FOTOT/ Liceu i Tiranës ndryshon pamje

27 Tetor 2016, 11:50Sociale TEMA
FOTOT/ Liceu i Tiranës ndryshon pamje

Nga sot, artistët e ardhshëm të Liceut Artistik “Jordan Misja” do të mësojnë dhe ushtrojnë talentin e tyre në ambiente e kushte dinjitoze. Bashkia e Tiranës përfundoi projektin e rikonstruksionit të plotë të godinës së shkollës së artistëve, ambientet e reja të të cilit u përuruan sot në një ceremoni ku morën pjesë Kryeministri, Edi Rama, kryetari i Bashkisë së Tiranës, Erion Veliaj, Ministrja e Arsimit dhe Sportit, Lindita Nikolla, Ministrja e Kulturës, Mirela Kumbaro, si dhe pedagogë e nxënës të shkollës.

Në fjalën e tij përshëndetëse, kryeministri Rama theksoi se pavarësisht se Liceu Artistik konsiderohet si një ndër vatrat më të çmuara të ekselencës shqiptare, ai ka qenë jashtë vëmendjes së investimeve, duke degraduar me kalimin e viteve. Prandaj, Rama vlerësoi faktin që pas shumë vitesh, Bashkia e Tiranës e rikonstruktoi plotësisht shkollën, ku kanë mësuar disa nga emrat më të njohur të artit shqiptar dhe botëror.

“Shkolla ka përjetuar një rrënim të vazhdueshëm për shkak të mungesës së plotë të vëmendjes dhe fatkeqësisht unë nuk arrita dot të bind njeri, lart në qeveri, se duhej bërë një investim masiv në këtë shkollë qysh në atë kohë, pasi që nga pianot që janë instrumenti bazë i shkollës, e deri tek atelietë e arteve vizuale, gjithë lënda e parë me të cilën punojnë nxënësit dhe mësuesit e liceut, duhet të ishte vërtet e vjetër në pikën që nuk krijonte më ato kushte pa të cilat është e pamundur të kërkosh cilësi. Sidoqoftë, kaluan jo pak vite, por ja dolëm që më në fund, mbas kushedi se sa dekadash, liceu të ketë pianot e reja, të ketë klasat dhe atelietë e reja, edhe pse projekti është ende i paplotë, pasi duhet me patjetër të plotësohet me sallën e re të koncerteve, të audicioneve, të aktiviteteve që liceu i ka të gjithë mundësitë të bëjë edhe për komunitetin jashtë mureve të tij”, u shpreh kryeministri Rama.

Ai siguroi se falë bashkëpunimit qeveri-bashki do të bëhet e mundur edhe realizimi i investimeve plotësuese në këtë shkollë, në mënyrë që t’u lihet më pas mësuesve dhe nxënësve për të bërë më të mirën për të rritur cilësinë përmes studimit të posaçëm dhe intensiv, që në këtë shkollë ka qenë gjithmonë traditë. Ndërsa kryetari i Bashkisë së Tiranës, Erion Veliaj, shprehu kënaqësinë që falë këmbënguljes, bashkëpunimit dhe vullnetit për t’i dhënë artistëve të rinj një ambient normal për zhvillimin e aftësive të tyre artistike, u bë e mundur realizimi i rikonstruksionit të kësaj godine.

“Ka dy kategori njerëzish në vendin tonë: ka njerëz që prodhojnë, dikush prodhon muzikë, dikush prodhon art, dikush prodhon punë konkrete dhe ka njerëz që gjithë ditën komentojnë, flasin, japin mend se si bëhen gjërat. Ne kemi zgjedhur të jemi te kategoria e parë, si bashki, si qeveri, si drejtues të liceut, ju si liceistë dhe si njerëz që besoni më shumë te një produkt konkret, te një vend si ky që prodhon art, gjëra të bukura, dashuri, energji pozitive për qytetin

tonë, se sa të jemi te tufa e qaramanëve dhe kritikëve. Por, vendi ecën përpara vetëm me një gjë: vetëm me punë konkrete dhe me angazhim tek ajo që kemi me pasion”, tha Veliaj.

Kryebashkiaku i Tiranës tha se ishte e pafalshme që një institucion i tillë, i cili ka nxjerrë mjaft artistë, të cilët e kanë çuar emrin e Shqipërisë në arenat më të mëdha dhe të rëndësishme të artit botëror, ishte lënë në një gjendje të mjeruar. “Kur kam ardhur herën e parë dhe pashë që në hollin e hyrjes së shkollës ishte puseta e ujërave të zeza thashë: Si ka mundësi? Si mund të jemi një komb me dy standarde? Si ka mundësi që rrahim gjokset dhe themi ‘O sa mirë me qenë shqiptar’, kur Inva Mula, Sajmir Pirgu, Tedi Papavrami apo Ermonela Jaho ia dalin të kenë sukses jashtë, kurse puseta e ujërave të zeza është e hapur m’u në mes të Liceut? A nuk jemi një shoqëri me dy standarde nëse nuk e korrigjojmë këtë? Ndaj më vjen mirë që me këmbënguljen e kryeministrit, ministres së Arsimit, ministres së Kulturës dhe punën e bashkisë, sot kemi një rezultat perfekt sepse ajo që themi është ajo që bëjmë”, shtoi Veliaj.

Ai u shpreh i sigurt se tashmë, falë edhe këtij investimi, kjo shkollë do të nxjerrë edhe më shumë artistë, që nesër do jenë krenaria jonë kombëtare. Ndërkaq, Veliaj njoftoi se edhe shkolla “Kosova”, që gjendet në këtë lagje, do t’i nënshtrohet rikonstruksionit shumë shpejt. Liceu artistik “Jordan Misja” është krijuar në janar të vitit 1947. Aktualisht aty mësojnë rreth 900 nxënës të profilizuar në degët e arteve figurative dhe muzikore, si dhe klasat e përgjithshme. Ndërhyrja në shkollë u realizua me investim nga Fondi Shqiptar i Zhvillimit, ndërsa rikonstruksioni ka prekur fasadën kryesore, fasadat e brendshme për shkak të lagështirës, hidroizolimin e kateve, tualetet, dyert e dritaret, sistemin e mbrojtjes kundër zjarrit, ngrohjen e shkollës, gjelbërimin e territorit të jashtëm si dhe terrenet sportive.

4 komente në “FOTOT/ Liceu i Tiranës ndryshon pamje”

  1. Alda says:

    Shume bukur duket. Vetem se kur vjen puna te sherbimet dhe gjerat qe duhet te funksionojne i lene ne dite te hallit.

    Tualetet dhe mirembajtja e tyre jane tmerr kudo, ne shkolla e ne ambientet e administrates.

    Nje foto te na kishit vene ketu ti shihnim cfare ndryshimesh i kane bere.

    Duhet bere reforme sic u be ne vitet 92, ne tualetet e shtepive.

  2. Beni says:

    Po kete Kumbaron per ca e do…pu pu pu! Eshte grifsha e grifshave, vetem per menyren e komunikimit ne institucion duhet ta zhduk nga administrata jo me si ministre.

  3. Plaku Xhuxhumaku says:

    O Zot na shpeto nga ky megalloman, arrogant, cinik dhe mendje pjerdhur! Gjithashtu, Poshte edhe Sali Berisha!

  4. GK says:

    Kushdo qe do ta kishte bere me pare do ti kisha dhene nje falenderim te madh , tani u realizua, shume shume falenderime te kesaj Bashkie nen drejtimin e qeverise Rama.Kam studiuar per 11 vjet ne kete shkolle te artit dhe kultures, ashtu si edhe Edi Rama te dy kemi dale nga bangat e kesaj shkolle me HISTORI te madhe . Ju lumte zoti Erion per shume pune te vyer dhe pak LLAFE te deklaruara. JU LUMTE. Mesi pres te shkoj ne Tirane dhe te shmallem dhe te marr shume kujtime. O zot kur e kam pare ne kohen e Saliut me kaardhe per te qare, nje dhimbje e vertete. Ju lumte qeverise per kete veper te ARTIT DHE KULTURES . Nje deshire pres nga QEVERIA E RAMES sepse ajo qeveri e mepareshme qeveri BANDITESH dhe HAJDUTESH qe e katandisen HOTEL DAJTIN ne ate derexhe,…………….. Ju lutem rregullojeni si te doni prone e bankes apo prone e shtetit , le te kthehet ne gjendjen e pepareshme. Ajo ka HISTORI………………….. te gjithaneshme…………….. e projektuaj nga njeri prej arkitekteve te famshem ITALIANE me emer ne BOTE. Fat qe e kemi te pa rrenuar plotesisht !!!!!!!!!!!!!!!!!!!!!!!! PUNE TE MBARE !!!!!!!

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje