"Universiada", Veliaj: Vitin e ardhshëm në Parkun Olimpik, hapësira më fantastike dhe moderne që do kemi

11 Nëntor 2016, 13:41Sociale TEMA
"Universiada", Veliaj: Vitin e ardhshëm në Parkun Olimpik,

Nën kujdesin e Bashkisë së Tiranës, studentë nga 26 universitete publike dhe private do të marrin pjesë në garën sportive, “Universiada 2016”. Si një nga politikat e Bashkisë së Tiranës, për përparësinë që duhet të ketë gjallërimi i jetës së të rinjve, nëpërmjet aktiviteteve sportive, qëllimi i këtij aktiviteti është që, përmes zhvillimit të garave sportive, të forcohet bashkëpunimi ndërmjet të gjitha universiteteve.

Në nisje të garës, kryetari i Bashkisë së Tiranës, Erion Veliaj, ftoi të gjithë qytetarët që të jenë pjesë e aktiviteteve sportive që po zhvillohen te Pallati i Sportit. “Dua t’ju uroj shumë suksese! E di që kjo është një garë, e di që të gjithë dëshironi fitore, e di që kupat janë të kufizuara, por është e rëndësishme që të marrin pjesë të gjithë. Besoj që në sport nuk fitohet vetëm një kupë ose një medalje, ndërtohet karakter, mësohet si humbet, mësohet edhe si fitohet. Në Shqipëri kemi nevojë të mësojmë se si të jemi fitimtarë të përulur, por edhe kur humbasim, të kuptojmë që nuk është fundi i botës. Ngrihemi, edhe luftojmë prapë”, theksoi Veliaj.

Kryebashkiaku Veliaj dha një lajm të mirë për të gjithë sportistët dhe dashamirësit e sportit, duke njoftuar se vitin e ardhshëm “Universiada” do të zhvillohet te Parku i ri Olimpik, i cili do të jetë një hapësirë moderne dhe një nga parqet olimpike më të bukura në rajon. “Vitin tjetër ‘Universiada’ do të jetë te ‘Parku Olimpik’,  që do të jetë hapësira më fantastike, moderne që ne kemi, ndoshta një nga parqet olimpike më të bukura në rajon dhe do të kemi realisht ndeshje dhe lojëra cilësore. Dua t’ju ftoj të gjithëve, një vit si sot, për “Universiadën” e dytë, ku do të takohemi të gjithë te “Parku Olimpik” pranë Liqenit të Tiranës”, tha ai.

Dita e parë aktivitetit u zhvillua në ambientet e Pallatit të Sportit “Asllan Rusi”, si dhe në Sallën e Lojërave pranë Universitetit të Sporteve Tiranë, ndërsa dita e dytë pranë kompleksit “Tirana” në afërsi të Ish-Frigoriferit Tiranë.

Gjatë këtyre dy ditëve do të zhvillohen gara sportive në:

Volejboll femra & Meshkuj

Basketboll Femra & Meshkuj

Minifutboll meshkuj

Beach-volley Femra & Meshkuj.

Partnere e Bashkisë së Tiranës në këtë organizim është Departamenti i Edukimit Fizik dhe Sporteve Universitare pranë Universitetit të Tiranës.

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje