Testi, a është i lirë Lulzimi dhe Berisha?

Mero-BazeNga Mero Baze

 

I gjithë debati që opozita provokon me dështimet e drejtësisë, është në të vërtetë kundër saj. Të ankohesh se drejtësia po dështon, se po lirohen njerëz në mënyrë të dyshimtë, apo nuk po ndalohen të tjerë, do të thotë të kesh uri për drejtësi, që sigurohet vetëm nga ligji i “Vetting”-ut, i cili verifikon një për një gjyqtarët dhe prokurorët që na kanë sjellë në situata të tillë. Opozita jonë e ka bllokuar këtë ligj dhe po gëzohet me pasojat e krimit të saj.

Ajo po gëzohet që Lulzim Berisha është i lirë, por sipas saj, jo prej drejtësisë, por prej Vangjush Dakos. Ajo po gëzohet që Klement Balili është i lirë, por sipas saj, jo prej drejtësisë, por prej një polici që i paska dërguar sms.

Kjo qasje e opozitës ndaj drejtësisë, të cilën po e mbron si koorporatë krimi dhe po bën politikë me krimet e saj, është në fakt identiteti kriminal më i rrezikshmi i gjithë kohërave në politikën shqiptare.

Edi Rama nuk është një ëngjëll dhe as ndonjë politikan që nuk ka notuar në ujërat e pista të “njerëzve të fortë” të këtij vendi,  por fakti që është i lirë të votojë “Vetting”-un dhe të bëjë dalje llumin nga politika dhe drejtësia, do të thotë se ka fuqi të jetë njeri i lirë.

Qasja  e opozitës, e cila kërkon që drejtësia të mos preket, por qeveria të mbajë përgjegjësi për viktimat e drejtësisë së korruptuar, është një instikt përdhunuesi, që vetëm Berisha mund ta injektojë nga jeta shtazore, në politikë.

Vangjush Dako mund të mos jepte pëlqimin që Lulzim Berisha të kryente shërbimin e provës vullnetare në Bashkinë e Durrësit. Sidomos po të kishte pak nuhatje politike më shumë, nuk duhet ta bënte. Edhe Lulzim Basha mund të ketë firmosur si bashkiak letra të tilla për të dënuar që duhet të kryejnë punë në komunitet. Por kjo nuk i ka mundësuar Lulzim Berishës, lirimin para kohe nga burgu, dhe as atyre për të cilët firmosin bashkiakët. Siç e raporton në mënyrë korrekte një investigim i BIRN, Lulzim Berisha është i lirë për shkak të një sërë vendimesh gjyqësore, të cilat kanë krijuar mundësinë që ai të jetë i lirë, nga një ish i dënuar me burg të përjetshëm.

Nuk e dimë ende sa të drejtë kanë pasur gjyqtarët në vendimet e tyre, pasi na mungon një institucion verfikimi për gjyqtarët, që është “Vetting”-u . Për një drejtësi që jep vendime të tilla, ka vetëm një zgjidhje, dhe ai është “Vetting”-u. Vetëm ai ligj na jep mundësi të hetojmë dhe të nxjerrim nga sistemi ata që marin vendime të dyshimta. Kush është kundër “Vetting”-ut, është pro rasteve të tilla në drejtësi.

Klement Balili mund të mos i ikte drejtësisë, tani që për atë ka një urdhër arresti. Muaj më parë Prokuroria, edhe pse i qenka kërkuar nga autoritetet amerikane të DIA në Athinë, që ai të ndalohej, nuk e kanë bërë, pasi nuk kanë pas prova ligjore. Tani e kanë bërë. Tani faji për mosndalimin e tij është një tërkuzë që tërhiqet mes policisë dhe Prokurorisë. Ne nuk e dimë kush ka më shumë përgjegjësi, por ka një mënyrë që ne t’i ikim këtij realiteti dhe ai është ligji i “Vetting”-ut.

Ata që e pengojnë atë ligj, dhe ata që duan që drejtësia të jetë peng i klientelizmit, natyrisht nuk e votojnë atë ligj.

I gjithë debati se kush është me kriminelët dhe kush është me drejtësinë, ka vetëm një pasqyrë ku duket qartë, dhe ai është ligji i “Vetting”-ut.

Kush voton atë është i lirë dhe ka fuqi të përballet me krimin, kush e bllokon dhe kërkon të ruajë drejtësinë kriminale në këtë vend, është skllavi real i krimit në Shqipëri. Dhe kjo pasqyrë rri varur për muaj të tërë në fasadën e Gjykatës Kushtetuese, ku tetë gjyqtarë nuk kanë fuqi të ngrejnë dorën kundër krimit në drejtësinë shqiptare.

Ky është testi real sa të lirë janë ata, të cilët në traditën e tyre mendojnë se kur e ke mbiemrin Berisha, nuk dënohesh po vrave. Ua kujtoi para dy ditësh përsëri vetë Berisha, duke shpalosur planet e parealizuara për vrasje më 21 janar. Ky është testi se sa të lirë janë Lulzimi dhe Berisha për të qenë ndryshe nga Lulzim Berisha!

REMOTE_ADDR:[]
                 Loading...