E denjë për skenar filmash! Rusët në Pashaliman: Erdhën si gazetarë, u dëbuan si spiunë

18 Janar 2017, 21:01Kronika TEMA

Rusi, Ballkan, bazë ushtarake, heshtje zyrtare! Një ngjarje e denjë për skenaret e filmave të spiunazhit ka ndodhur tre muaj më parë në Shqipëri. Ashtu si në romanin e Kadaresë, lufta e ftohtë është ringjallur sërish në Pashaliman.

Një grup shtetasish rusë janë ndaluar nga Policia e Vlorës në bazën e Pashalimanit. Zyrtarisht, askush nuk jep asnjë informacion mbi këtë ngjarje të ndodhur tetorin e kaluar. Por edhe burime të rezervuara japin versione të ndryshme, duke nisur nga numri i personave të përfshirë.

Top Channel ka mësuar se më 14 tetor të vitit të shkuar disa shtetas rusë dhe një shoqërues shqiptar janë ndalur nga policia. Ata janë prezantuar si gazetarë, pjesë e televizionit “Kanali 5”, me seli në Shën Petërburg dhe kanë pasur për qëllim realizimin e një dokumentari mbi pasojat që sjell anëtarësimi në NATO i vendeve të Ballkanit Perëndimor.

Në mesin e tyre ishte dhe Sergej Belous, një emër jo i panjohur në mediat ruse. Belous, një muaj para kësaj ngjarjeje ishte ndaluar në Kosovë, ndërsa rreth 3 vite më parë u raportua se ai ishte arrestuar nga autoritetet ukrainase.

Ndalimi i tyre konfirmohet si nga burime ushtarake, policore por edhe diplomatike, por konstatimet e secilës palë janë kontradiktore. Burime nga ushtria thonë per Top Channel se kanë qenë 3 turistë që vizitonin mozaikun e Orikumit.

Mozaiku ndodhet midis kufirit të parë dhe atij të dytë të bazës dhe lejohet çdo turist ta vizitojë. Ata shtojnë se, edhe sikur të merrnin foto prej aty ku ishin, ato foto nuk do të ishin më të sakta sesa ato që gjenden në internet.

“Atyre u janë kontrolluar aparatet dhe për sa kohë që s’kanë pasur asgjë kompromentuese janë lënë të lirë, por nën survejim, siç kanë qenë edhe para se të vizitonin Orikumin”, thonë burime inteligjente ushtarake për Top Channel.

Por një tjetër variant kanë burimet policore. Sipas tyre, dy fuoristrada me xhama të zinj me 5 shtetas rusë kaluan traun e postobllokut të Pashalimanit në muajin tetor.

Ata paraqitën kërkesë që të shihnin parkun turistik të Orikut. Por më pas, sipas të njëjtave burime, ata shkuan sipër bazës deri tek Kepi i Gjuzës.

Shërbimi i policisë ushtarake nisi ndjekjen e rusëve dhe bashkë me policinë shqiptare u bashkuan oficerë amerikanë që ndodheshin në bazën e Pashalimanit, duke i ndaluar ata në Fier. Në makinë rusëve iu gjetën aparate fotografike. Sipas burimeve policore, të pestë ata u shoqëruan direkt në aeroport dhe u dëbuan.

Top Channel iu drejtua Ambasadës së Federatës Ruse në Tirane lidhur me këtë ngjarje. Në përgjigjen e saj pohohet thelbi i ngjarjes se: “3 gazetarë rusë nga “Kanali 5” dhe shoqëruesi i tyre shqiptar iu drejtuan Ambasadës për ndihmë më 14 tetor 2016, pasi ishin ndaluar nga policia shqiptare në Vlorë. Gazetarët u liruan për arsye se nuk zhvilluan asnjë veprimtari të paligjshme”.

Por sipas ambasadës, rusët e ndaluar nuk u përzune nga Shqipëria nga aeroporti i Rinasit. “Pas lirimit, pjesëtarët e ekipit të xhirimit u nisën vetë për në Malin e Zi për të pasqyruar ngjarjet në prag të zgjedhjeve parlamentare të mbajtura në këtë vend më 16 tetor 2016”, vijon reagimi i selisë diplomatike.

Po ashtu, Ambasada Ruse në Tiranë shton se, komentet e bëra mbi faktin se personat e ndalur ishin “agjentë rusë të maskuar si gazetarë” janë tërësisht spekulime dhe se Sergej Belous nuk është shtetas rus, por ukrainas.

Prej asaj kohe, baza e Pashalimanit është vënë nën ruajtjen e Gardës së Republikës. Në fund, vetëm një gjë është e sigurtë, rusët erdhën, u ndaluan dhe ikën, sërish si dikur, po në Pashaliman.

5 komente në “E denjë për skenar filmash! Rusët në Pashaliman: Erdhën si gazetarë, u dëbuan si spiunë”

  1. berti says:

    Opinioni publik duhet të dijë të vërtetën ! Personalisht kam vënë re se Top-i jep shpesh lajme të pavërteta të porositura nga instancat më të larta të shtetit.

  2. shqip says:

    Nuk eshte çudi qe ne shqiperi te hyje” derri dhe dosa” . I vetmi qe i shkonte edhe zogjte ne skaner, ishte shteti Enverit. Po edhe Nese dikush do bente fotografi, ne zrinas do shkonte nje nga ato xhipat , e dikush do ti thoshte ” turistit” materialet qe ke ne rrulin e aparatit, Jane servirur nga autoritet shqiptare.

  3. Raimond vlonjati says:

    Po si ka mundesi , qe as Tema qe esht nje aficionados i pushtetit nuk jep dot lajm te sakte per kete ngjarje ?

    Duket qe vjen era kjo pune
    Po cudia esht pse nuk ua sekuestruan filmat te pakten ?

  4. kimi says:

    uroj qe ne te ardhmen te vine sa me shume muzhik stepash te vizitojne jo vetem rrenojat por edhe plazhet.

  5. Fakti says:

    O PARANOJAKE,LATE NAM FLISNI PER. ISH BAZEN QE ESHTE KATANDISUR NE PENEVREKE te ERDOGANEVE o PALLE DRURI.ATY LIGJIN E BEN BABA TURKU PEDERASTI

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje