Radhën e ka Vlora! Projekt i ri për restaurimin dhe rikualifikimin urban të “Qendrës Historike" të qytetit

30 Janar 2017, 15:46Turizëm TEMA
Radhën e ka Vlora! Projekt i ri për restaurimin dhe rikualifikimin

Pas Beratit, Krujës, Shkodrës, Korçës, Gjirokastrës,  tashmë radhën e ka qyteti bregdetar i Vlorës që të rilindë përmes trashëgimisë kulturore. Pas një pune të gjatë dhe konsultimeve të bëra projekti  për “Restaurimin dhe rikualifikimin urban të ansamblit ndërtimor “Qendra Historike Vlore”, është drejt finalizimit duke i hapur rrugën kështu restaurimit, konservimit dhe rehabilitimit të vendbanimeve tradicionale dhe  zonave të trashëgimisë kulturore.

Ky projekt bëhet i mundur falë bashkëpunimit teknik dhe financiar me Fondacionin Shqiptaro-Amerikan për Zhvillim, sipas të njëjtit model me të cilin është punuar për rijetëzimin e Pazarit të  Korçës, të Krujës, Gjirokastrës.

Është tashmë i njohur programi i Qeverisë shqiptare që udhëhiqet nga Ministria e Kulturës, për rijetëzimin e qendrave historike dhe kthimin e tyre në pole jo veç tërheqëse për turistët por dhe për t’i dhënë hov zhvillimit ekonomik të zonës.

Së fundmi në qytetin e Vlorës u zhvillua një takim i përbashkët dhe vizitë në terren midis përfaqësuesve të Institutit të Monumenteve të Kulturës, Fondit Shqiptaro-Amerikan të Zhvillimit AADF, Drejtorisë Rajonale të Kulturës Kombëtare Vlorë, Bashkisë Vlorë  dhe studios projektuese Atelier 4, ku u diskutua më konkretisht rreth detajeve të këtij projekti, i cili  financohet nga AADF në bashkëpunim me Ministrinë e Kulturës, Institutin e Monumenteve të Kulturës dhe Bashkinë Vlorë.

Zona për të cilën po hartohet projekti është zona ku qyteti i Vlorës ruan ende gjurmë të ndërtimeve të fundit të shekullit të 19‐të dhe fillimit të shekullit të 20‐të. Brenda kufijve të zonës së projektit ndodhen disa monumente kulture të kategorisë së parë si edhe rruga më e rëndësishme e qytetit për nga vlerat arkitektonike‐historike që mbart: rruga “Justin Godard”.

Rruga Justin Godard ka qënë rruga kryesore e qytetit në periudhën e Rilindjes së Pavarësisë Kombëtare. Cepi perëndimor i saj të nxjerr tek Sheshi i Flamurit, kurse ana lindore në Lagjen Partizani në drejtim të Babicës ku ka shumë foto të hyrjes së luftëtarëve më 1920. Shtëpitë janë me dy kate, me ballkone të vegjël të stilit neoklasik. Degëzimet e rrugëve sekondare të çojnë tek ish-pazari, “lagjja e hebrenjëve”, klubi “Laberia” dhe ish-Sinagoga. Në fund, nga ana lindore ka qënë dhe xhamia e Tabakëve, më e madhja e qytetit. Rruga ka patur disa ndërtesa shoqërore në shekullin e XIX, si një sahat (kullë) dhe Posta e qytetit. Kompleksi e ka marrë emrin nga juristi i njohur francez Justin Godard, i cili ka mbrojtur të drejtat e Shqipërisë në Konferencën e Paqes në Paris, më 1919. Godard ka qenë mik i shqiptarëve dhe ka ndihmuar dhe me fonde ekspeditën e arkeologut Leon Rey në Apolloni.

Nga ana arkitektonike ansambli paraqitet në formën e një vargu, i plotësuar me ndërtime pjesë-pjesë dhe ruan një pamje të njohur të qyteteve tona të kësaj periudhe, ku si funksion të katit përdhe dallohen dyqanet e ndryshme, kurse në katet e tjera ka patur gjithmonë banim. Ansambli është vënë në mbrojtje në vitin 1980. Që atëherë, ka patur punime të pjesshme restaurimi të herë pas hershme. Ky ansambël shfaqet me demtime si në fasada, po ashtu dhe në brendësi të godinave.

Parashikohet që punimet restauruese të fillojnë brenda pranverës dhe  do të mbikqyren nga Ministria e Kulturës dhe Fondacioni Shqiptaro- Amerikan për Zhvillim.

3 komente në “Radhën e ka Vlora! Projekt i ri për restaurimin dhe rikualifikimin urban të “Qendrës Historike” të qytetit”

  1. mirel says:

    Shume dakort. Kjo rruge eshte historike. Po per Vloren e vjeter nen pallatet e Pecos te stadiumi cdo beni?
    Flitet per histori mijeravjecare aty..

  2. Muzapopullore says:

    Mos Atelier 4 edhe ketu !!!!! Po keta per shtepine e tyre marrin arkitekte me pagese more vlonjate. Zotesia e tyre eshte vetem lidhja me piktorin.
    Keta tek projekti i burgut kishin bere qeli me Master Bathroom Toilets kurse tek projekti i rikonstruksionit te Teatrit Operas dhe Baletit kane futur nje piste vrapimi ne salle !!! Binjaket Eftibiu e perdorin plotterin per te hekurosur kemishet ndersa Alban Eftibiu per te bere nje vizatim ne shkallen 1/50 bleu tre shkalle metalike tek Megateku.. Holy smoke!!! Keta do bejne qendren historike te Vlores !!!!! Keta te vonuar i blejne “projektet” ne Ebay…….. dhe ja shesin Rames

    (Censura e Temes e dini vete)

  3. perkthyesi says:

    Po kenaqemi thjeshte me pamje, por jo nga ajo cfare duhet bere e duhej te ish bere!

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje