Federata Shqiptare e Futbollit ka bërë një marrëveshje me homologët maltezë në lidhje me fushën e arbitrimit.
Dy federatat do të shkëmbejnë me njëra-tjetrën arbitra për ndeshjet e Kategorisë Superiore dhe të Parë në Shqipëri dhe kompeticionet respektive në Maltë. Me anë të kësaj risie, FSHF synon të rritë nivelin e performancës së arbitrimit në vend në mënyrë që të zvogëlohen sa më shumë polemikat në lidhje me vendimet e tyre.
Megjithatë është për t’u çuditur një vendim i tillë duke qënë se kampionati maltez njihet si një nga kampionatet më të korruptuar në Europë. Çdo vit agjensitë e hetimit mbi trukimin e ndeshjeve nxjerrin dhjetëra ndeshje të trukuara nga skuadrat malteze, madje në vitin 2014 është arrestuar për trukime të ndeshjeve të kampionatit edhe një ushtar i forcave të armatosura malteze.
Duke parë numrin e lartë të trukimeve, në vitin 2014 agjensia “Sportradar” zhvilloi një tur sensibilizues në gjithë territorin e shtetit maltez me temën “Thuaji JO trukimit të ndeshjeve”, shkruan “Panorama Sport”.
Postimi i plote i FSHF-se.
Federata Shqiptare e Futbollit dhe ajo e Maltës kanë arritur një akord të përbashkët në fushën e gjykimit. Së fundmi është nënshkruar edhe një marëveshje ndermjet palëve për shkëmbim arbitrash në ndeshjet e ndryshme të kompeticioneve, si në Shqipëri, edhe në Maltë. Por, duke mos mbetur vetëm në këtë kuadër, por edhe në shkëmbimin e përbashkët të përvojë në fushën e gjykimit duke planifikuar kurse të ndryshme trainimi për përgatitjen e arbitrave, si në Maltë, edhe në Shqipëri. Nga ana tjetër sipas marëveshjes, arbitrat shqiptarë dhe ata të Maltës do të jene prezentë me paraqitjet e tyre në ndeshjet e Kategorisë Superiore, por edhe të parë, në të dy federatat. Gjithashtu, kjo marëveshje përfshin edhe prezencën e vëzhguesve të të dy palëve në ndeshjet e kategorive të mësipërme, shoqëruar kjo edhe më kurset e ndryshme të trainimit. Në këtë kuadër nuk do të mungojnë edhe gjykimet respektive në të dy kampionatet, sipas kërkesave të caktuara nga federatat përkatëse. Një marëveshje e tillë do të futet në funksion sa më shpejt dhe do të nisë menjëherë me një plan të detajuar bashkëpunimi mes sektorëve të të dy federatave.