Kujt i duhet çadra?

Share on FacebookShare on Google+Tweet about this on TwitterShare on LinkedInShare on Whatsapp

Nga Luljeta Progni

Kërkesa për zgjedhje të lira duhet të jetë pa asnjë dyshim e para në axhendën e protestave në Shqipëri. Zgjedhjet e lira janë kushti i domosdoshëm për të garantuar shtet ligjor e demokratik. Është fakt i gjithë pranuar se në Shqipëri nuk janë zhvilluar asnjëherë zgjedhje të lira. Asnjë proces zgjedhor nuk është vlerësuar deri më sot, si një proces i rregullt dhe i drejtë, ku vota e shqiptarëve të ketë përcaktuar pa asnjë lloj dyshimi a tjetërsimi qeverisjen e ardhshme. Nga ky pikëvështrim kërkesa e opozitës është e përligjur.

Por, janë të paktën dy faktorë që e vënë në pikëpyetje legjitimitetin e protestës: Koha, në të cilën nisi dhe mënyra se si po transformohet kauza e garantimit të votës së lirë.

Kërkesa është aq e vonuar, sa nuk mund të ofrojë asnjë zgjidhje për kauzën e granatimit të votës së lirë dhe kjo e vë seriozisht në pikëpyetje legjitimitetin e protestës. Kanë kaluar pothuajse katër vjet nga zgjedhjet e fundit parlamentare dhe opozita u kujtua vetëm pak muaj para zgjedhjeve të ardhshme, duke pretenduar t’i japë peshën që i takon çështjes së garantimit të votës së lirë. Nëse opozita do të ishte e interesuar për standardin e zgjedhjeve, do të duhej ta kishte nisur betejën politike të paktën një vit më parë. Por në fakt, as që është kujtuar ta përmendë e jo më të nisë një aksion politik.

Vetë kryetari i PD-së, Lulzim Basha e di shumë mirë se është thuajse e pamundur të ndryshojë Kodi Zgjedhor dhe po aq i pamundur votimi me numërimin elektronik. Po ashtu, duket krejt i pamundur edhe vullneti i palëve për të garantuar lirinë e votës. Vështirë të besosh se shumica e drejtuar nga Edi Rama e Ilir Meta do të garantojnë zgjedhje të lira, sepse u provuan në 21 qershor 2015 për zgjedhjet vendore, si dhe në disa procese të tjera zgjedhjesh të pjesshme, ku blerja dhe manipulimi i votës ishin shqetësuese, madje u përmendën si faktor i rëndësishëm edhe në raportet e vëzhguesve ndërkombëtarë. Por edhe krerët e opozitës, gjithashtu kanë dëshmuar se nuk mund të organizojnë një proces zgjedhor pa këto fenomene.

Faktori tjetër që vë në pikëpyetje legjitimitetin e protestës është mënyra se si u organizua, si filloi dhe si po vazhdon. Fillimisht kryetari i PD-së, Lulzim Basha, deklaroi në një status në rrjetet sociale se i ftonte të gjithë shqiptarët të protestonin më 18 shkurt kundër padrejtësive, varfërisë, shëndetësisë që lëngon, arsimit të shkatërruar, drogës, krimit e të tjera. Një ditë më vonë ai shpjegoi se protestat e Rumanisë shërbenin si frymëzim për lëvizjen dhe se opozita do të pretendonte të njëjtën gjë që kërkuan edhe protestuesit në Rumani: rrëzimin e qeverisë. Një ditë para protestës kryetari i PD-së, Lulzim Basha përsëriti thirrjen: “Protesta e nesërme është bashkimi me i madh i qytetarëve kundër padrejtësise, kundër keqqeverisjes, kundër varfërisë….” Më pas e moderoi qëndrimin në postimin e videos së parë nga protesta me diçiturën: “Qendresa jonë për zgjedhje të lira”. Në vijimësi  në të gjitha mediat, e vetmja kërkesë që po përcillej ishte vetëm kjo: garantimi i zgjedhjeve të lira dhe sipas Bashës kjo mund të arrihet vetëm me një qeveri teknike.

Vetë protestuesit mund të jenë ç’orientuar pak nga mosartikulimi i qartë i kërkesave, ndërsa frymëzimi nga protestat në Rumani mbeti thjesht një status në rrjetet sociale, gjë që dihej. Tek e fundit në protestat e rumunëve nuk kishte ndonjë flamur të forcave politike, përveçse atij rumun.

Ky devijim i paqartë i qëllimit të protestës, duke vendosur në plan të parë kërkesat e një force politike dhe anëtarëve të saj, solli edhe ndryshimin e qëndrimit të qytetarëve. Shqiptarët kanë dhjetra arsye për të dalë në atë shesh e për të protestuar. Keqeverisja në të gjithë komponentet e saj, ku dominon korrupsioni, ka rritur ndjeshëm varfërinë dhe ky është fakt që përmbledh të gjitha kërto arsye, pa i marrë ato me rradhë. Ndaj dhe sheshi i protestës do të duhej të ishte mbushur çdo ditë aq sa ishte më 18 shkurt, por qytetarët qëndruan në protestë vetëm atë ditë deri në orën 16.00.  Ata u larguan duke lënë pas çadrën e PD-së dhe partive të tjera opozitare, me deputetë që kanë qënë ministra për tetë vjet, ish-drejtorë të qeverisë Berisha e ish-zyrtarë të tjerë bashkë me bijtë e tyre. Ata po protestojnë për pushtetin e tyre dhe jo për lirinë e votës e as për hallet e qytetarëve. Vështirë të gjesh njerëz të mos e dinë se ajo çadër nuk është e protestës së qytetarëve, por e atyre që nuk ndjehen të sigurt pa qenë në pushtet dhe e kërkojnë atë me çdo kusht, edhe nëse do të duhet të vazhdojnë t’i luten Ilir Metës.

Ja si protestohet në Rumani:

Ja si protestohet në Shqipëri:

Share on FacebookShare on Google+Tweet about this on TwitterShare on LinkedInShare on Whatsapp
REMOTE_ADDR:[]

4 komente në “Kujt i duhet çadra?”

  1. Geri NYC says:

    Artikull i pavlere,ne Rumani populli ka dale ne shesh pasi qeveria atje beri nje ligj qe amnistonte te korruptuarit pas refromes ne drejtesi. Ketu qeveria mbeshtet refromen kurse opozita ka dale kunder. Prandaj perpjekja per ti barazuar eshte qesharake. Korrupsioni,krimi, liria e zgjedhjeve e gjithcka tjeter ka lidhje me Reformen ne Drejtesi,vetem pasi te implementohet reforma mund te kete rezultate ne keto fusha,ndryshe nuk ka rendesi kush eshte ne pushtet e sa shume do luftoje korrupsionin,krimin etj,perpjekja do ishte e kote pa pastruar institucionin e drejtesise.

    Artikull NUL.

  2. koha jone says:

    Shume e drejte , kjo lloj proteste me sufllaqe , pica , tallava , nuk eshte pare dhe degjuar ne asnje shtet .

  3. shaqo says:

    Sa shume pula qe kakarisin ne strofullen e PD?
    E thone dhe ato nga nje fjale, kakarisin, bejne apo nuk bejne ndonje veze.
    Sa poshte ka rene steka e PD.

  4. Jezerca says:

    Zgjedhjen nuk jane te lira per nje fakt te thjeshte: Qytetaret shqiptare jane te imponuar me ligjin zgjedhor te votojne siglat e partive nepermjet te cilave shprehet vullneti i olirgakeve te partive garuese ne zgjedhje,per te zgjedhur ato individe ( deputet ) qe permbushin interesat e tyre neopotike,krahinaliste,familjare e mbi te gjitha kriminale. Basha kete duhet te beje,te ndyshoj ligjin zgjedhor ne favore te vullnetit te sovranit qe Ky te ndjehet i lire qe te zgjedhe perfaqsuesit e tij ne Kuvend. Basha nuk mund ta beje kete, pasi eshte i kapur dhe nuk shkeputet dot nga strukturat e krimit pjelle e te cilave eshte.
    Ai po bene nje demagogji te paster.
    Qytetaret shqiptare duhet te bejne shume kujdes sa nuk eshte vone.
    Qeveria e ketij vendit ka shume aspekte te punes se Saj per te permiresuar ne funksion te rritjes se mireqenies materiale te qytetareve shqiptar.

Lini një Përgjigje

Adresa juaj email nuk do të bëhet publike. Fushat e domosdoshme shënohen *