INTERVISTA/ Flet Agron Duka: E vërteta e drekës me Metën dhe koalicionit me LSI-në

Share on FacebookShare on Google+Tweet about this on TwitterShare on LinkedInShare on Whatsapp

Intervistoi Andrea Danglli

Kreu i Partisë Agrare Ambientaliste Agron Duka, hedh më tepër dritë mbi letrën adresuar kryetarit të LSI-së Ilir Meta si dhe raportet që ka aktualisht me këtë forcë politike.

Në një intervistë dhënë për gazetën “TemA”, Duka pohon se apeli i pardjeshëm ndaj Metës ishtenjë vendim i marrë për t’i shërbyer zgjidhjes së krizës politike në vend.

Protestën e opozitës ai  e sheh si një pakënaqësi ndaj të gjithë qeverisë duke përfshirë këtu edheLëvizjen Socialiste për Integrim. Duka gjykon se  LSI-ja është po aq përgjegjëse për keqqeverisjen sa PS-ja dhe partitë e tjera të koalicionit.

I pyetur për krijimin e një “poli të tretë” mes partive të vogla siç aludohet në media, ai deklaron se nuk ka dijeni të ndonjë plani të tillë.

Më tej, kryetari i PAA-së siguron se në zgjedhjet e 18 qershorit, partia që përfaqëson do të shkojë krah opozitës së udhëhequr nga Partia Demokratike,  duke hedhur kështu poshtë zërat  për ndonjë bashkëpunim të mundshëm me Lëvizjen Socialiste për Integrim.

Z. Duka, a ka ndonjë deputet të pakënaqur në parlament i cili në zgjedhjet e qershorit ju ka shprehur vullnetin për të kandiduar nën emrin e partisë suaj?

Andrea, Partia Agrare Ambientaliste pothuajse i ka gati listat me kandidatët për deputetë dhe brenda këtyre ditëve në do të bëjmë prezantimin e tyre.  Janë të gjithë figura të spikatura dhe me reputacion publik, sidomos në zonat ku ata kandidojnë.

Ju i keni bërë një ftesë publike Ilir Metës pas një dreke që konsumuat së bashku. Ishte një kërkesë e tij kjo apo thjesht e kishit menduar më parë?

Faktikisht dreka e një dite më parë ishte diçka e rastësishme, ndërsa sa i përket letrës publike që i nisa kreut të LSI-së, e kisha menduar më herët si një lëvizje që ndoshta do t’i shërbejë zgjidhjes së krizës.

Unë bëra përpjekjen time dhe do të vazhdoj të angazhohem edhe me faktorë të tjerë deri në përmbushjen e kësaj kërkese legjitime të opozitës.

Pse zgjodhët t’i drejtoheshit Ilir Metës dhe jo Edi Ramës ?

Ilir Meta si bashkëkryetar i koalicionit qeverisës e ka artikuluar edhe më herët idenë e qeverisë teknike, prandaj letra i drejtohej pikërisht atij.

Dhe qeveria teknike është një garanci për zgjedhjet e ardhshme, në mënyrë që ato të jenë të lira e të ndershme. Kështu shmangim edhe kontestimet e mundshme pas shpalljes së rezultatit.

Kur protestoni kundra qeverisë, a është kjo edhe një pakënaqësi ndaj Lëvizjes Socialiste për Integrim e cila është pjesë e koalicionit qeverisës?

Ne e shikojmë qeverinë si një të tërë. Nuk mund ta parcelizojmë qeverinë, në të PS-së, LSI-së apo të partive të tjera që janë pjesë e mazhorancës. Natyrisht që edhe LSI-ja është po aq përgjegjëse për keqqeverisjen sa PS-ja dhe gjithë partitë e tjera.

Pse mendoni se e majta duhet t’i lirojë vendin të djathtës? Sipas jush, çfarë rigjenerimi kanë bërë në strukturat e tyre forcat politike të djathta që shqiptarët t’i besojnë sërish?

Mendoj se çështja nuk mund të shtrohet në këtë mënyrë, që njëra palë t’i lirojë vendin tjetrës sepse kështu anashkalojmë sovranin, i cili e ka në dorë rotacionin e pushtetit.

Janë qytetarët që duhet të vendosin me votë se kujt duan t’i delegojnë pushtet. Ne thjesht kërkojmë garanci që vota e qytetarëve të mos cenohet, që vullneti i tyre të mos tjetërsohet.

Nëse do kishit një ftesë nga LSI për koalicion, a do të bashkohej Partia Agrare Ambientaliste me të?

Partia Agrare Ambientaliste është pjesë e koalicionit opozitar të udhëhequr nga Partia Demokratike dhe në zgjedhje do të dalë si pjesë e opozitës. LSI është pjesë e qeverisë.

Shpesh herë media diskuton për një “pol të tretë” që mund të krijohet mes partisë suaj, asaj të zotit Blushi dhe disa partive të tjera të vogla. A ka pasur ndonjë plan të tillë për krijimin e polit të tretë politik?

Ne i kemi bërë të qarta prej kohësh qëndrimet tona dhe mendoj se s’duhet të ketë më vend për dyshime. PAA-ja është në opozitë me këtë qeveri dhe në zgjedhje do të dalë si pjesë e koalicionit opozitar të udhëhequr nga Partia Demokratike. Nuk jam në dijeni të ndonjë tentative për të krijuar “pol të tretë”. Partia Agrare Ambientaliste është  përqendruar tek protesta e opozitës dhe kërkesa për një qeveri teknike që do të garantojë zgjedhjet e ardhshme.

Eurodeputeti Knut Fleckenstein në një intervistë teksa komentoi protestën, ka thënë se opozita duhet të provojë akuzat për blerjen e votave me paratë e drogës dhe të krimit. 
A ka opozita prova për këto akuza? Dhe nëse i ka pse nuk i çon në Prokurori?

Nuk dua të komentoj deklaratat e eurodeputetit dhe të askujt tjetër, pasi tjetërsimi i votës në Shqipëri, shit-blerja e saj është një fenomen që e njohim të gjithë. Ne e pamë çfarë ndodhi në Korçë sapo kjo mazhorancë kishte ardhur në pushtet. E pamë çfarë ndodhi edhe në Dibër. Denoncimet në media ishin të shumta, madje edhe në prokurori. Kështu që mendoj se shit-blerja e votës është një çështje që duhet trajtuar seriozisht. Ne si klasë politike duhet të jemi bashkë për t’u ndarë njëherë e mirë nga ky fenomen i shëmtuar e kriminal.

Share on FacebookShare on Google+Tweet about this on TwitterShare on LinkedInShare on Whatsapp
REMOTE_ADDR:[]

Lini një Përgjigje

Adresa juaj email nuk do të bëhet publike. Fushat e domosdoshme shënohen *