PD rikthehet në identitet, Berisha dhe Topalli sulmojnë ndërkombëtarët dhe marrin në dorë drejtimin. Ka ‘humbur’ Lulzim Basha

Përplasja me ndërkombëtarët me sa duket është një punë e “rëndë” për Lulzim Bashën, kreun zyrtar të Partisë Demokratike. Ai nuk e përballon as ballafaqimin me ta, as përballjen me liderin historik të PD, dhe i mban me “gajret” të dyja palët, derisa të shtyhet situata më tej.

Sot për herë të fundit Lulzim Basha u pa në publik si i ashpër, teksa mallkonte Ramën dhe Metën për darkën që kishin konsumuar një natë më parë, si dy aktorët kryesorë të koalicionit qeverisës siç e kërkon normaliteti i një mazhorance që është ende pa e përfunduar mandatin e përbashkët qeverisës. Bëhet fjalë për mandatin e parë të maxhorancës së majtë.

Basha i mallkoi të gjithë, dhe ashtu si miku i tij Ilir Vrenozi, mallkues “profesionist”, tashmë është në “stanacijon”. Pikërisht atëherë kur duhej të ndërhynte në qetësimin e situatës në PD, në përballimin e goditjeve ndaj protestës që po vijon tash sa ditë, Basha zhduket nga qarkullimi. Asnjë fjalë, deklaratë apo kundërdeklaratë për tërë furtunën që është ngritur nga ndërkombëtarët kundër bojkotit të Kuvendit nga opozita.

Tashmë në “tapetin” e politikës kanë zbritur ato që fatkeqësisht mbeten “peshat” e rënda në PD, ish-kryeministri Sali Berisha dhe ish-kryetarja e Kuvendit Jozefina Topalli. Të cilët po përballën rëndshëm me ndërkombëtarët, gazetarët dhe gjithçka del para. Duke treguar qartë se kush komandon aktualisht në PD, më shumë se sa për të përballuar ftesat normale të komunitetit ndërkombëtar në kor që PD të lërë këtë protestë të panevojshme dhe pa motiv dhe të rikthehet në Kuvend.

Të rikthehet në komisione dhe në sallën e Kuvendit dhe të miratojë ligjet e reformës në drejtësi, të bashkëpunojë për zbatimin e kësaj reforme, të Vettingut dhe të kontribuojë për pastrimin e drejtësisë në Shqipëri dhe dhënien fund të pandëshkueshmërisë së zyrtarëve të lartë. Berisha e Topalli sulmojnë komisionerin Johanes Hahn dhe në veçanti reporterin për Shqipërinë Knut Fleckenstein që i kërkoi Berishës të lërë përrallat me sorosianë dhe komplotet me Soros dhe të kthehet në Kuvend.

Pra thirrja ka qënë për Berishën, ndërkohë që Basha është tashmë në qetësi, asnjë deklaratë dhe fatkeqësisht duke na treguar se kush e drejton realisht PD. Dhe kjo ndodh vetëm më pak se katër muaj para zgjedhjeve parlamentare të 18 qershorit, kur qytetarët shqiptarë do të shkojnë para kutive të votimit për të vendosur se kush do ta drejtojë vendin mandatin e ardhshëm./TemA

REMOTE_ADDR:[]
                 Loading...