Investimet në ekonomi u rriten me 14 % më 2015

24 Shkurt 2017, 09:25Ekonomia TEMA

Ndërmarrjet e të gjithë sektorëve i rriten investimet me 14 për qind më 2015 në krahasim me një vit më parë, sipas anketës strukturore të INSTAT.

Vlera e investuar arriti në 208 miliardë lekë.

Investitorët më të mëdhenj vijojnë të jenë ndërmarrjet e energjetikes dhe ujit. Më 2015 investimet në këtë sektor u zgjeruan me 13 për qind ose 7 miliardë lekë.

Gjithsej vlera arriti në 59 miliardë lekë ose 430 milionë euro.

Më 2014 dhe 2015 investimet gjithsej në këtë sektor arritën në 112 miliardë lekë.

Rreth gjysma e kësaj vlerë i dedikohet investimeve të kompanisë Statkraft, e cila vitin e kaluar finalizoi ndërtimin e HEC-t të Banjës në lumin Devoll, raporton Monitor.

Pavarësisht se më vlerë të vogël kompanitë shqiptare vitin e kaluar kanë dyfishuar investimet në sektorin e hotelerisë. Investimet arritën në 2.3 miliardë lekë nga 1.2 miliardë më 2014.

Fokusi i investimeve në sektorin e hotelerisë dhe turizmit ka ardhur në rritje kohët e fundit për shkak të ofertës gjithnjë e në rritje nga të huajt për të pushuar në Shqipëri. Kjo tendence u nxit së fundmi edhe nga pasiguria në Turqi e cila po orienton pushuesit drejt vendeve të tjera të Mesdheut.

Sektori që pa rënie dramatike të investimeve ishte industria nxjerrëse. Rënia me 2015 ishte 35 % krahasuar me 2014, e nxitur nga rënia drastike e çmimeve të naftës në tregjet ndërkombëtare. Shumica e kompanive që nxjerrin naftë në vendin tonë u përballen me kosto më të larta se çmimet. Si rezultat i kësaj situate kompanitë panë rënie të fitimeve dhe investimeve.

Ndryshe nga industria nxjerrëse, ajo përpunuese ka parë një dyfishim të investimeve. Të nxitura nga kërkesa e jashtme në rritje sidomos ndërmarrjet e fasonit janë zgjeruar ndjeshëm. Më 2015 në  linjat e industrisë përpunuese u investuan 21.1 miliardë lekë nga 9.8 miliardë lekë më 2014.

Investimet në sektorin e ndërtimit ranë gjithashtu. Moratoriumi i lejeve që është ende në fuqi për shumicën e qarqeve ka penguar investimet në sektor të cilat ishin 9 për qind më të ulta se më 2014.

Ndryshe nga treguesit e tjerë, prodhuesit e të mirave zënë pjesën më të madhe të investimeve të realizuara duke përbërë 61,8 % të investimeve gjithsej për 2015.

4 komente në “Investimet në ekonomi u rriten me 14 % më 2015”

  1. alda says:

    gjithnje e me shume po merren hapa shume te mire ne kuader te ekonomise eshte ne rrugen e duhur fale mbeshtetjes dhe reformat qe po kryen qeveria

  2. adi says:

    pavaresisht problemeve punohet fort per rritjen e investimeve ne vend dhe permiresimin e imazhin e te berit biznes ne shqiperi duke e kthyer ne nje vend atraktiv per investitoret

  3. fredi says:

    Nje lajm shume i mire invetsimet e huaja jane nje shtyse e madhe per ekonomine sjellin me shume vende te reja pune dhe permiresim te jetes se qytetareve, uroj te vazhdohet ne keteo hapa.

    1. erdis says:

      super pozitive menyra me efektive per me shume zhvillim dhe mireqenie

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje