OKB: Po kalojmë krizën më të madhe humanitare që prej 1945 në botë

11 Mars 2017, 14:04Sociale TEMA

Organizata e Kombeve të Bashkuara apelon për ndihmë sepse bota përballet me krizën më të madhe humanitare që prej vitit 1945 dhe një katastrofë e madhe është shumë afër.

Rreth 20 milionë vetë rrezikojnë të vdesin nga uria në Jemen, Somali, Sudanin e Jugut e Nigeri raporton shefi i çështjeve humanitare në OKB, Stephen O’Brien. Unicef-i e ka deklaruar tashmë se fëmijët që rrezikojnë të humbin jetën në këtë mënyrë, janë plot 1.4 milionë. Sipas O’Brien, që të shmanget fatkeqësia, deri në muajin korrik duhen mbledhur $4.4 miliardë dollarë.

“Jemi që tani në një pikë kritike të historisë. Që në fillimin e vitit, përballemi me krizën më të madhe humanitare të regjistruar ndonjëherë që nga krijimi i Kombeve të Bashkuara. Pa përpjekje të përbashkëta dhe të koordinuara globale, njerëzit thjesht do të vdesin nga uria e shumë të tjerë do të vuajnë, do të shuhen nga sëmundjet”, tha Stephen O’Brien, shef i çështjeve humanitare, OKB.

Një apel të ngjashëm e drejtoi muajin e kaluar dhe sekretari i Përgjithshëm i organizatës, Antonio Guterres.

Ai shpjegoi se pavarësisht premtimeve të mëdha, OKB-ja deri atëherë nuk kishte marrë veçse 90 milionë dollarë fonde.

Mjaft problematike paraqitet situata në Jemen, ku besohet se mesatarisht çdo 10 minuta, një fëmijë vdes nga sëmundje të parandalueshme, ndërsa gjysmë milioni të mitur në këtë vend vuajnë nga kequshqyerja akute.

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje