Rusia ndërhyn në punët e Shqipërisë? Basha informon ambasadorin Karpushin për situatën politike

Kryetari i PD, Lulzim Basha në kulmin e protestës kundër qeverisë përmes çadrës së ngritur afër kryeministrisë priti sot në selinë e Partisë Demokratike ambasadorin e Federatës Ruse, Aleksandër Karpushin.

Përmes një njoftimi të shpërndarë për mediat, thuhet se “gjatë takimit Basha iu përgjigj interesit të ambasadorit Karpushin mbi zhvillimet politike në vend”.

Burimet bëjnë me dije se Basha nuk ka munguar të shprehet edhe në lidhje me arritjen e realizuar në protestën kundër qeverisë.

Karpushin nga ana e tij nënvizoi se parimi bazë i politikës së jashtme të Rusisë, të cilit i qendron edhe Ambasada Ruse në Tiranë, është parimi i mosndërhyrjes në punët e brendshme të vendeve të tjera.

Basha dhe Karpushin shkembyen opinione edhe mbi zhvillimet në rajon.

Basha theksoi se njohja e pavarësisë së Kosovës dhe mbështetja për zbatimin e plotë të marrëveshjes së Ohrit në Maqedoni përmes aplikimit të dygjuhësisë nga Federata Ruse do të rihapnin një kapitull të ri në marrëdhëniet bilaterale.

Ambasadori Karpushin theksoi se Federata Ruse vlerëson se ekzistojnë mundësi të pashfrytëzuara për të rritur bashkëpunimin ekonomik pragmatik mes dy vendeve tona dhe shpreson se në të ardhmen të punohet për të rritur nivelin e këtij bashkëpunimi.

Karpushin shprehu besimin se një impuls të fortë shkëmbimeve dypaleshe ekonomike do t’i japë takimi në muajin prill në Tiranë i bashkëkryetarëve të Komisionit Ndërqeveritar Rusi-­Shqipëri për Tregtinë, Bashkëpunimin Ekonomik dhe Tekniko-­Shkencor, si dhe sesioni i ardhshëm i këtij Komisioni qe pritet të mbahet ne vjeshtë, kur të formohet qeveria e re shqiptare.

Basha dhe ambasadori Karpushin vlerësuan si konstruktiv një komunikim të tillë dhe vlerësuan se pikëpamjet e ndryshme në disa çështje nuk duhet të pengojnë përpjekjet për të eksploruar fusha të bashkëpunimit reciprok.

REMOTE_ADDR:[]
                 Loading...