Sekretari amerikan i Shtetit, Rex Tillerson, i bëri thirrje Koresë së Veriut që të braktisë programin bërthamor.
Tillerson takoi sot ministrin e Jashtëm të Japonisë, Fumio Kishida, në Tokio dhe shtoi se vendi komunist nuk duhet që të ketë frikë nga SHBA-ja.
Tillerson tha se duhet një “qasje e re” pas dy dekadave të, siç u shpreh, përpjekjeve të dështuara “për ta sjellë Korenë e Veriut në pikën e denuklearizimit”.
Në udhëtimin e parë në Azi si kryediplomat i SHBA-së, ai nuk dha detaje për mënyrën se si administrata e presidentit Donald Trump do ta trajtojë çështjen.
“Koreja e Veriut dhe njerëzit e saj nuk duhet t’iu frikësohen Shteteve të Bashkuara apo fqinjëve në rajon, që duan vetëm të jetojnë në paqe më Korenë e Veriut.
Duke pasur këtë parasysh, SHBA i bën thirrje Koresë së Veriut të braktisë programet me raketa bërthamore dhe balistike dhe të përmbahet nga çdo provokim tjetër”, tha Tillerson.