Partia Demokratike, duke filluar që nga e hëna e javës së ardhshme, do të përshkallëzojë aksionin e saj opozitar.

Intensifikimi i aksionit të PD-së do të nisë me bllokimin e rrugëve në të gjithë vendin ditën e hënë, midis orës 11:00-12:00, shkruan Panorama.

Këtë vendimmarrje Basha e konsultoi edhe me drejtuesit e PD-së në rrethe dhe aleatët e koalicionit opozitar, përpara se ta bënte publik në çadrën e demokratëve, në ditën e 62-të të protestës.

“Opozita e bashkuar, me në krye Partinë Demokratike, ka vendosur intensifikimin e protestës qytetare në të gjithë Shqipërinë, duke ruajtur si pishtar, si bërthamë, si monument të kësaj lëvizjeje, çadrën e lirisë, 24 orë në ditë, por duke e shtrirë atë në mbarë vendin.

Ditën e hënë, të gjithë qytetarët shqiptarë, të djathtë, të majtë, patriotë, të rinj, të reja, të moshuar, bashkohemi mes orës 11:00 dhe 12:00 në bllokimin total të trafikut kombëtar në të gjithë Shqipërinë”- tha dje Basha.

Ky përshkallëzim bëhet në ditën kur në Tiranë vjen njeriu i kancelares Merkel, për të negociuar dhe gjetur një zgjidhje për krizën politike në vend.