HISTORIA/ Martin Kaza, vrasësi shqiptar i dyfishtë që jetoi në Angli për 20 vjet me emër të rremë

9 Maj 2017, 19:52Kronika TEMA

Një vrasës i dyfishtë i cili u arratis nga Shqipëria dhe ka jetuar në Britani për gati 20 vjet, është në pritje të perfundimit te procesit te dëbimit drejt vendit te tij. Martin Kaza, 45 vjeç, vrau ne Shqiperi vëllezërit Dod dhe Augustin Gjini për “gjakmarrje”.

Kaza u arratis, por u dënua në mungesë të tij për vrasje dhe plagosje. Ai kërkoi azil në Mbretërinë e Bashkuar në vitin 1999 duke u paraqitur si shtetas kosovar me një emër të rremë. Ai u martua dhe kishte krijuar familjen me tre fëmijë në Angli. Kaza punoi në restorante, lavazhe e disa vende te tjera, teksa thuhet se ishte martuar atje me nje bashkekombase në vitin 2008, shkruan “The Sun”. Me 32 vjeçaren Majlina Dule ai ka tre fëmijë, pesë, shtatë dhe 13 vjeç.

Duke folur përpara gjykatës, Martin Kaza tha se ekstradimi i tij pas 18 vite së jetuari dhe punuari në Angli ishte i pajustifikuar, pasi shkelte të drejtat e njeriut, sipas Konventës Europiane për të Drejtat e Njeriut.

Po ashtu, ai i tregoi gjykatës se për t’iu shmangur familjes Gjini, me të cilën ishte në hasmëri, pasi në 1994, ata i kishin vrarë vëllain Ndue Kaza, oficer policie, ai ishte fshehur në Greqi. Martin Kaza, si pjesë të mbrojtjes për të shmangur ekstradimin i tregoi gjykatës se e kishin goditur 4 herë me thikë dhe kishte përfunduar në koma pasi ishte dëbuar nga Greqia.

Tani gjykatësi John Zani urdhëroi ekstradimin e Martin Kazës. Policia e arrestoi Kazen, nga Enfield, në veri të Londrës, këtë vit pasi Shqipëria lëshoi një urdhër ekstradimi ndaj tij.

Historia/ Nga vrasja e Komisarit në Rrëshen, tek hakmarrja në Kurbin 3 vite më vonë

Martin Kaza, 45 – vjeçari i arrestuar në Londër për një vrasje të dyfishtë në vitin 1997 në Kurbin pritet të ekstradohet në Shqipëri pas pak javësh. Do jetë Gjykata e Ekstradimeve në Londër që do të vendosë.

Por cila është zanafilla e konfliktit mes familjeve Gjini dhe Kaza?

Tvklan.al sjellë historinë e plotë të konfliktit, që nisi 23 vite më parë.

Qyteti i Rrëshenit, më datë 7 Janar të vitit 1994 u trondit nga vrasja e Shefit të Krimeve, Ndue Kaza. Ky i fundit u qëllua me armë zjarri në mes të qytetit nga Dod Gjini, i cili u largua nga vendngjarja. Shtypi i shkruar i kohës raportonte se vrasja ndodhi pasi Shefi i Krimeve ndërhyri për të shmangur përshkallëzimin e një konflikti mes dy grupeve rivale. Por 3 vite më vonë, pa arritur që autorët të arrestohen dhe familjet të pajtohen, në qytetin e Laçit  vëllai i Komisarit mori hak, duke vrarë 2 vëllezërit Dod dhe Agustin Gjini. Gazetat raportonin se ngjarja ndodhi  mesditën e 3 Korrikut të vitit 1997, ku sipas tyre, në atentat kishin marrë pjesë dy persona. Pas 4 vitesh, Gjykata e Kurbinit shpalli fajtor në mungesë për vrasjen e dyfishtë, Martin Kazën, duke e dënuar me 22 vite burg. Që prej asaj kohe, 45 – vjeçari u largua jashtë vendit dhe nuk u kthye më në atdhe. Ai u arrestua pak ditë më parë në Londër, ku jetonte nën identitetin e rremë kosovar, Naim Karagia.

9 Janar 1994- Gazeta Koha Jonë

Mirditë – Vritet Komandanti i Policisë Kriminale

Ditën e Premte, rreth orës 18:00 në qytetin e Rrëshenit qëllohet me pistoletë, Komandanti i Policisë Kriminale të rrethit të Mirditës, Ndue Kaza.

Vrasja erdhi si pasojë e grindjes së dy grupeve rivale mirditorësh në qytet. Në zënie e sipër, të dy grupet e të rinjve qëllojnë dhe vritet oficeri në fjalë.

Vrasësi kërkohet nga organet e Rendit të Mirditës, Lezhës dhe Laçit.

4 Korrik 1997 – Gazeta Koha Jonë

Laç – Vrasje në mesditë. Hakmarrje për dy vëllezër

Breshëri automatiku në mesin e pazarit të Laçit, dje rreth orës 13:00. Një 23 – vjeçar ka vdekur në vend dhe vëllai i tij 20 – vjeçar është plagosur rëndë, pas këtij atentati në zemër të qytetit.

Ndërkohë që tregtarët kanë lëvizur tezgat dhe janë larguar me shpejtësi nga vendngjarja.

Arsyet që kanë dërguar në vrasjen dy vëllezërve D.Gjini dhe A.Gjini mendohet të jenë për hakmarrje, pasi D. Gjini para dy vitesh kishte vrarë në Rrëshen Shefin e Krimeve Ndue Kaza, për këtë rreth.

Megjithatë do të jenë organet hetimore që do të vërtetojnë arsyen e vrasjes, ndërkohë që dy atentatorët janë larguar në drejtim të paditur.

Ngjarja ka ndodhur dje, rreth orës 13:00, kur dy vëllezërit Gjini kanë ndaluar pranë Pallatit të Kulturës, Laç me një makinë.

Me të hyrë në pazar, dy të rinj të pajisur me armë automatike, sipas dëshmitarëve okularë kanë qëlluar mbi dy vëllezërit.

Ndërkohë që Doda, 20 – vjeç ka ndërruar jetë në moment, i vëllai i tij 23 – vjeçar Agustini është plagosur rëndë dhe është dërguar urgjent në spitalin e qytetit. Më pas, ai është nisur drejt Spitalit Ushtarak në Tiranë.

19 Qershor 2001 – Gjykata dënon me 22 vite burg autorin

Gjykata e Kurbinit dënoi në mungesë Martin Z. Kazën me 22 vite burgim, për vrasjen e dy vëllezërve Dod dhe Agustin Gjini, por vendimi nuk u ankimua asnjëherë nga autori i vrasjes, i cili pas krimit ishte larguar nga vendi.

Në vendimin që tvklan.al disponon, gjyqtari Besnik Qira sqaron se një prej dëshmitarëve në gjyq ka rrëfyer se pas vrasjes është porositur nga xhaxhai i autorit, që sëbashku me një person tjetër të shkonte në shtëpinë e babait të viktimave dhe t’u çonte fjalë, sipas zakonit dhe kanunit, se: “Vrasjen e Dod e Agustin Gjinit e ka nga neve (nga Kaza), duke porositur që për vonesën e të dërguarit fjalë ishte bërë shkak se nuk kishin qenë në shtëpi Martin e Artan Kaza”.

Një tjetër dëshmitarë i plagosur në ngjarjen e “97-ës, Besnik Legisi, i shpjegoi gjykatës në atë kohë, se problemi i hasmërisë qëndronte në faktin se Dod Gjini i kishte vrarë të vëllain Martin Kazës dhe se me qëllim mbylljen e hasmërisë paraditen e ngjarjes është tentuar të realizohet një takim në qytetin e Rrëshenit, por pa sukses.

2 komente në “HISTORIA/ Martin Kaza, vrasësi shqiptar i dyfishtë që jetoi në Angli për 20 vjet me emër të rremë”

  1. emigrantja says:

    Kur u vra shefi i krimeve, shteti nuk i gjeti dot vrasesit ose vrasesin. U desh te kalonin edhe shtate vjet pa te jepej vendimi per vrasjen e vrasesve.
    pas 4 vitesh dhe te detyrohej tjetri te ike nga vendi se shteti nuk mbron as ata qe i sherbejne atij nen uniforme. Jo cdo njeri e ben ate qe beri vellai i shefit te krimeve, por edhe ai ka qene i ri ne ate kohe , dhe duhet cilesuar ai po zbatonte nje vendim te drejte ekzekutimi por i paautorizuar.

  2. Saranda says:

    Me vjen shume keq qe i shkoj i keshtu jeta e martinit
    NUK besoj te ken njofur djal me te mire dhe te urte se martini
    Kam qen me Martinin kure e Mori Lajmin I keq qe I vrane villain
    Une dhe martini punonim ne krete ne greqi mblidhnim ullinje per te jetuar
    Kriminelet I vran villain ne detyre
    NUK kishte rruge tjeter per martinin

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje