Megi Pjeshka, e cila u bë legjenda e çadrës për 90 ditë, i kërkoi dje Lulit një takim me gjashtë ministrat teknikë dhe zëvendëskryeministren.
Donte t’i njihte nga afër, pasi vetëm njërën kishte parë në çadër një ditë.
Luli ja plotësoi dëshirën dhe i thirri gjithë ministrat në takim me Megi Pjeshkën në çadër.
-Ja ku i ke, tha. Tani pyeti dhe kërko çfarë të duash.
Megi Pjeshka e nisi me të parën, që është zëvendëskryeministre.
-Kush je ti, i tha?
-Unë jam Lenida, i tha ajo.
-Ke qenë tek çadra?
-Jo zemër s’kam mujt me ardh se kam qenë ilegale. Na ka pas thënë kryetari mos me u duk se digjena.
Biles një kushërirën time e kam në shtab tek Ditmiri, mos me u kuptu.
-Ah po kuptova, i tha Megi Pjeshka.
-Po ju keni qenë tek çadra, pyeti Helgën?
-Unë jo. Kam pas detyrë me mbajt me muhabet Argitën, pasi stresohej shumë kur u shikonte që ju vuanit.
Isha gjysmë ilegale, se punoja dhe në Kontroll të Shtetit.
-Po ju, pyeti Gazmendin?
-Unë isha i zënë me ligjin e Vetingut në Kuvend dhe isha njeri teknik.
Nuk duhet të vija në çadër, i tha ai.
-E kuptova. Ilegal dhe ti.
-Po ju zonja Karabina?
-Mua më rruat mbiemri, se s’më la njeri të dilja në luftë, iI tha ajo. Më thanë rri ilegale.
-Po ti moj zonjushë, i tha Xhuljetës?
-Po unë jo të gjitha punët i bëj ilegalisht.
Këto të partisë i kam pas bë hapur.
Por më ka pas thënë Goni, do shkosh në çadër kur të them unë.
Dhe ai më tha ditën e fundit të çadrës, shko tako Lulin.
Shkova, më tha do të bëjmë ministre.
U mërzita në fakt, se doja tek CEZ, se për aty e kam pas CV-në.
Megi Pjeshka u trondit shumë nga e gjithë kjo.
Doli e mërzitur nga takimi dhe shkoi në zyrë të Lulit.
-Çfarë ke, i tha Luli? Pse je mërzitur?
-Si të mos mërzitem, i tha. Na paske marrë më qafë.
Na thoshe luftoni çdo ditë në çadër se do bëjmë Republikën e Re dhe ne ëndërronim.
Kurse këtyre që ke pas mikesha tamam, u paske thënë rrini ilegale.
Pse nuk më the dhe mua të bëhesha ilegale, po më le në çadër.
Do isha bë ndonjë ministre dhe unë.