Çmimi Nobel 2017 në Kimi shkoi për tre shkencëtarët që zhvilluan teknikën e mikroskopisë krio-elektron.
Sipas Komitetit vlerësues, metoda e sjellë nga shkencëtarët hap një epokë të re në biokimi dhe së shpejti do të mundësojë projektimin e imazheve të detajuara të mekanizmave komplekse të jetës.
Çmimi Nobel 2017 në Kimi i është akorduar Jacques Dubochet, Joachim Frank dhe Richard Henderson për zhvillimin e një teknike që lehtëson dhe përmirëson procesin e projektimit të biomolekulave në rezolucion të lartë.
Tre kimistët i bashkohen kështu listës prej 175 laureatësh të tjerë të kimisë të njohur që prej vitit 1901 dhe do të ndajnë mes tyre shpërblimin prej 1.1 milionë dollarësh.
Metoda e quajtur mikroskopia krio-elektron, e zhvilluar nga shkencëtarët, bën të mundur që biomolekulat të ngrihen shumë shpejt, duke bërë që të ruhet forma e tyre natyrore. Sipas profesorit Joachim Frank, përdorimet praktike të kësaj teknike janë të pafundme.
Komiteti i Nobelit argumentoi se ky zhvillim e çon biokiminë në një epokë të re, pasi së shpejti mund të kemi imazhe të detajuara të mekanizmave komplekse të jetës në rezolucion atomik.