Po vritemi si bagëtia për një gardh e vijë uji...

26 Tetor 2017, 09:21Blog TEMA

Nga Çapajev Gjokutaj

Më tronditi lajmi për vrasjen e çiftit Kosta në Gjirokastër. Lekon e kisha mik në FB. Meloditë e saksit të tij janë bërë pjesë e gjërave të bukura të rinisë sime.

Fytyrë fisnike dhe e bukur, shpirt artisti, veshje e shkujdesur por korrekte dhe me shije. Mbi të gjitha njerëzillëk dhe thjeshtësi komunikimi. Gjithçka të kujtonte jetën, gjallërinë.

Por vdekja erdhi papritur. Vrasje barbare për një mur.

Pas tronditjes së parë, të vjen ndër mend se tek ne ka shumë vrasje për gjëra të vogla, për një gardh, për një vijë uji. Për gjëpogjëra, do thoshin të moshuarat gjirokastrite.

Vështirë të thuash ku i ka rrënjët lehtësia me të cilën ia marrim jetën tjetrit.

Një shpjegim mund të jetë koha. Jetojmë në një krizë të stërzgjatur, në një tranzicion që s’po i duket fundi. Halle me thes! Edhe stresi, nervozizmi dhe agresiviteti vijnë me thes.

Vrasjet për hiç gjë mund të shpjegohen edhe me faktin që qysh nga 1997-a i kemi armët sheshit. Nxehesh, vete e rrëmben kallashin dhe kthehesh e bën gjëmën. Por një pjesë e vrasjeve po bëhen edhe me thika, si të therje berrin.

Mbase e vrasim tjetrin lehtësisht nga që lidhjet me fenë i kemi të zbehta dhe shpesh të munguara. Të gjitha fetë kanë në themel disa porosi morale. “Mos vra” renditet ndër të kreut.

Shkolla dhe media kanë kusure të mëdha në brumosjen me norma humaniste. Po të flisnim për to, do na duheshin netë dimri.

Thonë se vrasjet për hiçmosgjë lidhen me cilësinë e ulët të jetës. Sa më e lartë cilësia, aq më e çmuar jeta. Si çdo mall… Ndjesë për cinizmin!

Mbase lehtësia e papërballueshme për të vrarë lidhet me konfliktualitetin politik. Baballarët e Kombit, vriten e priten.

Jo për flamur, por për të marrë vota e për të dhenë tendera e konçensione. Nuk vriten me jatagan a kallash, por me fjalë.

D.m.th vriten e priten me gjasme apo simbolikisht.

Parë kështu, vështirë të thuash se konfliktualiteti politik nxit direkt vrasjet. Gjithsesi është e sigurt që rrit agresivitetin. Dhe agresiviteti është sera ku rriten e harlisen vrasjet e ardhshme.

Gjendja është e trishtueshme. Mos pyet për kë bie kambana. Sot bie për Afërditën e Lekon. Me dhimbje e trishtim. Si një klithmë saksi nëpër natë.

Por të jesh i bindur se bie edhe për mua e për ty, për një shoqëri në krizë morale.

2 komente në “Po vritemi si bagëtia për një gardh e vijë uji…”

  1. latifi says:

    Ndër shkaqet që rendite për lehtësinë me të cilën vrasin shqiptarët, zoti Gjokutaj, ke “harruar” kryesoren,… trashëgiminë tonë…(?!)

  2. Spartak VERDHA says:

    Or Çapajev . Aq shumë të vlerësoj e respektoj , se nuk ke 2-vjet , por mbi 20-30 vjet , që njihesh për shumë gjurmë të vlerësuara maksimalisht në publicistëkën shqiptare . Respekt . Por , i nderuar Çapajev , mos kujto , se kjo gjëmë , ka ndodhur sa hap e mbyll sytë , nga asgjëja . Harroje . Një dramë e jashtzakonshme vuajtjesh shpirtërore , stresi , konfliktualiteti shkatërrues indiferncash organesh dhe manipulimesh , ka ndodhur deri në këtë moment makabër . Nuk është njeriu normal ai që vepron , por duhet të besosh dhe jesh plotësisht i ndërgjegjshëm , që ai , ka degraduar në anormalitet .Ç’farë e shtyu dhe e çoi në anormalitet . Nuk po përmend shumë faktorë , por do e vendos theksin vetëm tek njëri , i cili , pa tjetër është e do të jetë përcaktues në nivelin më të lartë , në pothuajse të gjithë rastet . INDIFERENCA karshi shqetësimit , rrezikut nga kanosja e kujtdo që e ka shprehur këtë shqetësim . Ma ha mendja se , si në shumicën e rasteve , për konfkliktualitetin e problemit në fjalë , për agravimin dhe kërcënimet është bërë kallzim e denoncim në organet përkatëse , si dhe kanë qenë në dijeni shumë persona , që
    në fund të fundit janë përgjegjës sot , për shmengien dhe parandalimin e krimit . Mos qofsha i gabuar , dhe nuk dua as të paragjykoj , as të hyj në gjynah , por nisem vetëm nga shumë e shumë precedentë të mëparshëm , të cilat , në jo pak raste , kanë përfunduar në të njëjtën formë tragjike . Verifikoje , dhe atëherë derdhe talentin tënd , sepse kështu ke bërë një homazh me vlerë jo vetëm reflektuese , por edhe me efekt përmirësues për këtë problem të ndjeshëm shoqëror . Me argumenta , ngrije në këmbë opinionin shoqëror , që njerëzit e caktuar , të mbajnë përgjegjësitë , që i detyron ligji , dhe të ndëshkohen , për pasojat e indiferencës mos kryerjes së detyrës sipas ligjit , të cilat sjellin të tilla pasoja , deri tragjike .

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje