Rikthehet debati për vaksinat dhe autizmin: Qëndrimet pro e kundër dhe ndërthurja me politikën

Në Itali, kohët e fundit është rihapur një debat i madh në lidhje me rikthimin e një ligji që i bën 10 vaksina të detyrueshme për fëmijët. Kjo pezullon detyrimin që kanë prindërit për të provuar se fëmijët e tyre janë të vaksinuar, në momentin që regjistrohen në çerdhe dhe kopshte. Kritikët thonë se kjo do ta kthejë vendin në mesjetë.

Po çfarë mendojnë njerëzit që nuk e mbështesin këtë ligj dhe pse Italia po përfshihet në një lëvizje antivaksinë?

Ata preferojnë opsionin “pro zgjedhjes vetjake” para atij “antivaksinë”

Vitin e kaluar, qeveria e mëparshme e Italisë hartoi një ligj sipas të cilit, prindërit duhej t’i vaksinonin fëmijët e tyre për 10 sëmundje të ndryshme para se t’i regjistronin në shkollë. Detyrimi me ligj për këtë mërziti jo pak në radhët e atyre që janë kundër vaksinave.

Nadia Gatti, presidente e CONDAV, qendra italiane për njerëzit e dëmtuar nga vaksinat, thotë se njerëzit duhet të kenë lirinë e zgjedhjes. “Është e rëndësishme të mos detyrohen prindërit që kanë frikë nga vaksinat, për çfarëdo arsyeje, shkencërisht të vlefshme ose jo. Nëse shteti thotë se ka një emergjencë dhe ne duhet të vaksinohemi, në rregull, përsa kohë që e di se ka mundësi të vogla për efekte anësore dhe i ndihmon prindërit që po përballen me një situatë të caktuar. Por të të thonë se vaksinat nuk sjellin komplikime apo të të gënjejnë se janë 100% të sigurta, kjo është njësoj si t’i vrasësh për së dyti ata fëmijë”, thotë ajo.

“Sa i takon fruthit, jam dakord me vaksinën. Por pse të bëjmë 10 vaksina në të njëjtën kohë. Jam dakord që shteti të bëjë të detyrueshme 4-5 vaksina, por t’i lërë të tjerat në dorën e prindërve”, shton ajo.

Më pak besim te institucionet

Është një trend që duket se po rritet gjithnjë e më shumë: më pas besim te establishmenti dhe institucionet, që nga sulmet e Trumpi-it ndaj lajmeve të rreme në SHBA deri te refuzimi i mendimit të ekspertëve në prag të referendumit të Brexit. Dhe Italia nuk është imune nga këto.

“Edhe në Itali është shpërndarë skepticizmi, që njerëzit e përkthejnë në sensin që janë të pafuqishëm për të bërë ndonjë gjë apo për të përmirësuar gjendjen e tyre. Kjo nxit retorikën antielitë, atë antipolitikanë. Lega së bashku me Lëvizjen 5 Yjet ishin të afta për ta nxitur dhe përdorur këtë sens dëshpërimi dhe ndjesinë se institucionet politike të vendit po punojnë kundër interesit të popullit”, thotë Daniele Albertazzi, ekspert i politikës italiane në Universitetin e Birmingamit.

Influenca e medias së pafiltruar

“Është e rëndëishme të theksohet se si përdorimi i medias, e cila përdor komunikim horizontal dhe pa filtra, për të marrë informacionin mbi vaksinat është rritur me shpejtësi”, thotë Aurea Orandini, një akademik që ka studiuar skepticizmin italian në lidhje me vaksinat.

“Interneti dhe mediat sociale luajnë një rol të rëndësishëm në shpërndarjen e lajmeve të rreme dhe në ngritjen e alarmit të panevojshëm mbi sigurinë e vaksinave. Në fakt, kur informohen në internet, prindërit mund të krijojnë bindjen se vaksinat shkaktojnë autizëm dhe të vendosin të mos i vaksinojnë fëmijët e tye për të shmangur efektet anësore”, shton ajo.

Një rast i tillë i përfunduar në gjykatë duket se ka qenë me shumë ndikim në këtë debat. Gjykatësit në Rimini vendosën që familja e një djali me autizëm të dëmshpërblehej, mbi argumentin se ai ishte shkaktuar nga vaksinimi MMR. Vendimi u rrëzua në apel tre vjet më vonë.

Megjithatë, vendimi i shkallës së parë shënoi një pikë kthese thelbësore dhe shtoi mosbesimin te vaksinimi.

Influenca e një studimi të vënë në diskutim

Në vitin 1998, një studim i kryer nga Andrew Wakefield  dhe i botuar në “Lancet” pretendonte se kishte një lidhje mes vaksinave të fruthit, shytave e rubeolës – tri vaksina që njihen ndryshe si MMR –  dhe autizmit.

Studimi u hodh poshtë dhe u hoq nga regjistri mjekësor në Britaninë e Madhe. Por ideja e lidhjes mes vaksinave MMR dhe autizmit u përhap në shumë vende të Europës, ku edhe sot shumë njerëz e besojnë.

Legjitimiteti politik

Hezitimi në lidhje me vaksinat në Itali ka nisur prej kohësh, por ai u fut në axhendën politike vitin e kaluar, kur vendi pari një shpërthim të fruthit. Në Itali u diagnostikuan 5 mijë raste dhe pati katër të vdekur. Ekspertët e shëndetësisë thonë se shkalla e imunizimit kundër fruthit në Itali, që ishte në nivelin 85%, ishte e ulët. Sipas OBSH-së, ajo duhet të jetë 95% në mënyrë që të parandalohet shpërthimi i një epidemie.

Kjo bëri që qeveria ta bënte të detyrueshëm vaksinimin e fëmijëve me 10 të tilla para se të hynin në shkollë. Në prag të zgjedhjeve, Lega dhe Lëvizja 5 Yjet mbështetën elektoratin që nuk është dakord me vaksinat. Beppe Grillo deklaroi në atë kohë se vaksinat vërtet luajnë rol në çrrënjosjen e sëmundjeve, por sjellin me vete edhe rrezikun e efekteve anësore. Ndërsa lideri i Legës, Matteo Salvini, e quajti vaksinimin e detyrueshëm të pavlerë dhe të rrezikshëm.

Frika se gjithçka bëhet për të përfituar kompanitë farmaceutike

Beppe Grillo është shprehur se vaksinimi i detyrueshëm nuk është gjë tjetër veçse një dhuratë për gjigantët shumëkombësh të farmaceutikës.

“Disa nga prindërit që janë mbledhur në shoqatat kundër vaksinave besojnë se qeveria ka nxjerrë një ligj të detyrueshëm për shkak se ajo ka një marrëveshje me kompanitë farmaceutike dhe kjo është konflikt interesi”, thotë Oradini për Euronews.

Aktivistët kundër vaksinimit gjithashtu argumentojnë se mungesa e një kalendari të unifikuar të vaksinimit në të gjithë Evropën apo gjetkë është dëshmi se asnjë moment për ta bërë këtë nuk është më i mirë se një tjetër.

Ata thonë se 10 vaksinat e detyrueshme janë shumë dhe se Italia duhet të kthehet në katër vaksinime të detyrueshme. / Përgatiti: Gazmira Sokoli / 

 

REMOTE_ADDR:[]
                 Loading...