#Fakenews vs #Hopenews

13 Shtator 2018, 08:56Blog TEMA

Nga Rudina Xhunga

Fake news është pjesë e medias shqiptare. Nuk nisi me portalet, u shtua me to.

Unë jam gazetare që nuk e nisa nga portalet. E nisa te “Koha Jonë” gazetarinë e angazhuar.

E angazhuar, nuk po e përdor për të thënë e majtë, por për të thënë patriote, gazetari në shërbim të vendit, jo vetes.

Anglisht patriot, ngjan sikur thua hero, këtu duket sikur nënkupton hajdut, po fake news më vete edhe kjo.

Dua të kthehem pas në kohë, në vitin ‘97. Në një nga reportazhet e mia më të vështira, në Cërrik.

Kur vajta, pa ditur ku shkoja, u gjenda mes kufomash.

Banorët ishin të armatosur dhe të dehur.

Të gjithë të ofronin fërnet dhe një gjuajtje me automatik.

Çfarë ndodhi në Cërrik! Banorët u lajmëruam se do vinin forcat speciale nga Tirana dhe do të merrnin qytetin nën kontroll.

Situata u mbars me fake news. Dhe e tillë siç qe, qyteti që po priste gjëmën, u bëri gjëmën disa punonjësve të Shik, që shkuan me blind, por qenë pak dhe të papërgatitur për çfarë i priste.

Kohë më pas, kur vitet kalojnë ti pyet veten, a ishte ‘97 një vit plot fake news dhe kush i shpërndau?

Kush përfitoi dhe kush humbi?

Dhe sa lehtë manipulohen njerëzit, sa kollaj është t’i bësh turmat të besojnë, sa shpejt marrin flakë, me pak fake news, zjarrit.

Duke ikur nga ajo kohë, për të cilën flitet pak, a thua se nuk qe marrëzia jonë kolektive, vijmë në ditët e sotme, kur fake news ndikon jetën e individëve të bëjnë zgjedhje të gabuara, duke u nisur nga perceptimi më shumë se logjika.

Fake news është pikërisht i tillë, vjen të të gënjejë dhe të të manipulojë duke shfrytëzuar mungesën e njohurive, logjikës të kujt manipulon edhe një lloj imitimi nga njëri te tjetri.

Sepse, nëse unë tani do hap gojën, shumë prej jush në sallë, do të hapni gojën.

A e zhdukim dot me ligje?

E vështirë, sepse nëse ti ndëshkohesh me gjobë, ai që ka paguar për fake news do paguajë edhe për gjobën.

Por jo e pamundur.

Por, mbi të gjitha, ajo që unë besoj është se, në betejën ndaj fake news, arma më e mirë është hope news. Nuk kam parasysh propagandën me këtë. Ajo është fake news më vete.

Kam parasysh lajmet e bukura të përditshmërisë së secilit, të përgjegjshmërisë së secilit, të angazhimit të secilit, të besimit të secilit se po, ka shpresë, ka njerëz, ka të ardhme, ka djem e vajza që nuk do të hyjnë në politikë për t’u bërë rrogëtarë kryetarësh, por patriotë të këtij vendi.

Këtij atdheu që kërkon me çdo kusht fytyrën e një brezi që e do pa kushte.

Ky është një hope news. Nëse e shpërndani, nuk ka fake news që ju del para.

Sepse edhe entuziazmi është ngjitës, edhe frymëzimi është ngjitës. Mjafton të militoni për të.

Të militosh nuk do të thotë të jesh militant.

Të militosh do të thotë të përfshihesh, të angazhohesh, të ndërveprosh.

Duke besuar se fraza “politika është e keqe”, është një fake news.

Ndaj uroj të bëheni pjesë e saj, siç uroj të bëheni gazetarë, juristë, sociologë, grafistë, shkrimtarë, të mirë.

Të bëheni profesionistë të mirë, sepse nëse ti bën mirë punën tënde, cilado, ajo qoftë, as konsumon, as prodhon fake news./dritare.net

Ps. Fjala e mbajtur për studentë dhe gjimnazistë, në panelin me temë “Fake News”, thirrur nga Fondacioni “Qemal Stafa”.

3 komente në “#Fakenews vs #Hopenews”

  1. faro says:

    Fake news eshte edhe shprehja vetevrasese e gazetares kur thote……marrezia kolektie……
    Jo zonje ishte SHPERTHIM i mllefit popullor i ushqyer nga padrejjtesite e shtetareve.
    Ky eshte hope news!

  2. faro says:

    Zonja lektor ti thuash revoltes popullore fake news, marrezi kolektive, sic e quan ti ketu, eshte kryekeput fake news. Por te thuash qe korrupsjon shteteror arriti kulmin deri sa shkaktoi revolta popullore, eshte hope news, sepse levizje te tilla jane mesime shprese (hope), se ai qe ka mend, do ti mendoje mre hapat si pushtetar

  3. faro says:

    Zonja lektor ti thuash revoltes popullore , marrezi kolektive, sic e quan ti ketu, eshte kryekeput fake news. Por te thuash qe korrupsjon shteteror arriti kulmin deri sa shkaktoi revolta popullore, eshte hope news, sepse levizje te tilla jane mesime shprese (hope), se ai qe ka mend, do ti mendoje mire hapat si pushtetar

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje