Hazbiu ka disa mallkime pas udhëtimit të presidentit në Tropojë

Pas udhëtimit të presdentit deri në Tropojë për të hequr “Vallen e Tropojës” me kongresmenin Engell, Hazbiu u xhindos shumë.

-Si ka mundësi, tha, që presidenti shkon deri në Tropojë i ftuar nga një kryetar bashkie që s’ka hyrë në garë fare dhe nuk vjen në Këlcyrë, ku unë së paku kam hyrë në garë?

Pastaj akoma më keq, si ka mundësi që presidenti që sfidon Amerikën, nuk shkon tek Hazbiu, që është kandidat i Partisë Komuniste dhe që e ka traditë luftën kundër SHBA, por shkon tek një bashkiak i PD, që e ka pas me luhatje luftën kundër SHBA.

Ndaj ja nisi me një sërë mallkimesh:

“O ti i Bashkisë së Tropojës. T’u shtypshin boronicat në xhep e u duksh si Bajram Curri i vrarë në shpellë të Dragobisë, që të të imitojë Ilir Meta.

O ti i Bashkisë së Tropojës, të pickoftë nepërka e Shkëlzenit e ta thithtë gjakun presidenti, që të shohim kush e ka më të fortë helmin.

O ti Ilir Meta, që injoron komunistët si anti-amerikan dhe beson tek Berisha, të qofshin harram votat tona si komunistë, sa herë ke pas nevojë këto 29 vjet.

O ti Ilir Meta, t’u dukshin vilat e Lalzit si kapanone Spaçi dhe pushuesit që mbyten, si viktima të Sigurimit, që të bëhesh lugat nga frika në Lalz.

O ti Hary Bajraktari, që gënjen zotin Engell dhe nuk i tregon kush është Ilir Meta, të marrtë Perëndia mendjen e hyfsh në ndonjë tender në Kosovë, ta shikosh kush është Ramushi.

O ti zoti Ramush, që ke fituar tenderin ta bësh pro-amerikan Ilir Metën, u mbytsh në Adriatik tek kompleksi Fafa ku të ka dhënë Meta shtëpi, dhe u bëfsh ushqim për peshqit.

O ti zoti Engell, ty nuk të mallkoj dot, se të kemi mik, por mallkim më të madh se të heqësh vallen e anti-amerikanëve, pa e ditur, nuk ka.

Këtë e ke mallkim nga Ramushi, jo nga unë.”

REMOTE_ADDR:[]

1 komente në “Hazbiu ka disa mallkime pas udhëtimit të presidentit në Tropojë”

  1. asdfg says:

    Po boll me Hazbiun. Vetë Hazbiu përfaqëson deformim më skandaloz shpirtëror të njeriut. Ju, për çfarë arsye e merrni atë për model komunikimi me lexuesin tuaj? Kjo tregon thjesht varfëri intelektuale ose mos respekt për ata që ju lexojnë . Edhe shakaja ka një kufi, dreqi e mori, tregohuni më kreativ, gjeni një mënyrë tjetër për komunikim të lajmeve ose mesazheve që doni të përcillni.

Lini një Përgjigje

Adresa juaj email nuk do të bëhet publike. Fushat e domosdoshme shënohen *