Të armatosur deri në dhëmbë, Lleshaj: Ja njësia elitë që do godasë “të fortët”

11 Shtator 2019, 13:58Kronika TEMA

Ministri i Brendshëm, Sandër Lleshaj, vizitoi mjediset ku punon dhe stërvitet Njësia Speciale e Kërkimit të të “fortëve”, që i janë shmangur drejtësisë.

Gjatë vizitës, ministri Lleshaj, që shoqërohej nga drejtuesit kryesorë të PSH, ndoqi disa veprime operacionale, pjesë e programit të ngjeshur që po zhvillon Njësia, që prej disa javësh, nga dita e krijimit të saj.

Ndër të tjera, Lleshaj tha se shumë shpejt kjo njësi do të bashkëpunojë me partnerët ndërkombëtarë dhe do të bëhet pjesë e rrjetit evropian të njësive që merret me kërkimin e personave që i janë shmangur drejtësisë, brenda dhe jashtë Shqipërisë.

“Është shumë e rëndësishme të përcjellim mesazhin se drejtësia mund të vonojë, por nuk harron. Drejtësia në Shqipëria nuk do të harrojë askënd, që i është shmangur asaj. Kjo do jetë njësi elitë e policisë shqiptare, do jetë prova e këtij angazhimi serioz, për të kërkuar kudo që të jetë dhe për të vënë para drejtësisë këdo që ka llogari të hapura me të.

Kjo njësi do jetë një element i rëndësishëm bashkëpunimi me ndërkombëtarët, se së shpejti do jetë pjesë e rrjetit evropian njësive që merren me kërkimin e personave që i janë shmangur drejtësisë, në Shqipëri dhe jashtë saj”, u shpreh Lleshaj.

Fjala e plotë e ministrit të Brendshëm para efektivëve të Njësisë:

Është shumë e rëndësishme që të përcjellim mesazhin: “Drejtësia mund të vonojë, por kurrë nuk harron”. Ju jeni dëshmia dhe prova, kapaciteti që ne i japim qytetarëve shqiptarë, garancia se drejtësia në Shqipëri nuk do të harrojë askënd që i është shmangur asaj. Kjo Njësi, e cila do të jetë një ndër Njësitë elitë të Policisë Shqiptare, do të jetë pikërisht prova e këtij angazhimi serioz, për të kërkuar kudo që të jetë dhe për të vënë para drejtësisë këdo që ka llogari të hapura me të. Kjo është e para që dua t’iu them.

E dyta, kjo Njësi do të jetë edhe një element i rëndësishëm bashkëpunimi me partnerët tanë ndërkombëtar, për arsye se së shpejti, Njësia do të jetë pjesë e rrjetit europian të njësive që merren me kërkimin e personave që i janë shmangur drejtësisë.

Në këtë kuadër përgjegjësia juaj del përtej kufinjve të Shqipërisë, për arsye se ju do të jeni të angazhuar për të kërkuar jo vetëm personat që i janë shmangur drejtësisë në Shqipëri, por edhe persona që i janë shmangur drejtësisë në vende të tjera.

Ashtu si kundër Njësitë tuaja simotra homologe në vendet e europiane, do të jenë përgjegjëse dhe të angazhuara, për të kërkuar dhe venë para drejtësisë persona, të cilët i janë shmangur drejtësisë në Shqipëri apo në vendet e tjera.

Kështu që para jush, shtrohen kërkesa të mëdha për motivim të lartë, për besnikëri ndaj misionit, për patriotizëm, për profesionalizëm, për qytetari, për vendosmëri, në mënyrë që ta plotësoni misionin e ngarkuar me nder.

Jeni të parët që i hapni këto njësi shumë të rëndësishme për Policinë e Shtetit shqiptar. Do të fuqizoheni me tej, në të ardhmen, qoftë në numër, qoftë në teknologji, në pajisje dhe në mbështetje tjetër me qëllim që të mos mungojë asgjë për të realizuar këtë objektiv shumë të rëndësishëm.

Me këtë rast dua të them se Policia e Shtetit, po merr masa për të shtuar kapacitetet e saj, përveç prezencës territoriale edhe përmes shtimit të njësive, të cilat do të merren me aspekte të cakuara të punës së Policisë. Pra, krahas aspektit territorial do të kemi edhe një aspekt të fortë lëndor të Policisë së Shtetit, përmes fuqizimit të njësive ekzistuese dhe krijimit të njësive të reja.

Si njësia juaj, që është e angazhuar për luftën kundër krimit të organizuar dhe me fokus kapjen e personave të shpallur në kërkim, do të krijohen edhe njësi të tjera.

Së shpejti ne presim të krijojmë Njësinë e Luftës kundër Krimit Ekonomik, e cila do të marrë po ashtu një rëndësi të veçantë në fushën e luftës kundër krimit ekonomik dhe pastrimit të parave. Njësi të tjera do t’i shtohen Policisë së Shtetit, Njësia e Luftës kundër Krimit Kompjuterik, Njësi të tjera në fushën e informacionit dhe të inteligjencës, e të tjera me rradhë.

Do të merren masa që të dy krahët e Policisë së Shtetit, si ai territorial ashtu si edhe ai lëndor të jenë po aq të fuqishëm, në mënyrë që, me një Polici të re të reformuar, të modernizuar, të motivuar të mund të mbështesim objektivin numër një që ka Shqipëria dhe shqiptarët që është zbatimi i Reformës në Drejtësi.

Reforma në Drejtësi nuk mund të ketë sukses pa patur një Polici, e cila e zbaton atë. Është shumë e rëndësishme që Policia të ndjek me ritmin më të lartë, atë progres të madh që po bëhet në fushën e reformës në drejtësi për t’i garantuar asaj suksesin përfundimtar.

Drejtësia ka vlerë vetëm atëherë kur ajo zbatohet në praktikë. Ju jeni krahu që do të mundësoni zbatimin në praktikë të gjitha vendimeve që Drejtësia e re do të marrë në të ardhmen e afërt.

2 komente në “Të armatosur deri në dhëmbë, Lleshaj: Ja njësia elitë që do godasë “të fortët””

  1. goliku says:

    Ky eshte nje turp i madh i ketij minister LESHI. Nuk ka nevoje policia per kaptera ushtrie. Kjo eshte nje gafe qe shume shpejt Edi Rama dhe parlamenti duhet ta korigjoje. POLICIA KA REPARTIN ELITE RENEA QE ESHTE E PERGATITUR ME PERMASA NDERKOMBETARE DHE KA 25 VJET QE TRAJNOHET NGA SHBA, GJERMANIA etj. Turp turp te keshe o minister kapter LESHI.

  2. Peza says:

    E gjitha kjo eshte nje lajthitje e Rames dhe e ushtarit te tij Lleshaj!
    Se pari duhet saktesuar se kush jane fe FORTET,si u bene te FORTE me cilet bashkepunojne,ne cilat fusha veprojne,kush i ka lejuar ata qe u bene te forte,cfare ligjesh e rregullash kane bere te mundur pasurimin e tyre dhe rrezikshmerine qe paraqesin?
    Viktimat e vetme te ketyre te FORTEVE jane vetem qytetaret,prandaj Rama duhet t’i therrase mendjes se vetem informacionet nga qytetarejane rruga me e mire per goditjen e tyre e jo task forcat!

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje