Vonesa pagash për mësuesit dhe QSUT, reagon Ministria e Financave: Si është e vërteta

8 Nëntor 2019, 20:06Ekonomia TEMA

Në disa portale ka pasur raportime se ka pasur vonesa në shlyerjen e pagave për punonjësit e sektorit publik.

Fillimisht u raportua se kishte vonesa në dhënien e pagave për mesuesit, dhe pas kësaj të njëjtën shqetësim ndanë dhe punonjësit e QSUT-së.

Për situatën ka reaguar Ministria e Financave dhe e Ekomomisë:

“Lidhur me lajmet që kanë qarkulluar në media për sa i përket vonesave te pagave të punonjësve buxhetorë sqarojmë se: Vonesat e pagesës së pagave të disa institucioneve nuk kanë ardhur si pasojë e mosfunksionimit të sistemit të Thesarit, por për shkak të mos paraqitjes së urdhër – shpenzimeve nga ana e disa institucioneve.

Drejtoria e Përgjithshme e Thesarit është përgjegjëse për realizimin e pagesave në mënyrë të centralizuar, nëpërmjet sistemit informatik financiar të qeverisë. Për të zbatuar këtë detyrë DPTH aprovon shpenzimin në zbatim të kërkesave të kontrollit që burojnë nga aktet ligjore dhe nënligjore.

Në zbatim të urdhrit të Ministrit, DPTH autorizon pagesën e pagave, vetëm nëse shoqërohet së bashku me deklaratën e pagesës së sigurimeve shoqërore.

Ministria e Financave dhe Ekonomisë është angazhuar në terma konkretë, duke realizuar një ndryshim në Udhëzimin e Zbatimit të Buxhetit 2019, përmes së cilit specifikohet se pagesat e sigurimeve shoqërore të institucioneve buxhetore do të kryhen njëkohësisht me pagesën e borderosë, dhe jo pas 20 ditëve si në parashikimin e mëparshëm.

Ndërkohë, Drejtoria e Përgjithshme e Thesarit, po në bazë të këtij Udhëzimi, siguron zbatimin me rigorozitet të këtij rregulli të ri që prej muajit Tetor 2019.

Ministria e Financave dhe Ekonomisë siguron qytetarët shqiptarë se ka ndërmarrë të gjitha masat e nevojshme, brenda hapësirave që lejon ligji, që cështje të kësaj natyre të mos cënojnë në asnjë formë ecurinë e buxhetit të shtetit dhe qëndrueshmërinë e indikatorëve bazë të ekonomisë”, njofton Ministria.

1 komente në “Vonesa pagash për mësuesit dhe QSUT, reagon Ministria e Financave: Si është e vërteta”

  1. Na myten says:

    Po mi po! Se i dini njerezit bole juve! E ka fajin financierja e QSUT apo e shkollave!
    Pushojini nga puna qe te na mbushni mendjen qe e paskan fajin ata!

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje