COVID-19, mbi 6 milionë të infektuar në mbarë botën

1 Qershor 2020, 10:52Bota TEMA

Numri i të infektuarve me COVID-19 në të gjithë botën ka arritur 6 milionë tashmë, ndërsa të vdekurit në 372 mijë. 180 mijë prej tyre kanë vdekur në Europë.

SHBA-të mbeten në vend të parë për numër të prekurish, me më shumë se 104 mijë të vdekur.

Për sa i përket numrit të të infektuarve,  vendi i dytë në botë tashmë renditet Brazili, me më shumë se 514 mijë, dhe Rusia e treta, me mbi 405 mijë.

Mbretëria e Bashkuar është vendi i dytë pas SHBA-ve për numër të vdekurish, me 38.571, e ndjekur nga Italia me 33.415.

Prej disa ditësh, Spanja dhe Franca nuk janë më vendet me më shumë të vdekur pas Italisë, për shkak të rritjes së vdekjeve në Brazil, ku tashmë kanë arritur në 29.314. Në Francë janë regjistruar 28.850 të vdekur dhe në Spanjë 27.127.

Brazili ka marrë nga SHBA-të rreth dy milionë doza hidroksiklorokine për të trajtuar të sëmurët me COVID-19, edhe pse OBSH nuk e ka rekomanduar ende si ilaç.

Rënia e numrit të vdekjeve dhe infektimeve brenda një dite ka bërë që vendet e Europës të nisin lehtësimet.

Mbretëria e Bashkuar ka hapur shkollat, por pa i detyruar prindërit t’i dërgojnë fëmijët patjetër. Në fakt, 46% e familjeve kanë zgjedhur t’i mbajnë në shtëpi.

Kryeministri spanjoll ka kërkuar një zgjatje të fundit të gjendjes së emergjencës, me dy javë të tjera, ndërkohë që Franca ka nisur të hapë parqet dhe lulishtet publike.

Edhe në Turqi ka nisur lehtësimi i masave, pasi qeveria ka nisur të lejojë udhëtimin me makina private midis qyteteve. Të infektuarit në Turqi janë 164 mijë, të vdekurit 4540.

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje