Problemi real i Bashës me inceneratorët

22 Tetor 2020, 18:41Blog TEMA

Nga Ardit Rada

Lulzim Basha ka nisur dy histori të reja këtë vjeshtë. Bëhet fjalë për “Planin me 5 pika” që tashmë ka filluar ta kombinojë me inceneratorët. Prej disa ditësh ai thërret në selinë blu gazetarët e terrenit që mbulojnë Partinë Demokratike dhe u reciton të njëjtin refren deri në mërzi. Jo për faktin se nuk janë çështje me rëndësi, qoftë edhe me prapavijë të dyshimte siç pretendon ai, por sepse përsëritja në këtë rast nuk është mëma e dijes.

Pas të dhjetit takim ndoshta, dikush me gjasë ia ka vënë në dukje se i lodhi të tërë dhe kauzat mbi të cilat kërkon të ndërtojë aksionin opozitar nga selia, nuk ngjisin. Jo vetëm se s’po thotë asgjë të re, por po i sfilit gazetarët që s’po nxjerrin dot ndonjë titull të ri pas konferencave.

Ndaj një moment, të gjithë këtë hapësirë që zë, e justifikoi me pretekstin se s’do të lodhet asnjë ditë deri në 25 Prill për të përsëritur të vërtetën (që mesa duket e ka monopolizuar).

Duhet thënë se si në planin me 5 pika, ashtu dhe për inceneratorët, Lulzim Basha është i vetëm. Teksa gjysma e ish-grupit parlamentar të LSI e ka kaluar koronavirusin, Monika Kryemadhi ende këmbëngul te komploti kundër qytetarëve. Siç i quan ajo, të varfëruar dhe të pashpresë prej Edi Ramës. Sa për inceneratorët, në rastin më të mirë i ka përmendur Petrit Vasili, por që s’e merr më njeri seriozisht qëkurse i doli fotoja duke ngrënë fara.

Sot, Top Channel ka publikuar dokumentet ku ish-kryebashkiakët e opozitës në Kavajë, Vorë dhe Rrogozhinë i kërkonin ndihmë Tiranës për të shfarosur mbetjet e tyre në inceneratorin e Tiranës.

Interesante do të ishte që media të gjente edhe se si janë votuar në Këshillat Bashkiakë propozimet për inceneratorët në fjalë. Nëse votat e demokratëve do të kishin qënë PRO, kjo do të na e kursente konferencën e Bashës nga e hëna e tutje dhe do t’i vinte kapak muhabetit.

Gjithësesi, fakti se ish të zgjedhurit e opozitës së sotme kërkonin t’i sillnin mbetjet për djegie në Tiranë, nuk fakton ndonjë mentalitet modern që ata kanë pasur në vitin 2018 kur përkojnë shkresat. Në rastin më të mirë kjo tregon se Fiqiri Ismaili, Isa Sakja dhe Beqir Nuredini thjeshtë donin zgjidhje për plehrat e bashkive të tyre.

Në rastin më të keq tregon se asokohe e deri më sot që fushata kërkonë para gjithnjë e më shumë, Lulzim Basha është kujtuar për pazaret e prishura dhe po tenton të gjobisë edhe inceneratorët si në rastin e oligarkëve të ndërtimit. Si atëherë kur ua përmendi emrin nëpër dhëmbë derisa mori “Benz”-in, vilën e kushedi se çfarë tjetër.

Po nejse, këto janë punë të SPAK-ut që po e ‘mbyt’ me çështje Çlirim Gjata duke paditur pazaret e prishura të Bashës; Për të mos i lënë radhë hetimeve reale për të cilat kanë nevojë shqiptarët!

2 komente në “Problemi real i Bashës me inceneratorët”

  1. #Thetruth says:

    …akoma se keni kuptuar qe e ka per ate qe do behet ne durres??? Sepse ata per cdo pune qe behet ..per did tender shohin mundesine qe mund te fitonin/fitojne….kaq e thjeshte eshte…

  2. Ore says:

    Z. Rada! Problemi eshte qe loja ka mbaruar me 31.08.2017, dite kur eshte lidhur kontrata e koncensionit.Fiqiri Ismaili, Isa Sakja dhe Beqir Nuredini (Keshillat Bashkiak perkates) duhej te ishin shprehur perpara asaj date sepse behet fjale per tarifa. Keshtu qe Fiqiri Ismaili, Isa Sakja dhe Beqir Nuredini kane bere autogola, jo GOLA. Ne fakt SPAK-u duhet te merret edhe me keto te tre se perse jane shprehur ne emer te Keshillit Bashkiak.

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje