arkiva

Seksionet

•Home

•Editorial

•Politika

•Speciale

•Kronika

•Intervista

•Komente

•Opinion

•Aktualiteti

•Rajoni

•Bota

•Ekonomi

•Reportazh

•Rrethe

•Kultura

•Sporti

•Forum

•Dossier

•Sociale

•Arkiva

•Tema E-mail

Lidhje

•Deutsche Welle

•BBC Shqip

•Zeri i Amerikes

•EDSH

•Rilindja Demokratike

•Besnik Aliaj

•Zeri Yt

Shtypi i Huaj

•New York Times

•The Washington Times

•The Times

•Independent

•Guardian

•Frankfurter

•Corriere della Sera

•Il Giornale

•Le Figaro

•Le Monde

Drejtor Mero Baze

ARKIVA

POLITIKA

Flet presidenti i nderit i Partisë Republikane, Sabri Godo

Godo: Presidentin ta propozojë e majta

Fatjona Mejdini

Presidenti i nderit të Partisë Republikane, Sabri Godo, analizon situatën postzgjedhore dhe perspektivën e situatës politike deri në zgjedhjen e presidentit të ri. Sipas Godos, një nga arsyet pse mazhoranca e djathtë humbi bashkitë e mëdha në vend është edhe pakënaqësia e ish-pronarëve nga procesi kaotik i legalizimeve dhe një proces kompensimi i vonuar. Nga ana tjetër, z.Godo nuk ngurron të shtojë se qeveria i ka bërë gabim llogaritë me qytetarët, të cilët po legalizojnë shtëpitë e tyre, duke qenë se ata e arritën këtë fazë, kërkojnë më shumë shërbime nga qeveria e djathtë. Një nga arsyet e zemërimit, sipas Godos, të elektoratit të djathtë me kryeministrin Berisha është edhe takimi i tij me ish-kryeministrin, Fatos Nano, duke shtuar se takimi rezultoi negativ për të dy aktorët. Sabri Godo thekson se vendi nuk ka infrastrukturën e nevojshme, zgjedhore për zgjedhje të parakohshme dhe qeveria duhet të nxitojë ta krijojë këtë infrastrukturë. Sipas tij, propozimi i presidentit të ri nga partitë e opozitës do të sillte më shumë stabilitet dhe kompromis politik në vend. Nga ana tjetër, presidenti i nderit të republikanëve shprehet se mbajtja në burg e eksponentëve të lartë të Partisë së Ballit Kombëtar me akuzën e falsifikimit të firmës së Akile Ramës, i duket se po bëhet me një zell të madh, politik në momentin që nuk ka pasur asnjë ndikim në zgjedhje.

Box 1

“Ekziston një përshtypje e përgjithshme që ka një lloj zemërimi të pronarëve në këto qytete, të cilët nuk kanë mundur të marrin atë që prisnin dhe nuk kanë një perspektivë të mirë në këtë drejtim dhe kjo besoj se shkakton zemërimin e tyre. Pak a shumë në këto ujëra janë dhe ish-të përndjekurit politikë dhe pak a shumë këto kanë qenë kontigjente të sigurta që kanë votuar gjatë 15 vjetëve për të djathtën”

Box 2

“Çështja e reformave të qeverisë ndihet më tepër nëpër qytete dhe reformat janë projektuar, mund të jenë përgatitur edhe shumë projektvendime, por duket se qytetarët ende nuk shohin një strategji të qartë të asaj që do të bëhet dhe mënyrën sesi do të implementohen këto reforma. Të gjitha këto kanë shkaktuar një lloj konfuzioni, janë gjëra, të cilat e djathta tashmë duhet t`i sqarojë me durim, duke vendosur piketat e duhura”

Box 3

“Për fat të keq u krijua kjo psikologji që mund të shpallesh zot i një toke që nuk të përket kurrsesi dhe nga fenomene të tilla më pas vuan i gjithë shteti. Kjo për faktin që ke të bësh me qytetarë që nuk kufizohen brenda asaj çfarë kanë trashëguar brenda së drejtës së tyre, por mësojnë të jetojnë në mënyrë arbitrare. Ky është një problem i madh që duhet të trajtohet me kujdes dhe vendosmëri në të ardhmen. Jam i sigurt që derisa të vijë koha që këto zona të urbanizohen plotësisht, do të ketë fërkime mes kësaj kategorie dhe pushtetit”

Box 4

“Për hir të stabilitetit politik dhe të një lloj marrëveshjeje të forcave politike në pozitë dhe opozitë, do të ishte më e natyrshme që t`i lihej të majtës të propozonte një president. Kështu do të kishim edhe një balancim më të pranueshëm të pushteteve”

Si e gjykoni faktin që PD-ja ka fituar pjesën më të madhe të komunave në vend dhe nga ana tjetër, PS-ja, bashkitë e mëdha, kur në vitet e mëparshme ka ndodhur e kundërta? Pse mendoni se ka ardhur ky rezultat?

Unë besoj se një pjesë e elektoratit tradicionalisht e djathtë nëpër qytete nuk ka shkuar të votojë dhe mbase ky është një nga shkaqet e humbjes së të djathtës në tërësi në këto bashki të mëdha. Ekziston një përshtypje e përgjithshme që ka një lloj zemërimi të pronarëve në këto qytete, të cilët nuk kanë mundur të marrin atë që prisnin dhe nuk kanë një perspektivë të mirë në këtë drejtim dhe kjo besoj se shkakton zemërimin e tyre. Pak a shumë në këto ujëra janë dhe ish-të përndjekurit politikë dhe pak a shumë këto kanë qenë kontigjente të sigurta që kanë votuar gjatë 15 vjetëve për të djathtën. Por, nga ana tjetër, diferenca në disa qytete është aq e vogël, sa mund të thuash se ka një barazim, si në Elbasan ose në Durrës, qendra këto të një rëndësie të madhe. Ka pastaj diferenca të theksuara sa nga njëri krah, edhe në tjetrin. Ka një fitore shumë të theksuar të së djathtës në Shkodër, ashtu siç ka një fitore të thellë të të së majtës në Vlorë. Kjo gjendje ka nevojë për një studim për cilëndo nga palët që janë në konkurrim, duke analizuar gjendjen sociale dhe politike të qytetarëve për çdo njësi dhe për çdo qytet. Nga ana tjetër, nuk mund të thuash se ka një humbje të së djathtës në qytete, ashtu siç nuk mund të thuash se ka një monopol të saj në zonat rurale.

Unë besoj se banorët e zonave rurale kanë qenë më dashamirës ndaj së djathtës, po gjërat do të vijnë duke u balancuar në të ardhmen, sepse do të vijë koha që do të vendoset shteti ligjor në kuptimin e mirëfilltë të fjalës. Do të vijë koha, kur në këto zona do të paguhet taksa për tokën, taksa për bagëtinë, do të paguhen faturat e elektrikut dhe të ujit, d.m.th., do të vijë koha e takësimit të njëllojtë në të gjithë popullsinë.

Çështja e reformave të qeverisë ndihet më tepër nëpër qytete dhe reformat janë projektuar, mund të jenë përgatitur edhe shumë projektvendime, por duket se qytetarët ende nuk shohin një strategji të qartë të asaj që do të bëhet dhe mënyrën sesi do të implementohen këto reforma. Të gjitha këto kanë shkaktuar një lloj konfuzioni, janë gjëra, të cilat e djathta tashmë duhet t`i sqarojë me durim, duke vendosur piketat e duhura. Por, për të bërë të gjithë analizën, duhen të dhëna më të sakta, duhet të qartësohet mirë se kush dhe si ka votuar. Në rast se mund të disponohen të dhëna të tilla, mund të jesh edhe më i orinetuar për të gjetur shkaqet e këtyre rezultateve dhe kjo duhet të bëhet patjetër, sepse pastaj nuk do të dish si t`i eleminosh rezultatet që janë negative për palën tënde.

Indiferentizmi për të votuar u vu re edhe te banorët e zonave informale, të cilët kanë filluar të marrin tapitë e para dhe të legalizohen. Ç`mendoni se ka ndodhur me ta?

Është një llogari e gabuar që ka bërë e djathta me kategorinë e atyre qytetarëve që kanë ndërtesa për të legalizuar, sepse është supozuar se, megjithëse atyre iu është njohur e drejta të shpërngulen nga vendet e tyre dhe të vijnë të banojnë këtu, ata do t`i dilnin për zot këtij pushteti që iu krijoi këto mundësi që nga `92-shi e mbrapa. Por, ja që në psikologjinë e tyre tashmë duket se ndikojnë të tjera gjëra dhe dalin në sipërfaqe bindjet e tyre. Shumëkush nga ata e quan një të drejtë të vetën të vijë këtu dhe të shpallet pronar i një toke të huaj, qoftë kjo e shtetit apo e privatit. Legalizimi duhet të kishte nisur vite më parë, në mënyrë që të mos zhvillohej si proces në mënyrë konfuze dhe anarkike, sikundër është bërë. Tani do të dalë nevoja që aty ku janë krijuar këto qendra, të hapen rrugë, të funksionojnë institucionet e shërbimit dhe ato sociale dhe kulturore dhe një sërë procesesh të tjera, normale për qendrat e reja. Këto qendra e kanë këtë rrugë të vështirë përpara dhe, meqenëse i dhanë të drejtën vetes të ndërtojnë pa pyetur njeri, kujtojnë se pushteti nuk iu ka bërë ndonjë favor të madh dhe pastaj ankohen për atë çmim simbolik që iu është dhënë për truallin, ku kanë ndërtuar shtëpitë e tyre. Për fat të keq, u krijua kjo psikologji që mund të shpallesh zot i një toke që nuk të përket kurrsesi dhe nga fenomene të tilla më pas vuan i gjithë shteti. Kjo për faktin që ke të bësh me qytetarë që nuk kufizohen brenda asaj çfarë kanë trashëguar, brenda së drejtës së tyre, por mësojnë të jetojnë në mënyrë arbitrare. Ky është një problem i madh që duhet të trajtohet me kujdes dhe vendosmëri në të ardhmen. Jam i sigurt që derisa të vijë koha që këto zona të urbanizohen plotësisht, do të ketë fërkime mes kësaj kategorie dhe pushtetit.

Si e shikoni të ardhmen politike të ish- kryeministrit Nano pas zgjedhjeve të 18 shkurtit dhe ç`impakt mendoni se ka pasur takimi Berisha-Nano për të dy aktorët në elektorat?

Nëse mund ta lokalizojmë tek individët humbjen ose fitimin, do të thosha që nga e gjithë kjo garë Nano ishte personi që humbi më tepër si prestigj politik, duke qenë se edhe në zonën e tij, zgjedhore të Sarandës, ku ai bëri fushatë në favor të kandidatit të majtë, ky kandidat humbi. Në kushtet e tanishme Nano mund të kthehet te politika aktive, nëse bie në ndonjë marrëveshje me Ramën dhe Metën.

Nga ana tjetër, në politikë, kur ndërmerr të bësh një lëvizje, duhet të vësh mirë në balancë përfitimet që mund të kesh dhe humbjet, dhe në këtë llogari nuk është e thënë që të jesh gjithmonë i saktë. Kësaj here, takimi Nano-Berisha, Berishës nuk i dha atë që duhej, mund të them se shumë njerëz janë inatosur me të dhe mund të kenë votuar kundër, vetëm e vetëm për atë lloj spektakli që dha nga dalja me Nanon në Pallatin e Brigadave. Nuk e di sesa mund të jenë njerëzit që kanë votuar kundër, por jam i sigurt se ajo shkaktoi një zemërim të një pjese të elektoratit të djathtë, për këtë jam fare i sigurt. Nga ana tjetër, Nano që shpresonte të kthehej me një pamje fitimtari përmes mundësisë që i ofroi Berisha, edhe ai doli i humbur nga kjo. Me fjalë të tjera, ajo lëvizje që u bë, nuk rezultoi e lumtur dhe e mirë, por me rezultate negative për të dyja palët, nëse i referohemi opinionit publik.

Si i keni perceptuar kritikat e vëzhguesve ndërkombëtarë për procesin zgjedhor dhe si e konsideroni ju këtë proces, krahasuar me atë të korrikut 2005-së?

Para së gjithash duhet të kihet parasysh se këto zgjedhje u transformuan në një ndeshje të madhe, politike dhe doemos ky perceptim do të sillte edhe tensionin me vete.

Edhe pse diku pati ndonjë incident si në Gjirokastër, Ndroq dhe Mamurras, po të kesh parasysh se është një numër shumë i madh njerëzish, i angazhuar në këtë proces zgjedhor, doemos do të ketë brenda edhe elementë të pakontrolluar që bëjnë eksese. Këto që kaluam mund të konsiderohen si zgjedhje të mira dhe mendoj se nuk duhet të ndëshkoheshin me aq rreptësi nga vëzhguesit e OSBE/ODIHR-it.

Nga ana tjetër, zgjatjen e përfundimit të plotë të zgjedhjeve e konsideroj si negative dhe këtu ka përgjegjësinë e tij edhe Komisioni Qendror i Zgjedhjeve. Ky komision duhet të ishte më i saktë dhe më i qartë, sidomos më i shpejtë në veprimet e tij. Këto vonesa përsëri mund të na krijojnë një përshtypje të keqe para ndërkombëtarëve dhe përsëri mund të na akuzojnë se nuk i bëmë zgjedhjet ashtu siç duhet dhe kjo më duket mua se është gjëja më e dhimbshme lidhur me këto zgjedhje. Unë do t`i konsideroja këto zgjedhje lokale si një avancim krahasuar me ato të vitit 2005-së. Nuk ishin ashtu siç i dëshiroja, apo do të duheshin dhe shpresonim të ishin, por gjithsesi, janë një avancim.

Zgjatja e këtij procesi, i cili nuk do të dihet se kur do të mbarojë, pasi janë për t`u shqyrtuar edhe dyqind e ca ankesa, krijon një vakuum të rëndë të qeverisjes. Kjo, sepse kryetarët e vjetër të komunave dhe bashkive e kanë mbaruar mandatin e tyre, kurse këta të rinjtë nuk mund të fillojnë nga puna. Kështu që kemi një paralelizim të pushtetit lokal dhe qeveria qendrore nuk mund të punojë pa pushtetin lokal dhe prandaj është shumë e ngutshme që kjo të mbarojë sa më parë. Nëse ka njerëz që nuk e kuptojnë këtë problem, ata janë të papërgjegjshëm, është me të vërtetë urgjente që ky proces të mbyllet dhe secili të shkojë në vendin e tij në bazë të rezultateve që u arritën.

Në verën e këtij viti, parlamenti duhet të zgjedhë presidentin e ri. Mendoni se opozita mund ta bllokojë këtë proces, duke arritur në këtë mënyrë në zgjedhje të parakohshme?

Nëse e majta vendos ta bëjë këtë, ajo mund t’ia dalë në krye, pasi e djathta nuk mund të sigurojë dot e vetme 84 votat që i duhen për presidentin. Por, nga ana tjetër, ky do të jetë një akt tërësisht i papërgjegjshëm. Së pari, ne nuk kemi të përgatitur atë që quhet infrastrukturë për zgjedhjet dhe elementet dihen. Ne nuk kemi së pari një Kod Zgjedhor plotësisht të amenduar siç duhet, nuk kemi lista të sakta dhe dokumente të duhura të identifikimit të personave. Nga ana tjetër, duhet të ndërmerret edhe një reformë, për depolitizimin e organeve zgjedhore, në mënyrë që zgjedhjet të bëhen si në të gjitha vendet e zhvilluara të Evropës dhe më gjerë. Pa bërë këto, të bësh zgjedhje, do të thotë që të përsëritësh një situatë të ngjashme, ku njëra palë do t`i kontestojë dhe kjo është një rrugë pa krye. Ndaj, nëse ndonjë forcë politike mendon se është momenti për të dalë në krye, duke provokuar zgjedhjet, duhet të mendohet në radhë të parë për dëmin që bën, se ne nuk jemi të përgatitur ende për to dhe minimalisht na duhet një vit kohë për t`u përgatitur për zgjedhje.

Së dyti, zgjedhjet sjellin me vete një bllokim të ekonomisë së një vendi në radhë të parë. Nëse ne tani hapim perspektivën e zgjedhjeve të parakohshme, kjo do të thotë se edhe për shumë kohë investitorët e brendshëm dhe të huaj të rrinë në pritje të rezultatit të tyre. Kjo ndodh kryesisht tek investitorët e huaj, të cilët në momentin që vendosin të investojnë diku, e bëjnë këtë vetëm në vende që kanë stabilitet politik. Kjo do të thotë që ne të mbetemi në një gjendje vuajtjeje përsa i përket aspektit ekonomik. Ky është dëmi i dytë, i madh që i bëjmë vendit. Unë mendoj se forcat politike duhet të vazhdojnë të jenë konkurrente, por më parë duhet të zgjidhen këto probleme që janë emergjente.

Cila do të ishte rruga më oportune për t`u ndjekur, në mënyrë që gjatë zgjedhjes së presidentit mos të krijoheshin bllokime?

Për hir të stabilitetit politik dhe të një lloj marrëveshjeje të forcave politike në pozitë dhe opozitë do të ishte më e natyrshme që t`i lihej së majtës të propozonte një president. Kështu do të kishim edhe një balancim më të pranueshëm të pushteteve, megjithëse ekzekutivin e ka njëra palë dhe këtë pjesë të ekzekutivit e ka pala tjetër; do të duhej sikur kështu bënim një marrëveshje mbarëkombëtare, për të qeverisur vendin tani e mbrapa. Por, nuk përjashtohet as ajo që të jetë një kandidat i së djathtës, i pranueshëm edhe për palën tjetër. Gjithsesi, si kusht themelor për mua do të ishte që të gjendet një zgjidhje me konsensus dhe kjo bëhet e detyrueshme tani dhe për shkak të raportit të votave që kemi në parlament. Për mua do të ishte oportune që presidenti të zgjidhej me 110 vota, të ishte një institucion i balancuar që do t`i shërbente harmonisë politike.

Si e gjykoni qëndrimin e gjykatës në lidhje me mbajtjen në burg të kryetarit të Ballit Kombëtar, Artur Roshi dhe sekretarit të përgjithshëm të kësaj partie, Çelo Hoxha, në lidhje me akuzat për falsifikimin e firmës së të ndjerit Akile Rama?

Mbajtja në burg e dy eksponentëve të lartë të kësaj partie, edhe në kushtet kur falsifikimi të ishte provuar, do më dukej e padrejtë. Kjo, në momentet që nga gjykata nuk është verifikuar asgjë, më duket absurde. Maksimumi që mund të bënte gjykata për këtë “shaka banale” të kësaj partie, mund të ishte gjykimi në gjendje të lirë, sepse realisht i vë peshë një gjëje, kur ajo nuk e ka. Më vjen çudi me këtë zell të tepruar politik që po tregon prokuroria dhe gjykata ndaj kësaj çështjeje, duke qenë një akt që nuk ndikoi në mënyrë absolute në procesin zgjedhor dhe standardet e tij.

Intervistoi: Fatjona Mejdini

KESH, shkarkohet Beli, drejtori i ri Gjergji Bojaxhiu

Andi Beli është shkarkuar dje nga detyra e drejtorit të Korporatës Elektroenergjitike Shqiptare. Vendimi është marrë mbrëmë nga Këshilli Mikëqyrës i KESH-it, i cili ka shkarkuar Andi Belin, duke emëruar në postin e drejtorit të korporatës zëvendësministrin e Ekonomisë, Gjergji Bojaxhiun. Vendimi është ndërmarrë pas mbledhjes së këtij këshilli, i cili ka vendosur që Beli të mos jetë më në krye të korporatës. Bojaxhiu, i cili do të drejtojë tashmë një prej institucioneve më problematikë në vend është zgjedhur si personi më i përshtatshëm për drejtimin e tij. Vendimi për emërimin e Bojaxhiut në këtë detyrë ka qenë i mirëpritur prej anëtarëve të Këshillit Mbikëqyrës, pasi edhe më parë Bojaxhiu ka qenë pranë korporatës, duke qenë përgjegjës për sektorin e energjisë në Ministrinë e Ekonomisë. Në këtë mënyrë, Bojaxhiu është përzgjedhur si personi i duhur për të kryer reformat që qeveria ka planifikuar të ndërmarrë në vijim në sektorin energjitik dhe për KESH-in në veçanti.

LSI: Ndryshimet në qeveri kanë bllokuar administratën

Ndryshimet e pritshme në qeveri kanë bllokuar plotësisht punën e administratës". Kështu është shprehur nënkryetarja e LSI, Filloreta Kodra, gjatë një deklarate për mediat.

Për numrin 2 të LSI-së, mënyra dhe filozofia e ndjekur për realizimin e ndryshimeve në qeveri nga ana e forcave të djathta, janë përpjekje për të larguar vëmendjen e qytetarëve nga rezultatet - sipas saj - shumë të dobëta në qeverisjen e vendit. Duke e quajtur edhe një herë si fitore rezultatin e zgjedhjeve të 18 shkurtit nga ana e opozitës së majtë, Kodra shtoi se votat ishin një përgjigje e drejtpërdrejtë e qytetarëve ndaj qeverisjes së vendit.

Kreu i KQZ-së, Gjata, theksoi se komisioni po shqyrton deri në 10 ankesa në ditë

KQZ: Vonimi i rezultatit, pasojë e fluksit të ankimimeve

Komisioni Qendror i Zgjedhjeve reagoi ditën e djeshme, në lidhje me shtyrjen e përfundimit të procesit zgjedhor si rezultat i ankimimeve që janë në shqyrtim e sipër. Zëdhënësi i KQZ-së, Leonard Olli, theksoi se nuk ka asnjë lloj presioni nga faktori ndërkombëtar në lidhje me daljen e rezultateve, madje edhe shefi i Misionit të Vëzhguesve të Zgjedhjeve të OSBE/ODIHR-it, Jurgen Grunnet, i cili largohet nga Shqipëria në përfundim të procesit zgjedhor, ka theksuar që të vazhdojë puna konform ligjit. Sipas tij, shtyrja e nxjerrjes së rezultateve përfundimtare për zgjedhjet është e kushtëzuar nga fluksi i madh i ankimimeve dhe për këtë nuk mund të jetë faji i KQZ-së.

“Dalja e rezultateve përfundimtare zgjedhore do të jetë pak a shumë një 'odise', duke u nisur nga fakti se, fluksi i ankimimeve ka qenë shumë i madh. Deri tani janë 227 ankimime në total, duke përllogaritur këtu edhe ankimimet e depozituara para zgjedhjeve”, - theksoi Olli, duke shtuar, se përveç këtij procesi, partitë politike kanë të drejtën të ankimohen edhe në Kolegjin Zgjedhor.

“Ligji përcakton që do të ketë ankimime në KQZ dhe pastaj këto do të kalojnë edhe në Kolegjin Zgjedhor. Pra, nuk mund të ushtrojë askush presion, kur ka një kuadër ligjor, i cili duhet zbatuar me rigorozitet”, - shtoi zëdhënësi i KQZ-së. Nga ana tjetër, përfaqësuesi i Partisë Socialiste në KQZ theksoi se ky institucion duhet të procedojë më shpejt përsa i përket procesit të ankimimeve. Kryetari i KQZ-së, Çlirim Gjata, në lidhje me këtë çështje theksoi se, askush nuk ka të drejtë të paragjykojë punën e këtij institucioni zgjedhor. Sipas Gjatës, Komisioni Qendror i Zgjedhjeve po shqyrton deri në 10 ankimime në ditë dhe ky është një rendiment i lartë për këtë institucion.

Nga ana tjetër, në KQZ pritet të vijnë së shpejti edhe tabelat e rezultateve për njësitë vendore të mbetura.

“Nga momenti në moment pritet të vijnë edhe tabelat e rezultateve për njësitë vendore të mbetura, pasi është e pakuptueshme vonesa, por në bazë të informacioneve që kemi vazhdon të mbetet i njëjti justifikim, pamundësia për të llogaritur numrin e anëtarëve për këshilltar bashkiak apo komunal”, - theksoi zëdhënësi i KQZ-së, Leonard Olli.

Fatjona Mejdini

Bushati dhe Paskuqani shqyrtohen sot në KQZ

Komisioni Qendror i Zgjedhjeve shtyu për ditën e sotme shqyrtimin e ankimimeve për procesin zgjedhor në komunat e Bushatit dhe Paskuqanit. Në mbledhjen e radhës, KQZ-ja mori në shqyrtim çështjen e Bushatit, ndërkohë që anëtarët e këtij komisioni theksuan se janë në pritje të ankimimeve nga palët që kanë marrë pjesë në këto zgjedhje. Gjithashtu, anëtarët e KQZ-së kërkuan më tepër kohë për t'u njohur me ankimimet e depozituara për pasaktësi gjatë procesit zgjedhor në komunën e Paskuqanit. Për sa i takon Bashkisë së Elbasanit, pranë KQZ-së është depozituar një ankimim nga PS-ja, ndërkohë që edhe PD-ja ka deklaruar se do të protokollojë një ankimim pranë KQZ-së.

Nënkryetarja e Partisë Demokratike publikon rezultatet për 360 njësi vendore

Proporcioniali, e djathta 120

mijë vota më shumë se e majta

PD-ja dhe koalicioni i djathtë ka fituar në 235 njësi, ndërsa ai i majtë vetëm në 115. Me përqindje, 65% i takon koalicionit të djathtë dhe 32% koalicionit të majtë, ose 120 njësi më shumë atij të djathtë

Kryetarja e Kuvendit njëkohësisht nënkryetare e Partisë Demokratike, Jozefina Topalli, bëri publik rezultatin përfundimtar të zgjedhjeve në 360 njësi të qeverisjes vendore, mbështetur në rezultatet që disponon kjo parti dhe atyre të shpallura nga KQZ-ja. Sipas nënkryetares së Kuvendit, koalicioni qeverisës udhëheq si në mazhoritar, dhe në proporcional. Topalli tha se përsa i përket njësive të qeverisjes vendore, PD-ja dhe koalicioni i djathtë ka fituar në 235 njësi, ndërsa ai i majtë vetëm në 115. Me përqindje, 65% i takon koalicionit të djathtë dhe 32% koalicionit të majtë, ose 120 njësi më shumë atij të djathtë. Duke iu referuar rezultatit për mazhoritarin, përsa i përket totalit të votave, ajo tha se PD-ja dhe koalicioni i djathtë ka fituar 53% të votave, ndërsa ai i majtë 47%. Nënkryetarja e PD-së komentoi dhe rezultatet në proporcional. Sipas saj, PD-ja dhe koalicioni i djathtë ka fituar 53%, në krahasim me 43% që ka fituar ai i majtë, ose me përqindje, 10% më shumë ai i majtë.

Përsa i përket rezultateve për këshillat e bashkive, rezulton se PD-ja dhe koalicioni i djathtë ka fituar 741 këshilltarë, në krahasim me 584 që ka ai i majtë, ose i lexuar me përqindje, 53 % ai i djathtë, me 42% të së majtës. “Pra, janë 160 këshilltarë të djathtë më shumë se ata të majtë. Në përqindje, është mbi 11 % në avantazh koalicioni i djathtë, nga ai i majtë”, - tha Topalli. Në përfundim, ajo deklaroi se PD-ja dhe koalicioni i djathtë ka fituar 10 qarqe nga 2 që ka fituar e majta, ose pesë herë më tepër se ajo.

Alketa Alia

Për njësitë e qeverisjes vendore:

- PD-ja dhe koalicioni i djathtë ka fituar në 235 njësi, ndërsa ai i majtë vetëm në 115. Me përqindje, 65% i takon koalicionit të djathtë dhe 32% koalicionit të majtë, ose 120 njësi më shumë atij të djathtë.

Rezultatet për maxhoritarin:

-PD-ja dhe koalicioni i djathtë ka fituar 53% të votave, ndërsa ai i majtë 47%. Pra, 6% më shumë koalicioni i djathtë ose i lexuar me vota, 60 mijë vota është në avantazh ai i djathtë.

Rezultatet në proporcional:

- PD-ja dhe koalicioni i djathtë ka fituar 53%, në krahasim me 43 % që ka fituar ai i majtë, ose me përqindje, 10% më shumë ai i majtë. I përkthyer ndryshe, 120 mijë vota më shumë koalicioni i djathtë nga ai i majtë.

Rezultatet për këshillat e bashkive:

-PD-ja dhe koalicioni i djathtë ka fituar 741 këshilltarë, në krahasim me 584 që ka ai i majtë, ose i lexuar me përqindje, 53 % ai i djathtë, me 42% të së majtës. Pra, janë 160 këshilltarë të djathtë më shumë se ata të majtë. Në përqindje, është mbi 11% në avantazh koalicioni i djathtë, nga ai i majtë.

Rezultati për qarqet:

-PD-ja dhe koalicioni i djathtë ka fituar 10 qarqe nga 2 që ka fituar e majta, ose pesë herë më tepër.

Zogaj: Duhen korrigjuar problemet

e shfaqura në këto zgjedhje

Deputeti i mazhorancës, Preç Zogaj, reagoi dje, pas raportit të OSBE/ODIHR-it në lidhje me procesin elektoral të 18 shkurtit, duke theksuar se është i domosdoshëm korrigjimi i problemeve të konstatuara gjatë zgjedhjeve. Në këtë raport, i cili i paraprin atij përfundimtar, deputeti Zogaj është i mendimit se, në të reflektohen të gjithë oshilacionet që ka procesi. "Ne kemi probleme me zgjedhjet, pavarësisht se në substancë këto janë zgjedhje demokratike, gjithsesi konstatohen probleme përsa i takon votimit, numërimit në përgjithësi dhe pranimit të rezultateve nga partitë, në kuptimin e vlerësimit politik. Më pas ka ankesa për komuna të veçanta nisur nga vetë natyra e zgjedhjeve, që janë shumë të fragmentuara", - theksoi deputeti i mazhorancës. Ndër të tjera, ai ka shtuar se, zgjidhja e problemit të certifikatave duhet të jetë parësore dhe se shumë vende të tjera e konsiderojnë atë një çështje të mbyllur.

"Duhet t'i njohim mirë problemet që kanë zgjedhjet, t'i korrigjojmë dhe të gjejmë zgjidhje, në mënyrë që t'i japim fund kësaj historie tashmë banale. Vendet e tjera po prodhojnë makina, kompjutera, ilaçe, ndërsa ne jemi akoma të mbërthyer pas certifikatave. Kjo është shumë e trishtueshme dhe duhet të dalim patjetër nga kjo situatë", - tha deputeti i mazhorancës.

A. Alia

Të majtët i largohen kërkesës për zgjedhje të parakohshme në momentin e zgjedhjes së presidentit

Majko: Bamir Topi, figurë pozitive për president

Sekretari i Përgjithshëm i PS-së, Pandeli Majko, e vlerëson si pozitive kandidaturën e Bamir Topit për postin e presidentit, por ka theksuar se është ende herët për të diskutuar për këtë çështje. Majko vlerësoi Topin si një ndër figurat politike që ka kontribuar vazhdimisht në uljen e tensioneve politike, një ndër veçoritë që kërkon posti i presidentit. “Është ende herët të japësh koment, pasi unë e respektoj si koleg që padyshim ka dhënë shumë në uljen e tensioneve politike në parlamentin shqiptar, por jam shumë i rezervuar në dhënien e komenteve në lidhje me kandidimin e tij për postin e presidentit. Nga eksperienca që kam, unë mendoj se përgjithësisht fitimtare në të tilla raste janë kandidaturat që përmenden në çastin e fundit dhe jo ato që lakohen më parë", - u shpreh Majko, duke lënë të nënkuptohet mosmiratimin e ambicies tashmë të publikuar të ish-kryetarit socialist, Fatos Nano, për këtë post. Kreu i grupit parlamentar socialist nuk ka përjashtuar në këtë mënyrë mundësinë e gjetjes së konsensusit ndërmjet pozitës dhe opozitës lidhur me figurën e Bamir Topit si i mundshëm për president. Ndërsa opinionet e të majtëve, kryesisht ata afër Ramës, po përpiqen përditë e më shumë të gjejnë arsye për të larguar nga vëmendja atë që i kishin premtuar elektoratit të tyre, zgjedhjet e parakohshme. Opinionet e dhëna në studiot televizive të deputetëve afër Ramës, theksojnë mundësitë për shmangien e zgjedhjeve të parakohshme, në momentin kur do të zgjidhet presidenti, duke vënë kushtet e tyre. Kjo situatë politike ndërmjet pozitës dhe opozitës duket se po jep shenja të uljes së tensioneve politike, ndoshta të diktuara edhe nga thirrjet e ndërkombëtarëve për ulje të këtyre tensioneve pas zgjedhjeve të 18 shkurtit.

Reagimi për qeverinë

Sekretari i përgjithshëm socialist, Pandeli Majko, reagoi dje, edhe për hapat që qeveria “Berisha” po ndërmerr në drejtim të ndryshimeve në kabinetin qeveritar. Majko e ka vlerësuar si një situatë që nuk ofron asgjë konkrete, duke theksuar se matematika që po përdor Berisha për ndryshimet në qeveri nuk sjell asgjë konkrete në drejtim të vazhdimit të reformave. “Ne kemi mendimin se Berisha dhe qeveria e tij nuk po ofron asnjë gjë të re në situatën aktuale. E kam fjalën se më tepër po orientohet nga një histori matematikore sesa nga interesi për nxitjen e reformave në Shqipëri. Ajo që mua më duket e arsyeshme është që në një mënyrë apo në një tjetër ka filluar të mendohet për atë që do të konsiderohet si periudha post Berisha. Pra, në një mënyrë ose në një tjetër e djathta duhet të mendojë për një situatë post Berisha, sepse kjo qeveri aktuale, sado që të organizojë historinë e matematikës, po duket se po nxit një lloj krize tjetër brenda vetë gjirit të së djathtës, por edhe përballë opinionit publik. Politika nuk është vetëm matematikë, sigurisht që ajo është e rëndësishme, sigurisht që ajo është pjesë e krijimit të mazhorancave, por, nëse ecim kështu, do të ndodhemi në një situatë dëshpëruese për politikën shqiptare, ku do të kemi një mazhorancë që ka pushtetin dhe një opozitës që nuk e merr dot atë. Kjo situatë pastaj mund të krijojë edhe emergjenca të natyrave të tjera”, - tha Majko. Ai foli edhe për raportin paraprak të paraqitur nga OSBE/ODIHR-i në lidhje me procesin zgjedhor të 18 shkurtit. Sekretari i Përgjithshëm i PS-së, Pandeli Majko, u shpreh gjatë një prononcimi për mediat se, "raporti i OSBE/ODIHR-it është vazhdimi i logjikës së "shansit të humbur". “Tani po shpjegojnë elementet e tjerë lidhur me procesin zgjedhor dhe shqetësimit në lidhje me KQZ-në, si pjesa e transparencës dhe vonesat në vendimmarrje, të cilat esencialisht e bëjnë "qeverinë e zgjedhjeve" (KQZ) pjesë të problemit dhe jo të zgjidhjes përsa i përket çështjes së zgjedhjeve në Shqipëri", - tha Majko.

Deputetët e grupit parlamentar kundër parimit “Një anëtar, një votë”, ka hapësira për manipulime

Fino: 25 kryetarë të PS-së në rrethe do të votëbesohen

Nis “fshesa” Rama në PS. Kundërpërgjigjen kundërshtarët: Rama i fali Metës bastionet historike të PS-së dhe në këtë mënyrë shkatërroi partinë

Sekretari organizativ i PS-së, Bashkim Fino, deklaroi dje, se 25 kryetarë të PS-ë në bazën e partisë do t`i nënshtrohen procesit të votëbesimit. Kjo për shkak se PS-ja humbi në zonat e tyre në zgjedhjet e 18 shkurtit dhe kjo procedurë është e përcaktuar në statutin e PS-së, i miratuar në kongresin e majit të vitit 2005-së.

“Nga kjo pikëpamje më duhet të them se një pjesë e mirë e kryetarëve të degëve tona, lokale, po të kemi parasysh rezultatet, të cilat na janë ofruar, kam përshtypjen që rreth 20 deri 25 kryetarë partie të rretheve të Shqipërisë duhet të votëbesohen automatikisht”, - tha dje, Bashkim Fino. Përveç kësaj, socialistët do të nisin së shpejti procesin e zgjedhjeve në parti, ku përfshihet zgjedhja e të gjitha strukturave të kësaj partie sipas parimit “Një anëtar, një votë”. Kjo është deklaruar pak ditë më parë nga sekretari organizativ i PS-së, i cili tha se në procesin e zgjedhjeve në PS sipas parimit “Një anëtar, një votë”, do të përfshihet edhe kryetari i PS-së, Edi Rama. Ndërsa burime pranë grupit parlamentar socialist, thanë dje, se shumica e grupit parlamentar socialist janë kundër zbatimit të këtij parimi aktualisht. Kjo pasi sipas tyre, gjatë procesit të zgjedhjes së disa krerëve socialistë gjatë vitit të shkuar sipas parimit “Një anëtar, një votë”, janë vënë re manipulime dhe abuzime serioze me këtë proces. Deputetët socialistë, të cilët duket se janë në shumicë kundër planeve të Ramës për të pastruar partinë nga kundërshtarët e tij, duke përdorur parimin “Një anëtar, një votë”, janë të vendosur të argumentojnë qëndrimin e tyre kundër kryetarit socialist. Sidoqoftë, njerëzit pranë Ramës janë të angazhuar të përgatisin procesin e zgjedhjeve në parti. Ndërsa njerëz pranë Ramës kanë nisur sulmet mediatike ndaj kundërshtarëve të Ramës në PS për ta bërë më të lehtë shmangien nëpërmjet parimit “Një anëtar, një votë”, të figurave “të vjetra” në PS, ku mendohet të përfshihen anëtarë të forumeve të larta drejtuese të kësaj partie, të cilët dolën kundër Ramës për marrëveshjen me Ilir Metën në prag të zgjedhjeve të 18 shkurtit.

Analiza

Nga ana tjetër, analiza që pritet të zhvillohet nëpër forumet e PS-së për zonat ku humbi PS-ja më 18 shkurt dhe kryesisht në ato që u angazhuar deputetët socialistë, do të hapë një debat ndërmjet dy grupeve të kësaj partie. Marrëveshja ndërmjet Edi Ramës dhe Ilir Metës për zgjedhjet e 18 shkurtit, ku iu lanë shumica e bastioneve socialiste LSI-së, nuk mori kurrë miratimin e forumeve të larta, drejtuese, madje as të sekretarëve socialistë. Marrëveshja u nënshkrua nga Rama e Meta, ndërsa të gjitha forumet mbeten jashtë saj dhe për pasojë, shumë prej anëtarëve të kryesisë socialiste u shprehen kategorikisht kundër kësaj marrëveshjeje. Kjo situatë solli një grup të ri kundërshtar të Ramës, përveç deputetëve që ishin të deklaruar publikisht si mbështetës të ish-kryetarit socialist.Ylli Bufi e Kastriot Islami, Taulant Dedja apo edhe Luan Memushi, ishin deputetët që u aktivizuan plotësisht në luftën politike kundër asaj që ata e quajtën “falje e PS-së tek Ilir Meta”. Këta deputetë që pritet të jenë më të sulmuarit në analizën që do të zhvillohet në PS, pritet të kenë si argument mbrojtës pikërisht mosmiratimin e marrëveshjes së Edi Ramës me Ilir Metën, e cila prodhoi humbjen e PS-së në bastionet e saj, tradicionale. Duke qenë në shënjestër të sulemeve të Ramës, deputetët që guxuan ta kundërshtojnë vetëm pak ditë para zgjedhjeve kryetarin e tyre, janë përgatitur të hidhen në kundërsulm, duke akuzar Edi Ramën si autor të shkatërrimit të bazës së PS-së, pasi marrëveshja me Ilir Metën shkaktoi humbjen dhe çoroditjen e bazës së partisë. Nga statistikat e rezultateve të 18 shkurtit, del se shumica e krerëve të njësive vendore të opozitës në zonat bastione të PS-së i përkasin LSI-së. Dhe kjo pritet të jetë edhe pika më e fortë e Bufit, Islamit dhe deputetëve të tjerë, socialistë, të cilët që në fillim u pozicionuan kundër marrëveshjes me LSI-në në bastionet socialiste. Ata kishin parashikuar humbjen e bastioneve dhe e deklaruan publikisht, gjë që u vërtetua në rezultatet e zgjedhjeve të 18 shkurtit.

Luljeta Progni

Zyrtari i lartë i NATO-s, John Colston, vlerëson reformat e arritura në vend

NATO: Të bashkëpunohet për reformat

“Duke respektuar vlerësimin e OSBE/ODIHR-it, dëshiroj të vlerësoj se zgjedhjet u zhvilluan në një klimë konkurruese, reale, procesi i votimit reflektoi vullnetin e lirë të elektoratit shqiptar dhe se forcat e rendit mbajtën një qëndrim korrekt e profesionist”

NATO mbështet raportin e OSBE/ODIHR-it për zgjedhjet dhe thekson se partitë duhet të bashkëpunojnë për reformën zgjedhore dhe për të gjitha reformat.

Kështu është shprehur John Colston, i cili vjen në krye të Ekipit të Zgjeruar Faktmbledhës të NATO-s, për të bërë vlerësimin e ecurisë së Planit Kombëtar të Veprimit për anëtarësim në NATO.

Gjatë një takimi me kryeministrin, Sali Berisha, ky i fundit prezantoi reformat e ndërmarra në vend, përsa i përket luftës kundër krimit të organizuar, trafiqeve, korrupsionit, reformat për konsolidimin e shtetit ligjor dhe zhvillimin ekonomik të vendit me ritme të shpejta. “Përsa i përket reformave në fushën e mbrojtjes, kryeministri Berisha e njohu me arritjet në procesin e transformimit të Forcave të Armatosura dhe shndërrimin e tyre në një ushtri moderne dhe profesioniste të standardeve të NATO-s, si dhe angazhimin e qeverisë për mbështetjen e gjithanshme të kësaj reforme, në veçanti rritjen e buxhetit në masën 2 për qind të GDP-së për vitin 2008-të. Gjithashtu, kryeministri shprehu vendosmërinë e qeverisë për rritjen e pjesëmarrjes së Shqipërisë në misionet paqeruajtëse të NATO-s, si dhe vazhdimin e politikës konstruktive dhe të bashkëpunimit në rajon”, - thuhet në njoftimin e Kryeministrisë. “Përsa i përket zgjedhjeve lokale, kryeministri Berisha u shpreh se qeveria e mbajti premtimin, duke zhvilluar zgjedhje të lira, që reflektuan vullnetin e elektoratit shqiptar. Nga ana e tij, Zoti Colston u përgjigj se, duke respektuar vlerësimin e OSBE/ODIHR-it, dëshiroj të vlerësoj se zgjedhjet u zhvilluan në një klimë konkurruese reale, procesi i votimit reflektoi vullnetin e lirë të elektoratit shqiptar dhe se forcat e rendit mbajtën një qëndrim korrekt e profesionist. Zoti Colston shprehu përkrahjen e tij për reformat e ndërmarra në vend dhe vlerësoi arritjet në luftën kundër krimit të organizuar, trafiqeve dhe korrupsionit, kontrollit të kufijve dhe masat në fushën e sigurisë, reformat në fushën ekonomike dhe atë të mbrojtjes. Gjithashtu, ai vlerësoi rolin konstruktiv dhe marrëdhëniet e mira që Shqipëria ruan me të gjitha vendet e rajonit. Zoti Colston falënderoi në veçanti për përkrahjen që Shqipëria i ka dhënë NATO-s në misionet e paqes në Irak, Afganistan, Bosnjë-Hercegovinë dhe vlerësoi lart përpjekjet e Shqipërisë për të rritur këtë pjesëmarrje”, - vijon më tej njoftimi.

Gjatë këtij takimi, Colston theksoi se NATO përkrah dhe mbështet tërësisht aspiratën e Shqipërisë për t’u anëtarësuar në Aleancë dhe theksoi domosdoshmërinë e vazhdimit të reformave në konsolidimin e shtetit ligjor, luftën kundër krimit të organizuar, trafiqeve dhe korrupsionit.

NATO: Shqipëria në rrugë të mbarë për anëtarësimin

Ministri i Mbrojtjes, Fatmir Mediu, priti në një takim të veçantë Zv.sekretarin e Përgjithshëm të NATO-s, John Colston, i cili kryeson ekipin e lartë të NATO-s që merr pjesë në Takimin Vjetor për Vlerësimin e Procesit të Planifikimit dhe Rishikimit (PARP). Në këtë takim u diskutua për procesin e reformave të Mbrojtjes në Shqipëri, progresin e bërë, arritjet e shënuara dhe kërkesat që shtrohen për ritmet e punës për plotësimin e objektivave dhe të standardeve për marrjen e ftesës për anëtarësimin e Shqipërisë në samitin e ardhshëm të NATO-s.

Në përfundim të këtij takimi dy personalitetet e larta dhanë edhe një konferencë për shtyp. Në fjalën e tij ministri Mediu theksoi se, "është një ditë shumë e rëndësishme për Shqipërinë dhe veçanërisht për Forcat tona të Armatosura zhvillimi i këtij takimi me një ekip të nivelit të lartë të NAT0-s. Ne po diskutojmë për çështje të rëndësishme që kanë të bëjnë me reformat në FA, të cilat janë angazhuar dhe po punojnë për të marrë ftesën për anëtarësim në NATO në samitin e ardhshëm të saj".

Ministri Mediu falënderoi zotin Colston, i cili ka qenë kurdoherë i angazhuar për reformat në Shqipëri dhe nëpërmjet tij Sekretarin e Përgjithshëm të NATO-s, Shefer, për mbështetjen që i ka dhënë vendeve të Kartës së Adriatikut për të marrë ftesën për në NATO.

Nga ana e tij, Zv.sekretari i Përgjithshëm i NATO-s, Colston, falënderoi ministrin Mediu për mbështetjen që i kanë dhënë këtij ekipi të nivelit të lartë të NATO-s. “Ky ishte edhe një rast i mirë për NATO-n, - tha zoti Colston, - për të parë nga afër progresin që ka bërë Shqipëria dhe Forcat e saj të Armatosura për plotësimin e standardeve për në NATO”. "Vërej me kënaqësi, - theksoi më tej ai, - progresin e madh që është bërë në Shqipëri, angazhimin e qeverisë shqiptare për të rritur buxhetin e Mbrojtjes në 2% të GDP-së deri në vitin 2008-të, angazhimet e tjera për ristrukturimin e FA-së, për vazhdimin dhe zgjerimin e pjesëmarrjes tuaj në operacionet paqeruajtëse, etj".

“Shqipëria është në rrugën e duhur për krijimin e një force ushtarake, profesioniste dhe brenda standardeve që kërkon marrja e ftesës për anëtarësim në NATO”, - tha në përfundim të fjalës së tij zoti Colston.

KOMENTE

Z. Derens dëshpërohet përsëri

(“Le Monde Diplomatique” për Kosovën)

D. Kokonozi

Pas të një artikulli të disa muajve më parë në Le Monde Diplomatique, ku paralajmëronte për rrezikun e krijimit të Shqipërisë Etnike, këto ditë përsëri po në të njëjtën gazetë, i njëjti autor, J. A. Derens, paralajmëron botën se pavarësia e Kosovës është as më pak e as më shumë, por një bombë me shpërthim të vonuar.

Jean Arnault Derens, siç njoftohet, është kryeredaktor i site-it frankofon Le Courrier des Balkans, që ndonëse nuk është nga burimet më të besueshme të informacionit mbi vendet ballkanike, ai megjithatë mbetet një site i rëndësishëm dhe padyshim z. Derens ka pjesën e meritës së tij në këtë mes. Personalisht ai është nga personat e mirinformuar për çështjet politike të Ballkanit, ndërsa njohjen e thellë që zotëron për problemet e Kosovës e ka treguar edhe në librin e tij Kosova, viti zero, që u botua vitin e kaluar.

Megjithatë, kur një e përmuajshme aq e rëndësishme si Le Monde Diplomatique i lë atij në përdorim plot dy faqe për një dosje të titulluar Pavarësia e Kosovës, një bombë me plasje të vonuar, nuk mund të mos shtyhesh të shohësh me thellë se cila është analiza e tij për këtë çështje, ku është fshehur kjo bombë, ndërkohë që terma të tillë sot nuk përdoren më as në shtypin antishqiptar, i cili po detyrohet të pranojë një realitet tjetër.

Arsyet pse merr përsipër rolin e atyre që në Bibël njihen si profetë të fatkeqësive, nisin e shfaqen nga pak në artikullin e dytë të dosjes, që titullohet As bisedime as kompromis. Në të ai ka një frazë, ku thotë se në emër të ndershmërisë intelektuale duhet pranuar se në pakon e M. Ahtisaarit nuk duken gjurmët e asnjë lloj kompromisi. Ahtisaari për të nuk ka marrë fare parasysh arsyetimet e Beogradit. Kjo të lë të kuptosh se, sikundër në rastin e ndarjes së një parcele të harruar fshati, ku zgjidhja midis pretendentëve ndodhet aty diku nga mesi i parcelës, për z. Derens ndërmjetësi i OKB-së duhej të kufizohej e të merrte parasysh gjysmat e pretendimeve të serbëve dhe gjysmat e atyre të shqiptarëve. Dhe sipas kësaj logjike, të gjithë do të mbeteshin të kënaqur.

Ndonëse, më tej është e vërtetë ajo çka thotë ai se gjatë gjithë kësaj kohe nuk ka patur negociata të vërteta midis Beogradit dhe Prishtinës, megjithatë ai mbetet vetëm në sipërfaqe të çështjes. Që në fillim për të gjithë ka qenë e qartë se negociatat midis Prishtinës dhe Beogradit nuk është se kishin mbetur për t`u hapur në kohën tonë. Duhet pranuar se në këtë rast, komuniteti ndërkombëtar, në një farë mënyrë është ftuar të jetë i pranishëm në mbyllje të këtyre "negociatave", që historikisht kanë nisur të paktën një shekull para. Dhe historia e njeh mirë se Beogradi jo vetëm që kurrë nuk ka marrë parasysh kërkesat e popullit të Kosovës, por ai ka vepruar si një makinë e programuar për ta zhdukur atë. Nga ana tjetër, nuk duhet harruar se pjesë e "kompromisit" dhe e haraçit të shqiptarëve janë vuajtjet dhe gjaku i derdhur lumë, masakrat, gjenocidi, familjet e zhdukura, fshatrat e djegura, gratë e përdhunuara, inteligjenca e shfarosur sistematikisht. Histori që nuk ka filluar në vitin 2000. Z. Derens mund ta harrojë këtë, se vuajtjet e të tjerëve harrohen kollaj, por ata që i kanë ende plagët e hapura, nuk mund të kenë të njëjtin mendim.

Natyrisht, as që duhet pritur që në shkrimin e z. Derens të lihej mënjanë shqyrtimi i problemeve dhe përvojës së të drejtës ndërkombëtare për të gjetur një paralele historike dhe për t`u pozicionuar në to rastin e Kosovës si një rregull a si një përjashtim (në raport me rrethanat e disa vendeve të tjera në Kaukaz e gjetiu). Kështu, në nënartikullin e titulluar Pjesa e fundit e mozaikut ballkanik, ai ndërkohë që i bën jehonë idesë se "shpërthimi i Jugosllavisë ka filluar në Kosovë dhe do të mbyllet po aty, ngre një sërë problemesh të një natyre tjetër nga ato që jemi mësuar të dëgjojmë kohët e fundit. Kështu, si pengesë kryesore të pavarësisë së Kosovës ai nuk sheh më fort doktrinën e pansllavizmit rus apo dhe mitin e vëllazërimit ruso-ortodoks, por fytyrën e re që po tregon V. Putini ndaj vendeve të perëndimit. Aty sillet si shembull i kësaj politike të re fjalimi i tij më 10 shkurt në Mynih, ku shefi rus foli për "hegjemoninë amerikane". Pra, jepet të kuptohet se e ardhmja e Kosovës mund të vihet në rrezik si një përpjekje e Rusisë për të treguar se ajo ka rifituar pozicionin e saj, të dikurshëm në arenën ndërkombëtare.

Një pjesë e analizave të kësaj dosjeje të “Le Monde Diplomatique” i kushtohet rolit dhe kushteve, në të cilat komuniteti ndërkombëtar do të ushtrojë paralelisht pushtetin e ve,t të ardhshëm në Kosovë. Kjo për z. Derens nuk parathotë asgjë të mirë. E para, se rezultatet e një pushteti të tillë, paralel mund t`i shohim çdo ditë në Bosnjë-Hercegovinë, ku ato ai i cilëson "zhgënjyese", dhe e dyta, sepse në Kosovë, tashmë, ekziston Lëvizja Vetëvendosje, e cila, enda pa u vendosur ky pushtet paralel, ka mobilizuar një numër jo të vogël njerëzish kundër tij, të cilët dinë të jenë edhe të dhunshëm, siç tregoi manifestimi i 10 shkurtit të këtij viti, ku u vranë dy nga anëtarët e saj.

Ai thotë se është gjithnjë e më i madh numri i shqiptarëve në Kosovë që e kanë të vështirë që tani t`i durojnë "gangsterët e fuoristradave të bardha", siç i quajnë ata funksionarët e OKB-së dhe të organizmave të tjera, ndërkombëtare, gjë që në të vërtetë mbetet për t`u vlerësuar objektivisht sa të vërtetë ka brenda. Natyrisht, qeverisë së ardhshme në Kosovë do t`i duhet të japë prova se është në gjendje të ruajë rendin në vend, por ta shohësh “Lëvizjen për Vetëvendosje” të A. Kurtit si potencialisht të rrezikshme për ta ardhmen, është pak a shumë njësoj sikundër t`i gjykosh si destabilizuese për rendin kushtetues, francez manifestimet e pasuesve të Zhoze Bovesë kundër mbjelljes së bimëve të modifikuara gjenetikisht.

Si pjesë jo pa interes e kësaj dosjeje relativisht të gjerë të Le Monde Diplomatique mbi Kosovën, mbetet trajtimi i problemeve ekonomike të vendit në raport me ato politike. Duke qenë se sipas z. Derens zgjidhja që propozon Ahtisaari do të lërë të pakënaqur si serbët, ashtu edhe shqiptarët, kjo mund të përbëjë një përzierje tepër eksplozive në një vend, ku papunësia prek më shumë se gjysmën e popullsisë.

Natyrisht, nga ky vështrim i shpejtë në këtë dosje të fundit të Le Monde Diplomatique për Kosovën vërehet se ka një sërë të vërtetash, por nuk mungojnë edhe qëndrimet dhe njohjet virtuale të realitetit kosovar, të dinamikës së tij dhe mbi të gjitha vërehet mosnjohja e mobilizimit jo vetëm të klasës politike, por edhe e një numri gjithnjë e më të madh institucionesh dhe intelektualësh të angazhuar në rindërtimin e vendit. Njohja e kësaj force të gjallë, mbase do të kishte ndikuar për qëndrime më pak pesimiste nga ana e artikullshkruesit.

Nga Resmi Hibraj

Prostitucioni Mediatik

Aktiviteti i mediave shqiptare po fiton dita-dites konture të ngjashme me profesionin më të vjetër të shoqërisë njerëzore. Shumica e gazetave dhe televizioneve janë shndërruar në “konkubina” të politikanëve të fuqishëm politikisht e financiarisht, duke u vënë totalisht në shërbimin e tyre, edhe pse në dukje ata paraqiten si media apo gazetarë të pavarur. Është e dukshme deri në absurditet, se në median shqiptare ka gjithçka përveç pavarësi dhe etikë profesionale. Gazetarët janë mbërthyer nga “epshi” që ngjall përkitja në klanet e politikës dhe afërsia me politikanët me peshë dhe xhepa të rëndë. Ata (gazetarët) nuk i sjellin publikut news, ata krijojnë news, ata e shtrembërojnë, e çngjyrosin e masakrojnë të vërtetën për hir të interesave të padronëve të tyre dhe i sjellin publikut një realitet të stisur, i cili pastaj sintetizohet në aksione politike me pasoja të frikshme për demkoracinë dhe realitetin social të vendit. Ata nuk ngurrojnë të dramatizojnë komiken dhe të komedizojnë tragjiken, ata nuk ngurrojnë të thurin rrjeta mbrojtëse për kriminelet, qofshin këta zyrtarë apo ordinerë, ata nuk ngurrojnë të hedhin baltë mbi ata që guxojnë të luftojnë krimin e të jenë të virtytshëm.

Në botën e zullumshme të medias, ku identiteti mediatik shkrihet me atë politik dhe ku stafi editorial nuk kontrollon informacionin që botohet, por boton atë çka kontrollohet, gjen vërtetësi aforizma “Mjetet e justifikojnë qëllimin”, sepse, në dukje, mjetet që përdor media janë tërësisht demokratike dhe liria e fjalës është paradigma e lirive themelore të njeriut, çka në thelb përmbledh edhe të drejtën e medias për t`u bërë pjesë e politikës e pse jo edhe shërbëtore e saj. Por, qëllimi është tejet i mbrapshtë, ai është news i blerë e i rremë, teksa monopolizon lirinë e shtypit dhe e kthen këtë mjet të fuqishëm propagande në një armë për të goditur kundërshtarin politik, sfidantin e brendshëm, insitucionet ekzekutive e juridike e kështu me radhë.

Këtë rol normalisht e luan shtypi i vetë partive, si një zëdhënës legjitim i propagandës shurdhuese që bëjnë këto parti dhe rezultati është që pakkush dëshiron të lexojë shtypin partiak. Kjo mungese efikasiteti i shtyn politikanët të rekrutojnë mediat e “pavarura”, të cilat kanë apel më të gjerë dhe më të besueshëm dhe kështu, fuqia bindëse e propagandës shumëfishohet, pa humbur kredibilitetin që vuan rëndom gjatë masivizimit të mesazhit.

Padyshim, shtypin e pavarur dëshiron ta lexojë gjithkush, duke shpresuar se në mesazhin e pakushtëzuar nga axhendat politike, ne si lexues do të gjejmë pasqyrimin e analizës personale, qytetare, që kërkon përgjigje dhe alternativa zhvillimi. E vërteta e hidhur është që në shtypin e “pavarur” na serviret e njëjta menu bajate që gjendet në shtypin partiak, por këtë radhë e maskuar nën legjitimitetin e shtypit të lirë, gjithpërfshirës e pushtet-sfidues.

Në mes të shumë sfidave që vuan shoqëria shqiptare, më pak e përmendur, por jo më pak e rëndësishme është edhe mungesa e shtypit vërtet të pavarur, të çliruar nga prangat e politikës, që kthehet në përçues të frymës progresiste, që sfidon politikën e mbrapshtë, që denoncon paligjshmërinë dhe ballafaqon papërgjegjshmërinë politike me përgjegjësinë sociale. Kjo mungese sjell pasoja të rrezikshme për shoqërinë, sepse ajo manipulon mendimin popullor. Masat e lexojnë shtypin për t`u informuar dhe njëkohësisht për t`u njohur me analiza dhe sinteza prapaskenash që politika servir rregullisht, por shtypi shërbëtor i politikës jo vetëm nuk e ka këtë funksion, por përkundrazi, largohet përfundimisht nga misioni që duhet të kryejë. Shembujt e “prostitucionit mediatik” janë të shumtë dhe të lehtë për t`u identifikuar. Le të marrim rastin më të freskët, kur Rama dhe socialistët mobilizuan tri gazetat më të mëdha në vend, në një fushate absurde vetëshpagimi, që do t`i dukej lëvizje e dëshpëruar medias perëndimore. Nëse skandali i fotove nudo do të ndodhte diku tjetër, media do të sulej e uritur për të kapitalizuar në një mundësi të tillë dhe toni fshikullues i medias do të ishte dërrmues për politikanin në fjalë. Një gjë e tillë ndodhi në SHBA gjatë skandalit të presidentit Clinton. Shtypi ishte shumë i ashpër në reagimin e tij dhe kjo me të drejtë, duke pasur parasysh implikimet madhore që ka figura e presidentit. Në Shqipëri ndodh krejt e kundërta, fuqia e pushtetit dhe parasë lan çdo mëkat, dhe mbulon edhe lakuriqësinë morale më ekstreme. Suksesi i Ramës në zgjedhjet lokale mund t`i atribuohet pa frikë fushatës intensive të mediave ushtare, të cilat sulmuan këdo që mundën, duke glorifikuar Ramën e “viktimizuar pa të drejtë”.

Ishin po këto gazeta kryesore që gjatë mocionit të mazhorancës për shkarkimin e prokurorit Sollaku i dedikuan çdo rresht të tyre demaskimit të politikës agresive të qeverisë në kurriz të pushtetit legjislativ. Ironikisht, janë po këto gazeta-avokate të të drejtave të njeriut, që arrestimin e gazetarit Çelo Hoxha e përtypën në heshtje dhe nuk e morën mundimin ta konsiderojnë sulm të legjislativit mbi shtypin e lirë, siç do të kishte ndodhur pa dyshim, nëse një gazetar i majtë do të kishte pësuar të njëjtin fat.

Tendenca është e qartë, siç është edhe kahu i orientimit të “shtypit të pavarur”; “Prostitucioni mediatik” është i centralizuar dhe ai ushtrohet, aty ku oferta është më e majme. Si pasojë, kristalizimi i aferave banale politikë-shtyp do të rëndojë gjatë mbi fatet e demokracisë shqiptare. Mediat pa indipendencë, personalitet e integritet profesional kontribuojnë fuqishëm në shaktërrimin e balancës shtyp i lirë-politikë, duke i mohuar kështu publikut të vetmen mundësi për të lexuar vërtetësinë e jetës politike në vend.

INTERVISTA

Flet kryetarja e Delegacionit të Parlamentit Evropian për Evropën Juglindore, Doris Pack

Pack: Po përgatisim raportin

për të kërkuar president konsensual

Eurodeputetja nga Gjermania shpjegon në një intervistë të zgjeruar qëndrimin mbi zgjedhjet lokale, konsideratat në lidhje me politikën e Ramës dhe rrëfen për herë të parë sesi Rama nuk pranoi ta takonte atë dhe raportuesin e PE-së, edhe pse i kishte kërkuar një takim atij më përpara

Zonja Pack, ju keni qenë në Shqipëri gjatë zgjedhjeve si zakonisht. Fillimisht desha t’ju pyes, si u zhvilluan zgjedhjet gjatë ditës së votimit?

Dita e votimit ishte korrekte. Pati probleme me disa qendra që nuk u hapën në kohë, pasi mungonte dokumentacioni. Por, për herë të parë nuk pashë probleme me listat e votuesve dhe kjo më bëri përshtypje dhe isha e kënaqur. Por ne nuk mund të shohim vetëm ditën e zgjedhjeve, por gjithçka ndodhi rreth këtyre zgjedhjeve.

Pas zgjedhjeve ka patur një raport nga ODIHR-i lidhur me këtë, ku thuhet se nuk janë arritur standardet, a jeni dakord me këtë?

Natyrisht të gjithë e dinë që kam qenë shumë kritike para Krishtlindjeve, kur unë i kërkova politikanëve të arrinin konsensusin për të garantuar zhvillimin normal të zgjedhjeve. Kishte probleme me mungesën e kartave të identitetit, por kjo është një gjë që ekziston para shumë kohësh, prej 17 vjetësh. Pra, nëse opozita do dëshironte të kishte dokumente më të qarta, duhej ta kishte bërë këtë gjatë 8 viteve. Unë shpresoj me të vërtetë që qeveria aktuale do t’i kushtohet kësaj detyre për t’i pajisur qytetarët me një kartë identiteti. Me një kartë nuk ka probleme për të votuar, siç është me certifikatat. Dhe gjithçka që duhet, është vetëm një regjistër. Dhe zgjedhjet e ardhshme të vitit 2009-të duhen organizuar në një klimë të qartë dhe të pastër si në një demokraci normale.

Zonja Pack, nuk është vetëm problemi i dokumenteve për zgjedhjet, por folët edhe për klimën politike, mungesën e vullnetit mes politikanëve. Çfarë mendoni për këtë?

Ky është një problem që ekziston prej shumë kohësh në Shqipëri. E dini çfarë? Në Shqipëri fjala kompromis nuk është shumë e dashur. Të gjithë mendojnë se duke përdorur pushtetin që ke, atëherë je dikushi, por ky është një budallallëk. Kompromisi është një instrument që përdoret dhe që duhet të përdoret gjithandej, ku jemi dy, tre ose katër. Ne, në Parlamentin Evropian, jemi 27 vende dhe nuk është aspak e lehtë të gjesh një konsensus apo një kompromis edhe brenda grupit të partisë time, politike apo te socialistët, pasi kemi shumë kombe të përfshira. Kolegët e grupit tim të vendeve të tjera nuk kanë të njëjtat pikëpamje me mua, por duhet gjithmonë të gjendet kompromisi, me të cilin Ballkani nuk është familjarizuar shumë. Por ky është një problem që nuk e keni vetëm ju në Shqipëri. Këtë problem e kam hasur edhe me boshnjakët. Por, ka ardhur momenti që fryma e kompromisit duhet të futet në skenën politike. Ideja e kompromisit shihet edhe si dobësi nga politikanët, por mendoj se duhet folur me të gjithë politikanët në terren se në një kohë të vështirë duhet gjetur patjetër një kompromis, sepse përndryshe nuk mund të drejtosh një vend. Pra, nëse dikush nuk e ka shumicën absolute, duhet të bëjë patjetër një kompromis. Kështu ndodhi me zgjedhjet dhe ndoshta do të ndodhë kështu së afërmi edhe me kandidaturën e presidentit.

Zoti Berisha erdhi në pushtet duke premtuar se do t`i bënte kartat e identitetit, por as ai nuk e bëri këtë gjë.

Kjo është diçka që kam kritikuar gjithmonë, sepse premtimet duhen realizuar. Por nuk mund të fajësoj vetëm zotin Berisha, pse nuk bëri gjatë një viti, atë që të tjerët nuk e bënë gjatë 8 vjetëve. Pra, nuk është mirë që s`e ka bërë akoma, por shpresojmë që do ta bëjë tani, pasi presim prej 17 vjetëve. Dhe ka ardhur koha që kjo gjë të bëhet. Por nuk është nevoja që të flitet për faje, megjithëse kam folur gjatë fushatës zgjedhore dhe para saj dhe tani duhet që çdo politikan shqiptar të marrë përgjegjësitë e tij që t’i japë Shqipërisë imazhin e një demokracie të pjekur. Dhe një demokraci e pjekur do të thotë gjithashtu se duhet të keni të paktën edhe kartën e identitetit. Të paktën.

Zonja Pack, le të flasim pak edhe për atë që zoti Berisha ka premtuar dhe çfarë është bërë. E lexoni rezultatin e zgjedhjeve, ku Partia Socialiste fitoi shumicën dhe Tiranën si një dënim ndoshta për arsyen e mosmbajtjes së të gjitha premtimeve, a mund ta analizoni se çfarë ka bërë dhe çfarë jo?

Jo, nuk jam në pozicionin për të gjykuar se çfarë ka bërë në të vërtetë dhe çfarë nuk ka bërë qeveria, por rezultati është i tillë që tregon se ka njerëz që nuk janë të kënaqur. Atëherë ky rezultat dhe mendoj se qeveria dhe zoti Berisha e kuptojnë se duhet të ketë ndryshime, ndoshta në politikat e tyre, ndoshta kjo varet edhe pse nuk janë mbajtur premtimet, por një vit e gjysmë nuk është shumë. Është një kohë e shkurtër, nëse duan të bëjnë diçka. Unë e di shumë mirë, ata kanë për të luftuar korrupsionin dhe ajo që dua të theksoj, është gjithçka është bërë në fushën e edukimit. Kishte një terren politik me të vërtetë të sëmurë. Kishte shumë korrupsion në brendësi dhe çfarë nuk mund të ndikojë, pasi çfarë kanë bërë. Kam me të vërtetë një respekt të madh për ndryshimin në fushën e politikave të edukimit. Por nuk jam e aftë të gjykoj në fushat e tjera, por analiza e komisionit vitin e shkuar nuk ishte e keqe. Edhe rezoluta që u u hartua nga presidenti i ri nga Estonia, kolegu i vjetër, Tomas Ilgen, ishte një rezolutë mjaft korrekte. Ndonëse duhet punuar shumë në fushën e energjisë, kjo është një gjë që duhet bërë, gjithashtu për kartat e identitetit, duhet vazhduar të punohet për problemet e edukimit. Është thelbi për ata që kanë nevojë për një arsim të mirë. Duhet kushtuar kujdes në drejtësi dhe të gjitha këto. Politikanët në Shqipëri e dinë mirë se nuk jam unë ajo që duhet të jap leksione, por po paraqes vetëm disa vërejtje, për të cilat unë mendoj se duhen bërë ndryshime nga të gjithë. Dhe besoj se do të bëhen.

Zonja Pack, ju folët për ndryshime politikash, ndoshta për shkak të rezultatit të zgjedhjeve, ndërsa në Shqipëri po kërkohen ndryshime edhe në qeveri. Çfarë mendoni për këtë?

Unë nuk jam shqiptare, por besoj se zoti Berisha si kryeministër që është, mendoj se di se ç’duhet bërë. Unë nuk përzihem fare unë, nuk jam përzier kurrë më parë dhe nuk kam ndërmend ta bëj edhe në këtë moment.

Ju u takuat me zotin Berisha, me kryetaren e parlamentit, Topalli, me presidentin Moisiu, por nuk u takuat me kryetarin e PS-së, zotin Edi Rama. Ka patur disa kritika në Shqipëri për këtë. Pse nuk u takuat me zotin Rama?

Sepse ai nuk deshi të na shihte. Kjo është e vërteta. Takimin e kishim kërkuar ne. E kishim lënë rreth orës 3 dhe çfarë ndodh? Nuk pashë zotin Rama, por zonjën Dade. Atëhere isha unë ajo që i thashë zonjës Dade se nuk është shumë e sjellshme kundrejt kolegut Rycker që është edhe raportuesi për Shqipërinë, që të mos i jepet shansi për të takuar kryetarin e partisë më të madhe të opozitës. Unë e kam takuar gjithmonë zotin Rama sa herë që ka kërkuar të më shohë, kur ka ardhur në Strasburg. Kanë qenë rreth dy herë, nëse e mbaj mend mirë dhe kam qenë shumë e gatshme për ta dëgjuar. I kërkova zyrës të garantojë vizitën. Pra, kërkova t’i shoh të tre ata, kërkova të takoj dhe kryetarin e PS-së, zotin Rama, si dhe atë të LSI-së, zotin Meta. Por Meta nuk u përgjigj, ndërsa zoti Rama nuk më tha që nuk dëshiron të na takojë dhe na bëri të vinim, por ai nuk ishte aty. Pra, nuk pati mundësi të na flasë. Por isha unë ajo që kërkova që zoti Rama të paktën të takonte vetëm zotin Rycker po atë natë dhe një ditë para zgjedhjeve zoti Rycker u takuar me zotin Rama vetëm për 15 minuta. Kjo është e vërteta, nuk ishte faji im. Unë jam gjithmonë shumë korrekte dhe nuk m`u duk shumë korrekte çfarë u tha nëpër gazeta. Nuk e di kush e ka botuar, por në çdo rast nuk thanë të vërtetën. Unë kisha një axhendë dhe iu kërkova të gjithëve takim. Por ata që nuk duan të na shohin, atëherë faji bie mbi ta dhe jo mbi mua.

Zonja Pack, mund të thuhet se ndoshta është hera e parë që shohim kritika rreth Brukselit. Pasi dhe nga disa komentatorë thuhet se zonja Pack anon në krahun e zotit Berisha, pasi është e djathtë. Po ju bëj një pyetje direkte: A jeni vërtet në krah të Berishës, sepse është i djathtë, ndoshta dhe për këtë arsye dhe zoti Rama nuk ka dashur t’ju takojë?

Dëgjoni, është shumë e thjeshtë. Ështe qartë se unë bëj pjesë në grupin e Partive Popullore Evropiane, ku zoti Berisha dhe zoti Pollo bëjnë pjesë si vëzhgues në këtë familje. Por unë nuk shkova atje si kryetare e grave demokristiane në Evropë, apo si parlamentare demokristiane, por isha atje si kryetare e delegacionit për Evropën Juglindore, ku bën pjesë dhe Shqipëria. Unë jam munduar gjithmonë të jem e paanshme. Nuk kam asnjë pishman, sepse jam munduar gjithmonë të jem korrekte. Ka mundësi të mos kem qenë korrekte, kur nuk kam qenë e informuar mirë. Ka mundësi, është humane, por jam përpjekur të jem korrekte. Dhe të gjithë e dinë shumë mirë se edhe në kohën kur zoti Berisha ka bërë gjëra që nuk mund t’i pranoja, unë e kam kritikuar hapur. Jam unë ajo që e kam kritikuar për bojkotimin e parlamentit. E kam kritikuar gjithnjë, kur ka patur arsye. E di çfarë, unë nuk jam diplomate, nuk kam qenë kurrë dhe as nuk kam për të qenë ndonjëherë. Unë them gjithnjë atë që mendoj. E kam thënë në kohën kur zoti Nano ka qenë në qeveri, kur zoti Meta ka qenë në qeveri dhe e kam thënë edhe tani, kur zoti Berisha është në qeveri. Nëse ndodh diçka që është për t`u kritikuar, e bëj fillimisht privatisht dhe, nëse përsëritet, e bëj publikisht. Kështu ka ndodhur gjithnjë dhe askush nuk do të më ndalojë ta bëj. Unë nuk jam socialiste dhe nuk jam në familjen, ku është Rama dhe Rama nuk është në krahun tim politik, por kjo nuk do të thotë se nuk e mbështes, kur thotë dhe bën gjëra të drejta. Kur unë i kërkoj si lider i opozitës që të punojë në parlament dhe të bëjë gjithçka që duhet bërë, kur je në opozitë, kjo kërkesa ime është korrekte. Nuk e kërkoj vetëm se ai është socialist, por të njëjtën gjë ia kam kërkuar edhe Berishës. Në të vërtetë, mendoj se njerëzit normalë në Shqipëri nuk e kanë mendjen e shkurtër, e dinë shumë mirë se unë e kam bërë të ditur, kur ka qenë e mundur. Mund t’ju tregoj shumë gazeta që e vërtetojnë këtë gjë.

Në Shqipëri ka gjithmonë një tendencë për të pritur nga Brukseli deklarata direkte, por kjo nuk vjen nga komisioni, as nga zoti Solana, pasi janë në një pozicion që nuk iu lejohet. Prandaj përdorin gjuhën e dyfishtë. Por ju keni aftësinë t’i thoni gjërat troç. A mos ndodh kjo, ngaqë ju thoni gjithmonë atë që mendoni dhe, kur më në fund thuhen gjërat drejt, atëherë kjo nuk iu pëlqen të tjerëve?

Është normale. Kush i do gjërat kritike. Unë e kuptoj shumë mirë se socialistët e opozitës nuk mbetën të kënaqur me ato që thashë para Krishtlindjeve, por ato që iu them, i bëj sepse e dua Shqipërinë dhe që Shqipëria të lulëzojë. Keni nevojë për një opozitë që punon dhe kjo natyrisht vlen edhe për qeverinë. Por në atë kohë mendova vërtet se ishte një manovër politike. Ndoshta nuk ishte e tillë, por nga ajo që unë pashë nga jashtë dhe nga njerëzit që më informuan, jo nga Berisha, nga të tjerët, pra, të gjitha partitë dëgjohen dhe mendova se ishte një lojë e bërë enkas, pasi ato nuk ishin gati për zgjedhje në atë moment. Pra, unë desha vërtet ta ndihmoja Shqipërinë dhe partitë politike që të uleshin bashkë për të gjetur një kompromis. Por ju e dini shumë mirë, kompromisi është diçka jo e dashur nga Ballkani.

Ju u përpoqët, nuk e arritët, morët kritika nga Shqipëria. Gjëra që ndodhn, siç kritikoni ju, kritikojnë dhe ata. Cilat do të jenë pasojat e këtyre zgjedhjeve që nuk i plotësuan standardet për integrimin e Shqipërisë?

Po ju them gjithmonë që është një hap i dështuar. Të gjithë e dinë tani se ishte hera e fundit, për të mos patur herë të fundit për së dyti duhen bërë kartat e identitetit dhe tani është qeveria që duhet të punojë për këtë dhe e kërkoj me forcë që të punojë sa më shpejt të jetë e mundur. Sigurisht, nuk mund të bëhen për dy muaj, por ndoshta për një vit ose një vit e gjysmë të kemi mundësinë t’i shpërndajnë të gjithëve një kartë identiteti. Për këtë nevojitet edhe regjistrimi. Pra, duhen bërë të gjitha këto. Por, siç kam mësuar, kur isha atje, qeveria i ka marrë të gjitha masat që t`i bëjë sa më shpejt të jetë e mundur. Shpresoj se do të fillojë, përndryshe do të zgjasë shumë dhe Shqipëria ka për të humbur me të vërtetë kursin, pasi e gjithë kjo dënon afrimin me BE-në. Pasi i gjithë ky spektakël që patëm përgjatë disa muajve la një mesazh të tmerrshëm dhe qesharak në institucione. Kështu e kam cilësuar unë, të tjerët ndoshta jo. Prandaj e theksova këtë, sepse desha të zgjoheshin në Shqipëri. Sepse nuk është vetëm qeveria që mund ta ofrojë vendin me Bashkimin Evropian, janë të gjithë politikanët në opozitë dhe të gjithë njerëzit e shoqërisë civile që punojnë për afrimin. Dhe për këtë në të vërtetë duhet të hapin sytë dhe të shohn së çfarë imazhi japin jashtë vendit. Ky ishte problemi im para Krishtlindjeve.

Opozita ka paraqitur planin për zgjedhje paraprake në Shqipëri. A mendoni se është e mundshme që të mbahen zgjedhjet paraprake me apo pa kartat e identitetit?

Për të bërë zgjedhje të reja, cilatdo qofshin, duhen bërë kartat e identitetit, nuk ka mënyrë për të bërë pa këtë. Këtë e besojnë që të gjithë, edhe ODIHR-i e ka thënë këtë. Besoj në të vërtetë se kjo është baza që duhet patur, sepse nuk mund të rifillojë. Unë mendoj se është e qartë tash se i takon qeverisë që të punojë, sepse i takon asaj. Dhe opozita duhet të presë, në mënyrë që qeveria ta bëjë këtë gjë.

Mos ndoshta zoti Berisha dhe qeveria do ta vonojnë këtë gjë, në mënyrë që opozita të mos mund të realizojë zgjedhje të parakohshme?

Dëgjo, do të ishte realisht një manovër politike. Sipas mendimit tim, është shumë e qartë që zoti Berisha dhe qeveria e tij e dinë që duhet ta bëjnë dhe të gjithë po e vëzhgojnë qeverinë. Si evropianët, dhe amerikanët e vëzhgojnë se çfarë është duke bërë qeveria në këtë moment dhe ndaj duhet të tregoheni shumë vigjilent. Por nuk do të bëhen brenda dy muajve, kjo është e qartë, pasi zgjat disa muaj. Për këtë arsye nuk është tani momenti për të folur për zgjedhje të reja, sepse të njëjtat probleme që patët gjatë këtyre zgjedhjeve, do të kishit edhe në të ardhmen. Por ndoshta në këtë moment, socialistët duan të kenë zgjedhje, sepse fituan. Në fillim nuk deshën, sepse, ndoshta trembeshin nga një dështim, por tani e dinë se fituan dhe ndoshta duan të bëjnë zgjedhje. Por iu takon atyre që të presin zgjedhjet e reja, në mënyrë që këto zgjedhje të realizohen në një klimë ligjore dhe korrekte. Ligjore? Në fakt, gjithçka ishte ligjore, por jo korrekte.

Kur shohim çfarë ndodhi në Shqipëri, pra mungesën e besimit mes dy partive, shohim rezultatin e zgjedhjeve në Shqipëri; kur flitet për lidershpin e ri që hedh poshtë të vjetrin, kur brenda Partisë Demokratike në shënjestër është Sali Berisha, pasi Fatos Nano u largua; si e shihni ju? A vëreni një ndryshim lidershipi me Edi Ramën, pasi është i ri?

Unë në fakt shoh rreth e rrotull tij. A nuk janë po të njëjtët njerëz? A nuk ishin këta gjatë gjithë këtyre viteve në politikë. Atëherë, nëse Rama është i ri, ka të tjerë në Partinë Demokratike që janë të rinj. Unë mendoj se nuk është çështje vjetërsie, por është një çështje e mendësisë së re dhe mendoj se duhet kupuar vërtet se një politikë duhet kuptuar mbi një kompromis. Nëse nuk kemi shumicën absolute, duhen bërë kompromise dhe kjo i kërkohet fillimisht qeverisë që të ofrojë një konsens, pastaj i takon opozitës për të arritur kompromisin. Pra, ky është problemi. Nuk mendoj se ndikon ndryshimi i njerëve, por mendësia, e cila mbetet akoma shumë e vjetër. Duhet punuar mbi këtë mendësi të vjetër. Por Rama nuk është i ri. Ka qenë prej kohësh kryebashkiak i Tiranës dhe është hera e tretë që zgjidhet, apo jo? Pra, nuk dua të flas për njerëz apo për persona, pasi nuk jam unë ajo që votoj për ta dhe nuk është puna ime. Nuk do të pranoja, nëse dikush do të thoshte për dikë në Gjermani, nëse duhet hequr apo duhet mbajtur. Pra, kjo gjë ju takon juve ta bëni.

Zonja Pack, do të ketë një raport të ri, të hartuar nga monitoruesit. Çfarë do të shkruhet në këtë raport për rrugën që i mbetet Shqipërisë? Cilat do të jenë kritikat që do të bëjë parlamenti në këtë raport?

Normalisht nuk do të bëjnë një raport në këtë moment, pasi sapo kemi miratuar raportin e bërë në vjeshtë. Do të bëjmë një raport të shkurtër para se të miratohet presidenti për të vërtetuar sjelljen tonë decizive për të patur një president konsensual, për të mos patur problemet që kemi patur. Për këtë arsye, në flasim për situatën që është bazuar mbi dokumentet e OSBE/ODIHR-it mbi zgjedhjet, pasi ne nuk ishim atje për të vëzhguar zgjedhjet lokale, pasi Parlamenti Evropain nuk e bën kurrë këtë. Prandaj nuk e shpreha kurrë këtë, kur isha atje, pasi kisha shkuar si kryetare e Delegacionit Evropain për të treguar interesin tim. Do të flitet edhe për kartat e identitetit dhe për gjëra të tilla që do të përbëjnë brendësinë e raportit që do të hartojë zoti Rycker.

Le të përfundojmë me presidentin, meqë e përmendët. Zgjedhjet për të po afrojnë. Çfarë mendoni për rolin e presidentit të Shqipërisë gjatë zgjedhjeve?

Mendoj se ka luajtur një rol të rëndësishëm, me sa mbaj mend në fund. Pa të ndoshta nuk do të kishit mundësinë për të bërë zgjedhje. Unë kam një respekt mjaft të madh për këtë president dhe mendoj se ka bërë një punë të mirë, pavarësisht se nuk jam unë ajo që duhet të vlerësoj apo të kritikoj. Thjesht, shpreh respektin tim për presidentin Moisiu, që ka bërë një punë të mirë.

Po për zotin Nano? Thuhet shpesh si një kandidaturë e mundshme për presidentin konsensual. A mendoni se është një kandidaturë e mirë? A mund të bëni dhe një gjykim të fundit?

Të gjithë e dinë se çfarë mendoj dhe të gjithë e dinë se çfarë ka bërë në vitin 2003, pas vitit 2002 dhe pas zgjedhjeve. Të gjithë e dinë se çfarë roli ka luajtur Parlamenti Evropian. Nuk kam asgjë për të shtuar.

KRONIKA

Raporti i Departamentit Amerikan të Shtetit

“Shqipëria, përparime

të ndjeshme në luftën

kundër narkotikëve”

DASH: Qeveria e Kryeministrit, Sali Berisha, e cila erdhi në pushtet pas premtimeve për të luftuar korrupsionin, krimin e organizuar dhe trafikun njerëzor ka bërë përparime në këto drejtime

Shqipëria ka bërë përparime të ndjeshme në luftën kundër lëndëve narkotike. Ky ka qenë thelbi i raportit të përvitshëm të Departamentit Amerikan të Shtetit, ku theksohet në të njëjtën kohë se, megjithë përparimet e bëra, Shqipërisë i mbetet ende një rrugë e gjatë për të arritur suksesin e duhur. Sipas raportit, krimi i organizuar dhe trafikuesit e drogës e shfrytëzojnë Shqipërinë si vend tranziti për heroinën, që udhëton nga Azia Qendrore drejt Europës Perëndimore, për shkak të pozitës stratgjike, zbatimit të dobët të ligjit e sistemeve të pareformuara gjyqësore, si dhe kufijve të pakontrolluar mirë të Shqipërisë. Ndërkaq, Departamenti i Shtetit thotë se, qeveria e Kryeministrit Sali Berisha, e cila erdhi në pushtet pas premtimeve për të luftuar korrupsionin, krimin e organizuar dhe trafikun njerëzor ka bërë përparime në këto drejtime. Ndërkaq, duke iu referuar dinamikës së vitit të kaluar, raporti flet për suksese në përpjekjet e Shqipërisë kundër trafikut të drogave dhe të qenieve njerëzore. “Sasia e heroinës së sekuestruar u rrit gjatë vitit të kaluar, kryesisht për hir të shtimit të vëmendjes së policisë ndaj tregut të kësaj droge”, thuhet në raportin e Departamentit të Shtetit, raport që, gjithsesi, tërheq vëmendjen edhe tek prodhimi i bimës së kanabisit, që vazhdon të prodhohet në Shqipëri për tregjet europiane. Raporti thekson se, qeveria e Shqipërisë, në masë të konsiderueshme, në përgjigje të trysnisë ndërkombëtare dhe ndihmës nga bota, po iu kundërvihet më me agresivitet elementeve kriminale. “Por këto përpjekje, në jo pak raste janë sabotuar nga mungesa e burimeve dhe korrupsioni tepër i përhapur”, thuhet në raport.

Përdoruesit

Raporti thekson se, Ministria shqiptare e Shëndetësisë beson se përdorimi i drogës edhe nga vetë shqiptarët është në rritje, megjithëse nuk ekzistojnë ende të dhëna të besueshme. Sipas disa vlerësimeve, në Shqipëri ka 30 mijë përdorues droge. “Spitali ushtarak në Tiranë ka të vetmen qendër toksikologjike në vend për trajtimin e rasteve të mbidozës. Nga 9 mijë pacientë të trajtuar që nga viti 1995, rreth 70 për qind e marrin drogën përmes shiringave”, thuhet në raportin që i referohet të dhënave zyrtare të Ministrisë së Shëndetësisë.

Përshëndetja e nismave

Ndër nismat politike të 2006-ës, raporti përmend vendimin e qeverisë për të nxjerrë jashtë ligjit për tre vjet qarkullimin e skafeve të shpejta, me synim ndalimin e trafikut njerëzor dhe të drogave. Ndër hapat e qeverisë kundër korrupsionit, raporti përmend miratimin e ligjit për parandalimin e konfliktit të interesave. Raporti citon dokumentin e ratifikimit të Paktit të Asocim-Stabilizimit ndërmjet Shqipërisë dhe Bashkimin Europian, ku shprehimisht thuhet se, “Shqipëria vazhdon të përballet me sfida serioze në luftën kundër korrupsionit dhe krimit të organizuar, për të arritur zbatimin e plotë të ligjeve të miratuara, përmirësimin e administratës publike dhe luftën kundër trafikut njerëzor dhe drogave”. Raporti i Departamentit Amerikan të Shtetit plotëson edhe vlerësimet e tjera pozitive ndërkombëtare në luftën kundër drogës dhe e ka vlerësuar si “të suksesshme” betejën e bluve gjatë qeverisjes aktuale.

Operacionet, Shqipëria vlerësim edhe për bashkëpunimin rajonal

Për sa i përket veprimtarisë së forcave të rendit, raporti i Departamentit Amerikan të Shtetit përmend përparimet në operacionet kundër narkotikëve. “Autoritetet shqiptare organizuan operacione të rëndësishme dhe operacione për sekuestrim droge në mbarë vendin, por kryesisht në Fier, Tiranë dhe në portet e Vlorës dhe Durrësit”, thuhet në raportin e fundit të Departamentit Amerikan të SHtetit. Raporti thekson rritjen e bashkërendimit ndërkombëtar, përfshirë operacionet e përbashkëta me autoritetet italiane, maqedonase, greke dhe turke. Raporti iu referohet gjithashtu shifrave të autoriteteve të vendit, të cilat thonë se deri në 15 tetorin e kaluar, policia kishte arrestuar 329 vetë për trafik droge, kishte sekuestruar 104 kilogramë heroinë, 5 517 kilogramë marijuanë dhe 1. 6 kilogramë kokainë. Policia ka shkatërruar gjithashtu 74 mijë bimë kanabis dhe 580 bimë për prodhimin e opiumit. Raporti i Departamentit Amerikan të Shtetit shpjegon se, shtimi dyfish i sasisë së heroinës së sekuestruar, në krahasim me një vit më parë i kushtohet përdorimit të teknikave të posaçme policore që synojnë tregun e kësaj droge. Ndërsa, pakësimi i sasisë së eliminimit të bimëve të drogave shpjegohet me faktin që programet e policisë, në bashkëpunim me qeveritë vendore e kanë ulur ndjeshëm kultivimin e tyre. “Dëshira e Shqipërisë për t’u anëtarësuar në Bashkimin Europian dhe në NATO vazhdon të jetë nxitëse për qeverinë e Shqipërisë për të zbatuar reforma, por natyra e përçarë e politikës shqiptare dhe zhvillimi i ngadaltë, megjithatë i vazhdueshëm, i shoqërisë civile kanë qenë pengesa për përparim. Shtetet e Bashkuara, bashkë me Bashkimin Europian dhe partnerë të tjerë ndërkombëtarë do të vazhdojnë të nxisin qeverinë e Shqipërisë në luftën kundër trafikut të paligjshëm të drogave, që ajo të shfrytëzojë me efektshmëri ndihmën në zbatimin e ligjit dhe në reformën e gjyqësorit”, thuhet në raport.

Pozitive

-Arrestimet e shumta (320 persona)

-Dyfishim i drogës së sekuestruar (heroinë, kokainë dhe marijuanë)

-Vendimin e qeverisë për të nxjerrë jashtë ligjit për tre vjet qarkullimin e skafeve të shpejta, me synim ndalimin e trafikut njerëzor dhe drogave

Negative

-Shqipëria ka 30 mijë përdorues droge

-9 mijë pacientë të trajtuar që nga viti 1995

-70 për qind e marrin drogën përmes shiringave

SOCIALE

Hyn në fuqi ligji për pensionet e ushtarakëve, i shqyrtuar nga Gjykata Kushtetuese

Ministria e Financave: Përfitimi do të jepet brenda një kohe të shkurtër

Javën që vjen, në Ministrinë e Financave do të ngrihet një grup pune, i cili do të merret me shqyrtimin dhe nxjerrjen e akteve nënligjore që mundësojnë zbatimin e ligjit

Ka hyrë dje në fuqi ligji për pensionet e ish-ushtarakëve, i shqyrtuar nga Gjykata Kushtetuese, ndërkohë që Ministria e Financave ka filluar shqyrtimin e këtij ligji për të bërë më pas edhe ndarjen sipas gradave, për ish-ushtrakët. Në fletoren numër 22, të botuar dje, ligji për pensionet e ish-ushtrakëve ka qenë i dyti në renditje. Sipas ligjeve të shtetit shqiptar, menjëherë pas botimit të ligjit në fletoren zyrtare, institucionet përkatëse fillojnë të ndërmarrin hapat e nevojshme për përmirësimin e tij, në frymën e vendimit që ka dhënë Gjykata Kushtetuese.

Por duket se implementimi dhe shpërndarja e rritjes së pensionit për ish-ushtarakët do të jetë e shpejtë, pasi, qysh nga dita e djeshme, nga ana e Ministrisë së Financave ka filluar edhe shqyrtimi nen për nen i tij. Lajmi konfirmohet për gazetën “TemA” nga titullarë të lartë të këtij dikasteri, të cilët citojnë se për çështjen në fjalë do ngrihet një grup i posaçëm pune, i cili do të shqyrtojë si vendimin e gjykatës, ashtu edhe nxjerrjen e akteve nënligjore që bëjnë të mundur zbatimin e tij. Të njëjtat burime u shprehen se, puna ka nisur menjëherë me modalitetet e nevojshme, pas hyrjes në fuqi në fletoren zyrtare, ndërkohë që javën e ardhshme, plani i masave do të marrë një formë më të qartë

Ushtarakët

Nga ana e tyre, shoqata e ushtarakëve në lirim i kanë kërkuar ministrit të Mbrojtjes, Fatmir Mediu, si dhe kryeministrit Berisha që në grupin e punës që do të ngrihet për të marrë vendimin mbi pensionet e ushtarakëve në lirim të jenë edhe ata palë përfaqësuese. Në këtë mënyrë, gjithçka do të jetë transparente dhe nuk do të preken interesat e asnjërës prej palëve. Nga ligji në fjalë janë rreth 25 mijë ushtarakë në lirim që pritet të përfitojnë nga statusi i tyre për pensionet suplementare. Në këtë kategori do të përfshihen të gjithë të liruarit pas vitit 1991. Ndërsa, sipas vendimit të Kushtetueses, përfitimi i pensionit suplementar do të merret që nga 1 janari i vitit 2006. Pra, nëse do të ketë një shtesë mbi pensionin që një ushtarak merr aktualisht, ai do të përfitojë dhe pjesën e mbetur, kjo duke nisur që nga janari 2006. Gjithsesi, pritet që veç ndryshimit të ligjit të nisë edhe verifikimi i personave që do të përfitojnë si dhe i shumës që shteti do të japë për ushtarakët e dalë në lirim. Në këtë mënyrë edhe bashkëpunimi mes shoqatës dhe vetë qeverisë do të jetë më i domosdoshëm.

22 është numri i fletores zyrtare, ku është botuar vendimi

25 mijë ish-ushtarakë do të përshihen në skemën e pensioneve

1 janari 2006 është data kur nis përfitimi i pensionit

2.6 miliardë lekë është fondi aktual për këtë kategori

2 marsi është dita e nisjes së ndryshimit të ligjit

Qendra e Kontrollit të Barnave, përfitohet deri në 60 për qind rritje page

Më shumë se 300 punonjës të shëndetit publik përfitojnë 20% rritje page

Paga mujore e 331 punonjësve të shëndetit publik në mbarë vendin do të rritet me reth 20 për qind. Ky është vendimi i miratuar dje nga qeveria, sipas të cilit, rritja e pagës për këtë kategori specialistësh ka qëllim, motivimin më të mirë të tyre. Detyra e këtyre punonjësve është parandalimi i sëmundjeve ngjitëse, kontrolli i ujit të pijshëm, monitorimi, kontrolli i veprimtarisë publike e private, që jo rrallë janë me pasoja në shëndetin e popullatës. Por këto vende pune, gjatë dekadës së fundit janë braktisur, pasi me pagat e ulëta bëjnë që kjo degë specializimi të mbetet ende e papreferuar. Propozimi i Ministrisë së Shëndetësisë u nxit pikërisht nga këto të dhëna, për të rritur efikasitetin e punës dhe interesimin e punonjësve për këtë sektor të rëndësishëm të shëndetësisë. Po një ditë më parë është miratuar edhe rritja e pagës në një masë rreth 60 për qind, për 40 punonjës të Qendrës Kombëtare të Kontrollit të Barnave, rritja më e madhe e aplikuar në sektorin e shëndetësisë gjatë këtyre dy viteve. Synimi i propozimit nga ana e Ministrisë së Shëndetësisë ka qenë motivimi i inspektorëve dhe specialistëve të QKKB-së, detyra kryesore e të cilëve është siguria e barnave në rrjetin e hapur farmaceutik. Kjo iniciativë erdhi pas eliminimit të të ardhurave dytësore që kompesonin deri tani pagat e ulëta të këtij sektori. Efekti financiar mujor në fondin e pagave dhe sigurimeve është 740 mijë lekë. Ky vendim i shtrin efektet nga 1 korriku i vitit të kaluar dhe do të përballohet nga fondet e akorduara në buxhetin e Ministrisë së Shëndetësisë. Kjo ministri sqaron se, asnjë prej vendimeve për këta sektorë nuk lidhet me rritjen e pagave në sektorin e Infermieristikës.

Adoleshentët nisin nga drogat e lehta, për të kaluar më pas tek ato vdekjeprurëset, si heroina apo kokaina

Alarmi, më shumë se 10 mijë persona janë përdorues të heroinës

Në fillim nisin me drogat e lehta, por më pas bëhen skllevër të herionës dhe drogave të tjera. Mosha mesatare e fillimit të drogës nga adoleshentët shqiptarë është 14-15 vjeç, ndërkohë që alarmi ngrihet nga qendrat, të cilat merren me trajtimin e përdoruesve të drogës. Ndërkohë që, të dhënat konfirmohen edhe nga statistikat e Ministrisë së Shëndetësisë. Shumica e adoleshentëve e nisin me marijuanë si fillim, për të kaluar më pas në drogat vdekjeprurëse, si heroina. Madje, pirja e hashashit për disa gjimnazistë është kthyer në diçka të zakonshme. Harta e përdoruesve të drogës është e shtrirë në të gjithë vendin, ku përveç qyteteve të mëdha problematike janë edhe qytete të vogla si Lushnja dhe Gramshi. Sipas të dhënave të “Aksion Plus”, një prej qendrave të trajtimit të këtyre personave, rreth 8000-10000 përdorues injektojnë kryesisht heroinë si dhe përdorin të njëjtat shiringa, duke shtuar rreziqet për shëndetin e tyre. Ky është një nga shkaqet themelore për përhapjen e SIDA-s dhe infeksioneve të tjera seksualisht të transmetueshme. Vdekjet nga mbidoza, për vitin e kaluar kanë qenë rreth 40, por rastet e vdekjeve mund të jenë më të larta, si pasojë e mosraportimeve të sakta. Ministria e Shëndetësisë raporton ndërkohë rreth 30 mije përdorues droge dhe numri i tyre sa vjen e rritet. Kohët e fundit vihet re një rritje e përdoruesve midis anëtarëve të komunitetit rom. Ky komunitet, përveç drogës është i prekur nga papunësia, varfëria e thellë, aksesi i ulët ndaj shërbimeve shëndetësore. Për të qenë efektivë në parandalimin e epidemisë midis përdoruesve të drogave me injektim, UNAIDS-i vlerëson që programet e shkëmbimit të shiringave duhet të kapin 60-70% të injektuesve me informacion dhe edukim dhe pothuajse 20% të tyre me shiringa sterile në mënyrë të përhershme.

Banorët e Fushë-Mëzezit vonojnë për të marrë tapitë e shtëpive të tyre

Shehu: Vetëm 70 pronarë janë paraqitur për tapitë

Procesi i ndarjes së tapive të shtëpive të kësaj zone ka filluar që më 12 shkurt të këtij viti, pra gati një muaj më parë, por aktualisht rezulton se janë paraqitur vetëm 70 pronarë, nga rreth 750 të tillë

Rreth 70 persona të zonës së Fushë-Mëzezit janë paraqitur deri më tani, për të marrë dokumentet e legalizimit. Këtë e bëri të ditur ditën e djeshme nëndrejtori i Përgjithshëm i Agjencisë së Legalizimeve (ALUIZNI), Ferdinand Shehu, i cili u shpreh se banorët, përveç se do të marrin dokumentet e legalizimit do të paguajnë edhe një përqindje të vogël të shtëpive të tyre në mënyrë simbolike. Procesi i ndarjes së tapive të shtëpive të kësaj zone ka filluar që më 12 shkurt të këtij viti, pra gati një muaj më parë, por aktualisht rezulton se janë poaraqitur vetëm 70 pronarë, nga rreth 750 të tillë. “Deri tani në Agjencinë e Legalizimeve (ALUIZNI) janë paraqitur vetëm 70 persona për të marrë tapitë e tyre, të cilët duhet dhe të paguajnë një shifër simbolike pasi t’i marrin këto leje legalizimi”, - shprehet Shehu. Ai shprehet se një punë e mirë është duke u bërë edhe në rrethet e tjera, ku vazhdojnë të vijnë dosje me dokumentacionin e qytetarëve.

Procesi

Procesi i Legalizimit, mbyll përfundimisht një plagë të rëndë sociale, por jo vetëm kaq. Si pasojë e informalitetit, në të gjithë vendin janë bllokuar më shumë se 5 miliardë dollarë kolateral, të cilat po të investohen do ta përmirësojnë akoma më shumë, jo vetëm jetën e atyre banorëve që jetojnë në këto zona, por të të gjithëve ne. Nga ana tjetër, duke qenë të palegalizuar, alias të paligjshëm, të gjitha këto zona nuk futeshin në sistemin e taksave. Duke llogaritur se në këto ndërtime jetojnë afërsisht 1/3 e popullsisë së vendit dilet në përfundimin se, buxhetit dhe si rrjedhim qytetarëve iu mungon një shumë e konsiderueshme të hollash që, në rast se do të ishin investuar vit pas viti, do ishin shndërruar në investime dhe gjendja në këto zona nuk do të ishte ajo që paraqitet sot. Tashmë, numërohen mbi 270 mijë objekte të vetëdeklaruara, nga të cilat, vetëm pallatet me leje, me shtesa të ndërtuara pas vitit 1993, përbëjnë një sipërfaqe ndërtimore rreth 7 milionë metër katror, që do të thotë se, realisht janë më shumë se 80 mijë apartamente dhe mjedise me funksion social-ekonomik, të cilat janë informale. Këtu nuk përfshihen shtesat në pallatet e ndërtuara përpara vitit 1993. Për të thjeshtuar procedurat për qytetarët është aplikuar për legalizim nga ndërtuesi ose nga një banor në emer të të gjithë banorëve të pallatit. Pra kanë hyrë në proces mbi 350 mijë pasuri familjare të shtrira në të gjithë territorin e vendit.

Informatizimi

Një aspekt tjetër shumë pozitiv i këtij procesi është edhe informatizimi i sistemit dhe hapja e tregut të pronave, i cili futet si një risi në sistemin hipotekor shqiptar. Janë 350 mijë familje, të cilat do të regjistrohen të parat në sistemiun e informatizimit të hipotekave, gjë e cila do t’i hapë rrugën zhvillimit të tregut të pronave, i cili për hir të së vërtetës duhet thënë që ende nuk ka filluar të adaptohet në ngjashmëri me vendet perëndimore, por pronat shiten e blihen nga individë dhe sekserë të ndryshëm, gjë e cila, jo pak herë ka çuar në konflikte mes personave për shkaqe pronësie apo për parregullsi në dokumentacione. Paketa financiare, e cila është shumë e favorshme për qytetarin dhe vetë procesin, realizimi i regjistrimit fillestar nga agjencia e legalizimeve, përdorimi i teknologjisë dixhitale për realizimin e kësaj reforme të madhe dhe shumë delikate krijojnë mundësi për të prodhuar të gjithë dokumentacionin teknik, si harta, gen-plane, planimetri në rrugë dixhitale dhe njëkohësisht, dixhitalizimin e të gjithë dokumentacionit procedurial të procesit të legalizimit si dhe krijimin e data base-s me të dhënat dhe dokumentacionin e legalizimit, data base-s me të dhënat dhe dokumentacionin zyrtar e të certifikuar të pronësisë.

Procedurat në vazhdim

Ndërkohë, kreu i ALUIZNI-t, Shaban Memia, sqaron hapat që po ndërmerren me zonat e tjera informale, ku kanë filluar procedurat për legalizimet. “Për 152 zona, me sipërfaqe mbi 5 hektarë dhe me sipërfaqe të përgjithshme 23 300 hektarë është në përfundim dokumentacioni tekniko-ligjor dhe në proces miratimi në Këshillat e Qarqeve dhe do të shpallen e miratohen së shpejti në KRRTRSH. Gjithashtu, 281 zona me sipërfaqe 8 570 hektarë, të cilat janë me përmasa më të vogla se 5 ha janë në përfundim të plotësimit të dokumentacionit dhe në procedurë miratimi në këshillat bashkiakë apo komunave, si dhe në KRRT-të përkatëse”, - thotë Memia. Sipas tij, janë miratuar nga institucionet e autorizuara nga ligji 103, zona me sipërfaqe 423 hektarë dhe janë në proces të plotësimit të dokumentacionit tekniko-ligjor, për të marrë titullin e pronësisë.

270 mijë objekte të vetëdeklaruara janë vetëm nga pallatet me leje, me shtesa të ndërtuara pas vitit 1993

1/3 e popullsisë së vendit jeton në informalitet

80 mijë apartamente dhe mjedise, me funksion social-ekonomik janë informale

350 mijë pasuri familjare janë të shtrira në të gjithë territorin e vendit

5 miliardë dollarë kolateral janë bllokuar si pasojë e informalitetit në vend

Cikuli premton specializime për mjekët onkologë të Kosovës

Ministri i Shëndetësisë, Maksim Cikuli, në prag të largimit nga posti i ministrit është takuar me një delegacion të Ministrisë së Shëndetësisë së Kosovës, të kryesuar nga zv/ministri Fadil Kryeziu. Qëllimi i takimit ishte bashkëpunimi në fusha të ndryshme të sistemit shëndetësor, shkëmbimi i eksperiencave në fushën e sigurimeve shëndetësore, blerjeve të medikamenteve, funksionimit të institucioneve të rëndësishme shëndetësore, si spitalet universitare Instituti i Shëndetit Publik, Qendra Kombëtare e Kontrollit të Barnave. Gjatë bisedimeve me ministrin Cikuli, zv.ministri kosovar, Kryeziu, u shpreh se në këtë moment, për ta është e rëndësishme specializimi i mjekëve onkologë, duke kërkuar nga ministri Cikuli mbështetje për realizimin në Tiranë të këtyre specializimeve të domosdoshme. Ministri Cikuli mori angazhimin për ta përcjellë këtë shqetësim në Ministrinë e Arsimit dhe Shkencës dhe Fakultetin e Mjekësisë. Ekipi i Ministrisë së Shëndetësisë së Kosovës u njoh gjithashtu me rregulloret e funksionimit të spitaleve më të rëndësishme të vendit, me synim mbështetjen për hartimin e statuseve për spitalet e Kosovës.

EKONOMIA

Kompania ASG prezantoi projektin e parkut si dhe përfitimet që pritet të ketë vendi dhe zona ku do të ndërtohet ai

ASG: Parku energjitik do të sjellë bum ekonomik për Fierin

Sipas përllogaritjeve të projektit, ky park do të sjellë për vendin energji elektrike dhe gaz të lëngshëm me një çmim sa kostoja e prodhimit. Gjithashtu, ndërtimi i linjës së transmetimit të energjisë me Italinë do ta fusë Shqipërinë në rrjetin ndërkombëtar të energjisë elektrike

Kompania “ASG Power” paraqiti dje projektin e saj për ndërtimin e parkut energjitik të Fierit. Projekti do ta kthejë këtë park në impiantin më të madh në Ballkan, për gjenerimin e energjisë me cikël të kombinuar. Projekti do të zgjasë vetëm 18 muaj, duke filluar në muajin gusht të këtij viti dhe duke përfunduar plotësisht në fund të vitit 2009. Investimi total i këtij projekti kap vlerën e 2.3 miliardë dollarëve dhe projekti do të zërë një sipërfaqe prej 210 hektarësh, të ndara në tre parcela, përkatësisht me sipërfaqe 30, 60 dhe 120 hektarë secila. Kompania “ASG Power”, që do të ndërtojë këtë kompleks është një konsorcium ndërkombëtar, i përbërë nga një kompani shtetërore zvicerane dhe investitorë amerikanë. "ASG Power" do të punojë për zbatimin e projektit me kompaninë italo-amerikane “SAIPEM and Black and Veatch”. Një marrëveshje është arritur edhe me ABB-në për të gjitha interkonjeksionet elektrike dhe ndërtimin e linjave të tensionit të lartë.

Projekti

Ky kompleks energjitik parashikon ndërtimin e një stacioni rigazifikimi për gazin e lëngshëm natyror, një TEC me fuqi të instaluar 1200 MGW, e një stacioni difuzimi të tensionit të lartë, e një gazsjellësi mes Italisë dhe Shqipërisë, infrastrukturës së nevojshme detare dhe linjave përkatese të interkonjeksionit si brenda dhe jashtë vendit. Gazi natyror që do të vijë nga Egjipti, Algjeria dhe Libia, etj., do të transportohet çdo ditë me 5 anije të mëdha drejt stacionit të madh të rigazifikimit të gazit natyror në të lëngët (LNG), me kapacitet vjetor prej 10 miliardë metrash kub. Për realizimin e këtij procesi, projekti përfshin ndërtimin e një pontili me gjatësi 3 km, pasi deti në këtë vijë bregdetare nuk është i thellë. Gjithashtu, në këtë projekt përfshihet edhe ndërtimi i një TEC-i, i cili do të ketë një fuqi prej 1200 MGW në total, i cili do të ndërtohet në tre faza dhe do të ketë tre turbina me nga 400 MGW secila. Energjia e prodhuar nga ky TEC do të shërbejë, jo vetëm për nevojat e parkut, por edhe për t’u eksportuar drejti Italisë dhe një pjesë e saj do të mund të blihet nga KESH-i për nevojat e vendit. Përveç kësaj, projekti përmban edhe ndërtimin e një linje interkonjeksioni për transportimin e energjisë elektrike, si dhe për transportimin e gazit të lëngët, e cila do të lidhë këtë impiant me bregun italian të Brindizit, në një gjatësi prej 120 km. Kjo linjë do të jetë një linjë kabllore nënujore e tensionit të lartë dhe do të përmbajë një kapacitet të madh prej një mijë MGW.

Përfitimet

Shqipëria do të ketë mundësi të blejë gaz dhe energji elektrike nga ky projekt, me një çmim më të ulët se tregu. Çmimi i energjisë që do të përfitojë vendi prej TEC-it të ndërtuar do të jetë sa kostoja e prodhimit të energjisë, gjë që do të ndihmojë për nevojat e vendit për energji. Ky çmim do të jetë më i ulët se çmimi aktual i blerjes se tij në tregun ndërkombetar. Rrjeti kombëtar i Shqipërisë do të lidhet përmes këtij investimi me rrjetin europian të energjisë. Nga ana tjetër, kijimi i një qendre energjitike të tillë do të balancojë rrjetin elektrik të Shqipërisë, duke ulur në minimum humbjet teknike të transferimit të energjisë nga veriu në jug të vendit.

Në drejtim të përfitimeve sociale, fillimi i punimeve të kësaj vepre do të sjellë punësimin e rreth 3500 punëtorëve për një afat prej 18 muajsh, prej të cilëve, pas përfundimit të ndërtimit do të ketë 350 punëtorë të përhershëm. Hyrja financiare nga konsumi ushqimor i kantierit me 3 500 punonjës llogaritet të shkojë në rreth 10-13 milionë dollarë përgjatë periudhës 18-mujore, ndërsa të ardhurat financiare në rrethin e Fierit nga punësimi i tyre llogaritet të shkojë në mbi 22 milionë dollarë, në një pagë mesatare prej 350 dollarësh në muaj. Vlera e punimeve do të arrijë në 250 milionë dollarë, prej të cilave mund të përfitojnë kompanitë dhe prodhuesit shqiptarë, të cilët mund të ofrojnë shërbimet dhe produktet e tyre në ndërtimin e parkut. Gjithashtu, një tjetër përfitim për zonën në të cilën do të ndërtohet parku është edhe përmirësimi i infrastrukturës rrugore, që do të bëhet për të rritur volumin e transportit të nevojshëm për ndërtimin e tij.

Vendndodhja

Ndërtimi i këtij parku energjitik u spostua nga Vlora me kërkesë të Qeverisë Shqiptare, për në zonën e Semanit të Fierit. Vendndodhja do të jetë midis grykëderdhjeve të lumit Seman dhe Vjosë, në jug të kolektorit të Hoxharës. Ky pozicion ndodhet në një largësi prej 650 metrash nga bregu i detit, ndërsa largësia nga qyteti i Fierit është 18 km. Sipas kompanisë “ASG Power”, kjo vepër nuk do të ketë asnjë kosto mjedisore, për vetë faktin që gazi natyror i lëngshëm që do të përpunojë kompleksi energjitik është lënda më e pastër djegëse në natyrë. Madje, përveç kësaj, sipas vetë kompanisë, ndërtimi i këtij parku mund të sjellë përmirësim mjedisor për zonën, pasi prej tij mund të përfitojnë edhe industritë përreth si ajo kimike e plehërave, e cila do të mund të përdorë burime energjitike pa kosto mjedisore si gazi që do të prodhojë ky impiant.

Ergys Mërtiri

“Albtelecom”: Tenderi për portat ADSL po zhvillohet në përputhje me ligjin

“Albtelecom”-i ka përgënjeshtruar dje akuzat e bëra ndaj kësaj shoqërie lidhur me tenderin e 200 mijë portave ADSL. Sipas tij, këto akuza bëhen nga persona dhe grupe të cilëve iu janë prekur interesat private nga ky tender dhe që nuk u intereson e vërteta. Sipas kompanisë, shtyrja e tenderit nuk ka qenë pa afat, ashtu siç thuhet në këto akuza, por sipas vendimeve të marra nga Agjencia e Prokurimeve Publike tenderi është pezulluar përkohësisht, për të kontrolluar dokumentacionin e tij. Pas shqyrtimit, APP konkludoi se dokumentacioni dhe procedura e ndjekur nga “Albtelecom”-i ishin të rregullta dhe konform ligjit dhe më datë 26 shkurt u vendos lejimi i vazhdimit të procedurave për zhvillimin e tenderit. Në këtë mënyrë, “Albtelecom”-i, pasi mori në shqyrtim kërkesat e bëra nga kompanitë e interesuara në këtë tender dhe shkresat e dërguara nga APP-ja, vendosi që data e hapjes së ofertave të shtyhet për datën 9 mars 2007. Për këtë, kompania ka njoftuar menjëherë pas marrjes së vendimit për datën e re të hapjes së ofertave. Sipas “Albtelecomi”-t, ky investim nuk dëmton aspak interesat dhe vlerën e kmpanisë, por ai ndihmon në modernizimin e saj si dhe për më tepër, ai ndikon në një ulje të ndjeshme të çmimeve të internetit.

Të gjitha zonat e bregdetit që janë shkatërruar, në fund të 2009-ës do të shërbejnë për turizëm

Projekti, zonat e degraduara në bregdet, për dy vjet shndërrohen në turistike

Siç dihet, një pjesë mjaft e rëndësishme e zonave tona bregdetare, aktualisht janë kthyer në ishuj, ku nuk mund të flitet për zhvillim të turizmit. Ky rivlerësim, siç quhet në projekt, në fakt është kthim në gjendje të pranueshme për një shërbim të tillë

Qeveria shqiptare në përparësitë e saj përsa i përket turizmit parasheh që, deri në fund të vitit 2009 të gjitha territoret të cilat janë krejtësisht të degraduara dhe asesi nuk shërbejnë për turizëm të jenë rikthyer në gjendje që t’i shërbejnë turizmit. Siç dihet, një pjesë mjaft e rëndësishme e zoinave tona bregdetare, aktualisht janë kthyer në ishuj dhe ku nuk mund të flitet për zhvillim të turizmit. Ky rivlerësim, siç quhet në projekt, që në fakt është kthim në gjendje të pranueshme për një shërbim të tillë do të bëhet duke u ndihur edhe nga përmirësimi i ligjit për turizmin dhe nga masa të tjera, që kanë të bëjnë me përmirësimin e sistemit të planifikimit të zonave turtistike. Të dhëna zyrtare bëjnë të ditur se, konkretisht, prioritetet e përcaktuara për qeverinë shqiptare për periudhën 2006-2009 janë: përmirësimi dhe hartimi i kuadrit ligjor në turizëm, në përputhje me standardet e BE-së, përcaktimi i planit të veprimit strategjik afatgjatë, përmirësimi i sistemit të planifikimit të zonave turistike, rivlerësimi i zonave të degraduara bregdetare me prioritet zhvillimin e turizmit, zhvillimi infrastrukturor etj.

Ndërsa, për jetësimin e këtyre prioriteteve do të ndërmerren disa iniciativa ligjore si: hartimi i një ligji të ri për turizmin, i cili do të përafrojë direktivat mbi paketën e udhëtimeve, paketën e pushimeve dhe paketën e tureve, mbi mbledhjen e informacionit statistikor në fushën e turizmit si dhe procedurat për implementimin e direktivës mbi mbledhjen e të dhënave statistikore në fushën e turizmit dhe hartimi i VKM-ve, në zbatim të ligjit të ri për turizmin. Është hera e parë në të gjitha këto vite të tranzicionit që flitet për një masë të tillë, e cila parasheh rregullimin e zonave të degraduara, zona të cilat janë përmbytur nga mungesa e rregullit urbanistik, zona që janë rroposur prej betonit dhe ndotjes. Në të gjitha këto vite është parë vetëm në një drejtim, në atë të ndërtimit, pa patur në asnjë moment një ide se si mund të ketë turizëm kësisoj. Ajo që mund të thuhet është se puna që duhet të kryhet për këtë rivlerësim të zonave të degradura të bregdetit është e pamatë dhe kërkon angazhimin e mjaft e sektoreve shtetërore.

Fullani merr mbështetje nga BE-ja, për borxhin e brendshëm

Me ftesë të guvernatorëve të Bankave Qendrore të Luksemburgut dhe Belgjikës, guvernatori i Bankës së Shqipërisë, Ardian Fullani, zhvilloi një vizitë pune dyditore pranë këtyre institucioneve, njoftoi zyra e shtypit e BSH-së.

Guvernatori Fullani u takua dhe bisedoi me guvernatorin e Bankës Qendrore të Luksemburgut, Yves Mersch, si edhe me anëtarë të bordit ekzekutiv; me guvernatorin e Bankës Qendrore të Belgjikës, Guy Quaden, si dhe zhvilloi takime të përbashkëta me drejtues të departamenteve të kësaj banke. Guvernatori Fullani bëri një prezantim të gjerë të zhvillimeve të fundit të ekonomisë shqiptare, reformave në sektorin bankar dhe atë financiar. Gjithashtu, ai prezantoi punën konkrete të Bankës së Shqipërisë në fushën e politikes monetare, duke individualizuar kontributin e dhënë në ruajtjen e stabilitetit të çmimeve dhe mbikëqyrjes së sistemit bankar. Duke qëndruar më në veçanti në këtë fushë, Fullani informoi drejtuesit e ketyre institucioneve në lidhje me nismën që ka marrë Banka e Shqipërisë, për rivlerësimin e kuadrit strategjik të politikës së saj monetare dhe me hapat konkrete që janë bërë në këtë drejtim. Sipas burimeve të mësipërme, nga bankieret europianë u vlerësuan arritjet pozitive të ekonomisë shqiptare dhe puna e bërë në kuadër të reformës strukturore dhe arritjes së standardeve europiane.

Në vazhdim, takimet u fokusuan në fushat specifike ku do të përqëndrohet bashkëpunimi dypalësh si edhe marrja e asistencës teknike nga këto banka, me qëllim njohjen sa më mirë të funksionimit të Sistemit Europian të Bankave Qendrore dhe adoptimin e tyre në realitetin shqiptar. Një çështje e veçantë gjatë diskutimit me përfaqësuesin e Komisionit Europian, Z. Regling, ishte edhe manaxhimi i borxhit të brendshëm, ku u mor angazhimi për dhënien e ndihmesës në ngritjen dhe mbështetjen e strukturave përkatëse për një manaxhim modern të borxhit të brendshëm.

Punimet e KESH-it, ndërpritet energjia në Mëzez dhe Valias

Në vazhdimësi të investimeve dhe punimeve që Korporata Elektroenergjitike Shqiptare kryen për përmirësimin e furnizimit me energji elektrike si dhe për fuqizimin e rrjetit shpërndarës dje ka patur stakim të tensionit në linjën 35kV Mëzez-Valias. Sipas burimeve të KESH-it, stakimi i tensionit u bë nga Drejtoria e Tensionit të Lartë të Tiranës, si pasojë e remontit, të cilit do t’i nënshtrohet linja 35kV Mëzez-Valias. Brigadat e remontit do të montojnë pajisje të reja 35 kV në këtë linjë, me qëllim fuqizimin e saj.

Nga stakimi i tensionit pati mungesë të furnizimit me energji elektrike për zonat e Mëzezit dhe Valiasit, që do të variojë edhe sot, nga ora 10:00 e paradites deri në orën 15:00 mbasdite.

“Europetrol” merr leje për depozitat në Porto Romano

Shoqëria "Europetrol" do të ketë në dispozicion të saj sipërfaqen prej 15.000 metrash katrorë në Porto Romano, për të ndërtuar depozitat e karburanteve. Në mbledhjen e fundit, KRTRRSH-ja miratoi sheshin dhe lejen e ndërtimit për vendosjen e depozitave të karburanteve për këtë shoqëri. Leja e ndërtimit për "Europetrol" do të jetë 2-vjeçare, kohë e mjaftueshme për këtë ndërtim. Studimi ka marrë parasysh përdorimin optimal të gjithë sipërfaqes në dispozicion, si dhe respekton në mënyrë rigoroze distancat e linjës teknologjike dhe vendosjen e duhur të pajisjeve. Në planin e përgjithshëm merren në konsideratë gjithë kërkesat për mbrojtjen kundër zjarrit, sigurinë në punë si dhe mbrojtjen e shëndetit. I gjithë objekti do të rrethohet me mur me lartesi 2.5 m, të qëndrueshëm dhe të pakalueshem nga njerëzit. Ministria e Mjedisit ka miratuar lejen mjedisore për zhvillimin e aktivitetit të shoqërisë "Europetrol", duke përcaktuar kushtet përkatëse për ndërtimin dhe funksionimin e tij.

RAJONI

Përfundoi në Vjenë, raundi i parë i bisedimeve për pakon e Marti Ahtisarit

Ende asnjë marrëveshje për të ardhmen e Kosovës

Kryenegociatori për statusin përfundimtar të Kosovës, Marti Ahtisari, deklaroi dje, pas takimit se, nuk ka kompromis në asnjërën nga pikat e diskutuara

Përfundoi dje në Vjenë, raundi i parë i konsultimeve ndërmjet Prishtinës dhe Beogradit lidhur me propozimin e Marti Ahtisarit për të ardhmen e Kosovës. Në rend dite ishte aneksi që ka të bëjë me zbatimin e planit dhe periudhën tranzitore të implementimit. Në fund të bisedimeve të djeshme, Marti Ahtisari deklaroi se, nuk ka kompromis në asnjërën nga pikat e diskutuara.

Ai po ashtu tha se, në bazë të diskutimeve të deritashme, ai do ta adaptojë propozimin e tij, të cilin do t’ua dërgojë palëve, në Prishtinë dhe në Beograd.

"Bashkë më kolegët e mi do ta shqyrtojmë diskutimin e gjithëmbarshëm të mbajtur në Vjenë dhe do të shohim se çfarë mund të ndërrojmë nga propozimi ynë i parë", - ka thënë ai. “Do të fusim edhe disa propozime që nuk janë përmendur fare në bisedimet vjeneze”, - paralajmëroi Ahtisari.

Shefi i Delegacionit të Kosovës, Blerim Shala, para takimit ka deklaruar se nuk pret ndonjë kompromis, duke marrë parasysh se si janë zhvilluar bisedimet deri më tani.

Raundi i dytë i bisedimeve do të mbahet më 10 mars, kur duhet të shqyrtohet edhe njëherë propozimi. Përndryshe, në aneksin 12 parashikohet që pasi të hyjë në fuqi zgjidhja fillon periudha prej 120 ditësh deri kur duhet të nisë procesi për aprovimin e Kushtetutës së Kosovës. Më së voni nëntë muaj nga miratimi i Kushtetutës, në Kosovë duhet të mbahen zgjedhjet parlametare dhe lokale.

Burns: 2007-ta, viti kur do të zgjidhet statusi i Kosovës

Nënsekretari amerikan i Shtetit, Nicholas Burns ka vlerësuar mbrëmë se viti 2007 do të jetë "viti i transformimeve dhe i ndryshimeve në Ballkan" dhe "viti kur do të zgjidhet çështja e statusit të Kosovës."

Këto komente, zoti Burns i bëri gjatë një fjalimi para Këshillit Atlantik të Shteteve të Bashkuara në Uashington.

Ai ka thënë më tej se, Shtetet e Bashkuara e mbështesin të dërguarin e Kombeve të Bashkuara për statusin e Kosovës, Marti Ahtisari dhe ka paralajmëruar se në pjesën e dytë të këtij muaji do të zhvillohet "debat shumë energjik në Kombet e Bashkuara për statusin e Kosovës."

"Ende janë disa serbë që mendojnë se serbët duhet të bashkohen... serbët në Serbi, ata në Kosovë dhe në Bosnjë-Hercegovinë", - tha Nicholas Burns dhe shtoi se, "këtij lloji të forcave irredentiste, të cilat ishin aq shkatërruese para 10-15 vitesh gjatë shpërbërjes së Jugosllavisë, nuk mund t'u lejohet që të kthehen dhe të jenë fuqi politike në Ballkan."

Sipas zotit Burns, për SHBA-të dhe BE-në pos çështjes së statusit të Kosovës, i rëndësishëm është edhe modernizimi i Marrëveshjes së Dejtonit. Më tej, ai u shpreh se, "pos këtyre dy qëllimeve", Shtetet e Bashkuara synojnë që "Kroacia, Shqipëria dhe Maqedonia gjatë vitti 2008 ose 2009 të integrohen në NATO."

Prodi rikonfirmohet në krye të qeverisë

Kryeministri italian, Romano Prodi, ka fituar lehtësisht votën e besimit në Dhomën e Ulët të Parlamentit, duke i dhënë kështu fund krizës politike njëjavore.

Votimi i djeshëm vjen dy ditë pasi senati mbështeti koalicionin e zotit Prodi me një diferencë të ngushtë. Ai dha dorëheqjen javën e kaluar, pas nëntë muajsh në detyrë, kur senati kundërshtoi platformën e politikës së tij të jashtme me vetëm dy vota.

Presidenti italian Giorgio Napolitano i kërkoi zotit Prodi të qëndronte në detyrë deri pas votëbesimit në senat të mërkurën. Paketa e politikës së jashtme përfshin vazhdimin e pjesëmarrjes ushtarake të Italisë në Afganistan dhe zgjerimin e një baze ushtarake amerikan në veri të Italisë. Koalicioni i zotit Prodi mban shumicën me vetëm një vend më shumë në senat. Qeveria italiane është e 61-ta që nga Lufta e Dytë Botërore.

Ban Ki-Moon paralajmëron për ndryshimin e klimës

Kreu i ri i OKB-së thotë se ndryshimi i klimës përbën një rrezik të madh për njerëzimin të barabartë me luftën dhe i bëri thirrje qeverisë amerikane të marrë udhëheqësinë në përballimin e këtij kërcënimi. Sekretari i përgjithshëm i OKB-së, Ban Ki-Moon, tha se problemet e shkaktuara nga ndryshimet e mjedisit mund të çojnë në konflikte të ardhme.

Të varfërit në Afrikë dhe në shtetet e vogla ishullore, tha zoti Ban, kanë vuajtuar më shumë nga ndikimi i ngrohjes globale, megjithëse ato ishin vendet më pak përgjegjëse për këtë. Në vitet e ardhme, problemet e shkaktuara në mjedis si thatësirat dhe përmbytjet bregdetare mund të jenë më me ndikim se lufta dhe konflikti, parashikoi zoti Ban.

Ai tha para një grupi nxënësish në selinë e OKB-së se, që ky problem të përballet, njerëzve iu duhet të ndryshojnë mënyrën e jetesës.

Franca: Iraku është pranë ndarjes

"Të gjithë ne jemi pjesë e këtij problemi të rëndë dhe në rritje dhe secili nga ne ka gjithashtu nevojë të angazhohet për gjetjen e zgjidhjeve. Ne duhet të ndryshojmë mënyrën se si jetojmë dhe të rimendojmë mënyrën si udhëtojmë dhe bëjmë biznes", - tha ai. Zyrtarët e OKB-së të ngarkuar me çështjet mjedisore kanë kohë që i kërkojnë zotit Ban për të ngritur çështjen e ndryshimit të klimës, duke argumentuar se kjo është një çështje e qartë, ku bota ka nevojë për udhëheqës dhe se sekretari i përgjithshëm mund të ushtrojë ndikim. Në dhjetor, OKB-ja do të mbajë një konferencë për ndryshimin e klimës në Bali.

Protokolli i Kiotos skandon në vitin 2012. Para këtij afati duhet rënë dakort për masa të reja për të ulur emetimet ndotëse.

14 policë figurojnë të humbur në Irak

Një grup sunitësh në Irak i lidhur me Al-Kaidën thotë se ka rrëmbyer 18 punonjës të Ministrisë së Brendshme. Në një deklaratë të publikuar në internet thuhet se punonjësit u kapën në provincën Dijala, në shenjë hakmarrjeje ndaj përdhunimit të një gruaje sunite nga disa policë muajin e kaluar. Faqja elektronike tregon fotografitë e 18 personave, disa me uniformë dhe të tjerë të veshur si civilë. Zyrtarët irakianë thanë sot se 14 policë figurojnë të humbur në Dijala në veri të Bagdatit që nga dita e djeshme. Zyrtarët po hetojnë se oficerët e humbur janë midis të rrëmbyerve. Ndërkohë, ushtria amerikane në Irak tha se dy ushtarë dhe përkthyesi i tyre irakian u vranë sot nga një bombë, në anë të rrugës, në Bagdatin Veriperëndimor.

SPORTI

SUPERLIGA/ Kampionati Kombëtar i Futbollit regjistron sot takimet e javës së 22-të

Faza e dytë, sot finishi me shumë dilema

Vllaznia-Teuta: Trajneri Sulejman Starova do të ketë në dispozicon futbollistët Entonio Pashaj dhe Arjan Zere, të cilët ishin dëmtuar disa jave më parë. Në stadiumin “Loro Boriçi” do të mungojnë nesër Bledar Devolli dhe Edlir Tetova, për shkak të ndëshkimit me kartona të verdhë në ndeshjet e mëparshme

Kthehen ndeshjet e kampionatit kombëtar, në një kohë që skuadrat janë gati për sfidat e javës së fundit të fazës së dytë. 4 ndeshje do të luhen sot, ndërsa Dinamo-Apolonia dhe Kastrioti-Luftëtari do të luhen ditën e dielë. Vllaznia-Teuta është epiqendra e javës, në një kohë që Tirana do të shkojë të luajë në fushën e vështirë të Peqinit. Kërkesa e klubit "Vllaznia" për zhvillimin e ndeshjes me Teutën nën dritën e prozhektorëve, duket se ka gjetur mirëkuptimin e drejtuesve të federatës. Shkodranët kishin kërkuar orën 17:00 për zhvillimin e kësaj ndeshjeje shumë të rëndësishme dhe institucioni i futbollit e ka miratuar atë. Kjo gjë konstatohet nisur nga fakti se drejtuesit e klubit shkodran, tashmë kanë shpërndarë nëpër qytet afishet, ku lajmërohet se ndeshja Vllaznia-Teuta, e vlefshme për javën e 22-të të kampionatit do të zhvillohet në orën 17:00. Një orar ky që konsiderohet shumë i favorshëm edhe për tifozët, të cilët pritet të jenë të shumtë në këtë takim nisur nga rëndësia e tij. Ndërsa, në kampin e Tiranës, kapiten Muka iu drejtohet shokëve me një apel shumë të qartë për të mos lëshuar dhe për ta vlerësuar edhe ndeshjen e radhës si kundërshtar serioz. Muka deklaron: “Tashmë vemendja jone eshte perqendruar te ndeshja qe do te luajme te shtunen, ne Peqin, me Shkumbinin, skuadren qe mban vendin e 11-te ne renditje. Duhet ta shkulim nga mendja jone nje here e mire faktin se Shkumbini eshte skuader, qe vegjeton prej kaq javesh ne vendet e fundit te tabeles, ku eshte edhe ne keto momemte aktualisht. Per mendimin tim, ky ekip eshte demtuar ngaqe prej disa muajsh, per shkak te nje ndeshkimi te Disiplinorit, i ka luajtur ndeshjet jashte fushes se tij. Pa thene pastaj qe ka ne gjirin e tij disa futbolliste te pergatitur e mjaft te mire, si Rizvanolli, Muca, G.Bylykbashi, Bubeqi, Llani, etj. Pra, une u bej thirrje shokeve qe Shkumbinin ta konsiderojme nje skuader te forte, aq me teper kur dihet qe ne fushen e vet gjithnje e ka treguar kete gje”, - thotë kapiten Muka. Duhet veçuar fakti që, ndjekëset më të afërta të skuadrës së Tiranës, Teuta dhe Vllaznia do të përplasen së bashku, ndërkohë që Partizanin e pret një trasfertë delikate në Vlorë. Nisur nga kjo llogari e thjeshtë, nuk është çudi që Shkumbini të dalë më i përfituari nga java e 22-të, për të rrëmbyer një tripikësh me shumë vlera përballë Tiranës së Muçës. Ndërsa, në kampin tjetër, ish-futbollisti legjendar Magani thotë: “Fitorja ne kete ndeshje vlen sa i gjithe kampionati, sepse po u humb kjo ndeshje, Shkumbini praktikisht eshte jashte kategorise superiore. Nese do te luajne ashtu siç e mendojme ne, atehere te jeni te bindur se ndeshja do te fitohet. Duhet te jemi shume te perqendruar e te sakte ne mbulimin e lojtareve kundershtare dhe te mos na ndodhe si ne Kavaje, ku per shkak te gabimeve foshnjerake humbem ndeshjen. Ndaj, duhet te luajme me kujdes, sepse Tirana ka lojtare cilesore ne perberje dhe te ve ne veshtiresi". Takimi i Peqinit do të gjykohet nga arbitri i Kolegjiumit të Tiranës, Lorenc Jemini. Ndërkaq, në Vlorë do të luajë skuadra që ka ecur mirë deri tani, Partizani. Ekipi është në përgatitjet e fundit, në një kohë që përballja do të jetë më shumë se sa e egër. Tekniku Hasan Lika e nuhat vështirësinë e 90 minutave të Vlorës: “Kemi punuar mirë që në fillim të javës dhe shpresojmë të rikuperojnë ndonjë problem të shkaktuar në derbi. Përgjithësisht, forma e skuadrës duket në nivel të kënaqshëm, por nuk duhet të harrojnë se do të kemi përballë skuadrën që na shkaktoi humbjen në fushën tonë. E kam përsëritur shpesh dhe e them sërish që nuk ka më skuadra të dobëta. Çdo skuadër futet në fushë me bindjen për të dalë me sukses, ndaj asgjë nuk është e sigurt. Në takimin e parë me Flamurtarin nuk e kishim menduar humbjen, por fusha e lojës nuk na dha të drejtë", - ka shtuar Lika. Në Vlorë, Partizani hedh pas krahëve pjesën më të vështirë të fazës së dytë. Vllaznia, Dinamo dhe Flamurtari ishin kundërshtarë të njëpasnjëshëm të të kuqve dhe nuk pritej ndonjë mrekulli, por thjesht ruajtja e ecurisë. Me Vllazninë, Partizani nuk mori asnjë pikë, por fitorja në derbi u ka dhënë krahë djemve të Likës. Ndeshja në Vlorë do të jetë nën gjykimin e arbitrit Sokol Çekaj.

Arbitrat dhe Asistentët

KATEGORIA SUPERIORE

1 Vllaznia-Teuta (03.03.07) E.Peza, A.Pregja, D.Rexha

2 Flamurtari-Partizani (03.03.07) S.Cekaj, M.Dervishi, G.Maloku

3 Shkumbini-Tirana (03.03.07) L.Jemini, S.Avdo, E.Miho

4 Dinamo-Apolonia (04.03.07) K.Meta, F.Lamaj, R.Zhuli

5 Elbasani-Besa (03.03.07) A.Janku, S.Zeka, A.Lamçe

6 Kastritoi-Luftëtari (04.03.07) Sh.Guce, L.Mustafaraj, D.Korreshi

KATEGORIA E PARE

1 Erzeni-Pogradeci E.Hoxha, B.Mesi, E.Pjetrushi

2 Ada-Laçi A.Taullau, I.Ziraj, E.Doda

3 Besëlidhja-Skënderbeu M.Sopiani, P.Goxhaj, G.Bimi

4 Gramshi-Cërriku S.Bigdani, A.Guce, D.Salaj

5 Tomori-Tepelena A.Kastrati, A.Molla, A.Alla

6 Lushnja-Bilisht Sport S.Jareci, F.Elezi, E.Bicaku

RENDITJA E KAMPIONATIT

1. Tirana 46 21 12 4 3 46-22

2. Teuta 38 21 10 8 3 24-19

3. Vllaznia 37 21 10 7 4 28-18

4. Partizani 36 21 10 6 5 25-16

5. Besa 31 21 7 7 6 24-21

6. Dinamo 28 21 8 4 9 21-23

7. Elbasani 28 21 8 4 9 19-22

8. Flamurtari 26 21 7 4 10 27-26

9. Luftëtari 23 21 6 5 10 15-22

10. Kastrioti 22 21 5 7 9 22-31

11.Shkumbini 16 21 4 4 13 18-29

12.Apolonia 16 21 4 4 13 19-39

GOLSHËNUESIT MË TË MIRË TË KAMPIONATIT

15 gola: Sinani (Tirana)

13 gola: Salihi (Tirana)

12 gola: Plaku (Apolonia)

10 gola: Xhafaj (Teuta), Abazaj (Kastrioti+Tirana)

9 gola: Nenaj (Flamurtari)

7 gola: Mancaku (Teuta)

6 gola: Lici, Dalipi (Vllaznia), Stojku (Elbasani), Xhihani (Besa)

5 gola: Ziambo (Kastrioti), Dede, Duro (Tirana), Sukaj (Vllaznia), Gudjabi (Dinamo+Vllaznia)

Lojtarët e pezulluar, Kategoria Superiore

Lojtaret e pezulluar per shkak kartonash qe nuk mund te aktivizohen ne javen e 22-të, Kategoria Superiore.

Elbasani - Mardjan Kacollja (6v) - 2 ndeshje pezullim.

Besa - Renato Arapi (3v)

Flamurtari - Erald Guna (3v), Roland Nenaj (lv, 1k)

Luftetari - Rostand Simo (6v) - 2 ndeshje pezullim, i denuar ne javen e 21 e vazhdim.

Shkumbini - Daniel Ramazani (3v)

Dinamo - Goran Vincetic (6v) - 2 ndeshje pezullim Julian Ahmati (6v) - 2 ndeshje pezullim Ilirjan Caushaj (3v)

Teuta - Edlir Tetova (3v)

Bledar Devolli (6v) - 2 ndeshje pezullim, i denuar ne javen e 21 e vazhdim

Vllaznia - Armir Grima (3v)

Tirana, Apolonia, Kastrioti, Partizani s’kanë lojtarë të pezulluar për javën e 22-të.

Aperture faqe 22 me foto

Për mesfushorin e ekipit kombëtar shqiptar, kohët e rikuperimit kanë përfunduar

Ervin Skela të hënën fillon stërvitjet me skuadrën

Më në fund ka ardhur lajmi i mirë për tifozët e Energie Cottbus, por edhe për ata të kombëtares shqiptare, pasi fantazisti Ervin Skela ka marrë lejen nga stafi mjekësor i Cottbus për të filluar stërvitjet me skuadrën. Lajmin e ka bërë të ditur vetë futbollisti, i cili për shkak të një sëmundjeje të gjakut nuk ka arritur të stërvitet me skuadrën. “Analizat e fundit kanë dalë shumë pozitive”, - ka thënë ai për të përditshmen gjermane “Lausitzer Rundschau”. “Kam marrë dritën jeshile nga doktorët dhe prej së hënës do të filloj stërvitjet me skuadrën”. Muajt e fundit, padyshim mund të konsiderohen si më të vështirët në karrierën e 30-vjeçarit shqiptar, i cili më 10 janar të këtij viti ishte diagnostifikuar se kishte “vlera të larta albuminash në gjak” dhe kishte lënë përgatitjet që po zhvillonte me skuadrën në Antalia të Turqisë për t’u shtruar në një klinikë në Essen të Gjermanisë. “Sigurisht që ishte një ‘shok’ i vërtetë për mua. Ndihesha për mrekulli dhe isha shumë i motivuar për të zhvilluar përgatitjet me skuadrën dhe pastaj kjo.” Pas dhjetë ditësh në klinikën e Essenit, ai kishte vazhduar kurimin në shtëpi, madje duke u afruar edhe te skuadra. Shqiptari është treguar kritik ndaj mediave që kanë spekuluar shumë për sëmundjen e tij. “Është e vërtetë se unë jan një futbollist profesionist, por sëmundja ka qenë një gjë private. Do të doja që njerëzit ta respektojnë këtë. Nuk ishte një sëmundje e rrezikshme dhe asnjëherë nuk ishte vënë në rrezik karriera ime”, - është shprehur ai. Karriera e tij është e lidhur me Energie Cottbus deri më 30 qershor të vitit 2009. Tashmë, ai angazhohet që sa më shpejt të jetë i gatshëm që të debutojë për skuadrën e tij.

BOKS/ Sot sfida e madhe e ringut

Aleksandër Zaitsev: “Nuk e kam frikë Qaton”

Kundërshtari i Kreshnik Qatos (28-vjeç), boksieri rus Aleksander Zaitsev, i cili më 28 mars mbush 37 vjeç, pohoi ekskluzivisht për Albania-sport.com se takimi kundër shqiparit është shumë i rëndësishëm për të. Dy boksierët edhe pse qëndrojnë në të njëjtin hotel, nuk kanë dashur të shkëmbejnë asnjë njohje kortezie me njëri-tjetrin. “Dueli me Kreshnik Qaton është shumë i rëndësishëm për mua, pasi bëhet fjalë për titullin Kampion Europe në peshën super të mesme”, - pohoi në një nga ambientet e hotel “Rogner”-it, boksieri rus, që u asistua në deklaratë nga bashkëshortja e tij. “Shumë boksierë punojnë gjithë jetën e tyre për të qenë afër këtij titulli dhe unë nuk dua kurrsesi ta humbas shansin”. I pyetur nga Albania-sport, nëse kishte patur mundësi ta njihte më parë Kreshnik Qaton, 36-vjeçari Zaitsev u përgjigj: “Jo nuk e kam njohur direkt, por kam parë disa kaseta të tij dhe ndeshje të tij. Qato ka boskuar kundër një boksieri rus në Kiev. Gjithsesi, nuk kam frikë ndaj tij”. Trajneri i Zaitsev, Oleg Kostromin, i vetmi që ka ka kontaktuar me Qaton shprehet më entuziast dhe i sigurt për fitoren e boksierit të tij. “Unë kam punuar shumë me boksierin tim, aq më tepër që si trajner kam humbur me Qaton kur ai mposhti një boksierin tim, Vladimir Zavgorodniy dhe këtë radhë dëshiroj të marr revanshin.”

Skënderbeu, për fitoren në “kuvendimin” e Lezhës ndaj Besëlidhjes

Ekipi i Skënderbeut po përgatitet që të sigurojë një fitore të mundshme në fushë të huaj, ndaj Besëlidhjes së Lezhës, si ndjekësja më e afërt në kampionatin e Kategorisë së Parë. "Skënderbeu është në gatishmëri të plotë për sprovën e vështirë në Lezhë të shtunën", -kanë deklaruar sot drejtuesit e klubit. Futbollistët e drejtuar nga Jani Kaçi, si asnjëherë tjetër kërkojnë një rezultat pozitiv që do t'i bënte ata më të sigurt në përpjekjet për kalimin në Kategorinë Superiore. Trajneri Kaçi thotë se, "ekipi do të shkojë në Lezhë për të siguruar fitoren, ndërkohë që edhe barazimi do të ishte një zgjidhje e mirë". Ai shprehet i kënaqur me punën e kryer deri tani, ndërkohë që e gjithe skuadra është e impenjuar për të dhënë më të mirën në këtë takim. Ndeshja, sipas Kaçit, është më e vështira për Skënderbeun, por natyrisht dhe më e bukura për vetë vlerat dhe ambicjet që kanë këto dy skuadra. Kaçi ka përcaktuar bashkë me strategjinë e lojës edhe formacionin me të cilin do t'i kundërvihet Besëlidhjes, me Ahmetlliun në portë e më pas me Lartin, Ngjelën, Hashanin, Vieron, Tikon, etj.

Ke foto

Trajneri i Kievos, elozhe për sulmuesin Bogdani

Goli fantastik ndaj Romës dhe paraqitja që ka bërë sulmuesi shqiptar i Kievos, Erjon Bogdani ka bërë që media prestigjioze europiane “Eurosport” ta përfshijë përsëri shqiptarin në listen e 11 futbollistëve më të mirë të Serie A për javën e 25-të. “ErBomber”, bashkë me Francesko Totin e Romës dhe Luka Saudatin e Empolit përbëjnë treshen e sulmit të ndeshjeve të zhvilluara të mërkurën. Bogdani ishte vlerësuar njëjtë edhe pas ndeshjes së shtunës ndaj Torinos, kur kishte shënuar dy gola, duke bërë që emri i tij të përfshihej në 11-shen më të mirë të javës. Fatkeqësisht, “Bogu” nuk do të mund të përsërisë për herë të tretë të njëjtin sukses, pasi është i skualifikuar për shkak të tre kartonëve të verdhë për ndeshjen që skuadra e tij do ta zhvillojë të shtunën në “San Siro” kundër Milanit, në një ndeshje të rëndësishme për skuadrën e tij. Trajneri i Kievos, Luixhi Delneri, ashtu si Erjon Bogdani ishte shprehur pas ndeshjes se skuadra e tij mund të merrte një barazim. Pas takimit ai ka mbetur shumë i kënaqur nga paraqitja e skuadrës, madje i ka thurur elozhe sulmuesit shqiptar për paraqitjen e tij. “Jemi në rritje konstante. Skuadra zhvilloi një ndeshje të shkëlqyer përballë Romës, që është një kundërshtar i vështirë për t’u përballuar, - ka thënë trajneri i Kievos. Nuk ka pikë dyshimi që në këtë ndeshje u binda se kam një grup lojtarësh të konsoliduar, të cilët mund të vazhdojnë të mbajnë këtë ritëm. Përveç pikës që morëm pashë edhe njëherë se jemi në përmirësim të vazhdueshëm. Duam që kur të vijë maji, ne të kemi siguruar qëndrimin në Serinë A. Bogdani? Është e kotë që të bësh komente për gjëra që janë krejtësisht të dukshme. Shpresoja që të ripërsëriste vetveten pas ndeshjes me Torinon dhe ai e bëri një gjë të tillë. Më vjen keq që nuk do ta kem për sfidën me Milanin, por mendoj se Kievo ka elementë që të mund ta zëvendësojnë atë, të paktën për një ndeshje.” Pas Zakeronit ishte radha e Spaletit, një tjetër trajner që duhet të vuante golat e shënuar nga Bogdani pa kaluar ende 20 minutat e para të ndeshjes. Trajneri i Romës ia ka vënë fajin terrenit të fushës, por ka pranuar se nuk e priste që Kievo të shënonte aq shpejt.

UKRAINA

Elvin Beqiri: “Jam në gjendje të shkëlqyer”

“Në fazën e parë nuk u aktivizova shumë për shkak të dëmtimit, por tani që jam rikuperuar plotësisht ndihem në formë optimale”, - shprehet Beqiri nga Ukraina e largët, teksa vazhdon edhe aktivitetin e tij me skuadrën, ku dhe luan prej gati 3 sezonesh. Beqiri thotë se ka kontakte të shpeshta me Armend Dallkun dhe Debatik Currin, kundërshtarët e tij te Vorskla Poltave, por miqtë e tij të mirë në kombëtaren kuqezi. “Edhe ata shpresojnë ta mbyllin sezonin në një vend të mirë, pasi renditen në vendet e fundit në kampionat. Jemi përgatitur shumë fort, për më tepër që tashmë prej një muaj e gjysmë drejtohemi nga një trajner i ri, Ko Adriansen që ka drejtuar më parë Porton dhe në karrierën e tij kanë qenë edhe Ajaks dhe AZ Alkmaar në Holandë. Është një trajner me përvojë të madhe dhe shumë kërkues”, - shton Elvini, që nga ana tjetër pohon se me trajnerin e ri ka krijuar raporte të shkëlqyera si pune, ashtu dhe njerëzore. “Kemi shumë shpresë që të ngjitemi në klasifikim, pasi aktualisht ndodhemi në vendin e 7-të të kampionatit ukrainas, ku synojmë si zakonisht një vend në Kupën UEFA. Metalurg merr pjesë çdo vit në kupat europiane”, - pohon Beqiri, që mezi pret rifillimin e kampionatit më 4 mars. Elvin Beqiri shprehet edhe për ndeshjen e lombëtares kundër Sllovenisë, më 24 mars 2007, në qytetin e Shkodrës: “Ende nuk e kam marrë veten nga humbja me Maqedoninë (0-1), por shpresojmë se ndaj Sllovenisë do të marrim një rezultat pozitiv, ku së pari synojmë fitoren, aq më tepër që luajmë në fushën dhe tonë para sportdashësve tanë.”

Trajnerit Ramos, ende nuk i besohet ajo që i ndodhi

Trajneri i FC Sevilja, Juande Ramos, u shpreh te enjten ne mbremje se eshte ende ne gjendje shoku, pas goditjes qe pesoi ne koke nga nje shishe gjate çerekfinales se kthimit per Kupen e Spanjes perballe Betis. "Ende nuk e kuptoj ate qe me ndodhi", - deklaroi Juande Ramos, ne radion “Cadena Ser”. Trajneri i FC Seviljes u godit te merkuren ne mbremje nga tribunat, me nje shishe plastike me uje ne koke pas golit te shenuar nga Frédéric Kanouté ne '57 te ndeshjes. Ai humbi vetedijen per disa minuta, nderkohe qe ndeshja u nderpre nga gjyqtari. "Nuk e mendoja se mund te arrihej deri ketu", - tha trajneri disa ore pas daljes nga klinika, ku qendroi nen vezhgim. Federata Spanjolle do te vendose te premten pasdite per sanksionet nga Betis. Klubi i trajnerit francez, Luis Fernandez, mund te pezullohet nga Kupa e Spanjes per dy vjet dhe stadiumi mund te pezullohet nga kater deri ne 12 ndeshje.

Ke foto

Drogba zgjidhet lojtari afrikan i vitit 2006

Sulmuesi i Çelsit, Didier Drogba, eshte zgjedhur te enjten ne Akra lojtari afrikan i vitit 2006, beri te ditur Konfederata Afrikane e Futbollit. Drogba, qe i dha nje ndihme te madhe Bregut te Fildishte te arrinte deri ne finalen e CAN-2006, te humbur me 11-metersha dhe te marre pjese ne Kupen e Botes eshte preferuar para sulmuesit te FC Barcelona, Samuel Eto''o, qe ka fituar tre here (2003, 2004, 2005) dhe mesfushorit ganez, Michael Essien. 28-vjeçari shenoi dy here ne finalen e Kupes se Liges Angleze me Çelsin ndaj Arsenal (2-1), nderkohe qe ka fituar dy tituj te kampionit te Anglise me klubin londinez ne 2005 t 2006.

Lojtarët më të mirë të Afrikës që nga viti 1990 janë:

1990: Roger Milla (Kamerun/Saint Denis/REU)

1991: Abedi ''Pele'' Ayew (Gana/Marseille/FRA)

1992: Abedi ''Pele'' Ayew (Gana/Marseille/FRA)

1993: Abedi ''Pele'' Ayew (Gana/Lyon/FRA)

1994: George Weah (Liberi/Paris Saint-Germain/FRA)

Emmanuel Amunike (Nigeri/Sporting Lisbone/POR)

1995: George Weah (Liberi/AC Milan/ITA)

1996: Nwankwo Kanu (Nigeri/Inter Milan/ITA)

1997: Victor Ikpeba (Nigeri/Monaco/FRA)

1998: Mustapha Hadji (Marok/Deportivo La Corogne/SPA)

1999: Nwankwo Kanu (Nigeri/Arsenal/ANG)

2000: Patrick Mboma (Kamerun/Parma/ITA)

2001: El Hadji Diouf (Senegal/Rennes/FRA)

2002: El Hadji Diouf (Senegal/Liverpul/ANG)

2003: Samuel Eto''o (Kamerun/Real Majorque/SPA)

2004: Samuel Eto''o (Kamerun/FC Barcelona/SPA)

2005: Samuel Eto''o (Kamerun/FC Barcelona/SPA)

2006: Didier Drogba (Bregu i Fildishtë/Çelsi/ANG)

KULTURA

ZOGU I KOMBIT

Ali Podrimja

Zogu i Kombit na kishte përcjellë krahëhapur nga pika e qiellit, ku komunikonte me Tynzot ndoshta, të cilin e kërkonim, por nuk dinim a na njeh. Njerëzit kishin humbur edhe saktësinë e kohës e lëre më si duket Hirësia. Ka edhe pak deri atje, na thanë në rrëzë. Por ikte ora e katërt e Zoti ynë nuk dukej.

Në jetën time kurrë nuk kisha sharë më shumë se atë ditë. Tamam i ngjaja një karrocieri. Vetë i shtati po ngjitesha ta shikoja të gëzuarin. Gjarpëronim lugjeve të panumërta. Gazika e vjetër kineze tërfatte si një kafshë moçalike. Bjeshkë të zhveshura përreth pa asnjë hije na shtrëngonin, të qelavta, gungore me ngjyrë dheu, e cila ndërronte nuancat pas çdo kthese. Kisha të drejtë që shaja, tha Filozofi, dorë njeriu nuk paska ndërruar gjë. Vetëm bunkerë lëviznin si sy të gjallë.

Gazika e vjetër kineze mezi përbirohej xhadesë së kohës së Perandorisë Osmane. Tridhjetë km deri në brez të malit i kaluam për hiq më pak se katër orë. Njerëzit kishin harruar edhe kahjet, se çdo lidhje me Hirësinë e kishin këputur tash e sa vjet dhe nuk di a e kishin parë ndonjëherë në ëndërr. Shkilnim të njëjtën udhë nëpër të cilën kishin kaluar Naimi, Noli e burra të kombit. Asnjëri nuk kishte arritur në majë, kështu tregonin ata që kishin dëgjuar nga prindërit. I kishte lëshuar fuqia, apo i ishin frikësuar lartësisë. Nuk ia kishin parë fytyrën Hirësisë, as nuk kishin pirë ujë në burime të tij.

I madhi ishte endur kodrave tek bisedonte me vetmi e rrufe, herë-herë kryemëkrye i kishte tubuar majat dhe u kishte pëshpëritur diçka që askush nuk dinte të thoshte se çka. Supozohej se ishte ankuar dhe i kishte harruar ata që kishin kënduar për të: pak të vërtetë, pak besim, pak bekim nëpër fjalët e tyre...

Si në ëndërr ngjiteshim Tomorit. Ishte dëgjuar prapë Filozofi: Diktatorët janë vëllezër, kanë shumëçka të përbashkët. I ngrisin tempuj vetes dhe dikur u kujtohet mileti. Skarparioti bënte me dorë kah kodra: Ja këtu ka shkelur Naimi, ndërsa atje Noli. Fjala e tij pakëz e përmalluar. Por me psehun e tij merrej Filozofi. Unë isha në krye dhe më tërhiqte forcë e padukshme. As një pëllëmbë më e lartë se Ura e Shenjtë nuk më dukej kepi i humbur në re.

Pas pak kohe ishte parë Maja e Tomorit, floku i thinjur i tij, pastaj gjymtyrët e tjera. E ne pushtonim dhe kodrën e fundit. Cicerrima të shpezëve dëgjoheshin. Më vonë u shfaq Zogu i Kombit i mbërthyer në ajër, çuditshëm. Nuk i shkoqëm sytë nga fluturimi i tij. Me krah të mëdhenj na kishte mbuluar tërë kohën. Më se një orë kishte që e lamë gazikën e vjetër kineze aty te një bërryl mali. Zogun e Kombit nuk e pamë, seç e kishte fshehur një re. Te një pishë mbi trupin tim të dërrmuar u shemb diçka, as sirenë as floçkë, prej gjaku e mishi ishte, me flokë të gjatë tek më mbuloi mua Konstatinin dalë nga varri. Zëri i skarpariotit më zgjoi dikur: Rrëmujë qenka bërë në shtypin e majtë pse nuk e kishim marrë edhe Dritëro Agollin. Do ta bënte udhëtimin më të hareshëm e pak antik. Ç’kishim faj? Logjika shqiptare nuk ishte liruar ende nga paragjykimet partiake. Ngjiteshim në majë të takonim Tynzot, të cilin e kishin syrgjynosur atje lart dhe nuk ia kishin ndërtuar një dhiare që të zbresë mes të vetëve.

Parafytyroja Avenynë e pestë në Nju Jork, sheshet e Parisit, të Vjenës, të Berlinit, të Pekinit, të Moskës, Omoninë dhe Sintagmën e Athinës. Por Hirësisë çfarë sheshi t’i siguronim? Çështje u bë më vonë: Tynzot mos e kishte harruar shqipen, në cilën gjuhë të komunikonim me të.

Pamë një re të bardhë tek shpërthente nga një karajapi, zgurdulluam sytë se dilte dikush nga aty. Për pak kohë u shurdhua Tomori. Në një shkëmb guri ishte ulur Hirësia. Shikimin kishte tretur kushedi ku, Zogun e Kombit kërkonte ndoshta. Pa frymë u ngritëm, kush në bërryla e kush vrap. Frymë u bë dhe vasha me flokë të gjatë, as sirenë, as floçkë. Ma zgjati dorën dhe ramë përmbys para këmbëve të Hirësisë.

Hera e parë ishte që takoja Tynzot. Nuk kisha besuar se ishte më i ri se të tjerët që na vidhnin tokeqielledet. As shëndeti nuk e kishte lënë, megjithëse një gjysmë shekulli i syrgjynosur atje lart. Vërejta se zuri t’i rudhë sytë, mos dritë e fortë e kishte qëlluar. U përula vashës dhe e luta të m’i kthej syzat, nga verbimi ta shpëtonim Hirësinë. Buzagaz në dorë m’i hodhi ato dhe u nisëm në tempull, ku reja e bardhë ishte ngritur pakëz më parë.

Zbritëm tevona rrëzë Tomorit. Në bërrylin e parë gërrhamë e njohur na priti. Thellë në qiell flatëronte Zogu i Kombit, mbrojtësi ynë. Na kishin treguar dikur se gazikën e vjetër kineze e kishin gjetur të varur për një tra të Demir Zykos tek këndote Urën e Çabesë. Vasha e bukur, as sirenë as floçkë, kishte lëshuar një mallkim se mali nuk ishte ulur as çelur hëna, tek binte para nesh Zogu i Shenjtë. Kishte një krah të thyer që duhet shëruar. E vetmja lidhje është me Hirësinë.

Oh, Zoti Ynë...

QNK

Performancë me poezi të zgjedhura të Kadaresë

Poezia e Ismail Kadaresë, një nga personalitetet më të shquara të kulturës shqiptare, ka qenë në qendër të një performance artistike që u organizua të premten në mesditë nga Qendra Ndërkombëtare e Kulturës “Arbnori”, në Tiranë . I njohur për një poezi pa ekuivoke, shpesh marciale, thuajse përherë optimiste, në kritikën zyrtare, Kadare gjithnjë është pritur si pasurim i poezisë shqipe, veçanërisht me temën e qëndresës shumëshekullore të popullit shqiptar në rrugën e tij të gjatë të historisë. Poezia e tij është cilësuar si poezi e sfidave të mëdha shqiptare dhe që është e përshkuar nga qëndrimi hyjnizues ndaj historisë kombëtare dhe ndaj gjuhës shqipe. Përgjithësisht poezia e Kadaresë është e sunduar prej mitit të së shkuarës, evokimit të lavdisë së dikurshme. Kadare synon, përmes poezisë së tij, ta çlirojë njeriun shqiptar prej akuzash që e kanë ndjekur ndër shekuj, duke përfshirë akuzën si popull i lindur me instinktin e luftës dhe të mercenarizmit, binjak me armën dhe peng i saj. Në këtë performancë artistike, e cila u organizua në kuadër të sallonit të letërsisë shqiptare janë interpretuar poezi të zgjedhura të Ismail Kadaresë nga aktorë të Trupës së Teatrit Kombëtar Vasjan Lami e Rajmonda Bulku, ndërsa kanë qenë pjesëmarrës studentët e Fakultetit të Gjuhë Letërsisë, Akademisë së Arteve të Bukura, pedagogë dhe artistë. Ismail Kadare është një nga personalitetet më të shquara të kulturës shqiptare, ambasador i saj në botë, është autor i shumë veprave në poezi e prozë, laureat i shumë çmimeve kombëtare, kandidat i çmimit Nobel për shumë vite me radhë, anëtar i Akademisë së Shkencave të Shqipërisë dhe Anëtar i Akademisë Franceze të Shkencave Morale. Vepra e Tij është përkthyer në 32 gjuhë të huaja, duke arritur kështu një rekord të përhapjes në tërë botën e qytetëruar.

III

Bujar Zajmi shfaqet me 146 piktura në Galerinë Kombëtare

Është në udhëtim të vazhdueshëm në kërkim të vetes, e gjen dhe prapë vazhdon për ta pasur më të përsosur. Bujar Zajmi e ka të vështirë të përshkruajë pikturën. Shtjellimet i duken të pakuptimta. Ato janë ndiesi. Dhe në të vërtetë prej 146 pikturave shpërthejnë mijëra ndiesi të përjetuara në vitet '50-'60, por edhe ato të shikuesit të lirë, që gjen mes kontureve diçka të vetën, diçka të njohur. Dje në ambientet e Galerisë Kombëtare të Arteve hapi ekzpozitën personale piktori 68- vjeçar, Bujar Zajmi. Janë punimet e 50 vjetëve në teknika të ndryshme, që nga lapsi, pasteli, akuarel, bojë vaji, tush, akrilik, etj. Që nga peizazhet piktoreske tek ato abstraksioniste-gjeometrike, të guximshme për kohën kur u realizuan. Është një nga ekspozitat e tij të rralla. Dhe drejtori i GKA-së, Genc Mulliqi, teksa lë pas moshën e artistit, e quan atë një zbulim. Zajmi tregon se ka punuar vazhdimisht në heshtje. Natyra e tij është e tillë. "Kam punuar si i uritur", - thotë ai. Kur punonte mendonte se dita që do të ekspozonte do të ishte e nesërmja, por frymëzimi kapte frymëzimin dhe e nesërmja shtyhej gjithnjë në kohë. "Nuk them se kam bërë gjëra të veçanta. Kam pikturuar veten time, njeriun e përjetshëm. Dhe njeriu i përjetshëm nuk është shkencëtari, politikani…, por njeriu i zakonshëm", - thotë Zajmi, teksa përmend një shprehje të Abdurrahim Buzës, mësuesit të tij në Lice, që e porosiste vazhdimisht: "Baj veten tande!". Atëherë nuk e kuptonte, por teksa u thellua brenda qenies së tij, pa se aty ishte universi që kërkonte. Burri dhe gruaja të kapërthyer në një, për të dhënë vazhdimësinë, malësori me qeleshe të bardhë…, të gjitha janë aty, për të zbuluar dhe kuptuar botën e fshehtë të Zajmit. Një botë, që më në fund vendosi t'ua shpalosë edhe të tjerëve.

-Këngëtarja shqiptare, Elsa Lila, është ngjitur triumfuese në mbrëmjen e së mërkurës, në natën e dytë të edicionit të 57-të Sanremos. Vokali i saj i bukur, i shtrirë mes nunacave tigullore transaparente e ka mbushur hapësirën gjigante të teatrit “Ariston” në San Remo me emocione nga më dridhërueset

Këngëtarja Lila ka sfiduar me këngën “Il senso della vita” deri në natën finale

Elsa Lila, ylli shqiptar i Sanremos

Dhurata Hamzai

Këngëtarja shqiptare, Elsa Lila, është ngjitur triumfuese në mbrëmjen e së mërkurës, në natën e dytë të edicionit të 57-të Sanremos. Vokali i saj i bukur, i shtrirë mes nunacave tigullore transaparente e ka mbushur hapësirën gjigante të teatrit “Ariston” në San Remo me emocione nga më dridhërueset. Këngëtarja 25-vjeçare u rendit mes katër emrave të tjerë këngëtarësh të rinj, të cilët do t’i bëjnë sfidë njëri-tjetrit në natën finale në Sanremo. Elsa Lila ka interpretuar këngën “Il senso della vita” (Kuptimin e jetës), pas interpretimit të së cilës mori duartrokitje të mëdha nga publiku italian dhe përgëzime e përqafime miqësore nga drejtuesi legjendar i festivalit Pippo Baudo. Jo më pak dinjitoz e ka bërë konkurimin e Elsa Lilës fakti që në garën e Sanremos ishin rikthyer edhe këngëtarët më të vjetër. Në natën e dytë të festivalit italian kanë kënduar këngëtari i famshëm italian, Johny Dorelli, është rikthyer grupi britanik “Take That” dhe është rishfaqur Paolo Rosi me tekstin e shkruar para 20 vjetësh nga Rino Gaetano. Pikërisht mes duartrokitjeve të ndjera për të gjithë këta këngëtarë të famshëm janë ngjitur në natën finale edhe 4 të rinj, mes të cilëve ishte shqiptarja Elsa Lila. Të rinjtë e tjerë Romina Falconi, Sara Galimberti dhe Fabrizio Morro, sipas mediave italiane në natën finale do ta rrisin më tej konkurrencën midis këngëtarëve. Gazetta italiane “Il Tempo” ka shkruar për Elsa Lilën se “Një karakteristikë e veçantë e kësaj vajze të mrekullueshme është fakti që është lidhur me artin që në fëmijëri, kur shfaqej në programet e televizionit shtetëror shqiptar. Që aty, karriera e saj vazhdonte të ishte në rritje, duke surprizuar publikun. E gjithë kjo, meritë e një zëri të jashtëzakonshëm dhe e një prezence skenike të veçantë, por sigurisht edhe e një personaliteti të orientuar”. Elsa Lila është shprehur për mediat shqiptare që në fillim të konkurimit se “kënga ime do t’ju bëj të dridhëroheni”. E sigurt në vlerat artistike të kësaj kënge, Elsa Lila ka përgatitur me kujdes edhe veshjet dhe performancën e saj për në skenën gjigante të Sanremos. Një grimiere japoneze, e ardhur posaçërisht për Elsën nga SHBA, e ka cilësuar sharmin e saj si diçka magjike. Ajo ka thënë se fytyra e Elsa Liles i ngjan një engjëlli, sipas saj Elsa Lila është një grua-fëmijë. Ndërsa kënga me elementët e saj e ka bërë Elsën që të jetë akoma më e sigurt për fitoren deri në finale: “Muzika, teksti, por dhe fryma e vetë këngës më ngjajnë perfekte. Është kënga e duhur, në momentin e duhur”, thotë ajo. Për Elsa Lilën kjo është hera e dytë që hyn në konkurrim në Sanremo. Kjo pjesëmarrje e saj është pritur mirë nga publiku shqiptar, pas suksesit që ajo pati disa vite më parë në skenën tonë. Pas këngës “Valeria”, me të cilën ajo konkurroi tre vjet më parë me kompozim të kantautorit të njohur italian, Gigi D’Alessio, Lila rikthehet me këngën “Il senso della vita” (Kuptimi i jetës). Është një këngë që pas saj ka bashkëpunimin e dy emrave të njohur italian. “Kuptimi i jetës” është shkruar nga Guido Morra dhe e kompozuar nga Maurizio Fabrizio, dy autorë që kanë kompozuar për emra të njohur të muzikës italiane si Patty Pravo, Ornella Vanoni, Françoise Hardy, Mia Martini, Eros Ramazzotti dhe Renato Zeros. Interpretimi i saj i parë në Sanremo me këngën “Valeria” ishte i suksesshëm. Edicioni i 47-të i këtij festivali, ka nisur nga data 27 shkurt dhe përfundoi mbrëmë në orët e vona të datës 3 mars. Të pesë netët e festivalit u prezantuan nga Pippo Baudo dhe Michelle Hunziker. Elsa Lila ka qenë madhështore në të gjitha ngjitjet në skenë dhe përcjelljet në shkallët e Sanremos, ndërsa bashkatdhetarët e saj e kanë ndjekur me dashuri e krenari përmes ekranit të televizionit publik shqiptar. Spektatorët në herën e dytë të ngjitjes së saj në Sanremo panë një Elsa Lila me zë më të pjekur dhe në harmoni me poezinë e Guido Morra-s dhe muzikën e Maurizio Fabrizio-s. Duket se kënga është me e veçanta në mesin e këngëve të të rinjve përballë të cilëve konkuron Elsa Lila, sepse ajo di ta këndojë atë pa asnjë sforcim.

KRONIKA

Ishin shtyrë 15 seanca nga mungesa e avokatit

Arjan Kane, jepen dëshmi

për favorizim prostitucioni

Së bashku me biznesmenin Fatmir Tahiraj, Kane akuzohet për trafikim të femrave për prostitucion, në rrethanë rënduese me të mitura, si dhe falsifikim e pastrim parash

Në gjyqin në ngarkim të Arjan Kanes dhe bashkëpunëtorit të tij, Fatmir Tahiri, të akuzuar për trafik prostitucioni dhe marrëdhënie seksuale me të mitur janë paraqitur disa prova shkresore, në lidhje me akuzat ndaj të pandehurit Kane. Në Gjykatën e Krimeve të Rënda, që prej një viti është duke u shqyrtuar çështje në ngarkim të të pandehurve Kane e Tahiraj, ndërsa ky shqyrtim gjyqësor është ende në fazën e pyetjes së dëshmitarëve të akuzës. Në 15 seanca të zhvilluara nga kjo gjykatë, pothuasjse të gjitha janë shtyrë për mungesë të avokatit mbrojtës dhe për thirrjen e dëshmitarëve, ndërsa në seancën e radhës pritet që prokurori të mund të lexojë thëniet e njërit prej dëshmitarëve të akuzës, pasi këtij të fundit i janë marrë këto thënie në banesën e tij për shkak të sëmundjes. Kjo kërkesë e akuzës është miratuar edhe nga trupi gjykues, e cila pritet ta administrojë këtë si provë në fashikull.

Çështja

Dy biznesmenët nga Fieri, Arjan Kane dhe Fatmir Tahiraj akuzohen nga Krimet e Rënda për “trafikim të femrave për prostitucion, në rrethanë rënduese me të mitura”, “Shfrytëzim të prostitucionit në rrethana rënduese”, “Falsifikim të letërnjoftimeve apo vizave”, “falsifikim të akteve të gjendjes civile”, “falsifikim të dokumentave dhe pastrim i parave të pista”. Kane dhe Tahiraj, sipas kërkesës për gjykim akuzohen nga prokuroria se, për 10 vite me radhë kanë shfrytëzuar disa femra si prostituta jashtë shtetit, me qëllime përfitimi. Ndërsa të dy të pandehurit gjykohen në mungesë, pasi ndaj tyre janë lëshuar urdhërkërkimet ndërkombëtare. Të pandehurit Arjan Kane dhe Fatmir Tahiraj akuzohen se nga viti 1994 kanë shfrytëzuar disa femra si prostituta, për qëllime përfitimi në Itali. Hetimi ndaj dy të pandehurve ka filluar në vitin 2004, duke bashkëpunuar edhe me drejtësinë italiane. Nga hetimet dypalëshe është bërë e mundur të dokumentohet se Arjan Kane ka shfrytëzuar për prostitucion persona, me të cilët ekzistojnë lidhje të afërta gjinie. Mësohet se gjatë vitit 1999-2001, Arjan Kane ka falsifikuar dokumentet dhe është martuar me një vajzë shqiptare, për ta trafikuar më pas në Itali. Kjo e fundit, nga deponimet e realizuara, drejtësisë italiane i ka treguar gjithçka, duke qenë dhe shtysa e fillimit të hetimit. Sipas kërkesës për gjykim, dy të pandehurit, paratë e fituara nga shfrytëzimi i femrave për prostitucion i kanë investuar në Shqipëri në aktivitete të ndryshme private, të cilat janë sekuestruar paraprakisht.

Dëshmitë

Dy prej dëshmive kryesore në këtë gjyq kanë qenë pikërisht ato të dy prej viktimave të trafikut. Dëshmitaret e ardhura nga Italia, me kërkesë të organit të akuzës, kanë pranuar se kanë punuar në Itali me dëshirën e tyre. Lumturi Balla dhe Marsela Tahiraj iu janë përgjigjur për disa minuta pyetjeve të prokurorëve dhe gjyqtarëve, por në asnjë rast nuk kanë pranuar faktin se janë trafikuar. Në dëshminë e saj, Marsela Tahiraj ka pohuar se ka një vajzë me Fatmir Tahirin dhe për ca kohë kishte qenë e martuar më të. “Pas ndarjes, - pohoi dëshmitarja, - kam dalë në rrugë për të përballuar jetesën.” Por sipas akuzës, të dyja gratë nuk kanë dashur të pohojnë në gjykatë atë që kanë deklaruar para autoriteteve italiane, ku ka nisur edhe hetimi i kësaj çështjeje.

“Tur Labi” kërkon lirinë. Avokatët:

Kanë kaluar afatet e paraburgimit

Shtyrjet e pafund të hetimeve kanë bërë që Artur Vaqo, i njohur si Tur Labi, i akuzuar për trafik ndërkombëtar droge, të ankohet për zgjatjen e afatave të paraburgimit. Në Gjykatën e Krimeve të Rënda pritet që avokati mbrojtës i të pandehurit Vaqo, i cili është arrestuar një vit më parë si bashkëpunëtori i Gëzim Salillarit, të çojë para trupit gjykues prova të reja shkresore kundër qëndrimit në qeli. Në këto prova pritet që mbrojtja të argumentojë këtë ankesë në lidhje me mbajtjen e klientit të tij në qeli më shumë se tre muaj sa është e parashikuar edhe në ligj. Vaqo akuzohet nga Prokuroria e Krimeve të Rënda për Trafik Ndërkombëtar në bashkëpunim edhe me shtetasin Ilir Sukaj. Dy muaj më parë, dosja në ngarkim të këtyre shtetasve u nda në dy pjesë. Përfaqësuesi i organit të akuzës ka deklaruar se nga kjo dosje është shkëputur i pandehuri Gëzim Salillari, të cilit, tashmë akuza për bashkëpunim me Vaqon dhe Sukajn i është rrëzuar. Ndërsa, prokuroria e Krimeve të Rënda ka bërë të ditur se, Vaqo e Sukaj akuzohen për trafik lëndësh narkotike dhe në dosjen e hetuesve janë të gjitha përgjimet e policisë italiane, të cilat kanë mbërritur në Tiranë me anë të një letërporosie. Gjykata e Barit, disa muaj më parë ka dhënë 23 vjet burg për Artur Vaqon, me nofkën Tur Labi, ndërsa Ilir Sukaj është dënuar me 12 vjet heqje lirie. Ata akuzohen për trafik heroine në ngarkesa të mëdha. Sipas prokurorisë, pasi mbërrinte në Itali nga Shqipëria, heroina trafikohej në Emilia Romanja, Abruzo, Kampania e Pulia. Kujtim Pajo, 38 vjeç dhe Alfred Katro, 40 vjeç, janë dënuar me nga 16 vjet burg, Sukaj u kap në vendin e quajtur “Brryli”, ku banonte, ndërsa Vaqo tek “Stacioni i Trenit”. Për të dy të pandehurit, prokuroria ka bërë të ditur se ka prova të mjaftueshme për trafik ndërkombëtar droge dhe pjesëmarrje në organizata kriminale.

Burgjet, vijon sistemimi pas vendeve bosh të krijuara nga amnistia

Të dënuarit, në shumicën e burgjeve shqiptare janë duke u sistemuar nëpër dhomat e tyre të reja. Pas amnistisë dhe pas dërgimit në varësi të Drejtorisë së Burgjeve të të gjithë të paraburgosurve që ndodheshin në komisariate, transferimet në shumicën e qelive shqiptare janë bërë të përditshme. Drejtuesit e burgjeve kanë bërë të ditur se janë sistemuar një pjesë e mirë e të dënuarve, ndërsa pritet që ky sistemim të zgjasë edhe për disa ditë, kjo për shkak të lëvizjeve të shumta. Burimet nga Drejtoria e përgjithshme e Burgjeve kanë bërë të ditur se janë shqyrtuar të gjitha kërkesat e të dënuarve të mbërritura në drejtoritë përkatëse. “Ka patur shumë kërkesa, por sistemimi sipas dëshirave të të gjithë të dënuarve nuk është i mundur”, - shprehen drejtuesit e burgjeve. Grindjet nëpër burgje midis grupeve rivale të të dënuarve e kanë bërë më të vështirë procesin e rehatimit nëpër dhoma. Situata e krijuar nga lëvizjet këto ditë në burgjet e vendit ka bërë që edhe kontrollet të jenë më të rrepta nga ana e policisë së burgjve. Në këto kontrolle janë kapur disa sende të ndaluara si thika të sajuara nga të dënuarit si edhe disa telefona celularë. Sipas burimeve, transferimet nëpër burgje bëhen për arsye sigurie, kur rrezikohet jeta ose shëndeti i të dënuarve të tjerë, kur ka mbipopullim në institucione, etj. Ndërsa, në numrat pa pagesë të Avokatit të Popullit, këto ditë kanë mbërritur disa telefonata, në lidhje me disa raste të transferimit që nuk kanë qenë në mënyrë të rregullt dhe se drejtuesit e burgjeve nuk i kanë justifikuar sipas ligjit. Gjithsesi, sipas burimeve nga burgjet, pritet që këto raste ankesash të shqyrtohen një për një. Ndërsa, në disa raste të tjera ankesash thuhet se në urdhrin e transferimit nuk ndodhet arsyeja e këtij transferimi me shkrim. Një tjetër problem që mbetet i pazgjidhur në të gjitha burgjet e vendit është higjiena. Sipas burimeve nga Drejtoria e Përgjithsme e Burgjeve mësohet se, gjatë këtyre ditëve, në një pjesë të mirë të qelive është bërë edhe lyerja me gëlqere.

RRETHE

“Burg pa afat” trafikantëve të drogës

KORÇË- Gjykata e Faktit ka vendosur dje masën e sigurisë "arrest në burg pa afat" për tre persona, të kapur pak ditë më parë me një sasi prej afro 19 kilogramësh drogë, të cilën po e trafikonin drejt Greqisë. Në seancën e zhvilluar të premten, në një nga sallat e kësaj gjykate, trupi gjykues vendosi këtë masë sigurie për shtetasit e arrestuar Thanas Trasha, 43 vjeç, Dhimitër Duka, 44 vjeç, të dy banues në qytetin e Korçës dhe për 29-vjeçarin Bardhul Kolgjini, banues në Tiranë. Kjo masë ishte kërkuar dhe nga organi i Prokurorisë së Korçës për tre të akuzuarit si trafikues të lëndëve narkotike, në bashkëpunim dhe favorizues të përdorimit të lëndëve narkotike. Dy banorët e qytetit të Korçës, Trasha dhe Duka, të njohur më parë për precedentë penalë në trafikun e drogës dhe 29-vjeçari Kolgjini u kapën paraditen e datës 26 shkurt në hyrje të qytetit të Bilishtit (Devoll). Dy banorët e Korçës, që udhëtonin në një autoveturë dhe 29-vjeçari Kolgjini, që udhëtonte në një tjetër, në bashkëpunim mes tyre, po tentonin kalimin e 18 kilogramëve dhe 872 gramëve droge të fortë, e llojit heroinë, për në Greqi. Ata u kapën pas një survejimi relativisht të gjatë, gjatë një aksioni të organizuar në hyrje të qytetit të Bilishtit.

S. H

Defekti në linjën 110 kW si rezultat i stuhisë. Riparimi në kohë rekord

Njëqind mijë banorë, 30 orë në errësirë

Konfirmohet se furnizimi me energji elektrike i konsumatorëve të rretheve të Kukësit dhe Hasit ka rinisur, pas riparimit të defektit të ndodhur në linjën e tensionit të lartë…

KUKËS-Rreth 100 mijë banorë të rretheve të Kukësit dhe Hasit kanë qenë në errësirë të plotë për më shumë se 24 orë. Sipas specialistëve të KESH-it, kjo ndërprerje e papritur e energjisë elektrike për një kohë kaq të gjatë ka ardhur nga një defekt në linjën e tensionit të lartë në linjën 110 kW, që furnizon këto dy rrethe nga Fierza nëpërmjet linjës që kalon në Qafë-Mali. Ka qenë një stuhi e paparë, ndonëse moti ka qenë i ngrohtë në këtë zonë, ajo që ka shkatuar këputjen e përcjellësit të rrymës dhe për pasojë deri në mesditën e djeshmë, rrethet e Kukësit dhe Hasit kanë qenë në terr, megjithë përpjekjet e brigadave të riparimit të avarive, për të riparuar përcjellësit e këputur gjatë natës. Ndërkohë, një ditë më parë, dritat ishin ndërprerë edhe për shkak të riparimeve në HEC-in e Fierzës. Në Drejtorinë Rajonale të Elektrikut në Kukës, ende nuk ka mbërritur ndonjë

urdhër nga KESH-i për ndërprerje të energjisë eklektrike dhe futjen e grafikut të kufizimeve, kështu që përveç dëfekteve, ky rajon vazhdon të ketë

energji elektrike 24 orë. Edhe niveli i ujërave në Fierzë është rritur, duke mbuluar sërish gërmadhat e dala të qytetit të vjetër të Kukësit. Sipas zyrës së dispeçerisë, niveli i këtyre ujërave kap shifrën 265 metra mbi nivelin e detit. Kjo rritje është e shënuar, pasi Fierza punon fare pak dhe shumica e energjisë elektrike importohet. Edhe prurjet janë 120 metër kub ujë në sek, që konsiderohen fare pak dhe 80 metër më pak se mesatarja vjetore. Ndërkohë, konfirmohet se furnizimi me energji elektrike i konsumatorëve të rretheve të Kukësit dhe Hasit ka rinisur pas rreth 30 orësh, pas riparimit të defektit të ndodhur në linjën e tensionit të lartë. Bëhet e ditur gjithashtu se, dëmtimi ka ndodhur në këputjen e telave të linjës së tensionit të lartë 220 kilovolt në një zonë të vështirë, ku është punuar pa ndërprerje për rilidhjen e segmentit të dëmtuar nga cikloni.

BUJAR MUÇMATA

Kapet hajduti i dyqanit

FIER- Policia ka ndaluar një 40-vjeçar, i cili akuzohet për vjedhje të një lokali. Ndalimi i 40-vjeçarit Artur Sollaku (Plaku), banues në qytetin e Fierit, u bë në zbatim të urdhërndalimit të Prokurorisë së Rrethit. Ngjarja për të cilën akuzohet 40-vjeçari ka ndodhur pesë ditë më parë, kur ai ka vjedhur në një lokal në lagjen Sheq i Madh, në pronësi të shtetasit Agim Demaj. Mësohet se 40-vjeçari ishte dënuar me parë me 7 vjet heqje lirie për shfrytëzim prostitucioni. Sendet e vjedhura u sekuestruan në cilësinë e provës materiale, ndërkohë që dosja në ngarkim të 40-vjeçarit i kaloi Prokurorisë së Rrethit Gjyqësor të Fierit", - përfunduan burimet.

Së bashku me të edhe tre anëtarët e ekuipazhit

Gjendet e mbytur peshkarexha “Spiridon”

DURRËS- Motopeshkatorja malazeze "Spiridon", e cila që prej 10 ditësh konsiderohej e humbur në ujërat e Adriatikut është gjetur e mbytur rreth 1 milje larg qytetit të Ulqinit. Zëvendëskapiteni i Përgjithshëm i Porteve, Hamdi Domi, tha se këtë fakt e ka konfirmuar dje kapiteneria e portit të Ulqinit, e cila sqaroi se motopeshkatorja “Spiridon”, së bashku me tre anëtarët e ekuipazhit të saj ishin gjetur të mbytur rreth një milje në Jug të qytetit të Ulqinit, si dhe 100 metra larg bregut të detit. Sipas tij, të tre peshkatarët janë shtetas malazezë, ndërsa motopeshkatorja "Spiridon" ishte regjistruar në një nga portet e Malit të Zi. Dhjetë ditë më parë, Kapiteneria e Portit të Ulqinit kishte kërkuar të dhëna lidhur me fatin e motopeshkatores “Spiridon". Sipas zëvendëskapitenit të Përgjithshëm të Porteve, operacioni për nxjerrjen e anijes si dhe personave që janë mbytur së bashku me të do të kryhet sapo të përmirësohen kushtet detare.

Kapet drogë në një bunker

FIER- Forcat e Policisë së Drejtorisë së Qarkut, në bashkëpunim me ato të Repartit të Ndërhyrjes së Shpejtë kanë ndërmarrë gjatë ditës së djeshme një aksion kontrolli të vijës bregdetare nga grykëderdhja e lumit Vjosë deri në grykëderdhjen e lumit Seman. Objekti i këtij aksioni ishte parandalimi dhe lufta kundër trafiqeve të ndryshme, kultivimit dhe trafikimit të lëndëve narkotike, si dhe kalimi i paligjshëm i kufirit detar, me anë të skafeve. Burime zyrtare nga policia thanë se gjatë këtij aksioni, u gjetën 4.5 kg lëndë narkotike e llojit “kanabis sativa”, e cila ishte e mbështjellë me një copë beze dhe e papresuar. Lënda narkotike u gjet e fshehur në një bunker, në pyllin me pisha të fshatit Darëzezë. Sasia e lëndës narkotike u sekuestrua në cilësinë e provës materiale, ndërkohë që materialet i kaluan Prokurorisë së Rrethit Gjyqësor të Fierit. Ndërkohë, policia po intensifikon punën për identifikimin dhe kapjen e autoreve të kësaj vepre penale.