arkiva

Seksionet

•Home

•Editorial

•Politika

•Speciale

•Kronika

•Intervista

•Komente

•Opinion

•Aktualiteti

•Rajoni

•Bota

•Ekonomi

•Reportazh

•Rrethe

•Kultura

•Sporti

•Forum

•Dossier

•Sociale

•Arkiva

•Tema E-mail

Lidhje

•Deutsche Welle

•BBC Shqip

•Zeri i Amerikes

•EDSH

•Rilindja Demokratike

•Besnik Aliaj

•Zeri Yt

Shtypi i Huaj

•New York Times

•The Washington Times

•The Times

•Independent

•Guardian

•Frankfurter

•Corriere della Sera

•Il Giornale

•Le Figaro

•Le Monde

Drejtor Mero Baze

ARKIVA

EDITORIAL

Për median dhe demonët e tjerë

Alban Bala

Debati më i fundit publik në Shqipëri për median rrezikon të marrë përmasa gjithnjë e më të mëdha dhe të njollosë krejt imazhin e vendit në rrugën e integrimit të mëtejshëm euro-atlantik, ndërsa mazhoranca ka paralajmëruar se do të ligjësojë një nismë që synon të disiplinojë transmetimet televizive dixhitale.

Në fakt, të tillë në Shqipëri ka vetëm një dhe atë e drejton një grup mediatik, i njohur për qëndrimin opozitar ndaj qeverisë dhe sidomos ndaj kreut të saj.

Arsyet pse ky grup mediatik i është atashuar jo aq opozitës, por interesave të kreut të saj, Edi Rama, janë shumë dhe nuk ja vlen të ndalemi. Mjafton të themi se e ka bërë për t’u mbrojtur. Dhe ka kohë që e bën këtë gjë…

Por unë jam i detyruar ta pranoj se televizioni dixhital, si risi globale, erdhi në Shqipëri në një mënyrë dinjitoze, në kohën e duhur, edhe pse diskutimi për transmetimet pirate mund të mbetet i hapur në këtë pikë. Po ashtu, e drejta e një televizioni për të mbajtur qëndrimet që preferon, është legjitime dhe si e tillë, e pacenueshme.

Në këtë diskutim duken qartë dy pista. E para që lidhet me lirinë e medias dhe atë të shprehjes në përgjithësi. E dyta, raporti mes biznesit dhe ekzekutivit politik.

Jam shprehur dhe e ritheksoj se kemi nevojë për të hequr dorë nga fasadat e sterilitetit politik të medias. Është koha që çdo mass-media të shprehë në rrafsh editorial orientimin e saj politik, duke mbrojtur njëkohësisht të drejtën e publikut për informim, pa prishur – si deri më tani- strukturën e raportimit. Nëse ka një pengesë aktuale në lirinë e shprehjes nga media, kjo buron vetëm nga autocensura. Dhe për këtë duhen analizuar shkaqet.

Por unë besoj fuqimisht se në Shqipëri askush nuk vuan nga mungesa e lirisë së shprehjes. Numri i madh i mass-mediave të çdo lloji garanton që secili të gjejë dritaren e nevojshme për t’u shprehur dhe për t’u dëgjuar.

Si asnjëherë më parë, media sot mund të flasë hapur, mund të sulmojë e shajë çdokënd- nga i pari deri tek i fundit, pa frikën se autori rrezikon pasoja. Në praktikë, Shqipëria gëzon sot një nga standardet më të plota të lirisë së shprehjes.

Por, në këtë duel të fundit, qeveria shprehet se nuk ka asnjë konflikt me mediat, por me bizneset që e mbështesin atë. Për kë vjen nga qarqet e mediave, është aksiomatike shprehja se, “përpara se të lexosh një gazetë, pyet se kush paguan për të”. Ndaj deklarata e qeverisë ngjan pak e besueshme,

sepse mediat kanë qenë, janë dhe do të mbeten instrumente në shërbim të grupeve të interesit. Kjo në Shqipëri daton qysh në kohën e trakteve të Partisë Komuniste dhe të Ballit Kombëtar. Suksesi më i madh i mediave sot është, kur ato arrijnë të maksimalizojnë shprehjen e interesit publik përmes grupeve të interesit që përfaqësojnë.

Për të vlerësuar besueshmërinë që gëzojnë palët, jam i detyruar të adoptoj optikën e qytetarit të thjeshtë. Kështu, çdo qytetar mund të pyesë: Nëse qeveria tregoi tolerancë ndaj zaptuesve të tokës private dhe shtetërore, ftoi të legalizojë ndërtimet pa leje të shtëpive apo pallateve edhe në zona turistike, toleroi me optimizëm disa qindra mijëra shkelës ligji, pse të mos ta gjejë dot motivin e tolerancës edhe për një grup biznesi që – le ta pranojmë hapur – në një mënyrë paksa abuzive, ka hyrë në një treg që përmirëson cilësinë e shërbimeve mediatike në shkallë vendi?

Mijëra vetë, brenda dhe jashtë vendit, e kanë blerë tashmë platformën dixhitale, të cilën ka për objekt ligji, që opozita thotë se paraqet një presion ndaj medias dhe lirisë së shprehjes.

Një rreth i tërë biznesesh, duke përfshirë kompanitë e basteve – ndër më të pasurat në vend, kanë dy-trefishuar të ardhurat falë zgjerimit të përdoruesve të kësaj platforme. Sa do ta gëlltisin ata “puritanizmin” juridik të mazhorancës, nëse “DigitAlb” penalizohet?

Nëse, kur u shfaq në treg platforma “DixhitAlb”, Shqipëria kishte ende një boshllëk ligjor, në sytë e qytetarëve faji iu mbetet ligjbërësve. Asnjë legjislacion restriktiv në këtë drejtim nuk do të fitonte konsensus publik.

Precedenti i “faktit të kryer”, i cili është legjitimuar si praktikë në këtë vend, nuk prodhon veçse një ortek keqkuptimesh, të cilat marrin lehtë ngjyra politike, kur prekin sferën e medias.

Por e thashë, vendi gëzon tashmë një standard të besueshëm të lirisë së shprehjes, ndaj ajo ç’ka nuk kuptoj është se, përse vallë, në kushtet e lirisë së pacenuar, mazhoranca po mbjell me dorën e saj një krizë artificiale vetëndëshkuese?! Sepse kjo krizë marrëdhëniesh është një qorrsokak për të gjitha palët.

Diskutimi për lirinë e shprehjes është një element kyç në analizën e kushteve politike që duhet të përmbushë një vend, i cili aspiron për anëtarësim në NATO – ku pritet të ftohemi zyrtarisht vitin e ardhshëm, apo për anëtarësim në BE. Qëndrimi i bashkësisë ndërkombëtare, sado jothelbësor- do të respektojë shqetësimet e ngritura nga çdo palë, duke regjistruar në kurriz të Shqipërisë një tension të pathemeltë dhe joreal.

Ndërkaq, në shumë zona të globit, debati mbi liritë dhe respektimin e tyre është ashpërsuar ndjeshëm. Rusia prin karvanin me një president që kërkon të kontrollojë edhe site-et ruse të internetit, pasi ka marrë nën kontroll të gjitha mediat kryesore. Në vendet e CIS-it situata është edhe më e rëndë. Është i pritshëm një rikthim i vëmendjes te niveli i respektimit të të drejtave themelore, ku prijnë ajo e shprehjes së lirë dhe e drejta e informimit.

Me situatën e acaruar ndërkombëtare në këtë rrafsh politikash, pozitat e Këshillit të Evropës dhe OSBE-së vetëm se do të forcohen si monitorues dhe mbrojtës të këtyre të drejtave.

Për hir të zhvillimit të qëndrueshëm dhe parandalimit të situatave të panevojshme, është koha që mazhoranca të investojë në rritjen e besueshmërisë së saj ndërkombëtare, përsa kohë që shanset e vendit për të shmangur një apo më shumë kriza të brendshme janë të vogla. Zgjedhja e presidentit të ri është vetëm e para në radhë. Përcaktimi i statusit të Kosovës kërkon po ashtu garancitë për një stabilitet të njëmendtë politik në Shqipëri.

Më shumë se kurrë është koha që në mënyrë të besueshme qeveria të ndërtojë konsensus publik, për të avancuar reformat, pavarësisht kundërshtive.

Kjo kërkon fleksibilitet dhe mendje të hapur. Kjo kërkon bashkëpunim dhe frymë kompromisi.

Nëse fjala është për piraterinë e platformës “DixhitAlb”, më parë ajo le të legalizohet dhe pastaj të mbikëqyret. Por kjo bëhet përmes komunikimit të hapur, ftesave dhe tryezave.

Në fund të fundit, media është refleks i klimës si qeveriset vendi. Përmirësimi i klimës padyshim ndryshon për mirë edhe raportet me median dhe fytyrën që vendi do të ketë brenda dhe jashtë kufijve.

Asnjë opozitë nuk e rrëzon dot suksesin e një qeverisjeje të mirë, sado media të afta të ketë përkrah. Po ashtu, asnjë media nuk e përmirëson dot imazhin e qeverisjes, kur publiku është i pakënaqur prej saj.

Në këtë pikëpamje, të trukosh median, është si të trukosh pasqyrën, në vend të fytyrës. Dhe unë jam i kënaqur që deri më sot, qeveria nuk e ka bërë këtë marrëzi.

POLITIKA

Pas debatesh të ashpra, tashmë ligji është në fuqi dhe binzesi do të duhet të paguajë detyrimet e më pas të presë apelin

Kuvendi, kompromis për ligjin e gjobave

Opozita pretendon se qeveria kërkon të ketë më shumë forcë në kontrollin ndaj bizneseve dhe biznesi me këtë ligj dëmtohet. Në anën tjetër, deputetët e shumicës dhe përfaqësues të qeverisë thanë se ligji do të ketë qëllim të vetëm parandalimin e informalitetit dhe luftën ndaj tij

Kuvendi i Shqipërisë miratoi dje ligjin e ri për procedurat tatimore, ku biznesi tashmë është i detyruar të paguajë të gjithë detyrimin tatimor dhe çerekun e gjobës e më pas të presë vendimin e organeve të apelit. Diskutimi mbi këtë ligj qe i gjatë dhe pati debate mjaft të ashpra nga deputetët e dyja palëve, ku opozita kundërshtoi ashpër. Arsyet e paraqitura prej opozitës ishin, pasi ajo mendonte se një ligj i tillë do të bënte që informaliteti të rritej dhe jo të luftohej, duke qenë se ai do rriste barrën për biznesin. Gjithashtu, opozita pretendon se qeveria kërkon të ketë më shumë forcë në kontrollin ndaj bizneseve dhe biznesi me këtë ligj dëmtohet. Në anën tjetër, deputetët e shumicës dhe përfaqësues të qeverisë thanë se ligji do të ketë qëllim të vetëm parandalimin e informalitetit dhe luftën ndaj tij. Nuk do të ketë asnjë ndalje, asnjë stepje në betejën me informalitetin thanë ata, pavarësisht kundërshtive. Ligji është krejt në përputhje më kushtetutën e vendit dhe për më shumë, është pjesë e legjislacionit që vepron në vendet e Bashkimit Evropian. Ligji për procedurat tatimore, i cili parashikon që një biznes, në çastin kur merr një gjobë, është i detyruar të paguajë vlerën e detyrimit tatimor dhe njëzet e pesë për qind të gjobës para se gjykatat të kenë vendosur mbi të, është paraprirë nga debate të mëdha. E tërë opozita e ka kundërshtuar atë me forcë, por edhe segmente të rëndësishme të biznesit kanë bërë të njëjtën gjë. Në ligjin e ri, në të vërtetë ka patur disa ndryshime gjatë diskutimit të tij, pasi fillimisht qeveria kishte parashikuar që masa e gjobës që do të paguhej para se të apelohej vendimi i administratës do të ishte njëqind përqind dhe më pas u ul kjo masë në njëzet e pesë për qind. Ministria e Financave, e cila është autore e ndryshimit të ligjit, ka thënë se qëllimi i këtij ligji është parandalimi i shmangieve fiskale dhe jo gjobitja e bizneseve. Në sistemin tonë të legjislacionit doganor aktualisht një biznes, kur merr një gjobë, jo vetëm që paguan të gjithë detyrimin doganor, por ai paguan edhe pesëdhjetë për qind të gjobës para se ta apelojë këtë vendim. Ministria e Financave e ka përdorur këtë si një argument shtesë, për të thënë se nuk ka pse të ketë diskriminim të një biznesi, i cili importon dhe ka punë me doganat, me një biznes i cili ka punë vetëm me tatimet. Gjithashtu, edhe në të gjitha vendet e tjera të Bashkimit Evropian njihet e njëjta procedurë, madje edhe mjaft më e ashpër, ku vlera e gjobave që paguan një biznes është mbi pesëdhjetë për qind. Opozita i ka drejtuar sulmet kryesisht mbi qeverinë me argumentin se me këtë ligj ajo do t`i japë më shumë forcë gjykimit të një inspektori, i cili do të kontrollojë një biznes e kësisoj do të kemi të bëjmë me arbitraritet ndaj biznesit. Vetë biznesi ka thënë se ky i fundit e ka të vështirë të përballojë sasi parash cash të mëdha për likuiditet ndaj arkës së shtetit, prandaj ai kërkon që të mos e bëjë këtë gjë, para se të flasë një gjykatë. Në fakt, e gjithë kjo situatë është paraprirë nga fushata e ashpër në media kundër qeverisë, për faktin që kjo e fundit ka nisur një kontroll të gjerë ndaj mjaft biznesve të mëdha në vend rreth 1800), midis të cilave edhe kompani mediash, të cilat e kanë popullarizuar debatin. Zëra të caktuar kanë thënë se administrata e vendit, duke qenë jo në standardet e kërkuara, mund të gabojë dhe ky gabim në fakt, mund të përkthehet në falimentim të një biznesi, nëse ky i fundit detyrohet të paguajë një gjobë të vënë në këtë mënyrë. E vërteta është se nga kjo masë krejtësisht e njohur në të gjitha vendet duhet të trembet vetëm biznesi informal, pasi një biznesi korrekt asnjë inspektor tatimesh nuk mund t`i bëjë asgjë, pavarësisht ndryshimeve në ligj. Aktualisht, biznesi i detyrohet arkës së shtetit për shkak të mospagimit në kohë të detyrimeve mbi katërqind milionë dollarë, një shifër kjo, më e larta në historinë e vendit, për shkak se ligji e lejon një biznes të ankohet pambarim në gjykata dhe të mos e paguajë detyrimin dhe gjobën.

Ligji i ri nuk iu lejon bizneseve të agropërpunimit të lëshojnë fatura TVSH-je për prodhimet e blera nga fermerët

Kuvendi miraton heqjen e TVSH-së për qiratë

Kuvendi i Shqipërisë miratoi dje ndryshimet në ligjin për tatimin mbi vlerën e shtuar, të miratuara dy javë më parë në parim. Ndryshimet që u bënë në ligjin për TVSH-në kanë si shkas përputhshmërinë me legjislacionin e BE-së, pasi direktiva 6-të e BE-së iu krijon mundësi vendeve anëtare që ta konsiderojnë qiradhënien furnizim të përjashtuar. Në ligjin aktual është përcaktuar që dhënia me qira e ndërtesave publike nga institucionet qendrore është furnizim i përjashtuar nga TVSH-ja. Në bazë të ligjit zgjerohet edhe rrethi i subjekteve që përjashtohen nga TVSH-ja për furnizimin me ar, duke përjashtuar jo vetëm Bankën e Shqipërisë, siç parashikohej në ligjin ekzistues, por edhe bankat e nivelit të dytë. Ky ndryshim forcon konkurrencën e lirë të subjekteve, duke i vendosur ato në pozita të njëjta. Në projektligj parashikohet edhe përjashtimi nga TVSH-ja të vlerës së arit të përdorur si lëndë e parë dhe taksohet vetëm vlera e arit të përpunuar. Kjo do të ndikojë në zvogëlimin e informalitetit në importimin, tregtimin dhe përpunimin e arit dhe në rritjen e shkallës së deklarimeve. Lligji parashikon gjithashtu shfuqizimin e dispozitave që i japin të drejtë subjekteve në fushën e përpunimit të qumështit, ullirit, rrushit e bluarjes së grurit, të lëshojnë fatura tatimore për veten, lidhur me sasinë e këtyre produkteve të furnizuar nga fermerët. Ky ndryshim synon të shmangë hapësirat për abuzime nga subjektet përpunuese në deklarimin e TVSH-së për lëndën e parë të blerë te fermerët, të cilët nuk janë subjekte të TVSH-së.

Bregu: Do t`i shkojmë deri në fund betejës me informalitetin

Ministrja e Integrimit, Majlinda Bregu, në Kuvend, tha se, "qeveria do t'i shkojë deri në fund betejës së nisur kundër informalitetit, betejë që nxitet edhe nga detyrimet e MSA-së".

Sipas znj. Bregu, "me lirinë e shtypit në fakt po luhet duke i dhënë atij interpretime dhe keqkuptime nga më të ndryshmet dhe nga më të ndjeshmet, me synimin për ta shpërngulur vëmendjen nga qëllimi i vërtetë i betejës që ka nisur qeveria, lufta kundër informalitetit". "Nuk është aspak e ndershme dhe profesionale që beteja ndaj informalitetit të keqpërdoret duke e ndeshur atë me lirinë e fjalës. Do të kisha preferuar që beteja kundër informalitetit të përgëzohej si sfida më e madhe e kësaj qeverie, betejë, e cila kërkon debat politik dhe jo shpërqendrim vëmendjeje, debat real dhe jo pretekste, të cilat nisin me keqardhje dhe përfundojnë me koncerte, pasi kjo nuk është vetëm sfida e qeverisë", - tha znj. Bregu. Sipas saj, "ky është testi për të gjithë ne dhe nuk ka qasje të ndërmjetme mes informalitetit dhe formalitetit, ka luftë me informalitetin ose bashkëjetesë me të". Duke iu referuar disa raporteve të Departamentit Amerikan të Shtetit dhe organizatave që monitorojnë lirinë e shtypit, znj. Bregu theksoi se, "në ato raporte evidentohej se në çfarë kohe dhe në çfarë qeverie është cenuar në të vërtetë liria e fjalës". "Në vitin 2001 dhe 2005-së evidentohej qartë se qeveria është kritikuar disa herë për kërcënimin dhe burgosjen e gazetarëve dhe për një lloj ndarjeje të mediave pro dhe kundër qeverisë, duke përdorur si presion edhe reklama shtetërore. Në janar të 2004-trës, dy reporterë të “Top Channel” arrestohen vetëm se kishin filmuar kryeministrin në publik pa dijeninë e tij. Një muaj më pas forcat e sigurisë arrestojnë për disa orë dy gazetarë të televizionit “Alsat” dhe konfiskojnë edhe kasetën, ku ata kishin filmuar kryeministrin duke vizituar një spital", - tha znj. Bregu. Duke vijuar me këto raporte, znj. Bregu theksoi se, "në vitin 2004-tër evidentohet se një grup gazetarësh u ngritën për t'u shprehur hapur kundër përdorimit arbitrar të kontrolleve financiare dhe padive kundër gazetarëve nga ana e qeverisë, duke cenuar kështu lirinë e shtypit". Ndërsa duke u ndalur në raportin e vitit 2006-të, znj. Bregu theksoi se, "nuk referohet për asnjë lloj rasti dhune, padie, apo presioni editorial, madje theksohet në përgjithësi se individë të ndryshëm mund të kritikonin hapur qeverinë dhe aksionet e saj si në mediat e shkruara, ashtu edhe në ato audiovizive, pra nuk kemi asnjë rast censure ndaj fjalës së lirë".

Prifti: Ligji për gjobat është antikushtetues

Lëvizja Socialiste për Integrim shprehu dje kontestimet e saj në lidhje me projektligjin për parapagimin e gjobave nga bizneset. Në një konferencë për shtyp, nënkryetari i LSI-së, Dritan Prifti, u shpreh se, “jo vetëm që një procedurë e tillë e vënies së gjobave dhe e parapagimit të tyre para procesit të apelimit në instancat përkatëse nuk është standard evropian, por procedura të tilla nuk i përdor asnjë shtet evropian”.“Vendet evropiane sigurisht kërkojnë garanci pas aplikimit të gjobës ndaj biznesit, garanci pasurore, garanci nga bankat apo edhe në disa vende kërkohet parapagim në cash, por jo vetëm parapagim në cah sikurse e kërkon ligji që pritet të miratohet”, - tha zoti Prifti.

Malaj: Ligji do të nxisë informalitetin

Ish-ministri socialist i Financave tha dje në Kuvend se ligji për procedurat tatimore do të bëjë që biznesi të mund të rrisë shkallën e fshehjes së detyrimeve tatimore ndaj shtetit. Malaj tha se ligji i ri krijon pengesa dhe barrë me të për biznesin dhe nuk është një masë që do të luftojëe informalitetin, e kundërta tha ai do të ndodhë. Biznesi në Shqipëri ka nevojë që të mos vihet para të tilla masave, të cilat do t`i bllokojnë atij një pjesë të mirë të parasë cash, e cila do të shkojë në arkën e shtetit para se një gjykatë të ketë vendosur mbi ligjshmërinë e gjobës.

Mishto: Qeveria ka luftuar

piraterinë e programeve kompjuterike

Zëdhënësi i kryeministrit, Dritan Mishto, u shpreh në një deklaratë për mediat se, “përpara 3 korrikut 2005-së në Shqipëri dominonte pirateria e programeve kompjuterike të palicencuara dhe me konstatimin e këtij fakti, kryeministri, Sali Berisha, që në muajt e parë të qeverisjes, vendosi kontakte dhe nisi negociatat me gjigantin “Microsoft” për t’i dhënë fund kësaj piraterie”. Deklarata e zotit Mishto erdhi, pasi në një televizion privat u emetua lajmi se administrata shtetërore disponon programe të palicencuara të “Microsoft Office”. Duke e cilësuar këtë lajm si të pavërtetë, zoti Mishto tha se, “ky proces përfundoi me firmosjen në Edinburg, më 30 janar 2007-të, të marrëveshjes së partneritetit strategjik midis qeverisë së Shqipërisë, e përfaqësuar nga kryeministri, Sali Berisha dhe korporatës “Microsoft”, e përfaqësuar nga presidenti i saj Bill Gates, për modernizimin e sektorit publik shqiptar dhe përshpejtimin e zhvillimit teknologjik të vendit”.

Ministri i Brendshëm tha se ky projekt është arritur me asistencën e kompanive më me eksperiencë në Evropë

Nishani: I hapur për çdo

shpjegim për projektin e kartave

Ministri i Brendshëm, Bujar Nishani, deklaroi në Kuvend, se "projekti për pajisjen e shtetasve shqiptarë me kartat e identitetit synon integrimin e tyre". Gjatë seancës plenare të pasdites, ministri Nishani, duke informuar deputetët e opozitës për projektin që synon pajisjen e shtetasve shqiptarë me kartat e identitetit, shprehu gatishmërinë për t'u paraqitur në komisionin përkatës dhe për të dhënë të gjitha shpjegimet e nevojshme në lidhje me këtë projekt".

"Së pari, ju thatë se nuk kemi informacion të plotë mbi këtë projekt dhe më pas arritët në konkluzionin që është një aferë korruptive, ndaj unë jam i gatshëm dhe jeni të mirëpritur për të marrë gjithë informacionin e domosdoshëm, qoftë edhe pranë Ministrisë së Brendshme", - tha zoti Nishani.

Sipas tij, "ky projekt është arritur me asistencën e kompanive më me eksperiencë në Evropë dhe përtej Evropës dhe synon pajisjen me kartat e identitetit të 3 milionë shqiptarëve".

"Është një projekt, i cili është i shtrirë në një kohë të përcaktuar në mënyrë konkrete dhe natyrisht, është një projekt, i cili, megjithëse nuk është i lidhur në mënyrë të drejtpërdrejtë me regjistrin e gjendjes civile, unë po ju informoj që edhe në lidhje me regjistrin e Gjendjes Civile, Ministria e Brendshme, në bashkëpunim me ekspertizën e OSBE-së, ka një projekt, i cili është mbështetur financiarisht nga delegacioni i Komisionit Evropian në Tiranë", - tha zoti Nishani.

Sipas tij, "është përfunduar tashmë ky projekt, i cili i është paraqitur misionit të OSBE-së për ekspertizën përfundimtare".

"Edhe ky është një projekt, i cili do të gjejë zbatim brenda një afati kohor, qartësisht të përcaktuar. Po kështu, ju siguroj se është projekti tjetër për pajisjen e qytetarëve shqiptarë me pasaporta dixhitale, i cili është një projekt konkret, i shtrirë në kohë konkrete dhe ju siguroj që, pasi ta njihni me detaje të projektin, besoj se edhe ju, si gjithë qytetarët shqiptarë, do ta përqafoni fort dhe do të thoni fjalët më të mira për këtë projekt, i cili synon integrimin e shqiptarëve dhe asgjë më shumë", - tha ministri i Brendshëm, Bujar Nishani.

Ministria e Brendshme: Pagat kalimtare të

policëve në reformë janë të garantuara

Ministria e Brendshme ka marrë masat për garantimin e pagesës kalimtare të punonjësve të policisë të dalë në reformë. Duke marrë shkas nga komentet e bëra në një gazetë të ditës së djeshme, Ministria e Brendshme ka sqaruar opinionin publik, se:

Nisur nga ndryshimi i limitit organik për Drejtorinë e Përgjithshme të Policisë së Shtetit dhe zbatimit të VKM nr.551, datë 02.08.2006, për përcaktimin e numrit të punonjësve buxhetorë për vitin 2006-të, me ndryshimet përkatëse, si dhe të përcaktimeve të bëra në ligjin nr.8661 datë 18.09.2000 , për sigurimin shoqëror suplementar të punonjësve të Policisë së Shtetit, nga strukturat e buxhetit e financës të Policisë së Shtetit u morën masat paraprake për garantimin e fondeve të nevojshme, me qëllim mbulimin e shpenzimeve për pagesën kalimtare të punonjësve të policisë, që do të dilnin në reformë.

Në sajë të planifikimeve të bëra, si dhe pas miratimit nga Kuvendi i Shqipërisë të buxhetit për vitin 2007-të, është bërë e mundur që të sigurohen fondet e nevojshme dhe të garantohet pagesa kalimtare për 1.853 punonjësit e Policisë së Shtetit, që dolën në reformë për shkak të ndryshimit të limitit organik. Nga strukturat e buxhetit e financës të Policisë së Shtetit që në muajin janar është bërë detajimi i fondeve buxhetore, ku është planifikuar dhe mbulimi i pagave për reformë dhe ka filluar shpërndarja e tyre.

Patozi: Projektligji për transmetimet numerike, javën tjetër në Kuvend

Komisioni parlamentar për Edukimin dhe Mjetet e Informimit Publik diskutoi lidhur me projektligjin "Mbi transmetimet numerike eksperimentale në Republikën e Shqipërisë".

Duke mbështetur këtë projektligj, anëtari i Komisionit parlamentar të Medias, deputeti i Partisë Demokratike, Astrit Patozi, deklaroi se, "nisma ligjore e një grupi deputetësh të PD-së për projektligjin e transmetimeve numerike në Shqipëri, është një nismë pozitive dhe në sensin e duhur për të gjithë legjislacionin shqiptar, por në veçanti në sferën e transmetimeve televizive në vend".

Sipas zotit Patozi, "projektligji legalizon informalitetin ekzistues në Shqipëri dhe mbi të gjitha i pret rrugën vijueshmërisë në mënyrë progresive të informalitetit, pra jo vetëm të atij që ekziston, por edhe një informaliteti potencial, i cili në kushtet e vakuumit ligjor mund ta agravojë më tej situatën".

"Ky projektligj i jep përgjigje një direktive të Komisionit Evropian, i cili në raportin e fundit për Shqipërinë, në tetor të viti 2006-të thotë se, 'Shqipëria ka nevojë që të miratojë ligje për të luftuar piraterinë në media, si dhe të rregullojë transmetimet numerike në linjë me standardet e BE-së", - tha zoti Patozi. Sipas tij, "si vend serioz ne duhet t'i japim fund mungesës së konkurrencës në treg dhe piraterisë".

Në vijim të diskutimeve, zoti Patozi kërkoi që "ky projektligj të shtyhet dhe të kalojë në Kuvend javën që vjen, me qëllim përmirësimin e tij dhe diskutimin me grupet e interesit dhe ekspertët përkatës".

Ndërsa kryetarja e Komisionit të Medias, Valentina Leskaj, e vlerësoi këtë si një ligj teknik dhe të debatueshëm, ndaj dhe sipas saj, ka nevojë për "ekspertizën e duhur, si dhe për më tepër kohë në dispozicion".

Në këtë drejtim, znj. Leskaj theksoi se, "projektligji nuk po kalon me një procedurë normale në Kuvend".

Komisioni i Ligjeve diskuton kandidaturat për Kushtetuesen

Përplasje për emrin e Hoxhës, kërkohet dorëheqja nga Gjykata e Lartë

Komisioni parlamentar për Çështjet Ligjore, Administratën Publike dhe të Drejtat e Njeriut diskutoi mbi dekretet e Presidentit të Republikës për emërimin e tre anëtarëve të Gjykatës Kushtetuese.

Në mbledhjen e djeshme, anëtarët e komisionit të ligjeve u njohën me dekretet e Presidentit të Republikës për emërimin si anëtarë të Gjykatës Kushtetuese të z. Artan Hoxha, Sokol Berberi dhe Vladimir Kristo.

Duke vlerësuar në parim integritetin moral dhe profesional të tre kandidatëve, anëtarët e komisionit të Ligjeve evidentuan se zoti Artan Hoxha nuk ka dhënë ndërkohë dorëheqjen si anëtar i Gjykatës së Lartë, ndaj sipas përfaqësuesve të PD-së në këtë komision ka pengesa kushtetuese për miratimin e këtij dekreti.

Kryetari i komisionit, Fatos Beja, vlerësoi se, "është absurde që Kuvendi të miratojë një person, i cili në këtë moment do të gëzojë dy mandate kushtetuese njëkohësisht".

Ndaj, sipas tij, "fillimisht zoti Hoxha duhet të japë dorëheqjen si anëtar i Gjykatës së Lartë dhe pastaj t'i paraqitet Kuvendit dekreti për emërimin e tij".

Ndërkohë, deputeti i pavarur, Spiro Peçi, theksoi se, "nuk duhet të hezitojmë për të miratuar kandidatura të tilla që, sipas tij, janë njerëz që kanë kontribuar për reformat në drejtësi dhe nuk janë të implikuar në politikë".

Në të njëjtën linjë qëndroi edhe deputeti i PS-së, Bashkim Fino, i cili u shpreh se, "për aq kohë sa kandidatura e Artan Hoxhës plotëson të gjitha kriteret, atëherë komisioni duhet të dalë me një raport, ku theksohet se miraton në parim të tre kandidaturat, por njëkohësisht i propozon zotit Hoxha që të japë fillimisht dorëheqjen si anëtar i Gjykatës së Lartë".

Kryeministri diskuton me përfaqësuesit e ndërtimit në lidhje me projektligjin për gjobat ndaj biznesit

Berisha: Do të pranoj propozimet e biznesit për amendimet në ligj

Kryeministri gjatë takimit u shpreh se do të pranojë çdo amendim të biznesit në lidhje me abuzimet që mund të dalin nga kontrollet tatimore. Ndërtuesit kërkojnë të amendohet pagesa e detyrimeve “cash”, derisa të vërtetohet gjoba

Kryeministri, Sali Berisha, ka garantuar dje biznesmenët e ndërtimit se do të përforcojë luftën kundër informalitetit, me qëllim vendosjen e rregullave në tregun e ndërtimit. Këtë deklaratë kryeministri e bëri gjatë një takimi që pati me ndërtuesit. Në këtë takim merrnin pjesë ministri i Punëve Publike, Transportit dhe Telekomunikacionit, Lulëzim Basha, ministri i Drejtësisë, Ilir Rusmali, zëvendësministri i Financave, Florian Mima, si dhe drejtues dhe anëtarë të bordit të ndërtuesve dhe përfaqësues të degëve të këtij bordi në rrethe të vendit. Nga ana e tyre ndërtuesit kërkuan shtyrjen e këtij projektligji dhe bizneset të mos vihen përpara faktit të kryer në lidhje me gjobat që mund t`i vihen kësaj kategorie. Sipas tyre, mund të ndodhë që gjobat mund të jenë abuzive nga ana e strukturave tatimore, duke kërkuar që më parë të shihet vërtetësia e tyre dhe më pas të vendoset. Nga ana tjetër, ndërtuesit u përqendruan kryesisht në ekzistencën e informalitetit në ndërtim dhe gjetjen e formave për ta luftuar atë, vendosjen e rregullave të qarta për kontrollet tatimore dhe luftën kundër subjektivitetit në këto kontrolle, si dhe vënien nën mbikëqyrje të rritjes abuzive të çmimeve. Gjithashtu, ndërtuesit kërkuan që projektligjet që kanë lidhje me këto çështje të rishikohen dhe konsultohen me shoqatat e biznesit. Gjithashtu, ndërtuesit kërkuan marrjen e masave konkrete për të shmangur abuzimet në prokurimet publike, si dhe sigurimin e garancisë për objektet e ndërtuara. Përsa i përket çështjes së prokurimeve, kryeministri theksoi se po shkohet drejt prokurimeve elektronike, të cilat me formën moderne të aplikimit të tyre, nuk do të lenë vend për abuzime. Duke nënvizuar se kjo formë prokurimi është e domosdoshme për vendet si Shqipëria, kryeministri informoi se do të fillojë së shpejti një eksperiment pilot, i cili do të aplikohet në 10 institucione e më pas do të zgjerohet brenda disa muajve në të gjithë vendin.

Tatimet

Duke marrë në konsideratë shqetësimin e pjesëmarrësve lidhur me këto çështje, kryeministri u ndal veçanërisht në shqetësimin e ndërtuesve për projektligjin për procedurat tatimore, për të cilin kryeministri u shpreh se me anë të tij po rikthehet një normë, e cila ka ekzistuar. Kryeministri siguroi se do të amendohet dhe do të merren të gjitha masat që do të propozohen nga ndërtuesit për t`i ruajtur ata nga abuziviteti.

Kryeministri nga ana tjetër theksoi gatishmërinë për të bashkërenduar punën me grupet e biznesit, për të përcaktuar të gjitha kushtet dhe sugjerimet që ndërturesit të mos dëmtohen në mënyrë të paligjshme. Përsa i përket kërkesës së bordit për shtyrjen e miratimit të projektligjit për një periudhë dyjavore, kryeministri theksoi se procesi do t`i nënshtrohet procedurës së përcaktuar parlamentare.

Kryeministri shprehet në grupin parlamentar të PD-së se projektligji për gjobat synon luftën kundër evazionit fiskal

Berisha: Opozita po kthehet në avokate të informalitetit

Kryeministri, Sali Berisha, tha dje gjatë mbledhjes së qeverisë se që nga viti 1997-të, të ardhurat për frymë janë rritur rreth katër herë, por pensionet dhe paga minimale janë rritur me hapa shumë të ngadaltë. Sipas tij, projektligji për gjobat ndaj biznesit ka si synim të parë futjen drejt formalitetit të të gjithë biznesit, me qëllim që më pas këto të ardhura të rishpërndahen në politika sociale dhe investime. Këto deklarata kryeministri i bëri gjatë mbledhjes së grupit parlamentar të PD-së. “Në diskutimin bashkë me ta për këtë sektor, i cili është më i rëndësishmi dhe më kontribuuesi, pranohej bashkërisht se është mbi 50 për qind informal. Por cila është zgjidhja? Unë ju kërkova ndërtuesve dhe biznesit në tërësi të hartojnë vetë të gjitha amendament e domosdoshme për t’iu dhënë atyre mbrojtje të plotë nga arbitrariteti i taksidarëve. Jam shumë dakord dhe e pranoj që tani, që qeveria të paguajë një gjobë më të madhe se ajo që iu vjen këtyre bizneseve, në rast arbitrariteti, krahas pasojave të tjera. Ne nuk kemi asnjë synim tjetër. Synimi i arkës është absolutisht dytësor, në raport me synimin e rregullave të tregut. Duhet të vendosim rregulla dhe të ecim drejt modernitetit dhe jo të notojmë në kënetën e informalitetit, e cila dëmton mbi të gjitha biznesin. Ndaj, në këtë takim ramë dakord që vetë biznesi të hartojë me avokatët e tij qoftë në bashkëpunim edhe me zyrtarët tanë, amendamentet më të përshtatshme për t’i zhdëmtuar, në rast se ata bien viktimë e arbitraritetit”, - tha kryeministri

Opozita

Ndërkohë, në fjalën e tij, Berisha u ndal dhe në qëndrimin e opozitës në lidhje me këtë çështje. Sipas tij, ligji nuk ka aspak si synim favorizimin e monopoleve, por luftën kundër informalitetit, duke u shprehur se opozita tashmë është kthyer në avokate të këtij fenomeni. “Ka edhe një problem tjetër. Ky problem është se opozita ka marrë përsipër këto kohë avokatinë e informalitetit, çka, në gjykimin tim, është absolutisht në kundërshtim të hapur me programin e çdo partie politike që i beson tregut dhe vlerave të tij. Me këtë gjë lidhet edhe reagimi i saj ndaj ligjit të legalizimit të transmetimeve numerike. Ashtu siç kundërshtuan ligjin e legalizimit të banesave, kundërshtojnë çdo ligj formalizimi. Është absolutisht turp për një vend që të pranojë veprimtari të tilla shumë të mëdha të palicencuara dhe kjo vetëm për faktin se nuk ekziston ligji. Atëherë ne do të bëjmë ligjin. Duhet të jeni të sigurt se ne nuk kemi ndërmend të heqim licenca, as të anësojmë me to. Tregu është i lirë dhe le t’i blejë kush të dojë, kush të plotësojë kushtet. Kjo që ndodh në transmetimin numerik, ekziston shumë fuqishëm edhe në telekomunikacion. Nuk është, pra, vetëm në transmetimet televizive. Transmetimi numerik është një standard që duhet të plotësohet, sipas Komisionit Evropian, deri në vitin 2012-të, në të gjitha vendet, sepse është një shërbim më cilësor për konsumatorët, për shikuesit”, - tha Berisha.

Rama nis sherrin me mbështetësit e tij. Bashkim Fino drejt pozicionimit si kundërshtar i Ramës

Rama debat në publik me Bashkim Finon

Krerët aktualë të PS refuzohen nga baza e partisë

Sekretari organizativ i PS-së, Bashkim Fino, është pritur me debate nga krerët socialistë në Kuçovë dhe në mënyrë të veçantë nga kryetari i bashkisë së këtij qyteti, në takimin e dy ditëve më parë të krerëve socialistë në këtë qytet. Pas debateve që ka shkëmbyer me krerët e zonës së tij elektorale, ku janë shfaqur kundërshti të forta ndaj tij, Fino ka kërkuar shpjegime nga kryetari socialist, Rama, i cili ka qenë i pranishëm në debat në Kuçovë, por nuk është pozicionuar në mbështetje të Finos. Debati ndërmjet Finos dhe Ramës është zhvilluar dje, në një kafe pranë selisë së PS-së në prani edhe të gazetarëve. Fino kërkoi nga Rama të shpjegohej për arsyet që e kishin penguar këtë të fundit të pozicionohej për ta mbrojtur përballë reagimeve të kryetarit të Bashkisë së Kuçovës. Gjatë debatit mësohet se Fino është shprehur me tone të ashpra: “Pse nuk ndërhyre në debat? Ti më turpërove dhe kjo gjë nuk të nderon aspak”, ndërsa Rama sërish nuk ka reaguar në mbështetje të tij, madje tërësisht në kundërshtim me atë çfarë kërkonte Fino, Rama është shprehur:

“Unë mbeta i kënaqur në Kuçovë”, duke hedhur poshtë çdo pretendim të Finos se duhet të gëzonte mbështetjen e Ramës në debatin me krerët socialistë të Kuçovës. Ndërsa Fino është acaruar më pas nga Rama dhe i është përgjigjur me mjaft ashpërsi: “Ti nuk ke autoritet për të ndërhyrë dhe nuk është çështja, nëse mbete i kënaqur apo jo”. Ky reagim i Finos ka bërë që Rama të largohet i egërsuar nga tavolina. Debati i zhvilluar dje, ndërmjet dy zyrtarëve të lartë socialistë ka tërhequr vëmendjen e të pranishmëve në kafene, madje disa deputetë kanë ndërhyrë për të qetësuar situatën. Sherri i shfaqur dje në publik midis dy bashkëpunëtorëve të ngushtë socialistë vjen pak ditë pasi takimeve që Nano ka zhvilluar me disa ish-mbështetës të tij në PS. Një prej tyre është edhe sekretari organizativ, Bashkim Fino. Menjëherë pas takimit me Nanon, Fino kërkoi nga kryesia socialiste të pozicionohej për çështjen e presidentit dhe ky reagim mësohet të ketë shkaktuar edhe acarimin e kreut socialist, Edi Rama.

Gjinushi: Kërkesa e Ramës për pakt me mazhorancën dëmton të majtën

Zgjedhjet e parakohshme janë zgjidhja e vetme e situatës politike, sipas kryetarit të PSD-së, Skënder Gjinushi. Ai tha dje se opozita reale duhet t’i përgjigjet votës së 18 shkurtit dhe e vetmja zgjidhje

për nxjerrjen e vendit nga kriza janë zgjedhjet e parakohshme, duke përjashtuar mundësinë e pakteve politike për kryerjen e reformave. “Paktet apo detantat për gjoja reforma janë një shaka e hidhur në dëm të Shqipërisë e të së majtës, në dëm të integrimit të vendit. Kriza e deritanishme është shkaktuar në emër të reformave. Berisha po godet biznesin, median, institucionet, po godet mirëqenien e të gjithëve në emër të reformave dhe çdo pakt a detant me të do të thotë vazhdim e thellim i kësaj krize”, - tha Gjinushi. Përsa i përket ftesës së kreut socialist për pakt me mazhorancën për reformat duke shmangur zgjedhjet e parakohshme, Gjinushi tha se opozita s’duhet të ketë frikë të flasë për zgjedhje, roli dhe misioni i saj janë ndryshimi i qeverisë. Duke pasur në qendër të konferencës së djeshme për shtyp zgjedhjet e parakohshme, Gjinushi u shpreh se shmangia e tyre lë në pushtet qeverinë aktuale në dëm të interesave të shqiptarëve. “Kushdo nga opozita e majtë që nuk pozicionohet për zgjedhje të parakohshme në emër gjoja të stabilitetit, në fakt i shërben të djathtës dhe se e majta duhet të pastrohet nga segmentet dhe individët që për interesa personale, klanore a partiake, janë gati të bëjnë pazar me kryeministrin Berisha. Është koha që të majtët, votuesit tanë të dinë kush i përfaqëson realisht interesat e tyre e kush bën pazar në dëm të tyre. Përplasjet brenda së majtës i kanë shërbyer zgjatjes së mandatit të qeverisë aktuale, kështu po përdoren dhe sot”, - tha Gjinushi.

Kryesia socialiste zgjedh sot dy emrat për postin e kryetarit dhe sekretarin e grupit pas dorëheqjes së Majkos

Blushi e Braçe, dy drejtues të rinj të grupit parlamentar socialist

Koçi: Do bashkëpunoj për zgjedhjen e kryetarit të ri të grupit parlamentar

Kryesia socialiste mblidhet sot për të zgjedhur kryetarin e ri të grupit parlamentar të PS-së. Pas dorëheqjes që dha Pandeli Majko nga posti i kreut të grupit parlamentar, por edhe kryesisë, Ben Blushi duket se do të jetë zëvendësi i tij në këtë post. Burime pranë PS-së thanë dje se, në krye të grupit parlamentar pritet të zgjidhet Ben Blushi, ndërsa sekretar i grupit parlamentar socialist pritet të zgjidhet deputeti i kësaj partie, mbështetësi kryesor i kryetarit Rama, Erion Braçe. Emrat që do të përzgjidhen nga kryesia për dy postet do të miratohen në mbledhjen e grupit parlamentar të PS-së për të zgjedhur drejtuesit e përkohshëm të grupit deri në përfundim të zgjedhjeve brenda PS-së. Lidhur me këtë proces, nënkryetari i grupit parlamentar socialist, Petro Koçi, i cili është pozicionuar kundër Ramës përsa i përket procesit zgjedhor në PS, tha dje se do të bashkëpunojë në procesin e zgjedhjes së kryetarit të grupit parlamentar. Koçi tha se në krye të grupit duhet një figurë e rëndësishme politike.

Deklarata

Nënkryetari i grupit parlamentar socialist, Petro Koçi, tha dje se në vend të Majkos në krye të grupit parlamentar socialist duhet të zgjidhet një figurë e lartë politike në PS. Kryetari i ri i grupit parlamentar sipas Koçit duhet të zgjidhet nga kryesia e PS-së.

“Grupi parlamentar i PS-së duhet të drejtohet nga një përfaqësues i lartë politik i partisë, i emëruar nga kryesia. I kam kërkuar kryesisë dhe kryetarit të partisë që pas dorëheqjes së zotit Majko nga funksionet drejtuese, të përcaktojnë një drejtues politik të grupit, deri në zëvendësimin statutor të kryetarit të tij. Sipas konceptit statutor, kryetari i grupit është një nga nivelet më të larta të drejtimit të partisë dhe shpresoj që të veprohet sipas konceptit statutor”, - tha Koçi. Pak pak ditë më parë, Petro Koçi i kërkoi përmes një letre kryesisë dhe anëtarësisë socialiste që në procesin zgjedhor për drejtuesit socialistë, të zhvillojnë një analizë të hollësishme për zgjedhjet e 18 shkurtit, por dhe të japë mendimin e saj për ndryshimet statutore dhe vendimet e rëndësishme në lidhje me zgjedhjet e parakohshme dhe presidentin e ardhshëm. Në lidhje me letrën e drejtuar anëtarësisë, nënkryetari i grupit socialist tha se, “kam kërkuar që anëtarësia e partisë të zgjedhë në krye personalitete dhe figura që e duan partinë dhe mendoj se PS-ja nuk ka nevojë për reforma radikale, por ka nevojë për një proces normal, qytetar dhe për një modernizim”, - tha dje Koçi.

Luljeta Progni

KRONIKA

E ka goditur atë në kokë me dru, duke i shkaktuar vdekjen

Pas grindjeve vret burrin, e

fsheh 700 m larg shtëpisë

Nëna e 7 fëmijëve ka rrëfyer para uniformave blu se kanë qenë mosmarrëveshjet dhe grindjet familjare me bashkëshortin e saj, që e kanë shtyrë të ndërmarrë një akt të tillë ekstrem

S’ka duruar më grindjet me të shoqin dhe e ka goditur për vdekje. 45-vjeçarja, Aishe Pojani, prej ditës së djeshme është edhe e dyshuara kryesore për ekzekutimin e të shoqit, Hasan Pojanit, 52 vjeç, kufoma e të cilit u zbulua mesditën e djeshme disa minuta larg zonës së banuar të Baldushk. Zbulimi i të dyshuarës për vrasjen vetëm disa orë pas gjetjes së kufomës ka ardhur pas rreshtimit të të dhënave dhe pas dëshmive të fqinjëve se çifti kishte jetuar prej vitesh në mosmarrëveshje të thella.

Burime nga policia konfirmuan se, 45-vjeçarja Pojani gjatë marrjes në pyetje ka pranuar fajësinë lidhur me krimin. Nëna e 7 fëmijëve ka rrëfyer para uniformave blu se kanë qenë mosmarrëveshjet dhe grindjet familjare me bashkëshortin e saj, që e kanë shtyrë të ndërmarrë një akt të tillë ekstrem. Duke u bazuar në dëshminë e 45-vjeçares, të njëjtat burime policore konfimuan se ngjarja ka ndodhur pesë javë më parë, më 11 mars të këtij viti, në banesën e familjes Pojani.

Vrasja

Policia ka mundur të ndërtojë ngjarjen pas dëshmive të para të bashkëshortes së viktimës. Aishe Pojani, pasi është grindur me të shoqin, e ka goditur atë në kokë me dru, duke i shkaktuar vdekjen. Dyshohet se 45-vjeçarja për të fshehur gjurmët e krimit, e ka transportuar trupin me kafshë vetëm 700 metra larg banesës, duke e groposur atë. Deri dje vonë nuk bëhej fjalë për bashkëpunëtorë, ndërkohë që në pyetje janë marrë edhe fëmijët, për të dëshmuar rreth dijenisë për ngjarjen.

Kufoma e 52-vjeçarit u zbulua mesditën e sotme nga banorë të zonës të Baldushkut, vetëm disa metra larg zonës së banuar. Grupi hetimor që shkoi në vendngjarje, konstatoi se kufoma e groposur i përkiste seksit mashkull dhe ishte e mbështjellë me një batanije.

Analogji krimi dhe masakrimi...

Me gjetjen e kufomës së Zall-Herrit janë shënuar 5 raste, por policia dhe prokurorët vetëm në këtë rast dhe në rastin e kokës së gjetur në një zonë të Durrësit kanë mbetur pa asnjë emër për viktimën. Dy vjet më parë, gjithë vendi u përfshi nga një zhdukje misterioze e një prej emrave më të lakuar të një zone, potenciali shoqëror i të cilit nuk mund të lokalizohej vetëm në vendin ku u lind dhe shërbente. Masakrimi i trupit të Behar Kastratit, që u zbulua me të gjetur dhe trupin e tij pas 40 ditëve, tregoi edhe njëherë se në Shqipëri ka vrasës gjakftohtë dhe mizorë. I vrarë, i masakruar dhe më pas i lidhur në shtylla me tela me gjemba, ishin prova e fortë dhe e frikshme e elementëve kriminalë që guxonin të vrisnin barbarisht dhe t`iu humbnin gjurmët edhe njerëzve të njohur. Ndërsa gjymtimi i viktimës më të fundit të këtyre lloj vrasjeve, sjell as më pak e as më shumë se panoramën e tmerrshme të rasteve të 6-7 viteve më parë, kur dy femra bëhen pre e agresorëve mizorë. Drejtuesit e hetimit dhe të zbulimit i kanë parasysh më mirë se kushdo dy ngjarjet e viteve ’99-2000, ndërkohë që sot dhe asaj dite, nuk u gjendën autorët për to. Nëse sot, me ngjarjen aktuale, grupi i punës duket i “pafat” për vështirësinë e identifikimit, në ngjarjet e këtyre dy viteve, njohja me emrat e viktimave ishte e menjëhershme. Kozeta Hyseni ishte 19-vjeçarja, masakrimi i së cilës në shkurtin e 8 viteve më parë, tregoi lehtësinë e pamundësisë për të plotësuar dosjen me provat e duhura për të sjellë në pranga autorët. Krejt më e lehtë ishte situata në ngjarjen e një viti më vonë, kur në lumin Fan, në zonën e Fushë-Arrëzit, gjendet trupi i 37-vjeçares Marte Lleshi ndarë në dy thasë. Hetimi përveçse nuk e çoi kurrë në fund çështjen, masakrimin e ndau nga denoncimi që gruaja iu bëri tutorëve të motrës së saj.

Gjendet nga banorët rreth 90 minuta larg zonës së banuar

Baldushk, kufomë në përrua,

rihapen dosjet e të zhdukurve

Policia tha se, kufoma është krejt e dekompozuar dhe se dyshimet e para bëjnë fjalë për një krim që mund të ketë ndodhur vite më parë

Një kufomë rikthen edhe njëherë çështjet e pazbuluara në policinë e Tiranës. Burime policore thanë dje se një kufomë e groposur u zbulua në një përrua rreth 1orë e 30 minuta larg zonës së banuar. Zbulimi i kufomës u bë nga disa banorë që po kullotnin bagëtitë, të cilët më pas kanë lajmëruar policinë. Sipas policisë, kufoma është krejt e dekompozuar dhe se dyshimet e para bëjnë fjalë për një krim që mund të ketë ndodhur vite më parë. Grupi hetimor i komisariatit nr. 1, që ka shkuar menjëherë në vendngjarje, ka nisur punën për të zbuluar më shumë detaje rreth identitetit të kufomës dhe mënyrës sesi ka ndodhur krimi. Ndërkaq, gjetja e kufomës 30 kilometra larg Baldushkut ka rikthyer në skenë “dosjet pa autor” dhe “dosjet e humbura”. Burime policore bënë të ditur se, në polici ka nisur menjëherë interesimi për ata që janë shpallur të humbur. Besohet se përcaktimi i kohës së krimit do të mund të përcaktojë edhe saktësisht personat e zhdukur në atë periudhë. Megjithatë, dekompozimi i tepërt duket se do të kërkojë kohë deri në kryerjen e analizave.

Analogji krimi dhe masakrimi...

Kufoma e Zall-Herrit dhe dyshimet

Të shtunën e 22 tetorit 2006-të, një fëmijë hasi në trupin e cunguar të një femre. Duke menduar se është kukull, 12-vjeçari është afruar dhe, pasi ka konstatuar se kishte të bënte me njeri të vrarë, ka treguar në shtëpinë më të afërt. Policia e lajmëruar është nisur për në vendin e ngjarjes, ndërkohë që banorët vendas kanë mundur të nxjerrin trupin dhe të nisin kërkimin për pjesët e tjera. Policia dhe ekspertët treguan se kanë të bëjnë me një vrasje të kryer nga maniakë seksualë, por pista ra shpejt, që në momentin e parë, kur u hasën vështirësi në identifikimin e viktimës. Grupi i punës skicoi mënyrën e vrasjes së vajzës dhe u përcaktuan afatet kohore, në të cilat kishte ndodhur krimi, por pa mundur të shënojnë asgjë më tepër në dosjen e një prej krimeve më monstruoze dhe më të mistershme të ndodhura kohët e fundit në Tiranë. Pas arrestimit në shkurt të këtij viti në Mal të Zi të një prej të akuzuarve për vrasje serialo-maniake edhe në SHBA, Smajl Tuljas, u dyshua se kishim të bënim me të njëjtin autor si për kokën në Rrushkull të Durrësit, ashtu edhe për kufomën e Zall-Herrit. Por edhe kjo pistë ra shpejt dhe viktima tashmë është varrosur nga komunalja pa autor.

Ekzekutorët, akuza dërgon për gjykim dosjen e “miqve” të Bares

Përfundon në Gjykatën e Krimeve të Rënda dosja penale në ngarkim të ushtarëve të tjerë të Aldo Bares. Këta të fundit janë arrestuar në janar të një viti më parë, ndërsa akuza është ajo e organizatës kriminale dhe kryerja e ekzekutimeve në emër të “Plakut”, siç njihej ndryshe Alfred Shkurti. Pasi kanë zbardhur të gjitha vrasjet e shumë viteve më parë në Lushnjë, grupi i drejtuar nga Ilir Stërgu, tashmë do të fillojë gjykimin. Sipas burimeve nga Prokuroria e Krimeve të Rënda, dosja ka mbaruar javën e fundit së plotësuari me prova dhe pritet të hidhet në short në Gjykatën e Krimeve të Rënda. Pas hetimeve disamujore, organi i akuzës ka ngritur dyshimet për autorësinë e tyre në katër vrasje të ndodhura në vitin 1998-të; të shtetasve Nimet Zeneli, Masar Aliu, Idajet Beqiri dhe Luan Bilbili. Sipas akuzës, këto vrasje janë urdhëruar të kryhen nga kreu i kësaj organizate, tashmë i arrestuar në Turqi, Alfred Shkurti, i njohur me pseudonimin Aldo Bare. Sipas burimeve të akuzës, në vitin 1998-të, Stergu dhe Boriçi, të cilët njihen edhe si ekzekutorë të bandës famëkeqe, kanë vrarë për hakmarrje katër shtetasit shqiptarë, Zeneli, Aliu, Beqiri dhe Bilbili.

Dokumentimi

Pas disa indicieve, Prokuroia e Krimeve të Rënda ka shkuar në drejtorinë e policisë së Fierit dhe ka rrëmuar në të gjitha dosjet e vrasjeve të këtyre shtetasve shumë vite më parë. U rimorën në pyetje dëshmitarët, ndërsa janë gjetur edhe gjurmë nga këto ekzekutime. Prokuroria ka bërë të ditur se ka mbledhur fakte dhe prova, të cilat vërtetojnë se katër vrasjet janë kryer nga banda e Lushnjës. Pas hetimeve paraprake është arritur të zbardhej se, “urdhrat për këto ekzekutime janë dhënë nga Aldo Bare, kreu i bandës dhe janë ekzekutuar nga Ilir Stërgu dhe Enver Boriçi”. Prokuroria e Krimeve të Rënda disa muaj më parë ndaj Aldo Bares ka ngritur akuzat e “Vrasjes me paramendim, më shumë se njëherë”, “Shkatërrim të pronës me zjarr”, “Vrasjes me paramendim të mbetur në tentativë”, “Dhunim të varreve”, “Vjedhje me dhunë në bashkëpunim” dhe “Krijim të organizatave kriminale dhe kryerjen e veprave penale në kuadër të organizatës”. Sipas akuzës, Aldo Bare dhe banda e tij dyshohet se i kanë kryer veprat e ndryshme penale nga viti 1997-2005-së në qytetin e Lushnjës. Po sipas këtyre burimeve, thuhet se pas hetimeve të gjata, prokuroria ka arritur të mbledhë prova që implikojnë Aldo Baren si urdhërues të shumë veprave penale, të kryera nga të arrestuarit Arben e Enver Boriçi, Ilir Stërgu, Afrim Hoxha, Erion Cici, Enver Dondollaku, Rexhep Gina dhe Eduard Demiri

Të akuzuarit

Agur Musaku (në mungesë),

Erjon Cici,

Arjan Aliçka (në mungesë),

Afrim Hoxha,

Arben Boriçi,

dhe Ilir Stërgu.

Ende nuk është vendosur për

Rexhep Ginën

Flasin të pandehurit që kanë qenë në shërbim

Cigaret e Kokës, dëshmitë

shtyjnë pa fund seancat

Cigaret transportoheshin në Shqipëri e vende të tjera të rajonit, ku kalonin kontrabandë, pa paguar detyrimet shtetërore

Në gjyqin për kontrabandën e cigareve me 21 të pandehur janë dëgjuar sërish dëshmi të turbullta, të cilat nuk kanë arritur atje ku përfaqësuesit e organit të akuzës synojnë. Në seancën e djeshme gjyqësore, e cila ka zgjatur disa orë, janë dëgjuar dëshmitë e disa prej të pandehurve, të cilët kanë qenë me shërbim në kohën kur në port janë transportuar maunet me cigare kontrabandë. Punonjësit e policisë së portit kanë deklaruar se ata kanë kontrolluar dokumentacionin që më parë e kishin kontrolluar zyrtarët e antikontrabandës. Ndërsa, kanë deklaruar se, dokumentacioni shoqërues i mallit i është dorëzuar antikontrabandës së portit. Ndërsa, hetimi i Prokurorisë për Krime të Rënda, në bashkëpunim me drejtësinë e Malit të Zi, për kontrabandën e cigareve, ka konstatuar edhe mënyrën se si justifikoheshin këto ngarkesa në vendin fqinj, me qëllim që të humbisnin gjurmët. Ndërsa, dokumentacioni i tyre përdorej edhe për në port. Gati të gjitha aktet e shitblerjes së këtyre cigareve, në dokumentacionin fiktiv rezultojnë të jenë kryer nga shoqëritë qipriote të pjesës greke.

Verifikimet

Nga hetimet është konkluduar se, këto firma janë fantazma dhe nuk janë të vërteta. Me anë të dokumentacioneve të falsifikuara të paraqitura në portet e Malit të Zi është bërë e mundur që të kalohen sasitë e mëdha të cigareve kontrabandë, për të cilat po gjykohen në Shqipëri rreth 21 perosna dhe të tjerë janë nën hetim. Kjo taktikë e kontrabandistëve ka vazhduar për një kohë të gjatë, ndërsa ka të ngjarë që policët e portit apo të kontrabandës të kenë parë pikërisht këto dokumente, netët kur janë shkarkuar anijet. Sipas akteve të shitblerjeve të falsifikuara, rezultonte se cigaret ishin blerë nga shoqëri qipriote, të cilat nuk ekzitojnë në vendin e tyre. Ndërsa, më pas, cigaret transportoheshin në Shqipëri e vende të tjera të rajonit, ku kalonin kontrabandë, pa paguar detyrimet shtetërore, saktësojnë burimet. Në kërkesën për gjykim të 21 të pandehurve, thuhet se, më 30 mars 2005, në Shkozet të Durrësit, tek ish-magazinat e ORMN-së, pronë e të pandehurit Fatmir Zotaj, janë gjetur e sekuestruar shtatë kontenierë me cigare kontrabandë.

Operacioni

Policia ka bllokuar në kontenierët në magazinat e Shkozetit 8563 koli me cigare, të gjitha pa pullë fiskale e të padeklaruara në doganë gjatë futjes në territorin e Shqipërisë. Nga hetimet ka rezultuar se, kjo sasi cigaresh është ngarkuar në portet e Malit të Zi dhe është transportuar me anijet “Eni” dhe “Poseidon”, pronë e të pandehurve Fatmir Zotaj e Ardian Cani. Këto anije, në datat 9, 19 dhe 29 mars të vitit 2005, në orët e para të mëngjesit janë futur në akuariumin e portit të Durrësit, pa lejen e autoriteteve portuale. Në vendngjarje janë gjetur e sekuestruar edhe katër kontenierë të tjerë bosh. Nga hetimet ka rezultuar se, anija “Eni” është shkarkuar rreth orës 03.00 të 29 marsit dhe se një ditë më parë është nisur nga porti i Barit në Mal të Zi, në orën 18.30. Në portin e Malit të Zi, si destinacion i mallit është deklaruar porti Portstaid, në Egjipit.

Selimi, dështon seanca

për ekstradimin në SHBA

Seanca e radhës për shqyrtimin e kërkesës për mosekstradim të shtetasit Arjan Selimi (Armand Andoni alias Brian Forter) për në Shtetet e Bashkuara të Amerikës, ka dështuar. Ndërsa, mbrojtësi ligjor i të pandehurit, tashmë i arrestuar dhe iakuzuar për trafik droge edhe në Shqipëri, pasi autoritetet amerikane kanë kërkuar ekstradimin e Andonit për në SHBA, ku ka kryer disa vrepra penale në fushën e anrkotikeve, ka kërkuar një gjë të tillë. Me depozitimin e kërkesës për ekstradim nga autoritetet e SHBA-ve është zbuluar edhe një tjetër emër i përdorur nga ai gjatë kohës së qëndrimit në SHBA, në vitet 1983-1998. Pas arrestimit të tij në vitin 2003, në media njihej vetëm si Arjan Selimi. Më pas, u verifikua se emri i vërtetë ishte Armand Andoni, por në SHBA njihej edhe me emrin Brian Forter. Në ngarkim të tij, autoritetet e SHBA-ve, në kërkesën e depozituar për ekstradimin e tij thonë se, i pandehuri i arrestuar në operacionin e koduar “Kompas” është në një proces gjyqësor në shtetin e Miçiganit në SHBA, pasi akuzohet për shpërndarje të rreth një ton marijuane, në zonën e Miçiganit Perëndimor në vitin 1998. Fakti qëndron ende i publikuar në faqen e internetit të “U.S. Marshall”, ku emri i 33-vjeçarit shqiptar ndodhet së bashku me personat e tjerë të kërkuar nga autoritetet e SHBA-ve. Sipas kërkesës së autoriteteve amerikane për ekstradimin e tij, thuhet se, Andoni alias Forter është arrestuar fillimisht në maj të vitit 1998 nën akuzën e “bashkëpunimit kriminal në shpërndarjen e kokainës dhe marijuanës”.

Dosja intime me Selimin, Inis

Gjoni kërkon shpërblimin

Publikimi i një prej provave të dosjes hetimore ndaj Arjan Selimit ka bërë që e dëmtuara, Inis Gjoni, të padisë, pikërisht Prokurorinë e Krimeve të Rënda. Videoja, e cila bëri xhiron e Shqipërisë, ku protagonistë kanë qenë Armando Andoni dhe e dashura e tij, Inis Gjoni, dyshohet se ka dalë nga personat që duhet ta mbanin sekret deri sa kjo e fundit të paraqitej në Gjykatën e Krimeve të Rënda. Ndërsa dje janë administruar të gjitha provat dhe pritet që konkluzionet të lëxohen herën tjetër. Genci Terpo, avokati i Inis Gjonit, ka paraqitur disa materiale shkresore, ku vërtetohej fakti se akuza e ka hapur dy herë celularin e të pandehurit Arjan Selimi (ish-i dashuri i të dëmtuarës). Sipas avokatit, prokuroria ka bërë shkelje kur ka hapur për herë të dytë aparatin celular të Arjan Selimit, i cili ndodhej i bllokuar nga akuza. Pas paraqitjes së kësaj prove, prokurori, Përparim Kulluri, pranoi të kishte kryer një veprim të tillë. Akuza ka shpjeguar se e kishte hapur celularin për një arsye, të cilën e dëmtuara sipas prokurorit e di shumë mirë. Prokurori shpjegoi se ishin në fazën e hetimeve dhe hapja e celularit të të pandehurit Arjan Selimi ishte domosdoshmëri. Nëpërmjet celularit do të vërtetoheshin lidhjet e tij dhe më pas emrat e personave që do të thirreshin për të dëshmuar. Por, ky veprim i organit të akuzës është interpretuar ndryshe nga Terpo, avokati i Inis Gjonit, e cila pretendon se është abuzuar me të, duke shpërndarë filmimin e bërë në çaste intime.

Gazmend Dibra, “s’gjendet” trup gjykues për “Albatros”-in

Dosja me të pandehur Gazmend Dibrën, ish-drejtorin e Aviacionit Civil, ka ndërruar tashmë 4 gjyqtarë, të cilët kanë refuzuar të gjykojnë këtë dosje. Aktualisht, dosja është vetëm me një provë, e cila është një përgjim i regjistuar nga një televizion ndaj Gazmend Dibrës, ku ky i fundit është duke folur në telefon me njërin prej pronarëve të shoqërisë “Albatros”. Dosja e Dibrës u rihodh në short pas largimit të gjyqtarit Sokol Tona dhe anëtarëve të tjerë të trupit gjykues. Përjashtimin e trupit gjykues të drejtuar nga Tona e kërkoi i pandehuri nëpërmjet avokatit Genc Gjokutaj. Ishte pikërisht avokati, ai që kërkoi një javë më parë përjashtimin e trupit gjykues. Sipas mbrojtësit që mbështet të pandehurin, trupi gjykues i drejtuar nga gjyqtari, Sokol Tona, ka qenë i njëanshëm. Përjashtimi i trupit gjykues u kërkua menjëherë pas vendimit të gjykatës për të pranuar si provë kasetën e përgjimit të transmetuar edhe në një TV privat. Mbrojtja kundërshtoi me forcë marrjen e kësaj prove, duke e cilësuar të jashtëligjshme, për aq kohë sa përgjimi nuk është kryer me vendim gjykate. Bëhet fjalë për një nga provat kyçe të procesit, që është kaseta që ka brenda regjistrimin e bisedës mes Dibrës dhe nipit të presidentit Alfred Moisiu. Gazmend Dibra akuzohet për veprën penale të shpërdorimit të detyrës. Përfaqësuesit e “Albatros”-it pretendonin se ishin në rregull në lidhje me marrëdhëniet e tyre me shtetin, ndërsa pala tjetër deklaroi se kjo kompani nuk kishte shlyer një borxh.

KOMENTE

Vlerë është ajo që të tundon ta vjedhësh

Çelo Hoxha

Nostalgjikët e artit të periudhës së realizmit socialist kanë patur disa raste të përkujtojnë lavdinë e dikurshme të idhujve të tyre.

Hera e parë ishte, kur vdiq aktori Kadri Roshi, titujt e redaksive letrare ishin fryrë, sikur të kishte vdekur perëndia e skenës, ndërsa homazhet e tij patën hije perandorake; hera e dytë ishte, kur vdiq aktori Sulejman Pitarka, titujt e faqeve letrare të linin përshtypjen sikur kishte vdekur Kadri Roshi; herën e tretë, mbushi 75 vjeç regjisori dhe aktori Piro Mani, ngjarje që u përcoll në media, sikur të bëhej fjalë për Kadri Roshin ose Sulejman Pitarkën.

Megjithatë, edhe për letërsinë socrealiste punët nuk kanë ecur keq këto tre muajt e fundit.

Dritëro Agollit po i bëhet një bust, i cili do të vendoset në fshatin e tij, u tha para disa ditësh, por, më vonë, mund t’i bëhet një monument, thuhej kalimthi; ndërsa lajmi më i rëndësishëm për këtë letërsi ishte fakti që Lidhja e Shkrimtarëve ka propozuar Diana Çulin si kandidate për çmimin “Nobel”.

Ndoshta e kam thënë edhe herë tjetër që t’i thurësh lavde veprës së këtyre artistëve – e shumë të tjerëve, është njësoj si të reklamosh veprimtarinë politike të gjithë ish-sekretarëve të parë të rretheve apo kryetarëve të kooperativave, por edhe ata që e glorifikojnë artin e asaj periudhe e përsërisin vazhdimisht veten.

Personazhi i Sali Protopapës, për të cilin do të mbahet mend Piro Mani, apo kujdestari i konviktit, për të cilin do të mbahet mend Kadri Roshi, janë personazhe të krijuara sipas një këndvështrimi të caktuar politik, ndërkohë që nuk kishte mundësi të shfaqej ana tjetër e realitetit, sepse mungonte liria e shprehjes.

Kur flitet për aktorët e shkrimtarët socrealistë, zakonisht thuhet që x apo y vepër e tij i ka mbijetuar apo do t’i mbijetojë kohës dhe këto janë veprat, për të cilat ata kanë ngrënë ndonjë shpullë, por nuk përmenden veprat që ata i ngritën në qiell, ato vepra që i bënë shërbimin më të mirë Partisë së Punës në përpjekjen e saj revolucionare për ta shkatërruar këtë vend.

Romani “Komisari Memo” i Dritëro Agollit, të cilin e bëri film Piro Mani, ku ai vetë luan Sali Protopapën, flet për Luftën e Dytë Botërore i mbështetur mbi variantin e deformuar të historisë së Shqipërisë. Lufta mes palëve shqiptare nuk trajtohet ashtu siç ishte: luftë civile që nisi prej komunistëve shqiptarë të udhëhequr nga komunistët jugosllavë.

E ç’rëndësi ka që këta autorë apo aktorë krijuan personazhe artistikisht të arrirë? A mund t’i thuren lavde një vrasësi, i cili, me sytë mbyllur, e qëllon viktimën e pafajshme në lule të ballit? Kujt i duhet dhënë prioritet në këtë rast, cilësisë së ekzekutimit, apo rezultatit të veprës?

Megjithatë, medalja ka edhe një anë tjetër, e cila, si edhe gjatë diktaturës, mbetet më pak e ekspozuar.

Vitin e kaluar u botua libri “Vilsoni dhe Genci”, përgatitur nga Sadik Bejko, kushtuar poetëve Vilson Blloshmi dhe Genc Leka, të vrarë më 17 korrik 1977-të, ndërsa sot gjendet në qarkullim edhe një libër tjetër. Libri “Poetët e Bërzeshtës” është botuar në mënyrë pirate, pa ISBN dhe përmban pjesë nga libri i Sadik Bejkos; për botimin e tyre autori nuk është vënë në dijeni. Të drejtat e autorit thuhet se i kanë të afërmit, por Bedri Blloshmi, vëllai i Vilsonit, personi që ia ka kushtuar këto 17 vitet e fundit përpjekjeve për rivlerësimin e veprës së Vilsonit dhe Gencit, më tha se nuk i ka marrë kush leje për këtë libër të botuar nga shtëpia “Marin Barleti”.

Një nga arsyet që unë shikoj te shkaku përse duhej të bëhej ky botim pirat, është dëshira për të patur një botim paralel të këtyre autorëve – i zhveshur nga ekspertizat e bëra – me kërkesë të hetuesisë - nga Diana Çuli, Myzafer Xhaxhiu dhe Koçi Petriti që i shtuan mundësitë për vrasjen e tyre; e sigurisht, edhe për fitime financiare – libri është sponsorizuar nga Instituti i të Përndjekurve Politikë, sepse, pavarësisht se çfarë figurash trumbetojnë rubrikat letrare të gazetave, botuesit e dinë mirë, cila është letërsia që kërkon lexuesi.

Vlerë është ajo që të tundon ta zotërosh, qoftë edhe duke e vjedhur.

Resmi Hibraj

Tripodi i politikës djallëzore

Është bërë tashmë e qartë për këdo që ka guximin qytetar për të mos qenë naiv dhe integritetin moral për të demaskuar ambiciet klienteliste, se politika shqiptare po kontrollohet, dhe demokracia po mbahet peng nga tripodi djallëzor Moisiu-Sollaku-Rama. Dhe menjëherë pas tyre vijnë media/shoqatat e (pa)varura që iu shërbejnë me besnikëri tre padronëve të tyre politikë.

Sollaku është bërë me paramendim ekzekutuesi i çdo tentative të guximshme të ekzekutivit për të identifikuar dhe luftuar kokat e krimit, qoftë ky i organizuar në nivele periferike, apo i integruar vertikalisht. Duke pasur mbrojtjen e paepur të gjeneralit, Sollaku shmangu fushatën e Berishës për ta shkarkuar dhe që prej asaj dite, është kthyer në Zeus omnipotent, i cili vonon, por nuk harron të hakmerret. Hakmarrja ndaj Berishës dhe qeverisë së tij nuk kërkon përpjekje të veçanta, mjafton që ai të vazhdojë të sabotojë luftën ndaj krimit.

Ndërkohë, Sollaku ka filluar fushatën e tij intimiduese për t’iu dhënë një mësim të mirë të gjithë atyre që guxojnë të hedhin baltë mbi figurën e tij “dishepullore”. Për këtë ai nuk ngurron të shfrytëzojë pozitën e tij si kryeprokuror për të intimiduar gazetarët dhe shtypin e lirë. Dhe nuk ka si të ndodhte ndryshe, gazetari Baze është i pari në listën hakmarrëse të Sollakut. Tendenca është e qartë, siç janë edhe synimet e kryeprokurorit. Mero Baze është nga të paktët gazetarë të mirëfilltë në Shqipëri, që guxojnë të dalin kundër shumicës dhe të thyejnë tabutë që dikton politika djallëzore. Baze ka marrë pozicionin e rrezikshëm të sfidantit, i cili, nëpërmjet provave të dokumentuara dhe analizave të bazuara mbi logjikën e realitetit dhe jo realitetin klientelist, ka pasur kurajën profesionale të mbrojë të vërtetën, pavarësisht sa e lartë mund të jetë kostoja oportune e një veprimi të tillë.

Gazetarë të tillë, që në kundërshtim me tendencën e mediave të pavarura për t’u bërë konkubina të Ramës, Sollakut dhe Moisiut, guxojnë të bëhen “Promete” duke mbrojtur të vërtetën, janë shndërruar në specie endemike që rrezikojne të zhduken shumë shpejt në xhunglën e rrezikshme të politikës shqiptare.

Dhe pas çdo hapi të Sollakut, gjendet gjeneral Moisiu, i cili nuk ka hezituar në asnjë moment të përdorë zellin e tij presidencial në mbështetje të interesave të Sollakut dhe Ramës. Gjenerali, përveç mungeses së elokuencës dhe patetizmit profesional që e karakterizon dukshëm, sigurisht do të mbahet mend si presidenti që u bekua nga mazhoranca e sotme (atëherë në opozitë) me shpresën për të krijuar balancë politike e mbrojtje institucionale për demokracinë, por që u shndërrua në impediment madhor për disa nga reformat kryesore të vetë mazhorancës. Fakti që Moisiu kundërshtoi disa nga iniciativat e qeverisë nuk ka asgjë të keqe në vetvete, nëse arsyet për një vendim të tillë do të ishin kushtëzuar dhe bazuar në obligimet kushtetuese që nënkupton pozicioni i presidentit. Fatkeqësisht, vendimet e Moisiut dhe koha bashkë me kontekstin politik që shoqëruan këto vendime, treguan hapur se presidenti ynë është gjithçka përveç i pavarur dhe konstruktiv. Duke qenë tragjikisht i paaftë për të kontribuar sadopak në zhvillimet pozitive në vend, sepse i mungon autoriteti dhe respekti si nga pozita, dhe nga opozita, Moisiu ka zgjedhur rrugën e lehtë të servilizmit dhe vartësisë. Duke e pasur të qartë se mazhoranca nuk do ta mbështesë rizgjedhjen e tij, Moisiu është hedhur në prehërin e Ramës, duke shpresuar se Rama do të ketë mirësinë t’i japë një kockë edhe për një mandat të dytë. Nën komfortin presidencial, Moisiu ka harruar se të qenit president është aktualisht një punë e vështirë dhe me rëndësi kombëtare dhe jo një pension i glorifikuar. I gjendur në pozicionin e sfidantit në pamundësi për të qenë pretendent, ai vendosi t’i shfrytëzojë sa më mirë muajt e fundit të mandatit, duke farkëtuar aleanca me Sollakun e Ramën. Kështu, Moisiu e mbrojti hapur Sollakun, kur ky kishte nevojë dhe vetëm ata e dinë se cili ishte kompensimi për një mbrojtje të tillë. Kurse shpresën e vakët që i dha Rama për një mandat të dytë, ai ia shpërbleu duke u bërë avokat i mediave shërbëtore të Ramës dhe duke mbrojtur Sollakun, i cili padyshim nuk do të ngurrojë të bëjë “detyrën”, kur Rama apo lakejtë e tij të kenë nevojë.

Janë pikërisht këta tre individë që mbajnë pozicione kyçe, të aftë për të marrë vendime që përcaktojnë fatet e shoqërisë, të cilët përmes një aleance të heshtur, por tepër të fuqishme janë shndërruar në rrezik eminent për demokracinë shqiptare. Tripodi Moisiu-Sollaku-Rama është shembulli i përsosur i politikës klienteliste, politikë, e cila ka si objektiv kthimin e aferave korruptive në një shënjestër të lëvizshme që është pothuajse e pamundur për t`u goditur. Vënia e institucioneve madhore, si prokuroria dhe Presidenca në shërbim të politikës dhe mundësia e pakufizuar që kanë këta tre persona për të përfituar prej njëri-tjetrit është konflikt i hapur interesi dhe një kërcënim serioz për shoqërinë shqiptare, e cila kërkon transparencë dhe integritet nga udhëheqësit e saj.

Antikorrupsioni

Moisés Naím

Dhjetë vite më parë, bota u përball me një shpërthim korrupsioni. Me ardhjen e demokracisë, diktatorët dhe burokratët, që deri atëherë nuk i jepnin llogari askujt, nuk mund t’i mbanin më të fshehta pazaret e tyre të pista. Gjatë Luftës së Ftohtë, diktaturat kleptokrate shpesh e hidhnin mbështetjen e tyre ndërkombëtare në ankand te dy superfuqitë dhe në këmbim, këto të fundit heshtnin rreth vjedhjeve të tyre. Kur lufta e dy superfuqive mbaroi, këto marrëveshje korruptive shteruan. Për më tepër, falë revolucionit informativ, hija më e vogël e dyshimit për korrupsion në nivele të larta kthehej menjëherë në lajm botëror.

Kur u kuptua se politikanët ishin hajdutë – shpesh në bashkëpunim me biznesmenë –publiku i gjerë natyrshëm kërkoi një ‘luftë ndaj korrupsionit’. Vende të ndryshme nxorën ligje antikorrupsion, korporatat hartuan kode të ashpra sjelljeje dhe lindën organizatat joqeveritare si “Transparency International” për të nxjerrë në pah dhe për të treguar me gisht vendet me korrupsion të lartë. Kudo mbinë agjenci kombëtare monitoruese, me në krye carë të fuqishëm antikorrupsioni. Nga Gjermania në Peru, në Korenë e Jugut, skandalet e korrupsionit ishin të lidhura me ish-krerë shteti gati të paprekshëm; dhe kudo në botë, ish-funksionarë të lartë qeveritarë dhe drejtorë biznesesh përfunduan në burg. Nëse dikush do të kandidonte në politikë kundër një figure të fuqishme, patjetër që fushata e tij do të ishte e llojit të ‘duarve të pastra’, duke e quajtur kundërshtarin si një figurë të korruptuar të urdhrit të vjetër. Për ata që ndodhen në transhe, ngjarja kulmore e luftës ndaj korrupsionit ishte Konventa e Kombeve të Bashkuara kundër Korrupsionit, e vitit 2003, e cila u mbështet nga më shumë se 100 vende. Por fatkeqësisht, informatat nga fushëbetejat nuk janë shumë shpresëdhënëse. “10 vitet e fundit kanë qenë thellësisht zhgënjyese”, - thotë Daniel Kaufmann, një nga ekspertët më të famshëm të përpjekjeve antikorrupsion. “Puna ka qenë e madhe, por arritjet nuk kanë qenë të tilla. Përpjekjet tona nuk janë duke dhënë rezultate. Në fakt, mundet që edhe të japin efektin e kundërt”.

Sot, lufta ndaj korrupsionit po dobëson demokracinë dhe po ndihmon që udhëheqësit e gabuar të jenë në krye të shteteve, ndërkohë që gjithashtu po largon vëmendjen e shoqërisë nga problemet e tjera më urgjente. Korrupsioni është kthyer shumë shpejt në diagnozën universale të problemeve të një kombi. Sikur të ishim të aftë ta ndalnim kulturën tonë të ryshfeteve dhe të lakmisë, ndoshta shumë probleme të tjera të vështira do të zgjidheshin. Korrupsioni mund të jetë gjymtues, por dhënia fund e ryshfeteve, haraçeve dhe mitmarrjeve nuk është detyrimisht zgjidhja e problemeve më të thella, plagëve të çdo shoqërie. Në fakt, kjo bindje e gabuar mund ta bëjë më të vështirë e madje të pamundur që përpjekjet e tjera thelbësore të fitojnë mbështetje. Reformat e taksave, për shembull, që janë tepër të nevojshme, nuk mund të zbatohen, kur mendimi i përgjithshëm është se çdo taksë e re publike do të përfundojë në xhepat e të korruptuarve.

Gjithashtu, ky obsesion me korrupsionin e shmang edhe thjesht debatin për të tjera probleme me rëndësi jetësore. Për shembull, debatet për sistemet e varfëra të edukimit, spitalet në gjendje të mjerueshme dhe ekonomitë e ndenjura nuk mund të konkurrojnë me kryeartikujt rreth skandalit më të fundit korruptiv. Këto probleme mund të përkeqësohen si rrjedhojë e korrupsionit, por ato janë krijuar falë kushteve që shpesh nuk kanë shumë të bëjnë me sjelljen e pandershme të zyrtarëve qeveritarë.

Por ndoshta efekti anësor më negativ i këtij fiksimi është paqëndrueshmëria politike që ai shkakton. Zhgënjimi i elektoratit me zyrtarët e zgjedhur mund të jetë i justifikueshëm. Por mallkimi i korrupsionit i ushqen popullit pritshmëri jorealiste rreth mundësive të vërteta për përmirësimin e standardeve të jetesës dhe për çuarjen e vendit në rrugën drejt begatisë.

Padurimi i popullit, i nxitur nga besimi se gati të gjithë pushtetarët janë duke mbushur xhepat, e shkurton padrejtësisht kohën që iu jepet qeverive për të pasur efektivitet dhe rezultate. Që në 1990-tën, 11 krerë shteti në Amerikën Latine janë hequr apo janë detyruar të ikin nga detyra përpara përfundimit të mandatit të tyre. Në çdo rast, korrupsioni ka qenë faktor. Megjithëse kjo mund të justifikohej në disa raste, në raste të tjera, mungesa e progresit është interpretuar gjerësisht si një lloj manifestimi i korrupsionit. Kjo e ushqeu trillimin se, nëse votuesit thjesht do ta hiqnin qafe këtë grup zyrtarësh të korruptueshëm dhe të gjenin udhëheqës të ndershëm, progresi do të ishte i pashmangshëm. Silvio Berluskoni në Itali, Hugo Chavez në Venezuelë dhe Vladimir Putin në Rusi të gjithë erdhën në pushtet pjesërisht për shkak të urrejtjes së publikut ndaj korrupsionit që ekzistonte më përpara. Gjithsesi, të tre vendet janë të korruptuara dhe ende po presin që progresi i premtuar të realizohet.

Nuk ka dyshim që korrupsioni është një pengesë. Por gjithsesi, nuk ka dyshim që shumë vende të gjymtuara nga korrupsioni nuk po fundosen krejtësisht. Hungaria, Italia dhe Polonia janë vetëm disa nga shembujt e vendeve, ku begatia ka bashkekzistuar me nivele të konsiderueshme korrupsioni. Kina, India dhe Tailanda nuk po fundosen, ato po bëjnë hapa përpara, pavarësisht nga korrupsioni tejet i përhapur.

Patjetër që do të ishte shumë mirë, nëse këto vende do të gëzonin një sistem ligjor të pavarur, shtet ligjor dhe një sistem cilësor edukimi. Por këto janë rezultate, jo receta për ndryshim. Ato përfaqësojnë një progress të fituar me vështirësi falë përpjekjeve të vazhdueshme në të gjitha nivelet e shoqërisë dhe normalisht, kjo ndodh pas disa brezash. Më mirë mos të kishte fare retorikë antikorrupsioni në këto vende, sesa t’iu thuhet thjesht që duhet të çlirohen nga prangat e korrupsionit – siç thonë investitorët e huaj, politikanët, udhëheqësit e institucioneve shumëpalëshe apo edhe gazetarët. Ne duhet të marrim kurajë nga fakti që shumë forca janë bashkuar në luftën kundër korrupsionit.

Por përpara se të luftojmë armikun, duhet të bëjmë të gjithë një betim si ai i Hipokratit dhe të premtojmë që nuk do të bëjmë keq.

KOSOVA

Nju Jork

Udhëheqësit e Kosovës zotohen të ruajnë unitetin

Udhëheqësit kryesorë të Kosovës i dhanë fund një konference në Nju Jork, me zotimin për të ruajtur unitetin në këtë periudhë kritike për të ardhmen e vendit. Konferenca, e mbyllur për mediat, u organizua nga fondacioni “Rockefeller Brothers” dhe tri organizata të tjera dhe kishte si qëllim përgatitjen e strategjisë për 120 ditët e para të Kosovës së pavarur. Në konferencë folën ish-presidenti Klinton, ish-Sekretarja amerikane e Shtetit, Medlin Ollbrajt, nënsekretari i Shtetit, Nikolas Bërns dhe diplomati, Riçard Hollbruk. Me nënkuptimin e qartë se pavarësia nuk do të vonojë, udhëheqësit politikë të Kosovës shpallën synimet e tyre për të demonstruar se Kosova do të funksionojë normalisht në 120 ditët e para të tranzicionit të saj. Një deklaratë e Grupit të Unitetit që mori pjesë në konferencën e zhvilluar në Pokantiko të Nju Jorkut zotohet se do të zbatojë paketën Ahtisari si kornizë të përgjithshme për shtetin e ri. Për presidentin Fatmir Sejdiu ka shumë rëndësi përmbushja e sfidave që dalin nga pakoja e presidentit Ahtisari, nxjerrja e Kushtetutës së re, ndërtimi i një legjislacioni të nevojshëm dhe mënyra e organizimit në kuptimin e veprimeve strategjike, bashkëpunimi me praninë e re civile në Kosovë, përshpejtimi i proceseve të integrimit të Kosovës dhe në veçanti, anëtarësimi i saj në mekanizmat monetarë ndërkombëtarë dhe në OKB. “Ka rëndësi që në këtë periudhë të mbahet një kohezion i vazhdueshëm i të gjitha forcave politike”, - nënvizoi presidenti Ahtisari. Udhëheqësit politikë të Kosovës patën rastin të dëgjojnë në Pokantiko diplomatë të vendeve që kanë kaluar nga një situata varësie në shtete të pavarura, si Timori Lindor apo që kanë përjetuar një tranzicion drejt formimit të një shteti të ri, si Afrika e Jugut dhe Afganistani. Kryeministri, Agim Çeku, vlerëson se kjo ishte një ndihmë për udhëheqësit e Kosovës. “Duke dëgjuar ekspertët e vendeve të ndryshme që janë ballafaquar me situata të ngjashme, ne kemi kërkuar rrugët dhe mënyrat më të mira për zgjidhjen e këtyre sfidave të shtetësisë”, - tha Çeku. Wolfgang Petritsch, ambasadori i Austrisë në selinë e OKB-së në Gjenevë, i cili së bashku me ambasadorin amerikan Frank Wisner shërbeu si moderator i Konferencës tha se, çështja e bashkëjetesës me pakicat do të jetë me rëndësi të madhe për të matur përparimin e Kosovës në këtë periudhë kalimtare. Kryetari i Partisë Demokratike Hashim Thaçi tha se, 120 ditët e para do të kenë rëndësi të madhe për Kosovën. “Çështja numër një pas pavarësisë do të jetë se si ne do të dukemi. Pamja e parë është jashtëzakonisht e rëndësishme për botën demokratike në mënyrë që të kemi një fillim të suksesshëm”, - tha Thaçi. Presidenti i fondacionit “Rockefeller Brothers”, Stephen Heinz, tha se, konferenca arriti mjaft përparim. Ndërkohë, po hartohet edhe një plan veprimi si rrjedhojë e konferencës dhe që do t’i dorëzohet Prishtinës në të ardhmen e afërt. Në konferencë morën pjesë edhe përfaqësues të komunitetit serb të Kosovës.

Intervistë e presidentit serb, Boris Tadiç, dhënë për “BBC”-në

Tadiç: Plani ndërkombëtar, i paqëndrueshëm

Presidenti serb, Boris Tadiç, e ka bërë përsëri të qartë kundërshtimin e tij ndaj planit të OKB-së për Kosovën që rekomandon një formë të një pavarësie të mbikëqyrur ndërkombëtarisht për të. Në një intervistë për BBC-në, zoti Tadiç tha se plani i paraqitur nga i dërguari i OKB-së, Marti Ahtisari, nuk ishte i qëndrueshëm dhe se e vetmja rrugë për të ecur përpara ishte për të zhvilluar ato që ai i quajti "negociata të vërteta dhe të drejtëpërdrejta" midis udhëheqësve serbë dhe përfaqësuesve të shumicës shqiptare në Kosovë. Tani, Këshilli i Sigurimit po diskuton planin e zotit Ahtisari që është mbështetur në përgjithësi nga udhëheqja shqiptare në Kosovë.

Pse është Kosova kaq e rëndësishme për serbët?

Tadiç: Pse është Jeruzalimi aq i rëndësishëm për izraelitët dhe palestinezët? Për shkak të origjinës së këtyre kombeve dhe këtyre vendeve dhe kështu është edhe për Serbinë. Tani, Serbia po mbron integritetin territorial dhe sovranitetin, por gjithashtu edhe identitetin, prandaj Kosova është kaq e rëndësishme.

Çfarë do të bëni ju, çfarë do të bëjë Serbia, nëse Kosova bëhet e pavarur?

Tadiç: Ne po bëjmë ç'është e mundur brenda fuqive tona për të shmangur pavarësinë e Kosovës, por nëse Kosova do të bëhet një vend i pavarur, ne do të angazhohemi në procesin, duke u përpjekur të bëjmë ç'është e mundur brenda fuqive tona në fushën diplomatike, përpjekje politike, përpjekje ligjore, për të bërë disa ndryshime dhe ta kthejmë Kosovën drejt Serbisë.

I dërguari i OKB-së për negociatat, Marti Ahtisari, Shtetet e Bashkuara, Mbretëria e Bashkuar, Bashkimi Europian, të gjitha këto kanë thënë se mbështesin planin e OKB-së për pavarësi të mbikëqyrur. Kjo do të ndodhë, apo jo?

Tadiç: Ne duhet të negociojmë për statusin e ardhshëm të Kosovës këtu. Ne nuk patëm negociata të vërteta lidhur me statusin e ardhshëm të Kosovës. Kuadri i parë, që u përcaktua nga Grupi i Kontaktit, që nga fillimi nuk ishte elastik sa duhet për të zhvilluar negociata dhe për këtë arsye, ne kemi propozimin e Marti Ahtisarit, që nuk është i qëndrueshëm sipas pikëvështrimit tim dhe për këtë arsye, shpresoj se do të kemi negociata të vërteta dhe të drejtpërdrejta midis shqiptarëve dhe serbëve.

Si mendoni se mund të zhvillohen këto bisedime. Ku do të zhvillohen, sa kohë do të zgjasin?

Tadiç: Këtë i takon Këshillit të Sigurimit të OKB-së ta vendosë dhe shpresoj se ky do të jetë vendimi që do të merret këto pak ditët apo javët e ardhshme.

A besoni se duhet të ketë ndonjë kufi kohor se kur duhet të bihet në marrëveshje për statusin e Kosovës?

Tadiç: Serbia nuk do të përpiqet të vonojë negociatat, kjo nuk ka të bëjë me vonimin e negociatave. Kjo ka të bëjë me gjetjen e zgjidhjeve realiste dhe të qëndrueshme për çështjen e Kosovës këtu. Vetëm një zgjidhje e qëndrueshme do të jetë e dobishme për ne të gjithë, për serbët, për shqiptarët dhe për Bashkimin Europian.

Shumë nga shpresat e qeverisë serbe varen tek Rusia, se ndoshta Rusia do të mbështesë pikëpamjen serbe në Këshillin e Sigurimit të OKB-së, ndoshta do të përdorë veton. Sa shpresë keni ju që Rusia do të përdorë në fakt veton e saj dhe do të mbështesë Serbinë?

Tadiç: Nuk kam folur me zyrtarët rusë për çështjen e vetos. Ne e dimë shumë mirë se rusët kujdesen për interesat e veta.

Ka ndonjë rrezik që ndoshta Serbia të afrohet me Rusinë dhe që Serbia të largohet nga Bashkimi Europian?

Tadiç: Nuk jam i sigurt. Ne kemi interesa strategjike me Shtetet e Bashkuara dhe me rusët. Ne jemi në mes të Europës Juglindore. Ne kemi interesat tona, por nuk ka dyshim se në fund ne do të bëhemi vend anëtar i Bashkimit Europian.

A do të konsideronit ju ndonjë lloj tregtimi ndoshta, ta lejoni Kosovën të ikë, me qëllim që Serbia ndoshta të ndjekë një procedurë të shpejtë për t'u futur në Bashkimin Europian?

Tadiç: Kjo nuk është e mundur. Kam folur shumë shpesh me zyrtarët europianë dhe nuk kam pasur ndonjë propozim të tillë në të shkuarën. Nuk pres të marr ndonjë propozim të tillë në të ardhmen.

Putin: Misioni i KS-së në Kosovë do të verifikojë zbatimin e rezolutës 1244

Presidenti rus, Vladimir Putin, ka shfaqur shpresën se, misioni i Këshillit të Sigurimit në Kosovë do verifikojë se si po zbatohet rezoluta 1244, veçanërisht ajo pjesë që ka të bëjë me kthimin e të zhvendosurve. Në takimin e shefit të shtetit me anëtarët e qeverisë, ministri i Jashtëm, Lavrov, tha se tema kryesore e bisedimeve gjatë vizitës se tij në Beograd do jetë Kosova. Lavrovi, më 19 prill do vizitojë Serbinë dhe më 20 prill do qëndrojë në Mal të Zi.

BOTA

Rehn: Ritmi i integrimeve në BE varet nga ritmi i reformave

Zëvendëskryeministrja maqedonase, Gabriela Trajkovska, u takua dje në Bruksel me komisionerin përgjegjës për zgjerimin, Oli Rehn

Vizita e zëvendëskryeministres maqedonase, Gabriela Trajkovska, në selinë e Komisionit Europian në Bruksel si dhe takimi që ajo zhvilloi me komisionerin përgjegjës për zgjerimin, Oli Rehn (Olli Rehn) solli edhe një herë në skenë situatën në vendet e Europës Juglindore, sidomos atë në Maqedoni, Kosovë dhe Serbi.

Komisioneri Rehn përsëriti para gazetarëve mesazhin që i kishte përcjellë edhe zyrtares së lartë të Shkupit. Përshpejtim të reformave, forcim të dialogut politik ndërmjet pozitës dhe opozitës si dhe respektimin e plotë të marrëveshjes së Ohrit. Këto janë kriteret që do të përshpejtojnë fillimin e negociatave për anëtarësimin e Maqedonisë në Bashkimin Europian.

“Qeveria duhet të shpejtojë reformat, sepse ritmi i integrimeve në BE varet nga ritmi i reformave në vend”, - deklaroi Rehn. Ai cilësoi si reforma të domosdoshme luftën kundër krimit të organizuar dhe korrupsionit si dhe reformat në gjyqësor dhe administratë. Më pas, ai nënvizoi rëndësinë që ka dialogu politik për stabilitetin e Maqedonisë. Komisioneri i BE-së vuri në dukje se, që në muajin shkurt të këtij viti, gjatë vizitës që ai zhvilloi në Shkup i kërkoi kryeministrit vendas që të ndërmarrë hapa konkretë në këtë drejtim.

Në mënyrë të veçantë zyrtari i lartë i BE-së kërkoi nga qeveria e Shkupit një respektim të plotë të Marrëveshjes së Ohrit, e cila, siç tha ai, është një kriter i rëndësishëm i dialogut politik si dhe i krijimit të frymës së besimit ndërmjet pozitës dhe opozitës.

Komisioneri Rehn i bëri thirrje me këtë rast edhe Beogradit që të mos humbasë më kohë në formimin e një qeverie demokratike dhe proeuropiane, e cila do të mund të përshpejtojë afrimin e saj me Bashkimin Europian.

Duke folur rreth statusit të ardhshëm të Kosovës, Oli Rehn, nënvizoi se gjatë takimit jozyrtar që ministrat e Jashtëm të BE-së mbajtën para 2 javësh në Bremen të Gjermanisë u përafruan qëndrimet e vendeve anëtare të BE-së drejt një qëndrimi unik në mbështetje të propozimit të Ahtisarit.

Ai shprehu me këtë rast shpresën se edhe gjatë takimit të ardhshëm të ministrave të Jashtëm të BE-së që do të zhvillohet të hënën e ardhshme në Luksemburg si dhe më pas, këto qëndrime do të afrohen gjithmonë e më shumë drejt një qëndrimi të vetëm dhe unik të BE-së ndaj statusit të ardhshëm të Kosovës.

Irani deklaron se ambasada amerikane nuk është në shitje

Irani përgënjeshtroi informacionet, sipas të cilave, parku i ish-ambasadës amerikane do të vihej në shitje për të dëmshpërblyer një iranian të arrestuar nga agjentë amerikanë përpara 15 vjetëve, njoftoi sot shtypi. Iranianit Hossein Alikhani, i cili banonte në Qipro në vitin 2003, iu dha e drejta nga një gjykatë e Teheranit për marrjen e një dëmshpërblimi prej 550 milionë dollarësh për kapjen e tij dhe deklaroi javën e kaluar se ish-ambasada do të sekuestrohej për të financuar dëmshpërblimin. "Sipas ligjeve ndërkombëtare, ambasadat nuk mund të shiten ose të konfiskohen", - deklaroi Reza Jafari, zëvendësprokuror i Teheranit, i cituar nga e përditshmja “Kargozaran”. "Gjykata, vetëm mund të sekuestrojë vetura, llogari bankare, ndërtesa, ndërmarrje, por jo ambasada", -deklaroi ai. Ish-ambasada amerikane përdoret tani nga gardianët e revolucionit, ushtria ideologjike e regjimit, si qendër stërvitore, por edhe si muze për "krimet" e amerikanëve.

Votë "pro" për Correa-n dhe propozimet e tij

Presidenti i Ekuadorit, Rafael Correa, ka falenderuar ekuadorianët, pasi rezultatet e para pas votimit në një referendum konstitucional sugjeruan se propozimet e tij kishin marrë përkrahje të gjerë. Përkrahës të planit të presidentit Rafael Correa, për të reformuar në mënyrë radikale sistemin politik të Ekuadorit ishin nëpër rrugë vetëm disa minuta pas mbylljes së kutive të votimit. Ai vetë u shfaq edhe në tv, duke festuar në një hotel në qytetin më të madh të vendit, Guayquil. Rezultatet e plota do të duan edhe disa kohë që të dalin. Por duket qartë se propozimet e presidentit kanë marrë përkrahjen e shumicës. Rezultati do të thotë që Ekuadori tani do të mbajë zgjedhje të tjera për të patur një asamble kushtetuese që do të rishkruajë kushtetutën e vendit, do të reformojë institucionet politike dhe do të anashkalojë kongresin.

Boshkovski dhe Tarçulovski, para gjykatës

Në gjykatën e Hagës fillon procesi i parë gjyqësor për krime lufte në Maqedoni

Ish-ministri i Brendshëm i Maqedonisë, Ljube Boshkovski si dhe ish-shefi i një njësiti special të policisë, Johan Tarçulovski, akuzohen për vrasjen e shtatë shqiptarëve në një sulm në fshatin Luboten në vitin 2001. Ata akuzohen se kanë bashkëpunuar në planifikimin e sulmit në Luboten gjatë konfliktit të vitit 2001 midis forcave maqedonase të sigurisë dhe Ushtrisë Çlirimtare Kombëtare. Prokurorët e Hagës thonë se në Luboten nuk kishte objekte ushtarake, kur të akuzuarit urdhëruan policinë dhe njësitë ushtarake për të sulmuar me mortaja në kundërpërgjigje të një sulmi ku u vranë 8 ushtarë maqedonas. Mes të vrarëve në këtë operacion ishte edhe një fëmijë 5-vjeçar.

Debat mbi presidentin e ri të Turqisë

Parlamenti turk fillon procesin e zgjedhjes së një presidenti të ri, në atë që po duket të jetë një garë shumë kontraversiale. Rexhep Taip Erdogan është tani nën presion për të mos kandiduar si president. Të shtunën u organizua një protestë e madhe që ai të mos kandidojë. Policia thotë se, të paktën 370 mijë njerëz morën pjesë. Ata hodhën parullat: “Turqia është laike dhe do të mbetet e tillë”. Kryeministri dhe partia e tij i kanë rrënjët në islamin politik. Nëse zgjidhet president, atëherë gruaja e tij do të jetë e para zonjë e parë në Turqi që mban shami në kokë dhe ky është një simbol mjaft ndarës në Turqi. Javën e kaluar, gjenerali më i lartë në Turqi tha se presidenti i ardhshëm duhet që me gjithë zemër t'i qëndrojë besnik sistemit shekullor- një paralajmërim disi i hollë për zotin Erdogan. Presidenti në Turqi ka veto mbi të gjitha ligjet dhe cakton edhe figurat më të larta në qeveri. Me një shumicë në parlament, gjithashtu në teori, zoti Erdogan mund të ketë fuqinë për të transformuar republikën. Kryeminisitri ëshë politikani më popullor dhe ka përkrahje të plotë të partisë për t'u bërë president. Shumë vetë, megjithatë paralajmërojnë se kjo mund të nxisë më shumë tension atje.

Rohan: Pavarësia në fillim të verës

Kosova do të bëhet e pavarur deri ne verë, i ka thënë gazetës kroate “Jutarnji List” Albert Rohan, zevendësi i të dërguarit të OKB-së për Kosovën, Marti Ahtisari

Duke folur për statusin e Kosovës, Rohan ka thënë se ajo do të bëhet e pavarur me një mbikëqyrje ndërkombëtare si dhe vend në të cilin minoritetet do të kenë shumë të drejta. “Nuk di asnje vend tjetër në të cilin pakicat do të kishin kaq shumë të drejta”, - ka thënë Rohan, duke shtuar se mbikëqyrja ka të bëjë kryesisht me çështjen e minoritetit serb. Duke folur për situatën aktuale në Kosovë dhe Serbi, Rohan ka thënë se, politikanët serbë, ende po luajnë me kartën ruse, vënien e vetos kundër pavërësisë. Mirëpo Serbia ka thënë Rohan ka edhe dy opsione të tjera për të përmbysur zgjidhjen e statusit të Kosovës: e para është ndikimi i mundshëm në vendet anëtare të Këshillit të Sigurimit, Sllovakinë, Afrikën e Jugut, Ganën dhe Indonezinë që të mos votojnë pro pavarësisë, kurse e dyta është shtyrja e vendimit për statusin, duke krijuar hapësirë për incidente të dhunshme në Kosovë. Rohan ka thënë se, edhe situata aktuale në Kosovë është e qetë. Ajo është e ndjeshme dhe se çfarëdo incidenti mund të marrë dimensione të mëdha, shumë shpejt. “Sa më shpejt që të sillet vendimi për Kosovë, aq më mirë është”, - ka thënë Rohan.

EKONOMIA

Fondi i konkurrencës synon të reklamojë produktet shqiptare për të rritur konkurrueshmërinë e tyre

Qeveria: 25 milionë lekë biznesit për reklamë në tregjet e huaja

Zv/ministri Bozdo thote se, qeveria ka marrë përsipër të lehtësojë procedurat për aktivitetet që kompanitë vendase do të ndërmarrin në tregjet e huaja, ndërkohë po zbatohen edhe politika të reja për nxitjen e kokurrencës dhe standardeve të biznesit shqiptar për të rritur eksportet

Qeveria shqiptare ka akorduar një fond prej 25 milionë lekësh, në ndihmë të bizneseve eksportuese për reklamë. Sipas zv/ministrit të Ekonomisë, Eno Bozdo, ky fond bën pjesë në fondin e konkurrencës që qeveria shqiptare do të akordojë përgjatë këtij viti për kompanitë vendase, të cilat do të eksportojnë produktet e tyre për të konkurruar në tregjet e huaja. Qeveria ka dalë në mbështetje të këtyre bizneseve, për të ndihmuar në rritjen e pranisë së tyre në tregjet e huaja. Fondi do të vihet në funksionim të atyre kompanive, të cilat kanë mundësi më të mira për të rritur shitjet e tyre në tregjet e huaja si dhe kanë më tepër nevojë për promovim. Përveç kësaj, institucionet qeveritare, të cilat janë ngritur për të mbështetur këto biznese, do të ndihmojnë për realizimin e promovimit të tyre me anë të konsulencave të ekspertëve si dhe me anë të informacioneve të nevojshme lidhur me mundësitë më të mira për të reklamuar këto produkte. Të gjitha bizneset eksportuese që kanë mundësi për t’u shtrirë në tregjet e huaja si dhe që kanë nevojë reale për reklamim dhe promovim të produkteve të tyre mund të aplikojnë për të përfituar nga ky fond. Bozdo u shpreh se, qeveria ka marrë përsipër të lehtësojë procedurat për aktivitetet që kompanitë vendase do të ndërmarrin në tregjet e huaja, ndërkohë që po zbatohen dhe politika të reja për nxitjen e kokurrencës dhe standardeve të biznesit shqiptar për të rritur eksportet. Ky fond do të shërbejë për t’i bërë produktet shqiptare më të pranishme në tregjet e huaja, në mënyrë që mallrat shqiptare të mund të konkurrojnë në këto tregje. Qeveria ka ndërmarrë një sërë nismash për të mbështetur bizneset eksportuese, të cilat konsiderohen si target prej më të rëndësishmëve në politikat mbështetëse dhe subvencionuese qeveritare. Rritja e konkurrueshmërisë së këtyre kompanive konsiderohet si një sfidë kryesore në zhvillimin ekonomik të vendit, në kushtet e hapjes së tregut rajonal si dhe të tregjeve të BE-së. Në këtë mënyrë, qeveria ka ndërmarrë disa nisma dhe projekte për të mbështetur bizneset eksportuese në fonde dhe grante si dhe me asistencë teknike apo edhe me konsulencë, duke ofruar më tepër informacion mbi tregjet e huaja, në mënyrë që produktet shqiptare të shkojnë në ato pjesë të tregjeve të huaja ku mund të gjejnë hapësirën e duhur për të shtuar shitjet e tyre. Në këtë mënyrë, Ministria e Ekonomisë, në bashkëpunim me agjencinë “Albinvest’ ka ndërmarrë një projekt grantesh për të mbështetur të gjitha bizneset eksportuese me projekte konkrete për të shtuar konkurrueshmërinë e tyre. Targeti i këtyre projekteve janë ndërmarrjet e vogla dhe të mesme, të cilat janë parë si ndërmarrjet me potencialet më të mëdha për të qenë të pranishme në tregjet e huaja.

Ergys Mëritri

Banka bleu gjatë vitit të kaluar 138 milionë dollarë për të ruajtur pozitat e lekut

Banka e Shqipërisë njofton se, gjatë tremujorit të katërt të vitit 2006 ka hedhur në treg një sasi prej rreth 9.2 miliardë lekësh, me anë të blerjeve të bonove të thesarit. Prej tyre, instrumentave afatshkurtër u përkasin rreth 7.5 miliardë, ndërsa rreth 1.7 miliard lekë kanë qenë blerje të bonove të thesarit me të drejta të plota. Ndërkohë që, instrumenti kryesor u përdor për tërheqjen e likuiditetit në vlera mesatare rreth 1.6 miliard lekë gjatë muajit tetor dhe rreth 0.93 miliard lekë për injektimin e likuiditetit në tre raste të përdorimit të tij gjatë dy muajve të fundit të vitit. Këto masa, banka i mori për ruajtur nivelin e normave të interesit, duke u nisur nga teprica e likuiditetit e muajve paraardhës si dhe duke parashikuar mungesën e likuiditetit në muajt e ardhshëm, njëkohësisht vazhdoi injektimin e likuiditetit. Gjatë tremujorit të katërt, për investimin e likuiditeteve të lira, bankat përdorën depozitën njëditore, niveli mesatar ditor i së cilës ishte 4.803 milionë lekë. Në kushtet e plotësimit të nevojave në tregun ndërbankar, instrumenti i kredisë njëditore gjeti përdorim minimal gjatë tremujorit të katërt të vitit 2006, rreth 0.7 miliardë lekë në 2 raste përdorimi. Ndërhyrjet e Bankës së Shqipërisë në tregun e brendshëm valutor kanë vazhduar edhe gjatë tremujorit të fundit të vitit të kaluar, duke synuar përmbushjen e objektivit të Rezervës Ndërkombëtare Neto, por edhe shmangien e çrregullimeve të tregut të brendshëm valutor. Ndërhyrjet e Bankës së Shqipërisë kanë qenë përsëri në kahun e blerjes së valutës nga bankat e nivelit të dytë. Këto blerje janë përqëndruar në muajin dhjetor, që karakterizohet nga një ofertë e lartë valute. Banka e Shqipërisë ka blerë gjatë tremujorit të katërt të vitit, 10.55 milionë USD, me një kurs mesatar prej 93.50 lekësh dhe 34.92 milionë euro, me mesatarisht 123.45 lekë.

Blerjet e Bankës së Shqipërisë gjatë gjithë vitit 2006 kanë qenë rreth 138 milionë USD, në krahasim me rreth 126 milionë USD, në vitin 2005.

KESH: Remonti i linjës Elbasan-Kardia do të sjellë kufizime dhe tension të ulët

Korporata Elektroenergjitike Shqiptare njofton se, gjatë kësaj jave, energjia elektrike e shpërndarë ndaj konsumatorëve do të ketë tension të ulët. Kjo do të vijë si rezultat i një remonti të planifikuar në linjën e transmetimit 400 kV Elbasan-Zemblak-Kardia. Ky remont është planifikuar në koordinim me vendet e tjera të Ballkanit, duke përmirësuar rrjetin e transmetimit. Tensioni i energjisë së shpërndarë do të jetë deri në 206 kV në Fierzë dhe deri në 186 kV në sharrë. Gjithashtu, do të ketë një kufizim të shpërndarjes së energjisë me një fuqi prej rreth 120 mW, në të gjithë vendin. Kjo do të sjellë kufizime të energjisë elektrike për konsumatorët në të gjithë vendin, kufizime të cilat do të jenë të lehta. Kufizimet do të jenë në oraret e pikut të konsumit të energjisë, që përfshin orën 16:00 deri në 22:30 si dhe të mundshme do të jenë kufizime më të lehta në kohën e pikut të mëngjesit.

Fier, kontrollet zbulojnë 12 biznese të mëdha me punonjës në të zezë

Policia tatimore e rrethit të Fierit ka konstatuar 12 raste abuzive të bizneseve të mëdha, të cilat nuk kanë deklaruar punonjësit e tyre për t’i regjistruar në sigurimet shoqërore. Sipas të dhënave, policia ka gjobitur brenda tre muajve të parë të vitit 12 subjekte të biznesit të madh, të cilët janë vërejtur me shkelje të tilla. Policia tatimore e Fierit ka ndërmarrë gjatë këtyre muajve kontrolle të vazhdueshme për goditur punën e zezë në kompanitë e këtij qyteti. Në konstatimet e bëra gjatë këtyre kontrolleve rezultoi se, 22 punëtorë të këtyre kompanive punonin në të zezë dhe nuk u paguheshin sigurimet shoqërore dhe shëndetësore. Shkeljet e vërejtura kanë qenë më tepër në sektorët e kompanive të veshjeve dhe prodhimit të këpucëve.

Pas ndëshkimit me gjobë, tatimet e rrethit të Fierit kanë bërë automatikisht edhe regjistrimin e këtyre punëtorëve në skemat e sigurimeve shoqërore dhe shëndetësore. Aksionet e policisë tatimore janë përqëndruar edhe ndaj subjekteve që tregtojnë mallra të akcizës, ku gjatë së njëjtës periudhe janë sekuestruar sasi të konsiderueshme cigaresh dhe pijesh alkoolike.

RRETHE

Shkodranët braktisin shëtitoren buzë lumit

Ujërat e zeza bashkohen me të bardhat

Ndonëse problemi ka kohë që është ngritur me shqetësim nga komuniteti i qytetit verior, ai ka rënë në veshin e shurdhët të organeve dhe institucioneve përgjegjëse…

SHKODËR- Shëtitorja përbri lumit të Bunës ka kohë që e ka humbur këtë funksion, si pasojë e derdhjes në këtë lumë të ujërave të zeza. Dhe si të mos mjaftonte kjo, po në këtë vend kanë filluar që të hidhen edhe mbeturinat urbane, duke e rritur akoma më shumë nivelin e ndotjes. Afrimi i stinës së verës, që shoqërohet edhe me rritjen e temperaturës, e bën edhe më të padurueshme këtë situatë. Kjo rrugë e ndërtuar që në vitet e Luftës së Parë Botërore nga austriakët, e njohur ndryshe edhe me emrin “rruga e Molos”, prej shumë dekadash ishte kthyer në një shëtitore të këndshme për qytetarët shkodranë, sidomos në periudhën nga pranvera deri në vjeshtë. Arsyeja ishte qetësia si dhe ajri i pastër që ofronte kjo zonë në cepin jugor të këtij qyteti, ku edhe kalon lumi Buna.

Por, në kushtet e situatës së mësipërme, kjo rrugë nuk mund dhe faktikisht nuk ka se si të funksionojë më për këtë qëllim. Shkaku kryesor i këtij problemi mjedisor është derdhja direkt në lumin Buna i ujërave të zeza të Shkodrës, ndonëse një problem i tillë ka kohë që është ngritur me shqetësim nga komuniteti i qytetit verior, por që ka rënë në vesh të shurdhët. Vetëm pak vite më parë, organet vendore ia linin në dorë “dopjo gjashtën”, mosfurnizimit me energji elektrike të stacionit të pompave me ujëra të zeza, Tashmë, kjo nuk ndodh më, sepse ky stacion furnizohet pa ndërprerje me energji elektrike. Ujërat e zeza derdhen në liqen, pasi në derdhje të lumit, ato bashkohen me ujërat e bardha, për arsye se tek ura e Bunës, aty ku edhe fillon rruga “e Molos”, ndodhet edhe shkarkimi i kolektorit kryesor të ujërave të bardha të qytetit të Shkodrës. Ky kolektor, i dëmtuar edhe nga ndërtimet e shumta pa kriter të ngritura mbi të, është pastruar një herë në vitin 2004 pas përmbytjeve të dimrit të atij viti, por ky pastrim nuk ka qenë i plotë. Pikërisht kjo bën që gjatë shkarkimit të ujërave të bardha të bashkohen me to edhe ujërat e zeza. Ndërsa, akoma nuk është gjetur një zgjidhje, ndotja në këtë pjesë të lumit Buna, por edhe të liqenit të Shkodrës që ndodhet vetëm 3 kilometër më larg, sa vjen dhe shtohet. Nga ana tjetër, rruga “e molos” që kalon përbri lumit Buna, ku edhe ndodh prej disa kohësh ky fenomen i rrezikshëm mjedisor, është përdorur vetëm me një kalim, madje në oraret e pasdites dhe të mbrëmjes është ndaluar qarkullimi i automjeteve në të. Por, punimet maratonë në rrugën paralele në të djathtë të kësaj rruge, nga ana e Bashkisë së Shkodrës, kanë bërë që prej disa muajsh lëvizjen në të dy krahët edhe të kësaj rruge të automjeteve. Të gjitha arsyet e lartpërmendura janë mëse të mjaftueshme që kjo rrugë të mos shërbejë më si shëtitore për qytetarët shkodranë, pa llogaritur këtu dëmin ekologjik që sjell ndotja e ujit dhe e ajrit.

Arben Lagreta

Qafë-Morina, porta e shpëtimit të tropojanëve

TROPOJË-Dogana e Qafë-Morinës është porta që u shërben banorëve të rrethit për të lëvizur lirisht në të dy anët e kufirit. Nëpërmjet saj, çdo ditë ata frekuentojnë ose tregun e Gjakovës, ose spitalin e këtij qyteti. Po ashtu, në këtë periudhë, përmes kësaj dogane lëvizin çdo dite vajtje-ardhje edhe rreth 80-90 persona që janë të punësuar në Kosovë. Burime zyrtare nga policia lokale thanë se, në dy javët e shkuara të muajit prill, nëpërmjt kësaj porte shpëtuese kanë lëvizur çdo ditë mesatarisht rreth 150-170 persona me 90-110 mjete, të gjithë banorë të rrethit të Tropojës. Ata shkojnë në Kosovë, nga ku kthehen brenda ditës. Ndërkohë, numri i personave dhe i mjeteve që hyjnë është thuajse i barabartë me numrin e personave që dalin në një ditë, ndërsa nuk ka rezultuar i hyrë në Shqipëri asnjë shtetas kosovar nëpërmjet saj. Kjo, pasi shtetasit kosovarë nuk lëvizin përmes doganës dhe rrugës Qafë Morinë-Bajram Curri, që tashmë është sipas standardeve bashkëkohore, për shkak të mungesës së infrastrukturës rrugore nga Bajram Curri në drejtim të Shqipërisë së Mesme. "Aksi rrugor Fierzë- Qafë Mali është thuajse tërësisht i amortizuar, ndërsa lëvizja me të vetmin traget përmes Komanit nuk përballon fluksin e lëvizjes së kosovarëve", - thotë nënprefekti, Syl Smajlaj. Sipas tij, arsye tjetër e braktisjes së kësaj dogane nga kosovarët është edhe fakti që, përmes saj nuk lejohet kalimi i mallrave për qëllime tregtie, por vetëm për konsum vetjak. Banorët e këtij rrethi kanë kërkuar ndryshimin e statusit të doganës së Qafë-Morinës, në mënyrë që ajo të kthehet edhe në doganë për lëvizjen e mallrave për qëllime tregtie. Kjo ka bërë që tregtaret të vazhdojnë të furnizohen në tregjet e shumicës së Tiranës, gjë që ka sjellë edhe një rritje të konsiderueshme të çmimit të mallrave të konsumit të përditshëm në tregun e qytetit.

Në maj, përurimi i aksit rrugor, pjesë e Korridorit 8

Garë makinash për Rrogozhinë-Elbasan

ELBASAN-Punimet në pjesën e aksit rrugor Rrogozhinë-Elbasan, që nisën në mesin e vitit 2006, me fondet e qeverisë shqiptare pritet të përfundojnë në fund të muajit maj të këtij vitit. Bëhet fjalë për segmentin e Korridorit të Tetë, që nis nga fshati Vidhas deri në komunën e Bradasheshit. Punimet për rikonstruksionin e këtyre 1.5 km rrugë, po kryhen nga firma “Kirk Berger”. Fondet që qeveria shqiptare ka dhënë për këtë aks të rëndësishëm rrugor, që përfshin dhe mbikalimin është 330 milionë lekë. Sipas përfaqësuesve të firmës, përfundimi i punimeve ishte parashikuar në fund të muajit nëntor, por ky afat u shty për shkak të shpronësimeve. "Aktualisht, ky segment është drejt përfundimit. Ajo që ka mbetur ende është hedhja e shtresës së asfaltit, që do të përfundojë brenda datës 31 mars, sipas kontratës", -thanë përfaqësues të firmës. “Kirk Berger” ka vendosur në dispozicion shumë mjete të rënda, me qëllim që ky segment të përfundojë brenda afatit të përcaktuar në kontratë. Sipas drejtuesve të Drejtorisë së Rrugëve Nacionale, në përurimin e segmentit të fundit të mbetur të kësaj rruge do të zhvillohet edhe një garë makinash.

Suela Azemi

Rreth 50% e familjeve trajtohen me ndihmë ekonomike

Kuksianët, kurse kualifikimi në Prizren

KUKËS- Edhe pse investimet janë në rritje e në punimet e autostradës Durrës-Kukës-Morinë është mundësuar punësimin i rreth 200 personave, niveli i papunësisë në zonën verilindore të vendit mbetet i lartë. Sipas të dhënave zyrtare, rreth 50 për qind e familjeve të rrethit të Kukësit vazhdojnë të trajtohen me ndihmë ekonomike, për shkak të mungesës së të ardhurave. Në këta tregues, ndikojnë për shkaqe të ndryshme një sërë faktorësh. Shefi i Zyrës rajonale të Punësimit, Dylber Dafku, konfirmoi se, për periudhën janar-mars, në rrethin e Kukësit janë punësuar vetëm 20 persona, numër ky shumë i vogël, në krahasim me parashikimin edhe pse pretendohet se mund të rritet në 3-mujorin e dytë të këtij viti. Sipas tij, edhe të punësuarit në këtë periudhe janë më shumë të vetëpunësuar në sektorin privat, gjë kjo e konstatuar pas kontrolleve të ushtruara dhe që ishin të punësuar në të zezë. Të dhënat nga zyra rajonale e punësimit, thonë se, aktualisht, në rrethin e Kukësit, numri i të papunëve përllogaritet në rreth 5020 persona, nga 5250 persona që ishin të papunë në fillim të vitit 2006. Gjatë vitit të kaluar, numri i të punësuarve në të dy sektoret, shtetërorë e privatë ishte 210 persona.

Po sipas të dhënave zyrtare, të papunët janë kryesisht persona pa arsim apo pa ndonjë profesion, për të cilin ka nevojë tregu i punës, ndërsa, të papunë me arsim të lartë janë vetëm 18 persona, kryesisht specialistë të sektorit bujqësor. “Problemi është se ende nuk kontrollohet si duhet sektori privat, ku duhen përfshirë edhe të vetëpunësuarit në tregun kosovar të punës, gjë që nuk është vështirë të verifikohet, në bashkëpunim me doganat në kufirin me Kosovën”, -thotë Dafku. Për zbutjen e nivelit të të papunëve, që nga viti i kaluar, po zbatohet një projekt rikualifikimi përmes kurseve të ngritura në qendrën e kualifikimit profesional të Prizrenit, sipas një marrëveshjeje të Ministrisë së Punës, Çështjeve Sociale dhe Shanseve të Barabarta me Ministrinë e Punës së Kosovës. Ky projekt ka nisur që në muajin nëntor të vitit të kaluar dhe do të vazhdojë deri në muajin shtator të këtij viti.

KULTURA

Nga 16 deri më 22 prill në Durrës zhvillohet Festivali Ndërkombëtar i Dansit Modern dhe Kontemporan

Karine Saporta përcjell famën e balerinëve shqiptarë

- Duke vazhduar udhëtimin e saj nëpër botë në kërkim të formave muzikore dhe ritmeve të afërta me ndjeshmërinë e saj : Carine Saporta zbulon në Ballkan, në Shqipëri një afërsi të polifonisë krejtësisht befasuese. Në ndryshim me polifonë korsikane apo sarde, të njohura botërisht dhe shpesh të ndërthurura, muzika popullore shqiptare a capella ka mbetur krejtësisht e paprekur

Dhurata Hamzai

Në revistën “Danser n.264” të botuar në Francë, gazetari Nicolas Six, shkruan: Pas Operas së Kairos, Carina Saporta (Karine Saporta) pushton operan e Tiranës me spektaklin “Albane ou les yeux mauves”, për të evokuar identitetin e turbulluar shqiptar. Katër balerinët e operas së Tiranës, rrëshqasin në mënyrë të admirueshme në një fjalor kontemporan, i cili është i panjohur për ta. Në thellësi të skenës, figura gjeometrike të habitshme të krijuara nga Frieder Weiss ndriçojnë lëvizjet e balerinëve”. Sipas këtij artikulli duket se Nicolas Six është mahnitur nga këngët polifonike. Ai shkruan: “Por mbi të gjitha, spektakli qe i përsosur nga prania e këngëtarëve polifonikë. Polifonia e tyre nuk ngjan me asgjë që njohim. Hipnotizuese dhe e stuhishme; një linjë sonore e dendur që dëgjohet. Këto polifoni të sugjeruara mjeshtërisht nga drejtori i operas të çojnë në antikitet. Dhe njeriu kënaqet duke njohur kontemporanen në një vend që pak e njeh këtë lloj kërcimi. E parë në linjë kombëtare, ky spektakël mund të bëjë efektin e Carolyn Carison në vitet ‘70 në operan e Parisit, një nisje të re”. Krijimi i koreografes së njohur Carina Saporta i pak kohëve më parë, realizuar me sukses në Teatrin Kombëtar të Operas dhe Baletit, do të marrë një tjetër përmasë sot në qytetin bregdetar të Durrësit. Duke nisur nga 16 prilli deri më datën 22 prill në teatrin “Aleksandër Moisiu” në Durrës do të zhvillohet Festivali Ndërkombëtar i Dansit Modern dhe Kontemporan. Një bashkëpunim i Ministrisë së Turizmit, Kulturës, Rinisë dhe Sporteve, bashkisë së Durrësit me pjesëmarrjen e trupave nga Shqipëria, Franca, Italia, Zvicra, Hollanda, Kanadaja, Maqedonia, Suedia, Serbia. Siparin e këtij festivali e çel baleti konteporan ““Albane ou les yeux mauves”. Drejtues të TKOB-it, pohojnë për gazetën “TemA” se pjesëmarrj e veprës në këtë festival përfaqëson të vetmin institucion kombëtar të artit klasik dhe atij modern. Ky institucion ka vënë në skenën e tij shumë vepra konteporane. Drejtori i TKOB, zoti Zhani Ciko pohon se është i kënaqur me këtë pjesëmarrje duke u shprehu se “do të më gëzonte çdo sukses që vjen nga një institucion i përmasave dhe i një rëndësie kombëtare të tillë, nëpërmjet të cilit përçohen politikat kulturore më progresive dhe më të rëndësishme. Këto politika janë edhe imazhi i një Shqipërie që gjithnjë e më shumë i përket Europës, e cila ka artistë profesional dhe vepra të arritura.

Muzika

Duke vazhduar udhëtimin e saj nëpër botë në kërkim të formave muzikore dhe ritmeve të afërta me ndjeshmërinë e saj : Carine Saporta zbulon në Ballkan, në Shqipëri një afërsi të polifonisë krejtësisht befasuese. Në ndryshim me polifonë korsikane apo sarde, të njohura botërisht dhe shpesh të ndërthurura, muzika popullore shqiptare a capella ka mbetur krejtësisht e paprekur. Duke lënë mënjanë mbivendosjen e tonaliteteve komplekse dhe të strukturave ritmike të bazuara mbi një numeracion tek, këto këngë janë të magjishme.

Këngëtarëve të ansamblit polifonik, Carine Saporta u bashkoi një perkusionist : një “të vjetër”… specialist prej 60 vjetësh i ritmeve të Jugut.

Një gjest i imagjinuar

Te ballkanasit Carine Saporta ndjeu të fuqishme kulturën surrealiste dhe prezencën e gjithanshme të miteve themelues të mitologjisë greke (si ka shkruar Ismail Kadare). “Shqipëria është një vajzë me sytë mavi”, i përgjigjet koreografes një burrë i pyetur në rrugë. E përbërë nga përgjigjet e mbledhura prej këtyre mikro-trotuareve rreth pyetjes: “Çfarë është Shqipëria për ju?”, spektakli do të nxjerrë në pah si gëzimin ashtu edhe forcën, dyzimin e humorit shqiptar. Humor “i dyfishtë” ashtu sikurse sjellja e një popullit dalja e të cilit nga një diktaturë 50-vjeçare nuk mund të bëhet pa kontradikta. E dyfishtë si koka e shqiponjës, emblema e kombit shqiptar. Për Carine Saporta-n mbushja e të veçantave të imagjinimit dhe të physicalité balkaniques përfshin nevojën për të kërkuar një energji të re: më të rreptë, më të ashpër. Duke krijuar “albane (ou) les yeux mauves” koreografja synon të zbulojë një lëvizje të ashpër, të fuqishme. Për të ndryshuar nga një kompozim i rafinuar që ajo e përdor zakonisht për të pyetur jo pa fyerje.... Një kaos primordiale.

Një skenografi multimediale

Është arkitekti Valerio Ferrari që në shprehjen “art i varfër” (shpjegimi – një rrymë artistike që bëjnë art me gjëra, sende të ndryshme të gjetura), ka imagjinuar diapozitivin skenik mbi bazën e dollapëve që janë porta, edhe llastikëve që në origjinë janë destinuar për mekanikën e automobilëve. Këta janë marrë pranë një ndërrmarrjeje të specializuar dhe janë kthyer në skenografi. Por gjithashtu kallamat e peshkimit dhe qese plastike janë objekte që të përdorura nga kërcimtarët, i lejojnë koreografes të arrijë të realizojë lëvizje krejt të veçantë. Një punë multimediale që përdor një kamera infra të kuqe për të lexuar në errësirë, është objekt i një rezidence të Frieder Weiss pranë Carine Saporta-s.

Carine Saporta

Që prej 20 vjetësh, vepra e Carine Saporta-s është një nga më impresionantet në historinë

e vonshme te krijimit koreografik kontemporan perëndimor. Autore e spektakleve të kthyera tashme në “mite” (“La fiancée aux yeux de bois”, “Les Taureaux de chimène”, “La princesse De milan”, “Belle au bois dormant”, Carine Saporta luan gjithashtu me plastikën, është fotografe dhe realizuese. Kompania e saj ka dhënë shfaqje në të gjitha skenat e njohura të botës. Drejtore e Qendrës Koreografike Kombëtare të Normandisë nga shtatori 1988 deri në qershor 2004, Carine Saporta sot është drejtore e kompanise “Carine Saporta”.

Sinopsis

“Albane (ou) les yeux mauves”

“Albana ose syte mavi”

Premierë boterore

Spektakël koreografik nga Carine Saporta

Skenografia nga Valério Ferrari

Realizimi multimedial: Frieder Weiss

Balerinë të TKOB dhe kompanisë “Carine Saporta”

Grupi polifonik i Ansamblit Kombëtar të Këngëve dhe Valleve Popullore

Me mbështetjen e Ambasadës Franceze

Drejtor i produksionit skenik : Genc Shkodrani

Një spektakël: mavi ashtu si mali ka këtë ngjyrë

Me pjesëmarrjen e balerinëve të Teatrit Kombëtar të Operas dhe Baletit, Rovena Shqevi, Alisa Gjoni, Eva Seraj, Evis Heta dhe grupit polifonik te AKKVP.

Tenori Pirgu ngjitet në Royal Opera

Tenori Saimir Pirgu interpreton një nga rolet kryesore në operan “Gianni Schicchi” të Puçinit në Royal Opera House në Londër. Artisti nga Shqipëria është vlerësuar nga kritika britanike si “një nga tenorët lirikë më të mirë të së ardhmes”. Në më pak se pesë vjet ai ka marrë pjesë në ngjarje të rëndësishme operistike në tre kontinente dhe po punon me shtëpinë e njohur diskografike UNIVERSAL për diskun e dytë me muzikë klasike. Tenori Pirgu do ta luajë rolin e Rinuçios edhe në Los Anxheles të Shteteve të Bashkuara të Amerikës, ku opera e Puçinit do të vihet në skenë nga Plaçido Domingo dhe Woody Allen. Saimir Pirgu, 23-vjeçari shqiptar, është një prej zërave më të mirë, i cili po shkon drejt majave operistike. Ai ka lindur në qytetin e Elbasanit në vitin 1982. Mësimet e para të muzikës i ka marrë në qytetin e lindjes, në instrumentin e violinës dhe më pas ka vazhduar studimet për kanto në Liceun Artistik “Jordan Misja”. Kryen studimet e larta në Balzano të Italisë, nën drejtimin e mjeshtrit italian Vito Brunetti. Gjatë vitit 2001 ka fituar disa çmime, si atë të “Këngëtarit të ri më të mirë” në Bolonja, që i hapi rrugën për çmimet prestigjioze në aktivitetet ndërkombëtare “Caruzo” në Milano dhe “Tito Skipa” në Leçe. Gjatë vitit 2003, ka interpretuar disa role pranë Teatrit të Operës së Romës dhe suksesin më të madhe e ka korrur në shkurt të këtij viti, në operën e Moxartit “Cosi fan tutte”. Pasi fiton një bursë studimi nga fondacioni “Karajan” në Vjenë, për herë të parë, në prill të këtij viti luan në skenën vjeneze, në operën “Elisir d’amore”. Për herë të parë në Shqipëri, ai u prezantua dy vjet mw parw me veprën e Donizettit “Elisir d’amore”. Ka pasur shumë nga ata që e kanë konsideruar 23-vjeçarin “Pavaroti i ri”, të tjerë e kanë quajtur një “Anton Darmota”. Kështu do të shkruhej në faqet e një prej revistave kulturore më të rëndësishme austriake “Buhne” (“Skena”), për tenorin e ri shqiptar.

- Kritikja bullgare Amelija Liçeva, profesoreshë në Universitetin e Sofjes, e vlerëson romanin “Vetmi gruaje” të shkrimtares Flutura Açka, të botuar kohët e fundit në gjuhën bullgare nga shtëpia botuese “Ak-Ba-Ka” në Sofje. “Romani “Vetmi gruaje” hap kolonën e shtatë autoreve bashkëkohore ballkanike në bullgarisht

“Vetmi gruaje” i shkrimtares Flutura Açka është botuar kohët e fundit në gjuhën bullgare nga “Ak-Ba-Ka”

DURAS-i shqiptar?

Dr. Amelija Liçeva

Libri i F. Açkës “Vetmi gruaje” është i pari në kolanën premtuese të shtëpisë së re botuese “?k-B?-??”, që i ka vënë vetes detyrën shumë ambicioze që të mbushë fushat e bardha në njohuritë tona për letërsinë ballkanike dhe, më në veçanti, për letërsinë ballkanike që krijohet nga shkrimtaret femra. Kolana synon të shtojë emra të rinj pranë atyre të Dubravka Ugreshiçit dhe Ana Blandianës dhe do të bëjë një test se deri ku autoret e tjera ballkanike mund ta arrijnë famën e tyre. Thënë më gjerë, do të plotësojë vendet bosh në procesin e njohjes mes fqinjëve, do të hapë shtigje dhe fusha për dialog dhe shkëmbim. Sepse, në fillim të shekullit të 21-të, kur duket tepër e rëndomtë të konstatojmë tendencën e globalizimit, është pak e turpshme që, më pak nga të gjithë, të njohim pikërisht fqinjët dhe të mos interesohemi dhe të mos duam të dimë se çfarë i lidh dhe i bashkon kulturat tona. Zgjedhja e Flutura Açkës nuk është e rastit. Ajo është shkrimtare e mirë, e njohur në Shqipëri, e përkthyer në disa gjuhë evropiane. Veç kësaj, nuk është një shkrimtare rajonale, nuk është tipi që mund ta quajmë autore ballkanike. Ajo sheh thellë në njerëzoren, në gjendjet, në vetminë, jo kaq shumë në gjurmët e vendeve dhe të ngjarjeve të përjetuara. Megjithatë, asaj nuk i mungon shikimi ballkanik i fiksuar në shenjat, në gjurmët, në pikën e pandarë të vendit dhe të trishtimit, e cila lejon që për Ballkanin të flitet si për depo emocionesh dhe përjetimesh negative.

I lejoj vetes të them se “VETMI GRUAJE” është një libër gjysmë shqiptar e gjysmë italian. Jo vetëm për shkak të subjektit, të vendosjes së tij midis botës italiane dhe asaj shqiptare, por sepse ekziston një kapërcim i motivit ballkanik, për të cilin flas. Flutura Açka është si Marguerite Duras — mbiemocionale, e kursyer në përshkrimet, e fuqishme në sugjestionet, duke vizatuar nga larg njerëzit, duke zhveshur ndjenjat, autore e situatave dhe jo e ndodhive të tipit shkak-pasojë. Shkrimtare, tek e cila TJETRI nuk është i gatshëm të pranojë, e cila i thotë JO rrëfimit dhe të përbashkëtës... Ndërkohë që pasionet e përshkruara, i ngjajnë atyre të filmave të Vitorio de Sikas me Sofia Loren...

Përtej kësaj daljeje në evropjanen, rrjedh ndërkaq pyetja e logjikshme, e ngritur në libër: a ka më të vërtetë diçka që është e përbashkët ballkanike? Veç stereotipeve dhe negativizmit, me të cilat ne e ngarkojmë këtë koncept. Nëse do të nisemi nga mënyra e shkrimit të Açkës, përgjigja është më tepër PO. Përtej shkrirjes, humbjes se kufijve, kalimeve për të cilat ajo flet, edhe këtu, gjëja ballkanike, ballkanësja, është e tretur thellë, është ana e errët, nganjëherë barbare, ajo që i kundërvihet botës së ndryshme, që paraqet në vetvete “Italianen”. Sigurisht, asgjë nuk është e njëkuptimshme. Pasionet e forta janë kudo. Gjërat e çuditshme janë kudo. E vërteta është se Italia është vendi i artit, por edhe në Shqipëri çdo gjë është e mundur, edhe aty dashuria dhe e madhërishmja mund të përcaktojnë rrugën. Megjithatë, evropjania është ëndrra, ndërsa ballkanësja është vendi, ku dashuria dhe vdekja janë përfytyrimet e pasqyrë të njëra-tjetrës, dhe ku në numër, dështimet janë më të shumta se ëndrrat e realizuara. Në kolanën në fjalë nuk parashikohen autore bullgare, por nëse kjo do të shihet e arsyeshme, atëherë më e përshtatshmja do të jetë Emilija Dvorjanova. Sepse, nëse kërkojmë paralele midis këtij “shkrimi femëror shqiptar” dhe shkrimit femëror bullgar, atëherë lidhja ekzistuese është midis Açkës dhe Dvorjanovës — kjo edhe për shkak të mënyrës se si mendohet e kaluara, edhe për shkak të lojës me subjektin kriminal, edhe për rolin e muzikës, edhe për kapërcimin e rajonales.

Shënim: (Ky vlerësim është botuar në shtypin bullgar. Amelija Liçeva është profesoreshë në Universitetin e Sofjes. Ajo është një nga përfaqësueset më të njohura të kritikës letrare në Bullgari, e cila shpesh është cilësuar nga qarqet letrare si “gjykatëse e pagabueshme” në letërsi. red-Dh.H).

Umberto Eco: letërsia sot është një version modern i mitologjisë

-Eco i ftuar nderi në Festivalin e XIV-të Ndërkombëtar të Librit në Budapest-

Sipas shkrimtarit italian Umberto Eco, njerëzit lexojnë sepse duan të gjejnë në letërsi kënaqësitë që nuk i arrijnë në jetën e përditshme ."Jo rrallë herë jeta që bëjmë nuk na mbush, dhe prandaj lexojmë", tha Eco në Festivalin e XIV-të Ndërkombëtar të Librit që filloi fundjavën e shkuar në kryeqytetn hungarez, Budapest.

Shkrimtari, i cili merr pjesë si i ftuar nderi në këtë festival, i shpjegoi shtypit që letërsia në kohët që jetojmë, funksionon si "një version modern i mitologjisë " dhe se “pa të njerëzit do të dinin shumë më pak”. Autori i një sërë romaneve të suksesshën pohoi se "shkrimtari gjithnjë komunikon me dikë, dhe ky është publiku" . "Urrej shkrimtarët kur thonë se shkruajnë për veten e tyre. E vetmja gjë që shkruajmë për veten tonë është lista e gjërave që duhet të blejmë",u shpreh Eco me humor. Nga ana tjetër, Eco, me një eksperiencë të gjatë si profesor, nuk e konsideron shumë të rëndë problemin e parashtruar nga specialistët mbi aftësinë e pakët që kanë të rinjtë për të kuptuar çka lexojnë . "Më parë kishte një tregues shumë të lartë të analfabetizmit , shumë herë më të lartë se sa tani. Aq më shumë Interneti i detyron njerëzit që të lexojnë”, cilësoi shkrimtari . Romani i fundit i Eco-s është “Thirrja e çudishme e mbretëreshës Loana”, një libër ku protagonistja kryesore humb kujtesën .

III

Ese i vogël

Frikë për të ardhmen

Ali Podrimja

Kallëzojnë në qytetin tim se pasi ishin vrarë e prerë ndër veti bajraktarët, i kishin çuar fjalë njëri-tjetrit se mund të takoheshin në ndonjë nahi neutrale. Asnjëri nuk kishte kundërshtuar. I kishin mbledhur të vrarët e i kishin varur armët thuajse asgjë nuk kishte ndodhur mes tarafeve. U kishin hipur kuajve më të mirë e kishin rënë në atë farë nahije neutrale; kallëzojnë pastaj se ata kishin bërë pallën e sefasë, kishin pirë e ngrënë desh të pjekur rreth hellit të zjarrit, që shihej kushedi se ku. Ngapak edhe ishin kurvnuar dhe kishin lidhur miqësi.

Mirëpo, kur u ishin sosur të gjitha me shishe e tepsi, ia kishin filluar do bisedave fort të prera e morbide rreth plojës, që kishte ndodhur pak më parë mes tarafeve. Kishte pyetur i pari dikur: po sa qen t’u vranë? Më pak se ke shkrepur plumba. Iu kishte gjegjur tjetri rreth zjarrit. Po ty? - të parin e kishte pyetur i dyti. Aq sa ty. Iu kishte gjegjur i pari me kokë të ulur. Me ferk ishin ngritur e përqafuar dhe secili kishte rënë në bajrak të vet. Prapë ishte dëgjuar krisma e pushkës dhe gjëma, derisa kishte ndodhur një sebep tjetër qejfi. E kështu me rradhë ishin pakësuar tarafe e “qen”.

Para një kallëzimi të tillë morbid, i cili mund të kallëzohet në variante e me ditë njeriu normal shtanget dhe nuk mund të rrijë pa sharë. Në këtë hasmëri të tarafeve, kallëzojnë më vonë, se dorë kishte pasur hasmi që me mjeshtri ua kishte përzier punët. Bajraktarët Atdheun e shihnin aty nën çati dhe e kosnsideronin të madh sa, bie fjala, livadhi i Hasanit, ose nuk e shikonin kurgjë më të lartë se Suka e Cërmjanit. Shtrinin shuplakën pastaj e mendonin se e tij është deri aty ku bie kokrra e plumbit. Se kush ishin ata “qen” për bajraktarët nuk mund ta them se fyhem si njeri e krijues. E vërteta qëndron se në të dy anët ishin vrarë shqiptarë të gjorë, që kishin përcjellë bajraktarët dhe atje ku ata bënin qejf në oda të fshehta. As vetë nuk di pse hap plagën, që aty–këtu ende mund të kullojë. Sall kam të drejtë të frikësohem në momentin e pikërishëm mos po e pranojmë lojën e bajraktarëve. Më tmerron kjo kur në bazë të nahive e krahinave duam t’i ngremë edhe partitë. Ndonjë recidiv i së kaluarës së largët, për të cilën më kallëzonin shpesh të urtit e mëhallës, po të qesë kokë do të ishte turp edhe për elitën intelektuale. Një gjysmë karrige nuk mund t’ia zërë vendin çështjes kombëtare. E asaj pakkush ia ka parë hajrin. Unë frikësohem se mos krahinarizohemi, lagjizohemi, çatizohemi e sinanizohemi e po harrojmë se ka diçka më të shenjtë që qëndron mbi çdo gjë…

Frika është e natyrshme, sepse të ardhmes nuk ia shohim as një shenjë.

SPECIALE

Ministria e Arsimit ankimon në Gjykatën e Lartë: Muzeu i Shkencave të Natyrës në rrezik

MASH: Muzeu i Shkencave të Natyrës, pronë kulturore e shqiptarëve

Ministria e Arsimit ka depozituar në muajin janar 2007 në Gjykatën e Lartë, një ankesë kundër vendimit të Gjykatës së Apelit Tiranë (nr.1358, datë 26.12.2006), e cila, në mënyrë të papritur ka vendosur t’i kthejë Muzeun e Fakultetit të Shkencave të Natyrës familjes që, sipas gjykatës, është pronare. Sipas MASH-it, kronologjia e kësaj ngjarjeje fillon në shtator të vitit 2000, (vendim nr. 419 të datës 9 shtator), kohë kur Komisioni i Kthimit dhe Kompensimit të Pronave (KKKP) u kthen truallin dhe godinën 2-katëshe të Muzeut të Fakultetit të Shkencave Natyrore, familjes Zagolli si ish-pronare. Pas këtij vendimi, Ministria e Arsimit dhe Shkencës dhe Rektorati i Universitetit të Tiranës ngritën në atë kohë një kundër padi, ku kundërshtonin këtë vendim si të padrejtë dhe të pambështetur në ligj, duke argumentuar se, “së pari, pronarët ishin kompensuar nga shteti me një dekret të vitit 1940, me vlerën përkatëse të truallit në atë kohë dhe së dyti, sipas ligjit, pronat publike nuk u kthehen pronarëve, por vetëm u kompensohen.” Pas 5 vitesh, më 16 dhjetor 2005, Gjykata e Shkallës së Parë Tiranë vendosi anullimin e vendimit të KKKP-së, por të bazuar në parregullsi administrative, duke mos u shprehur për thelbin e çështjes. Një vit më vonë, në dhjetor 2006, Gjykata e Apelit Tiranë vendosi në një kohë shumë të shkurtër (2 seanca) për kthim të muzeut ish-pronarëve.

Ankesa

Për këtë, Ministria e Arsimit i kërkon Gjykatës së Lartë të pranojë ankimin si dhe kërkesën për pezullim të vendimit, ekzekutimi i të cilit do të sillte pasoja të parikuperueshme të pajisjeve brenda Muzeut të Shkencave Natyrore. Objektet janë të patransportueshme dhe çdo zhvendosje i prish speciet e rralla të ruajtura prej vitesh.

Vlera e Muzeut

Muzeu i Fakultetit të Shkencave Natyrore të Universitetit të Tiranës është objekt i një rëndësie të veçantë dhe shërben për zhvillimin e orëve mësimore të studentëve të Fakultetit të Shkencave dhe Gjeologjisë. Por, përveç karakterit të tij didaktik, ky muze ka një vlerë të madhe kombëtare, unikal për kulturën shqiptare dhe mban në brendësi të tij të gjithë pasurinë e florës dhe faunës shqiptare me vlerë miliona euro, fryt i punës 50-vjeçare të kërkuesve shqiptarë. Ai është një objekt i ndërtuar tërësisht me fondet e shtetit, pasi ka qenë i djegur nga koha e pushtimit italian dhe nuk ka pushuar asnjëherë së qeni objekt me karakter publik.

Rildo Ngjela

Procedurat ligjore që po ndjek Agjencia Qendrore e Vlerësimit të Arritjeve të Nxënësve

Disa pika kryesore të ligjit që po ndjek kjo agjenci për hartimin e lëndëve me detyrim për shkollat profesionale në Maturën Shtetërore

II. PROCEDURA E PËRGATITJES SË TESTEVE NGA AVA

Neni 19

Për provimet e detyruara të Maturës Shtetërore në lëndët e formimit teorik profesional për shkollat teknike-profesionale 5-vjeçare e 3+2-vjeçare dhe për shkollat social-kulturore, AVA përgatit 3 (tri) komplete testesh për çdo provim, mbi bazën e kësaj procedure.

20.1. DZHK-ja në MASH dërgon zyrtarisht në AVA programet orientuese lëndore të hartuara nga komisionet e ngritura sipas nenit 8 të kësaj Rregulloreje.

20.2. Pas marrjes së programeve orientuese, drejtori i AVA miraton ngritjen e grupeve lëndore të hartimit të testeve, emëron anëtarët e grupeve lëndore të hartimit të testeve dhe cakton përgjegjësin e grupit lëndor. Ata angazhohen në punë pas nënshkrimit të kontratave të posaçme,të cilat vënë si kusht ruajtjen e sekretit dhe mungesën e konfliktit të interesit.

20.3. Specialistët lëndorë të AVA-së trajnojnë çdo anëtar të grupeve lëndore të hartimit të testeve, pas emërimit të tyre.

20.4. Çdo grup lëndor harton fondin e kërkesave të testeve, bazuar në matricën e specifikimeve.

20.5. Pilotimi i njohjes së karakteristikave të kërkesave, procedurave logjistike dhe administrative për realizimin e provimit kryhet nga fondi i kërkesave të hartuara nga çdo grup lëndor.

20.6 Përgjegjësi i grupit lëndor harton 3 (tri) komplete testesh mbi bazën e bankës së kërkesave me karakteristika të njohura, bazuar në analiza psikometrike, si dhe harton skemën e pikëzimit dhe të vlerësimit.

20.7 Përgjegjësi i grupit lëndor të hartimit të testeve i dorëzon me procesverbal 3 (tri) kompletet e testeve drejtorit të AVA-së, i cili i fut ato në kasafortë, të mbyllura në kushte të sigurisë së lartë.

20.8 MASH organizon përzgjedhjen e testit përfundimtar.

20.9 Në mjediset e AVA-s kryhet shumëfishimi dhe paketimi i test-broshurave.

Neni 20

Për të gjitha lëndët e tjera të provimeve të detyruara dhe me zgjedhje të Maturës Shtetërore në sesionin e parë (përveç atyre që u përmendën në nenin 19) veprohet sipas kësaj procedure:

20.1. DZHK-ja në MASH dërgon zyrtarisht në AVA programet orientuese lëndore të hartuara nga komisionet e ngritura sipas nenit 8 të kësaj Rregulloreje.

20.2. Pas marrjes së programeve orientuese, drejtori i AVA miraton ngritjen e grupeve lëndore të hartimit të testeve. Me propozimin e specialistëve lëndorë të AVA ai emëron anëtarët e grupeve lëndore të hartimit të testeve. Ata angazhohen në punë pas nënshkrimit të kontratave të posaçme, të cilat vënë si kusht ruajtjen e sekretit dhe mungesën e konfliktit të interesit.

20.3. Specialistët lëndorë të AVA-së trajnojnë çdo anëtar të grupeve lëndore të hartimit të testeve, pas emërimit të tyre.

20.4. Çdo grup lëndor harton fondin e kërkesave të testeve, bazuar në matricën e specifikimeve,të hartuar nga specialisti lëndor. Ky fond është sa 10(dhjetëfishi) i kërkesave që do të përmbajë testi.

20.5. Pilotimi i njohjes së karakteristikave të kërkesave, procedurave logjistike dhe administrative për realizimin e provimit kryhet nga fondi i kërkesave të hartuara nga çdo grup lëndor,nën drejtimin e specialistit lëndor.

20.6 Përzgjedhja e testit të lëndës bëhet nga një specialist i caktuar prej Ministrit të Arsimit e Shkencës, që emërtohet përgjegjës i testit përfundimtar (PTP), në kushtet e ruajtjes së plotë të sekretit(KOEPS), brenda ambienteve të izoluara të AVA. Menjëherë pas përzgjedhjes së testit kryhet shumëfishimi dhe paketimi i test-broshurave.

IV. PËRZGJEDHJA E MJEDISEVE TË ZHVILLIMIT TË PROVIMEVE TË MATURËS SHTETËRORE

Neni 37

KMSH-ja e DAR-it dhe ZA-së evidenton dhe inspekton mjediset ku zhvillohen provimet e Maturës, 2 (dy) muaj para kryerjes së tyre.

Neni 38

Konsiderohen mjedise të përshtatshme për zhvillimin e provimeve të Maturës, ato që plotësojnë kriteret e mëposhtme:

38.1 Mjedisi më i vogël i përshtatshëm për zhvillimin e provimeve të jetë i mjaftueshëm për të paktën 15 nxënës.

38.2 Largësia ndërmjet çdo nxënësi/kandidati të jetë jo më pak se 120cm larg nga njeri nxënës/kandidat tek tjetri, si majtas-djathtas, ashtu dhe para-prapa.

38.3 Në ditën e provimit NUK zhvillohen aktivitete të tjera që ndërpresin provimin.

38.4 Mjediset të jenë të ajrosura dhe të ndriçuara.

38.5 Në mjediset ku zhvillohet provimi NUK ka postera, tabela ose materiale të tjera që kanë lidhje me lëndën që jepet provim.

38.6 Nxënësit/kandidatët ulen me fytyrë në të njëjtin drejtim.

38.7 Sipërfaqja që nxënësi/kandidati ka në dispozicion për të shkruar është të paktën (40 x 60) cm.

38.8 Çdo mjedis që përzgjidhet për zhvillimin e provimeve, të ketë komunikim me rrugë automobilistike.

Neni 39

Për provimet e Maturës, në shkollat ku numri i nxënësve/kandidatëve është më i vogël ose e barabartë me 20 (njëzetë), KMSH-ja e DAR-it dhe ZA-së grupon shkollat dhe cakton mjedisin ku zhvillohen provimet.

KMSH-ja njofton KSHMSH-të përkatëse për të lajmëruar çdo nxënës/kandidat me shkrim dhe për t’u krijuar atyre kushte lehtësuese transporti për provimet e detyruara.

Nxënësit e shkollave jopublike do t’i zhvillojnë provimet e maturës shtetërore në mjediset e shkollave publike.

Neni 40

KMSH-ja e DAR-it dhe e ZA-së merr masa që provimet me zgjedhje të zhvillohen VETËM në qytetet e DAR-it dhe ZA-së, mundësisht në mjedise të mëdha dhe që plotësojnë kriteret e përcaktuara në nenin 38.

Neni 41

KMSH-ja e DAR-it dhe ZA-së pas përcaktimit të mjediseve ku zhvillohen provimet e Maturës, dërgon në MASH, AVA dhe në KSHMSH, deri më 10 maj listën e mjediseve përkatëse.

KSHMSH-ja pas marrjes së njoftimit nga KMSH e DAR-it dhe ZA-së merr masat e nevojshme për organizimin dhe rregullimin e çdo mjedisi.

KSHMSH-ja njofton çdo nxënës/kandidat, për mjedisin ku ai jep provimet e maturës

V. PROCEDURAT E SHPËRNDARJES DHE GRUMBULLIMIT TË MATERIALEVE TË PROVIMEVE TË MATURËS

Neni 42

Shpërndarja dhe grumbullimi i materialeve të provimeve bëhet me procesverbal. Materialet e provimit tërhiqen në AVA nga dy persona: përfaqësuesi i autorizuar me shkrim nga kryetari i KMSH, të DAR dhe ZA dhe një person i autorizuar nga MASH, sipas grafikut te shpërndarjes te dërguar nga MASH. Personat e autorizuar sipas këtij neni mbajnë përgjegjësi për ruajtjen e sekretit dhe sigurimin e tyre deri në dorëzimin tek kryetari i KMSH-së së DAR-it dhe ZA-së.

Neni 43

Kryetari i KMSH-së së DAR-it dhe ZA-së, pas marrjes në dorëzim të materialeve të provimit, i ruan ato në kasafortë dhe mban përgjegjësi ligjore, individuale, institucionale, sipas dispozitave ligjore në fuqi për ruajtjen e sekretit dhe sigurimin e tyre.

Neni 44

Materialet e provimit tërhiqen me procesverbal në KMSH-në e DAR-it dhe ZA-së nga Përgjegjësi i administrimit të provimit (PAP), në prani të përfaqësuesit të KMSH-së së DAR-it dhe ZA-së që do ta shoqërojë atë, në mëngjesin e ditës së provimit, 2 (dy) orë para fillimit të provimit.

Këta dy persona mbajnë përgjegjësi ligjore, individuale, sipas dispozitave ligjore në fuqi, për ruajtjen e sekretit dhe sigurimin deri në momentin e hapjes së tyre. Kutia me materialet e provimit është përgjegjësi e PAP.

Në zonat rurale koha e shpërndarjes së materialeve të provimit është në varësi të largësisë së mjedisit të provimit nga DAR-i dhe ZA-ja.

Neni 45

45.1 Pas shpërndarjes se testeve nga PAP për çdo administrator provimi (AP), testet e ngelura(te papërdorura) PAP i fut ne zarf dhe i mbyll. Këto teste qëndrojnë ne kasafortën e drejtorisë se shkollës (ose ne ndonjë vend tjetër te sigurte) deri ne përfundim te provimit.

45.2 Pas përfundimit të provimit, administratori i provimit i dorëzon me procesverbal përgjegjësit të administrimit të provimit test-broshurat e plotësuara nga çdo nxënës/kandidat. Përgjegjësi i administrimit të provimit test-broshurat e grumbulluara, testet e papërdorura dhe materialet e tjera te provimit i mbyll ne kuti në kushtet e sigurisë në prani të përfaqësuesit të KMSH-së së DAR-it dhe ZA-së, dhe administratorit-eve të provimit.

45.3 Kutia e mbyllur vuloset nga drejtori i shkollës përkatëse.në rast të grupimit të në një mjedis të nxënësve nga shkolla të ndryshme, përdoret vula e shkollës pritëse.

45.4 Përfaqësuesi i KMSH-së i DAR-it dhe ZA-së dhe përgjegjësi i administrimit të provimit, dorëzojnë në KMSH-në e DAR-it dhe ZA-së me procesverbal kutinë me materialet e provimit.

45.5 Personi i autorizuar nga MASH, ngarkohet edhe me detyra të tjera si koordinator dhe mbështetës i KMSH së DAR dhe ZA, për zhvillimin normal të provimeve të Maturës Shtetërore.

Neni 46

Ditën e provimit, pas përfundimit të provimit, përfaqësuesi i autorizuar me shkrim nga kryetari i KMSH të DAR/ ZA dhe personi i autorizuar nga MASH, kutitë e dorëzuara sipas nenit 46, si dhe materiale të tjera të provimit, i sjellin në AVA.

VI. PROCEDURA E SHPËRNDARJES SË PËRGJEGJËSIT TË ADMINISTRIMIT, ADMINISTRATORËVE TË PROVIMIT DHE TË SEKRETIMIT NË MJEDISET E PROVIMEVE TË MATURËS

Neni 47

47.1 Për mjediset/sallat me mbi 15 nxënës caktohet një administrator provimi për çdo 20-25 nxënës.

47.2 Çdo KMSH e DAR-it dhe ZA-së, pasi merr informacion nga KSHMSH-ja për numrin e nevojshëm të administratorëve të provimeve dhe sekretimit, bën hartën e shpërndarjes së tyre në mjediset/sallat e provimit.

47.3 KMSH e DAR-it dhe ZA-së harton listën emërore për çdo provim të Maturës, të individëve sipas rendit alfabetik, që do të jenë përgjegjës të administrimit, administratorë provimi dhe njëkohësisht listën emërore të administratorëve të sekretimit.

47.4 KMSH-ja e DAR-it dhe ZA-së organizon shortin për shpërndarjen sipas mjediseve të përgjegjësve të administrimit, administratorëve të provimit dhe sekretimit, në ditën e provimit të Maturës, 3 (tre) orë para fillimit të tij.

47.5 KMSH-ja e DAR-it dhe ZA-së vendos me short emrat e mjediseve ku do të zhvillohen provimet.

47.6 Pasi përzgjidhet mjedisi i provimeve, në përputhje me numrin e administratorëve të provimeve dhe sekretimit për ketë mjedis, vendoset vija ndarëse sipas rendit zbritës, në listat emërore të shpallura të përgjegjësve të administrimit të provimit, administratorëve të provimit dhe të sekretimit.

47.7 Në DAR-të dhe ZA-të ku provimet zhvillohen vetëm në një mjedis, përzgjedhja respekton kërkesat e nenit 51.

SOCIALE

Kreu i shëndetësisë kundërshton pr/ligjin që kalon ISKSH-në në varësi të MF-së

Ndoka: ISKSH-ja, s’duhet të varet nga Ministria e Financave

Ministri i Shëndetësisë, Ndoka, ka kundërshtuar dje në Komisionin për Punën, Çështjet Sociale dhe Shëndetësisë projektligjin që parashikon ndryshime në ligjin Nr. 7870, datë 13.10.1994 “Për sigurimet shëndetësore në Republikën e Shqipërisë”, sipas të cilit ISKSH-ja kalon në varësi të Ministrisë së Financave. Kreu i këtij dikasteri u shpreh se, ndryshimi i varësisë së ISKSH-së nga Ministria e Shëndetësisë në atë të Financave nuk garanton përmirësimin e cilësisë së shërbimeve shëndetësore. Sipas tij: “Ky projektligj, vetëm sa minimalizon rolin e Ministrisë së Shëndetësisë, që është përgjegjëse për manaxhimin e politikave shëndetësore në vend. Me logjikën e këtij projektligji, sistemi shëndetësor do të varej plotësisht nga Ministria e Financave, gjë që nuk ka kuptim dhe do të dëmtonte rëndë sistemin shendetësor në vend.” Ndoka theksoi gjithashtu se, në fazën kur shërbimi shëndetësor është i pakonsoliduar dhe kur kujdesi parësor, tashmë financohet nga skema e sigurimeve shëndetësore, duke u manaxhuar nga vetë qendra shëndetësore, ndërrimi i varësisë do të sillte moskoordinim të punës e si rezultat do të influenconte në cilësinë e dhënies së shërbimit.

Sipas tij, ky ligj është zbatuar edhe në vende të tjera si Rumania dhe ka dështuar. Ndërkaq, ministri ka kundërshtuar në komision edhe dhënien e kompetencës për hartimin e listës së barnave një komisioni teknik që emërohet nga Ministria e Financave. “Dhënia e kompetencës për hartimin e listës së barnave një komisioni teknik që emërohet nga Ministri i Financave, i heq Ministrisë së Shëndetësisë, institucionit përgjegjës për sigurimin e shërbimit shëndetësor, mundësinë për të hartuar dhe zbatuar politika për mjekimin dhe kurimin e të sëmurëve, aq më tepër kur skema e sigurimeve shëndetësorë është duke u shtrirë edhe në spitale”, - theksoi ministri Ndoka. Duke shprehur kundërshtimin e tij për projektligjin, ai theksoi se, “ndryshimet në ligjin e sigurimeve shëndetësore në Republikën e Shqipërisë mendojmë të bëhen mbas miratimit të ligjit “Për shërbimin shëndetësor në Republikën e Shqipërisë”, pra kur të jetë përcaktuar edhe mënyra e financimit të sistemit shëndetësor, për të cilin aktualisht po punohet.”

Alketa Alia

Qeveria studentore hap numër llogarie për shërimin e studentes me leuçemi

Duke marrë shkas nga kërkesa për ndihmë e studentës së sëmurë me leuçemi, Besnike Markola, ka reaguar edhe qeveria studentore e Fakultetit të Gjuhëve të Huaja të Universitetit të Tiranës. Nëpërmjet një deklarate drejtuar mediave, studentët kanë kërkuar sensibilizim të opinionit publik, korpusin studentor, biznesmenët, si dhe të gjitha strukturat qeveritare për bashkëpunim sa më ngushtë që shërimi i vajzës 20-vjeçare të jetë sa më i shpejtë. Nëpërmjet kësaj deklarate, ata kanë kërkuar edhe reagimin e qeveritarëve, si ministrit të Arsimit dhe Shkencës, Genc Pollo, ministrit të Shëndetësisë, Nard Ndoka, si dhe atij të Punës dhe Çështjeve Sociale, Kosta Barka, që, sa më shpejt, të ndërhyjnë personalisht për të bërë të mundur sigurimin e mjeteve financiare që do të shpëtonin jetën e bashkëmoshatares së tyre dhe që do t’i risillnin buzëqeshjen familjes dhe miqve të saj. Për t’i ardhur në ndihmë bashkëmoshatares së tyre, ata kanë hapur edhe dy numra llogarie pranë “Raiffeisen Bank” 1.401.666.555 në lekë si dhe 1.400.666.955 në euro, ku biznesmenë të ndryshëm, por edhe kushdo që ka dëshirë, mund të kontribuojnë sadopak, në mënyrë që dita e shërimit për Besniken të jetë sa më e afërt.

A. A.

Së shpejti aplikim elektronik për regjistrimin e pasurive të paluajtshme

Në zyrën vendore të regjistrimit të pasurive të paluajtshme Tiranë po eksperimentohet aplikimi elekronik. Sipas zyrës së informacionit, ky projekt, i cili parashikohet të shtrihet në të gjithë sistemin e regjistrimit të pasurive në shkallë vendi, ka për qëllim shërbimin sa më komod ndaj qytetarëve, shmangien e vonesave, radhëve të gjata, rritjen e shkallës së saktësisë së aplikimeve, shtimin e rendimentit dhe luftën ndaj korrupsionit. Sipas regjistruesit të Tiranës, Fadil Kaloshi, kjo metodë regjistrimi pritet të japë efektet e saj shumë shpejt. Është parashikuar që, në fillim të dhjetëditëshit të dytë të muajit prill, aplikimi me metodën elektronike të nisë në të 15 sportelet e pritjes së qytetarëve që disponon kjo zyrë. Rritjes së cilësisë së shërbimit për qytetarët i ka shërbyer edhe aplikimi i sistemit të dërgimit postar të dokumenteve të pronësisë sipas adresës që lënë vetë qytetarët në ZRPP. Aktualisht, pranë këtyre zyrave çdo ditë kërkojnë informacion apo aplikojnë për dokument pronësie mbi 400 qytetarë.

A. A.

Gjana: Sallami, jo me mish gomari

Ministri i Bujqësisë, Ushqimit dhe Mbrojtjes së Konsumatorit, ka përgënjeshtuar lajmin e disa mediave për një punishte sallami në qarkun e Fierit, e cila përdorte si lëndë të parë mishin e gomarit. Hapja e këtij paniku ka bërë që për inspektim të menjëhershëm të shkojë vetë ministri Gjana, i cili ka theksuar se nuk ka asnjë konfirmim nga policia lidhur me këtë çështje. Vetë drejtuesit e rendit atje kanë përgënjeshtruar, po dje, publikisht, mashtrimin e bërë. Në komunikatën e lëshuar me këtë rast thuhet se, “nga seksioni i luftës kundër krimit ekonomiko-financiar nuk ka nisur asnjë hetim lidhur me skandalin e cituar për përdorimin e njëthundrakëve për prodhimin e sallamit, pasi nuk ka asnjë informacion për përdorimin e këtij mishi nga fabrika të ndryshme sallami”. Sipas ministrit, kjo ka bërë që të mblidhet me urgjencë gjithë inspektoriati veterinaro-sanitar i Fierit dhe nga gjithë informacioni për monitorimin e situatës nuk ka rezultuar asnjë abuzim i tillë. Me këtë rast, Gjana theksoi se, asnjë bllof “me mish gomari” nuk do të mund të përdoret si tymnajë për të humbur vëmendjen ndaj evazioneve të kafesë dhe serisë së evazioneve fiskale të ndonjë grupi informal interesi. Strukturat e MBUMK-së kanë penalizuar disa herë kompani fierake për mosrespektim të standardeve të sigurisë ushqimore. Gjana tha se, toleranca ndaj këtyre kompanive vazhdon dhe do të vazhdojë të jetë e ashpër vetëm në zbatim të ligjit. Por, edhe në këtë rast, askush nuk do të mund të krijojë dritëhije me “mish njëthundrakësh”, për të mbuluar apo humbur gjurmët e mosrespektimit të standardeve apo falsifikimin e certifikatave të origjinës për produktet e konsumit.

A. A.

RETHE

Gjykata refuzon masën e sigurisë për Adem Rrengën

LIBRAZHD- Gykata e rrethit gjyqësor të Librazhdit ka refuzuar mesditën e djeshme kërkesën e prokurorisë së këtij rrethi, për caktimin e masës së sigurisë për shtetasin Adem Rrenga, ish-kryetar i Degës së Tatim-Taksave të rrethit të Librazhdit. Kryetari i kësaj gjykate, Qemal Zaimi, ka deklaruar për përfaqësuesit e medias, të cilët ishin në pritje të zhvillimit të seancës gjyqësore, ku do të bëhej masa e vlerësimit të masës së sigurisë së kërkuar nga prokuroria se, nuk kishte një seancë të tillë për t’’u zhvilluar në këtë institucion të drejtësisë. Organi i prokurorisë së rrethit të Librazhdit, në bazë të një denoncimi të bërë nga administratori italian i firmës “Libadeko”, i kishte kërkuar gjykatës së Librazhdit që të caktonte masën e sigurisë për shtetasin Adem Rrenga. Ai, sipas prokurorisë, akuzohej për konsumimin e veprës penale “shpërdorim detyre”, të parashikuar nga neni 248 i Kodit të Procedurës Penale. Prokuroria i kërkonte gjykatës që, në bazë të ligjit, të caktonte një masë e sigurisë personale të karakterit të ndërmjetëm për pezullim të ushtrimit të detyrës, që kryen, aktualisht, Adem Rrenga, gjë që sipas prokurorisë parashikohet në nenin 242 të Kodit të Procedurës Penale. Por, pas seancës së djeshme, që është refuzuar nga gjykata, kërkesa e prokurorisë së Librazhdit për caktimin e masës së sigurisë ndaj shtetasit Adem Rrenga mbetet e papërfillur. Këtë e ka konfirmuar dje në një prononcim të bërë për mediat edhe kancelari i gjykatës së Librazhdit, z. Fatmir Duro.

Suela Azemi

Ndërmarrja italiane është rimbursuar dy herë nga qeveria

“LIBADEKO”, përvetësoi 400 milionë lekë të sigurimeve shoqërore

Në periudha të veçanta kohe, ndërmarrja italiane “Libadeko” është rimbursuar dy herë nga ana e qeverisë, me nga 200 milionë lekë (të vjetra), për të shlyer sigurimet shoqërore, gjë që nuk e ka bërë…

ELBASAN-Ndërmarrja italiane “LIBADEKO”, aktvitetin e saj në Librazhd e ka filluar në vitin 1992. Sipas të dhënave të nxjerra nga Dega e Tatim-Taksave të rrethit të Librazhdit rezulton se kjo ndërmarrje është rimbursuar nga fondi i buxhetit të qeverisë shqiptare dy herë, rimbursim ky i realizuar në periudha të veçanta kohore me 20 nga milionë lekë, pra me gjithsej 400 milionë lekë (të vjetra). Ky fond, pjesë e buxhetit të shtetit, apo e thënë më shqip, që është pjesë e taksapaguesve shqiptarë, i është dhënë ndërmarrjes “LIBADEKO” për të paguar detyrimet e sigurimeve shoqërore të punëtorëve, të cilët i ka patur të punësuar. Mirëpo, ka ndodhur ajo që drejtuesit e kësaj ndërmarrjeje i kanë marrë paratë e shtetit, i kanë futur në xhepat e veta dhe nuk i kanë derdhur sigurimet shoqërore për punëtorët që ka patur në punë. Sipas drejtuesve tatimorë, deri tani, nga 68 milionë lekë që ka patur ndërmarrja, ka likujduar një pjesë dhe ka për të shlyer ende edhe 4.1 milionë lekë. Gjithashtu, po kjo ndërmarrje ka borxhe për t’iu kthyer dhe të tretëve, si firmës “Sinani” SH.P.K. Bankës Amerikane dhe disa subjekteve të tjera. Sipas një shkrese të zyrës së përmbarimit, ndaj ndërmarjes “LIBADEKO” është ndërmarrë masa e sekuestros konservative për llogari të Bankës Amerikane, mbasi ky subjekt ka marrë në këtë institucion bankar rreth 250 mijë dollarë. Për moskthim të borxheve asaj i është bllokuar aktiviteti. Ndërkohë, nga ana e sigurimeve shoqërore deklarohet se, ndërmarrja “LIBADEKO” ka patur të punësuar me karta të rregullta 23-28 punëtorë të siguruar dhe jo 80 vete, siç kanë publikuar në disa media dhe organe të shtypit drejtuesit e “arratisur” të saj. Gjithashtu, në një shkresë zyrtare të drejtorit të Sigurimeve Shoqërore, Rexhep Hana, kjo ndërmarrje figuron debitore për mosderdhjen e detyrimeve për jo pak punëtorë, ndërkohë që ka rezultuar se, për tre punëtore ka irmosur një dokument sikur u ka derdhur sigurimet shoqërore, ndërkohë ato nuk janë derdhur.

Policia kërkon ndihmën e komisariateve të tjera

Aksidenti, vdes njeriu i paidentifikuar

LEZHË-Një aksident i rëndë automobilistik është shënuar rreth orës 22:45 minura, të ditës së djeshme, në superstradën Lezhë–Shkodër. Për pasojë, një person ka mbetur i vdekur në vend, ndërkohë që drejtuesi i mjetit ka lajmëruar polcinë për aksidentin e shkatuar, duke u vetëdorëzuar. Trupi pajetë i të aksidentuarit është dërguar në spitalin e Lezhës, në pritje të indentifikimit. Sipas policisë, aksidenti ka ndodhur, ndërsa 49-vjeçari E. Molla, nga lagjja “Dobrash” e qytetit të Shkodërës ka qenë duke udhëtuar me një kamion tip “Benz Mercedez”, me traga SH. 37 06 C dhe ka përplasur një person, që ishte duke ecur në drejtim të kishës së Lezhës, duke i shkatuar vdekjen e menjëhershme. Pas aksidentit, vetë Molla ka lajmëruar policinë, e cila brenda tri minutave ka mbërritur në vendin e ngjarjes, duke prangosur drejtuesin e mjetit aksidentues, i cili është shoqëruar në komisariatin e policisë së Lezhës. Policia ka kryer edhe ekspertizën e vendit të ngjarjes, ndërkohë që nuk ka mundur të gjejë asnjë dokument indentifikimi të personit të aksidentuar. Më pas, viktima është dërguar në morgun e spitalit të Lezhës, në pritje për t’u indentifikuar. Policia sqaroi se viktima i përket seksit mashkull dhe mendohet të mos jetë banor i zonës. Kjo e ka detyruar policinë të kryejë njoftimet në të gjitha komisariatet e vendit, për të bërë të mundur indetifikimin e kufomës.

Gjon Marku

Bie nga pema, gjen vdekjen e menjëhershme

MIRDITË- Mark Gj. Gjikola, 52 vjeç, nga fshati Kurbnesh i komunës së Selitës, ka humbur jetën rreth orës 11:00, të ditës së djeshme. Ngjarja e rëndë ka ndodhur në bahçen e ti,j kur ai po tentonte të krasiste një pemë. Mësohet se Gjikola ka hipur në pemë dhe pasi ka krasitur një pjesë të saj është shembur përdhe. Rënia e tij ka qenë mjaft e fortë dhe nga përplasja në gardhin që qarkonte kopshtin i ndjeri ka pësuar goditje fatale. Të afërmit e tij i janë gjendur menjëherë pranë për t'i dhënë ndihmen e parë, por kjo ka qenë e kotë, pasi ai kishte ndërruar jetë menjëherë. Ende nuk është e qartë nëse Gjikola kishte humbur ekulibrin gjatë qëndrimit në pemë, apo kishte pësuar ndonjë infarkt të papritur dhe më pas është shembur në tokë. Kjo, sepse M.Gjikola ka punuar gjithnjë nën tokë, në minierën më të helmët në Shqipëri dhe për pasojë, prej vitesh, vuante nga sëmundja e rëndë dhe e pashërueshme e silkozës.

Gjon Marku

Vidhet makina e policit special

VLORË-Një makinë e tipit “Renault” është vjedhur gjatë natës së të dielës, ndërsa gjendej e parkuar përpara njërit prej pallateve të qytetit të Vlorës. Makina ka qenë pronë e një polici të repartit special, por duket se kjo nuk i ka trembur aspak hajdutët e natës. Sipas informacioneve nga vendi ku është vjedhur makina, polici special, ashtu si çdo natë, e kishte parkuar makinën përpara pallatit ku banonte në lagjen “Rilindja”. Në mëngjes, ai ka konstatuar se makina nuk ishte atje ku e kishte parkuar dhe pas kësaj ka kuptuar se ia kishin vjedhur. Menjëherë, ai ka lajmëruar në komisariatin e policisë dhe agjentët antikrim kanë nisur kërkimet për të rënë në gjurmët e hajdutëve. Për këtë, ata kanë marrë parasysh disa dyshime që kishte vetë polici special për disa persona të njohur në zonë si hajdutë. Deri në mbasditen e ditës së hënë nuk ka patur asnjë informacion në lidhje me gjetjen e makinës, apo të hajdutëve, ndërkohë që, vetëm pak ditë më parë, policia ka kapur vetëm dy orë pasi kishte vjedhur një makinë, një tjetër hajdut makinash.

E.Alushi

I ati e përdorte medikamentin “Tagretol”, pasi vuante nga nervat

Vetëhelmohet me ilaçet e babait

Vajza ka marrë një dozë, gjashtë herë më të lartë sesa duhet, kurse mjekët thanë se, për të realizuar vetëvrasjen mjafton të përdoren deri në dy tableta për fëmijët dhe deri në katër për moshat e rritura….

KORÇË-Një vajzë 20-vjeçare, banore në fshatin Bitinckë, të rrethit të Devollit tentoi të helmohet, pasi ka përdorur një mbidozë të ilaçeve të babait të saj, i cili i përdorte ato si qetësues. Burime të drejtorisë së policisë thanë se, janë njoftuar nga spitali civil i Korçës, sepse atje kishte mbërritur në gjendje tepër të rëndë një 20-vjeçare, pasi ishte helmuar nga përdorimi i ilaçeve të babait të saj, në sasinë gjashtë herë më të lartë se doza ditore që merrte i ati. Pasi ka gjetur 20 kokrrat e qetësuesve, vajza i ka konsumuar të gjitha njëherësh, me qëllimin për t’i dhënë fund jetës. Mjekët thanë se, për të realizuar vetëvrasjen mjafton që nga ai medikament të përdoren deri në dy tableta për fëmijët dhe maksimumi deri në katër për moshat e rritura. Sipas burimeve të policisë, gjendja shëndetësore e 20-vjeçares me inicialet Xh. B., nuk ka qenë e mirë. Ka qenë mesdita, kur prindërit e kanë gjetur në gjendje të rëndë vajzën, të cilën e kishin lënë në shtëpi, pasi vetë kishin qenë në qytetin e Bilishtit si ditë pazari që ishte. Ata kanë lajmëruar një të afërmin e tyre me automjet dhe pasi e kanë nxjerrë nga shtëpia i janë drejtuar spitalit të Korçës, duke e ditur se, për raste të helmimeve nuk mund të ndërhyhet në spitalin civil të Bilishtit. Në spital, ata kanë arritur në orën 15:00. Mjekët e urgjencës, pasi kanë konstatuar se kishin të bënin me një rast të vetëhelmimit kanë njoftuar policinë, e ndërkohë kanë nisur punën për t’i dhënë ndihmën e parë mjekësore të dëmtuarës. Ende mbetet në gjendje kritike jeta e pacientes, megjithë kujdesin dhe mjekimin specifik që po përdorin mjekët e spitalit të Korçës.

Ndërkohë është ngritur menjëherë grupi i ekspertëve për të hetuar rreth shkaqeve të këtij veprimi vrasës, i cili ka konstatuar se 20-vjeçarja Xh. B, kishte konsumuar 20 kokrra ilaç qetësues, të cilin e përdorte babai i saj. Lloji i ilaçit të përdorur ka qenë “Mdoohemiet” ose i quajtur ndryshe “Tegretol”. Këtë ilaç, vajza e ka marrë në banesën e saj, në fshatin Bitinckë, ndërsa i ati e përdorte nga që vuante prej kohësh nga një sëmundje nevore dhe kurohej me këtë lloj ilaçi. Policia tha se, 20-vjeçarja ka tentuar dhe më parë që të vetëvritet, por ka shpëtuar falë zbulimit në kohë dhe dhënies së ndihmës nga prindërit dhe të afërmit e saj.

Seldi Hasanasi

Banorët në panik, braktisin banesat

Tërmeti trondit Elbasanin

ELBASAN-Një tërmet i fortë ka shkundur mëngjesin e djeshëm rajonin e Elbasanit, duke shkaktuar një panik të madh te banorët, të cilët kanë braktisur ambientet ku ndodheshin me një shpejtësi të rrufeshme. Epiqendra e këtij tërmeti, sipas shërbimit sizmik mendohet se ka qenë në fshatin Benë të zonës së Shmilit, 17 km në verilindje të qytetit të Elbasanit. Tërmeti i fortë është regjistruar në orën 09:38 minuta dhe ka zgjatur disa sekonda. Lëkundjet e tij kanë qenë të frikshme, jo vetëm për ata që gjendeshin në katet e larta të banesave shumëkatëshe, por edhe në ato të kateve të ulëta. Në shkolla e kopshte, nxënësit janë nxjerrë jashtë, duke pezulluar përkohësisht mësim, ndërkohë që, po kështu ka ndodhur edhe me administratën në zyrat e shtetit. Paniku i krijuar nga lëkundjet e tërmetit të paradites ka vazhduar gjatë gjithë kohës. Në disa shkolla, në të cilat godinat janë të amortizuara, mësimi nuk ka vijuar, pasi rreziku i shembjes së tyre sipas mësuesve e nxënësve është evident. Fatmirësisht, nga lëkundjet e regjistruara gjatë të hënës nuk ka patur dëme të mëdha materiale apo dëme në njerëz. Zyra e Shtabit të Emergjencave në prefekturën e qarkut të Elbasanit ka bërë të ditur se, dëmet janë të papërfillshme, ndërsa burime jozyrtare flasin për dëme serioze në disa objekte. Më problematike situata paraqitet në shkollën e fshatit Katund i Ri, ku tërmeti i paradites së të hënës ka shkaktuar plasaritjen e mureve dhe dëmtim të katit të dytë të saj, i cili dukshëm është tejet i rrezikshëm për jetën e nxënësve edhe pa patur lëkundje tërmeti. Soleta e dy klasave të katit të dytë të kësaj shkolle në mënyrë të pabesueshme mbahet mbi direkë druri të vendosur në mesin e klasave, jashtë të gjitha kushteve të sigurisë. Në këtë shkollë, ashtu sikundër edhe në atë të Kuqanit, Benës e në ndonjë tjetër nuk është zhvilluar mësimi, për shkak të rrezikut real që ato paraqesin për jetën e nxënësve. Gjatë viteve të fundit, rajoni i Elbasanit është prekur shpesh nga lëkundjet zizmike, sidomos gjatë verës së vitit 2004 dhe vitit 2005, ku gjatë ditës rregjistroheshin mëse 10 lëkundje të forta.

Suela Azemi

Tërmeti i rremë lemeris lezhianët

Policia qetëson banorët e tronditur

LEZHË-Frika e një tërmeti ka terrorizuar banorët e qytetit të Lezhës, mijëra prej të cilëve kanë lënë banesat, duke dalë në rrugët e qytetit verior. Lajmi i rremë, i përhapur që në orën 10:00 të parditës së ditës së djeshme ka shkaktuar panik, jo vetëm tek shkollat e qyteit, por edhe tek insitucionet vendore, punonjësit e të cilave kanë braktisur zyrat dhe kanë dalë jashtë ambienteve. Kjo ka bërë që nxënësit të përhapin lajmin kudo, duke bërë që qyteti të jetonte vërtet një terror psikologjik. Por, fatmirësisht, lëkundjet e tërmetit, thuajse nuk janë ndjerë fare në Lezhë. Kjo ka bërë që policia të mobilizohej e tëra dhe të shikonte në çdo shkollë të qytetit për të qetësuar mësuesit dhe nxënësit, të cilët i ka garantuar se nuk do të kishin probleme. Por, nuk ka mjaftuar qetësimi i orës dhjetë, pasi sërish një lajm tjetër, sipas të cilit në orën 14:00 Lezha do të ishte epiqendra e një tërmeti të fuqishëm, ka alarmuar banorët, të cilët sërish në ankth kanë lënë shtëpitë e tyre. Edhe këtë herë ka qenë policia që i ka qetësuar me një tjetër njoftim dhe duke vendosur pankarta.

Vihen në pranga tre bullgarë falso

POGRADEC-Tre shtetas maqedonas janë vënë në pranga nga policia kufitare e Qafë-Thanës, pasi janë paraqitur aty për të hyrë në Shqipëri me pasaporta të falsifikuara, duke u prezantuar si shtetas bullgarë. Veç pasaportave të falsifikuara, ata kishin të falsifikuara dhe lejet e drejtimit të automjeteve me të cilat udhëtonin për të hyrë në vendin tonë nga kjo portë hyrëse. Burime të policisë thanë se, janë arrestuar në flagrancë: Inseinferit Nuresku, 33 vjeç, Fikret Alitoski, 35 vjeç dhe Sabit Zefkovski, 54 vjeç, që të tre shtetas maqedonas. Arrestimi i tyre është bërë, pasi janë kapur në Qafë-Thanë, për të hyrë në Shqipëri, duke paraqitur pasaporta bullgare dhe leje drejtimi të automjeteve të fallsifikuara. Të tre maqedonasit e arrestuar po hetohen nga prokuroria e Korçës për falsifikim të dokumenteve. Arrestimi i tyre është bërë në orën 23 e 45 minuta të një dite më parë.

S. Hasanasi.

Grabiti kambistin, arrestohet

ELBASAN-Forcat e policisë ndaluan dje një shtetas, i cili akuzohet për vjedhje të një personi. Burime zyrtare nga policia lokale thanë se ngjarja ka ndodhur dje rreth orës 11.00 në qytetin e Elbasanit, ku kambistit Ramazan Rama, lindur e banues në lagjen “Beqir Dardha”, i kanë vjedhur me dhunë, sapo ka dalë nga makina e tij, një shumë parash prej 10 milionë lekësh. Shtetasi Bujar Shega, banor i rrethit të Peqinit, ortak me Ramën, u identifikua si autor i kësaj vjedhjeje, ndërkohë që është ndaluar pak kohë më pas. Burimet policore thanë se, aktualisht, Shega po merret në pyetje nga specialistët për të zbuluar shkaqet e ngjarjes. Mësohet se Shega dhe Rama, prej kohësh kanë qenë ortakë, pasi kryenin të njëjtin biznes, këmbimin e parave.

S.Azemi