arkiva

Seksionet

•Home

•Editorial

•Politika

•Speciale

•Kronika

•Intervista

•Komente

•Opinion

•Aktualiteti

•Rajoni

•Bota

•Ekonomi

•Reportazh

•Rrethe

•Kultura

•Sporti

•Forum

•Dossier

•Sociale

•Arkiva

•Tema E-mail

Lidhje

•Deutsche Welle

•BBC Shqip

•Zeri i Amerikes

•EDSH

•Rilindja Demokratike

•Besnik Aliaj

•Zeri Yt

Shtypi i Huaj

•New York Times

•The Washington Times

•The Times

•Independent

•Guardian

•Frankfurter

•Corriere della Sera

•Il Giornale

•Le Figaro

•Le Monde

Drejtor Mero Baze

ARKIVA

EDITORIAL

Pesëdhjetëvjetori i një suksesi

Majlinda Bregu

Sot, BE-ja mbush 50 vjeç. Ky moment shënon përvjetorin e Traktatit të Romës, zanafilla e një bashkimi që zgjerohet vazhdimisht. Nga një klub ekonomik, me 6 shtete, BE-ja është rritur këto 50 vjet duke u bërë një entitet politik me 27 shtete anëtare, 500 milionë banorë dhe përbën bllokun më të madh tregtaro-ekonomik në botë. Vërtet Bashkimi Evropian është 50 vjeç, por Evropa jo. Pjesa më e madhe e literaturës së fundit mbi integrimin evropian, si dhe mbi historikun e Bashkimit Evropian thotë se shtytja drejt krijimit të një bashkimi të shteteve evropiane ka filluar pas Luftës së Dytë Botërore.

Shqipëria jonë është pjesë e Evropës si një realitet gjeo-politik, por akoma nuk është anëtare e Bashkimit Evropian. Në fillim të viteve `90-të, të bindur se Bashkimi Evropian ishte përgjigjja më e mirë për ëndrrat dhe aspiratat e rinisë dhe intelektualëve, parulla “E duam Shqipërinë si gjithë Evropa”, kishte tagrin e një të drejte historike, të mohuar dhunshëm për vite të tëra nga një klikë që për interesa të pushtetit të saj synoi për rreshtimin në anën tjetër të bllokut dhe vetminë politike e ekonomike të vendit.

Kanë kaluar shumë kohë që nga vendosja e marrëdhënieve diplomatike Shqipëri-Komuniteti Ekonomik Evropian më 1991-shin, ku shpresa dhe këmbëngulja e shqiptarëve “u lodh” nëpër labirinthet historike, politike, institucionale, ekonomike, kulturorë. Po rruga e gjatë u bë me krye, në qershorin e kaluar, ku në Luksemburg, në Këshillin e Çështjeve të Përgjithshme dhe Marrëdhënieve me Jashtë, u nënshkrua marrëveshja e Stabilizim-Asocimit dhe marrëveshja e Përkohshme për Bashkëpunimin Tregtar.

Zbatimi i marrëveshjes së Stabilizim-Asocimit (MSA) dhe sidomos integrimi i Shqipërisë në BE nënkupton mirëqeverisjen, forcimin e shtetit ligjor dhe institucioneve, efektivitetin e tyre në luftën ndaj krimit dhe korrupsionit, forcimin e kapaciteteve administrative. Duke adoptuar politikat e BE-së për çështjet sociale, si dhe për shkak të tregtisë së lirë, do të ketë një cilësi më të lartë të jetës së qytetarëve. Përgjithësisht, integrimi në një ekonomi të hapur e të madhe me afërsi gjeografike sjell një rritje më të shpejtë ekonomike dhe rritje të standardeve të jetesës.

Për shkak të rritjes së shkëmbimeve tregtare me BE-në, reduktohet mundësia e firmave për të patur monopolin e vendosjes së çimeve, ndërsa konsumatori ka shumë më tepër mundësi në zgjedhjen e mallrave dhe shërbimeve. Mbështetur në sa më lart, integrimi nënkupton krijimin e një realiteti të ri që sjell rritje të mirëqenies së konsumatorit shqiptar.

Biznesit shqiptar i ofrohet një perspektivë me një hapësirë tjetër, pasi jo vetëm bëhet pjesë e një tregu prej afro 500 milionë konsumatorësh, por duke qenë i nxitur të rrisë cilësinë e prodhimeve dhe sistemin e marketingut, do të operojë lehtësisht në gjithë hapësirën evropiane, falë të njëjtit kuadër ligjor me BE-në dhe të njëjtave standarde të certifikuara, duke gëzuar kështu vlerat e konkurrueshmërisë së drejtë.

Eliminimi i barrierave në transferimin e teknologjisë do të sjellë rritjen e aksesit për kompanitë shqiptare në teknologjitë e përparuara, evropiane, në sferën e kërkim-zhvillimit për përmirësimin e cilësisë e dizajnit të produkteve, në funksion të përmirësimit të produktivitetit dhe të përballimit të konkurrencës.

Barrierat bien vazhdueshëm edhe përsa i përket lëvizjes së lirë të qytetarëve. Zbatimi i MSA-së synon një lëvizje të lirë të studentëve, me qëllim rritjen e nivelit të përgjithshëm, arsimor dhe atë profesional. Prioritet për sistemin e lartë, arsimor është përmbushja e objektivave të Deklaratës së Bolonjës. Njëkohësisht, zbatimi i MSA-së parashikon dhe ofron mundësinë për lehtësimin dhe akses më të madh për trajnime profesionale.

Synimi i Shqipërisë për t’u anëtarësuar në BE, është një rrugë me sfida, përballimi i të cilave kërkon jo vetëm detyrim e angazhim politik, institucional, por dhe mirëkuptim dhe ndarje të qartë të punëve që nuk mund të realizohen pa një kosto. Hyrja graduale në tregun e konkurrencës së përbashkët, evropiane nëpërmjet zbatimit të marrëveshjes se Përkohshme, ashtu sikundër ishte parashikuar, sjell mjaft vështirësi, që shkojnë nga nevoja për ristrukturimin e ekonomisë, deri te domosdoshmëria e modernizimit të institucioneve, të bizneseve, të teknologjisë së prodhimit, të standardeve e të infrastrukturës që lidhet me to. Përkundër zgjidhjes së sfidave të veta, Shqipëria do të mund të përballet në të ardhmen si pjesë e Bashkimit Evropian me sfidat e shekullit 21; globalizmin, konkurrueshmërinë dhe rritjen e qendrueshme, solidaritetin politik, furnizimin me energji, ndryshimet klimatike dhe sigurinë.

Megjithatë, vetë historiku i Bashkimit Evropian që është në vëmendjen tonë sot, na jep forcë dhe shpresë. Mjaft të kujtojmë 50 vjet më parë, një Evropë të ndarë e të ngërthyer prej ankthit të Luftës së Ftohtë, mosbesimeve dhe dyshimeve shekullore. Pikërisht atëherë, gjashtë vende evropiane (Belgjika, Franca, Gjermania, Italia, Luksemburgu, Holanda) gjetën dialogun në vend të hakmarrjes, kërkuan mirëqeverisjen në vend të gjuhës së armëve, thirrën arsyen e lanë mënjanë pasionin, duke firmosur Traktatin e Romës, për të krijuar një shembull të shkëlqyer të një demokracie transnacionale. Bashkimi Evropian sot, më shumë se një treg i përbashkët, është bartës i paqes për 500 milionë shtetasit e tij. Ja ku jemi – ëndrra e Monnet u bë realitet – asnjë evropian i ri sot, nuk ndjen frikën e një lufte të mundshme në Evropë. Kjo më bën të besoj fort se edhe ëndrra e shqiptarëve do të bëhet realitet. Ndërkohë që qeveria shqiptare është e angazhuar maksimalisht që shndërrimi i kësaj ëndrre në realitet të ndodhë sa më shpejt.

Zgjidhja më e mirë kundër së keqes

Dashnor Kokonozi

Zëra profetikë

Më 21 gusht 1849-të, gjatë një Kongresi të paqes, Viktor Hygo do të mbajë një fjalim, që kur e lexon sot, nuk mund të mos mendosh se ide të tilla mund të formuloheshin asisoj vetëm nga një mendje gjeniale. Ja një paragraf i tij: Do të vijë një ditë, kur topat do t`i vënë nëpër muzeume, sikundër kanë vënë sot, instrumentet (mesjetare) të torturës, duke u habitur se, përse janë dashur! (Të qeshura dhe të lumtë! shënohet në proces verbalin e rastit). Do të vijë një ditë, kur do të shihen dy grupe të mëdha, Shtetet e Bashkuara të Amerikës dhe Shtetet e Bashkuara të Evropës (duartrokitje) të vendosura përballë njëra-tjetrës, duke zgjatur duart përmbi detrat, duke këmbyer prodhimet e tyre, artet e tyre, gjenialitetin e tyre.... etj.

Më 9 shtator 1949-të, gjatë një fjalimi në Zyrih të Zvicrës, U. Çërçilli do të thotë: “Neve na duhet një ilaç që si me magji t`i shndërronte tërësisht rrethanat në pak vjet, duke e bërë Evropën po aq të lirë e të lumtur sikundër është sot Zvicra… Ne duhet të ndërtojmë Shtetet e Bashkuara të Evropës”.

Ideja tij ishte “ndërtimi i një familjeje evropiane dhe pajisja e saj me një strukturë që ta lejojë atë të jetojë dhe të rritet në paqe", që së pari, do të konkretizohet me krijimin e Këshillit të Evropës.

Në fillim ishte mosbesimi

Dy luftëra botërore kishin qenë më se të mjaftueshme për të bindur opinionin evropian se vullneti i mirë për paqe në të ardhmen nuk mjaftonte. Edhe një kontroll i ndërsjellët i industrive dhe lëndëve strategjike për prodhimin e armëve nuk do të kishte qenë i tepërt. Për këtë në fillim u nënshkrua në Paris një traktat që krijonte Komunitetin evropian të çelikut dhe qymyrit. Këtu veçohen veçanërisht emrat e dy burrave të shquar, Robert Shumanit, ministër francez i Punëve të Jashtme dhe Zhan Monesë, (Komisar i Planit).

"Bashkimi i kombeve evropiane, - thotë Shumani në një deklaratë tashmë të famshme të 9 majit 1950-të, - kërkon që kundërvënia shekullore midis Gjermanisë dhe Francës të zhduket". Duket se ishte gjetur zgjidhja me e mirë për t`iu kundërvënë luftërave të reja.

Për këtë qëllim, do të përpunohet ideja e krijimit të një Autoriteti të Lartë që do të kontrollonte prodhimin franko-gjerman të qymyrit dhe çelikut. Kjo deklaratë, për hartimin e së cilës kishte punuar edhe Zhan Mone, një personalitet tjetër, francez, autodidakt, është parë si ideja organizuese e Evropës së sotme.

Ndërkohë, një mendim i tillë do të gjejë përkrahës të mëdhenj te Konrad Adenhauri, i pari kancelar i Gjermanisë së pasluftës, i Alçide de Gasparit, edhe ky kryeministër i parë i Italisë së pasluftës etj.

Me dosjen që do të zgjerojë rrethin e vendeve evropiane që duan t`i bashkohen idesë evropiane që ka lindur në Paris, do të merret P. H. Spak, ish-kryeministri belg. Atij i njihen merita të jashtëzakonshme dhe një punë kolosale, që u kurorëzua me firmosjen më 25 mars 1957-të, të Traktatit të Romës. Në këtë datë thuhet se lindi Tregu i Përbashkët dhe Euroatomi.

Vendet e para, firmatare ishin gjashtë: Belgjika, Luksemburgu, Italia, Holanda, Franca dhe (ish) Gjermania Federale.

Vënia në jetë e vendimeve të marra do të fillojë më 1958-tën, kur në Bruksel do të instalohen institucionet e reja, evropiane.

Evropa e të Gjashtëve do të marrë fund vetëm më 1973-shin, kur asaj do t`i bashkohet edhe Anglia, Danimarka e Irlanda. Viti 1981 do të shënojë hyrjen në të të Greqisë, ndërsa Spanja dhe Portugalia do të presin 1 janarin e vitit 1986-të. Listës së vendeve anëtare të Bashkimit Evropian më 1995-sën do t`i shtohet Austria, Suedia e Finlanda, ndërkohë që po në dhjetor të atij viti do të merret vendimi për futjen në qarkullim më 1999-tën, të monedhës së përbashkët evropiane, euros.

Marshi i zgjerimit do të vazhdojë me aderimin më 2004-trën të Letonisë, Estonisë, Lituanisë, Polonisë, Çekisë, Sllovakisë e Sllovenisë, për të bërë një hap tjetër më 2007-tën me pranimin e Bullgarisë dhe Rumanisë.

Kufijtë e Evropës

Në një intervistë të dhënë kohët e fundit, ish-kryetari i Parlamentit Evropian, José Maria Gil Robles, vë disi në dyshim aftësitë absorbuese të Bashkimit Evropian: “Ajo i ka mbërritur caqet e saj”, - thotë ai. Është pak e mundshme që ajo që ajo të njohë zgjerime të reja, të mëdha. Përsa i përket vendeve të Ballkanit, ato një ditë do të jenë pjesë e Bashkimit, për shkak të protektoratit të Evropës në këtë zonë. Përsa i përket Turqisë, gjithçka do të varet nga aftësia që do të ketë për të homogjenizuar popullsinë e saj e të respektojë të Drejtat e Njeriut. Sa kohë që këto nuk janë plotësuar, asaj i duhet të presë.

SOCIALE

Ministria e Mjedisit thotë se, pas 2009-ës nuk do të lejohet më përdorimi i naftës D2

Makinat e vjetra, në 2009-ën, jashtë përdorimit

Statistikat tregojnë se, në vendin tonë qarkullojnë çdo ditë rreth 300 mijë automjete, 80 për qind e të cilave përdorin lëndë djegëse diezel, pa anashkaluar faktin se, numri më i madh i tyre janë mjaft të amortizuara

Alketa Alia

Të gjitha mjetet që punojnë me benzinë me plumb dhe me naftë të tipit D2, në në të gjithë vendin, do të dalin jashtë përdorimit më 1 janar të vitit 2009. Sipas vlerësimit të ekspertëve të mjedisit dhe studimeve të kryera, ndër faktorët që lidhen me këtë veprimtari, vend të veçantë zë cilësia dhe standardet e karburanteve të përdorura nga automjetet. Statistikat tregojnë se, në vendin tonë qarkullojne çdo ditë rreth 300 mijë automjete, 80 për qind e të cilave përdorin lëndë djegëse diezel, pa anashkaluar faktin se, numri më i madh i tyre janë mjaft të amortizuara. Sipas Ministrisë së Mjedisit, cilësia e lëndëve djegëse të përdorura deri tani, me përmbajtje të lartë squfuri, ka sjellë shqetësime tek qytetarët, duke u bërë burim sëmundjesh dhe kërcënuar jetën e tyre. Ky fakt, sipas tyre, bëhet edhe më i prekshëm duke iu referuar shifrave. Vetëm vitin e kaluar, në vendin tonë janë importuar 289 253 tonë lendë djegëse diezel dhe 54734 tonë benzinë, ku siç dihet, përmbajtja e squfurit është disa herë më e lartë se standardet e Bashkimit Europian. Pikërisht, duke marrë shkas nga ky shqetësim i përditshëm për cilësinë e ajrit urban dhe ndotjen e krijuar nga cilësia e ulët e lëndëve djegëse, Ministria e Mjedisit, Pyjeve dhe Administrimit të Ujërave hartoi projektvendimin “Për cilësinë e lëndëve djegëse, benzinë dhe diezel”, që u miratua në Këshillin e Ministrave. “Ky është një hap i rëndësishëm për përmirësimin e situatës mjedisore”, - theksoi ministri i Mjedisit, Pyjeve dhe Administrimit të Ujërave, Lufter Xhuveli, në konferencën e djeshme. Sipas këtij vendimi, në territorin e Republikës së Shqipërise lejohet vetëm tregtimi i benzinës pa plumb dhe që plotëson kërkesat e përcaktuara në rregulloret dhe standardet përkatëse.

Masat

Nga 1 janari 2009, përmbajtja e squfurit në lëndën djegëse për motorat diezel ulet gati 6 herë (nga 2000 mg/kg që është sot në 350 mg/kg). Nga 1 janari i vitit 2011, përmbajtja e squfurit në lëndën djegëse për motorat diezel ulet 35 herë të tjera (nga 350mg/kg në 10 mg/kg) dhe standardet shqiptare të lëndëve djegese përputhen me ato të Bashkimit Europian. Ekspertët dhe specialistët e Ministrisë së Mjedisit, Pyjeve dhe Administrimit të Ujërave, në punën për hartimin e projektvendimit, të miratuar tashmë në Këshillin e Ministrave, “Për cilësinë e lëndëve djegëse, benzinë dhe diezel”, përcaktojnë specifikime teknike në lidhje me kushtet shëndetësore dhe mjedisore për lëndët djegëse që duhet të përdoren për automjetet. Sipas vendimit të Këshillit të Ministrave, nëse, pas datës 1 janar 2009 evidentohen subjekte që tregtojnë lëndë djegëse me parametra jo të lejueshme, atëherë lënda djegëse sekuestrohet. Sipas ligjit është Inspektorati Qendror Teknik, ai i cili do të përcaktojë më vonë destinacionin e lëndës djegëse të sekuestruar.

Afatet kohore

Afatet kohore të përcaktuara në vendimin e qeverisë marrin parasysh faktorë ekonomikë dhe socialë. Sipas ministrit Xhuveli, shtyrja e afateve kohore merr parasysh; së pari, për t’iu dhënë kohë dhe mundësi importuesve të lëndëve djegëse për rregullimin e kontratave të importit. Gjithashtu, edhe rafinerisë së naftës në Ballsh, për të përmirësuar thellësisht cilësinë e lëndës djegëse për motorët diezel.

Sipas shkencëtarëve, njerëzit që vuajnë nga depresioni mund të vuajnë edhe nga zemra

Sëmundja e zëmrës vjen nga depresioni

Prej disa kohësh, shkencëtarët e huaj mendojnë se ka një lidhje të rëndësishme mes depresionit dhe sëmundjes së zemrës. Trajtimi standard për depresionin ka përfshirë shpesh antidepresantë dhe psikoterapi. Por, një studim i kohëve të fundit në Kanada tregon se, për disa pacientë të sëmurë me zemër, ilaçet mund të jenë më të efektshme sesa seancat këshilluese me psikologun ose psikiatrin. Thuhet se, ajo që ndodh në tru, shpesh herë ndikon edhe në zemër. Një zbulim i Organizatës Botërore të Shëndetësisë (OBSH) i një dekade më parë është edhe sot i vërtetë: njerëzit me depresion janë më të prirur për t’u sëmurur. Në fakt, OBSH-ja thotë se, numri i vdekjeve të pacientëve të moshuar që vuajnë nga depresioni është 4 herë më i madh se i atyre që nuk janë me depresion dhe shumica e tyre vdesin nga sëmundje të zemrës ose nga hemoragjia cerebrale. Dr. Francois Lesperance, i Universitetit të Montrealit thotë se, rezultatet ishin të habitshme. “Është sikurse të përpiqesh të trajtosh dy çështje në të njëjtën kohë. Vështirësia për t’u përballur me probleme shoqërore dhe strese dhe në të njëjtën kohë të vuash nga një sëmundje fizike, kjo ishte një sfidë e madhe për pacientët me sëmundje zemre”, - thotë mjeku.

Antidepresanti

Një grup pacientësh morën antidepresantin citalopram, që njihet ndryshe si Celexa dhe Laxapro. Dr. Lesperance thotë se, u zgjodh ky ilaç, sepse ka rrezikshmëri të ulët për të bërë reaksion me ilaçe të tjera. Ky është një faktor i rëndësishëm për pacientët që vuajnë nga zemra dhe që mjekohen edhe me ilaçe të tjera. Antidepresanti ndihmon në lehtësimin e depresionit, duke shtuar nivelin e substancës serotoninë në tru. “Antidepresantët që kanë efekt tek sistemi i serotoninës në tru i ndihmojnë pacientët me depresion, duke përmirësuar simptomat e sëmundjes”, - thotë Lesperanze. Studiuesit vunë re se, kur rritej niveli i serontoninës në tru, gjendja psikike e pacientit përmirësohej. Studimi kanadez, po ashtu arriti në përfundimin se, pacientët të cilët shkonin rregullisht në sesionet e përjavshme me mjekun psikiatër, treguan jo më tepër përmirësim sesa një vizitë e shkurtër tek mjeku, për një kontroll minimal. Doktor Lesperance thotë se, studiuesit, megjithatë nuk ishin të sigurtë përse përmirësimi nuk ishte i ndjeshëm: “Biseda për këto çështje, duket se ka qenë diçka e vështirë për pacientët e sëmurë me zemër”. Dr. Lesperance, ende beson se sesionet e terapisë tek psikiatri janë të vlefshme për shumë njerëz dhe se krahasimi i mëtejshëm i efektit që kanë tek të sëmurët antidepresantët dhe format e tjera të terapisë psikike janë të nevojshme.

Hipertensioni dhe gripi shtojnë rastet e hemoragjisë, e përhapur edhe tek fëmijët

Hemoragjia, 25 vetë për 20 ditë

Rastet që paraqiten më shumë janë të moshës mbi 40-45 vjeç, të cilët vuajnë nga hipertensioni

Si rezultat i gripit dhe hipertensionit (tensioni i lartë), në spitalin e ORL-së është vërenjtur shtim i rasteve që trajtohen me epistaksis (hemoragjia në hundë). 25 raste janë trajtuar gjithsej për 20 ditë. Sipas mjekut, Fatos Dodbiba, ka një rritje të ndjeshme të rasteve që trajtohen me këtë patologji dhe krahasuar me herët e tjera, numri i pacientëve është më e lartë. Kryesisht, sipas tij, rastet që paraqiten më shumë janë të moshës mbi 40-45 vjeç, të cilët vuajnë nga hipertensioni. Ndërsa, tek fëmijët e moshës 4-5 vjeç, kjo vjen si rezultat i patologjive të tjera apo siç është rasti i gripit që preku shumë fëmijë. Kryesisht, sipas mjekut, hemoragjia në hundë në moshat mbi 40 vjeç vjen si pasojë e tensionit të lartë dhe kryesisht mospërdorimit të medikamenteve regullisht nga ana e pacientit. Fillimisht, sipas mjekut rekomandohet që pacienti, pasi të ketë zbuluar se vuan nga hipertensioni duhet të shkojë për vizitë tek një kardiolog.

Trajtimi

Sipas mjekut specialist, hemoragjia në hundë trajtohet si një urgjencë dhe nuk ka asnjë lloj shmangieje ndaj saj. Fillimisht, ai shton se pacientit i bëhet ndalim mekanik i gjakderdhjes me anë të tamponeve, i cili arrin të kryejë shtytjen mekanike apo kompresionin mekanik. Dr. Dodbiba pohon se, kjo nuk është një sëmundje që mund të trajtohet, por është si rezultat i sëmundjeve të tjera që ka pacienti, të cilat më pas sjellin edhe hemoragji në hundë. Faktorët që mund të sjellin këtë janë të shumtë, ndër to mund të ndikojë edhe tumori në hundë, por janë shumë të pakta këto raste, pasi kjo sëmundje, si rezultat i zmadhimit të tumorit mund të shkaktojë më tepër vështirësi në frymëmarrje sesa gjakderdhje. Mjeku pohon se, pacienti duhet menjëherë të kryejë analizat e gjakut, për të parë nesë është anemik, pra, për të parë gjendjen e rruazave të kuqe të gjakut. Kryesisht, një pacient i cili ka gjakderdhje paraqet rrezikshmëri nëse nuk shkon në vizitë mjekësore apo konsultë, sepse, sipas mjekut, ky është një faktor shqetësues dhe nuk mund të parandalohet. Kjo vjen sepse, sipas mjekut, nëse gjakderdhja në sipërfaqet fizike të trupi mund të mjekohet edhe nga vetë pacienti, gjakderdhja në hundë është e vështirë për t’u ndaluar, nesë nuk mjekohet tek një specialist. Sipas tij, tensioni i lartë haset vetëm tek moshat e mëdha dhe kryesisht mund të evitohet nëpërmjet konsultave të rregullta tek kardiologu dhe përdorimit të rregullt të medikamenteve nga pacientët.

Gripi tek fëmijët

Pak kohë më parë, të dhënat e marra nga urgjenca e pediatrisë në QSUT tregonin qartë për një fluks gjithnjë e në rritje të fëmijëve që paraqiteshin me vitozën e gripit dhe sipas mjekëve të kësaj pediatrie, llogaritej në mbi 200 vetë. Ndërkohë, si pasojë e ndërrimit të stinëve ka shumë mundësi që të rishfaqet sërish një epidemi tjetër në spitalin e pediatrisë në QSUT. Në këto raste, mjekët theksojnë se, duhet t’i kushtohet një vëmendje e veçantë këtij virusi, i cili në stinën dimrit dhe pikërisht gjatë muajve janar, shkurt dhe mars është shumë i përhapur.

Alketa Alia

Ministria e Bujqësisë ka përgatitur një projekt prej 5 milionë USD për fermerët

Gjana: Fermerët që mbjellin mbi 3 dynym, marrin fonde falas

Ministria e Bujqësisë ka vendosuar të mbështesë fermerët shqiptarë me fonde të pakthyeshme, nëse shtojnë sipërfaqet e fermave të tyre me vreshta, pemëtore dhe ullinj. Këtë e bëri të ditur ministri i Bujqësisë, Ushqimit dhe Mbrojtjes së Konsumatorit, Gjana, gjatë takimit të djeshëm me përfaqësues të 150 përfaqësuesve të fermave të qarkut të Korçës dhe të Elbasanit, me qëllim promovimin e këtij projekti, i cili kap vlerën e 5 milionë dollarëve, të ofruar nga buxheti i shtetit.

Ky fond u nda për 12 qarqet e vendit. MBUMK-ja nxori udhëzimin përkatës sipas të cilit, fermerët që mbjellin mbi 3 dynym vreshta, pemëtore ose ullinj do të marrin fonde falas. Qëllimi i MBUMK-së dhe qeverisë shqiptare është rritja e sipërfaqeve me këto kultura, në zona të studiuara e të njohura për zhvillimin e tyre. “Po të kishim më shumë para, ne do të mbështesnim edhe blegtorinë, që është prioritet për ne, edhe perimet në sera apo fushë, edhe rritjen e prodhimit të qumështit apo përpunimin e tij, edhe përpunimin e ullirit. Por, për këtë vit të parë, na u dha nga “qeveria Berisha” fondi prej rreth 5 milionë dollarësh”, - theksoi Gjana. Duke shtuar se, “s’kemi arsye të mbetemi peng i invazionit të produkteve të importit dhe të blejmë nga jashtë 700 milionë dollarë produkte bujqësore.” Gjana iu bëri thirrje fermerëve të bashkoheshin vullnetarisht në bazë të interesave të tyre, pasi kjo do të zgjeronte edhe shanset e tyre. Ndonëse dikur, kooperativat lanë një shije të hidhur për shqiptarët, sot, ky bashkëpunim do të rriste më shumë mundësitë për fermerët dhe për emigrantët, të cilët punojnë në vendet fqinje dhe kanë një eksperiencë në këto sektor, duke i bërë ata të fitonin njëlloj si në vendet pritëse. Duke bashkëbiseduar me fermerët përfaqësues të të dy qarqeve, ministri Gjana iu bëri thirrje atyre të vlerësojnë specialistët e bujqësisë, si dhe të kenë kujdes me farërat, fidanet dhe kimikatet, sepse pasojat janë të rënda, nëse mbillen fidanë të sëmurë apo përdoren pesticide të skaduara. “Ne si ministri e kemi shumë në vëmendje këtë problem dhe do t’i shtojmë kontrollet për këtë gjë”, - tha Gjana.

Krijohet OJF e re për studentët

Një organizatë jofitimprurëse dhe jopolitike që vepron mes studenteve “Proaktiv” forum është themeluar ditën e djeshme në mjediset e hotelit “Tirana International”. Ajo është një nismë e një grupi studentesh aktivë me rezultate të larta të Fakultetit të Drejtësisë, të Universitetit të Tiranës, të cilët, së bashku ndërmorën një nismë për organizimin e studentëve. Synimet kryesore të kësaj shoqate me status dhe program krejt të veçantë janë: rritja e përfaqësimit studentor, monitorimi i programeve akademike, evidentimi i një elite studentore dhe lobimi për këtë elitë. Aktiviteti i parë që u zhvillua ishte një anketim për evidentimin e problemeve akademike, ku rezultoi problem pamjaftueshmëria e njohurive për implementimin e kartës së Bolonjës dhe dëshira për t’u informuar. Sipas njërës prej organizatoreve, Matilda Qesja, këto aktivitete me karakter informues tentojnë të shmangin komercialitetin e jetës studentore dhe të afrojnë bashkëpunim ndërmjet studentëve, që janë një forcë e madhe e së ardhmes dhe elitës së intelektualëve të së ardhmes.

KULTURA

Duke zbuluar ligjësinë e procesit letrar e artistik në romanin e ri të Latif Ajrrullait “Kufiri”

Mjaft me shqiptarhane..! Dhurata Hamzai

- Sikur Tostoi, që në romanin e madh “Lufta e paqja” diti të shfaq më së shumti përmes historive të dashurisë njerëzore një epokë të tërë, edhe shkrimtari i romanit “Kufiri” Latif Ajrrullai ka ditur të sintetizojë me dashurinë e Rinës dhe Metit historinë e një vendi ku shtrihet “shkretëtira e vetme në Europë” ( për këtë shprehje do t’ju vijë rëndë patriotëve dhe do ta gjykojnë për keq shkrimtarin njerëzit me peshë në shoqëri- që bëjnë shqiptarhane)...

Që nga koha kur njeriu nisi t’i largohej mirëfilli natyrës, edhe kufijtë që atij vetë iu desh t’i shpikte u zgjeruan, u shtuan, po shtohen në paskohë e në paskohë si metastazat e një tumori malinj. Kufiri, si një simbolikë e mendësisë së njeriut modern, duhet të kishte mbetur pa u trajtuar me sa duket, deri në daljen e librit më të ri të shkrimtarit shqiptar nga Tetova, Latif Ajrrullait, pikërisht pasi Kafka ka trajtuar kështjellat dhe Kamy Njeriun e RI- (kupto veprën “I huaji”). Latif Ajrrullai që prek një temë tabu sot, nuk vjen nga oborri i shkrimtarëve “piramid-anë” të letërsisë shqipe, por vjen prej oborreve të gjalla të shtëpive e historive njerëzore, të njeriut me intelekt natyral e të pakufizuar nga përshtresime të mendësive perverse (veti që për fat të keq te disa nga shkrimtarët e sotëm zgjat deri në bërjen jo të një, por të disa librave artistikë). Njerëzit edhe kur s’kanë kufij ia vënë ato vetes, shkruhet në romanin “Kufiri”, i cili ka disa muaj që ka dalë në dritën e botimit prej shtëpisë botuese “Albas”. Këtë libër lexuesit e kanë pëlqyer dhe i kanë falur autorit deri në këtë periudhë edhe shumë komplimente befasuese. Të parët që e kanë lexuar janë pikërisht ata që e njohin, jo vetëm letërsinë, por edhe artin e leximit. Ky vlerësim që ka disa kohë qw po ndihet dhe një mendim imi i çuditshëm që më pushtonte gjatë leximit të kësaj vepre, më shtyu më vonë në ngasje që të shkruaj e të vlerësoj siç duhet ngjarjet dhe artin e rrëfimit në këtë libër. Mendimi që më shoqëronte gjatë leximit se mos ky libër do të mbetej vetëm një romancë rozë, nuk zgjati shumë, sepse përmes trupave dhe shpirtit të dy të dashuruarëve, Rinës dhe Metit, pa kufij të prerë, në rastin e veprës- edhe kompozicionalë, lexuesi ndjek me fantazinë e tij se çfarë ka ndodhur e çdo të ndodh me një kufi që për gati 50 vjet nuk ka guxuar njeri që t’i afrohej, pa le më ta kalonte, në këtë kufi, ku ishin derdhur shumë lot nga njerëzit që vinin vetëm që të mund të shihnin së paku të afërmit e vet apo familjarët, por pa pasur as mundësi për t’i dhënë dorën njëri-tjetrit. Dhe në kontrast të kësaj dhimbjeje të mbrapsht në kohë, heroi Meti ka ardhur që të pres një grua, një grua që e kishte pëlqyer, Rinën nga Tirana. Në fakt për të rrëzuar përfundimisht këtë lloj kufiri gjatë zhvillimit të një procesi të bukur letrar dhe artistik, autorit i ka mjaftuar edhe dashuria e Rinës me Metin për ta ruajtur deri në fund aktiv simbolin metaforik, që merr jetë që nga shtrati i të dashuruarëve, deri tek instancat më të larta të organizimit shoqëror e shtetëror, për të cilat shkrimtari Latif Ajrrullai shprehet në këtë mënyrë: “Tek ne nuk ekziston tolerimi, tolerimi i fituesve ndaj humbësve dhe respekti i humbësve ndaj fituesve...prandaj unë e kam humbur besimin. Kam frikë se mos në vend të shtetit bëjmë “shqiptarhane”. ...Janë këto detaje dhe ngjarje që e bëjnë veprën të plotë për t’u shijuar me të gjitha ndjesitë estetike e filozofike. Sikur Tostoi, që në romanin e madh “Lufta e paqja” diti të shfaq më së shumti përmes historive të dashurisë njerëzore një epokë të tërë, edhe shkrimtari i romanit “Kufiri” Latif Ajrrullai ka ditur të sintetizojë me dashurinë e Rinës dhe Metit historinë e një vendi ku shtrihet “shkretëtira e vetme në Europë” ( për këtë shprehje do t’ju vijë rëndë patriotëve dhe do ta gjykojnë për keq shkrimtarin njerëzit me peshë në shoqëri- që bëjnë shqiptarhane). Historia e këtij romani nis me vështrimin e këtij vendi që quhet Shqipëri, pikërisht nga lartësia, ku kuptohet ke fatin ta shikosh çdo gjë më qartë (shiko në libër. fq. 7.): “mbi mjegullinën e dendur depërtonin vetëm majat e minareve dhe një kryq i madh, të cilët dukeshin qartë nga lartësia. Diku atje poshtë tyre jetonte një popull i ndarë në disa kufij”. Në gjithë historinë e rrallë të dashurisë që e takojmë në këtë roman, e cila nis nga balta shqiptare e Shkupit dhe pritet e e përcillet në rrugën Tiranë-Shkup e anasjelltas, shkrimtari vet është përpëlitur në një varg paradoksesh, të cilat në prologun e veprës do të shpreheshin me një gjuhë të hidhur: “Ai ishte një vend i mbizotëruar nga anti-vlera, një vend jashtë çdo kriteri në politikë, në fe, në jetën e përditshme. Jeta as në ëndërr nuk ishte e bukur. Të shtirurit ishte mënyrë jetese”. Ndodh shpeshherë që kur arti bwhet mirë, lexuesi rrëmben pjesën që do nga një vepër. Në të vërtetë ky libër është një himn dashurie, madje është një përkushtim për një grua, së cilës i thuhet “Të jetosh me ty është pak” dhe për dashurinë rrëfehet me këtë gjuhë se “jetët tona ndaheshin ku fillonin përgjegjësitë dhe puqeshin ku zinte fill shpirti”. Edhe dashuria jonë, sikur ky vend për të cilin flet autori duket se është e mbizotëruar nga anti-vlera. Në rastin e Rinës dhe Metit në këtë roman ndodh e kundërta, vlera ringjallet. Të merr malli për atë vlerë. Erosi dhe dashuria janë në një harmoni të jashtëzakonshme. Çdo grua po ta lexoj kwtw roman do të dashurohej me personazhin Meti e çdo burrë po ta lexoj do të dashurohej me Rinën. Sikur dashuria, vetëm dashuria t’i shembte kufijtë vrerorës, ...kjo nuk është pak. Le të dashurojmë, pra, është mesazhi i këtij romani, mjaft me shqiptarhane.

Kush eshte Latif Ajrrullai

Latif Ajrullai ka lindur në vitin 1953, në Tetovë. Arsimin parauniversitar e ka kryer në Kroaci. Është diplomuar në fakultetin e Shkencave Matematiko-Shoqërore (në Prishtinë), si dhe në Fakultetin e Farmacisë, ku dhe është licensuar si Magistër i farmacisë.

Ka punuar shumë vjet si profesor i kimisë në shkollën mjekësore në Tetovë. Aktualisht është bashkëthemelues dhe drejtues i shtëpisë botuese Albas, (me seli në Tiranë, Tetovë dhe Prishtinë), e orientuar nga botimet shkollore.

Latif Ajrullai është përkthyes i disa librave, ndër të cilët:

Rruga në të cilën rrallë shkohet (S. Peck);

Duajeni vetveten (L. Hay);

Femra të mençura, zgjedhje të gabuara (K. Kouven, M. Kinder);

Ligji (F. Bastiat);

Atlas i Fizikës dhe i Kimisë;

Atlas i Ekologjisë (Botime të Paramon).

Gjithashtu, L. Ajrullai është dhe autor i disa teksteve shkollore.

KRONIKA

Reagimi i bluve pas ngjarjeve të rënda

Policia, “Task force” për

të frenuar aksidentet

Grupi, i përbërë nga 5 punonjës policie të komisariatit të Policisë Rrugore dhe specialistë të Rendit, të zonave të komisariateve të policisë së Tiranës, do të ketë qëllim parandalimin e aksidenteve rrugore

Parandalimi i aksidenteve do të monitorohet përmes një grupi “Task Force”. Grupi, i përbërë nga 5 punonjës policie të komisariatit të Policisë Rrugore dhe specialistë të Rendit të zonave të komisariateve të policisë së Tiranës, do të ketë qëllim parandalimin e aksidenteve rrugore. Burime zyrtare nga Drejtoria e Policisë së qarkut, Tiranë thanë dje se, “Task Force” është krijuar në kuadër të masave të marra për rritjen e sigurisë në rrugë. Kështu, bëhet me dije se, nga Drejtoria e Policisë së qarkut, Tiranë, është hartuar një plan masash me detyra konkrete që i është dërguar komisariatit të Policisë Rrugore dhe gjashtë komisariateve të policisë në kryeqytet, si dhe komisariatit të policisë, Kavajë. “Në projekt është parashikuar një bashkëpunim i këtyre strukturave për parandalimin e aksidenteve dhe ngjarjeve të tjera, në akset rrugore të qyetit të Tiranës dhe në veçanti, në akset rrugore të zonave rurale”, - thuhet në njoftimin e policisë. Bashkëpunimi konsiston në ushtrimin e kontrollit të përbashkët të punonjësve të policisë rrugore me specialistët e Rendit të zonave në komisariate. Ndërkohë, mësohet se, shtim të masave policore nga ana e komisariatit të Policisë Rrugore, ka patur në segmentet rrugore të qytetit të Tiranës, në të cilat po zhvillohen punime dhe ka vështirësi të trafikut, me qëllim parandalimin e incidenteve rrugore dhe normalizimin e qarkullimit.

Gjithashtu, nga ana e këtij komisariati, me qëllim disiplinimin e qarkullimit rrugor, janë përforcuar shërbimet në kryqëzime, drejtimet dhe hyrje-daljet kryesore të lëvizjes në qytetin e Tiranës. Sipas policisë së Tiranës, nga data 1 deri më 23 mars të këtij viti, në qarkun e Tiranës janë regjistruar 12 aksidente rrugore, ku si pasojë kanë vdekur 3 persona dhe janë plagosur 10 të tjerë. Gjatë kësaj periudhe, nga Policia Rrugore janë bllokuar 13 mjete për mangësi dokumentacioni, janë marrë 7837 masa administrative, ku është bërë vjelja e tyre në 4416 raste, ndërsa janë pezulluar 106 leje drejtimi, nga këto 32 për përdorim të pijeve alkoolike, 57 për tejkalim shpejtësie, 13 për mosrespektim të semaforit dhe 4 të tjera për shkelje të ndryshme të legjislacionit rrugor. Ndërkaq, në bazë të udhëzimit të Ministrisë së Brendshme "Për procedurat e sekuestrimit dhe të konfiskimit administrativ të mjeteve", nga ana e komisariatit të Policisë Rrugore janë përgatitur dosjet për 472 automjete dhe 197 motoçikleta, të cilat do t'i paraqiten Komisionit të Vlerësimit pranë Drejtorisë së Policisë së qarkut, Tiranë.

Policia e Tiranës i bën thirrje qytetarëve që brenda 10 ditëve nga dita e bllokimit të automjetit të tyre, të paraqesin dokumentacionin e plotë të automjeteve të tyre pranë komisariatit të Policisë Rrugore, me qëllim që automjeti i tyre të mos bëhet objekt sekuestrimi e konfiskimi nga ana e Komisionit të Vlerësimit.

Reagimi i policisë vjen disa ditë, pasi në vend u shënuan disa aksidente të rënda, sidomos ai në Dukagjin të Shkodrës, ku humbën jetën 10 vetë dhe ai në Mollas të Elbasanit, ku jumbën jetën pesë gra.

Ngjarjet në Tiranë

12 aksidente rrugore,

kanë vdekur 3 persona,

janë plagosur 10 të tjerë,

janë bllokuar 13 mjete për mangësi dokumentacioni,

janë marrë 7837 masa administrative,

janë pezulluar 106 leje drejtimi, (nga këto 32 për përdorim të pijeve alkoolike, 57 për tejkalim shpejtësie, 13 për mosrespektim të semaforit dhe 4 të tjera për shkelje të ndryshme të legjislacionit rrugor).

Ballsh

Kapet me 38 kg kanabis, në pranga

polici Zyberi me 3 bashkëpunëtorët

Sërish efektiva policie të prangosur për trafik droge. Afrim Zyberi, efektiv i policisë rrugore të Beratit u prangos, pasi në makinën e tij u gjet dhe u sekuestrua një sasi prej 38 kg kanabis, si dhe 4 milionë lekë të vjetra.

Arrestimi u bë në aksin rrugor Ballsh- Fier, ndërkohë që në pranga kanë rënë edhe personat që udhëtonin me Zyberin, Agim Hyska, Sokol Lula, dhe Granit Emini, nën akuzën e bashkëpunimit. Katër të prangosurit po udhëtonin nga Gjirokastra në drejtim të Fierit. “Dyshohet se lënda narkotike ishte marrë në Gjirokastër”, - thanë dje, burime të policisë së Fierit, por pa saktësuar destinacionin e saj. Ndërkaq, mësohet se kanë nisur menjëherë hetimet për të përcaktuar itinerarin që do të ndiqte “malli”, ndërsa mësohet se Zyberi ndiqej nga kolegët e tij prej disa kohësh, për shkak të lëvizjeve të shpeshta që bënte nga Gjirokastra me makinën e tij.

Prangosja e Zyberit është e dyta brenda 10 ditësh brenda radhëve të policisë. Më 14 mars, një punonjës i forcave speciale përfundoi në prangat e policisë me një kuintalë hashash në makinë. Elidon Feimi ka qenë duke udhëtuar në drejtim të Vlorës së bashku me sasinë e hashashit në bagazhin e makinës, kur policia e ka ndaluar për një kontroll. Ndalimi i tij u bë në rrugën nacionale në afërsi të fshatit Greshicë. Policia ka kontrolluar automjetin tip “Benz” me targë Vl 3110 C.

Policët në krim

Policia e Shtetit ka bërë të mundur kohët e fundit arrestimin e disa grupeve kriminale, të implikuar në trafiqe të lëndëve narkotike. Por, në një pjesë të mirë të këtyre operacioneve policore ka rezultuar se të implikuar dhe ndihmës të trafikantëve kanë qenë edhe punonjës policie të strukturave të ndryshme. Rastet e implikimit të këtyre punonjësve të policisë janë disa, ndërkohë që edhe në rastin më të fundit të kapjes së një sasie droge gjatë operacionit “Segmenti i ndërprerë” dyshohet se është i implikuar një punonjës policie i rolit të lartë. Këtë fakt e ka pohuar edhe agjenti i infiltruar i policisë në këtë operacion. Ndërkaq, në nëntor të vitit të kaluar, një tjetër efektiv i policisë së kryeqytetit ka rënë në pranga, i akuzuar për trafik droge. Armand Kuliçi është arrestuar së bashku me një tjetër shtetase. Këta dy shtetas dyshohet se janë pjesë e një linjë trafiku nga SHBA-të. Ndërsa një tjetër efektiv i Policisë së Shtetit, i arrestuar për drogë, është edhe Nazi Kaçupi, i cili është ndaluar së bashku me një grup tjetër personash të implikuar në trafikun e hashashit me Greqinë. Artan Kamberi është një tjetër agjent policie, i arrestuar së bashku me grupin e bashkëpunëtorëve të tij në trafikun e drogës me Kosovën rreth një vit më parë në Mirditë. Ndërsa Dritan Manaj është inspektori i Antidrogës, i arrestuar në kryeqytet së bashku me trafikantë të drogës në grupin e drejtuar nga Emiliano Shullazi.

Vjedhja, kërcënimi e mashtrimi,

policia vë 3 në pranga dhe një nën hetim

Dy të prangosur për vjedhje dhe një për goditjen e tjetrit ka qenë rezultati i policisë në fushën kundër krimit ordiner. Policia bëri të ditur dje, se Ervis R, 16 vjeç, banues në Kamëz, Amarildo Ismaili, 18 vjeç, banues në Tiranë, kanë rënë në pranga për vjedhje, ndërsa Emiljano Pjetra, 26 vjeç, banues në Tiranë, është prangosur, pasi të premten, për motive të dobëta, ka goditur me çekiç në kokë shtetasin A.H, 23 vjeç.

Sipas policisë, minoreni Ervis R ishte shpallur në kërkim për veprën penale të "Vjedhjes". Ai njihet nga policia si kontigjent i minorenëve të akuzuar për vjedhje të ndryshme. Ndërsa Amarildo Ismaili është prangosur me akuzën e "Vjedhjes së mbetur në tentativë të një automjeti", pasi u kap si pjesë e një rrjeti që akuzohet për grabitje makinash. “Kërkojmë bashkëpunimin e komunitetit për të bërë të mundur arrestimin e vjedhësve, sidomos adoleshentëve”, - janë shprehur burime policore, ndërkohë që jo në pak raste, vjedhësit përdorin femrat si karrem për të zbuluar “Eldoradot” e tyre, duke i shenjuar e më pas grabitur.

Informaliteti

Ndërkohë, vetëm një ditë pasi ishin shënuar shifrat e informalitetit, sidomos në ndërtim dhe tregti, policia e Tiranës konfirmoi se kishte proceduar penalisht Dritan Duman, 39 vjeç, banues në Tiranë, pasi dyshohet se në harkun kohor të një viti, nuk iu ka shlyer punëtorëve të tij pagesën për dy muaj dhe nuk i ka siguruar ata për një periudhë 1-vjeçare. Dritan Duma do të ndiqet në gjendje të lirë, për veprat penale të "Mashtrimit", "Fshehjes së të ardhurave" dhe "Mospagimit të taksave dhe tatimeve". Ndërkaq, policia e Tiranës mësohet se do të jetë bashkëshoqëruese e inspektorëve të punës, për të bërë të mundur vendosjen dhe vjeljen e gjobave, si edhe shoqërimin në polici të personave që akuzohen për "Fshehje të të ardhurave" dhe "Mospagim të taksave dhe tatimeve".

SPECIALE

Epidemia e gripit të shpendëve është shfaqur së fundmi në Hungari

H5N1, rreziku që vjen nga Hungaria

Rreth tri ditë më parë, Ministria shqiptare e Bujqësisë ka ndaluar dhe ka kthyer në vendin e origjinës një sasi shumë të madhe mish pule hungareze, e cila dyshohej se ishte e infektuar me H5N1

Ambalazhuesit e pulave në Hungari mund të përballen me sanksione të rrepta për shkeljen e ligjeve të shëndetit dhe të sigurisë, si pjesë e propozimeve të reja për luftimin e gripit të shpendëve. Sipas shefit të veterinarisë së Hungarisë, Miklos Suth, parlamenti i vendit mund të vendosë sanksione më të rrepta mbi këta ambalazhues që dështojnë në prodhimin e dokumentacionit të duhur rreth origjinës së shpendëve të tyre shtëpiakë. Komentet vijnë pas njoftimit që u bë gjatë kësaj jave, sipas të cilit, stoqet e shpendëve shtëpiakë hungarezë janë edhe një herë të lira nga virusi vdekjeprurës H5N1, fill pas përhapjes në janar. Qeveria hungareze është shprehur e gatshme të marrë masa, për të rritur presionin tek ambalazhuesit e vendit për të arritur standardet e sigurisë së ushqimit. Çdo kompani që do t’u kundërvihet këtyre kërkesave mund të përballet si rezultat i kësaj me një vit të tërë pezullimi për të operuar, gjithashtu edhe me gjoba të mëdha. Propozimet e reja patën kritika edhe nga gjigandi i ambalazhimit të shpendëve shtëpiakë, Bernard Matthews, për vazhdimin e tregtimit nga vendi i tij në Holton të Britanisë së Madhe, ku ka rënë H5N1. Siç u kërkua nga Europa, Bernard Matthews vendosi një zonë të mbrojtur nga Europa për të ndaluar sëmundjen të përhapej më tej. Edhe pse zona mbrojtëse u vendos, Ministrja e Shëndetit Publik në Britaninë e Madhe, Caroline Flint, zbuloi javën e kaluar se 900 tonë i mishit të pulave është kaluar nga kjo zonë. Ajo shtoi se 93 tonë i këtij mishi vinte nga Hungaria, lidhja u bë përmes testeve gjenetikë si burimi i infeksionit origjinal në fermën e Bernard Matthews. Bernard Matthews e tregtoi mishin e dyshuar nga 2 shkurti, ku përhapja e virusit H5N1 u konfirmua dhe 12 shkurt, kur rregullatorët thanë se procesi i dezinfektimit kishte përfunduar. Sidoqoftë, Flint theksoi se, nuk ka patur rrezik për përhapje. “I gjithë ky mish ishte nga zogj që ishin therur përpara 2 shkurtit dhe asnjë nuk erdhi nga zogjtë e infektuar”, - tha ajo në parlament. Ndërkohë, Agjencia e Standardeve të Ushqimit (FSA) tha se, asnjë mish nuk shkoi afër plevicave, ku zogjtë e sëmurë ishin gjetur dhe që mishi i pulave, i gatuar si duhet mbetet i sigurtë për t’u ngrënë.

Gripi i shpendëve

Në vitin 2006, Organizata e Kombeve të Bashkuara për Ushqimin dhe Agrokulturën po qortonte kafshët shtëpiakë të Azisë dhe Afrikës për përhapjen e këtij gripi dhe qeveritë kanë qenë duke folur për rrezikun që bën shtegtimi vjetor i shpendëve. Bashkë me grupet e tjera, “Grain” - një organizatë tjetër joqeveritare ndërkombëtare që promovon mbështetjen e manaxhimit dhe përdorimin e biodiversitetit agricultural - debatoi se keqbërësit e vërtetë ishin fermat e shpendëve shtëpiakë me përmasa të mëdha industriale dhe tregtimi global i shpendëve shtëpiakë, jo kafshët e shtëpive ose zogjtë e egër. Sot, kjo është bërë një njohuri e përbashkët, edhe pse shumë pak punë po bëhet për të kontrolluar burimin industrial të problemit dhe disa qeveri akoma nxjerrin teorinë e zogjve që shtegtojnë. Ndërsa, ndodhia e fundit në Moskë e përhapjes së H5N1 ndodhi në një market të vetëm në qytet, një veterinar zyrtar i qeverisë paralajmëroi për ndodhi të mundshme të ardhshme këtë pranverë, ndërsa zogjtë e egër shtegtojnë nga veriu. Një dimension tjetër i lig i krizës së gripit të shpendëve po bëhet më i dukshëm: kompanitë farmaceutike po përpiqen të përfitojnë nga vullneti i mirë që tregohet nga qeveritë, duke krijuar një data base global të shembujve të gripit, për të krijuar kështu tregje me përfitim të madh të vaksinave. Dy agjenci të Kombeve të Bashkuara, Organizata e Ushqimit dhe Agrokulturës dhe Organizata Botërore e Shëndetit (OBSH) janë në qendër të këtij procesi. Ato po përdorin qëndrimin e tyre ndërkombëtar, aksesin në qeveritë dhe kontrollin mbi fondet e dhuruara për të përparuar axhendat e përbashkëta.

Gozhdimi i së keqes së vërtetë

Autoritetet që kanë të bëjnë me gripin e shpendëve më në fund po dallojnë rolin që luhet nga tregtimi i shpendëve shtëpiakë në përhapjen e virusit. Kjo ka përhapje të gjerë. Gripi i parë i shpendëve shpërtheu në Azinë Juglindore herët në vitin 2004-ën, në Vietnam, Tajlandë, Kamboxhia, Laos dhe Indonezi, të ndodhura në fermat e mbylluara dhe intensive. Por, asnjë hetim nuk është bërë se, përse shpërtheu sëmundja në këto ferma dhe si u përhap. E njëjta gjë ndodhi në Turqi dhe Egjipt. Zogjtë e egër dhe shpendët shtëpiakë u fajësuan menjëherë, ndërsa kompanitë e shpendëve shtëpiakë, që furnizonin marketet dhe producentët e shpendëve shtëpiakë, u shfajësuan. Vetëm në Britaninë e Madh, në shkurt të vitit 2007, miti që fermat e mëdha janë “biologjikisht të sigurta” u hodh poshtë dhe fshehtësia e mënyrës se si përhapet gripi i shpendëve përmes industrisë së shpendëve shtëpiakë transnacionale u rihap pjesërisht. Qeveria e Britanisë së Madhe, në fillim fajësoi zogjtë e egër për shpërthimin e këtij gripi në fermën e madhe, pronar i të cilës ishte Bernard Matthews. Edhe pse, kohët e fundit, ka patur një shpërthim të gripit të shpendëve në Hungari, - vend në të cilin Bernard Matthews ka prodhime të veta - kompania nuk vuri re raportet e medias mbi një lidhje të mundshme, duke thënë se të mbjellat e saj ishin të lokalizuara larg zonës së infektuar nga sëmundja.

Shqetësime në Indonezi

Situata është e ndërlikuar edhe në Indonezi, ku gripi i shpendëve po bën dëmin më të madh; 66 njerëz kanë vdekur. Qeveria qendrore po përpiqet të marrë donacione dhe biznese të mëdha, duke ndjekur kështu shembujt e vietnamezëve dhe tajlandezëve. Më 1 shkurt, ajo shpalli një therje në masë dhe një ndalim që zogjtë e gjallë të ndikonin në Xhakarta dhe nëntë provincat e tjera, ku gripi i shpendëve përhapet më shpejt. Me shenja të qarta se çfarë do të vijë, Xhakarta tashmë ka vende të caktuara për rivendosjen e thertoreve, vendeve të ruajtjes dhe marketeve të zogjve. Duke përdorur fjalë që mund të ishin përdorur mjaft lehtë nga homologu i tij vietnamez, ministri i Agrokulturës, Anton Apriyantono, tha: “Fermat e shpendëve shtëpiakë, përfundimisht duhet të integrohen me thertoret e shpendëve shtëpiakë.” Në të njëjtën kohë, qeveria po e braktis industrinë e madhe. Fermat komerciale me shkallë të gjerë, ku edhe pse mohohet, gripi i shpendëve mbetet një problem - është gjë bëhet në mënyrë vullnetare. Në fakt, qeveria dhe publiku nuk mund të bëjnë gjë tjetër, veçse të pranojnë atë që iu thotë industria, sepse gjendet akoma një ligj që i ndalon inspektimet në fermat fabrika, pa lejen e kompanisë. Sidoqoftë, qeveria indoneziane do shihet e paaftë për të përforcuar këto masa parandaluese. “Praktikat e shpendëve shtëpiakë tradicionalë janë të rrënjosura thellë në kulturën tonë dhe janë kritike për jetën e popullit”, - shpjegon Riza Tjahjadi e fondacionit indonezian “Biotani”, të vendosur në Xhakarta. “Qeveria ka një betejë të madhe për të bërë, nëse pret që njerëzit të japin zogjtë e tyre dhe marketet fqinje pulat e ngrira nga supermarketet.” Shumë njerëz thjesht po i injorojnë rregullat dhe disa po fillojnë të mobilizohen. Sebindo (Serikat Buruh e Indonezisë Jozyrtare ose Unioni i Punëtorëve i Indonezisë Jozyrtare) bëri një protestë më 27 shkurt, gjatë një takimi në Partinë Demokratike indoneziane për betejë (drejtuar nga ish-presidenti Megaëati Sukarputri). Veprimi ishte pjesë e fushatës së Serbinos për të siguruar më shumë informacion real për publikun rreth gripit të shpendëve dhe për t’i bërë presion qeverisë që të mbante një qëndrim më koherent. Unioni tha gjatë mbledhjes së masës se, “industria e shpendëve shtëpiakë, në masë të vogël është shpallur armiku dhe është deklaruar fajtor.” Kjo, me qëllim që të rilokalizojë dhe integrojë industrinë e shpendëve shtëpiakë. Qeveria po e shtyn më qëllim vendin që të jetë i varur nga disa ferma të mëdha industriale (plus importet e jashtme), pa asnjë garanci se do të eliminojë gripin e shpendëve. Disa njerëz, madje mendojnë se ka një qëllim të fshehur për të hapur një derë për pulat e ngrira që janë të ndaluara nga Amerika. Agrobiznesi, sigurisht që vuan, të paktën në afat të shkurtër, nga përhapja e gripit të shpendëve. Por nga Indonezia dhe Rusia në Indi dhe Egjypt, qeveritë dhe agjenci të ndryshme ndërkombëtare janë vënë menjëherë në mbrojtje të industrisë dhe madje e kanë kthyer krizën e gripit të shpendëve në një mundësi që korporatat e mëdha të konsolidojnë kontrollin e tyre me afate të gjata. Në tetor 2005, kompanitë më të mëdha botërore të shpendëve shtëpiakë u mblodhën së bashku, për të formuar Këshillin Ndërkombëtar të Shpendëve Shtëpiakë, për të mbrojtur urgjentisht dhe të avancojnë një pozicion më të unifikuar mbi rregullat për gripin e shpendëve. Producentët në shkallë të vogël të shpendëve shtëpiakë dhe tregtarët janë lënë komplet jashtë nga proceset e vendimmarrjes dhe kjo është reflektuar në rregullat që janë vendosur.

Përgatiti: Rildo Ngjela

KULTURA

- Reachel Smith nga Clarcksville,Tenn, arriti në pesëçen finale sëbashku me Meagan Yvonne Tandy nga Kalifornia, Cara Renee Gorge nga Kansas; Helen Salas nga Nevada dhe Danielle Lacourse nga Rhode Island, e cila u shpall dhe shoqëruesja e parë. Publikut i është dhënë mundësia të votojë, duke përzgjedhur Rebecca Moore, të Alabamës si Miss Fotozhenia. Ndërsa mësohet se Stephanie Trudeau e Montanës është përzgjedhur si Miss Miqësia

Ish punonjëse e stafit të shfaqjes së suksesshme televizive amerikane “The Oprah Winfrey Show”

Reachel Smith zgjidhet Miss USA

Reachel Smith duket se e kuptoi se do të kishte fat në Miss USA kur arriti që të hynte në pesëmbëdhjetë vajzat e përzgjedhura për në finale. Pas paradës me kostume banjoje, vajza e diplomuar për gazetari nga Tennesse i tha vetes: “Do t’ia dal mbanë”. Smith, 21 vjeç arriti që të lejë pas bukurinë e 50 vajzave të tjera, për të fituar kështu titullin e Miss USA.

Brunia simpatike është diplomuar në Belmont University, dhe një ish punonjëse e stafit të shfaqjes së suksesshme televizive amerikane “The Oprah Winfrey Show”.

“Tashmë kam mbetur pa fjalë, vërtet”, është shprehur Smith pas përfundimit të konkursit.

Konkurente nga pesëdhjetë shtete dhe nga zona e Kolumbisë kanë konkuruar për t’u zgjedhur si pasuesja e Tara Conner, Missin e vitit të kaluar, e cila i është nënshtruar një terapie rehabilitimi, pas zërave që deklaronin se ajo gjendej e dehur nëpër klubet e natës së New Yorkut. Vajza nga Kentucky rrezikoi për një moment të humbiste kurorën, por Donald Trump, i cili është bashkëpronari i konkurist, i ofroi asaj një mundësi të dytë.

Duket se stafi nuk e ka fshehur këtë fakt, pasi vetë shfaqja është hapur me një sërë pasazhesh nga këto copëza lajmesh, ndërsa 21 vjeçarja bionde s’ka vonuar të dalë në skenë, e veshur me një fustan të ngushtë mbrëmjeje.

“Ka qenë viti më i paharrueshëm i jetës sime dhe jam rikthyer sërish, më mirë se kurrë”. Këto fjalë janë shoqëruar me duartrokitje të mëdha nga ana e publikut.

Reachel Smith nga Clarcksville,Tenn, arriti në pesëçen finale sëbashku me Meagan Yvonne Tandy nga Kalifornia, Cara Renee Gorge nga Kansas; Helen Salas nga Nevada dhe Danielle Lacourse nga Rhode Island, e cila u shpall dhe shoqëruesja e parë.

E pyetur nëse ishte e gatshme të zinte vendin e Conner, Smith iu përgjigj se “në njëfarë mënyre do të ishte një lloj sfide”, duke shtuar se ishte gati për të.

“Mezi pres të shoh se çdo të sjell ky vit”-është shprehur ajo.

Smith ka përgëzuar edhe Conner për mënyrën sesi arriti “t’i bënte ballë së keqes, duke u përballur me një sfidë kaq të madhe”.

Pyetjes sesi do të sillej gjatë vitit në të cilin ajo do të ishte më e bukura e Amerikës, Smith iu përgjigj: “Do të jem e ndershme dhe e hapur”.

Tim Vincent dhe Nancy O’Dell të “Access Hollywood” ishin edhe drejtuesit e konkursit, i cili iu rikthye Hollivudit, pas dy vitesh në Baltimore.

Gjatë një interviste të shkurtër të Vincent dhe O’Dell, Conner ka folur rreth planeve të saj për të ardhmen, ku përfshiheshin shkrimi i një libri, si dhe aktrimi”.

Duket se konkurentet e tjera gjatë viteve të shkurara, sjellja e të cilave binte ndesh me standartet e konkursist, nuk arritën që të kishin të njëjtin fat me Conner. Miss Nevada, e shpallur dikur Miss Amerika, Katie Rees, e humbi kurorën e saj pas shfaqjeve të disa fotove në internet, ndërsa Miss New Jersey e zgjedhur dikur si Miss USA, Ashley Harder, hoqi dorë kur mbeti shtatzënë.

Konkursi Miss USA i ka pasur fillesat e tij në vitin 1952, si një garë reklamuese në Long Beach.

Konkurentet duhet të paguajnë një shumë të caktuar për të marrë pjesë dhe duhet të kenë fituar një tjetër titull përpara se të konkurojnë për kurorën e Miss USA. Fituesja jeton në një apartament tepër luksoz në New York për një vit, gjatë së cilit ajo do të shpenzojë shumicën e kohës duke udhëtuar dhe marrë pjesë duke përfaqësuar Shtetet e Bashkuara, në konkursin e Miss Universit.

Publikut i është dhënë mundësia të votojë, duke përzgjedhur Rebecca Moore, të Alabamës si Miss Fotozhenia. Ndërsa mësohet se Stephanie Trudeau e Montanës është përzgjedhur si Miss Miqësia.

Juria ishte përbërë nga gjashtë personalitete të artit, ndër të cilët shfaqej prezantuesi televiziv Jerry Springer, ylli i “Blow Out”, Jonathan Antin, prezantuesja e E! News”, Giuliana De Pandi, Vanessa Minnillo e MTV-së, presidenti i Baby Phat, Kimora Lee Simmons dhe lojëtari i Lakers së Los Angeles, Jerry Buss.

Përktheu: Xhuli Moran

EKONOMI

Hidrocentralet e vogla, brenda këtij viti, do të jenë dhënë të gjitha me koncesion

83 HEC-e të vogla për 200 milionë kW/h energji

Aktualisht, një numër prej rreth dyzet hidrocentralesh të vogla, duke përfshirë edhe ato që ka marrë kompania italiane “Essegei” janë dhënë me koncesion për privatët, por në fakt, të dhënat bëjnë me dije se, sikurse edhe me “Essegei”-n, kontratat do të riformulohen, për të forcuar kushtet e tyre edhe me kompanitë që kanë marrë me koncesion numrin tjetër të hidrocentraleve të vogla

Energjia që pritet të prodhojnë të gjitha hidrocentralet e vogla në Shqipëri, në momentin që ato të mund të jenë të tëra në punë, do ta kapërcejë kufirin e dyqind milionë kilovatorëve në vit. Të dhëna nga Ministria e Ekonomisë dhe Energjitikës bëjnë të ditur se, aktualisht, numërohen rreth tetëdhjetë e tre hidrocentrale të vogla, ku përfshihen ato të dhëna me koncesion deri më tani dhe të gjitha të tjerat në projekt. Aktualisht, një numër prej rreth dyzet hidrocentalesh të vogla, duke përfshirë edhe ato që ka marrë kompania italiane “Essegei” janë dhënë me koncesion për privatët, por në fakt, të dhënat bëjnë me dije se, sikurse edhe me “Essegien”, kontratat do të riformulohen edhe me kompanitë që kanë marrë me koncesion numrin tjetër të hidrocentraleve të vogla. Ndërkohë që, për të gjitha hidrocentralet që aktualisht nuk janë dhënë me koncesion, sapo ka nisur ky proces. Ligji i ri i koncesioneve ka përcaktuar të gjitha detajet e procedurave që do të ndiqen, duke marrë në konsideratë edhe kapacitetet përkatëse të tyre. Për çdo hidrocentral të vogël që do të jepet me koncesion, do të synohet që kompania fituese të jetë ajo që do të bëjë edhe investimin më të madh të mundshëm dhe që do të sjellë për pasojë edhe kapacitetin më të madh të energjisë. Për të gjitha hidrocentralet e vogla që do të kenë një kapacitet maksimal poshtë nivelit të pesë megavatorëve do të vendosë njësia përkatëse e qeverisjes vendore. Pra, kjo njësi do të drejtojë procesin e dhënies me koncesion. Shumica e hidrocentraleve të vogla janë të përqëndruara në Shqipërinë Jugore, ku Vjosa me përrenjtë e saj dhe Osumi me Devollin dhe degët e tyre zënë pjesën kryesore. Duhet thënë se, edhe në rrethin e Librazhdit, disa degë të Shkumbinit numërojnë një numër të konsiderueshëm projektesh për hidrocentrale të vogla, por edhe hidrocentrale të vogla ekzistuese.

Rishikimi i kontratës me “Essegei”-n, kushte detyruese

Rishikimi i marrëveshjes koncesionare për 25 HEC-e vendore për kompaninë italiane "Essegei", i miratuar së fundi nga qeveria, pritet të sjellë dyfishim të prodhimit të energjisë elektrike në to. Rishikimi i marrëveshjes koncesionare, e cila u nënshkrua në vitin 2002 nga ish-Ministria e Energjitikës, ka vendosur kushte të forta për firmën koncesionare, e cila detyrohet t'i zbatojë ato, sipas kontratës së rishikuar, bëjnë të ditur të dhëna zyrtare të METE-s. Kështu, ndër kushtet, parashikohet që të optimizohet shfrytëzimi i burimeve ujore, përmes futjes së teknologjive më moderne të prodhimit të energjisë, rritja e investimeve në masën 20%, afate kohore të përcaktuara për kryerjen e tyre me 3 dhe 6-mujorë, etj. Sipas rikushtëzimit të kontratës koncesionare, pritet që të dyfishohet prodhimi i energjisë elektrike në të 25 HEC-et. Nga 37.9 milionë kW/h në vit që ishte parashikuar, prodhimi i energjisë elektrike në këto 25 HEC-e vendore do të arrijë në 65 milionë kW/h në vit. Kompania italiane "Essegei" mori në vitin 2002, me marrëveshje koncesionare, 25 HEC-et më të mira nga fondi prej 83 të tilla që janë ndërtuar në Shqipëri, ku pjesa më e madhe e tyre ishte jashtë prodhimit.

Banka Botërore, monitoruese e procesit

Që në janarin e vjetshëm, një grup ekspertësh të Bankës Botërore, së bashku më ata të Ministrisë së Ekonomisë dhe Privatizimit nisën të hartojnë ligjin e ri të koncesioneve për hidrocentralet e vogla. Banka Botërore, duke qenë se është një nga donatorët më të rëndësishëm të vendit tonë, padiskutim që do të kishte rolin e saj në këtë proces dhe madje, ajo organizoi vjet, në janar edhe një konferencë të donatorëve për financimet në fushën e energjisë në Shqipëri. Në lidhje me ligjin e ri të koncesioneve, Banka Botërore kërkoi që në ligj të kishte klasifikim të procedurave për dhënien me koncesion të një hidrocentrali të vogël, në varësi të kapacitetit të tij dhe për këtë gjë, u ra dakord që për hidrocentralet me kapacitet më të madh se pesë megavat-orë të përdorej procedura e tenderit të hapur ndërkombëtar. Banka Botërore e ka cilësuar mjaft të rëndësishme çështjen e hidrocentraleve të vogla, pasi ato janë pjesë e strategjisë kombëtare të zgjidhjes së problemit të furnizimit me energji të vendit. Duke qenë se bëhet fjalë për sasi energjie prej mbi dyqind milionë kiolovatorësh pra, për një sasi energjie prej rreth dhjetë për qind të asaj që importon vendi në vit. Kjo gjë u cilësua në strategjinë e energjisë si një element i rëndësishëm. Gjithashtu, energjia që do të prodhojnë hidrocentralet e vogla do të jetë një element mjaft i rëndësishëm në humbjet në rrjet të energjisë, pasi do të ketë një shpërndarje më të mirë të burimeve të energjisë, pavarësisht kapacitetit të vogël të tyre. Gjithashtu, të gjitha hidrocentralet e vogla mund të shërbejnë si një nga çelësat e biznesit për të furnizuar me energji aktivitetet e tij, pasi i mund të marrë energji në mënyrë të pavaruar nga rrjeti kombëtar i energjisë, nëse vetë një biznes do të mund të marrë me koncesion një hidrocentral të vogël dhe kësisoj, ai nuk do të ketë më asnjë lloj varësie nga rrjeti i transmetimit të energjisë.

Shitja e energjisë, garant shteti

Energjia që do të prodhojnë hidrocentralet e vogla do ta kenë sigurt tregun e tyre dhe madje, do të kenë të sigurt edhe një çmim të mirë për shitjen e energjisë së tyre. Qeveria shqiptare ka vendosur që korporata publike e energjisë, KESH, ta blejë të gjithë energjinë që do të prodhojnë hidrocentralet e vogla, me një çmim që do të jetë sa çmimi mesatar i importit të energjisë në vitin paraardhës. Kjo do të thotë se, kostoja e prodhimit të energjisë nga hidrocentrali i vogël do të jetë e llogaritur si e barabartë me koston e energjisë që KESH-i ka blerë një vit më parë nga importi. Në të vërtetë, kostoja e prodhimit të një megavati energji në një hidrocentral të vogël do të jetë aq sa kjo njësi energjie kushton e blerë nga importi, megjithatë, kjo masë është marrrë për të nxitur prodhimin e një sasie sa më të madhe të energjisë nga koncesionarët e hidrocentraleve. Në rast se, brenda një viti, në Shqipëri do të mund të vihen në punë të gjitha hidrocentralet e vogla në parametrat e parashikuar dhe në rast se edhe termocentrali i Vlorës do të mund të nisë të prodhojë energji, atëherë është e sigurt se vendi nuk do të ketë asnjë kufizim të energjisë elektrike, megjithëse do të ketë sërish nevojë të importojë energji elektrike, por në gjysmën e asaj që importon tani. Termocentrali Vlorës, siç dihet, do të ketë një kapacitet prej rreth nëntëqind milionë kilovatorësh në vit, çka do ta lehtësonte importin me mbi një të tetën dhe po ashtu, do të mpakte në maskimum humbjet, pasi ky TEC është në një anë gjeografike të kundërt me burimet e mëdha hidrike të energjisë.

POLITIKA

Kryeministri Berisha merr pjesë në samitin e PPE-së që zhvillohet në Berlin të Gjermanisë

Berisha-Merkel: Sfida jonë,

plotësimi i kushteve për integrimin

Angela Merkel pranon ftesën e kryeministrit Berisha për një vizitë në vendin tonë. Takime të shumta të kryeministrit shqiptar me personalitete të njohura të politikës evropiane. Samiti miraton deklaratën e 50- vjetorit të themelimit të BE-së

Kryeministri, Sali Berisha, ka marrë pjesë dje, në samitin e Partive Popullore Evropiane që zhvillohet në Berlin të Gjermanisë, gjatë të cilit ka zhvilluar një takim dhe me presidenten e radhës së BE-së, Angela Merkel. Në samitin, i cili u zhvillua në hotel “Ablon”, dikur simbol i ndarjes së Evropës, merrin pjesë rreth 60 kryetarë shtetesh, qeverish dhe personalitete të larta të organizmave komunitare, kryetarë partish të së djathtës evropiane etj. Samiti organizohet nën kujdesin e veçantë të kancelares gjermane, Angela Merkel, e cila ka dhe presidencën e radhës së BE-së.

Sot në mesditë, në orën 12.00, në ambientet e hotel “Ablon”, në Berlin, dikur simboli i ndarjes së Evropës, nisi punimet samiti i Partive Popullore Evropiane, mbajtur me rastin e 50-vjetorit të Traktatit të Romës, themelimit të Bashkimit Evropian. Samiti miratoi deklaratën për 50-vjetorin e themelimit të BE-së, në të cilën u theksua se Evropa e bashkuar, vlerat e lirisë, trashëgimia e saj, pozitive, janë baza për një të ardhme të sigurt. "Historia e 50-vjetorit të Bashkimit Evropian është një histori e suksesit që garanton një të ardhme për popujt e Evropës së Bashkuar, mbi vlerat që këta popuj ndajnë", - thuhet në një pjesë të deklaratës.

Takimet

Gjatë takimit me kancelaren gjermane, kryeministri Berisha e njohu këtë të fundit me përpjekjet e qeverisë së tij dhe nismat për të kaluar me sukses sfidat drejt anëtarësimit në BE, si dhe diskutuan mbi zhvillimet në Shqipëri dhe rajon. Gjithashtu, kryeministri Berisha i përsëriti Merkel-it ftesën për të vizituar Shqipërinë, ftesë, e cila u pranua me kënaqësi. Gjatë zhvillimeve të samitit, kryeministri shqiptar zhvilloi takime edhe me shumë personalitete të larta të politikës evropiane, kryetarë shtetesh, kryeministria apo kryetarë partish. Kryeministri Berisha takoi edhe homologët e tij, kryeministrin e Holandës, Jan Peter Balkenede, kryeministrin e Luksenburgut, Jean-Cloude Juncker, kryeministrin e Greqisë, Kostas Karamanlis, kryeministrin e Maltës, Lawrence Gonzi, kryeministrin e Sllovenisë, Janez Jansa, kryeministrin e Kroacisë, Ivo Sanader, si dhe presidentin e Rumanisë, Trajan Basesku, të cilët i njohu me përpjekjet e Shqipërisë për integrim në BE, si dhe me situatën në rajon. Kryeministri i ftoi bashkëbiseduesit të vizitojnë Shqipërinë, ftesa, të cilat u pranuan me kënaqësi. Kryeministri Berisha pati një takim të përzemërt dhe me kryetarin e Forca Italia, zotin Silvio Berluskoni dhe zotin Pier Fernando Casini, president i Dhomës së Deputetëve të Italisë. Gjatë takimit me kryetarin e parlamentit Evropian, Hans-Gert Pottering dhe me presidentin e Asamblesë Parlamentare të Këshillit të Evropës, Van Der Linden, kryeministri Berisha i njohu bashkëbiseduesit me ecurinë e procesit të integrimit euroatlantik të vendit, vendosmërinë e qeverisë në këtë drejtim, si dhe me sfidat në të ardhmen.

Jemin Gjana, një ndër eksponentët e PD-së, shprehet se vetëm tre sekretarëve në PD iu duhet ndahet posti nga portofoli i ministrit

Gjana: Sekretari i Përgjithshëm

mund të kryejë funksionin duke qenë ministër

Sipas Gjanës, të nevojshëm për t`u ndarë nga portofolet e ministrave janë vetëm tre sekretarë, sekretari organizativ, sekretari i burimeve njerëzore dhe sekretari për marrëdhëniet me median.

Jemin Gjana, një ndër eksponentët e lartë të PD-së, mbështet mendimin se postet e sekretarëve të partisë duhet të ndahen nga postet ministrore, ndërkohë që Gjana lë të kuptohet se nga ky ristrukturim përjashtim duhet të bëjë posti i sekretarit të përgjithshëm të partisë. Sipas Gjanës, të nevojshëm për t`u ndarë nga portofolet e ministrave janë vetëm tre sekretarë, sekretari organizativ, sekretari i burimeve njerëzore dhe sekretari për marrëdhëniet me median. Sa për postet e tjera, partiake, siç është dhe ai i sekretarit të përgjithshëm, ata sipas Gjanës mund të funksionojnë farë mirë, duke ruajtur dhe portofolin ministror. Deklarata e Gjanës vjen vetëm një ditë pas deklaratës së shefit të kabinetit në Kryeministri, Arben Imami, i cili deklaroi kandidaturën e tij për sekretar i përgjithshëm i PD-së. “Unë kam qenë sekretar organizativ në PD dhe e kam lënë këtë post të hapur për t`u komanduar nga dikush tjetër, sepse kam gjykuar dhe gjykoj se, sekretari organizativ i një force politike duhet të jetë te partia gjithë kohës. Gjykoj se, sekretari i burimeve njerëzore i një force politike duhet të jetë si post, sepse ja si erdhëm në mes të mandatit politik, në zgjedhjet vendore dhe nuk e kemi atë. Natyrisht, një sekretariat që merret me burimet njerëzore është i domosdoshëm, duhet të vazhdojë të jetë permanent dhe funksional. Mendoj se duhet të jetë permanent dhe funksional edhe sekretari që merret me median”, - tha Gjana.

Analiza e 18 shkurtit

Nga ana tjetër, Gjana u shpreh se, së shpejti, do të fillojë analiza në të gjitha ato qytete, ku Partia Demokratike ka humbur në zgjedhjet e 18 shkurtit. Nga ana e tij, Gjana u shpreh se, në disa rrethe humbja nuk ka ardhur vetëm për faj të strukturave. “Nuk është se në të gjitha vendet humbja është nga ndonjë efekt i punës dhe i dobësisë së strukturave politike të partisë. Po të qe kështu, të majtët që kanë humbur të gjitha bastionet e tyre në territorin e vendit do të thotë që e shpërbëjnë partinë në të gjitha këto zona. Nuk është se është vetëm funksioni i strukturave të partisë gjithçka që lidhet me rezultatet në zgjedhje”, - tha Gjana

Pas disa rasteve, kur këshilltarët e LSI-së bashkojnë votat me ata të PD-së, vjen reagimi

LSI: Analizë për votimet në Këshillat Bashkiakë

Lëvizja Socialiste për Integrim do të fillojë një analizë për ato këshilla bashkiakë, ku këshilltarët e saj gjatë konstituimit të tyre kanë bashkëpunuar me mazhorancën.

Nënkryetari i LSI-së, Sokol Axhemi, iu përgjigj interesimit të medias, lidhur me këtë çështje se, "LSI-ja është në ndjekje të vëmendshme të të gjitha konstituimeve të këshillave bashkiakë dhe komunalë në zona të ndryshme të vendit dhe se është për t'u theksuar se, ne së bashku me PS-në në ato konstituime, ku ekziston mazhoranca e majtë dhe rezultatet kanë dalë në anën tjetër, do të bëjmë analizën përkatëse në mënyrë serioze, duke evidentuar edhe përgjegjësitë përkatëse".

Nënkryetari i LSI-së e bëri këtë deklaratë gjatë një konference për shtyp, ku shprehu shqetësimin në lidhje me situatën e vështirë, të krijuar në mjaft zona administrative, kryesisht në disa komuna në veri, verilindje dhe jug e juglindje të vendit, si pasojë e situatës së keqësuar të kushteve të rënduara të motit dhe reshjeve të dendura të dëborës.

Zoti Axhemi tha se, "në mjaft prej komunave të pjesës veriore, si në ato të Tropojës, Shkodrës, Dibrës, Pukës e Malësisë së Madhe janë evidentuar bllokime të infrastrukturës rrugore, kryesisht në rrugët rurale, të cilat kanë bërë të mundur izolimin e mjaft prej këtyre zonave nga njëra -tjetra e nga zonat urbane".

"Po kështu, probleme kanë filluar të shfaqen edhe në drejtim të furnizimit të tyre me energji elektrike, si dhe në drejtim të realizimit dhe plotësimit të nevojave që ka popullsia e këtyre zonave në shërbimet sociale, kryesisht në arsim dhe shëndetësi", - tha Axhemi.

Lëvizja Socialiste për Integrim kërkoi ndërhyrjen e strukturave shtetërore, të kryeministrit dhe anëtarëve të tjerë të qeverisë, në mënyrë që popullsisë së këtyre zonave t’i vihet në ndihmë, në mënyrë të menjëhershme dhe që normaliteti të vendoset sa më parë.

KQZ-ja miraton një udhëzim mbi mënyrën sesi do hidhet shorti

Shorti i datës 28 do të shpallë fituesin e minibashkisë 10

Komisioni Qendror i Zgjedhjeve vendosi ditën e djeshme që shorti për njësinë bashkiake nr. 10, në Tiranë të hidhet më 28 mars. Rezultati i këtij shorti do të përcaktojë dhe fituesin në këtë minibashki, pas zgjedhjeve lokale të 18 shkurtit, ku kandiduan Gerti Bogdani për PD-në dhe Mira Veizi për PS-në. Sipas një udhëzimi të Komisionit Qendror të Zgjedhjeve, do të jetë KZQV-ja e njësisë bashkiake nr. 10 ajo që do të organizojë hedhjen e këtij shorti në prani të KQZ-së. Sipas udhëzimit, në një enë transparente futen aq gogla sa është edhe numri i subjekteve zgjedhore, pjesëmarrëse në short dhe në secilën gogël futet nga një shirit letre, ku n? nj?rin prej tyre shënohet fjala “Fitues”. Më pas, KZQV-ja cakton një person për tërheqjen e goglave dhe sekretari i KZQV-së fton me radhë përfaqësuesit e autorizuar të subjekteve zgjedhore, pjesëmarrëse në short për tërheqjen e shortit. Nga ana tjetër, personi që tërheq goglën, e hap atë dhe ia dorëzon kryetarit të KZQV-së. Kryetari lexon me zë të lartë, atë çfarë përmban gogla dhe iua tregon gjithë vëzhguesve dhe përfaqësuesve të autorizuar të subjekteve zgjedhore, pjesëmarrëse në short. Më pas, rezultati i shortit shënohet në procesverbal dhe në bazë të tij, KZQV-ja shpall fituesin për këtë njësi bashkiake.

F.Mejdini

Meta: LSI-ja, faktori për fitoren e opozitës

Edi Rama dhe Ilir Meta kanë zhvilluar takime të tejzgjatura me strukturat lokale të PS-së dhe LSI-së në Elbasan, gjatë mbrëmjes të së premtes. Kryesocialisti, Edi Rama, në ambientet e “Real Skampis” për më se dy orë ka takuar kryebashkiakët dhe kryekomunarët e rinj, socialistë, si dhe liderët lokalë të kësaj partie, të cilët i ka uruar për suksesin e arritur më 18 shkurt. Rama ka theksuar se, me një punë më serioze koalicioni i majtë dhe veçanërisht Partia Socialiste do ta kishte patur edhe më të thellë fitoren ndaj së djathtës. Megjithatë, ai ka shprehur kënaqësinë e tij për rezultatet e arritura nga socialistët në qarkun e Elbasanit dhe iu ka kërkuar drejtuesve të rinj të bashkive dhe komunave që ta përdorin me përgjegjësi mandatin e dhënë nga populli. Kryesocialisti ka deklaruar se, “duhet të përgatitemi për të fituar zgjedhjet e parakohshme, parlamentare, të cilat ka shumë mundësi që të zhvillohen në vjeshtën e këtij viti për shkak të një krize të mundshme, presidenciale”. Pothuajse të njëjtat fjalë ka deklaruar gjatë një takimi me drejtues të forumeve të LSI-së së qarkut Elbasan edhe Ilir Meta. Në një deklaratë përpara mediave, Meta ka komentuar edhe qëndrimin e tij për një takim të mundshëm Rama–Berisha, për qëndrimin e këshilltarëve të LSI-se në zgjedhjen e kryetarëve të Këshillave Bashkiakë e Komunale dhe për të ardhmen e koalicionit të opozitës. LSI-në, Meta e ka cilësuar si faktorin vendimtar, politik i dha fitoren së majtës në kryeqytet dhe në qytetet e tjera, të mëdha të vendit, në zgjedhjet e 18 shkurtit.

Ministri i Mbrojtjes, Fatmir Mediu takon Sekretarin e Përgjithshëm të NATO

Scheffer: “Shqipëria, zëri i arsyes në Ballkan”

“Shqipëria është zëri i arsyes në Ballkan”. Kështu është shprehur Sekretari i Përgjithshëm i NATO-s Scheffer, në takimin që pati me Ministrin e Mbrojtjes Mediu, të premten më 23 Mars 2007. “Viti 2007 është pa dyshim mjaft i rëndësishëm për rajonin e Ballkanit. Kosovës do t’i përcaktohet statusi final, ndërkohë që Shqipëria, Maqedonia dhe Kroacia kanë përpara objektivin e marrjes së ftesës për anëtarësim. Ka rëndësi shumë të madhe që Shqipëria të vazhdojë reformat në të gjitha fushat”, deklaroi gjatë takimit, Jaap De Hoop Scheffer, i ciliu shpreh mjaft pozitiv për progresin e bërë nga Shqipëria në fushën e mbrojtjes: “Keni punuar mjaft mirë deri tani. Shqipëria është prej kohësh eksportuese e sigurisë dhe ky fakt është për t’u vlerësuar në vazhdimësi. Gjithnjë kam qenë i mendimit se rajoni i Ballkanit duhet të jetë tërësisht i integruar në strukturat e NATO-s dhe Bashkimit Evropian”.

Ministri Mediu, nga ana e tij, i deklaroi Sekretarit Shefer se: “Ne do të bëjmë gjithçka është e mundur për të marrë ftesën për anëtarësim në NATO. Lufta kundër krimit të orgainzuar dhe korrupsionit është problem për të dy krahët e politikës shqiptare. Mesazhet e Samitit të Rigës, me mbështetjen e dhënë ndaj Shqipërisë, i përkasin jo vetëm qeverisë, por dhe opozitës dhe gjithë popullit shqiptar. Shqipëria ka qenë aktive ne rritjen e stabilitetit në rajon dhe marrëdhëniet me Maqedoninë janë një shembull i mirë për të ilustruar këtë fakt”.

Sekretari Shefer përshëndeti faktin që Qeveria Shqiptare ka planifikuar që në vitin 2008, buxheti i mbrojtjes do të kapë vlerën e 2 përqind të Prodhimit të Brendshëm Bruto. Ai theksoi si mjaft pozitiv faktin që 8 përqind e Forcave Tokësore Shqiptare merr pjesë në operacionet paqeruajtëse në pikat më të nxehta të globit si dhe shtoi se pjesëmarrja e Shqipërisë në Operacionin ISAF në Afganistan, drejtuar nga NATO është e konsiderueshme në numër dhe pozitive në rezultate.

Të dy personalitetet u shprehën dhe për të ardhmen e Kosovës. Ministri Mediu ritheksoi qëndrimin e Qeverisë Shqiptare në mbështetje të plotë të propozimeve të presidentit Ahtisaari, duke vënë theksin në respektimin e të drejtave të pakicave etnike e në veçanti të asaj serbe. Sekretari Shefer deklaroi se Aleatët Euro-Atlantikë me një zë të vetëm mbështesin paketën e presidentit Ahtisaari dhe se presin një zgjidhje sa më të shpejtë të proçesit të statusit.

OPINION

Të dielën me INDRO MONTANELLI-n

*Letra & Editorialë

Për qartësinë

Në letrën dërguar Montanelli-t, Ugo La Malfa i konfirmonte me kënaqësi atij se, “takimi DC-PCI” (“Partia Demokristiane-Partia Komuniste Italiane”), me këmbënguljen e Partisë Republikane, do të mund të ndihmojë për një zgjidhje të “krizës së skajshme, në të cilën shkon vendi”.

X X X

I dashur Ugo, kam reflektuar njëzetekatër orë para se t’i përgjigjem letrës tënde, së cilës ia admiroj stilin, jo vetëm sepse në pak radhë ajo shpalos aq shumë argumente, por mbi të gjitha, sepse me një forcë të thellë, polemika i çon qëndrimet e mia te të tuat.

Sidoqoftë, të falënderoj që ma dërgove. Prej kohësh sillet përreth një mëdyshje në marrëdhëniet tona, ose më mirë me thanë, në qetësinë e ndërsjelltë e të gjatë tonën. Ia vlen të zhdavaritet e gjitha. Këmbëngul që miqësia e vjetër, që e ke nënvizuar në fund të letrës dhe që unë ta rikthej të dyfishuar, nuk ka çka bën tjetër përveçse të përfitojë prej gjithë kësaj. Ajo që do të fitojë pak ndërkaq, është një konvergjencë e mundshme e opinioneve që më atribuon në lidhje me domosdoshmërinë e një situate politike që për ty, tashmâ duket e përfunduar, ndërsa për mua ende e pakryer, madje, për të mbetur ende e hapur me të gjitha mundësitë: atë të dështimit të negociatave në rrugë e sipër midis dy ujqërve të vjetër, me synimin e një krize të pranishme brenda PCI-së dhe pse jo, edhe me mundësinë për zgjedhje të parakohshme.

Do ta skematizoj përgjigjen në disa prej pyetjeve të premé dhe të ngritura që mua më parashtron thuajse për të më zënë frymën dhe për të mi djegur përgjigjet, para se ato të më dalin nga goja.

Në të parën thua: “Çfarë krimi kemi bërë unë dhe partia ime që kemi parashikuar se një ditë do të ndodhë takimi i pakundërshtueshëm midis DC-së dhe PCI-së?”

Ja pra që mua më duket se partitë nuk lindin vetëm për të parashikuar. Partitë lindin dhe ekzistojnë, mbi të gjitha për të vepruar; ndërsa kur janë të vogla, por ndikuese, siç është e jotja, edhe për të kushtëzuar lojën e më të fortëve. Me vrullin për të parathënë atë që do të bëjnë DC-ja dhe PCI-ja, t’i ke hequr dorë para kohe mu nga ky kushtëzim i tyre. Duke hequr dorë po para kohe prej rolit autonom të partisë tënde dhe duke demoralizuar partitë e tjera, laike, me synimin për të shkuar te një parashikim që thotë se DC-ja nuk ka rrugë tjetër përveçse “të takojë” PCI-në, mu tash që kjo po afron të ndodhë, natyrisht falë edhe miratimit tënd, pasiv, ti shfaqesh aty pari, duke thënë: “Po presim mrekullinë”. Cilën mrekulli? Atë të një vendi në krizë, të shpëtuar prej një DC-je të varur prej strukturave të tjera, siç thuhet sot, dhe të një PC-je, e cila mbas blatimit të buqetës së abstenimit, shpërndan ujin e shéjtë të miratimit? Ose atë, që është mandej e njëjta gjë: ajo e një “programi të përbashkët” që në optikën tënde duket shumë e më e rëndësishme sesa pasojat politike që mund të shpërthejnë, ndërkohë që për ne, pasojat politike mbesin në çdo rast më të rëndësishme se vetë programi? Më vjen keq, por po ta them krejt hapur: ndryshimi midis nesh është dhe mbetet i plotë.

Pyetja jote, e dytë: “Nuk të duket e padrejtë t’i atribuosh PRI-së (Partisë Republikane Italiane), si parti e ashtuquajtur e ndërmjeme, përgjegjësinë e situatës së kompromisit që mund të krijohet?”

Kryekreje pyes: Përse kjo “e ashtuquajtur” e ndërmjeme? Mos ndoshta ke hequr dorë nga pozicioni mjesuer dhe pra, të qendrës për partinë tënde? Këmbëngul me të vërtetë se i ke konsumuar deri në fund përgjegjësitë e tua për këtë braktisje që i ke bërë truellit laik që ishte i njënatyrshëm për PRI-në? Nuk do të dëshiroja të mbërrija deri te një “lapsus frojdian”, por nuk mund të rri pa pohuar mu në çastin, kur i thërras vëmendjes tënde ndaj fjalëve të sakta të shkrimit tim. Unë përgjegjësinë për paktin, të cilin jemi duke e përjetuar, iua atribuova jo vetëm republikanëve, por edhe socialistëve e socialdemokratëve. Do të jem edhe më i qartë. Nëse republikanët, në vend që të parashikojnë dhe profetizojnë, do të kishin punuar për të bashkuar socialdemokratët dhe liberalët në këtë Aleancë laike, ashtu siç bënë gjatë fushatës elektorale, ku më tepër kanë penguar sesa kanë mbështetur, ndoshta sot, mu për këtë po i shohim të mënjanuar prej vlerave dhe marrëdhënieve të pamjes sonë, politike: socialistët duhej të ishin më afër socialdemokratëve, në vend që këta të ishin më pranë atyre, e liberalët nuk do të ishin kësisoji të izoluar, siç janë, ndërsa republikanët do të bëheshin udhëheqja e natyrshme e këtij blloku të qendrës, i cili nuk është thjesht, ngaqë ata nuk kanë dashtë që të jetë dhe pa të cilin gjithçka është prishur.

Pyetja jote, e tretë: “A me të vërtetë, qysh kur PRI-ja ishte në qeverinë dyngjyrëshe, i është shmangur betejës?”

Natyrisht, dhe madje për herë të parë. Nuk e kujton më kongresin e Genova-s të PRI-së? Ishe ende në dyngjyrëshin, por tashmâ qe paralajmëruar me kohë, qoftë edhe në terma ende të papërcaktuara, vendueshmëria dashamire e partisë tënde ndaj kompromisit historik. Edhe sepse ende nuk këmbëngul për ta quajtur arratisje, kjo lëvizja yte ngjall panik dhe konfuzion në kampin laik. Vetëm “Unitá” të mbrojti asokohe, ndërkohë që në gazetën tonë, një nga bashkëpunëtorët e mi, më të ngushtë, Bettiza, me miratimin tim, spikati me një salto mortale për të të justifikuar ty. Shpresonim ende se mund të ndikonim ndaj asaj paqartësie, ndaj atij hamletizmi që e konsideronim të çastit. U gabuam. Nuk ishte një dyshim që kalon vrik e vrik, por mjerisht, ishte një vendim politik, i shprehur në terma të zbehtë, vetëm ngaqë ndodheshim para dhe jo mbas zgjedhjeve të 20 qershorit. Në të vërtetë, e kishe pikësynuar tashmâ qëndrimin tënd për kompromisin dhe i kishe braktisur aleatët tuaj, natyralë, si dhe vetveten tënde.

Dhe ja ku mbërritëm në fund. Nëse sot, mund të të duket se po ta them më vonë atë që do të thoja më parë, kjo është një përshtypje e rrémë. Unë në shkrimin tim kam përshkruar dhe analizuar me hidhërim një situatë domosdoshmërie, për krijimin e së cilës ke kontribuar dhe jo në një masë të vogël, vetë ti. Kam përshkruar lâmshin e rrugës “Gesu” dhe të “Botteghe Oscure”, pa e miratuar, pa pritur asnjë mrekulli, por vetëm me ngushëllimin për të parë mbi tryezën e bisedimeve një DC për herë të parë më të bashkuar sesa PCI-në.

Ngushllim që ty mund të të duket i vogël, ose plotësisht mendjelehtë. Sepse ti, në thelb, shpreson në përsosmërinë e programit të marrëveshjes midis ujqërve të vjetër, ndërsa ne urojmë mosrealizimin. Ose, në cakun e fundit, dështimin. Ne do të dëshironim që qoftë DC-ja, qoftë PCI-ja, të dilnin prej mëdyshjes: njëra me përgjegjësitë e saj, elektorale, tjetra me nxitjet dhe dogmat e bazës dhe të ideologjisë së saj, të nëndheshme ideologjike. Në ndryshim nga ti, ne nuk jemi për asnjë lloj kompromisi. Jemi për qartësinë. Dhe mu për këtë qartësi kam dashtë me të folë me të gjithë thellësinë e mendimit tonë, që siç e sheh, nuk përkon me tëndin. Uroj që ky mospërkim të mos e prekë miqësinë tonë, të vjetër. Natyrisht që nuk e prek asesi miqësinë time për ty.

7 maj 1977

E përzgjodhi për botim dhe e përktheu

BESNIK DIZDARI

KRONIKA

Pritet të zbardhen edhe porositësit e fishekëve të trafikuar nga oficerët e ushtrisë

57 000 fishekët, ushtarakët

mohojnë akuzat për trafik

Sipas burimeve nga grupi hetimor, sekuestrimi në Karbunarë të Lushnjës është pjesë e një rrjeti ballkanik të trafikut të armëve. Ndërsa, sipas avokatëve mbrojtës, të gjithë të pandehurit kanë zbatuar urdhrat e eprorëve

Të pestë ushtarakët, të akuzuar për pjesëmarrje në organizatë kriminale të financuar nga trafiku i armëve, janë përballur dje me Gjykatën e Krimeve të Rënda, ku kanë pranuar se kanë zbatuar vetëm urdhrat e eprorëve. Arif Mata major, Medi Hasani, nënoficer, Pajtim Lama shofer, Gramoz Bendo magazinier armatimi dhe Nasi Froria, punonjës në garkim-shkarkim janë paraqitur dje në Gjykatën e Krimeve të Rënda për të marrë edhe masën e sigurisë. Prokurori i kësaj çështjeje, Anton Martiki, ka rreshtuar akuzat para gjyqtarit, ndërsa ka përjashtuar nga pjesëmarrja në organizatë kriminale shtetasin Froria. Ky i fundit akuzohet vetëm për moskallëzim krimi dhe mbajtje të municionit luftarak. Sipas burimeve nga grupi hetimor, sekuestrimi i 57.000 fishekëve në Karbunarë të Lushnjës është pjesë e një rrjeti ballkanik të trafikut të armëve. Ndërsa, të pandehurit nuk e kanë pranuar këtë fakt. Ata nuk kanë pranuar as akuzat për organizatë kriminale. Sipas avokatëve mbrojtës, mësohet se të gjithë të pandehurit kanë zbatuar urdhrat e eprorëve.

Gjykata

Të pandehurit ushtarakë kanë mbetur të gjithë në burg pa afat, pasi janë shqyrtuar provat e Prokurorisë së Krimeve të Rënda edhe të mbrojtjes, ndërsa i pandehuri Froria do të rrijë 30 ditë në burg, deri në verifikimin e plotë të rrethanave. Prokuroria e Krimeve të Rënda ka mundur t’iu dërgojë letërporosi të gjitha institucioneve homologe të rajonit, ku dyshohet të jetë edhe destinacioni i fishekëve. Këto polici janë duke kryer të gjitha verifikimet e duhura, pasi dyshimet më të forta i përkasin trafikimit të fishekëve në një nga këto vende. Grupi i ekspertëve që po kontrollon çdo veprimtari të dyshimtë në ushtrinë shqiptare, prej të paktën një jave, ka nisur të zbatojë forcimin e survejimit të armëve apo pajisjeve luftarake që dalin nga repartet.

Rezultatet e hetimeve të ushtrisë kanë përcaktuar paraprakisht se, fishekët ishin destinuar për trafik në një nga vendet e rajonit.

Hetimet

Prokuroria e Krimeve të Rënda është duke vazhduar hetimet dhe pritet që të zbulohen edhe persona të tjerë të implikuar. Ndërsa, edhe përsa iu përket letërporosive të nisura në vendet fqinje, pritet të zbardhen edhe porositësit e fishekëve të trafikuar nga oficerët e ushtrisë shqiptare. Ndërsa, nëpër të gjitha repartet e Beratit, ku dyshohet se janë vjedhur municione është duke vazhduar inventari i armatimit, ndërsa bëhet e ditur se, janë nisur inventarët edhe në disa reparte të tjera në këtë zonë. Ndërkaq, duket se kanë nisur të zbardhen porositësit, të cilët, sipas akuzës, janë drejt arrestimit.

Janë arrestuar

-Arif Mata, 39 vjeç, lindur në Kukës e banues në Tiranë, me detyrë oficer pranë Shtabit të Brigadës 4460 në Pezë-Helmës, Tiranë, me gradën Major

-Medi Hasani, 40 vjeç, lindur në Peshkopi e banues në Tiranë, me detyrë shofer, nënoficer në Brigadën 4460 në Pezë-Helmës, Tiranë

-Pajtim Lama, 24 vjeç, lindur e banues në Shkodër, me detyrë shofer në Brigadën 4460 në Pezë-Helmës, Tiranë

-Gramoz Bendo, 33 vjeç, lindur e banues në Palikesht të Beratit, me profesion magazinier armatimi në Repartin Ushtarak nr. 4453, Berat

-Nasi Froria, 40 vjeç, lindur e Banues në Berat, me profesion punonjës ngarkim-shkarkimi, pranë repartit nr. 4453, Berat

U sekuestruan

57.000 fishekë luftarakë

Automjeti tip kamion, me targë U 1166

Automjeti tip “Benz” veturë, me targë TR 1680 M

6 aparate celularë që iu përkasin të arrestuarve

Korrupsioni, mbetet në qeli polici rrugor,

hetim të lirë për katër efektivë të tjerë

Mbetet në qeli deri në sqarimin e plotë të rrethanave, ish-punonjësi i policisë rrugore, i paditur në prokurori nga Kontrolli i Shërbimit të Brendshëm, pasi ishte filmuar duke marrë para. I vetmi i arrestuar ka qenë Mentor Leka, ndërsa kësaj vale filmimesh nuk i kanë shpëtuar dot edhe 17 punonjës të tjerë të qarkullimit. Shërbimi i Kontrollit të Brendshëm në Ministrinë e Brendshme ka vënë kamera në postblloqe të ndryshme, ku shërbenin këta policë dhe filmoi raste flagrante, ku ata iu merrnin para qytetarëve. E njëjta praktikë është ndjekur herë pas here dhe rezultatet kanë qenë të kënaqshme për kontrollorët. Shërbimi i Kontrollit të Brendshëm në Ministrinë e Brendshme arrestoi tre ditë më parë Mentor Lekën, në kohën që ky i fundit merrte turnin e tretë. Arrestimi është bërë, pasi gjykata e Tiranës ka caktuar ndaj tij masën e sigurisë “arrest në burg”. Pas hetimeve të bëra nga SHKB-ja, ndaj këtij punonjësi, prokuroria ka filluar procedimin penal për “korrupsion”, parashikuar nga neni 259 i Kodit Penal. Agjentët e SHKB-së ekzekutuan vendimin e gjykatës së Tiranës, ndërkohë që mësohet se janë dorëzuar edhe provat për këtë masë. Mbi bazën e kallëzimit të SHKB-së dhe pas koordinimit të punës me Prokurorinë e Tiranës ka filluar procedimi penal me akuzën e korrupsionit edhe për 4 punonjës të tjerë të policisë rrugore në Tiranë. Ky koordinim ka bërë të mundur që edhe për 7 punonjës të tjerë të këtij komisariati të sigurohen nga SHKB-ja prova të mjaftueshme për largimin e tyre nga puna, pasi janë të përfshirë në veprimtari korruptive gjatë ushtrimit të detyrës. Gjithashtu, SHKB-ja ka dërguar për ndjekje penale edhe 6 punonjës të policisë rrugore në qarkun e Elbasanit, përfshirë edhe vetë shefin e sektorit të policisë rrugore, për korrupsion dhe shpërdorim detyre.

Rastet e dënimeve

Një vit më parë, në Kuçovë, pas denoncimit të një qytetari dhe kombinacionit të oficerëve të SHKB-së, u arrestua në flagrancë Muhamet Pone, drejtuesi i lartë i policisë, të cilit iu gjetën në xhep 20 mijë lekë që, sipas SHKB-së, i kishte marrë nga një qytetar. Shefi i qarkullimit rrugor në komisariatin e policisë së Kuçovës është prangosur në një lokal në afërsi të komisariatit. Ndërsa, disa muaj më parë, dy policët e qarkullimit rrugor, Lulëzim Meta dhe Luan Nabolli, u dënuan përkatësisht me nga 3 vite e 6 muaj burg dhe me nga një gjobë prej 6 milionë lekësh të vjetra. Efektivët e komisariatit të policisë rrugore Tiranë, me detyrë kontrollorë linjash janë ndaluar nga SHKB-ja me akuzën e korrupsionit pasiv, të kryer në bashkëpunim. Sipas akuzës, dy efektivat, në mënyrë të vazhdueshme, bllokonin dokumentacionin e drejtuesve të mjeteve të ndryshme, pa asnjë shkak dhe më pas iu kërkonin atyre para në këmbim të lëshimit të dokumenteve.

Ndërkaq, mësohet se edhe në Elbasan, shumë shpejt pritet të hapet procesi për të gjashtë efektivat, ndërsa ende mbeten nën vëzhgim disa efektiva, të denoncuar nga qytetarë të ndryshëm për korrupsion.

RRETHE

Gazi i anijës “Mariana” merr miratimin e inspektoriatit

Dogana, analiza të reja për “Global Gaz”

VLORË-Inspektoriati Teknik Qendror i ka dhënë “ok” cilësisë së një sasie të madhe gazi, të mbërritur në port ditën e djeshme, kurse dogana është shprehur dyshuese dhe ka marrë kampione që t’i analizojë për hesap të vet. Është verifikuar kështu rasti i dytë, në lidhje me mosmarrëveshjet institucionale ndërmjet doganës dhe Inspektoriatit Qendror Teknik. Shkaku i është i njëjtë me atë të disa javëve më parë, ku analizat e cilësisë së gazit të sjellë në port prej shoqërisë “Vjosa”, të kryera jashtë Shqipërisë e nxorën gazin me probleme, ndërsa inspektoriati i dha viston e zhdoganimit. Edhe malli i ardhur këtë herë për llogari të shoqërisë “Global Gaz” është transportuar prej së njëjtës anije “Mariana”. Burime të brendshme të drejtorisë së portit bëjnë të ditur se, inspektoriati ka bërë analizat dhe ka ndezur dritën jeshile për hedhjen në treg të sasisë prej 1370 tonësh gazi, ndërkohë që, për të garantuar këtë cilësi, dogana nuk e ka lënë me kaq çështjen. Siç edhe konfirmon drejtori i saj z.Hysni Sharra, nga ana e institucionit që ai drejton janë marrë kampione dhe po bëhen analiza të reja lidhur me verifikimin e konkluzionit të nxjerrë nga inspektoriati. Përgjigjet e këtyre analizave do të mësohen pas dy ditësh. Sharra ka shtuar se, sasia e gazit, në bazë të nenit 75 të Kodit Doganor, nuk mund të konsiderohet e bllokuar, por thjesht e magazinuar. Kjo do të thotë se, sasia e mallit nuk lejohet që të preket nga firma “Global Gaz”, pasi është vulosur dhe duhet të qëndrojë në pritje të përfundimit të rezultatit të analizave.

Ergys Alushi

Konstatimi: Situatë alarmante në transportin e pasagjerëve

Task Forca bllokon 50 automjete

Në mbyllje të kësaj jave, grupi Task Forcë ka evidentuar një numër të madh automjetesh të llojeve autoveturë, furgonë dhe autobusa, që punojnë për transportin e pasagjerëve në mënyrë të paligjshme…

ELBASAN- Mbështetur nga urdhëresa e tre ministrive, përkatësisht asaj të Brendshme, Ministrisë së Financave dhe Ministrisë së Transporteve, e mbështetur nga Drejtoria e Tatim-Taksave dhe Drejtoria e Transportit Rrugor, Task Forca dhe policia kanë ndërmarrë një operacion të gjerë, në rang qarku, me qëllim kontrollin dhe evidentimin e të gjitha automjeteve që qarkullojne me dokumentacione të parregullta. Sipas statistikave zyrtare mësohet se, nga dita e hënë deri të shtunën, në mbyllje të kësaj jave grupi Task Forcë ka evidentuar një numër të madh automjetesh të llojeve autoveturë, furgonë dhe autobusa, që punojnë për transportin e pasagjerëve në mënyrë të paligjshme. Një problem tjetër i hasur nga Task Forca ka qenë mungesa e lejes së drejtimit për këtë lloj shërbimi, transport pasagjerësh. Përfaqësuesit e Task Forcës e kanë vlerësuar situatën si “tejet alarmante”, duke e konsideruar këtë edhe një nga shkaqet kryesore të aksidenteve rrugore që muajt e fundit janë shtuar shumë, duke shkaktuar edhe viktima. Operacioni i Task Forcës është mbështetur edhe nga Sindikata e Transportit Rrugor. Sipas përfaqësuesve të kësaj sindikate, operacioni do të shërbejë për disiplinimin e shërbimit të të gjitha llojeve të transportit dhe për minimizimin e rasteve të aksidenteve, veçanërisht të atyre me pasoja të rënda. Gjatë kësaj jave, nga grupi Task Forcë janë bllokuar rreth 50 automjete të llojeve të ndryshme, që kryenin transport udhëtarësh me targa të bardha dhe pa licencë. Një tjetër e mirë e këtij operacioni lidhet me faktin tjetër se, ai do të evitojë në maksimum konkurrencën e pandershme, si dhe do të sjellë zbatimin e përpiktë të ligjit.

Suela Azemi

Aksidentohen tre vetë nga një familje

LIBRAZHD-Një tjetër aksident rrugor është shënuar në aksin Librazhd-Elbasan në vendin e quajtur “Çezma e Miftarit”. Mjeti furgon i tipit “Benz-Mercedes”, me targa LB 1488, i drejtuar nga shtetasi Latif Mana është përplasur me autoveturën po të tipit “Mercedes-Benz”, me targa LB 21 87 A, drejtuar nga Petrit Face. Si rezultat i përplasjes janë aksidentuar drejtuesi i mjeti Petrit Face, 41 vjeç, vajza e tij 12-vjeçare Floresha Face dhe Shaqir Face, 70 vjeç, babai i Petritit. Aksidenti ka ndodhur si pasojë e lagështirës në rrugë, por edhe për drejtim të gabuar të drejtuesit të furgonit. Të plagosurit janë shtruar në spitalin e qytetit të Librazhdit dhe janë jashtë rrezikut për jetën. Aksi rrugor në fjalë, gjithnjë ka qenë burim aksidentesh, për vetë fatin se kthesat janë të vështira, por edhe gurët që bien nga shkëmbi kthehen në burim aksidentesh.

S.Azemi

Vidhet Universiteti “Ismail Qemali”

VLORË-Pas një sërë vjedhjesh të banesave dhe njësive tregtare në qytet, radha i ka ardhur Universitetit “Ismail Qemali” të Vlorës. Sipas informacioneve zyrtare nga policia, vjedhja ka ndodhur gjatë natës të së premtes. Nga hetimet e para dhe deponimet e drejtuesve të universitetit rezultoi se, persona të paindentifikuar kanë hyrë në ambientet e tij dhe kanë vjedhur tri videoprojektorë dhe një kompjuter portable. Vlera e dëmit arrin një shumë e 150.000 lekëve, ndërkohë që universiteti është i siguruar më roje të policisë private. Policia tha se, objekt i hajdutëve ka qenë laboratori i fizikës, ndërkohë që bëhet e ditur se ka edhe materiale të tjera të vjedhura, të cilat nuk janë deklaruar në komunikatën zyrtare të policisë.

Dëbora bllokon gjashtë fshatra

TROPOJË- Reshjet e dëborës që kanë filluar prej disa orësh në zonat rurale të rrethit të Tropojës kanë shkaktuar izolimin e 6 fshatrave të thella të këtij rrethi. Nënprefekti, Syl Smajlaj, tha se, deri në orët e mesditës, reshjet e dëborës kanë vazhduar të bien në zonat e thella të komunave të Margegajt, Tropojës së Vjetër dhe Lekbibajt, duke shkaktuar dhe izolimin e disa fshatrave. Po ashtu, Smajlaj bëri të ditur se, si pasojë e motit të keq dhe erërave të fuqishme janë konstatuar dhe mbi 100 shtylla elektrike të dëmtuara, të cilat kanë lënë pa drita 6 fshatra të thella të këtyre komunave. Për riparimin e defekteve në linjat elektrike është angazhuar pjesa më e madhe e specialistëve të filialit elektrik të rrethit. Shtyllat e rrëzuara ndodhen në zona të thella dhe ringritja e tyre vështirësohet si pasojë e motit të keq dhe trashësisë së dëborës në këto zona malore.

Rrugët e ngrira, policia dyfishon postblloqet

KUKËS- Si pasojë e ngrirjes së asfaltit të rrugëve, policia e qarkullimit rrugor ka dyfishuar postblloqet në aksin rrugor Morinë-Kukës-Qafë Mali, që lidh Shqipërinë me Kosovën, për shmangien e aksidenteve të mundshme, në kushtet kur trashësia e dëborës në Qafë-Mali ka arritur në 30 centimetra. Burime të policisë thanë se aksi rrugor Morinë-Kukës-Qafë Mali është i kalueshëm, por drejtuesit e mjeteve duhet të qarkullojnë me zinxhirë, për të shmangur rrëshqitjet e mundshme. Ndërkaq, reshjet e dëborës kanë përfshirë të gjitha zonat rurale të rrethit të Kukësit, madje mëngjesin e djeshëm ato janë shtrirë deri në qytet, në formën e llohës (reshje shiu dhe dëbore së bashku). Reshjet e dëborës vazhdojnë të bien në rreth 20 fshatra të rrethit, duke bllokuar lëvizjen e mjeteve në akset rrugore që lidhin fshatrat e komunave të Grykë Çajës, Bushtricës, Kalisit, Arrnit, Zapodit e Shishtavecit me qytetin e Kukësit. Në këto zona, trashësia e dëborës ka arritur në mbi 40 centimetra, gjë që ka shkaktuar dhe bllokimin e segmenteve të rrugës që i lidhin këto komuna me qytetin e Kukësit.

EKONOMI

Nga aplikimi i kësaj takse përfitojnë vetëm pagat e larta, të cilat paguajnë mbi 10 % tatim mbi të ardhurat

Taksa e sheshtë përgjysmon tatimin mbi pagat e larta

Pagat 90 deri 140 mijë lekë do të përfitojnë një ulje të tatimit mbi të ardhurat në vlerën 5 për qind, ndërsa pagat mbi 140 mijë lekë do të përfitojnë një ulje prej 20 për qind. Aktualisht, pagat 90-140 mijë lekë paguajnë 15 për qind tatim mbi të ardhurat, ndërsa ato mbi 140 mijë lekë paguajnë 20 për qind

Me aplikimin e taksës së sheshtë, që qeveria ka në plan të aplikojë, pritet të ketë një ulje të ndjeshme të tatimit mbi të ardhurat personale. Nga taksa e sheshtë përfitojnë pagat e larta, të cilat aktualisht paguajnë më shumë tatim mbi të ardhurat, ndërkohë që tatimi për pagat e ulëta dhe të mesme nuk e kalon kufirin e 10 përqindëshit, i cili është niveli në të cilin do të bazohet taksa e sheshtë. Tatimi për pagat 90 mijë deri në 140 mijë lekë do të ulet me 5 për qind, si pasojë e aplikimit të kësaj nisme të qeverisë. Për këtë kategori pagash, tatimi mbi të ardhurat personale është në masën 15 për qind dhe si pasojë e aplikimit të taksës së sheshtë, ky tatim do të shkojë në nivelin e 10 përqindëshit. Ndërsa, për pagat mbi 140 mijë lekë në muaj, tatimi do të bjerë me 10 për qind, duke qenë se, aktualisht, tatimi për këto paga është në nivelin e 20 për qindëve. Si pasojë e kësaj, për pagat mujore 90 mijë lekëshe, tatimi nuk do të jetë më në kuotën e 14 mijë lekëve, por do të zbresë në 9 mijë lekë, ndërkohë që për një pagë 150 mijë lekë, tatimi bie nga 30 mijë lekë në 15 mijë. Kjo nismë e qeverisë ka ndryshuar politikat fiskale të planifikuara deri në vitin 2009. Sipas këtyre politikave, ishte planifikuar që tatimi mbi të ardhurat personale të vinte duke u ulur gradualisht, ndërkohë që tashmë do të aplikohet një ulje drastike për këtë tatim lidhur me pagat e larta. Taksa e sheshtë është një ndër nismat e fundit që qeveria ka planifikuar të ndërmarrë, me qëllim fuqizimin e biznesit. Qeveria e ka vlerësuar si mjaft ambicioze këtë nismë, e cila do të bëjë që të gjitha taksat, përveç TVSH-së, të mos jenë mbi kufirin maksimal prej 10 për qind. Këtu do të futen edhe tatimi mbi fitimin si dhe çdo lloj takse tjetër. Aplikimi i taksës së sheshtë bëhet me synimin ambicioz për ta bërë Shqipërinë vendin me taksa më të ulëta në rajon. Kjo gjë bëhet, jo vetëm për të krijuar më shumë të ardhura për biznesin si dhe më shumë mundësi për investime për të, por edhe me qëllim përthithjen e investitorëve të huaj, për të investuar në Shqipëri. Nisma e qeverisë është duke u hartuar tashmë, teksa pritet që të merret edhe miratimi i FMN-së. Qeveria është optimiste që FMN-ja ta mirëpresë dhe të pranojë këtë nismë, duke lejuar mundësi më të mira për zhvillimin e biznesit në vend, megjithë kostot që kjo nismë do të ketë në buxhetin e shtetit. Politikat qeveritare synojnë që të krijojnë më shumë frymëmarrje për tregun dhe pikërisht rritja e biznesit dhe prodhimit në vend të krijojë kushte më të mira për të rritur të ardhurat në buxhet.

Akciza e cigareve ka shkuar në 20 euro për kg gjatë vitit 2007

Niveli i akcizës së cigareve për këtë vit ka shkuar në 20 euro për kilogram. Politikat fiskale për akcizën e cigareve kanë parashikuar një rritje graduale për ta çuar çmimin e cigares në nivelet e vendeve të BE-së, të cilat parashikojnë nivele të larta akcize për këtë produkt. Në gjysmën e dytë të vitit të kaluar, akciza e cigareve pati një rrite prej 6 eurosh, në krahasim gjysmën e parë, përgjatë së cilës akciza ndaj këtij produkti ishte në 10 euro për kilogram. Sipas këtyre politikave, aciza do të vazhdojë të rritet me nga 5 euro për kilogram, për çdo vit, duke bërë që niveli i saj deri në vitin 2009 të shkojë në 30 euro. Duhet thënë se, përkundër efektit të krijuar nga rritja e akzicës për një sërë produktesh, gjatë vitit 2006 ka pasur një ulje të madhe të taksave, si pasojë e nënshkrimit të MSA-së. Kjo marrëveshje ka sjellë një efekt negativ prej rreth 5 miliardë lekësh në të ardhurat e buxhetit të shtetit. Gjithashtu, për të nxitur investimet në ekonomi është parashikuar që taksat doganore të aseteve kapitale të bëhen zero, gjë e cila do të krijojë një efekt negativ prej një miliard lekësh në të ardhruat buxhetore. Por, kjo masë është ndërmarrë për të stimuluar prodhimin në vend, duke ulur shpenzimet që biznesi është i detyruar të bëjë nga taksat dhe duke krijuar mundësi më të mira që biznesi të fusë në vend një teknologji më të mirë për prodhim.

Të ardhurat nga taksa e qarkullimit rrugor gjatë dymujorit të parë, 700 milionë lekë

Të ardhurat e mbledhura nga Taksa e Qarkullimit Rrugor kanë patur një rritje prej rreth 116 milionë lekësh, në krahasim me të njëjtën periudhë të vitit të kaluar. Sipas të dhënave statistikore nga Drejtoria e Përgjithshme e Tatimeve, rritja ka ardhur si pasojë e rritjes së efikasitetit të tatimeve në mbledhjen e të ardhurave dhe uljes së nivelit të korrupsionit në këtë dikaster. Sipas këtyre të dhënave, në fund të dymujorit të parë të këtij viti, të ardhurat nga kjo taksë, arritën në rreth 700 milionë lekë nga rreth 584 milionë që kjo drejtori ka mbledhur një vit më parë prej kësaj takse.

Rritja e parashikuar e eksporteve gjatë këtij viti pritet të ulë deficitin tregtar

Norma e pritur më e lartë e rritjes së eksporteve në krahasim me atë të importeve për vitin 2006 pritet të ndikojë në rënien e deficitit tregtar dhe rrjedhimisht, edhe në ndryshimin e kontributit të kërkesës së jashtme në rritjen e GDP-së. Sipas të dhënave, ky kontribut ka patur përmirësime të ndjeshme, duke shkuar nga -2.53 për qind, që ka qenë në vitin 2005 në -0.9 për qind në vitin 2006. Pritshmëritë për një normë rritje të eksporteve më të lartë se ajo e importeve, dhënia e efektit real të përdorimit të makinerive dhe pajisjeve të importuara gjatë viteve të kaluara (si një pjesë e rëndësishme e strukturës së tyre), përmirësimi i kushteve infrastrukturore, rritja e popullaritetit të turizmit vendas si dhe thellimi i vazhdueshëm i reformave strukturore në kushtet e ruajtjes së rritjes ekonomike të eurozonës pothuajse në nivelet e viteve të fundit, do të sjellin, gjatë periudhës së shqyrtuar brenda këtij programi, një shpërndarje më të rregullt të strukturës së kërkesës agregate, duke e rritur influencën e kërkesës së jashtme.

RRETHE

Nuk rezulton të jetë i skeduar nga policia shqiptare

Gjendet i vrarë në Athinë taksisti

Nga të dhënat e depozituara prej ekspertëve grekë ka rezultuar se, i ndjeri Ferdinand Beqiri është goditur me pesë plumba, ndërkohë që, pranë tij janë gjetur mijëra euro dhe 75 gramë heroinë…

SARANDË- Një shtetas shqiptar me moshë 40-vjeçare, që punonte si taksist i rregullt në linjën automobilistike Sarandë-Athinë është gjetur i vrarë me armë zjarri, ditën e premte, në kryeqytetin helen pesë milionë banorësh, Athinë, në rrethana ende të panjohura. Po ashtu, për momentin, të panjohur dhe misteriozë kanë mbetur edhe ekzekutorët e tij, për të cilët organet greke të hetimit nuk kanë dhënë asnjë version. Aktin e mësipërm kriminal e ka konfirmuar edhe shefi i komisariatit të policisë së Sarandës, Limos Fallani, i cili tha dje se, 40-vjeçari i ekzekutuar quhet Ferdinad Beqiri, i cili ishte banor i Sarandës dhe punonte në shërbimin taksi të linjës Sarandë-Athinë. Sipas shefit Fallani, i ndjeri Beqiri është gjetur i vrarë nga policia greke, mëngjesin e ditës së premte. Duke sqaruar se në këtë pohim policia e Sarandës i është referuar komunikatës zyrtare të policisë së shtetit helen, Fallani ka sqaruar se, 40-vjeçari Beqiri u gjet i vrarë në automjetin e tij. Lidhur me rrethanat e këtij zbulimi, shefi i komisariatit sqaroi se: “Grupi hetimor grek ka konstatuar gjurmë plumbash në xhamin e krahut të shoferit". Ai, gjithashtu nënvizoi se, 40-vjeçari Beqiri është identifikuar 24 orë pas kryerjes së krimit të vrasjes. Nga të dhënat e depozituara prej homologëve grekë ka rezultuar se, taksisti shqiptar, i ndjeri Ferdinand Bqiri, është goditur me pesë plumba, ndërkohë që pranë tij janë gjetur mijëra euro dhe 75 gramë heroinë. Lidhur me mundësinë e vrasjes së të ndjerit për motive pazaresh të lëndëve narkotike, shefi i policisë së krimeve të Sarandës, Artur Gjikëdhima, ka thënë se, Ferdinand Beqiri është person i paskeduar nga policia shqiptare, që do të thotë se ai rezulton të jetë i papërzier në asnjë lloj veprimtarie antiligjore. Sipas Gjikëdhimës, për shumë vite me radhë i ndjeri Beqiri ka qenë emigrant në Itali, kurse prej një viti punonte si taksist në linjën Sarandë-Athinë. Trupi i pajetë i viktimës është sjellë dje pranë të afërmve të tij në lagjen “Metoq” të Sarandës.

Rajmond Belo

Dështon atentati me eksploziv

Zbulon tritolin poshtë makinës

VLORË- Ashtu si çdo mëngjes ka shkuar për të hipur në makinë, por ka dalluar se poshtë saj ishte vendosur një sasi eksplozivi. Kështu i ka ndodhur mëngjesin e së shtunës një banori të lagjes “Partizani”, i cili zotëronte një automjet tip “Ford” me targa të huaja. Sapo ka konstatuar sasinë e eksplozivit poshtë makinës, shtetasi ka lajmëruar policinë, e cila ka mbërritur me forca të shumta në vendngjarje, në përbërje të të cilëve ka qenë edhe një ekip neutralizuesish. Nga hetimet e para ka rezultuar se, sasia e eksplozivit ka qenë e llojit tritol dhe në të ishte vendosur një ndezës granate. Për hetuesit, shtetasi, poshtë makinës të të cilit u gjet sasia e tritoli, ka deklaruar se, nuk ka probleme me askënd dhe se mund të ishte bërë ndonjë ngatërresë. Sipas specialistëve të lëndëve plasëse, eksplozivi i llojit tritol ishte i përmasave 15 x 14 x 6 dhe shpërthimi i tij mund të bëhej i mundur vetëm nëpërmjet tërheqjes së unazës së detonatorit të ndezësit. Dy pistat kryesore që po hetohen janë ajo e ngatërrimit të objektivit dhe problemet që mund të ketë pronari i automjetit. Sipas policisë, mënyra e eksplozivit mund të ketë qenë vetëm për ta trembur poseduesin e “Ford”-it (emri i të cilit për arsye hetimi nuk bëhet i ditur), pasi ky lloj eksplozivi është vështirë të shpërthehet nga largësia, pasi duhet një distancë e shkurtër për ta aktivizuar.

Ergys Alushi

Nëna denoncon largimin e së bijës

Policia kërkon 20-vjeçaren e humbur

GRAMSH-Denoncimi në polici i një nëne për largimin nga shtëpia të vajzës së saj që prej disa ditësh ka vënë në lëvizje uniformat blu, të komisariatit të policisë së Gramshit.

Denoncimi është bërë vetëm 24 orë përpara, kur nëna (emri i të cilës nuk publikohet), banuese e rrethit të Gramshit, pasi ka pritur gjatë që vajza të kthehet në shtëpi dhe kjo nuk ka ndodhur, i është drejtuar vetë kryekomisarit të policisë, të cilit i ka kërkuar ndihmë për gjetjen e vajzës. Menjëherë, policia ka nisur gjurmimet dhe sipas burimeve të brendshme, bëhet e ditur se tashmë është lokalizuar vendndodhja e 20-vjeçares. Dyshimet e para të policisë janë se vajza mund të jetë larguar me të dashurin e saj, i cili hamendësohet se e ka marrë për shfrytëzim prostitucioni. Mbas hetimeve të para është bërë e ditur se vajza ndodhet përreth lagjes “Medrese” të qytetit të Tiranës dhe policia tashmë ka lokalizuar zonën në fjalë. Specialstë të kësaj fushe kanë marrë me vete edhe shoqen e 20-vjeçares, me qëllim që të bëhet e mundur sa më shpejt gjetja e 20-vjeçares dhe të parandalohet kalimi i kufirit.

S.Azemi

Maska qëllon me “Kallash” furgonin

VLORË-Rreth orës 06.00 të mëngjesit të djeshëm, një person i armatosur dhe i maskuar në fytyrë, i ka prerë rrugën një furgoni. Thirrjeve të tij për të ndaluar, drejtuesi i automjetit që kishte me vete dy pasagjerë, nuk i është bindur, duke i dhënë më shumë gaz mjetit. Me këtë manovër, ai ka mundur t’i shpëtojë pritës së të maskuarit, i cili pasi ka parë këtë reagim, ka ngritur armën, që sipas dëshimtarëve ishte automatik “Kallashnikov” dhe ka qëlluar në ajër. Fatmirësisht, asnjëri prej pasagjerëve nuk është lënduar. Pas marrjes së informacionit, policia është nisur menjëherë në vendin ku ndodhi ngjarja, por deri dje në mbrëmje nuk kishte bërë të mundur arrestimin e ndonjë të dyshuari si autor i kësaj ngjarjeje.

Ergys Alushi

Ndalohet grupi adoleshent i vjedhjeve

SHKODËR- Policia ka ndaluar tre adoleshentë, përkatësisht 16 dhe dy të tjerë 13-vjeçarë, banues në një lagje periferike të qytetit verior, të cilët tentuan të vidhin një banesë, vetëm një orë para se të prangoseshin. Ndalimi i tyre në flagrancë është bërë rreth orës 16.00. 16-vjeçari Gj. P, është lindur në Dukagjin dhe banues në lagjen “Skënderbeg” të qytetit të Shkodrës. Arrestimi i tij u bë pasi të premten, rreth orës 14.30’, në bashkëpunim me të vëllanë e tij 13-vjeçar T. P, nxënës në klasën e 6-të si dhe shokun e tij bashkëmoshatar, shtetasin K. D, lindur në Nicaj të komunës së Shalës dhe banues po në lagjen “Skënderbeg” kanë tentuar së bashku që të vjedhin një banesë në lagjen “Vasil Shanto” të këtij qyteti. Lagjja në fjalë është fqinje me lagjen periferike “Skënderbej”, ku banojnë edhe 3 të penalizuarit për tentativë vjedhjeje. Aksioni i tyre për vjedhjen e banesës është pikasur ende pa filluar mirë nga të zotët e shtëpisë si dhe fqinjët, të cilët kanë bërë menjëherë denoncimin kundër tre grabitësve me eksperiencë adoleshente.

A. Lagreta

INTERVISTA

Kryetari i Komisionit Qendror të Zgjedhjeve komenton procesin zgjedhor më 18 shkurt dhe votimin në Shijak

Gjata: Zgjedhjet, mision i pamundur

Fatjona Mejdini

Kryetari i Komisionit Qendror të Zgjedhjeve, Çlirim Gjata, shprehet në intervistën e tij, të parë për procesin zgjedhor të 18 shkurtit. E konsideron atë si më të vështirin nga të gjitha proceset e tjera, të zhvilluara gjatë viteve të pluralizimit shqiptar. Vështirësive teknike për realizimin e një procesi në 384 njësi vendore, Gjata i shton edhe kohën e pakët që kishte KQZ-ja në dispozicion për të realizuar zgjedhje brenda standardeve. Vlerësimi i procesit zgjedhor si “një shans i humbur” nga ndërkombëtarët, sipas Çlirim Gjatës i faturohet faktorit politik, i cili nuk i dha KQZ-së komoditetin për të pasur kohën e mjaftueshme për të realizuar një proces zgjedhor brenda të gjitha standardeve. Gjata tregon se Komisioni Qendror i Zgjedhjeve ka qenë më i imunizuar nga ndikimi i faktorit politik gjatë zgjedhjeve që kaluan, por shton se është e pamundur që në një proces ankimi, ku ka humbës dhe të fituar, të mungojnë akuzat dhe deklaratat politike kundër vendimeve të KQZ-së. Në kuadrin e një reforme të thellë, zgjedhore, Gjata propozon edhe shkëputjen e procesit të ankimit nga funksionet e KQZ-së dhe Kolegjit Zgjedhor dhe delegimin e kësaj kompetence gjykatave civile në të gjithë vendin. Sipas Gjatës, sistemi zgjedhor duhet të pësojë ndryshime dhe të kthehet në proporcional të pastër. Duke shtuar këtu edhe nevojën për elektronizimin e procesit të numërit, Gjata thekson se procesi zgjedhor do të administrohej në mënyrë më të lehtë dhe për pasojë, partitë politike do të krijonin më shumë besim në proces. Kreu i KQZ-së shpjegon në intervistë dhe detyrimin që kishte institucioni që ai drejton për të shpëtuar procesin zgjedhor në zonën e Shijakut, proces që sipas tij u tentua të merrej peng nga shtabi elektoral i kandidatit të opozitës në këtë zonë. Por, sipas tij, e rëndësishme është që edhe mes vështirësive të ndryshme që u krijuan gjatë procesit, qytetarët shqiptarë arritën të votonin, duke plotësuar kështu edhe një të drejtë të pamohueshme, kushtetuese.

Ka përfunduar tashmë procesi për Zgjedhjet Vendore 2007-të, duke patur parasysh dhe procedurat e ankimimit pranë KQZ-së. Cili është opinioni juaj, i përgjithshëm mbi ecurinë në tërësinë e procesit?

- Gjëja më e vështirë është të japësh vlerësime të përgjithshme, kur ke të bësh me operacione kaq të mëdha e komlekse, sikundër është procesi zgjedhor. Gjithçka fillon shumë më herët nga data e zgjedhjeve, për të përfunduar, për fat të keq, shumë kohë pas saj. Në këtë moment, procesi është në përfundim e sipër. Kemi hequr "barrën" më të madhe e jemi gati në fundin e ankimimeve, si në KQZ, ashtu dhe në Kolegjin Zgjedhor. Jemi në gatishmëri për përsëritjet e zgjedhjeve, në ato zona ku nuk u zhvilluan apo dhe në ato që ka përcaktuar apo do të përcaktojë në ditët në vijim Kolegji Zgjedhor, të cilat, gjithsesi, janë shumë pak në raport me numrin e përgjithshëm të ankimimeve. Nëse e shoh procesin nga ana ime, si kryetar i KQZ-së, mund të them se ai ka ecur përgjithësisht mirë. Kemi realizuar një proces të rregullt, zgjedhor. Por, do të doja të cedoja pak nga pozita e kryetarit të KQZ-së për të ritheksuar atë që kam përsëritur shumë herë: procesin zgjedhor nuk e ka në dorë vetëm Komisioni Qendror i Zgjedhjeve. Fakti është se deri ditën e zgjedhjeve KQZ-ja arriti t'i bënte zgjedhjet. Të gjithë e dimë si u organizuan këto zgjedhje. Të gjithë jemi në dijeni të krizës politike dhe mungesen totale të besimit që e shoqëroi këtë proces, që solli dhe afatin shumë të ngushtë kohor për zhvillimin e zgjedhjeve. Pa asnjë ekzagjerim, theksoj se kanë qenë zgjedhjet më të vështira, nga pikëpamja administrative, për t'u organizuar në të gjithë historinë e proceseve zgjedhore, demokratike në Shqipëri. Nuk dua aspak të bëj krahasime me vitin 1997-të, pasi atëherë zgjedhjet kanë qenë të vështira dhe u konsideruan të pranueshme për të tjera shkaqe, për efektin dhunë, por jo për probleme për çështje administrative. Nëse kishte probleme administrative në 1997-tën, ato ishin për shkak të violencës e destabilitetit. Ndërkohë që, në këto zgjedhje patëm një vështirësi shumë të madhe në administrimin e procesit: efektin kohë. Pikërisht këtë efekt dhe faktor determinant në të njëjtën kohë, për organizimin e një procesi, nuk e ka në dorë KQZ-ja, por e kanë aktorët e tjerë, ku mbizotëron ai politik. Pra, kemi KQZ-në me kompetenca absolute për të organizuar një proces zgjedhor sipas Kushtetutës, por kemi dhe faktorin politik, që përbëhet nga partitë politike, përfaqësuesit e tyre në parlament, që kanë në dorë të bëjnë ligjin dhe kanë kompetenca të padiskutueshme, ligjore. Po ashtu, është dhe faktori President që cakton datën e zgjedhjeve, por edhe ai, në një farë mase, është i varur nga ky faktor politik. Tashmë dihet historia e datës së zgjedhjeve, pasojë e krizës politike. Kemi faktorin administrativ jashtë procesit, siç është qeveria dhe institucionet e tjera etj. Por, faktorin e kohë e kishte në dorë politika, e cila u bë pengesë serioze. Këtu, doja të thoja se, pikërisht atë kohë që na duhej, nuk e patëm, për shkak të krizës politike. Megjithatë, ne i bëmë zgjedhjet. Dhe kur kemi bërë zgjedhjet e vitit 2007-të, mund të bëjmë zgjedhje në çfarëdolloj kushtesh të tjera.

Mund të them se ky proces dukej “Një mision i pamundur”. Por ne ia dolëm. Organizuam procesin zgjedhor për 3 javë, një kohë jashtëzakonisht e ngushtë, me një mobilizim shumë të madh të të gjitha strukturave administrative të Komisionit. Ndërmorëm operacionin më të madh të shpërndarjes së bazës materiale, zgjedhore që është bërë ndonjëherë në historinë e zgjedhjeve, duke i çuar ato në 384 njësi. Asnjëherë më parë nuk ka ndodhur të shpërndahet në 384 njësi, derë më derë të çdo KZQV-je në Shqipëri, baza materiale nga K.Q.Z.-ja, në mënyrë të saktë dhe pa probleme. Sigurisht që një ndihmë shumë e madhe na është dhënë nga faktori administrativ, ku do të veçoja qeverinë apo struktura të tjera, të saj. Në kuadër të Memorandumit të Bashkëpunimit që u nënshkrua, ky fator u tregua i gatshëm në çdo aspekt. Gjithashtu, kemi pasur një komunikim shumë dobiprurës dhe efikas me forcat e ushtrisë. Ka patur një interesim të veçantë të vetë Shtabit të Përgjithshëm të Ushtrisë dhe Ministrisë së Mbrojtjes. Po shfrytëzoj rastin të falënderoj ministrin e Mbrojtjes dhe Shefin e Shtabit të Përgjithshëm për gatishmërinë e tyre në çdo moment të ditës dhe natës për problemet zgjedhore. 180 kamionë të ushtrisë u vunë në dispozicion, me ditë të tëra, për KQZ-në, në mënyrë që të shpërndahej baza materiale, pa folur për helikopterët. Po kështu, edhe forca njerëzore e ushtrisë, ku do veçoja shumë oficerë apo edhe ushtarë me një gatishmëri të habitshme. Kjo bëri të mundur realizimin e këtij operacioni. Të mos harrojmë që këto zgjedhje do të ndikonin jo pak në marrëdhëniet e vendit tonë me strukturat euro-atlantike. Nuk mund të lihet jashtë vëmendjes gjithashtu edhe puna e mirë e Policisë së Shtetit në këto zgjedhje. Policia ka luajtur një rol jashtëzakonisht pozitiv, e vlerësuar kjo edhe nga ndërkombëtarët. Pra, faktori komision dhe ai administrativ, në këtë rast qeveria, ndikuan vetëm për mirë në këtë proces. Ajo çfarë ka sjellë dëmin në raport me konstatimin “ një tjetër shans i humbur ”, është faktori politik në tërësi. Dhe vërtet, gjithë ajo punë e madhe në kohë tepër të shkurtër, u dëmtua sidomos ditën e zgjedhjeve dhe pas saj nga politikanë të ndryshëm apo edhe deputetë që me ndërhyrjet e tyre deri edhe bllokuan procesin në disa njësi. Ishte përsëri ndërhyrja e Komisionit në këto raste që stabilizoi situatat.

2- Sipas jush, çfarë mund të ishte bërë më mirë para, gjatë dhe pas procesit, në mënyrë që ai të vlerësohej më shumë nga faktorët e brendshëm dhe ata ndërkombëtarë?

- Mendoj dhe jam i bindur se gjërat mund të ishin bërë dhe më mirë, por, gjithmonë kjo për faktin se KQZ-ja nuk mund të operojë vetëm, pasi funksionon në një zinxhir pune, në të cilin ka shumë hallka. E them këtë jo për mburrje, por duke iu referuar vlerësimeve të njëpasnjëshme të faktorit ndërkombëtar për punën e mirë të KQZ-së. Analizat se çfarë mund të ishte bërë më mirë mos ia kërkoni kryetarit të K.Q.Z.-së, për këtë duhen analistët zgjedhorë. Dhe më vjen keq ta përmend, por kemi ndoshta shumë analistë politikë, ekonomikë, sociologë, të historisë, artit apo dhe fushave të tjera, por nuk kemi analistë të fenomeneve zgjedhore, megjithëse procesi zgjedhor në vend njihet për problematikat e tij dhe pasojat deri edhe politike që ka sjellë. Do të ishte mirë që analizat e këtij procesi të bëheshin nga këta analistë. Unë mund të veçoj, në respekt të pyetjes tuaj, megjithë konfliktin e interesit që kam, se ajo që do të ndihmonte që gjërat të ishin bërë më mirë, do të ishte fakti, sikur ne të kishim patur të paktën 3 muaj kohë më tepër në dispozicion. Në këtë rast, jam i bindur se zgjedhjet nuk do të ishin konsideruar “një shans i humbur”. Nuk po pretendoj për 6 muaj, siç e kërkojnë standardet ndërkombëtare, por vetëm gjysmën e kësaj kohe të kishim patur, shumë gjëra do të ishin realizuar shumë herë më mirë. Pse e them këtë? Shumë e thjeshtë: do të realizohej e gjithë strategjia jonë e trajnimit të komisionerëve. Procesi rrodhi në mënyrë të tillë, që ne, në fund të tij na mungonin 24 orë, pra, vetëm një ditë. Nëse do ta kishim atë ditë në dispozicion, shumë gjëra do të ishin realizuar saktë, por, për shkaqe që dihen, atë ditë nuk e pata... Mund t'jua argumentoj me një shembull konkret këtë fakt. Fletët e votimit u prodhuan me shumë vonesë, pasi gjithçka erdhi me vonesë. Ne morëm në fillim ato për qarqet më të largëta, si Kukësi, Saranda, Korça, të premten para datës së zgjedhjeve. Duke u plotësuar baza materiale për Kukësin, konstatuam se nuk ishin prodhuar fletët e votimit për Këshillin e Bashkisë, Kukës. Lajmëruam kompaninë italiane, e cila i prodhoi brenda natës. Të shtunën paradite, mbërritën me avion në Tiranë dhe me helikopter u transportuan në Kukës. Por nuk ndodhi kështu për dy komuna: atë Qendër, Malësi e Madhe, ku mungonin fletët e votimit për këshillin komunal dhe atë të Libofshës, ku mungonin fletët e votimit për kryetar. Është më se normale që në një proces zgjedhor të ndodhin një ose dy gabime të tilla. Problemi qëndron se gjithmonë ka kohë t'i rikuperosh ato. Dhe ne nuk patëm pikërisht këtë element në dispozicion, KOHËN. Qoftë dhe 24 orë më shumë të kishim, këto defekte do të ishin shmangur. Sigurisht, pati dhe disa probleme të vogla, teknike, por që nuk cenonin ndjeshëm ecurinë e procesit në ditën e votimit. Por ajo që do të doja të ndaja dhe me publikun e gjerë është një fakt i pakontestueshëm: angazhimi dhe përgjegjësia maksimale e punonjësve të administratës të Komisionit, ku mjaft prej tyre për 72 orë me radhë nuk pushuan asnjë moment, pasi për të fjetur as që bëhej fjalë. Dëshiroj që edhe publikisht t'i përgëzoj dhe në emër të Komisionit për punën e bërë, pasi ishte një faktor mjaft i rëndësishëm, i cili mundësoi zhvillimin e zgjedhjeve vendore. Gjithashtu, është e pakonceptueshme që për disa komuna në veri të vendit zgjedhjet nuk u zhvilluan, sepse partitë nuk ngritën Komisionet e Qendrave të Votimit. Pra, shkoi baza materiale dhe nuk kishte komisione. Unë nuk e di, kush e paguan koston e këtyre veprimeve të papërgjegjshme.

Tjetër fakt është që vërtet u arrit një marrëveshje politike, 5 javë para datës së zgjedhjeve, por ne dy javë rresht na u deshën për ngritjen e komisioneve vendore të nivelit të dytë dhe rishikimin e gjithë atyre akteve të miratuara më parë, por që duheshin përshtatur me ndryshimet në ligj. Propozimet nga partitë për komisionerët erdhën me vonesë, KZQV-të u krijuan me shumë vonesë. Arritëm të trajnonim rreth 70 % të anëtarëve të tyre, por më duhet të pohoj se, rreth 80% e komisionerëve, në të gjithë vendin, u ndryshuan më pas. Do të thoja se është një e drejtë abuzive që ligji iu jep partive në lidhje me komisionerët. Po kështu, komisionerët e qendrave të votimit u emëruan deri ditën e fundit dhe shumë prej tyre nuk arritën të trajnoheshin fare. Shumë nga gabimet, për të cilat sot, partitë kërkojnë pavlefshmërinë e zgjedhjeve, vjen pikërisht për këtë shkak. Por jo vetëm këto. Edhe grupet e numërimit të votave u krijuan me shumë vonesë, madje, mjaft prej tyre deri dhe një orë para fillimit të procesit të numërimit. Pra, megjithëse patëm një marrëveshje politike, të gjitha këto fakte që përmenda më sipër erdhën si rezultat i mosrespektimit nga ana e subjekteve politike të detyrimit të tyre, për të paraqitur komisionerët e të gjitha niveleve në afatet kohore, të përcaktuara në ligj. Një korrektësi dhe përgjegjshmëri më e madhe nga ana e tyre do të kishte ndikuar ndjeshëm që gjërat të shkonin shumë më mirë. Nuk do të kishim patur kaq pavlefshmëri sa kemi tani.

Ndërsa, përsa i takon vlerësimit të faktorit të brendshëm, dihet që ai është partizan. Siç e theksova, për fat të keq, ne nuk kemi ende analistë të mirëfilltë, elektoralë, të cilët mund të bënin një analizë të thellë të procesit zgjedhor, analizë, e cila mungon. E vetmja analizë objektive e punës sonë, aktualisht vjen nga vëzhguesit ndërkombëtarë, ku mund të pohoj se deri në fillimin e proceseve ankimore kemi marrë vlerësime pozitive në të gjitha rastet. Por, le të presim raportin e tyre, përfundmitar, për të gjykuar të gjitha aspektet.

3- Gjatë shqyrtimit të çështjeve nga ana e KQZ-së janë vënë re debate mes anëtarëve të komisionit dhe shpesh janë hedhur akuza politike. Sa është realisht e larguar KQZ-ja nga subjektet politike që propozojnë anëtarët e saj?

Përderisa Komisioni përbëhet nga 9 anëtarë, normal është që të ketë dhe debate. Përsa i takon faktit se bëhen akuza politike, nuk ia vlen të merremi me to. Gjithmonë ndaj Komisionit janë hedhur akuza politike, gjithmonë nga Komisioni ka ngelur e pakënaqur politika. Le t`i referohemi rastit të fundit. U bë shumë zhurmë për Komisionin, sa u arrit deri në ndryshimin e Kushtetutës dhe nga 7, institucioni u bë me 9 anëtarë. Menduam se u zgjidh gjithçka në lidhje me Komisionin. Por ja që përsëri akuzat politike vazhduan, sharjet gjithashtu... Ishin vetë politikanët që ndryshuan Kushtetutën dhe e rregulluan, e bënë si deshën dhe prapë nuk janë të kënaqur. Mendoj se çështja e komisionit është një çështje e mbyllur. Derisa kemi ndërhyrë në Kushtetutë dhe arritëm në këtë formulë, në këtë zgjidhje, nuk mund të bëhen më ndërhyrje. Këtu ka një moment që mund ta diskutojmë më poshtë për çështjen e reformës zgjedhore, si mund të organizohet puna e Komisionit, raporti mes tij dhe politikës, sidomos në çështjen e ankimimeve. Ajo që ndodh është se deri në ditën e zgjedhjeve, palët politike nuk kanë pothujase asnjë akuzë ndaj Komisionit. Për organizimin e procesit zgjedhor Komisioni ka patur harmoni të plotë, asnjë akuzë apo problem. Akuzat dhe goditjet ndaj Komisionit fillojnë gjatë procesit të ankimimit, ku institucioni kthehet në një “quasi gjykatë”. Kjo është një çështje tjetër. A duhet të ishte kështu? Kjo i përket reformës zgjedhore për ta përcaktuar. Pala që humbet do të ketë ankesat e veta, njësoj si në gjykatë, pala që humbet gjyqin, shan gjyqtarët. Kështu ndodh dhe me ne. Le të gjejmë një formulë tjetër, ta ndërtojmë ndryshe punën e Komisionit. Por, po i lamë në dorë shqyrtimin e çështjeve, kështu do të dalim përsëri. Si njëra palë, ashtu dhe tjetra do të hedhin akuza politike! Janë të pashmangshme këto raste. Por, ajo që kam theksuar dhe theksoj sërish është se nuk ka patur konkretisht ndonjë akuzë ndaj KQZ-së, ku të thuhet se ky apo ai vendim bie në kundërshtim me ligjin kaq apo nenin aq. Vendimet tona, nga ana tjetër, shqyrtohen nga Kolegji Zgjedhor. Pra, kemi një ankimim në komision, kemi vendim të komisionit, ankimim në kolegj dhe prapë vendim në kolegj. Mendoj se ka tashmë rrugë ligjore, procedura, ka institucione. Ndërhyrja politike dhe akuzat nuk bëjnë asgjë tjetër vetëm ulin nivelin e vetë politikës në tërësi, por dhe në raport me faktorin ndërkombëtar në veçanti.

4- Jo rrallëherë, eksponentë të politikës shqiptare e akuzojnë KQZ-në për militantizëm apo vendime "partizane". A e ka ndjerë KQZ-ja në punën e saj, qoftë dhe për vendimet e saj këtë presion dhe si ndikon apo sa ndikon ai në punën tuaj?

- Për këtë nuk e quaj të arsyeshme të jap një mendim. Ky komision merr vendime dhe ato më pas shqyrtohen në Kolegj. Nuk kam dëshirë të shprehem për raporte midis komisionit dhe politikës, pasi secili anëtar e vlerëson vetë këtë fakt. A ka pasur ndikim politika? Kam vënë re një gjë; ndërhyrjen e deputetëve në komisionet e niveleve të dyta, sidomos në KZQV dhe komisionet e tjera, gjatë numërimit të votave. Rasti më tipik dhe më flagrant është rasti i Bushatit, ku ndërhyrja e deputetëve bllokoi numërimin e votave. Ku kemi patur ndërhyrje të deputetëve, ka patur dhe probleme. Edhe këtu në KQZ kemi patur ndërhyrje të deputetëve. Por një gjë është e qartë, se nuk ndikojnë aspak këtu. Jemi organ kushtetues dhe nuk ndikohemi aspak, nëse vijnë deputetët apo politikanë në sallë. Presioni në këtë rast është shumë më pak i ndjeshëm, po kështu edhe figura e politikanit që kërkon të imponohet në proces. Është tjetër presioni politik që mund të vijë "underground", duke filluar nga përfaqësuesit politikë të partive parlamentare apo institucioneve të tjera. Besoj se gjithsecili nga ne duhet të përgjigjet vetë për këtë. Unë nuk mund të flas në emër të tyre. Përsa i takon presionit të hapur që vjen nga prezenca e figurave politike, deklaratave mediatike etj., si këto, ju garantoj se nuk shqetësohet asnjëri prej nesh. Mendoj se ka ardhur koha dhe është arritur ajo pjekuri institucionale, sa nuk merakoset më njeri për imunitete politike, deklarata politike, akuza apo presione. Janë bërë kaq të shpeshta dhe kaq të pabaza, sa kanë humbur vlerën reale dhe komisioni është shumë më i "imunizuar" në raport me to.

5- Përtej kësaj që ju shpjegoni, ka rënë në sy fakti se një pjesë e vendimeve për çështje të "nxehta" janë marrë me kuorumin 5 me 4. Si e komentoni këtë fakt?

Mendoj se dhe ju me këtë pyetje nuk i keni shpëtuar paraqitjes së jashtme të KQZ-së 5 me 4. Çdo institucion mediatik që ndjek punën e KQZ-së, në çdo detaj, duhet gjithashtu të vinte re se kjo nuk është e vërtetë në çdo çështje. Ka raste, kur votimi ka dalë në raporte 5 me 4, por ka akoma shumë më shumë çështje të tjera që kanë pasur tjetër raport, si 6 me 3 e deri në 9 me 0. Ka çështje që kanë dalë 5 me 4, por, në këndvështrimin tim, aspak nga pozita politike, deri në vitin 2005-së, Komisioni u akzua si Komisioni 7 me 0, si Byro Politike etj. Këtë herë akuzohemi se votohet 5 me 4. Si mund ta gjejmë ekuilibrin e kësaj pune...? Ajo që do të veçoja, është fakti se e gjithë puna për përgatitjen e procesit deri ditën e zgjedhjeve, që është pjesa më e rëndësishme e procesit, është realizuar 7 me 0 dhe dhjetë ditët e fundit edhe 9 me 0. Pra, nuk ka asnjë kontestim për përgatitjen e procesit. Kontestet dhe ndarjet 5 me 4 fillojnë pikërisht gjatë procesit ankimor, por janë palët ankuese ato që kanë sjellë shkeljet. Përsa iu takon çështjeve, nuk bëj dallime, sikundër shpesh paraqiten gjërat në media, "çështje të nxehta" ose "komuna dhe bashki të rëndësishme", për faktin e thjeshtë se përballë ligjit këto nocione nuk kanë asnjë vlerë. Çdo komunë dhe bashki në vend, duke filluar nga Tirana e deri te komuna më numër të kufizuar banorësh për ne janë të barazvlefshme ligjërisht. Në mjaft raste bashkish apo komunash të mëdha, ne i kemi kaluar pa probleme, sepse ishin çështje të thjeshta. Mirëpo Kolegji ka bërë interpretimin e tij dhe, në disa raste, ka shpallur pavlefshmërinë në tërë zonën, pikërisht në ato njësi të vogla që ne nuk e mendonim kurrë se do të shkonin në një vendimarrje të tillë. Këtu s' ka të bëjë fare ndarja 5 me 4. Shumica e çështjeve kanë qenë çështje interpretimi. Këtu votimi nuk është bërë 5 me 4 për "arsye politike", por për arsye këndvështrimi të ligjit. Nuk mund të jap një numër të saktë, por jam i bindur se vendimmarrja 5 me 4 është në minorancë, me raport me 280 kërkesat ankimore të depozituara në KQZ. Çështja është te ruajtja e një standardi gjykimi, te mënyra sesi dikush e interpreton ligjin. Nëse bën një interpretim të caktuar në një çështje, është mirë të mbash të njëjtin standard edhe për çështjet e tjera, analoge. Gjatë punës kemi patur disa standarde, të cilat jemi munduar vazhdimisht t'i zbatojmë me korrektësi. Ka patur dhe hezitime, sepse është e pamundur, ndoshta të përballosh tërë këtë gamë ankimimesh. Kemi gjykuar rreth 15 çështje në ditë. Nga ecuria e punës sonë varet konstituimi i një pushteti të tërë dhe për këtë duhet të nxitojmë, janë një sërë fondesh që presin të lëvrohen për pushtetin vendor, që nuk lidhen në mënyrë të drejtpërdrejtë me ne, por që ne ndikohemi nga këto fakte dhe ky mund të quhet presion.

6- Institucioni që ju drejtoni është akuzuar nga opozita, midis të tjerash, se ka vonuar qëllimisht nxjerrjen e rezultatit përfundimtar të zgjedhjeve. Cila është përgjigjja juaj?

Nuk iu përgjigjem akuzave apo deklaratave. Preferoj të flas për fenomenin dhe jo individët. Problemi është se në nxjerrjen e rezultatit ka një detyrim ligjor. Komisioni nxjerr vetëm një rezultat, atë përfundimtar dhe nuk nxjerr rezultat tjerër. Ky rezultat nxirret, pasi ka mbaruar ankimi i fundit, i çështjes së fundit, pas përsëritjes së fundit. Ne jemi në një proces ankimor. Mbarojnë çështjet në Komision, shkojnë në Kolegj. Shohim se cilat kalojnë në përsëritje, mbarojnë ankimet në Komision dhe Kolegj dhe, kur mos kemi më asnjë ankim, jemi të detyruar të shpallim rezultatin përfundimtar. Kjo është ana ligjore e shpalljes të rezultatit përfundmitar e ne nuk mund të dalim jashtë këtyre parametrave. Por, në momentin që për një njësi vendore nuk ka ankime, nuk ka problem ligjor për mandatimin e kandidatëve fitues apo konstituimin e këshillave respektivë dhe ata mund të fillojnë nga puna. Shpallja e rezultateve nuk po zvarritet. Pretendimi për këtë është i pabazë. Çdo vonesë ka ardhur si rezultat i ankimimeve të shumta, rreth 280 ankimime sikundër e thashë dhe më lart dhe këto ankimime në pjesën më të madhe, të tyre kanë ardhur pikërisht nga partitë politike, kryesore! Ne duhet t'i shqyrtojmë, të bëjmë një hetim administrativ, të saktë, të plotë, të kujdesshëm dhe të marrim një vendim. Më pas, palëve iu lind e drejta të shkojnë në Kolegj. Është diçka që e përcakton ligji dhe jo KQZ-ja.

7- Duke qenë se ju jeni një teknicien i fushës, por dhe me një përvojë relativisht të gjatë në KQZ, çfarë mund të rekomandoni për një zgjidhje me optimale të kësaj teme, por dhe për aspekte të tjera?

- Ka një postulat që thotë: “Kur do të më duhet mendimi yt, ta kërkoj vetë”. Sa herë janë realizuar reforma zgjedhore, janë bërë kode ose ndryshime në Kodin Zgjedhor, i vetmi institucion që nuk i është kërkuar mendim është KQZ-ja. Po kështu, në amendimet më të fundit të Kodit Zgjedhor në fuqi. Nuk e di ç' do të bëhet në reformën e ardhshme, e cila duhet kryer domosdoshmërisht. Ka mendime për një reforme të thellë zgjedhore, një Kodi të ri, duke filluar që nga sistemi zgjedhor në tërësi e deri në detajin e fundit teknik. Nëse do të më kërkohej mendimi, unë do të jepja gjithmonë mendime bashkë me kolegët e mi, mendime dhe zgjidhje të anëve teknike të Kodit, pa hyrë aspak në ato politike. Përsa i përket çështjes së ankimimeve, e ritheksoj se KQZ-ja është vënë në kuadrin e një "quasi gjykate". Kjo duhet reformuar. Si mund të bëhet? Ka shumë forma, por do të mendoja se, qoftë shqyrtimi në Komision, qoftë shqyrtimi në Kolegj, mbase janë të tepërta. Ndërkohë që ne kemi 6 gjykata apeli civil në Shqipëri. Pra, 12 qarqe kanë 6 gjykata të tilla, një raport i mirë. Do ishte shumë më e shpjetë dhe shumë më optimale, sikur procesi ankimor të lihej në dorë të gjyqtarëve civilë, pa lidhje me procesin zgjedhor. Kjo edhe pse, nëse një organ administrativ merr një vendim ndaj një qytetari, qytetari nuk e ankimon prapë në të njëjtin vend vendimin, por e ankimon në gjykatë. Shkon tek arbitri, te gjykata civile, bën një kundërshtim antiadministrativ që bie në kundërshtim me interesat e tij dhe kërkon zgjidhje. Kjo logjikë duhet të funksionojë edhe për procesin zgjedhor. Nëse edhe pas reformës e lëmë procesin e ankimit në dorë të KQZ-së dhe Kolegjit, do të vazhdojmë të kemi probleme. Pra, fola vetëm për një kapitull të reformes. Por, në tërësi, do të theksoja se ky sistem zgjedhor duhet të thjeshtëzohet. Është shumë, shumë i ndërlikuar.

8- Opozita akuzoi KQZ-në si shkaktare të dëmtimit të procesit zgjedhor në Shijak, pas udhëzimit tuaj për zbatimin e Nenit 100 të Kodit Zgjedhor dhe jo sipas dispozitave kalimtare që u bënë në Kodin Zgjedhor për zgjedhjet vendore. Sa real është pretendimi i tyre?

- Nuk dua të debatoj aspak me opozitën në lidhje me zgjedhjet, pasi jam teknicien jo politikan, por do të shpjegoj vetëm vendimin tonë për zgjedhjet në Shijak nga pikëpamja ligjore dhe si e manaxhuam procesin dhe situatën që u krijua atje. Problemet në Shijak filluan që ditën e shtunë. U kërkua që të aktivizoheshin disa deputetë me titullin e vëzhguesit, megjithëse kishin kaluar afatet ligjore për këtë. Se çfarë do një deputet të akreditohet si vëzhgues në një zonë zgjedhore, në qendër votimi, këtë e dinë, ata që e kërkuan. Pa folur këtu për funksion kushtetues të deputetit që nuk pajtohet me asnjë funksion tjetër. Megjithatë, KZZ-ja nr. 26 i pranoi, sepse ne vazhdojmë akoma me teorinë e gabuar, se mjafton që palët të bien dakord, edhe nëse kjo përbën shkelje ligji, nuk ka asnjë problem. Kështu, ata u akredituan jashtë afatit. Më pas, doli problemi i dytë, nëse do të përdorej regjimi i certifikatave të 18 shkurtit apo jo. Ligjërisht nuk mund të përdorej më ai regjim në zgjedhjet parlamentare, sepse është një dispozitë kalimtare dhe ka titullin e përdorimit vetëm për zgjedhjet vendore 2007-të. Pra, ishte dispozitë vetëm për ato zgjedhje dhe pas tyre mbaron në mënyrë automatike. Më ka bërë përshtypje një deklaratë e zv/kryetarit të KZZ-së ditën e shqyrtimit të çështjes në KQZ për zonën 26, kur tha se, nga dega e PS-së së Shijakut dhe shtabit elektoral të kandidatit të opozitës u vunë dy kushte: akreditimi i deputetëve dhe zbatimi i regjimit të certifikatave për zgjedhjet e 18 shkurtit. U shpreh se të dyja këto kushte ishin të panegociueshme nga ana e tyre! Sinqerisht më ka bërë shumë përshtypje. Si mund të arrihet të vihen në një proces zgjedhor kushte të panegociueshme?! Pra, ne marrim procesin peng dhe i vendosim këto kushte. Por ata mund të vinin edhe kushtin se duam 1 milion dollarë ose ndryshe nuk çojmë komisionerë! Procesi nuk bëhet në bazë kushtesh, ai zhvillohet normalisht në bazë të një kuadri ligjor, të përcaktuar qartë, ku mbahet shënim çdo gjë, deklarohet çdo shkelje dhe bëhet ankimim në KQZ. Kjo ka qenë kërkesa më antikushtetuese që unë kam dëgjuar në një proces zgjedhor. Dega e një partie, që nuk është as subjekt për të bërë kërkesa zyrtare, vendos kushte të panegociueshme. Më interesantja është se KZZ-ja nr. 26 vendosi t'i plotësojë këto kushte. Të shpërndajë ditën e shtunë regjistrin e posaçëm të certifikatave në çdo qendër votimi, pranoi ditën e diel me vendim që aty ku ka dyshime, certifikata të shoqërohet me dokument tjetër, pra, kthehu regjimin e zgjedhjeve vendore. Megjithëse unë e kisha deklaruar dhe i gjithë komisioni ishte në një mendje se kjo nuk shkonte, se ishte e paligjshme, KZZ-ja vendosi përsëri në kuadrin e mentalitetit: "Le të shkelim ligjin, por mos të bëjmë zhurmë". Atëherë, këtu ka filluar fenomeni i tretë. Megjithëse deri në orën 10.00, komisionerët e majtë nuk kishin shkuar në qendra, filluan të nxirrnin pretekste të tjera, si ka presione etj. dhe ikën. Në këtë çast, KQZ-ja u ndodh para një gjendjeje të rëndë, ku duhej të merrte situatën në dorë. Ne jemi një institucion kushtetues dhe nuk mund të tolerojmë situata të tilla bojkotesh, kushtesh dhe marrjesh peng të procesit zgjedhor. Në rast se Komisioni nuk arrin ta zgjidhë këtë gjë, atëherë s' ka pse të jetë Komisioni. Prandaj ne ndërhymë me një vendimmarrje kushtetuese si institucion kushtetues qe jemi, ku votimi duhej të kryhej qoftë dhe me një vulë, qoftë edhe pa kuorum në komisione. Thuhet se kemi shkelur ligjin, por ligji u bllokua, nuk ishte më në zbatim, ata morën vulat dhe ikën. Atëherë nuk kishim si të shkelnim një ligj që nuk ishte më, i cili për shkak të faktit të ndodhur, nuk zbatohej më. Atëherë ne zbatuam direkt Kushtetutën. Ne respektuam të drejtën e qytetarit për të votuar, që prevalon mbi gjithçka. Kjo është një e drejtë themelore, universale, qindravjeçare dhe janë bërë luftëra dhe revolucione për këtë të drejtë vote. Askush nuk mund të thotë: Ti nuk mund të votosh, se nuk dua unë. Prandaj ne morëm atë vendim dhe i dhamë të drejtën qytetarit për të votuar. Çështja e rezultatit nuk është puna jonë. Ne s' kemi të bëjmë fare me të. Ky vendim u ankimua në Kolegj dhe kjo gjykatë vendosi lënien në fuqi të vendimit tonë.

9- Megjithëse diferenca e votave në Bashkinë e Durrësit ka qenë e vogël mes dy kandidatëve, ju keni votuar kundër rinumërimit të disa votave të shpallura të pavlefshme nga KZQV-ja, të cilat mund të ndryshonin rezultatin. Pse kjo vendimmarrje?

Qëndrimin në fjalë e kam mbajtur jo vetëm për Durrësin, por edhe në rastet e tjera. Jemi gjithmonë te standardet që vendosim në punën tonë. Nuk është e thënë se votat e pavlefshme gjithmonë rinumërohen. Interpretimi im në atë rast është se po të bëje llogari, rezultonte se për çdo qendër votimi ishin 7 ose 8 fletë të pavlefshme. Por, për një zonë, ku ka një diferencë mes kandidatëve, kjo është fare normale. Ndryshe do të qëndronte problemi, nëse do të kishim një qendër votimi, e cila do të ishte totalisht e pavlefshme dhe kjo do të ndikonte në rezultat. Zona do të kishte shkuar për pavlefshmëri. Por, nëse në një kuti votimi kemi 5 fletë të pavlefshme dhe 350 të vlefshme, nuk përbën shkak që ato të hapen dhe të rivlerësohen. Pra, këtu kemi mbajtur një standard. Ndryshe qëndron puna në rastin e Elbasanit, ku, në një qendër, votimi nuk është zhvilluar dhe një kuti ishte e dëmtuar, në atë masë sa nuk mund të numërohej më.

10- Të gjithë papërjashtim shprehen për domosdoshmërinë e një reforme të thellë, zgjedhore dhe për ndryshimin e sistemit zgjedhor, parlamentar në vend? Sipas jush, cili do të ishte sistemi më i përshtatshëm në kushtet e Shqipërisë?

- Nëse i referoheni ndryshimit të sistemit vetëm nga ana politike, nuk do të ndërhyja, sepse përcaktimi i sitemit është një zgjidhje politike. Ne kemi një nga proceset më të ndërlikuara jo vetëm në Evropë, por edhe në shkallë botërore. Kemi kaq shumë procedura, dokumentacione, infrastrukturë, e deri në detajet e tjera. Ky proces është shumë i ndërlikuar, më shumë i ngatërron qytetarët dhe çështjen sesa e zgjidh atë. Këto procedura të komplikuara janë bërë shumë herë shkak për kontestime. Mendoj se duke filluar që nga sistemi, procesi duhet të ishte më i thjeshtëzuar. Por këto ndryshime kërkojnë ndërhyrjen në Kushtetutë. Për ne një sistem i lehtë dhe i manaxhueshëm më mirë, do të ishte një proces më i thjeshtë nga pikëpamja proceduriale dhe ajo e kontrollit. Ajo çfarë doja të theksoja, qëndron te fakti se do të ishte e udhës që të merrej edhe konsulta e Komisionit në lidhje me reformën zgjedhore, gjithmonë duke u nisur nga ana teknike, që synon thjeshtëzimin e procesit zgjedhor në Shqipëri. Kjo kërkon ndërhyrje dhe investim. Së pari, regjistrimin e popullsisë dhe identifikimin e zgjedhësve me karta identiteti, duke futur teknologjinë në procesin zgjedhor, si numërimi elektronik i votave etj. pa përjashtuar numërimin manual që përdoret për siguri ose në rast verifikimesh. Modernizimi i sistemit zgjedhor do të sillte më shumë besim mes palëve, sepse teknologjia çdo gjë e bën më të pranueshme, më saktë dhe i vendos faktorët e tjerë në pozicione më të favorshme.