arkiva

Seksionet

•Home

•Editorial

•Politika

•Speciale

•Kronika

•Intervista

•Komente

•Opinion

•Aktualiteti

•Rajoni

•Bota

•Ekonomi

•Reportazh

•Rrethe

•Kultura

•Sporti

•Forum

•Dossier

•Sociale

•Arkiva

•Tema E-mail

Lidhje

•Deutsche Welle

•BBC Shqip

•Zeri i Amerikes

•EDSH

•Rilindja Demokratike

•Besnik Aliaj

•Zeri Yt

Shtypi i Huaj

•New York Times

•The Washington Times

•The Times

•Independent

•Guardian

•Frankfurter

•Corriere della Sera

•Il Giornale

•Le Figaro

•Le Monde

Drejtor Mero Baze

ARKIVA

EDITORIAL

Fajdet, lojë politike e vjetëruar

Çelo Hoxha

Gjatë fushatës elektorale të vitit 2005-së, socialistët u munduan të kthenin në vëmendjen e qytetarëve ngjarjet e vitit `97-të, duke iu bashkangjitur atyre me kokëfortësi, emrin e kryetarit të demokratëve, asokohe në opozitë, Sali Berishës. Rezultati i votimeve të 3 korrikut e deklaroi të dështuar strategjinë e përdorimit të së shkuarës jo fort të afërt për qëllime politike. Ashtu si gjykatat, edhe populli nuk ndëshkon dy herë për të njëjtën gjë, hera e parë ishte në vitin 1997-të.

Gati dy vjet më vonë, situata është ndryshe, ndoshta rastësisht, ndoshta me paramendim, por efekti që socialistët nuk arritën më 2005-sën po bëhet realitet, veçse me një strategji më të kamufluar. Çdo ditë ngrihemi nga gjumi dhe mediat vrapojnë të na informojnë si ecin punët e fajdeve. Në debatin e ri duket sikur nuk ka asnjë përfitim politik, sepse fushata elektorale ka mbaruar, ndërsa fushata tjetër do shfaqet pas dy vjetësh në horizont. Atëherë, ç’po bëhet? Politikë, natyrisht, alla shqiptarçe, zakonet nuk zhduken sa hap e mbyll sytë.

Sido që të jetë e vërteta, pavarësisht se i akuzuari i madh, Berisha, kurrë nuk u gjet fajtor për piramidat, edhe pse kundërshtarët e tij, politikë patën tetë vjetë kohë ta hetonin, pavarësisht se socialistët mund të justifikohen se fajdet janë çështje e gjykatës dhe ato e kanë dhënë vendimin e tyre, pavarësisht faktit – ose justifikimit – se ato u bënë çështjeve e mediave për shkak të fakteve të reja që kanë dalë këtu apo në Greqi, sa herë që do të hapet kjo çështje, ajo ka për të lënë një farë hijeje negative mbi karrierën e disa politikanëve të caktuar; mbi ata politikanë që quhen “brezi i vjetër” në të dyja kampet, vetëm se gjuajtja bëhet me rikoshetë. Më i fituari në këtë mes, padyshim që është Edi Rama, sepse nuk janë këto bizneset, kjo s’duhet mohuar, për të cilat ai mund të akuzohet. Edi Rama e di këtë dhe e ka nuhatjen për ta shfrytëzuar: në mes të debatit për fajdet famëkeqe, të cilat e çuan vendin në buzë të greminës, ai ulet dhe i dërgon kundërshtarit një letër të hapur bashkëpunimi.

Por kjo është një lëvizje taktike e dobët. Një letër bashkëpunimi mes dy institucioneve nuk dërgohet nëpërmjet mediave, ose nuk shkon më parë në të gjitha redaksitë e pastaj në postë. Por këtu janë keqkuptuar marrëdhëniet me publikun, më duket se në disa institucione punohet vetëm për të lajmëruar mediat, duke ia zbehur vlerën informacionit.

Fajdet nuk përbëjnë më problem të përgjithshëm, politik. Retorika politike, sado e egër qoftë, nuk do të cenojë fatet e asnjë partie. Ato janë vetëm çështje e prokurorisë dhe gjykatave, të cilat mund ta rihapin çështjen, sa herë që dalin në dritë fakte të reja, siç ka ndodhur edhe javët e fundit. Por këtu ka një problem që mua më duket më i rëndësishmi.

Prokuroria e ka trajtuar njëherë çështjen e fajdeve dhe e ka bërë këtë në mënyrën më të keqe të mundshme. Prokurori që e ka mbuluar çështjen, është akuzuar publikisht para disa ditësh se ai është personi që e ka devijuar hetimin, por kjo të lë të kuptosh se ai nuk ka vepruar në kokën e vet, përderisa askush nuk merr një masë, qoftë edhe administrative ndaj tij.

Me pak fjalë, më parë duhen bërë reformat e duhura në prokurori dhe gjykata, pastaj të merret në shqyrtim çështja e fajdeve dhe gjithë çështjet e ngjashme me të. Kështu që, kur flasim për fajdet, nuk mund të vazhdojmë të akuzojmë atë e këtë politikan, por duhet të kërkojmë reformimin e institucioneve që do t’i hapin rrugë kërkimit të së vërtetës. Dhe e vërteta, aq sa është e mundur, duhet zbuluar, sepse në vitin `97-të shqiptarët nuk humbëm miliona dollarë, nuk humbën lekët e shtëpisë apo të lopës së vetme në familje, nuk është çështja se rrezikuan të zhyteshin në luftë civile, jo, me rrëzimin e piramidave dhe gjithçka që pasoi, shqiptarëve iu shkatërrua një ëndërr, ndoshta ëndrra e tyre, më e madhe në atë periudhë.

Dakord, mund të ketë qenë një ëndërr e keqe, por zbulimi i të vërtetës nuk është i dëmshëm.

POLITIKA

Topi dhe Patozi ngarkohen për zëvendësimet që do i bëhen ministrave në komisionet parlamentare

PD-së i duhet të ndërhyjë për zëvendësime në 4 komisione parlamentare

Në mbledhjen e fundit të grupit parlamentar të Partisë Demokratike është diskutuar dhe në lidhje me zëvendësimet që pritet të bëhen në komisionet e përhershme të Kuvendit, pas emërimit të disa deputetëve në poste të ndryshme ministrore. Burime në PD, shprehen se me zëvendësimet e emrave do të merren kryetari i grupit parlamentar të PD-së, Bamir Topi dhe deputeti Astrit Patozi. Duket se më i prekuri nga ndryshimet është komisioni parlamentar i Ligjeve, ku do të duhet të zëvendësohet emri i Gazmend Oketës, zëvëndëskryeministër dhe emri i Nard Ndokë, ministër i Shëndetësisë. Gjithsesi, emri i këtij të fundit do të zëvendësohet nga një tjetër deputet i grupit parlamentar të PDK-së. Në komisionin parlamentar për Edukimin dhe Informimin Publik, Ylli Pango, nënkryetar i këtij komisioni tashmë duhet të zëvendësohet me një tjetër emër, ndërkohë që zëvendësim do të ketë dhe në komisionin për Sigurinë Kombëtare, ku Bujar Nishani, tashmë ministër i Brendshëm mbante postin e sekretarit. Ndërkohë, që për postin e sekretarit, Partia Demokratike duhet të mendojë edhe në komisionin e Çështjeve Sociale dhe Shëndetësisë, pas emërimit të Majlinda Bregut në krye të ministrisë së Integrimit. Nga ana tjetër, zëvendësime duhen bërë dhe në komisionet, ku disa prej deputetëve mbanin postin e anëtarit zëvendësues, siç është komisioni i Veprimtarive Prodhuese, tregtinë dhe mjedisin, si dhe Komisionin e Jashtëm Parlamentar, ku anëtar zëvendësues ishte Gazmend Oketa.

Prefektura e Vlorës, pro konstituimit të Këshillit Bashkiak

Prefektura e Vlorës është shprehur "pro" konstituimit të Këshillit të Bashkisë së këtij qyteti. Sekretarja e Përgjithshme e Prefekturës, Dorote Konomi, tha dje, gjatë një prononcimi për median, se, "procesi i konstituimit ishte i rregullt dhe në përputhje me ligjin". Sipas Konomit, prefektura është shprehur për ligjshmërinë e procedurave të konstituimit të Këshillt të Bashkisë, gjë që i ka hapur rrugë mbledhjes së tij. Por, edhe pse kanë kaluar rreth dy javë pas zhvillimit të këtij procesi, ky këshill nuk është mbledhur ende, për shkak të kontestimeve që i janë bërë nga përfaqësuesit e PS-së dhe të disa partive të tjera, opozitare, duke përfshirë edhe kreun e Bashkisë së Vlorës. Ata e kanë cilësuar të paligjshëm këtë proces, për shkak të disa shkeljeve proceduriale, duke iu drejtuar për këtë dhe Gjykatës Kushtetuese. Gjatë votimit të zhvilluar dy javë më parë, kryetar i Këshillit Bashkiak të Vlorës u zgjodh përfaqësuesi i LSI-së, ndërkohë që në funksionin e nënkryetarit u konfirmua një prej këshilltarëve të Partisë Republikane

Kryeministri Berisha i përgjigjet pozitivisht ftesës së opozitës për bashkëpunim. Ironizon letrën e Ramës

Berisha: Letra të tilla Rama i ka dërguar dhe Nanos e Metës

“Në sirtarët e mi kam gjetur letra të shumta, që zoti Rama i dërgonte zotit Nano dhe zotit Meta dhe do ta këshilloja që forma me letra të hapura komunikimi është jo e ndaluar, por arkaike sa vetë letra e Enver Hoxhës në 1967-tën, që iua drejtonte shqiptarëve”, - tha kryeministri

“Letrat e Edi Ramës përngjajnë me ato të Enver Hoxhës që dikur ia dërgonte popullit”. Kjo ka qenë përgjigjja e kryeministrit, Sali Berisha, ndaj letrës së hapur që Edi Rama, kryetar i PS-së vetëm një ditë më parë i dërgonte shefit të qeverisë. Berisha u shpreh se kjo nuk është letra e parë që Rama i dërgon një kryeministri dhe se letra të tilla i ka dërguar dhe kryeministrave të tjerë, Meta dhe Nano. “Në sirtarët e mi kam gjetur letra të shumta, që zoti Rama i dërgonte zotit Nano dhe zotit Meta dhe do ta këshilloja që forma me letra të hapura komunikimi është jo e ndaluar, por arkaike sa vetë letra e Enver Hoxhës në 1967-tën, që iua drejtonte shqiptarëve”, - tha kryeministri për mediat. Gjithsesi, Berisha u shpreh se të gjitha këto nuk përbëjnë asnjë pengesë reale për bashkëpunimin mes opozitës dhe pozitës, por, gjithsesi, kryeministri nuk e sheh të udhës që t’i kthejë përgjigje në të njëjtën mënyrë Ramës. “Të gjitha këto nuk përbëjnë asnjë pengesë reale që të mirëpres vullnetin e sinqertë për të bashkëpunuar në reforma, në të gjitha fushat. Ne jemi një qeveri që procedojmë me reforma të gjithanshme. Jemi dhe do të jemi të ndjeshëm ndaj interesave të veçanta të opozitës. Unë jam i vetëdijshëm që opozita ka qëllim interesat e vendit, por ka edhe interesa specifike, më të theksuara. Mendoj se pavarësisht formës arkaike, kur gjeta se iu kishte dërguar edhe kryeministrave të tij, letra, “lëre”, thashë”, - tha kryeministri. Sipas tij, e rëndësishme është që të predominojë fryma e dialogut dhe e bashkëpunimit dhe në këtë kontekst, mazhoranca e ka shprehur gatishmërinë e saj. “E rëndësishme është se fryma e dialogut dhe e sensit të përgjegjësisë për të bashkëpunuar në fushën e reformave të rëndësishme, duhet të predominojë. Në këtë kontekst, ne kemi shprehur gatishmërinë e plotë për sistemin elektoral dhe për të gjitha proceset e tjera, që janë të dobishme për vendin”, - tha kryeministri.

Letra

Vetëm një ditë më parë, kryetari i PS-së, Edi Rama, me anë të një letre drejtuar kryeministrit, i kërkonte këtij të fundit bashkëpunim për disa çështje, siç janë reforma zgjedhore, decentralizimi, reforma në drejtësi etj. Ndryshe, Rama kërcënoi me zgjedhje të parakohshme. Në rast se do duhet t’i referohemi retrospektivës, do thoshim se ka qenë Rama ai që ka refuzuar sistematikisht ftesat e opozitës për bashkëpunim në çështje që ai parashtron në letër. Nga ana tjetër, kërcënimi për zgjedhje të parakohshme duket paksa i pakuptimtë, në një kohë që Berisha më shumë se një herë është shprehur se nuk do të pranojë president të imponuar nga opozita dhe se mazhoranca është e gatshme në çdo moment t`i drejtohet zgjedhjeve të parakohshme.

Kryeministri Berisha merr pjesë në ndërrimin e komandës së NATO në Shqipëri

Berisha: Objektivi ynë, kryesor, anëtarësimi në strukturat euroatlantike

Kryeministri, Sali Berisha, mori pjesë dje, në ceremoninë e ndërrimit të komandës së NATO-s në Shqipëri, e cila kalon nga gjeneral major, Gergios Mouroutsos, nën drejtimin e gjeneralit, Anastasios Rinitis. Të pranishëm në ceremoni ishin komandanti i Joint Force, Comand Napoli, Air Marshall, Dusty Miller, ministri i Mbrojtjes, Fatmir Mediu, ministri i Brendshëm, Bujar Nishani, drejtues të lartë të Shtabit të Përgjithshëm të Forcave të Armatosura, ambasadorë dhe atashe ushtarakë të akredituar në Shqipëri, përfaqësues të komuniteteve fetare, si dhe personalitete të tjerë. Gjatë fjalës së tij, përshëndetëse, kryeministri Berisha u shpreh se një ndër objektivat kryesore të integrimit të Shqipërisë është dhe integrimi në strukturat euroatlantike. “Dua t’ju siguroj ju, të siguroj Forcat e Armatosura të Shqipërisë, se qeveria do të bëjë çdo përpjekje që ta meritojë këtë ftesë, do të vazhdojë me përkushtim dhe vendosmëri të madhe reformën e Forcave tona të Armatosura, përpjekjet për të arritur të gjitha standardet politike dhe të tjera, që në Samitin e ardhshëm në Washington, Shqipëria së bashku me Kroacinë dhe Maqedoninë, të meritojë ftesën për anëtarësim të plotë në Aleancën e Atlantikut të Veriut. Në këtë aspekt, ne jemi të vendosur të përparojmë drejt një ushtrie të vogël, profesionale, e cila të përmbushë me dinjitet të gjitha detyrimet që rrjedhin nga anëtarësimi i Shqipërisë në NATO. Vetëm pak ditë më parë, qeveria vendosi që në vitin 2008-të, shpenzimet për FA-të të rriten me 2 për qind të Prodhimit të Brendshëm Bruto”, - tha kryeministri.

Prezenca e OSBE-së përkujton 10-vjetorin e saj në Shqipëri

Vaçek: në 10 vjet Shqipëria ka bërë përparime mbresëlënëse

Prezenca e OSBE-së në Shqipëri përkujtoi dje, 10-vjetorin e aktivitetit të saj në vendin tonë. Zyra e shtypit e OSBE-së, përmes një deklarate për mediat, bën të ditur se Prezenca e OSBE-së në Shqipëri u krijua në bazë të një vendimi të Këshillit të Përhershëm të OSBE-së, më 27 mars 1997-të, "në përgjigje të mosfunksionimit të ligjit dhe të rendit publik në vend". Sipas kësaj deklarate, "gjatë kësaj periudhe, Prezenca e OSBE-së, u përqendrua në ofrimin e këshillimit dhe ndihmesës për kapërcimin e pasojave të kolapsit të fuqisë së shtetit, monitorimin e çështjeve të sigurisë, të të drejtave të njeriut, përgatitjen dhe vëzhgimin e zgjedhjeve dhe çështjet e demokratizimit. Gjatë dhjetë viteve të fundit, Shqipëria ka bërë përparime mbresëlënëse dhe detyrat e puna e Prezencës janë rritur paralelisht në mënyrë të ndjeshme", - tha dje, kryetari i Prezencës, ambasadori Pavel Vaçek. Më tej, kryetari i Prezencës në Shqipëri shtoi se, "Shqipëria është në rrugën e saj drejt integrimit euroatlantik dhe sfida për Prezencën është si të japë më së mirë ndihmesën e saj për reformat e brendshme më të rëndësishme, brenda mandatit tonë, si dhe të bashkëpunojë ngushtësisht me qeverinë dhe partnerë të tjerë, shqiptarë". Deklarata thekson se, " Në vitin 2003, mandati i Prezencës u rifreskua dhe që nga ajo kohë, ajo u përfshi edhe në nxitjen e demokratizimit, shtetit të së drejtës dhe të drejtave të njeriut, si dhe forcimin e institucioneve demokratike, në përputhje me parimet, standardet dhe angazhimet e OSBE-së”. “Prezenca e OSBE-së, - citohet në deklaratë, - punon, gjithashtu, në fushën e reformës legjislative dhe juridike, reformës së pronave, reformës zgjedhore, reformës administrative, rajonale, në forcimin e kapaciteteve të Kuvendit në luftën kundër trafiqeve dhe korrupsionit, zhvillimin e medias, nxitjen e qeverisjes së mirë, zhvillimin e shoqërisë civile dhe ofron ndihmesën e saj për policinë".

Kandidati i opozitës, Qazim Sejdini, rezultoi me 678 vota më shumë se kandidati i mazhorancës, Luçiano Boçi

Kolegji numëron kutinë e fundit të Elbasanit dhe shpall fitues kandidatin e opozitës

Kolegji Zgjedhor vendosi ditën e djeshme të shpallë fitues të zgjedhjeve për Bashkinë e Elbasanit kandidatin e opozitës, Qazim Sejdinin. Nga ana tjetër, Kolegji Zgjedhor hodhi poshtë kërkesën e kandidatit të mazhorancës për Bashkinë e Elbasanit, Luçiano Boçit, i cili kërkonte shpalljen e zgjedhjeve të pavlefshme në këtë njësi vendore. Trupa gjykuese e Kolegjit Zgjedhor mori vendimin të numërojë kutinë e qendrës së votimit, 23.36, në kundërshtim me vendim e KQZ-së, e cila e kishte konsideruar këtë kuti të dëmtuar në mënyrë të tillë që nuk mund të merrej parasysh për t`u numëruar. Nga numërimi i kutisë 23. 36, rezultoi se kandidati i opozitës, Sejdini, kishte marr 104 vota, pra, 3 vota më shumë se kandidati i mazhorancës, Luçiano Boçi, i cili kishte marrë 101 vota në këtë kuti. Nga ana tjetër, kandidati i mazhorancës për Bashkinë e Elbasanit, Luçiano Boçi, kërkon pavleshmërinë e zgjedhjeve në këtë njësi vendore. Sipas avokatit të Boçit, procesi për njësinë vendorë të Elbasanit ka pasur shkelje të rënda para dhe pas ditës së zgjedhjeve. Sipas tij, në qendrën e votimit 23.78, procesi zgjedhor nuk ka nisur fare dhe për pasojë, 800 zgjedhës, të cilët duhet të votonin në këtë qendër nuk kanë pasur mundësinë të votojnë. Nga ana tjetër, në 18 qendra votimi nga 97 gjithsej në këtë zonë ka munguar regjistri për indeksin e certifikatave dhe për pasojë, minimlaisht 2745 zgjedhës të pajisur me certifikata si mjet identifikimi nuk kanë arritur të votojnë. Sipas avokatit të Boçit, shumë qendra votimi në këtë njësi vendore kanë filluar procesin e votimit me shumë vonesë dhe po kështu, ka pasur një sërë parregullsish gjatë procesit të votimit dhe numërimit të tyre. Avokati i kandidatit të mazhorancës për Bashkinë e Elbasanit theksoi se të gjitha shkeljet që janë bërë gjatë dhe pas votimit në këtë njësi vendore janë të dokumentuara dhe të pasqyruara në librin e protokollit të KZQV-së të kësaj njësie. Sipas rezultatit përfundimtar, të nxjerrë nga Kolegji Zgjedhor, kandidati i opozitës, Qazim Sejdini, kishte 678 vota më shumë se kandidati i mazhorancës Luçiano Boçi.

Fatjona Mejdini

Zgjedhjet në Elbasan do përsëriten vetëm në një QV

Komisioni Qendror i Zgjedhjeve ka vendosur disa javë më parë përsëritjen e zgjedhjeve vetëm në qendrën e votimit 23. 78. Anëtarët e KQZ-së vendosën në mënyrë unanime që të përsëritej votimi vetëm në qendrën e votimit, 23.78, qendër në të cilën ka patur probleme në procesin zgjedhor dhe ku duhet të votonin rreth 800 votues. Por gjasat se kjo qendër votimi në Bashkinë e Elbasanit të kthejë rezultatin e zgjedhjeve janë të vogla, duke qenë se diferenca mes 2 kandidatëve është 678 vota dhe në këtë qendër votimi, votojnë vetëm 800 votues.

KQZ-ja do vendosë sot, në lidhje me shortin që pritet të shpallë fituesin për minibashkinë nr. 10

Veizi tërhiqet nga shorti në KQZ, duke kërkuar përsëritjen e zgjedhjeve

Nuk dihet, nëse kandidates së opozitës do t`i jepet e drejta të kërkojë pavlefshmërinë e zgjedhjeve në këtë minibashki, duke qenë se vendimi i Kolegjit Zgjedhor është që fituesi mes dy kandidatëve të dalë me short dhe vendimet e kësaj gjykate janë të paapelueshme

Kandidatja e opozitës për njësinë bashkiake nr. 10, Mira Veizi, deklaroi ditën e djeshme se do të tërhiqet nga shorti që pritet të të mbahet ditën e sotme në Komisionin Qendror të Zgjedhjeve. Sipas kandidates së opozitës nuk është e drejtë që votat e qytetarëve mos të merret në konsideratë dhe zgjedhjet të hidhen me short.

“Nuk do të marr pjesë në shortin që Komisioni Qendror i Zgjedhjeve do të hedhë nesër, për të shpallur kandidatin fitues dhe, nëse nesër fitoj, do ta refuzoj këtë post”, - deklaroi kandidatja e opozitës, Mira Veizi, duke theksuar se ajo do të vazhdojë të kërkojë të drejtën e saj në rrugë gjyqësore. Sipas kandidates së opozitës për këtë minibashki, e udhës do të ishte që të përsëriteshin zgjedhjet, duke theksuar se do të kërkonte në KQZ pavlefshmërinë e tyre. Nga ana tjetër, nuk dihet, nëse kandidates së opozitës do t`i jepet e drejta të kërkojë pavlefshmërinë e zgjedhjeve në këtë minibashki, duke qënë se vendimi i Kolegjit Zgjedhor është që fituesi mes dy kandidatëve të dalë me short dhe vendimet e kësaj gjykate janë të paapelueshme.

Rezultati i shortit që do të hidhet sot, në KQZ do të përcaktojë dhe fituesin në këtë minibashki, pas zgjedhjeve lokale të 18 shkurtit, ku kandiduan Gerti Bogdani për PD-në dhe Mira Veizi për PS-në. Sipas një udhëzimi të Komisionit Qendror të Zgjedhjeve, do të jetë KZQV-ja e njësisë bashkiake nr. 10 ajo që do të organizojë hedhjen e këtij shorti në prani të KQZ-së. Sipas udhëzimit, në një enë transparente futen aq gogla, sa është edhe numri i subjekteve zgjedhore, pjesëmarrëse në short dhe në secilën gogël futet nga një shirit letre, ku n? nj?rin prej tyre shënohet fjala “Fitues”. Më pas, KZQV-ja cakton një person për tërheqjen e goglave dhe sekretari i KZQV-së fton me radhë përfaqësuesit e autorizuar të subjekteve zgjedhore, pjesëmarrëse në short për tërheqjen e shortit. Nga ana tjetër, personi që tërheq goglën, e hap atë dhe ia dorëzon kryetarit të KZQV-së. Kryetari lexon me zë të lartë atë çfarë përmban gogla dhe iua tregon të gjithë vëzhguesve dhe përfaqësuesve të autorizuar të subjekteve zgjedhore, pjesëmarrëse në short. Më pas, rezultati i shortit shënohet në procesverbal dhe në bazë të tij, KZQV-ja shpall fituesin për këtë njësi bashkiake.

Fatjona Mejdini

LSI-ja mbledh në tryezë konstitucionalistë dhe përfaqësues të shoqërisë civile dhe medias për Reformën Zgjedhore

Meta: Sistemi proporcional garanton votën e emigrantëve

Në këtë takim merrnin pjesë konstitucionalistët Luan Omari, Njazi Jaho, Genti Ibrahimi, ish-kryetarët e KQZ-së, Ilirjan Celibashi dhe Kristaq Kume, drejtori i ZMQ-së, Kreshnik Spahiu, analistë të medias dhe përfaqësues të shoqërisë civile, Andrea Stefani, Mustafa Nano, Lutfi Dervishi, Bashkim Muça

Një sistem zgjedhor, proporcional konsiderohet nga kreu i LSI-së si më i miri për të garantuar votën e lirë të të gjitha shtresave, si dhe për të sjellë një nivel më të lartë të Kuvendit të Shqipërisë. Meta e deklaroi qëndrimin e tij në tryezën e djeshme që LSI-ja kishte organizuar me shoqërinë civile dhe mediat për reformën zgjedhore. Krerët e LSI-së kanë diskutuar në këtë tryezë platformën e tyre për reformën zgjedhore, duke kërkuar mendimin e shoqërisë civile, konstitucionalistëve dhe mediave për të përmirësuar platformën për reformën zgjedhore. Kreu i LSI-së ka shpalosur idetë e LSI-së për reformën zgjedhore, duke u përqendruar te nevoja për një sistem proporcional në Shqipëri. "Sistemi aktual, mazhoritar-proporcional dhe i përzier ka sjellë një cenim të vetë procesit të zgjedhjeve për shkak të deformimeve dhe të mosrespektimit të frymës kushtetuese, sikurse ndodhi në vitin 2001 apo edhe në 2005-sën. Së dyti, ky sistem ka sjellë një ndezje të ashpër të konkurrencës në zonat zgjedhore, ku edhe niveli i parlamentit për fat të keq vjen duke u ulur. Është gjithnjë edhe më e vështirë për vetë forcat politike të konkurrojnë me këtë sistem që të promovojnë njerëzit më të kualifikuar të tyre, që të promovojnë juristë, ekonomistë dhe nga të tjera profesione, njerëz, të cilët kanë kapacitet për diskutimet që bëhen në parlament për të vendosur për shumë çështje jetike të vendit. Pra, me këtë sistem zgjedhor, garancia për të përzgjedhur njerëzit më të kualifikuar, për gratë, vajzat dhe të rinjtë që do të kishin dëshirë për të kontribuar në politikë, është e pamundur. Njëkohësisht, sistemi aktual e bën shumë të vështirë pjesëmarrjen në votim të emigrantëve shqiptarë. Ne këtë problem e kemi ngritur vazhdimisht dhe i qëndrojmë asaj ideje se të gjithë shtetasit shqiptarë, të gjithë emigrantët tanë duhet të kenë të drejtën të votojnë, atje ku ata jetojnë, sepse nuk mund të vijnë në Shqipëri, sa për të kryer këtë të drejtë legjitime. Ata kanë kontributin kryesor për mbajtjen e ekonomisë së vendit apo edhe zgjidhjen e shumë problemeve të rëndësishme nëpërmjet kontributit të tyre. Njëkohësisht, ata janë një mbështetje e madhe për të ardhmen e vendit, ku pjesa më e madhe e tyre do të vijnë një ditë në Shqipëri dhe kanë të drejtë të vendosin për parlamentin dhe qeverisjen e Shqipërisë, ashtu sikurse ndodh edhe në majft vende të tjera”, - tha dje, Meta. Në tryezë kanë folur për çështjen e reformës zgjedhore të pranishëm të fushave të ndryshme të shoqërisë civile.

Luan Omari-Konstitucionalist, Akademia e Shkencave

“Duke pasur parasysh problematikën që ka sjellë ky sistem aktual, elektoral mendoj se Shqipëria duhet të ketë sistem proporcional, sepse ka disa anë pozitive, pasi ulen tensionet e krijuara gjatë dhe pas procesit zgjedhor. Gjithashtu, gjykoj se është absolutisht i domosdoshëm aplikimi i një sistemi të tillë, sepse siguron dhe një nivel më të lartë përfaqësimi në parlament”.

Njazi Jaho- Konsitucionalist

Me propozimet e bëra nga LSI-ja si iniciatore e kësaj tryeze, por edhe e faktorëve të tjerë duhet që të arrihet një bashkësi objektivash për të pasur një proces zgjedhor sa më legjitim. Personalisht, duke mos pasur ngarkesën e partive të ndryshme, mbetet për të diskutuar problemi i pragut elektoral për të mos patur parti "false" apo parti joreale, të cilat do përpiqen të mbijetojnë në këtë prag të ri, elektoral. Sigurisht, duhet të ndryshojnë edhe komisionerët politikë, të cilët deri tani nuk kanë garantuar legjitimitetin e zgjedhjeve, por e kanë cenuar atë”.

Ilirian Celibashi –ish-kryetar i KQZ-së

“Është për t`u vlerësuar nisma e LSI-së, sepse të paktën që nga viti 1996-të, ne jemi në një nevojë të vazhdueshme për proceset zgjedhore në Shqipëri dhe nevojën për të përmirësuar standardet e këtyre proceseve. Dhe kjo për faktin se zgjedhjet në Shqipëri, duke përjashtuar disi zgjedhjet e 2005-sës, nuk kanë prodhuar atë legjitimitet të pranuar dhe të kërkuar nga faktorët politikë në vend, por edhe nga ndërkombëtarët. Kjo do të thotë që nevoja për gjetjen e një metode tjetër të procesit zgjedhor buron së pari nga mungesa e legjitimitetit të procesit zgjedhor, nga mungesa e njohjes së rezultatit përfundimtar nga të gjitha palët. Për të pasur një proces zgjedhor të drejtë dhe të ndershëm, ne duhet të kemi përmirësimin e regjistrit civil dhe bërja efektive e numrit personal të çdo qytetari, riorganizimi i sistemit të adresave dhe lidhja e këtij sistemi me regjistrin civil, intensifikimi dhe regjistrimi”.

KULTURA

Libri mbi heroin kombëtar, zbulon edhe gravurat e Jost Anman, ilustruesit të Biblës në gjermanisht

- Kasëm Biçoku: “Veprat e Marin Barlecit kanë një varg dobësish, që janë karakteristike në përgjithësi për historiografinë humaniste, siç janë fryma panegjirike, fjalimet e sajuara që u vihen në gojë heronjve, imitimi i historianëve antikë, si p.sh., i Tit Livit etj”

-Vepra ka edhe një veçanti: është e përkthyer edhe në gjuhën angleze dhe kështu, krahas vlerës së materialit që sjell, ua bënë të mundur edhe lexuesve të huaj të njohin gjithë këtë material të pasur mbi Skënderbeun

Libri mbi heroin kombëtar, zbulon edhe gravurat e Jost Anman, ilustruesit të Biblës në gjermanisht

Skënder Blakaj, një vepër autentike për Skënderbeun

Dhurata Hamzai

Studiuesi, publicisti e botuesi i njohur nga Prishtina, Skënder Blakaj, i ndodhur përpara një vargu mungesash e dobësish që shoqërojnë edhe veprat e Marin Barlecit, ka kuptuar misionin e tij për t’u thënë të vërtetën më afër lexuesve për heroin kombëtar, Gjergj Kastriotin Skënderbeun. Gjithë sa u tha më sipër, bëhet më e qartë tek vepra e titulluar “Skënderbeu”, e cila është e veçantë në llojin e vet, jo vetëm sepse në të janë janë përfshirë mendime e fragmente që nga bashkëkohësit e Gjergj Kastriotit, nga autorë, krijues e personalitete të shquara botërore e shqiptare, e deri te Rezoluta e Kongresit Amerikan, e vitit 2005, por edhe për faktin se autori me durim e këmbëngulje ka mbledhur, sistematizuar dhe komentuar materiale të shumta e të shumëllojshme nga fusha të ndryshme të shkrimit mbi Skënderbeun. Vepra është botuar me rastin e 600 vjetorit të lindjes së Skënderbeut. Botimi i veprës duket se ka sjellë në dritën e kohës dhe në vendin që e meritojnë Gjergj Kastriot Skënderbeun dhe Marin Barlecin. Për këtë vendodhje autori i këtij libri, z. Skënder Blakaj, do të shprehej më saktë me këto fjalë; “secili aq i madhërishëm në rolin dhe në atdhedashurinë e vet, duke e sjellë në një formë paksa më ndryshe se të zakonshmet, si një pasqyrim të respektit që u kanë bërë këtyre dyve kombet e mëdha, siç janë gjermanët, ta zëmë. Dhe, nëse kësisoji, kryeprotagonisti i historisë sonë dhe autori i tij i mrekullueshëm, pos kënaqësisë së lexuesit për libër, na e rrisin edhe mburrjen për ta e për vetveten, atëherë mundi nuk ka shkuar kot”. Duke motivuar rrugën e studimit që ka ndjekur autori i librit, Brakaj, thotë se: “Por kjo na kthen ku ishim moti – shqiptarët duhet të bëhen të denjë për Gjergj Kastriotin Skënderbeun”. E konceptuar kështu, vepra e re “Skënderbeu” ka fituar shtresa të ndryshme nga qasja artistike tek dokumenti historik dhe në këtë mënyrë ka synuar receptivin më të gjerë e më të lehtë të materies.

* * *

Vepra ka edhe një veçanti për tipin e tillë: është e përkthyer edhe në gjuhën angleze dhe kështu, krahas vlerës së materialit që sjell, ua bënë të mundur edhe lexuesve të huaj të njohin gjithë këtë material të pasur mbi Skënderbeun. Vepra përmban edhe një studim të autorit mbi Skënderbeun dhe periudhën e tij, studim në të cilin saktësohen e korrigjohen disa të dhëna historike mbi heroin tonë, Gjergj Kastriotin Skënderbeun, mbi biografinë e tij më të njohur të shkruar nga Marin Barleti dhe saktësime të fakteve të ndryshme që lidhen me Skënderbeun. Një kualitet i shquar i veprës është paraqitja e gravurave të Jost Anman (dhe autorëve të mëdhenj gjerman), ilustruesit të veprës së Barletit në botimin në gjermanisht, ilustruesi i Biblës në gjermanisht dhe i veprave të tjera të shquara të asaj kohe. Shumicën e veprave të tilla artistike, lexuesi shqiptar ka rastin t’i shohë për herë të parë te ky libër. Duke shfletuar faqet e këtij libri e duke parë në të gravura të rralla e dokumente akoma më të padëgjuara, nuk do të na dukej habi kur autori citon një mendim të bibliografit dhe të historianit të Skënderbeut, Kasëm Biçokut, i cili pohon se “Veprat e Marin Barlecit kanë një varg dobësish, që janë karakteristike në përgjithësi për historiografinë humaniste, siç janë fryma panegjirike, fjalimet e sajuara që u vihen në gojë heronjve, imitimi i historianëve antikë, si p.sh., i Tit Livit etj. Por vlerat e veprave të tij, si burime historike, janë shumë më të mëdha në krahasim me dobësitë e tyre”. Po kështu autori ka vërejtur disa veprime të gabuara të studiuesve dhe historianëve pararendës, të cilët e kanë eklipsuar të vërtetën historike, sipas rastit dhe rrethanave të kohës, me qëllim ose jo, një pjesë e tyre kanë devijuar ligjësinë e zbulesës.

* * *

Autori Skënder Blakaj citon se “Megjithëse janë botime themelore të historiografisë e të kulturës sonë kombëtare, veprave të Marin Barlecit ende nuk u është bërë, siç e meritojnë, një botim i vërtetë shkencor, ku përkthimi shqip të shoqërojë (344 Gjergj Kastrioti Skënderbeu) tekstin latinisht të origjinalit”. Më tej ai thekson: “Rëndë është gabuar me përkthimin shqip të “Historisë së Skënderbeut”. Në vend që të përkthehej botimi i parë i veprës së M. Barlecit, i bërë në Romë në vitin 1508-1510, është përkthyer botimi i dytë latinisht i vitit 1537 i “Historisë së Skënderbeut, i cili është publikuar pas vdekjes së autorit, në Strasburg të Gjermanisë”. Sipas tij, këto dy botime kanë ndryshime të mëdha ndërmjet tyre, si tek treguesit e përmbajtjes së veprës ashtu edhe te shënimet e shumta anësore të faqeve të librit, me të cilat M. Barleci, jo pa qëllim, i ka pajisur veprat e tij dhe që kanë mbetur të papërkthyera e të pabotuara në gjuhën shqipe. Edhe tekstet e të dy botimeve latinisht të “Historisë së Skënderbeut“ nuk janë identike. Zbulohet se ato kanë midis tyre disa qindra ndryshime, “që nuk janë thjesht gabime shtypi, por shumë prej tyre kanë të bëjnë me kuptimin e saktë të përmbajtjes së frazave përkatëse, sepse ka harresa fjalësh e kohë foljesh etj”. Pra, ky libër autentik hedh më shumë dritë në rrugën e zbulimeve të rralla, siç do të shohim në faqet e gazetës “TemA” edhe dy gravurat që autori ia ka bashkangjitur këtij libri, të cilat botohen për herë të parë. Më në fund, bëjmë të ditur se libri është i botuar në format të madh dhe me përgatitje shumë të mirë, ndërsa botues është BKUK dhe ARBI Ltd. Prishtinë.

“Njohja” ime me Gjergj Kastriotin Skënderbeun

Skënder Blakaj

“Njohja” ime me Gjergj Kastriotin Skënderbeun është e hershme. U thellua gjatë përgatitjes së serialit dokumentar televiziv, shtatë episode, për arbëreshët e Italisë, më 1976, me mbititullin “Rrembi i këputur thahet”. Parashikimin që sjell kjo formulë e morëm nga drama “Nita” e autorit nga Arbneshi i Zarës, J. V. Rela

dhe e përjetuam intenzivisht gjatë xhirimeve në ambientet e Kala bri së. Edhe

mërgimi i tyre para pesë shekujve, edhe jeta e djeshme dhe e ta shme, gjithçka

lidhej me fi gurën e Skënderbeut dhe me “Motin e Madh” të tij. Prandaj ishte aq e

domosdoshme njohja e mirë me Gjergj Kastriotin. Lasgush Poradeci thotë që vlerën e një kombi e bën tradita e tij. Kjo traditë vjen deri te ne me hallka të trasha të një zinxhiri të madh. Si hallkë të parë thekson pellazgët, hallkë të dytë ilirët dhe

gjuhën shqipe që trashëguam prej tyre, “hallka e tretë”, më i madhi ndër gjeneralët e botës, Gjergj Kastrioti, dhe pas kësaj, thotë, “vjen ajo hallka tjetër- e fortë dhe e shkëlqyer-Rilindja! Rilindja, ajo e bëri Shqipërinë!” Rilindja si lëvizje kulturore dhe Lidhja Shqiptare e Prizrenit ishin aq të ndërlidhura ndërmjet veti. Kryeheroi ynë, Gjergj Kastrioti Skë nderbeu, u jipte shpirt të dyjave. Madje Lidhja e Prizrenit, 1878, ishte si një përsëritje e Lidhjes së Lezhës, 1444. Te Lidhja e Prizrenit mungonte fi zikisht Skënderbeu, por ishte aty shpirtërisht, madhështor e i pakontestueshëm, protagonist qendror thuaja në gjithë veprat e Rilindjes, nga De Rada te Naimi e gjithë të tjerët. Në 100 vjetorin e Lidhjes së Prizrenit bëmë 13 emisione dokumentare njëorëshe, të lidhura mirë me njëri-tjetrin, deri te i fundit, me titullin “Duam lirinë dhe vetqeverimin!”. Titulli u shkëput nga thirrja për kryengritjen antiosmane të vitit 1912. Edhe se në rrethana në dukje liberale të Jugosllavisë së vitit 1978, emisionet u ndaluan dhe më vonë autori i tyre u dënua. Për përgatitjen e emisoneve du hej njohur atë tharmin kombëtar që mishëron

fi gura dhe epoka e Gjergj Kastriotit Skënderbeut. Sepse, dihet që, siç shkruan

Abas Ermenji në librin për Gjergj Kastriotin “Skënderbeu është fi gura qe ndrore

që lidh të dy pjesët e historisë shqiptare: vjetërsinë klasike dhe kohët moderne. Figura e Skënderbeut ka lozur një rol kryesor edhe në kohët e pastajme të kombit shqiptar. Ajo i ka sunduar rrjedhimet e kësaj historie deri në ditët tona”.

Revistën mujore “Ekskluzive” e udhëhoqa nja tri vjet. Gjatë kësaj kohe dolën

32 numra. Në shumicën e numrave kishim dokumente e shkrime për Skënderbeun. Numri 20 i revistës doli me një shtojcë speciale për Gjergj Kastriotin, e përgatitur prej meje me rastin e vendosjes së monumentit të tij në Prishtinë, në vjeshtë të vitit 2001. Kjo e tashmja është hera e katërt që po përqendrohem në Gjergj Skënderbeun dhe në epokën e tij të madhe. E filluam në 600 vjetorin e lindjes. Në “Hyrje” të këtij libri është shpjegimi si ndodhi kjo. Dhe mbas shumë leximesh e shënimesh (342 Gjergj Kastrioti Skënderbeu) të lodhshme, kisha ndjenjën se u hodha

midis oqeanit. Me keqardhjen për vetveten, më shtohej keqardhja për historianët,

për borxhin që e kanë ta shpjegojnë drejt atë epokë luanësh dhe t’i korrigjojnë

defektet e shumta të shkencës së tyre. Sidoqoftë, pa ta zor se do të ishte i këtillë

ky botim, prandaj i falënderoj për ndihmën e shumëfi shtë që më kanë dhënë

përmes veprave të tyre. Por, nëse qëmton kaq shumë këso defektesh një publicist

i zakonshëm si unë, duhet të bëjnë një mal me to hulumtuesit e historianët që

do të vijnë paskëtaj. Dhe ndoshta të vënë pikën në çështje aq të diskutueshme. Më

në fund, edhe historianët e Skënderbeut, që nga Aleks Buda, Ali Hadri, Kristo Frashëri, Kasem Biçoku, Jahja Drançolli e të tjerët, kanë punuar e shkruar nën kufi zimet e sistemit e të pamundësive për hulumtime më të thelluara nëpër arkiva.

Edhe Fan S. Noli, në vitin 1921, konkludon: “Më në fund kemi arshivat e Vatikanit, të Republikave të Venetisë e të Raguzës, të mbretërive të Napolit e të Hungarisë, dhe të dukatëve të Millanit e të Burgonjës, me të cilat kishte marrëdhënie diplomatike Shqipëria në kohën e Kastriotëve. Historia kritike

e Skënderbeut s’ mund të shkruhet gjersa të shoshiten plotërisht këto arshiva”.

Një si rezultat i punës rreth këtij libri është që një ekzemplar autentik, në mos

fort i posaçëm, i botimit të parë të veprës së Marin Barlecit “Historia e jetës dhe e bëmave të Skënderbeut, Princit të Epirotëve”, Romë 1508-1510, u soll në Prishtinë dhe është pronë e familjes Pacolli. Më në fund, një pyetje, përgjegjja e së

cilës kërkon këto që thotë Noli më sipër - a ishte Skënderbeu “shpirti i shoqërisë

në kalë”, siç shprehet Hegeli për Napoleonin, a diçka më ndryshe e diçka më

tjetër. Lëvizjet e Gjergj Kastriotit nuk ishin as aq të largëta, as me aso synimesh

si të Napoleonit. Përherë mund ta arrinte lehtë qendrën e vet administrative-ushtarake, kryeqytetin Krujë. Hulumtues të tashëm pohojnë që njihen madje deri në 13 shkresa e dokumente të ndryshme që kanë dalë brenda një dite nga kancelaria e Skënderbeut. Pos atyre që u përmendën më sipër, le të mbështetemi sërish në M. Barlecin: “Asnjëherë gjatë gjithë ditëve, qëkurse u hap lajmi se kryetrimi Skënderbej ishte nisur kundër armikut, që prej agimit të diellit e gjer në perëndim, nuk u largua kush, qoftë prej parisë së qytetit nga pallati dhe nga

zyrat, qoft ë populli nga pazari”. Po, historianët kanë shumë punë. Afatet e tejkaluara të marrëveshjes me BKUK për bashkëpunim rreth këtij botimi, m’i kanë lënë jashtë këtij libri aq shumë shënime, besoj të dobishme, rreth Skënderbeut dhe skënderbegasve, siç i quan Marin Barleci aq shpesh ush tarët arbëror kah fundi i veprës së tij monumentale “Historia e jetës dhe e bëmave të Skënderbeut,

princit të epirotëve”. Ndoshta një (ri)botim pa ngutje, sjell më shumë sistem,

i mbledh brenda gjithë këto shënime dhe e bën librin më të dobishëm. Mbetem me

kësi obligimi të shumëfi shtë. Për Skënderbeun, biografi i tij Marin Barleci në vepër përdor shumë emra: Gjergji, Kastrioti, Gjergj Kastrioti, Epiroti,

Skënderbeu, Gjergj Skënderbeu, i Krishteri, Kapedani, Arbërori, Princi i

Arbërit…Autorit, gjithë këta emra ndoshta as nuk i mjaftonin për madhështinë

si Skënderbeu. Këtu, në libër, janë përfshirë mendime e fragmente që nga bashkëkohësit e Gjergj Kastriotit, nga autorë, krijues e personalitete të shquara botërore e shqiptare, e deri te Rezoluta e Kongresit Amerikan, e vitit 2005, me rastin e 600 vjetorit të lindjes së Skënderbeut. Ajo fi llon me formulimin: “Në nderim (343 Gjergj Kastrioti Skënderbeu) të 600 vjetorit të lindjes së Gjergj Kastriotit

(Skënderbeut), burrështetasit, diplomatit dhe gjeniut ushtarak, për rolin e tij

në shpëtimin e Evropës Përendimore nga pushtimi otoman”. Librat për të e kryejnë misionin e vet, në qo ftë se sadopak u ndihmojnë shqiptarëve, “të

bëhen të denjë për Skënderbeun!.”

“Scanderbeccu i pa faan”?!

“Scanderbeccu i pafaan”, siç i thonin De Rada e arbëreshët, për nga rrjedhojat e

pastajme, a ishte njëmend i pafat. E quaj për nder që edhe te kjo pyetje të kërkoj

ndihmën e Ismail Kadaresë, kur thotë: „Personazhi i Gjergj Kastriotit, përpara se

të rimerrej prej shqiptarëve, u krijua ashtu si iliriciteti, në Evropë. Hero i një epoke të tërë, si rrallëkush, ai u kthye në një ikonë, në fi llim në kontinent, e pastaj në një pjesë të botës, Amerikë, Rusi, e gjer në Japoni. Mbi një mijëlibra, e po aq vepra artistike, u krijuan e vazhdojnë të krijohen për të në dhjetëra gjuhë e

në dhjetëra vende: biografi , studime, botime arkivore, poema, romane, drama, portrete, shtatore, vepra muzikore, nga Lope de Vega te Vivaldi e dhjetëra autorë të shquar. Cili është kyçi për të shpjeguar dukurinë e tij? Heronj me shpatë e me kalë, ka pasur me tepricë në gadishullin tonë epik. As shpata, as kali, por tjetër gjë e shpjegon të fshehtën e famës së Skënderbeut. Përpara se të ishte kordhëtar, ai ishte ideatori, programuesi i një orientimi të ri për shqiptarët dhe krejt

ballkanasit: orientimi drejt perëndimit. Prej arbëreshëve ai u pagëzua me cilësorin „i pafat“, ngaqë bëri një luftë fatalisht të humbur. Por, ndërsa lufta e tij përfundoi me humbje, ideja që themeloi, programi i tij, ngadhënjeu. Sot, në shekullin 21, kur Shqipëria bashkë me fqinjët e saj të Ballkanit perëndimor,

bëhet gati për të hyrë në Evropë, programi i tij mbetet i vetmi për të gjithë.

Ai është i vetmi prijës shqiptar që komandoi trupa të bashkuara shqiptare e evropiane kundër shtetit osman. Ndaj, më natyrshëm se kurrë rri sot shtato rja e tij në dy kryeqytetet Tiranë dhe Pri sh tinë, përbri shenjave shqiptare dhe evro pia no-atlantike, që më mirë se atij, s’i shkojnë askujt.“

RRETHE

Blerim Sula ishte banor i lagjes nr.13 Durrës

Prangoset zjarrvënësi i hipotekës

Oficerët e policisë kanë ndjekur të gjitha veprimet e Blerim Sulës dhe rreth orës 04:10 kanë ndaluar makinën me të cilën ai udhëtonte. Ata e kanë realizuar arrestimin në kthesën e fshatit Fier-Shegan...

BERAT-Prangosja e autorit të vënies së zjarrit në zyrën rajonale, ku janë hipotekuar dosjet që presin kthimin dhe kompensimin e pronave ka bërë që rreth orës 12:30, të ditës së djeshme të dalë në një konferencë për shtyp drejtori i policisë së qarkut të Beratit, Bernard Çaushaj. Sipas tij, ka qenë administrimi i mirë i pronave, vlerësimi i të dhënave dhe informacioneve të qytetarëve, ngritja e versioneve profesionale për ndjekjen hap pas hapi të veprimeve të autorit të krimit, që kanë çuar në zbardhjen e ngjarjes dhe më pas në prangosjen e autorit. Ai është Blerim Sula, banues në qytetin bregdetar, i cili rreth orës 06:00, duke u gdhirë dita e dielë, pasi kishte thyer xhamat e zyrës së AKKP-së, ka depërtuar brenda dhe më pas i ka vënë zjarrin asaj. Pas ngjarjes, ai ka mundur të zhduket nga vendi i ngjarjes, duke lënë në të gjurmë të mjaftueshme identifikimi. Ngjarja e rëndë, e përfolur fillimisht se kishte përfunduar me zhdukjen e një sërë dosjeve të rëndësishme të pronësive, fatmirësisht ka përfunduar pa dëmtimin e dokumentacionit. Policia komunikoi se, shtetasi Blerim Sula është i datëlindjes 27.07.1980, lindur në fshatin Hink, komuna Poshnje dhe banues në lagjen nr.13, zona e plazhit Durrës. Ai rezulton të jetë i dënuar më parë për vjedhje dhe dëmtim të pasurisë private, i martuar me dy fëmijë. Versioni i policisë shpjegon se, pasi ka thyer xhamat e zyrës, e cila ndodhet në katin e dytë të godinës së këshillit të qarkut, Sula ka depërtuar brenda saj dhe meqenëse nuk ka gjetur ndonjë diçka me vlerë për ta vjedhur iu ka vënë flakën disa letrave. Pastaj është larguar po nga dritarja e objektit, ku për shkak të çarjes nga xhamat, ka lënë gjurmë gishtash dhe njolla gjaku. Kanë qenë kalimtarë të rastit, ata që rreth orës 06:30 të ditës së dielë kanë parë të dilte tymi nga dritaret e zyrës dhe menjëherë kanë njoftuar me anë të telefonit organin e policisë dhe repartin e zjarrfikseve, që ndodhen rreth 200 metra larg nga vendi i ngjarjes. Më pas ishin zjarrfikësit ata që duke thyer xhamat e objektit hynë brenda dhe fikën zjarrin, i cili kishte filluar që të digjte disa prej letrave të ndodhura në parket. Sipas punonjësve të zyrës, dëmi i shkaktuar është i papërfillshëm dhe nuk është marrë apo djegur asnjë dosje ku janë të regjistruara pronat e qytetarëve. Lidhur me kapjen e autorit, shefi i policisë kriminale, Sokol Noka, tha se, nuk ka qenë i lehtë identifikimi për faktin se kishim të bënim me një autor që nuk ka konflikte pronësie, prona të regjistruara në zyrën e AKKP-së, se autori ishte me banim në një nga fshatrat e rrethit të Beratit, i larguar familjarisht përpara 10 vjetësh për në qytetin e Durrësit. Për identifikimin e tij është bashkëpunuar me policinë kriminale të Durrës, nga ku është marrë informacioni i nevojshëm për veprimtarinë e shtetasit B.Sula. Banesa e tij është mbajtur për gjithë natën nën vëzhgim dhe rreth orës 03:30 duke u gdhirë dita e djeshme, 27-vjeçari Sula ka marrë kamionçinën me të cilën punonte dhe është nisur drejt qytetit të Beratit, me qëllim blerjen e disa viçave për tregti. Oficerët e policisë kriminale, pasi kanë ndjekur të gjitha veprimet e Blerim Sula, rreth orës 04:10 i kanë dalë përpara makinës, me të cilën ai udhëtonte dhe në aksin rrugor Berat-Lushnjë, konkretisht në kthesën e fshatit Fier-Shegan, kanë bërë arrestimin e tij. Sula ndodhet në ambientet e komisaratit të policisë së Beratit.

Abedin Kaja

Nxënësit dhe prindërit, kundër transferimit të Zilie Poçit

Mësuesit e Xhyrës, padi për shpifje

LIBRAZHD-Të akuzuarit për “prishje të etikës në shkollë” gjer tek akuza “të pamoralshëm”, po kthehen në denoncues për të gjitha ata që kanë shpifur ndaj figurës së tyre si mësues dhe moralit njerëzor. Gjatë gjithë paradites së djeshme ka patur zhvillime të reja në shkollën e Xhyrës si dhe në zyrën e Drejtorisë Arsimore të Rrethit, ku është përfshirë edhe policia. Madje, për herë të parë, është prononcuar publikisht për mediat vizive dhe të shkruara edhe e vetmja mësuese e akuzuar, Zilie Poçi Ndërsa, klasa e katërt me ish-mësuese Zilie Poçi, nuk ka zhvilluar mësim, por së bashku me prindërit kanë protestuar para dyerve të Drejtorisë Arsimore të rrethit të Librazhdit. Më pas, grupi i nxënësve dhe i prindërve shoqërues së bashku me mësuese Poçin, janë shoqëruar për 30 minuta në komisariatin e policisë së rrethit, thjesht me merakun e ndonjë incidenti të ri. “Më ka pyetur policia se mos isha unë nxitësja e revoltës së nxënësve dhe prindërve, por iu shpjegova se nuk isha përzier në këtë punë. Por, çuditërisht, uniformat blu me një copë letër në dorë më kanë komunikuar transferimin nga shkolla ku kam qenë mësuese prej vitesh”, - ka deklaruar mësuesja Zilie Poçi. Ndërkohë, edhe dy mësuesit e tjerë, Arben Koxhaj dhe Edmond Kurti kanë pohuar se, ende nuk kishin marrë njoftim dhe komunikim zyrtar për transferimin e tyre, përveçse kishin dëgjuar lart e poshtë për këtë problem. “Unë do të dorëzoj në prokurorinë e rrethit padi penale ndaj kryetarit të fshatit, personave që kanë shpifur për moralin tim si femër dhe mësuese bashkë me zyrën arsimore të rrethit”, - ka pohuar mësuesja Poçi. Të njëjtën deklaratë kanë bërë edhe dy kolegët e saj, të cilët janë shprehur: “Ne do të vëmë në vend dinjitetin tonë për thashethemet. E tërë kjo histori “dashurie” është një farsë e montuar për interesa fshatareske të personave të veçantë”, - kanë pohuar Kurti dhe Koxhaj.

Suela Azemi

Pashkët, gjatë 24 orëve 1440 emigrantë shqiptare

KAKAVIJË- Rreth 1440 shtetas shqiptarë, pjesa më e madhe e të cilëve emigrantë që jetojnë dhe punojnë në Greqi, kanë hyrë gjatë 24 orëve të fundit në pikën kufitare të Kapshticës (Devoll), për të kremtuar pranë familjeve festën e Pashkës. Që prej 25 marsit, afati zyrtar i palës greke për lëvizjen e lirë të emigrantëve shqiptarë drejt vendlindje me rastin e festës fetare, numri i atyre që kanë mbërritur në Kapshticë ka ardhur duke u rritur. Shaban Dervishi, komandant i policisë kufitare në Kapshticë tha të martën se, gjatë 24 orëve të fundit në këtë vendkalim kanë hyrë 1440 shtetas shqiptarë si dhe 370 mjete. Burimet nga Kapshtica shtuan se, emigrantët e kthyer deri tani nuk janë përballur me vonesa të palës greke, gjatë procedurave të kalimit të kufirit. Nga ana tjetër, mësohet se ka pasur radhë të pakta të automjeteve të emigrantëve në tokën greke, të cilat i janë nënshtruar një kontrolli të imtësishëm nga doganierët e vendit fqinj.

Hyrjet në doganë, 2 mijë emigrantë, 523 automjete

KAKAVIJË- Numri i emigrantëve shqiptarë që kthehen në atdhe përmes pikës kufitare të Kakavijës me rastin e festës së Pashkëve ka shënuar rritje gjatë 48 orëve të fundit. Burime zyrtare nga policia kufitare e Kakavijës thanë se, gjatë 48 orëve të fundit kanë hyrë në territorin shqiptar 2 mijë persona dhe rreth 523 automjete. "Numri i emigrantëve shqiptarë që hyjnë çdo ditë përmes kësaj pike është rritur, por numri i sporteleve ende nuk është shtuar, pasi situata aktualisht paraqitet në parametra normale", - tha komandanti i këtij vendkalimi, Enea Gjergjani. Për lehtësimin e lëvizjes së udhëtarëve po punohet me sistem 24 orësh, ndërsa është rritur numri i punonjësve, me synim minimizimin e radhëve gjatë kontrollit kufitar. Në kufirin Shqipëri-Greqi, në qarkun e Gjirokastrës, funksionojnë dy pikëkalime, ai i Kakavijës dhe i Tre Urave.

SOCIALE

Sipas ministrit të Shëndetësisë, reformat e para do të bëhen në sektorin e urgjencës

Ndoka: QSUT, drejt privatizimit

Do të ketë një përmirësim rrënjësor të urgjencës, duke filluar nga shërbimi i transportit, i autoambulancave, të cilat, për fat të keq, vetëm në shërbim të pacientëve dhe qytetarëve nuk janë, në modelin që kemi sot

Ministri i Shëndetësisë, Nard Ndoka, tha ditën e djeshme se, së shpejti do të nisë një reformë e re, e cila ka për synim që të privatizojë të gjithë spitalet shtetërore, në mënyrë që të rritet konkurrenca dhe shërbimet të përmirësohen. Ndoka u shpreh se, në projektet e tij është edhe ndërtimi i një spitali të ri për kryeqytetin, në mënyrë që shërbimet brenda QSUT-së të mos përballojnë fluksin gjithnjë e në rritje të kërkesave nga gjithë vendi. Ministri i ri i Shëndetësisë tha se duhet t’i jepet fund mitmarrjeve nga bluzat e bardha, veçanërisht nga infermierët. Në të parin takim zyrtar publik me shefat e pavijoneve të QSUT-së, Ministri i ri i Shëndetësisë, Nard Ndoka, hodhi idenë e një reforme të thellë në këtë sektor dhe një reformë të shpejtë afatshkurtër, veçanërisht në fushën e urgjencave. Ndoka tha se si qytetar kishte mbetur i skandalizuar nga gjendja e urgjencave, veçanërisht ajo kirurgjikale në QSUT dhe se në këtë drejtim duhet ndërhyrë me investime dhe strategji të qëndrueshme. Kreu i Shëndetësisë u shpreh se, do të niset së pari me transformimin e shërbimit të urgjencës, që është dhe kontakti i parë i qytetarëve me strukturat shëndetësore, duke hedhur idenë e privatizimit të shërbimit të urgjencës dhe ngritjes së spitalit bashkiak për Tiranën. “Ky shërbim do të jetë përparësia jonë, aty ku është dhe kontakti i parë i qytetarëve me bluzat e bardha. Do të ketë një përmirësim rrënjësor të urgjencës, duke filluar nga shërbimi i transportit, i autoambulancave, të cilat, për fat të keq, vetëm në shërbim të pacientëve dhe qytetarëve nuk janë në modelin që ne kemi sot. Pra, do të tentojmë shumë shpejt në privatizimin e këtij shërbimi, që ky shërbim do të jetë sa më shpejt tek qytetarët”, - tha kreu i shëndetësisë.

Privatizimi

Ministri Ndoka u shpreh se, ideja po diskutohet gjerësisht me grupet e punës dhe të konsulencës për ecurinë e reformave. Duke u shprehur për pacientët e panumërt që i drejtohen QSUT-së për problemet e tyre shëndetësore, Ndoka u shpreh se, ideja e një spitali bashkiak po bëhet gjithnjë e më tepër e domosdoshme. “Për ne është shumë e rëndësishme kjo qendër spitalore. Kjo është fytyra e shëndetësisë, këtu përballen me miliona qytetarë. Unë pashë statistikat. Me të vërtetë një ngarkesë shumë e madhe. Mirëpo mendojmë për reformimin, që të ketë dhe një mundësi alternative, ndoshta dhe për një spital rajonal, për një spital bashkiak. Kemi gatishmërinë e kryeministrit, Sali Berisha, me idetë tona reformuese t’i bëjmë prezent dhe nuk do të mungojë mbështetja për sistemin tonë të shëndetësisë është përparësi e padiskutueshme e qeverisjes, edhe në të ardhmen”, - u shpreh kreu i shëndetësisë.

Mitmarrja

Ndoka theksoi se duhet t’u jepet fund mitmarrjeve nga ana e mjekëve dhe infermierëve, duke theksuar se, “një aspekt tjetër që unë do të gjykoja nga ju që ky mesazh të përcillet edhe më tej është edhe elementi i humanizmit te bluzat e bardha, sidomos te infermierët, shtresa më tepër prezent me pacientët. Kjo nuk ekziston në të gjitha rastet. Këto unë i kam vërejtuar edhe gjatë këtyre ditëve, por tashmë është një sëmundje e përhershme e këtij sistemi. Pra, janë disa gjëra të vogla në dukje, por shumë të rëndësishme për imazhin e shëndetësisë në tërësi.”

Sipas MASH-it, maturantët në prill do të zgjedhin provimet dhe në qershor fakultetin

MASH: Akoma më shumë lehtësira për maturantët

Maturantët, brenda muajit prill duhet të caktojnë dy lëndët për provimet me zgjedhje të Maturës Shtetërore 2007, ndërkohë që regjistrimi i tyre për në fakultet do të kryhet në muajin qershor, njoftoi dje Ministria e Arsimit. Kjo ministri sqaroi se, dy lëndët me zgjedhje do të caktohen nga maturantët përmes aplikimit të formularit A1, të cilin do ta plotësojnë dhe dorëzojnë në shkollat e tyre të mesme. Ndërkohë që, regjistrimet për shkollat e larta do të kryhen nga kandidatët pranë sekretarive të fakulteteve të universiteteve dhe shkollave të larta brenda muajit qershor. Sipas MASH-it, caktimi i këtij afati është favorizues për maturantët, pasi ata do të kenë më shumë kohë për të përcaktuar degët, në të cilat ata duan të vazhdojnë shkollën e lartë. Për regjistrim në arsimin e lartë, maturantët duhet të dorëzojnë në shkollën e mesme të tyre formularin e plotësuar A2. Në këtë formular maturantët mund të përzgjedhin deri në 10 degë të fakulteteve të universiteteve tona publike, sipas një rendi preferencial, duke filluar me atë që dëshirojnë më shumë. Ndryshe nga praktika e vitit të kaluar, maturantit i jepet më shumë kohë për të bërë zgjedhjen e studimeve, i kursehet mundimi dhe shpenzimi për aplikimin në fakultetet e ndryshme. Pra, nëse vjet, për të aplikuar në 10 fakultete maturanti priste radhën në 10 sekretari dhe paguante 10 herë tarifën e regjistrimit, pasi udhëtonte drejt Shkodrës, Tiranës apo Vlorës, sivjet nuk do të ketë udhëtim, radhë pritjeje dhe pagesa shumëfishe, por do të apilkojë përmes një formulari. Për maturantët që duan të vazhdojnë studimet jashtë Shqipërisë, sipas MASH-it, është e domosdoshme që ata të informohen për kushtet që vendos universiteti apo vendi përkatës dhe nëse duhen provimet me zgjedhje, ata duhet të regjistrohen përmes formularit A1. Maturantët që kanë mbaruar shkollën e mesme jashtë Shqipërisë dhe që duan të vazhdojnë universitetin publik në vend, ndryshe nga viti i kaluar, nuk do japin dy provimet me detyrim, por vetëm dy provime me zgjedhje. Dëftesa e tyre do të ekuivalentohet sipas rregullave në fuqi, duke iu referuar MASH-it.

Shkodër

Marrëveshje bashkëpunimi mes Universitetit “Luigj Gurakuqi” dhe atij të Sarajevës

Mes Universitetit “Luigj Gurakuqi” të Shkodrës dhe atij të Sarajevës u nënshkrua ditën e djeshme një marrëveshje bashkëpunimi. Nënshkrimi i kësaj marrëveshjeje për palën shqiptare u zyrtarizua nga rektori Mahir Hoti dhe për atë të Sarajevës, nga rektori, Faruk Caklovica. Rektori i Universitetit "Luigj Gurakuqi", prof.dr. Hoti, tha se, “marrëveshja mes Universitetit të Shkodrës dhe atij të Sarajevës konsiston në bashkëpunimin për projekte dhe konferenca të përbashkëta, shkëmbim të profesoriatit dhe studentëve, shkëmbim literature dhe eksperiencave të ndryshme mbi implementimin e Procesit të Bolonjës, etj". Po sipas zotit Hoti, një nga hapat konkretë të kësaj marrëveshjeje është mirëkuptimi me dekanin e Fakultetit Ekonomik të Universitetit të Sarajevës, prof. Muris Ciçiç, që një pjesë e studentëve të Universitetit të Shkodrës të vazhdojnë Master në këtë fakultet për periudhën në vazhdim. Rektori Hoti pohon se, gjatë vizitës në Fakultetin e Shkencave Politike, në pritje nga dekani, prof. Xhevat Termiz dhe stafi i tij u diskutua mbi përshtatjen e kurrikulave dhe njehsimit të pikëve kredite, çka bën më të lehtë edhe njohjen e diplomave reciproke. Nënshkrimi i kësaj marrëveshjeje shënon një tjetër hap drej hapjes dhe bashkëpunimit të Universitetit të Shkodrës me universitetet homologe jashtë vendit, çka pritet të rrisë edhe më tepër nivelin pedagogjik të këtij universiteti.

EKONOMIA

Bizneset do të përfitojnë një subvencion prej 10 mijë dollarësh si dhe asistencë teknike për të rritur eksportet

Regjistrohen 6 bizneset e para, për të përfituar nga skema e rritjes së eksporteve

Bizneset kryesore që do të përfitojnë, do të jenë nga sektorët e agropërpunimit, tekstilit, përpunim-drurit, etj. “Albinvest”-i do t’iu ofrojë këtyre bizneseve edhe asistencë teknike, informacione për tregjet e huaja, pjesëmarrje në panaire ndërkombëtare, si dhe mundësi për certifikim të produkteve

Agjencia “Albinvest” ka filluar regjistrimin e bizneseve të cilat dëshirojnë të zgjerojnë aktivitetin e tyre, për të shtuar produktet e eksportuara prej tyre në tregjet e huaja. Burime nga kjo agjenci bënë të ditur për gazetën “TemA” se, që në janvën e parë janë regjistruar gjashtë kompani eksportuese, të cilat kanë aplikuar për të përfituar prej projktit “Cost-shearing” që kjo agjenci ka filluar në ndihmë të bizneseve eksportuese. Projekti ka shfaqur interes tek një pjesë e mirë e këtyre bizneseve, të cilëve iu është krijuar mundësia për të përfituar përkrahje për projektet e tyre me të cilat ata synojnë të shtojnë aktivitetin e tyre. Këto kompani do të përfitojnë një subvencionim prej rreth 10 mijë dollarësh nga shteti si dhe asistencën e nevojshme teknike, së bashku me informacionet e nevojshme për të shtrirë më tej aktivitetin e tyre në tregjet e huaja. Deri tani, agjencia është në fazën e regjistrimit të këtyre bizneseve, e cila pritet të pasohet edhe nga një tjetër fazë, ku secili biznes do të plotësojë formularët përkatës, si dhe do të përcaktojë llojin e shërbimeve, për të cilët janë të interesuar të përfitojnë. Gjithashtu, “Albinvest”-i është duke informuar kompanitë shqiptare për përfitimet të cilat ofrohen prej këtij projekti, për t’i bërë ata pjesë të tij. Pasi të jenë përcaktuar të gjitha këto, si dhe të jenë hartuar projektet përkatëse për çdo biznes mbi mjetet me të cilat synohet të rriten mundësitë për eksporte, agjencia do të bëjë edhe përzgjedhjen e duhur për të ndihmuar këto kompani. Deri tani, nevojat kryesore të cilat janë shfaqur për të përfituar nga projekti kanë të bëjnë me certifikimin e produkteve të tyre, në mënyrë që këto produkte të mund të futen në tregjet e huaja, si dhe me asistencën teknike dhe pjesëmarrjen në panaire të ndryshme ndërkombëtare, për të bërë të mundur afrimin e këtyre produkteve me prodhuesit e huaj. Sipas të dhënave nga “Albinvest”-i, bëhet e ditur se, sektorët kryesore ku ky projekt do të jetë i dobishëm janë sektorët e agropërpunimit, tekstilit, përpunim-drurit, prodhimeve artizanale etj. Projekti “Coast-shearing”, do të kushtojë në total në shumën prej 250 mijë dollarësh, të cilat qeveria i ka vënë në dispozicion të bizneseve eksportuese shqiptare, me qëllim rritjen e konkurrueshmërisë së tyre në tregjet e huaja. Ky projekt synon stimulimin e biznesit shqiptar me qëllim rritjen e eksporteve. Ai është pjesë e rëndësishme e strategjisë kombëtare për rritjen e eksporteve dhe ka për targetim, vetëm ndërmarrjet e vogla dhe të mesme, pasi ky sektor shihet me mundësi më të mira për rritjen e eksporteve. Projekti u ofron bizneseve eksportuese një subvencionim për projektet e tyre në funksion të rritjes së eksporteve. Ky subvencionim do të mbulojë deri në 50 për qind të shpenzimeve të projektit të kompanisë, por brenda një kufiri prej rreth 10 mijë dollarësh. Në këtë mënyrë do të subvencionohen projekte deri në 20 mijë dollarë. E gjithë procedura për këtë skemë bazohet në kuadrin rregullues të financimit të eksporteve, të cilat janë të përcaktuara nga standardet e OBT-së, OECD-së dhe BE-së. Ndihma ndaj kompanive shqiptare eksportuese, synon përmirësimin e marketingut të produkteve të këtyre bizneseve si dhe përmirësimin e metodave dhe programeve të manaxhimit të tyre, për t’i bërë ato më konkurruese në tregjet rajonale dhe ato të BE-së.

Ergys Mërtiri

Depozitat u rritën me 100 miliardë lekë, në krahasim me një vit më parë

Shqiptarët, 5.2 miliardë dollarë depozita në banka

Banka e Shqipërisë bëri të ditur se, depozitat e sistemit bankar në Shqipëri kanë arritur në një vlerë prej 520.3 miliardë lekësh. Sipas të dhënave, këto depozita kanë patur një rritje prej rreth 100 miliardë lekësh përgjatë vitit 2006, gjë që përbën një rritje prej rreth 20 për qind më shumë se në vitin 2005. Ndërsa, portofoli i kredisë gjatë vitit 2006, arriti vlerën 197 miliardë lekë, duke shënuar një rritje prej 55 për qind më të lartë se fundi i vitit 2005. Rreth 28 për qind e portofolit të kredisë është dhënë në lekë, ndërsa pjesa tjetër në valutë. Sipas bankës, gjatë vitit të kaluar ka pasur një rritje të ndjeshme të sistemit bankar, jo vetëm përsa i përket transaksioneve të kryera, por edhe përsa i përket mbulimit të territorit si dhe shërbimeve të ofruara. Banka vëren se ka pasur shtim të ndjeshëm të numrit të degëve dhe agjencive bankare nëpër të gjithë vendin. Hyrja në treg e bankave të njohura europiane është një tjetër zhvillim i vitit të kaluar, i cili pritet të vazhdojë edhe gjatë këtij viti. Të gjitha këto janë efekt i një rritjeje ekonomike që Shqipëria ka patur përgjatë kësaj periudhe, e cila dëshmohet edhe nga rritja e Prodhimit të Brendshëm Bruto në masën 5 për qind. Shtimi i këtyre bankave të cilat kanë shtrirë tashmë aktivitetin e tyre në Shqipëri ka bërë që, nën trysninë e konkurrencës, bankat të jenë më agresive në kredidhënie, duke shfrytëzuar edhe segmente të reja të tregut të kredisë, si kredia konsumatore apo huatë për pasuri të paluajtshme.

Të ardhurat nga kontributet për dymujorin e parë, 5.6 miliardë lekë

Drejtoria e Përgjithshme e Tatimeve bën të ditur se, të ardhurat nga kontributet e sigurimeve shoqërore arritën gjatë dymujorit të parë të këtij viti në 5.6 miliardë lekë. Sipas të dhënave nga kjo drejtori, vetëm gjatë muajit shkurt janë mbledhur rreth 2.6 miliardë lekë. Duke filluar nga muaji shtator i vitit të kaluar, qeveria shqiptare, në një vendim të saj, miratoi uljen e kontributit të sigurimeve shoqërore dhe shëndetësore. Kontributi i detyrueshëm për sigurimet shoqërore e shëndetësore për të punësuarin është sipas listëpagesës, 32.9 për qind e pagës mujore, ku pjesa e punëdhënësit është 21.7 për qind dhe pjesa e të punësuarit 11.2 për qind. Çdo punonjës i siguruar paguan, jo më pak se 4.323 lekë në muaj, nga 5.243 lekë, që ishte më parë.

KOMENTE

Presim përgjigje si më 1999-tën

Agim Çeku

Kryeministër i Kosovës

Të shtunën, ne shënuam përvjetorin e tetë të ndërhyrjes së NATO-s në Kosovë. Më 24 mars të vitit 1999-të, aleanca më e fuqishme, ushtarake e botës iu bashkua luftës sonë për liri. Ky ishte një akt vendimtar kthese në historinë e kombit tonë. Për afro një shekull populli i Kosovës kishte pasur një përvojë shumë të keqe me regjimet represive, serbe, por pak mbështetje nga bashkësia ndërkombëtare. Fillimi i bombardimeve të NATO-s mbi makinerinë ushtarake të Beogradit ishte një ditë e madhe shprese për Kosovën. 24 marsi është një mesazh i triumfit të shpresës mbi përvojën. Lufta kundër regjimit mizor të Millosheviçit na bashkoi në një partneritet, të cilin koha vetëm sa e ka forcuar. Mbështetja e NATO-s e bëri të pashmangshme mposhtjen e Millosheviçit dhe i hapi dyert një roli të ri të Aleancës Veriatlantike në Kosovë. Marrëdhënia jonë me NATO-n nuk është vetëm e natyrës mbrojtëse; marrëdhënia është një reflektim i interesave të NATO-s dhe Kosovës: ruajtja e stabilitetit në Kosovë nënkupton stabilizim afatgjatë të rajonit dhe krijimin e një klime pozitive bashkëpunimi për kontinentin e më gjerë.

Në këtë epokë zhvillimesh globale, shtetet janë si enët komunikuese: çfarë ndodh në njërin, do të reflektohet herët a vonë edhe te të tjerët. Kjo është një ndër arsyet, pse bashkësia e vendeve demokratike të botës nuk mund të lejonte që globi të kishte vrima të zeza dhe vatra të së keqes.

Sot, në ditën kur presidenti Ahtisaari prezanton propozimin e tij për Kosovën në Këshillin e Sigurimit të OKB-së, ne presim që bashkësia e vendeve demokratike të botës të na japë të njëjtën përgjigje pohuese si në pranverën e vitit 1999-të. Ne presim që kjo bashkësi të na dërgojë sinjale dhe të ndërmarrë veprime që dëshmojnë angazhimin për ruajtjen e paqes dhe stabilitetit në rajon. E dimë, ka vetëm një rrugë drejt kësaj paqeje afatgjatë dhe stabiliteti të qëndrueshëm e kjo është zgjidhja e statusit të Kosovës.

Me ndërhyrjen ushtarake, aleanca më e fuqishme, ushtarake e botës tregoi sesi mund të përdoret fuqia militare në pacifizimin e një rajoni të tërë; sot, Kombet e Bashkuara kanë rastin të përdorin instrumentet diplomatike për çimentimin e paqes dhe fillimin e një periudhe të re për Ballkanin, ku fjalët kyçe janë: respektim i të drejtave të njeriut, fqinjësi korrekte, treg i lirë, përparim ekonomik, demokraci aktive, integrim rajonal e evropian.

Letra dhe dokumenti që presidenti Ahtisaari dorëzon sot, kompletojnë kornizën për një zgjidhje përfundimtare të statusit të Kosovës. E para, letra, propozon pavarësi për Kosovën, të mbikëqyrur në fazën e parë, çka është në përputhje me vullnetin e popullit të Kosovës. Dokumenti voluminoz, nga ana tjetër, parasheh rregullimin e marrëdhënieve mes shumicës e pakicës në shtetin e ri, çka kënaq interesat e banorëve serbë të Kosovës. Pakoja e të dërguarit special të Kombeve të Bashkuara për statusin e Kosovës, e hartuar me bekimin e OKB-së, ka mbështetjen e fuqishme të Uashingtonit, Londrës, Parisit, Brukselit, e shumë e shumë qendrave të tjera. Pres që edhe të lëkundurit, apo ata që kanë kundërshti ndaj propozimit, të kuptojnë se procesi “Ahtisaari” në mos qoftë më i miri, është i vetmi opsion realist; e vetmja zgjidhje praktike. Pres pra, unitet të Kombeve të Bashkuara dhe përmbyllje të një kapitulli historik për Kosovën.

Puna në Kosovë nuk përfundon me këtë akt. Na takon të gjithëve papërjashtim të thirremi në përgjegjësinë kolektive dhe ta bëjmë Kosovën një vend më të mirë për të gjithë. Bashkëpunimi me komunitetin ndërkombëtar dhe NATO-n do të jetë vital edhe në periudhën pas zgjidhjes së statusit të Kosovës. NATO-ja dhe prania e ardhshme, civile në Kosovë do të jenë këtu për të garantuar respektimin e të drejtave civile, të cilat duhet të jenë të aplikueshme për të gjithë qytetarët e Kosovës pa dallime etnike, fetare apo kulturore. Është në nderin tonë të marrim lidershipin në mbrojtjen e këtyre të drejtave. Ne kemi treguar se kemi forcën ta bëjmë këtë. Kosova është në rrugë të mbarë. Këtë rrugë do ta përshkojmë bashkarisht. Ju faleminderit!

*Ky është fjalimi i përjavshëm i kryeministrit të Kosovës në radio

Tregim për xhelozinë në gazetarinë kosovare

Migjen Kelmendi

Kryeredaktor i gazetës “Java”, fituese e çmimit prestigjioz “PRESS FREEDOM AWARD”

Me fuqinë e fjalës që ta krijon njohja ndërkombëtare, deshta me përfitue nga rasti shumë i rrallë për gazetarinë kosovare, ma mirë me thanë – i vetmi – (deri sot), kur nji institucion ndërkombëtar si “Reporterët pa kufij” çmojnë dhe nderojnë gazetën “Java” me “Çmimin për Shtyp Të Lirë” (Press Freedom Award – Signal for Europe 2006), për me i piketue rrethanat, në të cilat u dha çmimi dhe me e kontekstualizue randësinë e këtij çmimi për momentin dhe situatën e përgjithshme të gazetarisë kosovare; me e kallxue tregimin për gazetarinë kosovare dhe çmimin e parë, ndërkombëtar në historinë e saj.

Tregimi për çmimin e parë, ndërkombëtar në historinë e gjatë të gazetarisë kosovare, që jipet për me e zhvillue dhe mbajtë të gjallë idenë e shtypit të lirë dhe të gazetarisë së pamvarun, në Kosovë nisi me – censurë.

Lajmi për çmimin e parë të gazetarisë kosovare në historinë e saj – u censurue (sic!).

U censurue nga tana mediat kosovare pos RTK-së dhe gazetës “Express”. Asgja ma fort e ma sakt nuk flet për randësinë e këtij çmimi për situatën e shtypit kosovar sesa kjo censurë, kjo mbytje e lajmit. Sa shumë fiton në domethanie tashti kualifikimi “Çmim për shtyp të lirë”. Sa fuqishëm tingëllon tashti emnimi “Press Freedom Award” në tragjikën e censurimit të lajmit për te. Papritun bahet edhe ma i randësishëm tashti ky çmim për situatën e shtypit kosovar.

E sa mos me i mbet nderi krejt RTK-së, lajmin që desku n’RTK e kishte përjetue si sihariq dhe e kishte përfshi në tana edicionet e datës 5 mars, nga lajmet qendrore të orës 19:30, zbret apostafat nga zyra kryeredaktori i RTK-së, Nebi Qena, dhe nga edicioni qendror i lajmeve, ku ishte përfshi edhe ky lajm, e censuron me arsyetimin se – po i bajmë reklamë “Javës”!

Nji ‘medalje’ për gazetarinë kosovare

Si u ba që gazeta, për të cilën tanë mediokrat ishin në sinkron dhe me nji za se asht gazetë pa tirazh dhe gazetë e dështueme, me e sjell të parin dhe të vetmin çmim ndërkombëtar deri sot në historinë e gazetarisë kosovare? Me e prue ‘nji medalje’ për gazetarinë në Kosovë.

Rrallë e hiç ka pas projekt medial si “Java” që i ka tubue tanë mediokrat bashkë në besimin e përkryem se “Java” dhe atituda e saj janë – gabim. Nji huqje. E ma e keqja, në ndërtimin e këtij stereotipi për “Javën”, ‘punë të palodhshme’ e ‘kontribut të paçmuem’ kanë dhanë sidomos disa njerëz që shtihoheshin si miq të mi, personal, ose miq të gazetës.

E kuptoj plotësisht se nga piskama dhe hallakama e krijueme nga gazetat që non-stop vetëshpallen dhe vetëlavdohen si «Gazeta Nr.1 në Kosovë», ose «Gazeta më e mirë në Kosovë», nuk u panë e as u ndigjuen argumentet që «Java» i jepte çdo t’ejte se, në situatën kur mungon konsensusi për kriteret dhe parimet e fushës mediale, kur mungon transparenca e financimeve të gazetave, kur e kemi situatën që në ‘garë’ për gazetën ma të mirë njanit nga ‘garuesit’ i falet hiç ma pak se nji televizion dhe disa milionë, e tjetri asht në gjendje me i humbë përmbi pesë milionë për 3 vjet, se kjo nuk asht situatë e natyrshme. Se kjo asht gazetari dopingu, gazetari e mbyllun mbrenda nji realiteti të konstruktuem e fals. Në situatën kur liderë partish përcaktojnë stafet e gazetave, asht guxim me u shpall Nr.1 e me u lavdue me tirazh, sepse, kësaj ‘gare’ i mungojnë rregullat e lojës, konsensusi për to. Kjo i bjen si në futboll me dhanë gol me dorë! Në situatën kur lexuesit i mungohen dhe i censurohen të dhanat, mënyra e financimit nuk i bahet e mundun që të familiarizohet me faktet dhe realitetet e funksionimit të shtypit kosovar, asht guxim me u lavdue me tirazh, sepse tirazhi në këso situata nuk asht shej suksesi, po damkë manipulimi. Këta janë gola me dorë.

Me këte lexues kosovar, të cilit i mungohet shumëçka, e ai nuk asht në gjendje me e dallue gazetën dhe raketën, me u lavdue me tirazh, asht paftyrsi, asht arrogancë. (Me tirazh lavdohej “Politika”, “Politika Express”, “Bujku”…). Fatkeqësisht, tirazhi në këtë pjesë t’Europës gjithmonë ka qenë ma shumë argument pushteti e manipulimi, sesa kualiteti informacioni.

Guantanamo, gazetaria e Kosovës

Shtypi kosovar duhet me dalë nga ky reality show e me iu nënshtrue nji reality check. Vetëm mbrenda realiteteve të stisuna, të konstruktueme, vetëm mbrenda nji Guantanamo gazetarie ky tirazh mundet me qenë ‘argument’ e këto ‘kritere’ - kritere. Tirazhi në reality show-un e shtypit kosovar asht kuantifikim i manipulimit dhe budallakisë. Asht masë e debatit qytetar. Edhe Bllace kishte tirazh, tirazh milionsh, por tirazhi i Bllaces ishte ekstrapolim i pamundsisë dhe huqjes së luftës. Edhe Milosheviçi kishte tirazh, tirazh milionsh n’Gazimenstan, por ai tirazh, si po vërtetohet me pamvarësimin e Kosovës dhe me bombat e NATO-s, ishte vetëm kuantifikim i marrisë, i çmendisë. Njisoj asht edhe situata me tirazhin e shtypit kosovar. Fatkeqësisht, gazeta ma e shitun nuk flet për kualitetin e informatës, por për kuantitetin e manipulimit.

Prandaj, ndoshta, për këtë pjesë të shtypit kosovar lajmi për çmim ndërkombëtar u përjetue si – shok. Prandaj, ndoshta, lajmi për çmim u censurue, u mundue me u mbajt i mbytun, sepse lajmi për çmimin ndërkombëtar hapi derën në këtë Guantanamo-gazetari dhe e bani këtë shtyp me u ballafaque me realitetin, realitetin ku argumentet e tyne nuk janë ma valide. Ato argumente përnjiheri u dokën të pavërtetueme, false, “Levis” i Novi Pazarit, “Adibas” patika. Prandaj, ndoshta u përjetue randë e gati e hangrën lajmin për çmimin nji pjesë e gazetarëve e redaktorëve kosovarë, sepse çmimi ishte origjinal dhe krejt tjerët i bante “Adibas” gazetarë e “Soni” gazetari.

Çmimi, ashtu si e përjetoj unë, e hap derën në këtë Guantanamo- Gazetari, ku gardianët i futnin mbrenda paret për protagonistat e vet, të cilët kishin për detyrë me e caktue se kush asht ma i miri e kush asht ma i forti. Mbas këtij çmimi, ma i forti në shtypin kosovar mundet me u ba vetëm ai që merr nji shpërblim edhe ma të madh se “Java”. Çmimi i “Javës” e shkërdhen hierarkinë e konstruktueme e të rreme të Guantanamo-Gazetarisë kosovare. Andaj shoku dhe censura.

Për çdo lexues të qytetnuem dhe të kulturuem, lajmi për çmimin ka mujt me u kuptue vetëm si sihariq. Si ogur i bardhë. Çmimi e jep drejtimin e mbarë nga duhet me u orientue shtypi kosovar. Andej nga Europa, nga kriteret, nga transparenca, nga guximi qytetar e profesional… nga përgjegjësia… andej. E jo këndej, nga partitë, nga liderët, nga fondet e dyshimta, nga manipulimi i përgjithshëm, nga kafet me liderin e partisë e me kryeministrin.

Ku asht dallimi mes nji besimtari mysliman që nuk e ha mishin e derrit dhe nji gazetari kosovar që nuk e ‘ha’ gegnishten?

Kur krejt kësaj jotransparence dhe manipulimi ja shton edhe faktin se shtypi kosovar jeton dhe zhvillohet nën hijen e tabuve të mëdha sa Kilimanxharo, siç asht sot, tabuja e standardit të shqipes dhe e identitetit kosovar, e kupton krejt debatin qytetnues e profesional të shtypit kosovar. E kupton, përse e përjetuen si shok çmimin e “Javës” dhe përse çmimi fiton konotacione dhe domethanie ma shumë në kontekstin aktual, kosovar. Asht turp me përfitue nga injoranca e lexuesit. Me e ushqye injorancën e tij tue ja mungue familiarizimin dhe debatin për të vërtetën e gjuhës shqipe, për të vërtetën e identitetit, të flamurit, të Kosovës së nesme. Me i evitue e me i mbyt debatet për temat ma të randësishme të Kosovës sot, njisoj si lajmin për çmimin e parë në historinë e gazetarisë kosovare.

Imagjinoni njeriun e qytetnuem që ka dhe kultivon tabu. Imagjinoni gazetën, e cila lavdohet me tirazh në kontekstin e ekzistimit të tabuve të mëdha sa Kilimanxharo? Imagjinoni gazetarinë qytetare në kontekstin e ekzistimit të tabuve gargamele. Tabuja e standardit të shqipes dhe e identitetit e shndërron gazetarinë kosovare në oksimoron. Imagjinoni njerëzit nëpër këto gazeta që lavdohen me tirazhe e me qytetari, që gërditen prej nji gjuhe si gegnishtja, njashtu siç gërditen myslimanët prej mishit të thiut, si tuten dervishët prej lepurit, si tuten bestytët nga banderat në formën e germës “A”, njashtu si u tut gazetaria kosovare nga çmimi i «Javës».

Ku asht dallimi mes nji besimtari mysliman që nuk e ha mishin e derrit dhe nji gazetari kosovar që nuk e ‘ha’ gegnishten?

Tabuja e gegnishtes dhe e identitetit e heq maskën qytetare të këtyne gazetave, tue e çplue vërtetësinë e tyne prej mekanizmash manipulimi e prej gazetarie me sehire, sepse, këto gazeta i kanë dhanë të drejtë vetes me gjykue në vend të lexuesit, me ja mungue atyne informatat. Me mendue në vend të tyne se çka asht mirë e çka asht keq për ta.

Pyetjes sesi u ba që gazeta, e cila ishte destinue me dështue, u çmue e vlerësue, e jo gazetat me Numrin 1 në ballina, une e kam nji përgjegje që i shkon këtyne gazetave dhe atitudës së tyne: me gjasë s’ka qenë kismet dhe dikush ju ka ba sehire.

Gazeta “Java” ka lind si reagim ndaj këtij manipulimi me opinionin dhe me qytetarët. “Java” asht mendue si nji hapsinë ma shumë, ku tabutë dhe sehiret nuk duhet ma me nxanë vend, të bindun se lexuesi i sotëm e ka kulturën e nevojshme sa mos me ju tutë të vërtetës. Me qenë ekstrahapsinë për ata që dojnë me qenë të ndryshëm, e ndryshe. “Java” si pikënisje ka respektin për lexuesin dhe ky respekt manifestohet tue e familiarizue atë me faktet dhe me debatet, jo tue ja censurue realitetin e tue ja mungue lajmet. Dhe për të gjithë ata që kështu e kanë kuptue “Javën”, ky ishte triumf i nji atitude qytetare, shembull sesi duhet me besue dhe luftue për fjalën e lirë, për shtypin e lirë dhe për pamvarësinë e tij.

Ky asht me pak fjalë tregimi i gazetarisë kosovare, e cila e censuroi lajmin për çmimin e parë, ndërkombëtar në historinë e saj, tue i dhanë kështu edhe domethanie edhe konotacione të paprituna këtij çmimi për gazetarinë kosovare.

Personalisht dhe n’emën të redaksisë i falënderoj tanë ata që kontribuen gjatë këtyne pesë vjetëve në këtë gazetë dhe shprehën përkrahjen dhe besimin e tyne n’atitudën e “Java”.

Këndej asht rruga….jo andej….

SPECIALE

Biznesmenët shqiptarë që po pushtojnë Greqinë

Nga Dhimitri Markopulo

“To Thema”

Gazeta greke “To Thema”(Tema) në artikullin e saj të datës 24 mars 2007-të, ka botuar një intervistë të ambasadorit shqiptar në Athinë, në lidhje me biznesmenët shqiptarë që kanë investimet e tyre në Greqi, si dhe disa sqarime për masën e shkëmbimeve tregtare ms dy vendeve tona, por edhe perspektivat e zhvillimit të mëtejshëm të marrëdhënieve me interes reciprok. Artikulli botohet vetëm pak, pasi ambasada shqiptare në Athinë nën drejtimin e Dr. Minarollit po ndërmerr hapat e nevojshëm mbi krijimin në Athinë të Dhomës së Tregtisë mes Shqipërisë dhe Greqisë me qendër në kryeqytetin grek, analoge me atë që tashmë është formuar në Tiranë me qendër atje mes biznesit grek dhe atij shqiptar. Më poshtë vijon artikulli.

Adnan Çela, Andrea Ndrio, Kristo Agna, Bekim Halilaj. Jo nuk bëhet fjalë për 11-tëshen e lojtarëve të kombëtares shqiptare. Aq më tepër për të gjithë ata që nxitojnë të mendojnë negativisht, nuk janë as bujqit e zakonshëm apo ndërtuesit e shtëpisë ngjitur. Dhe, nëse dikur grekërit vetë nxitonin të përmendnin duke qeshur historinë me turistët shqiptarë, kush do ta besonte se sot, do të ishim në gjendje të përmendnim biznesmenët shqiptarë në Greqi?

Në një moment kur vazhdon përpjekja për të mbyllur plagët e sistemit socialist në vendin fqinj, një brez i ri biznesmensh pasurohet dhe po ngrihet në Tiranë. Por kjo është vetëm një anë e së njëjtës medalje. Tjetra gjendet poshtë kufirit të Kakavijës në vendin tonë. Ka të bëjë me brezin e ish-emigrantëve ekonomikë, njerëve që nga të prapambetur u shndërruan në biznesmenë të radhëve të para.

Poshtë portretit të Skënderbeut

Udhërrëfyes në këtë pjesë të padukshme të shoqërisë që u përket sa shqiptarëve në Greqi, aq edhe vetë përpjekjes greke për zhvillim, u bë për “Historitë e Biznesit” ambasadori në Athinë, z Vili Minarolli. Na priti në zyrën e tij, moderne në Psiqiko. Nën vështrimin e rreptë të heroit kombëtar, Skënderbeut, i cili stoliste zyrën e z. ambasasdor në një kornizë, folëm për diçka që nuk jemi mësuar. Ndoshta edhe për faktin se mohonim në mënyrë kategorike që ekzistonte; Investimet shqiptare dhe zhvillimin e tyre në Greqi

“A e dini se në çdo rreth të Greqisë ekzistojnë 2 deri në 3 shqiptarë biznesmenë, të cilët mbajnë me punë rreth 100 deri në 200 njerëz? ”Kjo ishte pyetja e parë që z. ambasador na drejtoi, duke shkelur kureshtinë se çfarë do të ndiqte më pas. Shembujt e tij qenë të shumtë.

“Ndërtimi grek tashmë mbështetet te kompanitë e bashkatdhetarëve të mi. E njëjta gjë ndodh edhe me sistemin e pastrimit të ndërtesave, manaxhimin e lëndëve të para, një pjesë të shërbimeve etj. Prezencën e tyre biznesmenët shqiptarë në Greqi e kanë deri në fushën e reklamave, ku kanë krijuar madje edhe zyra të tyre. Një nga ata është z Vasil Skëndo”, - thekson z. ambasador.

Gjithashtu, një lëvizje e madhe e biznesmenëve nga vendi malor vihet re edhe në fushën e karburanteve. “Ekziston një biznesmen shumë serioz si z. Adnan Çela, i cili me shoqërinë e tij “Alba Ledi” ka shumë bashkëpunime me Greqinë. Por nuk është i vetmi. Si do t’ju dukej, nëse do ju thosha se z. Andrea Ndrio si marrës punimesh, ka marrë pjesë me brigadat e tij të punëtorëve në 60% të ndërtimeve të rrugëve në Greqi dhe veçanërisht të rrugës së Atikës. Sigurisht që kompanitë greke bëjnë ofertat dhe marrin tenderat e ndërtimit infrastrukturor, por manaxhimin e krahut të punës e përmbushin shoqëritë shqiptare”.

Po të njëjtat informacione na tregojnë se në zonën e Thesalisë, një prej qendrave më të mëdha të rritjes së derrave, është në duart e shqiptarëve, në një kohë që lëvizje të mëdha vihen re edhe në fushën e punimeve me dru.

Life-style alla greke

Shumica e biznesmenëve shqiptarë ka gjetur me kohë rrugën e begatisë ekonomike. Blejnë makina të shtrenjta, jetojnë si grekët dhe tashmë, edhe banojnë në zonat më të zgjedhura të Athinës. “Sigurisht që edhe në vendin tim është formuar me kalimin e viteve një elitë biznesmenësh që interesohet për të punuar me Greqinë. Ka shumë biznesmenë të fuqishëm që brenda kufijve shqiptarë bashkëpunojnë me grekët. Por ekziston edhe vullneti për të kundërtën, por gjërat vështirësohen në këtë pikë nga burokracia e administratës greke”, - thekson z. Minarolli dhe shton: “Para rreth një muaji, ftova në Greqi një prej biznesmenëve më të njohur të supermarketeve në Tiranë, i cili ka në zotërimin e vet një rrjet shumë serioz dyqanesh në Shqipëri. Greqia i refuzoi vizën hyrëse dhe për të ardhur u detyrua që të marrë vizë nga Italia, e cila është edhe më elastike në këtë problem. Dhe që të sqarohemi, ky njeri donte të vinte këtu, sepse kërkonte verëra greke, për t’i vendosur si më cilësoret në raftet e dyqaneve të tij”.

Problemet

Një tjetër shembull i biznesmenit shqiptar që na sjell z. Minarolli, është ai i pronarit të një shoqërie nafte, por edhe sigurimesh, të z. Bekim Halilaj. Bëhet fjalë për një njeri, i cili ka njohje brenda qeverisë së z. Berisha dhe i cili merrte pjesë pak kohë më parë në bisedimet e nivelit të lartë në Athinë të komunitetit të biznesit. Ndërsa xhiroja e z. Halilaj në Greqi kalon në rreth 1-2 milionë euro, ai u gjend të mos kishte vizë dhe të merrte dëbimin nga Greqia. “U desh të ndërhyjë prefekti i Selanikut, z. Panajot Psomiadhi, që të gjendej një rrugëdalje dhe të dilej nga situata”, - na shpjegon ambasadori. Dhe pa e marrë veten ende nga ndërhyrja e politikanit të Greqisë së veriut, z. Minarolli na zbulon se një biznesmen me vendqëndrim në Selanik, që në një vit i jep shtetit grek taksa të nivelit të 40 mijë eurove, shpesh detyrohet të shkojë në Shqipëri për arsye të problemeve me burokracinë. Zjarri i fjalëve që na drejtohet nga z. amabasador është i pandërprerë. “Ekziston në zonën e Pangratit një biznesmen që ka një njësi të bërjes së statujave qeramike. Bëhet fjalë për një nga furnizuesit kryesorë të Plakës. Madje, kur kisha pritur një përfaqësi të huaj, iu bëra dhuratë një amforë greke, por “Made in Albania”, - thekson z. Minarolli. duke na treguar ç’është e vërteta edhe një punim të njësisë në fjalë. Nxitje për intervistën në fjalë shërbeu edhe rasti i një biznesmeni nga Korça që ka në punë rreth 150 persona e që detyrohet të rinovojë shpesh vizën e tij. Në këtë shembull skicohet diçka më shumë se drama e biznesmenit shqiptar.

Të pasiguruarit

Por autoritetet shqiptare ndjekin nga afër edhe masën e të pasiguruarve në Greqi. Vlerësimet e z. ambasador janë se, rreth 30% e bashkatdhetarëve të tij në Greqi punojnë pa siguracion.

“Mendoni çfarë të ardhurash humbin shoqëritë e sigurimeve dhe arka. Dhe kjo, në një kohë kur shërbimi statistikor i vendit tuaj ka vlerësuar sipas studimeve të bëra rolin e forcës punëtore shqiptare në ngritjen e të ardhurave kombëtare”, - thekson z. Minarolli. Paralelisht me shembujt e sjellë, z. ambasador bën edhe propozimin e tij: “Nëse Greqia do të njihte punësimin sezonal dhe do të ishte paksa më elastike në dhënien e vizave, do të kishte përfitime të konsiderueshme. Mendoni se më shumë se 300 mijë shqiptarë, pasi mbarojnë punët e bujqësisë dhe marrin “paratë e zeza”, kthehen në atdheun e tyre dhe rikthehen sezonin tjetër. Përse të mos ketë një traditë të kësaj pune që edhe emigrantët shqiptarë do t`i kënaqte, por edhe paraekonominë në Greqi do ta godiste?”

Vizat

Një luftë e panjohur, ekonomike ndërkaq zhvillohet për sytë e vendit tonë, fqinj. “Të dashur, luftën deri tani e keni humbur. Viza greke zgjat maksimumi 2 vjet. Italianët japin ndërkaq në këtë kohë leje qëndrimi në vendin e tyre dhe kjo është më e pakta. Nuk është e rastit që 27% e importit që bën Shqipëria e realizon me Italinë dhe vetëm 16% është me Greqinë. Dhe kjo, edhe pse me Greqinë ne kemi kufij tokësorë dhe përveç të tjerave edhe më shumë lidhje, siç janë rreth 1 milionë bashkatdhetarët e mi”, - nënvizon ambasadori, z. Minarolli. Por edhe eksportet janë sigurisht më të shumta në drejtim të Italisë, duke arritur në 72%, ndërsa vetëm 9,6% me vendin tonë. Çfarë ndodh nga ana tjetër me turizmin shqiptar?

“Koha, kur varfëria ishte pengesë që të flisnim për një zhvillim të tillë, ka kaluar. Por edhe në këtë pjesë keni mbetur mbrapa. Ne shkojmë 10 herë më shumë në Itali, duke shpenzuar atje paratë tona. Përse, në një kohë kur kërkoni rritje të turizmit, nuk hapni dyert e vendit tuaj për vizitorët nga Shqipëria?”

Një studim i Ministrisë shqiptare të Ekonomisë tregon se fqinjët tanë blejnë 8 herë më shumë lëndë ndërtimi nga Italia, ndërsa e njëjtë është edhe diferenca në lidhje me pjesët e këmbimit për makinat dhe pajisje zyrash.

400 milionë investimet e Greqisë në Shqipëri

Deri në këtë moment, në Shqipëri kemi rreth 250 kompani greke. Vendi ynë përbën partnerin e dytë, më të rëndësishëm në shkëmbimet tregtare me Shqipërinë, me investime që tejkalojnë shifrën e 400 milionë eurove.

Të gjitha këto shoqëri marrin pjesë energjikisht në përpjekjen e zhvillimit të vendit. Siç na përmendi edhe ambasadori shqiptar në Athinë, në këtë moment po formohet një klasë e re, më e specializuar profesionistësh që ndihmon të gjithë ata që duan të investojnë në Shqipëri. “Grekët janë të mirëpritur në Shqipëri dhe më duhet t’ju them se presim shumë nga ju në përpjekjen që bëjmë për integrim në BE. Jeni aleatët tanë më të afërt”.

Shoqëritë më prezente

Banka Kombëtare greke

Alpha Bank

Tirana Bank (Banka e Pireut)

Vodafon Albania

AMC (degë e Cosmote)

EL.PE

DIEKAT

Shoqëria “Mamidhaki”

KRONIKA

E veja e doktorit dëshmon në gjyq

Vjollca Kastrati: Ju

rrëfej vrasësit e Beharit

Bashkëshortja e viktimës ka deklaruar se me të dhënat që kishte marrë nga telefonatat anonime, nga dëshmitë e deritanishme, të dëgjuara në gjykatë ishte e bindur se Behar Kastratin e kanë vrarë të pandehurit

E veja e Behar Kastratit nuk ka njohur asnjërin prej të pandehurve të akuzuar për vrasjen burrit të saj në sallën e gjyqit, por ka pohuar se janë pikërisht ata vrasësit. Vjollca Kastrati ka rrëfyer dje, në Gjykatën e Krimeve të Rënda se nuk njihte personalisht asnjërin prej vëllezërve Rexha dhe bashkëpunëtorin e tyre, Geca. Në dëshminë e saj, bashkëshortja e viktimës ka deklaruar se me të dhënat që kishte marrë nga telefonatat anonime, nga dëshmitë e deritanishme të dëgjuara në gjykatë, ishte e bindur se Behar Kastratin e kanë vrarë të pandehurit. E veja e Kastratit ka deklaruar se fëmijët e lagjes kishin gjetur dy ditë pas zhdukjes së Beharit edhe çelësat e tij dhe më pas ia kishin çuar në shtëpi. Dëshmitarja ka deklaruar se në shtëpinë e tyre, menjëherë pasi Behari ishte zhdukur, kishin mbërritur telefonata anonime dhe zëri që ka qenë nga ana tjeter e telefonit, iu kishte deklaruar se Beharin e kishin vrarë dy vëllezërit Rexha dhe i njohuri i tyre, Ismail Geca.

Akuza

Ndërsa këtë dëshmi e kanë kundërshtuar të pandehurit, si edhe mbrojtësit e tyre, ligjorë. Sipas organit të akuzës, autorë të vrasjes së mjekut nga Hasi janë vëllezërit Qamil e Abedin Rexhaj dhe i akuzuari si bashkëpunëtor i tyre, Ibrahim Geca. Sipas prokurorisë, nga hetimet është konkluduar se motivi i vrasjes ka qenë vdekja e vëllait të Rexhajve, Ganiu, në spitalin e Krumës në vitin 1995-së, si pasojë e një infarkti miokardi, kur si mjek roje ka qenë Behar Kastrati, i cili nuk është ndodhur në detyrë. Prokuroria ka zbardhur gjithë skemën e ngjarjes, duke e bazuar në prova materiale dhe dëshmi të rreth 50 personave nga Hasi e Durrësi, ku prej disa vitesh banojnë të pandehurit Rexha. Sipas akuzës, më datë 8 korrik 2005-së, rreth orës 11.30, policia e Hasit është njoftuar nga Flamur Kastrati, se që nga mbrëmja e datës 7 korrik 2005-së, nuk është paraqitur në banesë dhe nuk dihej vendndodhja e vëllait të tij, Behar Kastrati, 42 vjeç, lindur në Brrut të Hasit e banues në qytetin e Krumës. Humbja e kontaktit me të nga familjarët ka ndodhur që prej orës 23.30 të datës 7 korrik 2005-së e në vazhdim. Ndërkaq, më 27 gusht të 2005-së, në fshatin Klosh të Kukësit, në rrugën automobilistike Kukës-Tiranë, në vendin e quajtur Ura e Kloshit, rreth 5 metra nga këmba e katërt e urës dhe 8 metra nga bregu verior i liqenit, ndodhej një kufomë e zhytur në ujë, ku dallohej pjesa e prapme e kokës dhe shpina. Gjatë këqyrjes së vendit të ngjarjes dhe gjatë nxjerrjes së kufomës, u konstatua se trupi ishte i lidhur me dy shtylla betoni nëpërmjet telave dhe një litari në qafë, trung dhe këmbë. Nga veprimet hetimore të kryera më tej, u konkludua se kufoma e gjetur i përkiste Behar Kastratit.

Të akuzuarit

Qamil Rexhaj, 49 vjeç, lindur në Golaj të Hasit e banues në Katund të Ri të Durrësit, i dënuar më parë, akuzohet për kryerjen e veprës penale të “Rrëmbimit ose mbajtjes peng të personit”, me pasojë vdekjen, të kryer në bashkëpunim.

Abedin Rexhaj, 44 vjeç, lindur në Shpërdhe të Krujës e banues në Katund të Ri të rrethit të Durrësit, akuzohet për kryerjen e veprës penale të “Rrëmbimit ose mbajtjes peng të personit”, me pasojë vdekjen e personit, të kryer në bashkëpunim.

Ibrahim Geca, 50 vjeç, lindur e banues në Krumë të Hasit, akuzohet për kryerjen e veprës penale të “Rrëmbimit ose mbajtjes peng të personit”, të kryer në bashkëpunim.

7 korrik 2005-së, zhduket Behar Kastrati, 42 vjeç, lindur në Brrut të Hasit e banues në qytetin e Krumës.

27 gusht 2005-së, gjendjet kufoma e Behar Kastratit në vendin e quajtur Ura e Kloshit, rreth 5 metra nga këmba e katërt e urës dhe 8 metra nga bregu verior i liqenit.

Morën peng për 50 mijë euro,

burg e gjobë për Zhangon e Gugën

Trupi gjykues i Krimeve të Rënda ka dhënë dje, vendimin për Ferdinand Zhangon dhe Julian Gugën. Janë dënuar me nga 4 vite burg dhe me një gjobë prej 6 milionë lekësh. Ndërsa prokuroria dy javë më parë ka kërkuar dënimin me nga 5 vjet burg secili. Ferdinand Zhango dhe Julian Guga janë akuzuar për veprën penale të “Shtrëngimit me anë të kanosjes ose dhunës për përfitim të pasurisë”, të kryer në bashkëpunim. Sipas prokurorisë, Ferdinand Zhango dhe Julian Guga akuzohen për pengmarrjen e një lokali në Lukovë të Sarandës. Të dy të pandehurit sipas akuzës pretendohet që të kenë rrëmbyer dhe mbajtur peng shtetasin Ilirian Thomanaku, i cili ishte banor në fshatin Lukovë. Zhango dhe Guga pretendohet se kanë shkuar shpesh në lokalin e Ilirian Thomanakut për më tepër se një vit. Atje kanë konsumuar ushqime dhe pije pa kryer asnjë pagesë. Vetë pronari i lokalit nuk ka mundur të kërkojë asnjëherë pagesën për këto shërbimeve, pasi të pandehurit e kanë kërcënuar atë vazhdimisht. Kjo nuk ka përfunduar me kaq, derisa një ditë, të dy kërcënuesit e kanë marrë peng atë, duke i kërkuar një shumë prej 50 mijë eurosh në këmbim të lirisë së tij. Hetimet tregojnë se marrja peng ka ardhur si rezultat i kërkesës së pronarit të lokalit për të mos shkuar më në restorantin e tij. Përveç këtyre, prokuroria ka theksuar gjatë seancës se Zhango është dënuar edhe njëherë nga drejtësia për veprat penale të kërcënimit me armë dhe dezertimit nga ushtria. Gjatë seancave në Gjykatën e Krimeve të Rënda, prokuroria ka theksuar se mbledhja e dëshmitarëve ka qenë shumë e vështirë, pasi të gjithë dëshmitarët kanë refuzuar dëshminë si pasojë e kërcënimit të të pandehurve.

Vjedhjet, gjykata jep masën për dy grabitës

Dy të rinj janë lënë dje, nga gjykata e kryeqytetit në detyrim paraqitjeje, pasi janë arrestuar dy ditë më parë nga policia, të akuzuar për vjedhje. Ardian Muhametaj, 23 vjeç, banues në Tiranë, me arsim 8 klasë është arrestuar nga policia, pasi në rrugën “Skënderbej” i ka vjedhur celularin një shtetasi. Ky shtetas ka pranuar akuzën, ndërsa do të gjykohet në gjendje të lirë, duke marrë parasysh edhe kërkesën e avokatit mbrojtës. Ndërsa një 17-vjeçar është lënë me detyrim paraqitjeje dje, gjatë marrjes së masës së sigurisë. Ky shtetas dyshohet të ketë vjedhur në banesën e një shtetasi disa sende me vlerë, duke shfrytëzuar mungesën e pronarit të banesës. Pas kësaj ngjarjeje, personi i dëmtuar ka bërë denoncim në polici dhe më pas është bërë i mundur edhe ndalimi i të miturit, i cili do të gjykohet i lirë, për shkak të moshës dhe për mungesë të precedentëve të mëparshëm.

Torino/ Katër shqiptarë në pranga me 5 milionë euro heroinë

Katër shqiptarë kanë rënë në prangat e policisë italiane dy ditë më parë, pasi në valixhen që njëri prej këtyre shtetasve ka qenë duke e transportuar, janë gjetur plot 60 kilogramë heroinë. Katër shqiptarët kanë qenë të vëzhguar prej disa kohësh nga policia. Policia e italiane e ka organizuar operacionin e saj në Torino. Droga e gjetur në valixhe ka qenë e ambalazhuar në 50 paketa. Sipas specialistëve të Antidrogës së qytetit, mësohet se kjo drogë ishte e destinuar për tregun italian të narkotikëve, ndërsa vlera e saj në treg arrinte në rreth 5 milionë euro. Mësohet se nga hetimet ka rezultuar se kjo sasi heroine do të shpërndahej në veri të Italisë. Shqiptarët e arrestuar janë Oktovian Nikolla, 41 vjeç, Robert Sulovari, 36 vjeç, Eder Sylari, 36 vjeç dhe Fatjon Borokoçi, 23 vjeç. Policia e Torinos ka bërë edhe kontrollet e banesave të të gjithë të arrestuarve. Shtëpia e 23- vjeçarit, Fatjon Borokoçi, ishte transformuar në një laborator të vërtetë droge. Policia ka gjetur në këtë banesë peshore të ndryshme, letër celofani, e cila përdorej për ambalazh, si edhe disa lëndë, të cilat përdoreshin si përzierës të heroinës. Policia italiane disa ditë më parë ka mundur të kapë një tjetër sasi të konsiderueshme droge, e cila dyshohet të ishte nisur nga Shqipëria. Guardia di Finanza ka arrestuar shoferin e kamionit, një 42-vjeçar me origjinë maqedonase. Droga, e cila kushtonte rreth 8 milionë euro, e ndarë në 200 pako, ishte destinuar për në rajonin e Toskanës, në veçanti për shpërndarje lokale. Droga ishte fshehur në ngarkesën me fruta të kamionit dhe policia po heton për të zbuluar anëtarë të tjerë të këtij trafiku. 13 kg të tjera kokaine janë sekuestruar para një jave nga një tjetër operacion i policisë italiane në Emila Romania, dhe në pranga kanë rënë dy shqiptarë 25 e 26 vjeç. Në përfundim të operacionit u sekuestruan edhe 3 kg përzierës droge dhe një pistoletë, që ishin fshehur në makinën e dy të arrestuarve.

Operacioni/ Nis konkretizimi i iniciativës për bllokimin e mjeteve të dyshuara si të trafikuara

Tiranë, makinat e vjedhura,

“Catch 5” bllokon 7 luksoze

“Janë në verifikim shumë makina me targa të huaja, por edhe disa makina të zhdoganuara, për të cilat ka të dhëna se mund të jenë të trafikuara”, thanë dje burime policore

Nis konkretizimi i iniciativës për bllokimin e mjeteve të dyshuara si të trafikuara. Policia e Tiranës deklaroi dje se, në kuadër të operacionit të koduar "Catch 5", që ndërmori në kuadër të verifikimit, bllokimit dhe sekuestrimit të mjeteve motorike të trafikuara në vendin tonë u sekuestruan 7 automjete dhe u proceduan penalisht drejtuesit e tyre. Bëhet me dije se forcat e policisë sekuestruan mjetet; "Volkswagen Golf" me targa të huaja BR 902 MZ, "BMW 320 D" me targa të huaja BP049FD, "Benz 270" me targa të huaja BX143EX, "BMW 318" me targa të huaja AN460 EM, "Benz" me targa të huaja BM758 XY, "BMW" me targa të huaja CP793 KL dhe "Renault Megane" me targa të huaja CJ048MP. Drejtues të policisë bënë të ditur se, në Drejtorinë e Policisë së qarkut Tiranë është ngritur një grup pune, i cili do të hetojë në lidhje me trafikimin e këtyre mjeteve motorike në Shqipëri, për identifikimin e autorëve të përfshirë në këtë aktivitet si dhe dokumentimin ligjor të kësaj veprimtarie kriminale. “Janë në verifikim shumë makina me targa të huaja, por edhe disa makina të zhdoganuara, për të cilat ka të dhëna se mund të jenë të trafikuara”, - thanë dje burime policore.

Operacionet e mëparshme

Aksionet në kuadër të operacioneve të koduara “Catch” kanë nisur tetë muaj më parë. Operacioni i përket të njëjtit kod me operacionet e zhvilluara në 12 vende të Europës Juglindore, ku edhe dyshohet se janë trafikuar makinat e vjedhura dhe mes këtyre vendeve rezulton edhe Shqipëria. Vetëm brenda një nate, në fillim të tetorit të shkuar janë bllokuar 278 automjete, ku pas verifikimeve paraprake vetëm 21 prej tyre kanë rezultuar të vjedhura. Zbulimi i tyre ka ardhur nga Interpol Tirana, ndërkohë nga asistuesit e këtij operacioni është mundësuar vendosja e pikave të kontaktit, mes vendeve përfshirëse, çka ka mundësuar edhe përcaktimin në kohë rekord të “vendlindjeve” të makinave të dyshuara. Vetëm në Tiranë u bllokuan 93 automjete, ndërsa kanë rezultuar të vjedhura vetëm 10 prej tyre, ku 5 prej tyre janë “Mercedes”, tip i fundit, ndërsa pjesa tjetër, “BMW” nga X3 në X5 dhe makina të tjera të konsideruara po luksoze. Ndërkohë që, edhe në Durrës u bllokuan 48 automjete dhe u ndëshkuan edhe shumë drejtues të tyre për mungesë dokumentacioni. Ndërsa kanë rezultuar të vjedhura vetëm katër prej tyre.

Prokuroria: “BMW”-të s’i kemi hetuar të specifikuara për “X5”

Makinat “BMW” rezultojnë edhe më problematiket në verifikimn e dokumentacionit. Në fillim të marsit, numri dy i Drejtorisë së Përgjithshme të Doganave, Bujar Vukaj, deklaroi se, nga 118 autovetura “BMW X5” të regjistruara, vetëm 13 makina “BMW X5” të shitura nga koncesionari, si dhe autoveturat e trupit diplomatik të akredituara në Shqipëri rezultojnë të jenë me dokumente të rregullta. Sipas Vukajt, ky trafik është organizuar nga një rrjet trafikantësh, të cilët kanë bashkëpunuar ngushtë me segmente të administratës shtetërore. Sipas numrit dy të Doganave, 105 autovetura “BMW X5” janë pajisur me dokumente dhe qarkullojnë në mënyrë të jashtëligjshme. Prej këtyre, 16 autovetura janë pajisur me targa shqiptare pa u zhdoganuar fare në doganë. Ndërsa, 89 prej tyre janë zhdoganuar në degë të ndryshme doganore, duke paraqitur të dhëna të ndryshme nga ato reale si tipi i “BMW”-ve dhe viti i prodhimit, duke ulur detyrimin doganor. “25 automjete janë regjistruar si të vjedhura në vende të ndryshme të Europës, dosja e të cilave është dërguar në organin e ndjekjes penale”, - ka deklaruar Vukaj. Ndërsa, automjetet e tjera janë në proces hetimi. Por, prokuroria ka deklaruar se, bllokimi duhet të ishte bërë nga policia, ndërkohë që hetimi ka qenë për të gjitha “BMW”-të dhe jo në veçanti për llojin “X5”.

Histori vjedhjesh...

Në qershor të 2003-shit, policia e Tiranës lajmëroi për shkatërrimin e një organizate kriminale që vidhte “Benz”-a. Në pranga ranë 6 persona, ndërsa u tha se brenda një kohe shumë të shkurtër policia kishte arritur të zbulonte vjedhjen e 5 “Benz”-ave, tip 250, në atë kohë të sapohyrë në Shqipëri, prej këtij grupi. Pas atij aksioni, grabitësit e makinave u duk se pushuan aktivitetin (ata, ose policia ndjekjen...). Fusha e grabitjes së makinave nxori një tjetër element të vjedhjes. Një bandë, në përbërje të së cilës kishte minorenë, u identifikuan si hajdutë pasqyrash. Sërish “Benz”-at ishin makinat e shenjestruara prej tyre. Policia arrestoi edhe një pronar servisi, por shpejt u la i lirë, pasi nuk rezultoi i papërfshirë në vjedhjen e 90 pasqyrave. Grupet vazhdojnë të identifikohen nga policia edhe në 2006-ën. Përveç tropojanëve në përbërje të të cilëve ishte edhe një lushnjar, policia para pak ditësh arriti të godasë edhe grupin e Valiasit, duke sjellë në pranga dy persona dhe shpallur në kërkim një të tretë. Gjithashtu, vetëm para dy ditësh, policia e Lezhës goditi një tjetër grup, të cilët vidhnin makina në Tiranë, Durrës, Elbasan dhe i çmontonin në Hajmel të Shkodrës, ku kishin ngritur edhe pikën e servisit. Në pranga mësohet se ranë katër persona dhe priten edhe arrestime të tjera.

Trafiku, lushnjari dhe kosovari që zbardhën trafikun

Një lushnjar, i arrestuar disa muaj më parë ka qenë i shpallur në kërkim si anëtar i bandës prej së cilës janë arrestuar 10 persona. Laver Isufi, 45 vjeç, nga Lushnja pretendohet se është i fundit i këtij grupi, për të cilin Prokuroria e Tiranës kishte lëshuar urdhërarrestin për vjedhje makinash. Automjeti që e ka “dorëzuar” lushnjarin mësohet se ishte një “Benz 250”, me shasi të ndërruar. Me dy makina të tilla ndodhi edhe zbulimi i veprimtarisë së tyre në shkurtin e vitit 2006, kur në Luf të Pukës u bllokuan tri makina me katër persona, që të gjithë anëtarë të bandës që më vonë u identifikua me “tropojanë”. Makinat vidheshin në Tiranë dhe brenda natës mbërrinin në Bajram-Curri, për t’u shitur pastaj me çmime qesharake. Ndërkaq, disa kohë më vonë u vu në pranga kosovari që trafikonte makina në linjën Gjermani–Kosovë–Kukës. Zbulimi erdhi nga Kukësi, ndërsa një 25-vjeçar nga Suhareka u konsiderua edhe “çelësi” për ekspertët e hetimit të një prej linjave të trafikut të mjeteve motorike. I riu nga Suhareka është ndaluar për verifikim dokumentacioni, ndërsa makina “Mercedes 208” me targa të Kosovës, ka rezultuar e vjedhur. Në deponimet që janë regjistruar në sektorin antitrafik të Kukësit, emri i 25-vjeçarit rezultonte i përfshirë në një trafik, bashkë me një bashkëqytetar të tij, por që jeton në Gjermani. Nga sa është mësuar gjatë hetimeve, kosovari furnizonte Bullkenban Sulën për të realizuar trafikun me Kukësin. Kështu, Sula, i vënë në pranga, do të presë tashmë edhe “shokun” e tij, për të vazhduar ecurinë e zbulimit të të gjithë bashkëpunëtorëve të tjerë në këtë linjë. Hetuesit që janë përfshirë në çështjen e kosovarit të kapur në doganën e Morinës, kanë hedhur dyshime edhe mbi persona të skeduar kuksianë, ku, sipas tyre, bashkëpunimi në këtë trafik është i paevitueshëm nga ana e tyre. Qafë-Thana dhe Tushemishti janë konsideruar si dy pikat e preferuara të trafikantëve për të kaluar makinat e vjedhura, automjete që sipas Policisë së Shtetit kanë mbërritur deri në Elbasan.

Shkurt

Dy shqiptarë në “Ndragheta”, pranga me grupin në Itali

Ishin të lidhur me familjen e Farao Marincolas në Umbria dhe vepronin në sektorin e shpërndarjes së drogës. Bëhet fjalë për një organizatë kriminale e njohur si “Ndrangheta kalabreze”, e cila është eliminuar nga policia italiane gjatë një operacioni dy ditët e fundit. Prokurori i kësaj çështjeje, Nicola Miriano, në një konferencë për shtyp ka deklaruar se, operacioni ka nisur që në vitin 2004 dhe dje ka përfunduar me arrestimin e 15 personave. 8 prej të arrestuarve banoni në Umbria, 5 në Toscana dhe njëri në Kalabri. Në pranga kanë rënë edhe 2 shqiptarë, 2 nigerianë dhe pjesa tjetër të gjithë me origjinë kalabraze. Të gjithë këta shtetas akuzohen për organizatë kriminale e financuar nga trafiku i lëndëve narkotike dhe kryerja e vrasjeve në kuadër të organizatës. Hetimi për këtë organizatë ka nisur në vitin 2004, nga policia, për të verifikuar aktivitetin e një firme të shitjes së pasurive të paluajtshme. Ndërsa, në hetimet e policisë italiane ka rezultar se, në datën 28 maj 2005 është vrarë Roberto Provenzano, një kalabrez i akuzuar për shpërndarje lëndësh narkotike. Ndërsa, dyshohet se vrasja ka ndodhur për mospagim të parave të furnizimit. Gjatë operacionit për arrestimin e këtyre shtetasve mësohet të jenës sekuestruar gjithësej 2 kg drogë hashash, kokainë dhe heroinë. Kjo sasi droge mbërrinte nga Turqia, nëpërmjet Shqipërisë.

Vrau dy vjet më parë, ekstradohet Hamzaj

Ekstradohet vrasësi i Selimajt, në Xhafzotaj të Shijakut. Interpol Tirana ekstradoi dje nga Turqia, Hysen Hamzajn, 28 vjeç, lindur në Kryemadh, Kukës dhe banues në Xhafzotaj, Durrës, i cili ishte shpallur në kërkim ndërkombëtar për “vrasje”. Sipas policisë, Gjykata e rrethit Gjyqësor të Durrësit, me vendim të datës 16.11.2005 e ka dënuar 28-vjeçarin Hamzaj me 10 vjet burg për veprat penale të “vrasjes" dhe "armëmbajtjes pa leje”. Hysen Hamzaj është shpallur fajtor nga kjo gjykatë, pasi më datë 16.01.2005, rreth orës 17.00 në fshatin Xhafzotaj ka vrarë me armë zjarri shtetasin Ali Selimaj. Mësohet se për ekstradimin e këtij shtetasi Zyra Qendrore Kombëtare Interpol Tirana ka bashkëpunuar në mënyrë të vazhdueshme me autoritetet policore turke. Ndërkohë, në aeroportin ndërkombëtar “Nënë Tereza” në Rinas, Hysen Hamzaj iu është dorëzuar përfaqësuesve të Drejtorisë së Përgjithshme të Burgjeve.

RRETHE

Studioja “Kapedani” ndodhet në ambientet e bashkisë së qytetit

Vidhet piktura e rrallë 500-vjeçare e Shën Krajlit

Koleksionisti Vangjel Kapedani tregon: “Hyra në studio dhe u përballa me tre persona. U përlesha me ta, njëri prej tyre më goditi me levë në kokë e më pas u larguan, duke marrë vetëm pikturën e Shën Krajlit...”

ELBASAN-Rreth orës 20.00 të mbrëmjes, tre persona ende të paidentifikuar prej policisë kanë hyrë në studion e koleksionistit të njohur Elbasanas, Vangjel Kapedani, duke vjedhur një nga pikturat më të çmuara të Europës, atë të Shën Krajlit. Piktura në fjalë është 500-vjeçare dhe sipas historisë, i përket Shën Krajlit, bashkëshortit të Maria Magdalenës. Koleksionisti Vangjel Kapedani, i cili njihet për koleksionet e tij të rralla në mbarë Shqipërinë, e cilësonte këtë pikturë si një ndër më të vyerat e koleksioneve të tij dhe e ruante atë në një vend të fshehte të studios së tij. Në këtë studio, koleksionisti Kapedani ka të arkivuara thesaret e tij të panumërta, duke filluar që nga monedhat e kohërave të lashta e plot skulptura, piktura, etj. Studioja “Kapedani” ndodhet në ambietet e Bashkisë së qytetit të Elbasanit dhe ka dy hyrje, një nga mbrapa bashkisë dhe një brenda ambienteve të saj. Kapedani, gjithnjë përdorte derën e jashtme të studios së tij për të pritur klientë, dhe koleksionistë të ndryshëm, të cilëve u blinte sende të vjetra prej shekujsh.

I prononcuar për gazetën “TemA”, Kapedani tregon edhe momentin e përjetimit të këtij akti të turpshëm:

“Erdha në studio në orën 20.00 dhe vura re se dera e saj ishte gjysmë e hapur. Menjëherë e kuptova se diçka kishte ndodhur. Hyra brenda dhe u përballa me tre persona, të cilët nuk munda t’i njihja. U përlesha me ta, njëri prej tyre më goditi me levë në kokë e më pas u larguan, duke marrë vetëm pikturën e Shën Krajlit.” Ndër të tjera, Kapedani tregon se studioja ishte rrëmujë dhe tre personat kishin hedhur në tokë monedhat e vjetra, por edhe shumë sende të tjera me vlera të rralla historike, që ndodheshin në ambientet e studios.

Piktura në fjalë është shumë e kushtueshme, ajo ka edhe një histori të veçantë, që i përket periudhës së Jezu Krishtit. Personat të cilët e kanë kryer këtë akt kanë qenë të mirinformuar për këtë. Kapedani me një karrierë shumëvjeçare në profesionin e koleksionistit të sendeve antike ka ndihmuar shumë herë edhe Muzeun e Elbasanit, si dhe ka marrë pjesë në shumë emisione debat, duke analizuar çdo objekt apo pikturë të ndodhur në studion e tij. Pas konstatimit të kësaj vjedhjeje misterioze, ai ka bërë denoncimin në komisariatin e policisë së Elbasanit dhe aktualisht po i nënshtrohet një kurimi nga ana e mjekëve, pasi goditja që ka marrë në kokë ka qenë e thellë.

Ndërkaq, efektivat e komisariatit të policisë janë vënë në ndjekje të tre personave dhe po punojnë për identifikimin dhe kapjen e tyre.

SUELA AZEMI

I “shpëton” doganës, e kap policia

Sekuestrohen 80 koli me cigare kontrabandë

SHKODËR-Është ndaluar dje në drekë në flagrancë nga efektivat e antikrimit ekonomik të policisë së qarkut një 45-vjeçar, lindur dhe banues në qytetin verior, i cili po transportonte me furgonin e tij një sasi të madhe stekash me cigare të futura kontrabandë në territorin e Shqipërisë nga Mali i Zi. Sipas burimeve nga komisariati i policisë së Shkodrës, dje në një rrugë dytësore të lagjes “Kongresi i Përmetit”, Sektori i Luftës Kundër Pastrimit të Parave dhe ai Krimit Ekonomiko-Financiar pranë Drejtorisë së Policisë së qarkut të Shkodrës, në bashkëpunim me prokurorinë e këtij rrethi kanë arrestuar në flagrancë shtetasin Nail Cuf Mbiarra, 45 vjeç, lindur dhe banues në lagjen “28 Nëntori’ të këtij qyteti. Arrestimi i tij u ndërmor, pasi ky shtetas po trasportonte me furgonin e tij tip “Mercedes Benz”, me ngjyrë të bardhe dhe me targë DR 1467 D, një sasi prej 80 kolish cigare të markës “Karelia Slims” të pashoqëruara me pullën fiskale të Ministrisë së Financave. Po sipas burimit të mësipërm, mallin e mësipërm, i ndaluari kishte arritur ta fuste kontrabandë nga Mali i Zi. Në këtë pikë vlen të nënvizohet një fakt i çuditshëm: si ka mundur të kalonte m’u përpara hundëve të doganierëve shqiptarë një sasi kaq e madhe cigaresh kontrabandë në cilëndo pikë të kalimit kufitar ndërmjet Shqipërisë dhe Malit të Zi, pra në Han të Hotit apo Muriqan? Kjo për faktin e thjeshtë se një sasi e tillë do të ishte e vështirë për t’u kaluar në mënyrë të jashtëligjshme përtej kufirit nisur edhe nga aparaturat më të fundit të sofistikuara vëzhguese që iu dhuruan policisë kufitare të qarkut të Shkodrës para më shumë se një viti nga përfaqësia e OSBE-së si dhe nga ambasadat e Francës dhe të Çekisë në Tiranë. Duke iu rikthyer aksionit të djeshëm të zhvilluar dhe realizuar me sukses në qendër të qytetit, mund të thuhet me plot gojë se, suksesi i tij duhet kërkuar jo tek doganierët që e kishin për detyrë ta zbulonin këtë shkelje që në doganë, por tek informacionet e sakta të marra në rrugë operative. Materialet proceduriale në ngarkim të shtetasit Nail Mbiarra, i cili është edhe person me precedent penal me tendencë kontrabandën, i kanë kaluar për ndjekje të mëtejshme Prokurorisë së Rrethit Gjyqësor të Shkodrës.

Arben Lagreta

Arrestohet i kërkuari nga Interpol Italia

LAÇ- Policia ka mundur të arrestojë dje shtetasin 21-vjeçar A. Lika, i shpallur në kërkim nga interpoli italian, nën akuzën e “vrasjes së mbetur në tentativë, armëmbajtje pa leje dhe vjedhje me dhunë në bashkëpunim. Ndërkohë që, vetëm para pak muajsh 21-vjeçari kishte ardhur në fshatin e tij të lindjes, në Gjormë të rrethit të Kurbinit. Burime të policisë së Kurbinit bënë të ditur se, efektivat e antikrimit që prej një javë kishin rënë në gjurmët e të shumëkërkuarit A. Lika. Polocia, pas të dhënave që kishte arritur të merrte nëpërmjet homologëve të saj italianë dhe interpolit, ku kishte siguruar përveç fotove edhe dosjen volominoze të krimit që kishte kryer A. Lika, kishte filluar edhe investigimin e 21-vjeçarit, duke ndjekur lëvizjet e tij. Dje, policia e Kurbinit e ka mbajtur nën mbikëqyrje banesën e Likës në fshatin Gjormë, që pas mesit të natës e deri në orën 17.00, kohë në të cilën A. Lika ka hyrë në banesën e tij. Rrethimi i shpejtë i banesës ka shmangur edhe tentativën e tij për t’u larguar nga pjesa e pasme e saj, duke rënë në kordonin e uniformave blu të Laçit. Pas arrestimit është kryer edhe kontrolli i banesës nga ana e polcisë, ndërkohë që nuk i është gjetur asgjë që kishte të bënte me vjedhjen me dhunë të tij në Itali. A. Lika, sipas burimeve zyrtare të polcisë së Kurbinit, me dt. 10.11.2004, në bashkëpunim me një tjetër shtetas shiptar, kishte hyrë në banesën e shtetasit Italian M. Mançini në Torino, të Italisë, rreth orës 02.00 të natës. Ndërsa, Mançini i ka dëgjuar dy grabitësit në momentin e hyrjes nga dritarja në banesën e tij dhe është zgjuar menjëherë, por kjo për pak sa nuk i ka kushtuar jetën. Pasi A. Lika, sipas polcisë, ka qëlluar me pistoletë dy herë në drejtim të tij. Kjo e ka detyruar shtetasin italian t’iu bindej urdhrave të dy shqiptarëve të armatosur dhe t’u jepte komplet sasinë e lekëve që kishte në banesë, ndërkohë që asnjë nga pjesëtarët e tij të familjes nuk ndodhej në shtëpi. Sipas policisë italiane, dy grabitësit kanë lënë edhe shenjat e gishtërinjve në banesë e Mançinit, një triko me të cilën kishin mbështjellë kokën dhe fije flokësh, që janë dërguar në laborator ku u është kryer edhe AND-ja. Ndërkohë, 230vjeçari Lika pritet të hetohet edhe për të tjera vjedhje të kryera në Itali në bashkëpunim. Pas arrestimit, ai është dërguar në dhomat e paraburgimit në burgun e Shënkollit, ndërsa pritet që të dërgohet në Itali.

Gjon Marku

Vodhi, prangoset 17-vjeçarja

LUSHNJË- Policisë ka ndaluar mbrëmjen e kaluar një 17-vjeçare, e cila akuzohet për vjedhje. Ajo quhet Irda Koxhaj dhe është banuese në qytetin e Fierit. Vjedhja për të cilën Koxhaj akuzohet ka ndodhur dje, rreth orës 12.30 minuta, në një lokal në qytetin e Lushnjës. Sipas policisë, pas identifikimit të 17-vjeçares si autore e ngjarjes, u bë bllokimi dhe sekuestrimi i sendit të vjedhur, në cilësinë e provës materiale, si dhe ndalimi i saj. Materialet i kaluan Prokurorisë së Rrethit Gjyqësor për veprime të mëtejshme.

Kundërshtoi policinë, ndalohet

GJIROKASTËR- Është ndaluar të martën, në pikën e kalimit kufitar të Kakavijës një 31-vjeçar, i cili akuzohet për kundërshtim të punonjësve të policisë në detyrë. Sipas policisë, ngjarja ka ndodhur në orët e para të ditës së djeshme, kur 31-vjeçari Ervin Fico, teksa tentonte të kalonte kufirin me Greqinë pa dokumentacionin përkatës dhe është ndaluar nga dy punonjës të policisë kufitare, i ka kundërshtuar me forcë ata. Fico, i cili aktualisht ndodhet në dhomat e paraburgimit të komisariatit të policisë së Gjirokastrës deri në zbardhjen e plotë të ngjarjes, akuzohet për “ushtrim dhune në krye të detyrës” dhe “prishje të rendit publik".

EKONOMI

Intervistë me Gani Kasapin, kreun e Tatim-Taksave të Korçës

“Ekspertët kontabël favorizojnë korrupsionin”

“Gjatë vitit 2006 bashkëpunuam intensivisht me Drejtorinë e Përgjithshme të Tatimeve dhe arritëm të shlyejmë detyrimet tatimore (TVSH) si ato të prapambetura nga vitet e kaluara, ashtu edhe ato të vitit ushtrimor...”

Kreu i sektorit të Vlerësim-Mbledhjes pranë degës së Tatim-Taksave Korçë, Gani Kasapi, ka folur jo pa shqetësim, përsa i përket moszbatimit të ligjit nga ana e ekonomistëve dhe ekspertëve kontabël në dorëzimin e dokumentacionit, lidhur me mbajtjen e llogarive të subjekteve. Për rrjedhojë, ka sqaruar Kasapi, me dashje ose jo nga ana e tyre, praktika të tilla favorizojnë korrupsionin. “Ka ekonomistë që nuk njohin siç duhet kërkesat e ligjit, nuk respektojnë rregullat për mbajtjen e dokumentacionit justifikues. Për pasojë, mosrespektimi i afateve ligjore sjell ndëshkimin e subjekteve deri në 40 mijë lekë për çdo muaj.” Ndërkohë, i prononcuar për “TemA”-n, përgjegjësi i sektorit të Vlerësim-Mbledhjes së Tatim-Taksave Korçë ka sjellë të githa detajet e këtij procesi.

Në fund të vitit 2006 ju tërhoqët vëmendjen e biznesit, financierëve, ekonomistëve të punësuar dhe ekspertëve kontabël të miratuar, për dorëzimin brenda afatit ligjor të dokumenteve lidhur më mbajtjen dhe përgatitjen e llogarive vjetore. Cili është reflektimi i tyre?

Jo serioz e korrekt. Ekonomistët nuk kanë dorëzuar dokumentet ligjore, në zbatim të Udhëzimit të Ministrit të Financave nr. 5, datë 22.05.2000, si dhe shtesave dhe ndryshimeve me nr. 5475, datë 01.07.2004, lidhur me mbajtjen dhe përgatitjen e llogarive vjetore, megjithëse janë lajmëruar në media dhe takime. Drejtoria e Përgjithshme e Taksave, Tiranë, me shkresë nr.872/1 prot. datë 14.02.2007, i detyron ekspertët kontabël të miratuar të paraqesin dokumentacionin ligjor, për të cilën janë njoftuar dhe më parë, por pa rezultat.

A mendoni se njihen e zbatohen ligjet e sistemit fiskal nga ana e kontabilistëve?

Mendoj se lë shumë për të dëshiruar. Përsëritja e shkeljeve, mangësive, parregullsive gjatë kontrolleve të bilanceve të viteve të kaluara është pasojë e mosnjohjes dhe moszbatimit, sa dhe si duhet, e dispozitave ligjore dhe rregullave për mbajtjen e dokumentacionit justifikues, të mbajtjes së kontabilitetit, të përgatitjes së bilanceve, të deklaratave, të evidencave tatimore, etj, tregon punë josistematike gjatë gjithë vitit ushtrimor dhe për rrjedhim, përpilim të bilanceve fiktive.

Cilat janë afatet e dorëzimit të bilanceve e dokumentacioneve të tjera?

Siç e kam theksuar dhe më lart, së pari pranimi i bilancit të vitit 2006 përpilohet e dorëzohet pranë bankave dhe Deklarata Përfundimtare e Tatim-Fitimit të Bilancit për vitin 2006 brenda datës 31.03.2007. Bilanci i vitit 2006 nuk do të pranohet, në rast se deklarata e mësipërme nuk është dorëzuar. Së dyti, në rast se bilanci i vitit 2006 dorëzohet pas datës 31.03.2007, subjekti penalizohet për çdo muaj vonesë në vlerën 40 000 lekë. Së bashku me bilancin dorëzohet edhe dokumentacioni shoqërues i tij.

Brenda datës 31.07.2007 duhet të dorëzohet tek sektori i Vlerësim-Mbledhjes së degës, vendimi i Asamblesë së Ortakëve lidhur me shpërndarjen e fitimit neto të ushtrimit të bilancit të vitit 2006. Dorëzimi jashtë këtij afati penalizon firmën në vlerën 25 000 lekë për çdo muaj me vonesë, pavarësisht nga rezultati i bilancit 2006.

Dividenti i përcaktuar nga shpërndarja e “fitimit neto të vitit ushtrimor” i përcaktuar nga vendimi i ortakëve, duhet të derdhet brenda datës 30.07.2007. Në rast arkëtimi me vonesë, firma penalizohet me detyrim “interesi” sipas ligjit.

Si janë marrëdhëniet me institucionet e tjera?

Në përgjithësi, bashkëpunim i mirë. Por, herë-herë, ngatërrohet zbatimi i aktmarrëveshjeve midis nesh e institucioneve dhe zbatimi i ligjit për çdo institucion. Një problem është vërejtur me bankat që operojnë në rrethin e Korçës për vitin 2006, ku në kundërshtim me ligjin dhe aktmarrëveshjet, ndërhyjnë në uljen e vlerës së detyrimeve tatimore të përcaktuara në mënyrë ligjore nga Dega e Tatimeve, kryesisht në urdhërpagesat e parapagimeve të tatim-fitimit mujor, çka sjell pasoja në arkëtimin e tyre.

Çfarë mendon për afatin e regjistrimit të subjekteve në organet tatimore, që jo rrallë herë është bërë objekt diskutimi?

Mendoj se nuk janë organet tatimore përgjegjëse direkte për vonesat në regjistrimin e subjekteve. Në rast se këto organe do të zbatonin vetëm ligjet fiskale, të jeni të bindur se do të mjaftonin vetëm, maksimalisht 5 ditë regjistrim. Nëse regjistri tregtar do të ishte instaluar në gjykatat e rretheve dhe jo në Gjykatën e Tiranës, afati i regjistrimit do të ishte minimal. Gjithashtu edhe marrja e një sërë dokumentash në institucione të tjera zgjat kohën e regjistrimit të subjekteve.

Po për ekspertimin e bilanceve, çfarë mendoni?

Duke marrë shkas nga ankesat e shumta të tatimpaguesve në lidhje me auditimin e bilanceve nga ana e ekspertëve kontabël të miratuar dhe parametrave shumë të ulët të përcaktuar në Ligjin “Për Shoqëritë Tregtare” qysh në vitin 1995, i cili parashikon kushtet për ekspertimin e bilanceve, të cilat janë: aktivi 6 000 000 lekë, xhiro mbi 12 000 000 lekë dhe mbi 10 të punësuar për çdo firmë (plotësimi i dy nga tre kushtet) mendoj se ligji duhet të ndryshohet e përshtatet në kushtet e sotme.

Disave prej subjekteve që janë regjistruar në degën tuaj iu kontrollohen bilancet nga dega e tatimpaguesve të mëdhenj me vendndodhje Tiranën. A ju duket normale kjo?

Kam rezerva.

Jo rrallë, organet tatimore janë kritikuar për mosdhënien e rimbursimit të TVSH-së, subjekteve me material porositësi (fason) dhe atyre eksportuese. Cila është situata në degën tuaj për këtë problem?

Situata në momentin që po bisedojmë bashkë është mëse normale dhe absolutisht nuk kemi asnjë problem në dhënien e rimbursimit ligjor të TVSH-së. Gjatë vitit 2006, subjekteve me fason dhe atyre eksportuese iu rimbursua TVSH-ja, në vlerën 41 934 780 lekë, ku me korrektësi, transparencë, gradualisht për çdo muaj, pavarësisht nga limiti prej 5% të vlerës së realizimit të saj mujor, arritëm të rikuperonim vlera të konsiderueshme TVSH-je të prapambetura.

Si e arritët këtë rezultat?

Thjesht zbatim ligji. Bashkëpunim, korrektësi e ndërsjelltë, krijimi i frymës së mirëbesimit pa paragjykime midis Degës së Tatim-Taksave Korçë e subjekteve, për rrjedhojë, dhënie e një detyrimi që atyre u takon me ligj dhe asgjë më tepër.

Cila e ka përgjegjësinë për mosdhënien e rimbursimit të TVSH-së konform ligjit, degët e tatim-taksave apo Drejtoria e Përgjithshme e Tatimeve?

Mendoj se janë degët e tatimeve përgjegjëse, sepse nuk kanë zbatuar ligjin nr. 7928, datë 27.04.1995 “Për TVSH-në” i ndryshuar, neni 50 “Rimbursimet”, nuk kanë realizuar detyrat e planit mujor të TVSH-së, nuk kanë rimbursuar për çdo muaj subjektet dhe për rrjedhim ka mbartje të vlerave të konsiderueshme detyrimi. Gjatë vitit 2006 bashkëpunuam intensivisht me Drejtorinë e Përgjithshme të Tatimeve Tiranë, ku arritëm të shlyejmë detyrimet tatimore (TVSH) si ato të prapambetura të viteve të kaluara, ashtu dhe ato të vitit ushtrimor, në zbatim të ligjit. Edhe për periudhat në vazhdim ne do të jemi korrektë në dhënien e rimbursimit të TVSH-së subjekteve me fason dhe eksportuese, duke mos u sjellë asnjë problem. Gjithsesi, duhen ndryshuar disa procedura burokratike, disa prej të cilave i përmenda më lart.

Bisedoi: Seldi Hasanasi

INTERVISTA

Sipas specialistëve, 30 minuta ushtrime fizike në ditë ulin rrezikun e sëmundjes së zemrës

Aktiviteti fizik parandalon sëmundjet e zemrës

Sëmundjet në zemër janë transformuar kohët e fundit në shqetësimin më të madh. Pothuajse çdo ditë, me dhjetra persona, të cilët vuajnë nga shqetësimet e zemrës shkojnë thjesht për një vizitë. Sipas specialistëve, sëmundjet që prekin zemrën janë të llojeve të ndryshme, ndaj edhe mjekimi varet sipas specifikës që ka çdo individ. Sipas specialistëve, 30 minuta në ditë ushtrime fizike si, ecje ose vrapim i lehtë mund të pakësojnë dukshëm rrezikun e prekjes nga sëmundje të zemrës. Sipas tyre, ngritja e peshave ndihmon në formimin e muskujve dhe pikërisht nga formimi i muskujve përfiton edhe zemra. Kështu, për pacientët të cilët vuajnë nga sëmundje të zemrës rekomandohet edhe nga mjekët kryerja e aktiviteteve fizike, pasi në këtë mënyrë pakësojnë edhe rrezikun e prekjes nga kjo sëmundje. Aktivitetet fizike ndikojnë në uljen e nivelit të kolesterinës së keqe dhe ndihmojnë oragnizmin të asimilojë sheqerin në gjak. Duke ruajtur këto parametra edhe zemra do të funksionojë në gjendje të shëndoshë. Sipas mjekut të urgjencës, Edomond Zaimi, ndërhyrjet kirurgjikale, shpeshherë kanë qenë një zgjidhje për personat që vuajnë nga sëmundje të tilla.

Nga se shkaktohet pushimi i zemrës?

Pushimi i zemrës mund të shkaktohet nga shkaqe të shumta. Ndër to mund të përmendim lodhjen, rrahjet e zemrës në mënyrë të çrregullt dhe shumë të shpejtë. Por që, zakonisht kjo ndodh kur zemra nuk është në gjendje të kryejë funksionin e saj si pompë.

Dhimbja që mund të vijë nga krahu, mund të jetë një sinjal për sëmundjet në zemër?

Duhet theksuar se jo çdo dhimbje krahu mund të shkaktojë një infarkt. Por, nuk mund të themi se nuk ka raste që një dhimbje krahu mund të sinjalizojë një infarkt në zemër.

Cilët janë faktorët e riskut për një atak në zemër?

Faktorët janë të shumtë, por klasifikohen në faktorë të ndryshueshëm dhe të pandryshueshëm. Ndër faktorët e pandryshueshëm janë: trashëgimia, mosha të cilat nuk i ndryshojmë dot, por ekzistojnë edhe faktorë të ndryshueshëm siç janë jeta sedentare, dieta ushqimore (ushqimet e pasura me yndyrna) dhe alkooli; këta janë faktorë që mund të modifikohen. Pastaj, një rol tjetër luajnë edhe sëmundjet e diabetit, hipertensioni. Këto të fundit përbejnë një element shumë të rëndësishëm që po të eliminohen mund të shmangin mjaft mirë atë që quhet faktor risku. Një faktor tjetër është kolesteroli i lartë në gjak. Duhet të theksoj se, ilaçet që mund të përdoren nga të sëmurët me zemër janë të shumta, nuk mund të thuhet se ekziston vetëm një ilaç, pasi çdo i sëmurë ka specifikën e vet.

Si mund të veprojmë me pacientët që sapo kanë pësuar një pushim zemre?

Si fillim, është shumë e domosdoshme konstatimi i sëmundjes, pasi, ndonjëherë, njerëzit në vend që t’i bëjnë mirë pacientit, i bëjnë keq. Një pacient të cilit sapo i ka pushuar zemra nuk është në gjendje të komunikojë, ndërsa infarki ka një larmi simptomash, duke filluar që nga dhimbjet karakteristike të gjoksit në formën e shtrëngimeve të cilat provokohen nga sforcimi fizik dhe që zgjasin mbi një çerk ore, por ka edhe dhimbje, të cilat mund të zgjasin më pak se një çerek ore, pra mund të jenë edhe 10 minuta. Edhe këto shkaktohen nga bllokimi i përkohshëm i enëve të gjakut. Kjo bën që edhe i sëmuri të mos jetë në gjendje të përballojë një sforco fizike. Simptomat janë të larmishme dhe të shumta.

Çfarë këshillohet në të tilla raste?

Në të tilla raste është mirë që i sëmuri të dërgohet menjëherë në spital, pasi njerëzit e thjeshtë e kanë të vështirë të kuptojnë gjendjen në cilën i sëmuri ndodhet dhe në vend që të ndikojnë në përmirësimin e gjendjes së tij shëndetësore, mund të ndikojnë në përkeqësimin akoma edhe më shumë të situatës. Të sëmurit, i cili vuan nga sëmundja e zemrës, është mirë që t’i lirosh rrobat dhe ambienti duhet të jetë në kushte të mira, i ajrosur sa më mirë dhe në kushte qetësie. Në qoftë se dhimbja është e tillë, e fortë, në pozicion shtrirë të përdorësh një trinicilinë në gjuhë. Kjo vlen më tepër për ato që quhen mosha të kaluara. Rastet me sëmundjet e zemrës ndodhin më shpesh tek moshat e vjetra, por ka edhe raste që ndodhin në mosha të reja. Kryesisht tek femrat, pas periudhës së menopauzës, ky rast është më i përhapur. Mbi të gjitha, mund të themi se aktiviteti fizik është mjaft i domosdoshëm, pasi me anë të aktivitetit fizik humb kolesterolin në gjak, eliminon faktorët e riskut, ku ndër to janë dhe yndyrnat.

Bisedoi: Alketa Alia

RAJONI

Reagimet në Prishtinë, Beograd dhe Tiranë, pas propozimit të Marti Ahtisarit lidhur me statusin final të Kosovës

Prishtina, “pro” paketës Ahtisari

Ekipi i Unitetit shqyrton angazhimin kosovar, pas publikimit të kryenegociatorit, Marti Ahtisari, që pavarësia me mbikëqyrje ndërkombëtare të jetë statusi i ardhshëm i Kosovës.

Udhëheqësit politikë të Kosovës, që përbëjnë dhe grupin e unitetit për statusin e ardhshëm, kanë shprehur pajtimin e tyre me propozimin e bërë nga zoti Ahtisari, por në të njëjtën kohë thonë se po përshpejtojnë përgatitjet për periudhën, pasi Këshilli i Sigurimit të ndryshojë rezolutën 12 44 që ka për të shënuar dhe inaugurimin e pavarësisë.

Nga pala kosovare është konfirmuar vendosmëria për implementimin e dokumentit të ri, që është vlerësuar si me rëndësi historike, ndërsa është mbështetur në Uashington, Bruksel e Londër.

Presidenti i Kosovës, Fatmir Sejdiu, mirëpriti qëndrimin e sekretarit të Përgjithshëm të Kombeve të Bashkuara, Ban Ki Mun, i cili ka mbështetur rekomandimet e presidentit Ahtisaai. Ai përsëriti qëndrimin e palës kosovare kundër vazhdimit të bisedimeve, kërkesë kjo e bërë nga pala serbe dhe e mbështetur edhe nga Rusia. Zoti Sejdiu tha se për këtë janë shterur të gjitha mundësitë.

Propozimi i presidentit Ahtisari është mbështetur edhe nga kryeministri Agim Çeku, ndërsa udhëheqësi i opozitës që njëherësh është dhe anëtar i Grupit të Unitetit, Hashim Thaçi, paralajmëroi se, së shpejti, edhe parlamenti i Kosovës do të mbështesë dokumentin e Ahtisarit, për të zyrtarizuar përkushtimin për implementimin e marrëveshjes.

Veton Surroi, njëri prej anëtarëve të ekipit negociator, ka paralajmëruar shpalljen e pavarësisë së Kosovës, pa marrë parasysh se çfarë do të ndodhë në Këshillin e Sigurimit.

"Është obligim i Kosovës ta shpallë pavarësinë dhe kemi obligim të kërkojmë njohje të kësaj pavarësie", - tha zoti Surroi.

Merret vesh se anëtarët e Grupit të Unitetit do të vazhdojnë kontaktet diplomatike jashtë vendit, me qëllim që opsioni i propozuar të marrë një mbështetje sa më të gjerë ndërkombëtare.

Serbia pret "veton historike" të Rusisë

Zyrtarët e Beogradit e kanë hedhur poshtë rekomandimin e Marti Ahtisarit mbi pavarësinë e kontrolluar për Kosovën, sepse, siç thonë, kjo është në kundërshtim me Kartën e KB-së në Rezolutën 1244. Presidenti, Boris Tadiç, i ka përcjellë nënsekretarit amerikan të Shtetit, Nikolas Berns "mospajtimin e fuqishëm me vendimin e Departamentit të Shtetit për ta mbështetur pavarësinë e mbikëqyrur për Kosovën."

Në një bisedë telefonike me Berns, Tadiç ka thënë se, "Serbia nuk mund të pranojë çfarëdo forme të pavarësisë për Kosovën dhe do të orvatet që në kontaket me vendet anëtare të KS-së të KB-së të shprehë nevojën e zgjidhjes me kompromis, e cila mund të arrihet me vazhdimin e negociatave."

Serbia është e gatshme për pjesëmarrje konstruktive në negociatat e mëtejshme, ka thënë Tadiç, duke shtuar se "është me interes jetik që të bëhet gjithçka, në mënyrë që të sigurohet paqja dhe stabiliteti në Kosovë."

Kryeministri, Vojisllav Koshtunica, tha dje se, Serbia është e bindur që Rusia do të hedhë poshtë planin që i jep Kosovës pavarësi të mbikëqyrur me "veto historike" në Këshillin e Sigurimit të KB-së. "Jemi të bindur se propozimi do të dështojë në Këshillin e Sigurimit dhe kjo do të hapë derën për proces të ri negociator me një ndërmjetës të ri", - tha Koshtunica.

Kryetarja e Qendrës bashkërenduese për Kosovën, Sanda Rashkoviç Iviç konsideron se në KS nuk do të kalojë propozimi mbi pavarësinë e mbikëqyrur të Kosovës dhe negociatat do të vazhdojnë, sepse ato janë mënyrë e vetme për arritjen e zgjidhjes me kompromis. Ajo kritikon vendimin e administratës amerikane për ta mbështetur pavarësinë e mbikëqyrur të Kosovës. Zv/kryetari i Partisë Radikale serbe, Tomisllav Nikoliç, në reagimin e tij thotë se Serbia nuk do të lejojë të mashtrohet që në zgjidhjen për Kosovën të qëndrojë fjala pavarësi.

Tirana përshëndet propozimin e Marti Ahtisarit

Tirana zyrtare përshëndeti propozimet e përfaqësuesit të posaçëm të OKB-së, Marti Ahtisari, lidhur me statusin final të Kosovës. Në një deklaratë për mediat, ministri i Punëve të Jashtme, Besnik Mustafaj, ka përshëndetur qëndrimin e Sekretarit të Përgjithshëm të OKB-së, Ban Ki Mun si dhe propozimin e Marti Ahtisarit, në të cilin rekomandohet pavarësia e mbikëqyrur, si opsioni i vetëm realist dhe i qëndrueshëm për zgjidhjen e çështjes së Kosovës.

"Shqipëria shpreh mirënjohjen e thellë për punën e devotshme dhe kontributin e jashtëzakonshëm të presidentit Ahtisari për drejtimin e procesit të përcaktimit të statusit të Kosovës. Rekomandimi i bërë nga ana e tij, në përmbyllje të këtij procesi, të formuluar tashmë me termin “pavarësi e mbikëqyrur” merr në konsideratë rrethanat historike, realitetin e tanishëm si dhe nevojën urgjente për stabilitet politik dhe ekonomik në Kosovë", - u shpreh zoti Mustafaj.

Në vazhdim, ai shprehu bindjen se në këtë fazë, tejet të rëndësishme, deri në finalizimin e statusit në Këshillin e Sigurimit, faktorët politikë në Kosovë do të vazhdojnë të jenë në partneritet të plotë me komunitetin ndërkombëtar. Në vazhdim të deklaratës së tij ministri Mustafaj u bëri thirrje komuniteteve pakicë, veçanërisht atij serb në Kosovë që të përfshihen në këtë proces vendimtar e të pakthyeshëm.

Ministri i Jashtëm i Shqipërisë udhëton sot për në Nju-Jork dhe bëri të ditur se kjo vizitë do të jetë e fokusuar në shpjegimin e domosdoshmërisë së arritjes së pavarësisë së mbikëqyrur të Kosovës.

"Tirana është tërësisht e përfshirë në këtë proces. Nesër herët, unë nisem për Nju-Jork, ku do të kem një seri takimesh me ambasadorët e vendeve anëtare të Këshillit të Sigurimit, siç do të kem edhe një takim të veçantë me Sekretarin e Përgjithshëm të Kombeve të Bashkuara, zotin Ban Ki Moon, përpara se të filloj shqyrtimin në Këshillin e Sigurimit, para datës 3 prill", - sqaroi Mustafaj.

I pyetur nëse për Kosovën do të ishte më mirë një pavarësi e kushtëzuar apo e mbikëqyrur, ai u përgjigj se është absolutisht e njëjta gjë.

Propozimin e Marti Ahtisarit e përshëndeti dje edhe kryetari i Partisë Socialiste, Edi Rama.

"Ne i jemi mirënjohës për angazhimin e gjatë, serioz dhe shumëplanësh, përfaqësuesit të posaçëm të OKB-së, Marti Ahtisari dhe ekipit të tij negociator, i cili diti të gjejë rrugën e arsyes për të ardhmen e Kosovës, organizimin e saj si shtet i pavarur, rolin në rajon dhe pozicionin në gjirin e bashkësisë ndërkombëtare", - tha Rama, duke e vlerësuar këtë si një moment historik për të gjithë shqiptarët. Propozimi i Marti Ahtisarit për të ardhmen e Kosovës është përshëndetur edhe nga Presidenti i Shqipërisë, Alfred Moisiu dhe kryeministri Sali Berisha. Kryeministri vlerësoi projektin e paraqitur nga i dërguari Special për Statusin e Kosovës, presidenti Ahtisari, duke theksuar se pavarësia e Kosovës është një proces i pandalshëm dhe se procesi i mbikëqyrjes është i rëndësishëm për të arritur pavarësinë e Kosovës.

BOX:

KB: Në prill, KS fillon diskutimet për planin e Ahtisarit

Këshilli i Sigurimit do të fillojë diskutimet mbi raportin final të Martti Ahtisarit për statusin e Kosovës në muajin prill, tha Michele Montas, zëdhënëse e Sekretarit të Përgjithshëm Ban Ki-Moon. "Sekretari i Përgjithshëm e ka shprehur mbështetjen e tij të plotë për raportin e të dërguarit të posaçëm Ahtisari dhe propozimin për zgjidhjen e çështjes. Me dorëzimin e raportit dhe propozimit për zgjidhjen në Këshillin e Sigurimit, procesi i përcaktimit të statusit të ardhshëm të Kosovës ka mbërritur në fazën vendimtare", - tha Montas. Raporti prej 3 faqesh e gjysmë që iu dorëzua Këshillit të Sigurimit, bën thirrje për pavarësi të mbikëqyrur të Kosovës. Shtetet e Bashkuara, Britania e Madhe dhe Bashkimi Europian e kanë mbështetur propozimin.

SPORTI

Përfaqësuesja shqiptare e futbollit vijon përgatitjet për sfidën e sotme. Bariç nuk dorëzohet, dje seanca e fundit

Sot prova e nxehtë, Bariç sakrifikon gjithçka

1. Në kampin bullgar ka një frymë sigurie për 3 pikë, teksa është në dyshim Bozhinov.

2. Bushi e Lala nuk tërhiqen: “Ata nuk e kanë aspak të lehtë, duhet të bëjnë kujdes me Shqipërinë”

3. Ndeshja nis në orën 18.00 (ora lokale), në stadiumin “Vasil Levski” të Sofjes, nën drejtimin e një tresheje suedeze.

Skuadra kombëtare e futbollit ka realizuar dje seancën e radhës të ekipit kombëtar të futbollit, në stadiumin ku edhe do të zhvillohet ndeshja. Shihet një farë optimizmi në radhët e skuadrës shqiptare, por ata qëndrojnë sërish me këmbë në tokë. Që të gjithë shprehin se kanë një lloj sensacioni të veçantë sa i përket faktit të kundërshtarit dhe përballimit të tij pa asnjë lloj frike. Ka mbërritur vetëm dje në mesditë në hotel edhe trajneri Otto Bariç, i cili as më shumë dhe as më pak preferoi menjëherë që të jetë në këtë takim, në pankinë. Me të mbërritur, ai ka realizuar menjëherë bisedën e parë me ndihmësit e tij, në lidhje me situatën më të fundit në kampin shqiptar, teksa nga ana tjetër, mendon se gjithçka mund të jetë pjesë e lojës, gjithçka mund të jetë pjesë e rezultatit pse jo edhe pozitiv, pasi skuadra do të jetë në funksion të saj. “U ndjeva më mirë dhe besoj se kam mbërritur për të karikuar më shumë skuadrën, duke mos lënë asnjë lloj stepje në favor të kundërshtarit. Do të luajmë padiskutim lojën tonë dhe unë ndiej besim, madje jo të pakët. Është një kundërshtar i fortë dhe pretendent në grup, në një kohë që nga ana tjetër edhe rezistenca dhe përballja jonë do të jetë me monedhë të njëjtë”, - deklaroi ai. Bariç menjëherë ka nxituar të marrë kontakte edhe me disa futbollistë të skuadrës së tij, teksa ka biseduar edhe me pjesën e përvojës. Megjithatë, një lloj rreshtimi i përket vetëm atij në minutat e fundit të ndeshjes. Ndërsa nga ana tjetër, mesfushori Cana është i mendimit që sfida është e hapur dhe asgjë nuk mund të thuhet në absolut për inferioritet: “Një ndeshje shumë e vështirë. Bullgaria është një kundërshtar shumë i fortë ,ndaj të cilit duhet patur shumë kujdes. Ka lojtarë si Berbatov, Bojinov dhe shumë të tjerë, të cilët nuk të falin. Duhet të bëjmë maksimumin dhe dashtë Zoti shumë që të marrim një barazim.” Sa i përket rreshtimit taktik të skuadrës ka vetëm disa modifikime të vogla në një kohë që mungon Muka, teksa jo pak futbollistë të tjerë rrezikojnë për skualifikimin për takimin e ardhshëm, atë me Luksemburgun. Ndeshja do të nisë në orën 18.00, me orën lokale të Sofjes, në një kohë që do të drejtohet nga një treshe suedeze. Skuadra kombëtare është shoqëruar së fundmi edhe nga opinionet e mediave sportive vendase dhe kryesisht me Bushin (dikur ish-futbollist me Liteks), si dhe me Lorik Canajn e Erion Bogdanin. Në kampin bullgar, ndërkaq Stoiçkov ka shumë besim se skuadra e tij do të fitojë dhe këtë besim ai e përcjell me bindje edhe në mediat sportive. Trajneri bullgar nuk do të ketë shërbimet e Petrovit, një element shumë i rëndësishëm i skuadrës, por edhe Bozhinovi mund të mos nisë ndeshjen që nga minuta e parë. Ndërkaq, ditën e sotme, priten që të vijnë jo pak personalitete edhe nga Tirana, vetëm për të parë ndeshjen e skuadrës kombëtare.

Bushi: “Bullgaria të bëjë shumë kujdes”

Nuk e gënjejmë vetem dhe do të jetë sukses në qoftë se arrijmë vendin e tretë apo të katërt në këto kualifikime. Në Bjellorusi arritëm rezultat 2-2, kurse në ndeshjen me Holandën kur rezultati ishte 2-1 nuk na akorduan një penallti të pastër. Një ndeshje, e cila do të jetë e një rangu të vështirë, por që në fund të fundit asgjë nuk ka të sigurtë edhe kundërshtari. Një sinjal për të bërë shumë kujdes me Shqipërinë. E njoh shumë mirë futbollin bullgar dhe mbaj lidhje të gjata me disa prej futbollistëve që kam pasur shokë këtu, por Shqipëria do të luajë lojën e saj, nuk do të ketë frikë dhe mbi të gjitha do të jetë një skuadër kompakte, shumë herë më e motivuar për këtë sfidë.

Lala: “Të mos pësojmë që në fillim, shumë e rëndësishme”

Një ndeshje e cila nuk mund të thuhet kurrsesi që do të ketë presionin bullgar. Aspak. Një takim që do të ketë shumë specifika në tërësinë e tij. Nuk duhet kurrsesi që të pësojmë gol që në 30 minutat e para, në mënyrë që loja të ecë dhe të marrë trajtën e plotë të qëndrimit në fushë. Dua të them që një ndeshje e tillë e këtij niveli ka edhe atë që kundërshtari futet në fushë domosdoshmërisht për ta fituar, në një kohë që, ne do të bëjmë shumë kujdes dhe nuk jemi nën një presion të tillë, jo se nuk duam të fitojmë. Mendoj edhe pse i takon trajnerit që nuk duhet aspak që të qëndrojmë të mbyllur prapa, por shpesh edhe të bëjmë ndonjë avancë, madje spostimet e shumta në bllok do të krijonin shumë çororditje në lojën e skuadres kundërshtare dhe them se mospësimi i gol në 30 minutat e para do t’i nervozonte shumë.

Sofje, 27 mars 2007