PDK shkarkon Pajazitin, Bajramin dhe Vehapin

Kryeministri Hashim Thaçi ka shkarkuar nga postet Zenun Pajazitin, Arsim Bajramin dhe Idriz Vehapin, ndërkohë që menjëherë pas ka dhënë emrat e ministrave të rinj

Bajram Rexhepi është emëruar ministër i Punëve të Brendshme, Edita Tahiri ka marrë postin e MAP, Blerand Stavileci është ministër i Bujqesise, ndërsa Besim Beqaj ministër i Integrimeve.

Vendimi pason dakordimin e dy partnerëve të koalicionit qeverisës për ndryshime, me ç’rast nga LDK u shkarkuan Alush Gashi, Nekibe Kelmendi dhe Valton Beqiri, dhe u zëvendësuan nga Bujar Bukoshi (ministër i Shëndetësisë), Lutfi Haziri (ministër i Kulturës) dhe Haki Demolli (ministër i Drejtësisë).

LDK shkarkon Kelmendin, Gashin dhe Beqirin

Lidhja Demokratike e Kosovës ka shkarkuar tre ministra në Qeverinë e Thaçit. Ministrat e shkarkuar janë: Nekibe Kelmendi, Alush Gashi dhe Valton Beqiri.

Bëhet e ditur se Bujar Bukoshi do të bëhet ministër i Shëndetësisë, duke e zëvendësuar Alush Gashin, Lutfi Haziri do të vijë në krye të Ministrisë së Kulturës, duke e zëvendësuar Valton Beqirin, ndërsa Haki Demolli do të bëhet ministër i Drejtësisë, në vend të Nekibe Kelmendit.

Ky është vendimi që ka marrë Kryesia e LDK së në takimin e paradites për ndryshimet e kërkuara në qeveri, siç u tha, me qëllim që të përmirësohet perfomanca e Qeverisë së Kosovës.

Vendimi pason dakordimin e dy partnerëve të koalicionit qeverisës për ndryshime në të paktën gjashtë ministri.

Nga ana e Partisë Demokratike është thënë se do të largohet Fehmi Mujota, ministër i FSK-së, Zenun Pajaziti, ministër i Punëve të Brendshme, dhe Idriz Vehapi, ministër i Bujqësisë. Konfirmimet zyrtare për largimin e tyre priten gjatë ditës së sotme.

Ndryshimet në qeveri, që u quajtën edhe si riformatim, u paralajmëruan në periudhën e përplasjes mes dy partnerëve në koalicion, gjatë fushatës për zgjedhjet lokale në nëntor të vitit të kaluar.

Opozita në Kosovë i cilësoi kërkesat për ndryshime si përpjekje të udhëheqësve aktual për të vazhduar me qeverisjen, të cilën ajo e cilësoi, si të dështuar.

back | 31.03.2010