Ambasadorja Ries: Shqipëria ka plotësuar standardet minimale në luftën ndaj trafikut njerëzor

SHBA: Shqipëria, stanjacion në luftën ndaj trafikut

Ambasadorja e Shteteve të Bashkuara të Amerikës Marsi Ries ka deklaruar dje se Shqipëria ka plotësuar standardet minimale në luftën ndaj trafikut të qenieve njerëzore, duke ndenjur në të njëjtin vlerësim për të katërtin vit me radhë. Ambasadorja e SHBA-së mori pjesë dje në Konferencën Vjetore "Nisma Shqiptare: Veprim i Bashkërenduar Kundër Trafikimit Njerëzor", në të cilën trajtohen problemet e trafikut të qenieve njerëzore. Në këtë konferencë morën pjesë përfaqësues të shtetit shqiptar, përfaqësues të qeverive të huaja dhe shumë organizata ndërkombëtare që ndihmojnë në trajtimin e problemit të trafikut njerëzor. Ambasadorja e SHBA-së tha se duhet ende shumë punë nga ana e shtetit shqiptar për të luftuar trafikun e qenieve njerëzore. “Raporti mbi Trafikimin e Personave për vitin 2005, i Departamentit të Shtetit, e radhiste Shqipërinë si një vend i Grupit 2 për të katërtin vit; një vend i Grupit 2 është ai që plotëson standardet minimale dhe po bën përpjekje domethënëse për të arritur nivelin e zbatimit të Ligjit mbi Mbrojtjen e Trafikimit të Personave të vitit 2000. Kështu, ndërkohë që është bërë përparim, shohim që mbeten për t'u zgjidhur çështje të rendësishme. Këto përfshijnë nevojën për të vënë në zbatim mjete ekzistuese ligjore anti-trafikim, për të përmirësuar mbrojtjen dhe riintegrimin e viktimave, si dhe për të trajtuar korrupsionin e lidhur me trafikimin,” u shpreh Ries. Ambasadorja trajtoi edhe disa prej shkaqeve që çojnë në fenomenin e trafikut njerëzor, duke u fokusuar edhe tek problemet e grave.  “E dimë që disa prej arsyeve rrënjësore të trafikimit të personave qëndrojnë në dhunën ndaj gruas, mungesën e shkollimit dhe të mundësive për punësim, në kërkesën që ekziston në vendet e destinacionit, varfërinë dhe dëshirën për një jetë më të mirë, injorancën mbi pasojat e trafikimit, si dhe përfitimet e larta dhe rreziqet e ulëta për trafikantët.” Ambasadorja e SHBA-ve vlerëzoi angazhimin e kryeministrit Berisha për të trajtuar me seriozitet këtë problem. “Në të gjitha vendet tona, kemi prirjen për të shmangur diskutimet mbi trafikimin e personave, sepse është vërtet një temë shokuese. Kjo është një prej arsyeve pse ishte një kënaqësi që dëgjova Kryeministrin në një prej fjalimeve të tij të para të diskutonte nevojën për t'u ballafaquar vërtet me këtë problem. Sjellja e këtij problemi në sferën publike është një hap i parë i rëndësishëm. Tani, duhet të punojmë vërtet shumë dhe të punojmë sëbashku për ta eliminuar atë. Qeveria e ShBA po punon për t'iu kundërvënë shkaqeve rrënjësore të trafikimit duke investuar në shoqërinë civile, zbatimin e ligjit dhe reformën gjyqësore,” tha Ries. Ambasadorja u tha të pranishmëve se SHBA-të janë të vendosura në luftën ndaj trafikut të qenieve njerëzore dhe po japin ndihmën e tyre në këtë drejtim.  Kemi një numër programesh që i trajtojnë këto probleme dhe dëshiroj të flas shkurtimisht mbi to. Po punojmë në fushën e zbatimit të ligjit nëpërmjet Programit Ndërkombëtar të Asistencës së Trainimit Hetimor Kriminal (ICITAP). Ky program ndihmon Ministrinë e Brendshme dhe Policinë e Shtetit duke ofruar trainime. ICITAP gjithashtu po ngre një rrjet kombëtar të kompjuterizuar informacioni për zbatimin e ligjit (Sistemi i Menaxhimit Total të Informacionit – TIMS), i cili përputhet me nismat rajonale. ShBA dhe BE po punojnë sëbashku për ta sjellë TIMS në nivelin e një rrjeti të plotë informacioni që të mbulojë të gjitha pikat e kalimit të kufirit, të gjitha drejtoritë e policive, Ministrinë e Brendshme, portret, si dhe të gjitha zyrat e Policisë së Shtetit. Kjo nënkupton kufij më të sigurt dhe, sigurisht, ka ndikim mbi aftësinë tonë për t'iu kundërvënë trafikimit,” u shpreh Ries. 

Bashkëfshatari vret vajzën 13 vjeçare

Një vajzë 13-vjeçare nga Nikla e Krujës është vrarë të Hënën në mbrëmje me armë zjarri nga një bashkëfshatar. Burime zyrtare nga Drejtoria e Policisë së Qarkut bënë të ditur se Odeta Allushi, 13 vjeç, është vrarë me automatik nga një bashkëfshatar të hënën në mbrëmje, rreth orës 22.20, teksa ndodhej në dhomën e saj të gjumit në fshatin Kërrçie të komunës së Niklës. Sipas burimeve, mendohet se shtetasi Baki Shima, 42 vjeç, banues në këtë fshat, është autori i kësaj ngjarje. Nga të dhënat e para, mësohet se motiv i krimit ka qenë grindja e fëmijëve të shtetasit Shima me 13 - vjeçaren Allushi. Forcat e policisë janë vënë në kërkim të autorit.

Drejtuesit e policive të Europës Juglindore mblidhen në Durrës

Në kuadër të finalizimit të Projekt-Konventës “Për bashkëpunimin policor në Europën Juglindore”, dje në Durrës, ka filluar punimet raundi i parë i negociatave me tematikë “Bashkëpunimi Policor”, që përbën dhe pjesën e parë të projekt konventës. Në këtë raund negociatash merrnin pjesë ekspertë e përfaqësues të Ministrive të Brendshme të vendeve të Rajonit, si: Shqipëria, Bosnjë Hercegovina, Kroacia, Maqedonia, Moldavia, Mali i Zi dhe Rumania, si dhe grupi i ekspertëve Austriakë që po mbështet këtë aktivitet.  Gjatë punimeve të ditës së djeshme të pranishëm ishin Zv/Ministri i Brendshëm për çështjet e Policisë, Gjergj Lezhja, dhe Drejtori i Përgjithshëm i Policisë së Shtetit, Drejtues Bajram Ibraj. Duke shprehur vlerësimin e lartë të Ministrit të Brendshëm, Sokol Olldashi, për këtë raund të parë negociatash, Zv/Ministri i Brendshëm tha se “nisma të tilla siç është finalizimi i Projekt-Konventës së Bashkëpunimit Policor në Europën Juglindore, ndërmerren për të zhvilluar dhe ridimensionuar bashkëpunimin në rajon nëpërmjet krijimit të mundësive të njohjes dhe standardizimit të proçedurave penale ndërkombëtare, në rrafshin e legjislacionit të brendshëm.”  Po ashtu Gjergj Lezhja vuri në dukje masat e rëndësishme institucionale dhe ligjore të ndërmarra nga Ministria e Brendshme për modernizimin e strukturave të Policisë së Shtetit dhe rritjen e bashkëpunimit të saj me strukturat rajonale dhe më gjërë.  “Vullneti për të luftuar krimin e organizuar, terrorizmin dhe trafiqet e paligjshme po konkretizohet me dëshirën dhe përpjekjet për thellimin e bashkëpunimit policor rajonal dhe më gjerë dhe përafrimin progresiv të legjislacionit proçedurial penal shqiptar me atë të vendeve të Bashkimit Europian.”- vijoi Lezhja.  Raundi i parë i negociatave do t’i vazhdojë punimet deri me datë 14 tetor. Ky raund pason Konferencën e Vjenës të zhvilluar në datat 22-23 qershor 2005 në kuadër të bashkëpunimit mes policive të vendeve të Europës Juglindore. 

Bumçi prezanton drejtuesit e rinj të burgjeve

Ministri i Drejtësisë, Aldo Bumçi,  prezantoi  dje dy drejtuesit e rinj në Administratën Burgjeve. Lajmin e bënë  të ditur  burime zyrtare nga Ministria e Drejtësisë. Drejtori i Përgjithshëm i Burgjeve është emëruar  Saimir Shehri, i cili zëvendësoi në këtë post Engjell Hysin, ndërsa në postin e  Drejtorit të Policisë së Burgjeve është emëruar Zija Tefereci, i cili zëvëndësoi ish- drejtorin Hasan Ahmetaj. Urdhri për shkarkimin e Hysit është lëshuar nga kryeministri Sali Berisha ditën e djeshme. Shkarkimi i Hysit vjen menjëherë pas shkarkimit të drejtorit të Policisë së Burgjeve, Hasan Ahmetaj si dhe drejtorit të Burgut të Peqinit, Agim Bardhi. Masa për shkarkimin e tyre u mor nga ministri i Drejtësisë, Aldo Bumçi, pas arratisjes nga materniteti "Koço Glozheni" në Tiranë i të Frederik Durdës, njërit nga të dënuarit e procesit "Kokaina".

Komisioni i Ekonomisë miratoi dje kalimin në seancë plenare të projektligjit për blerjen e 76% të aksioneve të Albtelekom nga kompania turke Calik Enerji

Kuvendi, ekspertizë ndërkombëtare për Albtelekom-in

Alida Beqiri

Çështja e privatizimit të Albtelekomit do të shqyrtohet nga ekspertë ndërkombëtarë, të cilët do të gjykojnë nëse bëhet fjalë për shitje të jashtëligjshme të njërit prej sektorëve më strategjikë në vend. Komisioni i Ekonomisë dhe Financës, mes shumë debatesh, miratoi dje kalimin në Kuvend të projektligjit për "Ratifikimin e kontratës për blerjen e aksioneve të shoqërisë anonime, Albtelekom sh.a". Deputetët e Partisë Socialiste që braktisën sallën dhe nuk morën pjesë në votim, përkrahën idenë që marrëveshja të kalonte në konsulencë ndërkombëtare, por sipas tyre, thirrjen e kësaj konsulence duhet ta bëjë qeveria dhe jo Kuvendi. "Ne nuk mund të pranojmë që marrëveshja të kalojë në seancë plenare dhe deputetët të kërkojnë konsulencë ndërkombëtare, pasi Parlamenti ka vetëm të drejtë ta ratifikojë ose jo këtë marrëveshje. Thirrja e konsulencës ndërkombëtare është kompetencë ekskluzive e qeverisë dhe kjo ekspertizë duhet bërë më përpara se marrëveshja të kalojë në Kuvend", deklaroi nënkryetari i Komisionit të Ekonomisë, Ylli Bufi, deputet i PS.

Deputetët e tjerë socialistë të komisionit të Ekonomisë, Erion Braçe e Shpëtim Idrizi, këmbëngulën se nuk mund të diskutonin rreth marrëveshjes pa dëgjuar qëndrimin e qeverisë për shitjen e Albtelekomit. “Këtu nuk është i pranishëm as zv/kryeministri, as ministri i Ekonomisë, as zv/ministri dhe ne nuk mund të dimë qëndrimin e qeverisë për këtë marrëveshje, nëse ajo është pro apo kundër shitjes së Albtelekomit”, tha Braçe.

Kryetari i komisionit të Ekonomisë Edmond Spaho tha se procesit të privatizimit të Albtelekomit i ka munguar totalisht transparenca publike, po ashtu ky proces nuk i është nënshtruar një debati të gjerë publik me grupet e interesit. “Mendoj se shitja e Albtelekomit është bërë në mungesë të plotë të transparencës. Dokumentet që kemi në dispozicion nuk të lejojnë të gjykosh përsa i përket mbështetjes ose jo të kontratës. Nuk e dimë nëse shitja është në të mirë të vendit, por duket se kjo kontratë forcon monopolin. Dhe gjoba simbolike prej 1 milion eurosh, nuk na jep siguri nëse kompania turke do të përmbushë detyrimet e premtuara”, tha Spaho.

Në Qershor të këtij viti, qeveria shqiptare miratoi shitjen e 76 % të aksioneve të "Albtelekom" sh.a. në vlerën 120 milion euro.

Konsulenca

Aleksandër Biberaj, deputet i Partisë Demokratike, kërkoi që Kuvendi shqiptar të marrë një konsulencë ndërkombëtare për mënyrën e privatizimit të "Albtelekom" sh.a, me qëllim që të ketë një gjykim profesionist, të paanshëm dhe të pranuar nga të gjitha palët e interesuara. Deputeti Biberaj e argumentoi kërkesën në relacionin e paraqitur prej tij, me faktin se vazhdimi i proçedurës së privatizimit vetëm me një ofertues, sikundër ka ndodhur, paraqet një rast unikal në privatizimin e sektorëve strategjikë.

Deputeti Biberaj tha gjithashtu se "përsa i përket plan-biznesit, në kontratë është përcaktuar zbatimi i vlerës së investimeve të parashikuara brenda periudhës 5-vjeçare, duke i dhënë të drejtën shitësit që të monitorojë zbatimin e këtij biznes-plani, por dhe duke e detyruar blerësin të paguajë shumën prej 1 milion eurosh në rast të kundërt, çka do të thotë se blerësi nuk ka garanci që do të realizojë planin".

Ndërkohë, sipas relacionit të paraqitur, në një nen të veçantë të kontratës është përfshirë kërkesa e blerësit për ofrimin e shërbimit të Roaming-ut kombëtar, gjë që është kompetencë e Entit Rregullator të Telekomunikacionit dhe jo e qeverisë shqiptare.

Prifti: Çmimi i shitjes, shumë i lirë

Edhe sipas deputetit të opozitës Dritan Prifti, telekomi shqiptar është shitur në mungesë të transparencës me një çmim mjaft të lirë, disa herë më të vogël se investimet që janë bërë ndër vite në kompaninë e telefonisë fikse. “Duke marrë parasysh se fitimi vjetor i Albtelekomit arrin deri në 25 milionë euro në vit, atëherë çmimi i shitjes duhet të ishte rreth 250 milionë”, tha Prifti, i cili shtoi se informacionet për kompaninë turke Calik janë të pakta, për të mos thënë mungojnë krejtësisht. “Në kontratë thuhet se blerja do të bëhej nga konsorciumi Turk Telekom dhe Calik Enerji, ndërkohë që vetëm Calik ka marrë pjesë në tender. Kam kërkuar informacion për këtë kompani dhe më rezulton se ajo nuk ka asnjë lidhje me fushën e telekomunikacioneve”, tha Prifti.

3 kompani braktisin tenderin në fazën finale

Në muajt shtator, tetor, dhe nëntor të vitit 2004 janë publikuar ftesa për shprehjen e interesit për blerjen e aksioneve të Albtelekom Sh.a, edhe pas përfundimit të afatit për shprehjen e interesit rezultuan 11 kompani të interesuara për blerjen e aksioneve të shoqërisë Albtelekom. Nga vlerësimi i kompanive që kishin shprehur interes u kualifikuan katër kompani që plotësonin kushtet për të vazhduar më tej garën dhe konkretisht u kualifikuan:

Konsorciumi telekom Korea/Samsug Korea

Konsorciumi Turk telekom/ CalikEnerji telekomunikasyon-Turqi

MTC (Albanian Consorcium) Mohamed Abdul Mohsen Alkharafi& Sons-Kuwait

Telekom Slovenije/Slloveni

Nga këto katër kompani në fazën finale të tenderit, në procesin e paraqitjes së ofertave më 6 maj 2005, u prezantua vetëm një ofertë nga Calik Enerji me vlerë 120 milionë euro. Mbetet enigmë mosparaqitja e tri kompanive të tjera. Vazhdimi i procedurës së privatizimit me vetëm një ofertues paraqet rast unikal të privatizimit të sektorëve strategjikë me vetëm një ofertë, gjë që ka sjellë edhe mungesën e konkurrencës.

Ministria: Jo dypunësim për gjithë drejtuesit e Shëndetësisë

Ministria e Shëndetësisë nuk do të lejojë dypunësimin për të gjithë drejtuesit e strukturave shëndetësore në mbarë vendin. Këtë deklaratë e ka bërë të martën në Lushnje vetë ministri i Shëndetësisë z.Maksim Cikuli, gjatë prezantimit të drejtorit të Drejtorisë së Kujdesit Shëndetësor Parësor, Shpëtim Gjoni, të Shëndetit Publik, Mehmet Xhindoli dhe drejtorin e Spitalit, Vasil Lushnjari.

Sipas Cikulit të gjithë të emëruarit e rinj do të nënshkruajnë me ministrin e Shëndetësisë deklaratën përkatëse që nuk kanë konflikt interesi. Ndërkohë vetë ministri shtoi se nuk mjafton vetëm deklarata, por, do të bëhet njëkohësisht edhe verifikimi në drejtorinë përkatëse të licensave në Ministrinë e Shëndetësisë.

“Të gjithë ata që do të drejtojnë është e pamundur që të kenë konflikt interesi, pra nuk mund të jesh drejtor i spitalit dhe të kesh kabinetin tënd. Në qoftë se ju do të keni sinjalizime që nuk e respektoi atë që kanë firmosur vetë, ju lutem e keni derën e hapur tek unë. Eshtë absurde që një njeri që duhet t’ju drejtojë 8 orë në spital, të punojë 3 orë apo 4 orë dhe të ikë në kabinetin e vet”, tha Ministri i Shëndetësisë, duke shtuar se drejtuesit e rinj do të duhet t’i përkushtohen më shumë punës së shtetit.

Ministri Cikuli ka vizituar dhe qendrën e trajtimit të talasemikëve, ku u premtua një aparaturë e imunoesesë (që realizon testin Elisa për të identifikuar bartësit e HIV/AIDS) e nevojshme kjo për një gjak sa më të sigurt. Ministri kërkoi që të shtohet puna në drejtim të nxitjes së dhurimit dhe grumbullimit të gjakut. “Këtu duhet të jetë qendër model jo vetëm e trajtimit të talasemikëve, po duhet të jetë qendër model edhe e mbledhjes së gjakut të sigurt”, u shpreh ai.

Ministri i Shëndetësisë ka shprehur shqetësim lidhur me gjendjen e një pjesë të spitalit të Lushnjës. “Ajo që na alarmon ne është disniveli që ka midis spitalit obstetrik të gjinekologjisë dhe pjesës së vjetër të spitalit”, tha Cikuli.

Ministri Cikuli ka shfaqur shqetësim dhe lidhur me mungesën e organizimit nëpër spitale, duke përmendur këtu dhe mungesën e mjekëve gjatë orarit të tyre të punës.

“Po ju them copë, që ai që sot është zëvendësministër ka ardhur këtu në 12.00, apo 1.00 nuk gjente mjek. Kjo punë duhet të marrë fund”, vijoi Cikuli, duke i kërkuar që mjekët t’i japin prioritet kirurgjisë.

Prokuroria dërgon në Gjykatë ish-kryebashkiakun e Himarës

Prokuroria e rrethit Vlorë ka dërguar në gjykatë dosjen në ngarkim të tre ish zyrtarëve të bashkisë së Himarës. Zyra e shtypit e Prokurorisë së Përgjithshme bëri të ditur dje se mbi bazën e kallzimit të bërë nga Kontrolli i Lartë i Shtetit, për shkeljet e konstatuara në Bashkinë e Himarës, prokuroria e Vlorës ka kryer hetime ndaj ish drejtuesve të Bashkisë Himarë për shkelje dhe abuzime te kryera gjatë kohës që kanë qenë në detyrë. Sipas prokurorisë nga hetimet e kryera është provuar se shtetasit Viktor Mato me detyrë ish-Kryetar i Bashkisë Himarë, Thoma Çali me detyrë ish-shef finance në Bashkinë Himarë dhe shtetasi Vasil Çakalli me detyrë kryeplak i fshatit Vuno, kanë kryer veprën penale të vjedhjes së pasurisë, duke shpërdoruar detyrën në bashkëpunim dhe falsifikimit të dokumentave zyrtare. Bëhet e ditur se, Mato dhe Çali akuzohen se kanë vjedhur shumën 32 284 920 lekë, ndërsa Çakalli akuzohet për shumën 2 260 000 lekë.  Ndërkohë është provuar se këta shtetas në bashkëpunim me njëri-tjetrin i kanë shitur troje për ndërtim shtetasve të ndryshëm në territorin e Bashkisë Himarë dhe paratë e paguara nga shtetasit për vlerën e truallit nuk i kanë dokumentuar dhe arkëtuar për llogari të Bashkisë, por i kanë pervetësuar. Gjithashtu është provuar se kanë përvetësuar paratë e paguara si qera nga  shoqëria "Vodafon Albania" për 4 antena të telefonise celulare të vendosura në territorin e Bashkisë së Himarës. Prokuroria e Vlorës ka përfunduar hetimet për këtë procedim penal dhe është duke dërguar materialet për gjykim në Gjykatën e Vlorës në ngarkim të këtyre tre të pandehurve.

Kandidatët që përfshihen në këto kuota duhet të regjistrohen me 17-18 tetor

Ja kuotat e paplotësuara në fakultete

Ministria e Arsimit ka publikuar dje vendet bosh që kanë ngelur në fakultetet shqiptare, pas përfundimit të procedurës së parë të regjistrimit. Sipas Ministrisë së Arsimit për kuotat e parealizuara, regjistrimi do të bëhet me datë 17-18 tetor. Të gjithë kandidatët që kanë konkurruar për fakultetet shqiptare, duhet të interesohen nëse emri i tyre përfshihet në këtë numër  kuotash të parealizuara. Vihet re një numër i madh kuotash të parealizuara në fakultetet e shkencave të aplikuara, jo vetëm në Tiranë, por edhe në rrethe.

Ministria e Arsimit ka miratuar ditën e djeshme

Universiteti Politeknik

Fakulteti i Inxhinierisë Elektrike              32

Fakulteti i Inxhinierisë së Ndërtimit          13

Fakulteti i Inxhinierisë Mekanike              59

Fakulteti i Inxhinierisë së Gjeologjisë       20

Universiteti Bujqësor i Tiranës                 91

Universiteti i Tiranës

Fakulteti i Shkencave Natyrore                                            173

Fakulteti i Gjuhëve të Huaja                                                  46

Fakulteti i Shkencave Sociale                             

Dega Filozofi-Socialogji                                                           7

Punë Sociale                                                                          2

Psikologji                                                                               1

Shkenca Politike                                                                     1

Fakulteti i Histori Filologjisë

Histori                                                                                    5

Gjuhë Letërsi                                                                          5

Gjeografi                                                                                5

Gazetari                                                                                  3

Fakulteti i Mjekësisë      

Mjekësi e Përgjithshme                                                             10

Stomatologji                                                                              2

Farmaci                                                                                     2

Fakulteti i Infermierisë                                                                 5

Fakulteti i Drejtësisë                                                                    14

Gjithsej                                                                                     271

Universiteti “Ismail Qemali” Vlorë

Drejtësi                                                                                     30

Turizëm                                                                                     76

Cikël i Ulët                                                                                 18

Cikli i ulët parashkollor                                                               72

Inxhinieri navale                                                                        19

Navigacion                                                                                 6

Infiermieri                                                                                 30

Italisht                                                                                      30

Gjuhë letërsi                                                                             42

Matematikë fizikë                                                                       27

Gjithsej                                                                                     350

Universiteti “Fan Noli” Korçë

Anglisht                                                                                    16

Cikli i ulët                                                                                 34

Cikli i ulët parashkollor                                                               31

Matematikë                                                                                57

Filozofi-Sociologji                                                                        8

Gjuhë Letërsi                                                                              6

Administrim biznes                                                                    44

Financë                                                                                    14

Marketing                                                                                  60

Turizëm                                                                                    37

Agro-biznes                                                                               56

Hortikulturë                                                                               49

Inxhineri agronomike                                                                  38

Gjithsej                                                                                     450

Universiteti “Aleksandër Xhuvani” Elbasan

Frëngjisht                                                                                  25

Gjermanisht                                                                               24

Matematikë                                                                                20

Biokimi                                                                                      8

Cikli i Ulët parashkollor                                                                48

Cikli i ulët                                                                                   11

Gjithsej                                                                                     137

Universiteti “Eqerem Çabej” Gjirokastër

Gjuhë letërsi                                                                  51

Anglisht                                                                        48

Italisht                                                                          44

Greqisht                                                                        26

Infermieri                                                                      8

Biologji kimi                                                                   34

Matematikë informatikë                                                  50

Matematikë fizikë                                                           39

Cikli i ulëta                                                                    45

Cikli parashkollor                                                           44

Histori gjeografi                                                             10

Gjithsej                                                                         399

Universiteti “Luigj Gurakuqi” Shkodër

Administrim Biznes                                                         10

Turizëm                                                                         10

Matematikë                                                                    18

Fizikë                                                                             33

Informatikë                                                                    39

Biologji kimi                                                                   25

Cikli i ulët                                                                      50

Cikli parashkollor                                                           30

Histori gjeografi                                                             10

Gjuhë letërsi                                                                  15

Frëngjisht                                                                      36

Gjermanisht                                                                   38

Italisht                                                                          35

Kukës, shkolla e mesme akoma nuk ka nisur mësimin

Në qytetin e Kukësit nuk ka nisur ende proçesi mësimor në shkollën e mesme për këtë vit shkollor.

Shkaku i protestës së tejzgjatur, që ka filluar para tri javësh, është mungesa e mjediseve të mjaftueshme për zhvillimin normal të mësimit në arsimin e mesëm, si dhe kundërshtimin e zhvillimit të tij në dy turne. Shefi i Zyrës së Personelit në Drejtorinë Rajonale të Arsimit, Nail Hoxha, tha se "urdhri nga drejtoria jonë, i miratuar edhe nga Ministria e Arsimit për zhvillimin e mësimit me dy turne në këtë shkollë, ka hyrë në fuqi që në datën 26 Shtator, por nuk është zbatuar, si pasojë e kundërshtimit të mësuesve". Në Shkollën e Mesme të Përgjithshme të këtij qyteti janë regjistruar 1 600 nxënës për këtë vit shkollor. Numri i tyre në një klasë është mbi 50. 

Vlorë, studentët akomodohen në konvikte

750 studentë të Universitetit Teknologjik "Ismail Qemali" në Vlorë u akomoduan në konviktet e qytezës "Studenti" për vitin akademik 2005-2006. Sipas drejtores së Shoqërisë Aksionere "Trajtimi i Studentëve", Dafina Brokaj, "kjo përputhet me kapacitetin maksimal akomodues të qytezës". Brokaj tha se "tarifa e akomodimit për këtë vit është rritur në 21 mijë lekë, në krahasim me 15.6 mijë lekë që ka qenë një vit më parë". Qyteza "Studenti" në Vlorë, këtë vit u