KPD-ja e socialistëve mblidhet nesër për të zgjedhur anëtarët e rinj të kryesisë

Dorëhiqet në bllok kryesia e PS-së

Luftë e ashpër mes grupimeve të ndryshme në Partinë Socialiste për të pasur përfaqësim më të madh në forumin drejtues të PS-së. Grupi anti-Rama pretendon përfaqësim më të madh në Kryesinë e Partië Socialiste.

Anëtarët e Kryesisë së Partisë Socialiste vendosën dje të dorëhiqeshin vullnetarisht në bllok, duke i hapur rrugë zgjedhjes së një kryesie të re nga ana e Komitetit të Përgjithshëm Drejtues, i cili pritet të mblidhet nesër. Kryesia e PS-së kishte ngelur e paplotë që prej dorëheqjes të Petro Koçit dhe Bashkim Finos për shkak se e konsideruan këtë si një forum pa legjitimitetin e nevojshëm moral. Këtë vendim kryesia socialiste ia la në dorë kryetarit Edi Rama dhe Pandeli Majkos, kjo pasi kryesia kishte kohë që ishte e përçarë dhe ishte lëkundur mjaft nga dorëheqjet e shpeshta të anëtarëve të saj pas zgjedhjve të 3 Korrikut. “Anëtarët e kryesisë vunë në dispozicion mandatin e tyre dhe KPD do të zgjedhë kryesinë e re të PS-së” u shpreh kryetari. Sipas kryetarit Rama, takimi i djeshëm me kryesinë ishte i frytshëmm, i karakterizuar nga një frymë mirëkuptimi. “Në një takim mjaft të frytshëm, i cili u karakterizua nga fryma e mirëkuptimit, kryesia e PS-së vendosi të vijojë me procesin e rishikimit të skemës organizative të partisë, përfshirë edhe vetë kryesinë, duke i lënë në dorë kryetarit, Sekretarit të Përgjithshëm dhe Komitetit të Përgjithshëm Drejtues vendimmarrjen për kryesinë e re dhe njëkohësisht edhe për strukturën parimore, që do të duhet të mishërojë kjo kryesi e re” tha Edi Rama pas mbledhjes së Kryesisë. Kryesia dha dorëheqjen në bllok, në mbledhjen e saj të parë me kryetarin Edi Rama dhe Sekretarin e Përgjithshëm, Pandeli Majko. Një pikë tjetër që u diskutua në mbledhjen e djeshme ishte zgjerimi i kontakteve me antarësisë socialiste dhe fillimi i një fushate anëtarësimesh në Partinë Socialiste. “Njëkohësisht kryesia mendoi se është mjaft e udhës që qoftë unë, qoftë Sekretari i Përgjithshëm dhe qoftë të gjithë të tjerët, të angazhohemi në një proces kontaktesh me anëtarësinë e partisë, në funksion të trajtimit të të gjithë problematikës që tashmë na takon si opozitë dhe njëkohësisht në funksion të një fushate anëtarësimesh në PS, duke paraparë edhe hapa të mëtejshëm për procese demokratike vendimmarrjeje brenda partisë’’ deklaroi Rama. Sipas Edi Ramës, Partia Socialiste duhet t’iu nënshtrohet transformimeve të mëtejshme. “Dëshiroj të falënderoj të gjithë miqtë dhe shokët e kryesisë së PS për frymën jashtëzakonisht konstruktive, për solidaritetin me të cilin e trajtuan gjithë këtë proces që sapo mbyllëm dhe njëkohësisht që do të vazhdojmë të trajtojmë në të ardhmen dhe natyrisht edhe me angazhimin individual dhe modestinë me të cilën iu vunë në dispozicion PS-së dhe vetë transformimeve të mëtejshme që ne do të kemi në këtë parti të gjithë bashkë, të bindur se të gjithë jemi të nevojshëm dhe se për gjithkënd do të ketë vend, punë dhe nevojë për energji në Partinë Socialiste” përfundoi fjalën e tij Edi Rama. Komiteti i Përgjithshëm Drejtues pritet të mblidhet ditën e nesërme për të vendosur me votë antarët e rinj të Kryesisë socialiste.

Zv.kryeministri u shpreh dje se projekt-vendimi për kufizimin e imunitetit nuk prek asnjë dispozitë kushtetuese

Rusmali: “Imuniteti” nuk kufizon lirinë e deputetëve

Projekt-vendimi për kufizimin e imunitetit të deputetëve nuk cenon kushtetutën, pasi është një vendim që kufizon thjesht procedurat që çojnë në heqjen e imunitetit duke mos prekur liritë e deputetëve. Zv.kryeministri, Ilir Rusmali në cilësinë e përfaqësuesit të një grupi deputetësh të mazhorancës shpjegoi ditën e djeshme në komisionin e Ligjeve arsyet pse projekt vendimi për kufizimin e imunitetit është në zbatim të plotë me Kushtetutën. Sipas Ilir Rusmalit projekt vendimi zbaton në mënyrë rigoroze një normë kushtetuese dhe garanton liritë e personit. Rusmali theksoi se nuk ka nevojë që të amendohet Kushtetuta për miratimin e këtij projekt vendimi, sepse ky i fundit synon të zbatojë një dispozitë kushtetuese dhe jo ta ndryshojë atë. Pyetjes se si i vlerësonte Ilir Rusmali mendimet e ekspertëve për projekt vendimin e pregatitur nga mazhoranca, Rusmali u shpreh se ishte i kënaqur që kufizimi i imunitetit ishte pranuar nga juristët, si një tendencë botërore.

“Projekt vendimi nuk ka kundërshtime me Kushtetutën në thelb dhe kjo u pranua nga një pjesë e madhe e ekspertëve, ky projekt vendim nuk është agresiv sa modeli gjerman dhe nuk cenon liritë e njeriut,” theksoi përfaqësuesi i firmëtarëve të projekt vendimit për kufizimin e imunitetit të deputetëve.

Kryetari i grupit parlamentar të Partisë Socialiste, Pandeli Majko tha se në projekt vendim nuk është marrë parasysh neni i Kushttutës që flet për imunitetin në mënyrë detyruese. Këtij shqetësimi Rusmali iu përgjigj se nga hartuesit janë zgjedhur të gjitha dispozitat e Kushtetutës dhe rregullores që flasin për procedurat. Ilir Rusmali theksoi se vëmendja është përqëndruar te dispozitat proceduriale dhe jo te ato materiale.

Nga ana tjetër opozita ishte kundër miratimit të këtij projekt vendimi pa bërë më parë një amendim në Kushtetutë për çështjen e imunitetit. Kryetari i grupit socialist, Pandeli Majko, tha se projekt vendimi i paraqitur nga mazhoranca është i ngatërruar në vetvete dhe është në shkelje të neneve të Kushtetutës. Ilir Rusmali deklaroi se projekt ligji është bërë me qëllimin e vetëm për të luftuar korrupsionin dhe rastet e shpërdormit të detyrës. Sipas tij, ky projekt vendim është në akordancë me praktikën ndërkombëtare, që kërkon luftë kundër korrupsionit dhe projekt vendimi nuk është në kundërshti me Kushtetutën në thelbin e vet. Komisioni i Ligjeve ditën e sotme pritet të miratojë ose jo projekt vendimin e mazhorancës për kufizimin e imunitetit të deputetëve për të luftuar korrupsion dhe rastet e shperdorimit me detyrën.

Komisioni i Ligjeve kalon “Albtelecomin” në Kuvend

Komisioni i Ligjeve miratoi ditën e djeshme në parim projekt-ligjin “Për ratifikimin e Kontratës për blerjen e aksioneve të Albtelekomit” duke ia kaluar për shqyrtim seancës së ardhshme plenare, e cila pritet të rrëzojë këtë vendim për shkak të parregullsive të vëna re në këtë kontratë të dyshimtë. Kërkesa për vlerësim nga juridike erdhi nga kryetari i komisionit të Ekonomisë, Edmond Spaho drejtuar kryetarit të komisionit të Ligjeve Spartak Ngjelës. Sipas Pandeli Majkos, çështja e Albtelekomit nuk është një çështje ligjore por politike. Sipas Fatos Bejës specialistët kanë rezerva në lidhje me mënyrën që është privatizuar kjo kompani shtetërore dhe me zbatimin korrekt ose jo të ligjit të privatizimit. Ndërsa Ilir Rusmali deklaroi se se qeveria ka deklaruar se kjo çështje duhet të diskutohet në Kuvend dhe është Kuvendi ai që vendos për ratifikim të vendimit ose jo.

Kryesia e kësaj partie mbështeti nismën e kryetarit për vendosjen e sistemit proporcional

LSI: Nismë për ndryshimin e sistemit zgjedhor

Lëvizja Socialiste për Integrim vendosi ditën e djeshme që të mbështesë nismën e kryetarit të kësaj partie për reformë të sistemit zgjedhor në Shqipëri. LSI do të kërkojë vendosjen e një sistemi të pastër proporcional. “Kryesia vendosi të mbështesë ndryshimet duke filluar që nga ndryshimi i sistemit zgjedhor drejt një sistemi proporcional e deri në administrimin e ndershëm të votes së çdo shqiptari. Në mbështetje të kësaj nisme, LSI ka hartuar strategjinë e mediatizimit masiv e profesional të saj për të siguruar mbi të gjitha mbështetjen e gjerë të qytetarëve për këtë nisme,” thuhet në njoftimin e LSI. Kryesia e kësaj partie vendosi dje që anëtari i Kryesisë së LSI-së, z.Mustafa Muçi të jetë Zëdhënësi i LSI për Reformën Zgjedhore. “Kryesia e Lëvizjes Socialiste për Integrim (LSI) në mbledhjen e saj të radhës diskutoi dhe miratoi strukturën e re organizative të LSI në qender, e cila do të administrojë e nxisë zbatimin dinamik të kalendarit politik të LSI në funksion të zgjedhjeve të pushtetit vendor. Struktura e re prezanton një organizim tërësisht bashkëkohor dhe i përgjigjet në mënyrë adekuate veprimit politik që LSI ka ndërmarrë për fillimin e zbatimit të kalendarit politik në të gjithë vendin,” thekson njoftimi i LSI për mbledhjen e kryesisë.

Anëtarët e bordeve nuk mund të jenë më shumë se në dy borde drejtuese njëkohësisht

Qeveria mbyll konfliktin e interesave në borde

Zyrtarët socialistë kishin marrë deri në 14 milion lekë rrogë në muaj duke qenë anëtarë të më shumë se 10 bordeve drejtuese njëkohësisht. Kufizohet pagesa me maksimumi 45 mijë lekë të reja në muaj.

Qeveria i ka mbyllur dje rrugët konfliktit të interesave mes anëtarëve të bordeve drejtuese të ndërmarrjeve të ndryshme, duke mos lejuar pjesëmarrjen e një anëtari në më shumë se dy borde. Sipas vendimit të marrë dje nga qeveria maksimumi që mund të marrë anëtari që është njëkohësisht në dy borde shkon deri në 45 mijë lekë të reja. Vendimi është marrë pas problematikës së vënë re gjatë qeverisjes së majtë, ku zyrtarë të ndryshëm kanë marrë rroga deri në 14 milionë lekë të vjetra në muaj, duke qenë anëtarë njëkohësisht në më shumë se 10 borde drejtuese. Këshilli i ministrave vendosi dje të ndryshojë parimet e ndërtimit të bordeve, të enteve dhe ndërmarrjeve kombëtare e lokale, përbërjen dhe mënyrën e shpërblimit të anëtarëve dhe drejtuesve të tyre. Kështu, një anëtar i administratës nuk mund të jetë më shumë se në dy borde njëkohësisht, shpërblimi për anëtarët e bordit do të jetë sa 30% e rrogës së Sekretarit të Përgjithshëm të Ministrisë nga ku varet kjo ndërmarrje, ndërkohë që në përbërjen e bordeve do të përfshihen edhe intelektualë nga bota akademike dhe institucionet kërkimore. Ministri i punëve publike, Transportit dhe Telekomunikacionit, Lulzim Basha, u shpreh dje në një konferencë për shtyp se, pas investigimit të bërë, rezulton se pagat që marrin anëtarët e bordit janë shumë të mëdha, ku disa herë arrin edhe pagën e ministrit, nga bordet kanë qenë të përjashtuar intelektualët e botës akademike dhe institucioneve kërkimore. “Këshilli i Ministrave konstatoi se vendimi ekzistues ka qenë i bazuar mbi konfliktin e interesit dhe babëzinë. Ai i ka lejuar zyrtarët e lartë të administratës së mëparshme, anëtarësimin deri në 10 borde të ndryshme duke arritur në shpërblime që në disa raste kapin shumën midis 10 dhe 14 milionë lekë në muaj. Të tillë kanë qenë rastet e zëvendës-ministrave Rafti e Berberi. Gjithashtu, Këshilli i Ministrave konstatoi se bazuar në vendimin e mëparshëm, shpërblimi për anëtarët e bordeve caktohej bazuar si përqindje e rrogës së Drejtorit Ekzekutiv të Koorporatës apo ndërmarrjes publike, ndërkohë që rroga e Drejtorit caktohej nga anëtarët e bordit. Kjo ka bërë që dhjetëra dhe qindra zyrtarë të shpërblehen me rroga më të mëdha apo sa të ministrave”, u shpreh gjatë konferencës për shtyp ministri i Punëve publike, Lulzim Basha. Ai shtoi më tej se gjatë mbledhjes së djeshme të Këshillit të ministrave u vendos që rroga e një anëtari të bordit të jetë 30% e rrogës së sekretarit të përgjithshëm të ministrisë, nga ku varet kjo ndërmarrje, në të gjitha bordet që do të ngrihen do të përfshihen ekspertë dhe intelektualë nga bota akademike dhe institucionet kërkimore, si dhe akush nuk mund të jetë anëtar i më shumë se dy bordeve njëkohësisht. “Shpërblimi për anëtarët e bordeve të ndërmarrjeve kombëtare nuk do të jetë më përqindje e rrogës së drejtorit ekzekutiv të ndërmarrjes, por 30% e rrogës së Sekretarit të Përgjithshëm të Ministrisë nga e cila varet kjo ndërmarrje. Për entet lokale, ky shpërblim nuk do të jetë më i lartë se 20% i rrogës së Sekretarit të Përgjithshëm të Prefekturës ku gjendet ndërmarrja. Në përbërje të këtyre bordeve do të përfshihen ekspertë dhe intelektualë nga bota akademike dhe institucionet kërkimore. Askush nuk mund të jetë anëtar i më shumë se dy bordeve njëkohësisht. Shpërblimi në bordin e dytë nuk do ta kalojë 75% e shpërblimit të marrë në bordin e parë”, përfundoi Basha.

Kryeministri Berisha ngre një komitet të posaçëm me pjesëmarrje edhe të opozitës për parkun energjitik të Vlorës

Komitet të posaçëm për parkun energjitik në Vlorë

Kryeministri Sali Berisha urdhëroi dje ngritjen e një komiteti për shqyrtimin aspekteve ekonomikë të projektit të parkut energjetik të Vlorës. Zëdhënësi i kryeministrisë, Dritan Mishta, në një konferencë për shtyp, në përfundim të mbledhjes së djeshme u shpreh se në këtë komitet do ftohen për të marrë pjesë edhe kryetari i Bashkisë së Vlorës si dhe deputetët Isaraj, Kollozi dhe Malaj. Ai tha se kryeministri Berisha gjykon se ngritja e këtij komisioni do të ndihmojë në gjetjen e një rruge të përshtatshme për zhvillimin e burimeve ekonomike në këtë zonë. “Duke u nisur nga rëndësia që ka zhvillimi i ekonomisë dhe i turizmit, si dhe shqetësimet e vazhdueshme të qytetarëve e shoqërisë civile për ruajtjen e mjedisit, kryeministri Berisha gjykon se ngritja e këtij komiteti të posaçëm, me pjesëmarrjen e zyrtarëve të lartë do të ndihmojë në gjetjen e një zgjidhjeje të drejtë për zhvillimin e burimeve ekonomike dhe ruajtjen e mjedisit. Gjithashtu Kryeministri, duke vlerësuar dobinë që sjell bashkëpunimi institucional dhe politik, ka vendosur që në mbledhjet e Komitetit të Posaçëm të ftohen edhe Kryetari i Bashkisë së Vlorës, Rektori i Universitetit dhe deputetët Arben Isaraj, Ardian Kollozi dhe Arben Malaj”, u shpreh dje zëdhënësi i qeverisë Mishta. Ky komitet do të drejtohet nga zëvendës kryeministri, Ilir Rusmali ndërsa në përbërje të tij do të jenë edhe ministrin e Mjedisit, Ujërave dhe Administrimit të Pyjeve, ministrin e Turizmit, Kulturës, Rinisë dhe Sporteve, zëvendësministrin e Ekonomisë, Industrisë dhe Energjitikës, drejtorin e Agjencisë Kombëtare të Energjisë, prefektin e Qarkut të Vlorës, drejtorin e Institutit të Mjedisit, këshilltarin e Kryeministrit për Çështjet e Ekonomisë. Në mbledhjet e këtij komisioni do të ftohen për të marrë pjesë gjithashtu edhe organizma të shoqërisë civile, të përfshira në mënyrë konstante në trajtimin e këtij problemi si: përfaqësues të shoqatave mjedisore të “Ekolëvizjes”, “Për ruajtjen e mjedisit natyror në Shqipëri”, “Për Ruajtjen e Shpendëve dhe kafshëve të egra në Shqipëri”. Ky komitet i ngritur me iniciativën e kryeministrit do të përfundojë studimin e zonës deri në datën 30 tetor, datë në të cilën do të dërgojë në kryeministri edhe raportin me përfundimet e arritura. Pas marrjes së këtij vendimi nga Këshilli i Ministrave, ambientalisti Sazan Guri tha se zhvendosja e TEC/eve nuk do të zgjidhë problemin për thjesht do ta vonojë atë. “Mbështesim qëndrimin e qeverisë që ka hedhur idenë e zhvendosjes së TEC/eve por zhvendosja nuk e zgjidh problemin e ndotjes, por thjesht e vonon atë. Përqëndrimi i tepërt i industrisë në Vlorë e shkatërron atë si qytet bregdetar dhe nga ana tjetër Vlora nuk është qytet i përshtatshëm për të ndërtuar TEC/e. Deri tani kemi mbledhur 7 mijë firma për referendum që populli t’i thotë jo ndërtimit të TEC/it në Vlorë. Shpresojmë të na mbështesë edhe qeveria në këtë nismë”, u shpreh Guri. Gjatë një vizite pak ditë më parë në qytetin e Vlorës kryeministri Berisha është shprehur se Parku Energjetik do të ndërtohet në një zonë periferike ku nuk do të ndihen efektet ndotëse.

Kalohen kompetencat te Ruli. Zhbllokohet privatizimi i ndërmarrjeve shtetërore

Qeveria hap “dritën jeshile” për privatizimet

Këshilli Ministrave i hapi rrugë dje privatizimit ndërmarrjet dhe objekteve, të cilat janë pronë shtetërore pas shkrirjes së ministrisë së Ekonomisë dhe Ministrisë së Industrisë dhe Energjetikës në Ministrinë e Ekonomisë, Tregtisë dhe Energjetikës. Sipas këtij projektligji Ministria e Ekonomisë, Tregtisë dhe Energjitikës mund të kryejë procedurat e privatizimit për ndërmarrjet dhe objektet pronë shtetërore, si dhe zhbllokohet situata e krijuar pas ndryshimit të strukturës organizative të qeverisë dhe bashkimit të dy ministrive, asaj të Ekonomisë dhe të Industrisë dhe Energjitikës. Projektligji lejon që Ministria e Ekonomisë, Tregtisë dhe Energjitikës të ushtrojë kompetencat për privatizimin e shoqërive tregtare që veprojnë në sektorët jostrategjikë, duke zhbllokuar situatën e krijuar pas ndryshimit të strukturës organizative të qeverisë. Gjithashtu në mbledhjen e djeshme të qeverisë u miratua edhe projektligji “Për transformimin e ndërmarrjeve shtetërore në shoqëri tregtare”, i cili lejon ministrinë e Ekonomisë të ushtrojë të drejtën si përfaqësues i pronarit për pronën shtetërore, të kryejë procedurat e transformimit të ndërmarrjeve shtetërore në shoqëri tregtare dhe të realizojë procedurat e privatizimit të shoqërive tregtare, si dhe zhbllokohet situata e krijuar pas ndryshimit të strukturës organizative të qeverisë. Në këtë mbledhje u miratua edhe projektligji “Për strategjinë e privatizimit të sektorëve me rëndësi të veçantë,” i cili lejon Ministrinë e Ekonomisë të realizojë zbatimin e strategjisë së privatizimit në sektorët strategjikë, si dhe zhbllokohet situata e krijuar pas ndryshimit të strukturës organizative të qeverisë.

12 mijë persona që trajtohen si të papunë do të përfitojnë një rritje pagese prej 15 përqindësh

Qeveria, kush përfiton nga rritja e asistencës

Asistenca minimale për 12 mijë personat që trajtohen si të papunë, do të shkojë në 50 mijë lekë të vjetra, nga 43 mijë lekë që ishte

Qeveria e drejtuar nga kryeministri Sali Berisha ka rritur dje asistencën për të papunët me 15 përqind. Qeveria miratoi dje vendimin që do të prekë rreth 12 mijë persona që trajtohen si të papunë nga shteti shqiptar. Me këtë vendim të qeverisë shqiptare, asistenca minimale për të papunët që trajtohen nga kjo ndihmë do të jetë në rangun e 50 mijë lekëve të vjetra. Këshilli i Ministrave e miratoi dje vendimin për rritjen me rreth 15% të të ardhurave nga papunësia, duke e çuar këtë shifër në 5 mijë lekë të reja në muaj, nga 4.360 lekë që ka qenë më parë. Efekti financiar për zbatimin e këtij vendimi do përballohet nga buxheti i vitit 2005, miratuar për Ministrinë e Punës, Çështjeve Sociale dhe Shanseve të Barabarta. Pagesën e papunësisë e përfitojnë rreth 12.000 të papunë, trajtimi i të cilëve bëhet pranë zyrave të punësimit.

Qeveria urdhëroi dje që brenda tri ditëve të shemben të gjitha ndërtesat që ndodhen në ambjente shkollore

Ambjentet shkollore lirohen në tri ditë

Kryeministri Sali Berisha ka kërkuar dje që brenda tri ditëve të shemben të gjitha ndërtesat brenda oborreve të kopshteve, shkollave, fakulteteve dhe objekteve social-kulturore të vendit. Këtë deklaratë Berisha e bëri një ditë pas ceremonisë së fillimit të vitit të ri akademik në Fakultetin ekonomik. Ai kërkoi gjithashtu që të ndiqen penalisht të gjithë abuzuesit me oborret e këtyre ambienteve. “Të fillojë aksioni i çlirimit të oborreve të shkollave, brenda tri ditëve fillon veprimi. Së dyti, zoti ministër i Arsimit, ministri i Punëve publike, dhe ministri i Brendshëm në një kohë sa më të shkurtër do të rrafshojnë çdo objekt i ndërtuar në oborrin e shkollave të Shqipërisë, do të çlirohen çdo centimetër tokë shkolle, oborr shkolle në Shqipëri, do të jepet për ndjekje penale të gjithë abuzuesit me oborret e shkollave. E kam ndier veten dje para studentëve në një siklet të vërtetë, kur pashë oborrin e tyre më të vogël se kjo dhomë. Ministri më informon se është ndërtuar shkolla, por tjetri nuk më lejon të bëhet rrethimi, nuk mund të ketë asnjë lloj tolerance në këtë drejtim dhe t’ia nisim me fëmijët, më nxënësit, me studentët”, u shpreh kryeministri Berisha gjatë mbledhjes së djeshme të qeverisë. Ai kërkoi që përveç prishjes së ndërtimeve pa leje në këto ambiente, ato të kthehen në gjendjen që kanë qenë. Kryeministri Berisha tha se duhet mbajtur qëndrim ndaj të gjithë atyre që kanë toleruar kundrejt rryshfetit që u është ofruar. Shefi i mazhorancës kërkoi që çdo centimetër tokë që u është zënë fakulteteve dhe shkollave t’u kthehet atyre sa më shpejt. “Tani zotërinj jo vetëm që do të rrafshohen, por ata që kanë ndërtuar oborret do të detyrohn t’i rikthejnë ato në formën që kanë qenë. Të zhdëmtojnë dëmin e madh që kanë bërë. Nuk ka asgjë më të papranueshme kur shihja tentakulat e mafies se si kishte pushtuar oborrin e fakultetit, absolutisht nuk kisha nga të sillesha. Të mbahet qëndrim ndaj të gjithë atyre që kanë toleruar kundrejt rryshfetit të mafies për të pushtuar territoret e shkollave. Edhe një herë zotërinj ministra me forcën e hekurt të ligjit të çlirojmë çdo centimetër të shkollave, kopshteve dhe objekteve social-kulturore të vendit”, u shpreh më tej kryeministri Berisha. Gjatë kësaj mbledhjeje të qeverisë ai i kërkoi ministrit të Arsimit, Genc Pollo të marrë të gjitha masat për të sistemuar në shkollë të gjithë studentët që ende nuk janë futur në shkollë. “Regjistrimet kanë përfunduar, studentët janë ulur në banka, zoti ministër me operativitet të madh të studiojë, të shohë se kush ka mbetur dhe sa kanë mbetur pa sistemuar në mënyrë që të gjithë në 72 fakultete që ka Shqipëria të shpërndahen dhe të jetë i plotë i liberalizimi. Asnjë njeri që do të ndjekë shkollën e lartë të mos humbasë këtë mundësi”, përfundoi kryeministri Berisha.

Rusmali dhe tre ministra në grupin e punës për lirimin e ambjenteve shkollore

Në mbledhjen e djeshme të këshillit të ministrave u ngrit grupi punës së kryesuar nga zëvendës kryeministri, Ilir Rusmali dhe i përbërë nga ministri i Arsimit dhe Shkencës, Genc Pollo, ministri i Punëve publike, transportit dhe telekomunikacionit, Lulzim Basha si dhe nga ministri i Brendshëm Sokol Olldashi për të liruar oborret e shkollave, kopshteve dhe objekteve social-kulturore nga të gjitha ndërtimet pa leje dhe rikthimin e tyre në gjendje fillestare nga dëm-sjellësit. Këshilli i Ministrave emëroi Zana Turkun zëvendës- ministre të Turizmit, Kulturës, Rinisë dhe Sporteve, Kreshnik Alimadhi, prefekt të Qarkut të Vlorës dhe zotin Roland Bejko prefekt të Qarkut të Beratit. Në këtë mënyrë ngelen ende pa u plotësuar zëvendës ministri i Integrimit dhe dy zëvendës ministra të Jashtëm, si dhe prefektët e Vlorës, Fierit dhe Elbasanit.

Emërohen anëtarët e ISKSH-së

Gjatë mbledhjes se djeshme të këshillit të ministrave u caktuan tre anëtarët e këshillit administrativ të Institutit të Sigurimeve të Kujdesit Shëndetësor. Pjesë e këtij stafi do të jenë Aleksandër Sallabanda, zv/ministër i Shëndetësisë, si përfaqësues i Ministrisë së Shëndetësisë, Sybi Hida, Drejtor i Analizave dhe Politikave Buxhetore në Drejtorinë Drejtorinë e Buxhetit, si përfaqësues i Ministrisë së Financave, Astrit Kuka, Drejtor i Drejtorisë së Pagave dhe Pensioneve, si përfaqësues i Ministrisë së Punës, Çështjeve Sociale dhe Shanseve të Barabarta.

Rama: Nano, vetëm anëtar i PS-së

Në radhë të parë dua të theksojë se kryesia e partisë është një zgjedhje e komitetit të përgjithshëm drejtues. Në radhë të dytë dua të theksojë që zoti Meidani ka qënë dy herë rivali im në momentet zgjedhore brenda partisë socialiste por është në vijimësi një bashkëpunëtor i natyrshëm, një personazh të cilin gjithnjë e kam respektuar dhe do të vazhdojë ta respektoj për gjithçka ka dhënë për Shqipërinë si president i republikës, për mendimin në kuptimin e kontributeve intelektuale qoftë si profesor dhe qoftë më tutje ose mbase ai ishte presidenti, si një opinionist natyrisht në një staturë të veçantë dhe edhe për atë që ai ka bërë për Partinë Socialiste me kontributet që ka sjellë në të dyja këto momentet zgjedhore. Përsa i takon zotit Nano, unë do të thosha se do të çmojë çdo kontribut dhe çdo vlerë që ai do të sjellë me po atë ndjeshmëri dhe respekt që do të çmojë kontributet dhe vlerat e secilit prej 60 mijë socialistëve shqiptarë.