Kandidati i Partisë Demokratike në zonën 31, nënkryetari demokrat, Bamir Topi shprehet i sigurt në fitoren e tre korrikut

Lufta e të majtëve në një zonë të djathtë

Lufta verbale në zonën 31 të kryeqytetit mes kandidates socialiste, Mimi Kodheli dhe kandidatit të LSI-së, Ilir Dashi, përkthehet edhe në problematikën e mprehtë të kësaj zone të ndarë në dy pjesë, brenda dhe jashtë unazës. Me sa duket favorit i kësaj zone, nënkryetari demokrat, Bamir Topi, është shmangur nga kjo betejë mediatike mes socialistëve të ndarë, për një fakt të tjeshtë: siguria në fitoren e tre korrikut.

Zona 31 shtrihet nga qendra e Tiranës dhe duke ecur në veri pjesa më e madhe e saj kalon në periferi, pas unazës së kryeqytetit. Kjo zonë për këtë shkak është e shkallëzuar, pjesa e qendrës deri në unazë ka një infrastrukturë normale dhe të organizuar, ndërsa pjesa tjetër e zonës ka një infrastrukturë në kaos dhe probleme të shumta, ashtu si në çdo zonë tjetër të kryeqytetit.

Në periferinë e kësaj zone problemi më i mprehtë mbeten legalizimet. Një pjesë e madhe e ndërtesave të kësaj zone janë të palegalizuara dhe banorët në këtë pjesë janë kryesisht të ardhur nga të gjitha zonat e Shqipërisë, pas vitit 1990. Në të gjithë zonën periferike ekziston vetëm një shkollë 9-vjeçare, e cila punon jashtë kapaciteteve të saj.

Fëmijëve në pjesën më të madhe, iu duhet të bëjnë disa kilometra rrugë për të mësuar në një shkollë afër qendrës së kryeqytetit. Në periferi nuk ekziston një shkollë e mesme, ku gjimnazistët mund të ndjekin mësimet. As fëmijët e vegjël nuk kanë shansin të edukohen si fëmijët e qendrës, në periferi nuk ka asnjë kopsht shtetëror.

Në këtë pjesë që zë dy të tretën e zonës elektorale 31, nuk ka as çerdhe dhe as qendra shëndetësore. Përsa u përket rrugëve, në periferi janë ndërtuar vetëm akset kryesore të kësaj zone, ndërsa në pjesën tjetër as që nuk mund të flitet për infrastrukturë, sepse nëpër lagjet e kësaj zone, ai që mbizotëron është kaosi.

Banorët e bllokut të pallateve “Almako” pranë rrugës “Don Bosko” vuajnë nga mungesa e të gjithë elementeve të infrastrukturës.

Ndërsa, pranë rrugës “Jordan Misja” tregu i gjësë së gjallë është jashtë çdo parametri teknik dhe higjenik, duke u bërë një problem i madh për të gjithë banorët e zonës përreth.

Kandidati i PD-së në zonën 31 është nënkryetari dhe kryetari i grupit parlamentar të Partisë Demokratike, Bamir Topi, ndërsa Partia Socialiste ka zgjedhur si kandidate në këtë zonë Mimi Kodhelin dhe Lëvizja Socilaiste për Integrim, Ilir Dashin.

60 përqind e banorëve, të papunë

Në zonën 31 rreth 60-65% e banorëve në gjendje të aftë për punë, ende nuk kanë arritur të gjejnë një vend pune, duke u radhitur në listën e të papunëve të kryeqytetit.

Në këtë zonë elektorale, përveç bizneseve të vogla, ekzistojnë edhe bizneset e mesme, të cilat vuajnë më shumë nga taksat dhe nga mungesa e infrastrukturës për të punuar.

Në pjesën periferike, ku këto biznese janë shtrirë, përveç mungesës së infrastrukturës rrugore, probleme ka dhe me rrjetin elektrik, i cili nuk është aq i fuqishëm sa për të përballuar prodhimin në këto biznese.

Sipas platformës së Partisë Demokratike, biznesit të vogël do t’i përgjysmohen taksat, ndërsa bizneseve të tjera do t’i ulen taksat në një të tretën e tyre.

Një zonë me dy burgje

Dy burgje të kryeqytetit ai 302 dhe 313, gjenden në territorin e zonës 31. Gjithsej në këto burgje duhet të votojnë rreth 700 votues, por për këta votues kanë dalë disa probleme.

Ministria e Drejtësisë ende nuk u ka dhënë lejet përkatëse anëtarëve të Komisioneve Zonale Zgjedhore të ngrenë këto 2 Qëndra Votimi të Posaçme brenda këtyre burgjeve, ndërkohë që nga procesi zgjedhor na ndajnë vetëm pak ditë.

Sipas kryetarit të Partisë Demokratike të zonës elektorale 31 dhe njëkohësisht anëtarit të Këshillit Kombëtar të PD-së, Arben Xhikut, në këto burgje gjatë kësaj kohe po ndodhin shumë transferime, me pretekst të mbipopullimit.

Arben Xhiku thekson se këto transferime po ndodhin që këta të burgosur të mos votojnë, sepse në vendet ku ata transferohen, nuk e kanë emrin në listat përfundimtare.

Një zonë thuajse bastion

Fushata elektorale e kandidatit të Partisë Demokratike, Bamir Topi, ka pasur dy kulminacionet e saj. Kjo fushatë është hapur në Teatrin e Operas dhe Baletit, ku salla ka qënë e tejmbushur dhe shumë simpatizantë qëndronin jashtë saj.

Ndërsa gjatë një koncerti festiv për mbylljen e fushatës elektorale, disa ditë më parë, në pallatin e sporteve “Asllan Rusi” sipas organizatorëve, kanë qenë të pranishëm rreth 5.000 qytetarë.

Sipas shtabit elektoral të Bamir Topit, ky numër i madh qytetarësh kishte qenë befasues për të gjithë. Po sipas këtij stafi, këto grumbullime njerëzish nuk kanë qenë rezultat vetëm i militantizmit, por edhe i njerëzve jo të djathtë në bindjet e tyre politike.

Organizatorët theksojnë se qytetarët donin të mbështesnin Bamir Topin dhe të dëgjonin platformën e tij elektorale në këtë zonë.

Sipas shtabit elektoral të kandidatit të PD-së, Bamir Topi u ka premtuar qytetarëve të zonës së tij se do të ushtrojë një presion të madh që gjatë qeverisjes së demokratëve në këtë zonë do të ngrihet një shkollë e re 9-vjeçare, një qendër shëndetësore dhe një qendër sociale në periferi.

Zona 41 e kryeqytetit është një ndër zonat me më shumë probleme në kryeqytet, si përsa i përket infrastrukturës, edhe papunësisë

“Ali Demi”, Ngjela: Unë do jem avokati i zonës në Kuvend

“Ali Demi” është një nga zonat më problematike në kryeqytet. Në këtë zonë konkurrojnë për deputet, Spartak Ngjela për Partinë Demokratike dhe Spartak Poçi për atë Socialiste. Si të gjitha zonat në kryeqytet, edhe zona 41 konsiderohet nga zonat më problematiket. Hysen Osmani, kryetar i shtabit elektoral, ku kandidon Ngjela u shpreh se “në këtë zonë ka munguar investimi në mënyrë kategorike në sektorët më të rëndësishëm si rrugë, ujë, drita, legalizim shtëpish etj.. Partia Socialiste ka investuar vetëm për rritjen e papunësisë dhe shtimin e varfërisë si në të gjithë vendin,” u shpreh ai përgjatë një shëtitjeje në zonë.

“Me kandidimin e Ngjelës ne si shtab elektoral kemi filluar të njohim zonën me të gjitha problemet që ka. Ndër të parat probleme të zonës që hasëm, ishin familjarët që kishin zënë objekte shtetërore, siç është Uzina Traktorit, dhe nivelin e varfërisë,” thotë Osmani.

Duke prekur problemet e zonës...

“Strategjia për t’u njohur me problemet e zonës bëri që ne të takojmë sa më shumë njerëz: biznesmenë, familjarë e intelektualë. E veçanta është se jemi përshëndetur me përzemërsi nga shumë njeëz dhe biznesmenë që për shumë vite kanë qenë të majtë. Së pari ne ju kemi bërë nga një vizitë të gjitha zonave ku kandidon Ngjela dhe jemi njohur me të gjithë problemet që hasin ata përditë. Zona elektorale 41 është më problematikja për sa u përket listave të zgjedhësve,” deklaroi Osmani. Ai thotë se fenomenet negative me listat e zgjedhësve janë më pak evidente se në zgjedhjet e kaluara, por pavarësisht nga kjo, një numër i madh votuesish nuk kanë aritur të marrin çertifikata për të votuar. “Pra gjendjet civile zvarrisin procedurën e dhënies së letërnjoftimeve. Ky problem ka ndodhur kryesisht me ata votues që votojnë për herë të parë. Paralelisht me këtë banorët e zonës së ‘Ali Demit’ janë përballur dhe me fenomenet e vjetra zgjedhore.” Osmani u shpreh se “ka rreth 500 persona që iu gjendet emri në zona të tjera elektorale, dhe shpesh herë në emër dhe mbiemër ka shpesh ngatërrim të një shkronje, gjë që nuk regjistrohet në listat e zgjedhësve. Të paktën me forcat e rendit nuk kemi pasur probleme gjatë fushatës, duke veçuar incidentin një muaj më parë ku një simpatizant i një kandidati të pavarur, theu xhamin e zyrës elektorale të Ngjelës. Këto probleme, tha Osmani, jemi munduar që t’i shmangim në mënyrë që çdokush të ketë të drejtën për të votuar pa u cënuar e drejta e ndokujt. Megjithë problemet që hasen në këtë zonë, avokat Ngjela deklaroi ai do të fitojë betejën elektorale madje do të marrim një fitore të thellë.

Avokat Ngjela përballë ministrit Poçi

Takimet me elektoratin në të gjithë vendin janë zhvilluar në një gjendje tensioni dhe sharje ndaj kundërshtarit politik, në të vetmen zonë ku banorët nuk kanë dëgjuar sharje dhe ofendime të tilla ka qenë zona 41 e ‘Ali Demit’. Anëtarët e shtabit elektoral të Ngjelës deklaruan se kandidati socialist Poçi, në këtë zonë nuk ka zhvilluar asnjë takim të hapur me zgjedhësit. Osmani deklaroi se një gjë e tillë ka ndodhur sepse Spartak Poçi, nuk ka mbajtur premtimet e zgjedhjeve të kaluara. Në këtë mënyrë zona e ‘Ali Demit’ është nga zonat më të varfra të Tiranës. Zona elektorale 41 ka rreth 60 mijë banorë me një numër votuesish rreth 35 mijë.

Një zgjidhje për problemet

Një problem që do zgjidhje emergjente në zonën 41 është ish uzina e Traktorëve ku sot banojnë disa familje. Ngjela ka projektuar që ta kthejë në një zonë banimi njësoj si qendra e kryeqytetit. “Duke kthyer zonën e Uzinës së Traktorit në qendër banimi, do të zhvillojmë infrastrukturën e zonës, dhe njëkohësisht do rrisim numrin e të punësuarve në këtë zonë. Projekti për kthimin e uzinës në qendër banimi është diskutuar dje mes Ngjelës dhe disa inxhinjerë të huaj. Investimi në këtë zonë do të thotë zgjidhje i problemit të pronave dhe punësim i banorëve.

Si në të gjithë zonat në kryeqytet dhe në këtë zonë ka probleme me banesa e palegalizuara, pavarësisht se nuk janë të shumta në numër, është një problem që do zgjidhje. Osmani deklaroi se strategjia e legalizimit të banesave do të bëhet brenda tre muajve. Ky është prioritet i Partisë Demokratike për të gjithë zonat informale. “Zgjidhja e të gjitha këtyre problemeve të kësaj zone do të vijë me ardhjen e Partisë Demokratike në pushtet, dhe me Ngjelën si deputet në parlamentin e ardhshëm,” u shpreh Osmani.

Edhe pse në plan të parë duket se në zonën 41, ka një rivalitet mes kandidatësh, Osmani u shpreh se “nuk shohim asnjë kandidat kundërshtar në këto zgjedhje. Kandidatët e pavarur, u shpreh ai, nuk përbëjnë problem për ne, e njëjta konsideratë është edhe për të majtët, të cilët fushatën elektorale e kanë ndërtuar mbi gënjeshtra dhe mashtrime. “Këto kandidatë i japin një shans më shumë Spartak Ngjelës që të ketë një fitore të sigurt më 3 korrik,” ashtu siç do jetë fitorja e Partisë Demokratike nga jugu dhe në veri. Fushata që avokat Ngjela bën në këtë zonë bazohet mbi programin e Partisë Demokratike. Ne nuk bëjmë fushatë personale. Çdo gjë bazohet mbi alternativat e Partisë Demokratike.”

Shpresa që rilind

Banorët e zonës së “Ali Demit” shpresojnë se me ardhjen në pushtet të Partisë Demokratike, do të ndryshojë gjendja, në të cilën është zhytur zona gjatë tetë vjetëve qeverisje të socialistëve. “Kam dy vjet e gjysëm që nuk jam parë me fëmijët e mi, të dy djemtë i kam në Angli, pasi këtu nuk mund të rrinin. Papunësia i detyroi që të largoheshin prej vendlindjes. Kur ishin në Shqipëri u morën për dy vjet me një dyqan abazhurësh, por i binte që të punonin për shtetin, pasi atë që fitonin e paguanin taksë në shtet,” thotë një banor.