Nga Mero Baze

Ka një reagim të tepruar të lexuesve ndaj një editoriali të Andi Bushatit rreth faktit që ai e konsideron të motivuar paraqitjen e rrezikut për jetën ndaj Edi Ramës pas 21 janarit. Gati- gati po t’u hedhësh një sy rreth 200 komenteve nervoze kundër tij, dhe të tjerë plot fyerje që janë seleksionuar si të pavlerë, të krijohet ideja se është krijuar një nervozizëm nga përmendja e temave tabu për opozitën siç është 21 Janari, për shkak të debateve joracionale që ato hapin në fushatë për opozitën.

Unë e pashë dokumentarin e Edi Ramës, në prezantimin e tij në Vlorë, dhe ajo që vë re është se ai më shumë se sa mbështetësit e tij, tregon një kujdes të panevojshëm për të fokusuar dhe për të lënë në hije episode politike nga biografia e tij. Dhe këtu dua t’i rikthehem dy detajeve.

Detaji i parë është ai i 21 Janarit, ndërsa detaji i dytë prezenca e madhe e familjes në promovimin e tij.

Ajo që shkruan Bushati është pak nervangritëse dhe natyrisht është bërë nga një pozicion kritik për Ramën. Por në të vërtetë Edi Rama duket se ka një kompleks të panevojshëm tashmë për 21 Janarin. 21 Janari nuk është një vepër e Edi Ramës dhe as ndonjë skenar kriminal i tij. Ajo është një demonstratë krenare e opozitës, bile një nga ditët e saj të mëdha, për të cilën duhet të krenohet. Ajo ditë ka një të akuzuar të madh dhe ai është Sali Berisha. Ai është njeriu që ka vrarë katër qytetarë të pafajshëm dhe tërësisht paqësorë, dhe së bashku me Lulëzim Bashën është përgjegjës për tetë fëmijë jetimë dhe një precedent të ndyrë në historinë e politikës shqiptarë të pas vitit 1990, kur pushteti ekzekuton dhe merr përgjegjësinë për ekzekutimet politike, pa i hyrë gjemb në këmbë. Edi Rama nuk mund të shpëtonte Ziverin, Aleksin, Hekuranin apo Faikun nga plumbat e Sali Berishës. Askush nuk doli për t’u vrarë dhe për të vrarë atë ditë në rrugë. Për të vrarë dolën nga shtëpia dhe u mbyllën pas xhamave të blinduar vetëm dy burracakë, Sali Berisha dhe Lulëzim Basha.

Për këtë arsye, askush nuk mund të kompleksojë liderin e opozitës për 21 Janarin, as pas koalicionit me Ilir Metën dhe as nesër, nëse ndodh ta shikojmë të pafuqishëm për të ndëshkuar Sali Berishën. Për këtë arsye është e nevojshme që Edi Rama të sillet si lider i një opozite krenare sa herë përmendet 21 Janari, dhe lideri i një opozite krenare nuk fokusohet kur përmend 21 Janarin tek rreziku apo kërcënimet ndaj tij, por tek të vrarët e pushtetit. Edi Rama, dhe kushdo tjetër nga opozita e 21 Janarit, duhet t’i bëjë gjimnastikë trurit dhe të ketë gati katër emra në gojë sa herë përmendet 21 Janari. Ata janë simboli i asaj dite, ata janë krimi i shtetit, ata janë domethënie pse ne kemi një regjim dhe ata janë arsyeje pse ajo ditë ishte dita më e zezë e pas 22 viteve pluralizëm në Shqipëri. Të gjithë ata që ishin në shesh  kanë detaje të frikshme, të sikletshme apo të dhunshme më 21 janar, përfshi dhe unë, por të gjithë duhet të heshtim dhe të flasim vetëm për thelbin e 21 Janarit. Dhe thelbi i asaj dite është që Sali Berisha dhe Lulëzim Basha kanë vrarë katër vetë për arsye politike. Duhet t’ua përcjellim brezave këtë fjali për të mos u harruar kurrë dhe të mos e dublojmë me episode të tjera, që edhe pse janë të vërteta, zbehin thelbin e 21 Janarit. Jam i sigurt se çdo opozitar i rrahur, çdo gazetar i hetuar për puçist, çdo demonstrues që ka qenë afër të vrarëve, apo çdo njeri që është përndjekur për shkak të 21 Janarit, ka se çfarë të tregojë, por të gjithë ne të gjallët e kemi të ndaluar të flasim për vetveten më 21 janar. Vëmendja dhe përjetësia u shkon atyre që nuk janë më mes nesh për shkak të asaj dite.

Detaji i dytë që më tërhoqi vëmendjen tek dokumentari i Ramës ishte fokusimi tek familja e tij, intervista prekëse e Gregut, rrëfimet e nënës, gruas dhe miqve politikë dhe artistë. Edi Rama është votuar në këtë vend dhe pa e pasur këtë dekor familjar kaq të përsosur sa e ka tani. Për këtë arsye nuk mendoj se ky dekor sjell mbështetje më të madhe për Ramën, por vlen shumë për kundërshtarin e vet, i cili fëmijët dhe gruan i ka fatkeqësinë e tij kryesore elektorale në këto votime. Pra, nëse vlen për ndonjë gjë ky detaj, vlen jo për ta na kujtuar sa mirë i ka punët Rama me familjen, por se në çfarë halli është Sali Berisha me familjen që ka qeverisur tetë vjet.

Përfytyro që Berisha të bëjë të njëjtën gjë dhe të shfaqet i biri, i cili as nuk thotë dot që është ndarë nga gruaja, as që bashkëjeton ilegalisht me një të dashur, as që ka dy fëmijë, se s’ka ku t’i tregojë, as që e do shumë babin se i ka ndenjur afër kur ka qenë emigrant në Belgjikë e Suedi, e të tjera detaje si këto. Boll fotografia e tij dhe njerëzit nënkuptojnë menjëherë njeriun që shëtit me një çantë të zezë në dorë, derë më derë, për të negociuar pushtetin e babait.

Përfytyro sikur Sali Berisha të nxjerrë në ekran vajzën dhe ajo të tregojë sa e ka ndihmuar babai duke i firmosur çdo firmë për koncesione të klientëve të saj, të cilëve u kërkon 3 përqind të investimit. Përfytyroni të shfaqet në ekran gruaja e tij dhe të tregojë se çfarë mrekullie është jeta me burrin e saj, dhe sa shumë e “respektojnë” biznesmenët shqiptarë duke i bërë dhurata për fondacionet e saj.

Pra, domethënia e detajeve familjare të Edi Ramës nuk vlen aq shumë për të pasur një Ed Rama si burrë shembullor, baba të dhimbsur, apo fëmijë i një nëne tepër të lidhur me të. Shqiptarët e kanë votuar dhe kur i ka munguar kjo biografi. Ai pasazh vlen për të na kujtuar se familja përballë është shembullore sa i përket raporteve njerëzore me njëri- tjetrin, por e tmerrshme sa i përket mënyrës se si sillen si familje me pushtetin, ndaj shqiptarëve.

Ndaj nuk e gjej aq acaruese kritikën e Bushatit ndaj qasjes së Ramës në dokumentarin e tij për 21 Janarin, edhe pse Bushati ka qejf t’ia ngrejë nervat Ramës në këtë pikë. Më shumë më ngroh fakti se Berisha është tërbuar aq shumë nga ky dokumentar, edhe pse ai nuk ishte askund. E ka tërbuar pikërisht thyerja e një tabuje mbi të cilin ai kish ndërtuar mitin e tij si një njeri familjar. Kjo është një kryearsye pse pushteti i tij ka dështuar, duke u kthyer në pushtet të Familjes. Ndaj nuk vlen aq shumë si shkon me nënën, gruan, djalin apo vajzën, po sa larg pushtetit di t’i mbash ata për të mos na i kthyer në regjim Familjeje.

-Po çfarë të themi, tha Flamuri, ne e kemi gjithë fisin e Alketës në PD. Një xhaxha e kemi pas deputet e ministër, një tjetër militant, që na e ka rrahur Ilir Meta atë natë që të arrestoi ty….

-Jo zotëri, duhet me i sqaru njerëzit. Duhet me u thënë që ajo gënjen. Shiko Flamur, ajo thotë kam qenë fanse e Edi Ramës që 14 vjeç. Gënjen! 14 vjeç ajo ka pasë punu tek radio “Kontakti”, ka qenë me ne.

-Më thuaj çfarë të bëj, tha Flamuri, jam gati ta eklipsoj menjëherë. Kemi këtë vajzën që prezanton emisionin e fëmijëve në TVSH, a ta nxjerrim që mbështet PD?

-Jo atë se nuk e njohin shumë, shiko, është njëra që jep kohën tek ABC, ajo më duket e mirë?

-Dhe ajo është socialiste më duket se është feju me djalin e një socialisteje.

-Ashtu, po mirë, dëgjo, shiko, dakord, prit, kë të gjejmë, kë të gjejmë si kjo Alketa, është një tek TV Scan, ka pas bë një emision, nuk më kujtohet për çfarë, nuk e di si e ka emrin, nuk e di me kë ka qenë, po si me ne dukej…

-Ah, po, më duket e kanë heqë, tha Flamuri.

-Ashtu ë? Mirë, prit, shiko, dëgjo, tek Klani kë ka ndonjë ky Gjebrea???

-S’ka ai Doktor, i bën të gjitha vetë.

-Dakord, mirë, lëre, shiko tek TVSH është një që bën një emision për çështje sociale…

-Ajo nuk është me ne Doktor, është socialiste.

-Flamur, po ajo që prezanton Big Brother, për kë do votojë thua?

-Nuk e di Doktor, se ata të Top Channel nuk merren vesh. Vetëm Arian Konomi është yni.

-Jo, atë lere. Shiko, po kjo vajza që jep lajme në Ora News…

-Jo Doktor, vetëm ajo e TV Shijakut na ka ngelë prapë.

-Ashtu? Jo atë, jo! Çfarë t’i bëjmë, çfarë t’i bëjmë… Dëgjo: ta bëjmë kështu, duhet me e sulmu këtë Edi Ramën për deklaratën që ka bë për Alketën. Duhet me i kujtu mo zotëri se ai ka harru Elsa Lilën. Ajo ka hy në grevë urie për votat e Edi Ramës dhe ky s’e ka përmendë dhe përmend Alketën që është në parti time.

-Ah sa mirë të vajti mendja Doktor, se ai i ka dënuar të gjithë ata të grevës së urisë, sikur e kanë bërë grevën kundër Ramës, jo kundër teje. I ka heqë nga deputet nga çdo listë, nga çdo ngjarje…

-Shkëlqyer Flamur. Këtë t’i themi. Jo po duhet t’ia themi patjetër se ai zotëri bën sikur ky vend nuk ka memorie. Jo po një memorie e ka ky vend. Si mund të gëzohet ai që e voton një çupëlinë, si ajo unë kam 50, dhe hesht për ata që e kanë mbështetur vërtet në ditë të vështira. Jo zotëri se ajo deri më sot paguhej nga Klani, ky ma paraqet si zbulim. Do të tregojë që po më merr njerëzit. Duhet me ia bë patjetër.

Nga Rigels Xhemollari

150.000 maturantë votojnë për herë të parë në Shqipëri dhe asnjë përfaqësues i tyre nuk ndodhet në listat e partive të vjetra, megjithëse ligji dhe Kushtetuta e lejon.

Sot paradite ambasadorja gjermane me të drejtë u tha 18- vjeçarëve : “Votoni”, por për kë do të votojnë këta të rinj?

Kjo pyetje ka vetëm një përgjigje: Sot 70- vjeçarët dhe ish-komunistët kanë marrë në dorë fatin e të rinjve shqiptarë. Kryeministri nuk ngopet me kaq, ai kërkon dhe votën e 16- vjeçarëve për të shtuar eliksirin e pushtetit të tij.

Problemi dhe paradoksi më i madh që ka rinia shqiptare është ai i mospërfaqësimit në proporcion me numrin e votave që posedon.  Pjesa më e madhe e votuesve i përket rinisë, ndërsa pjesa më e madhe e përfaqësuesve të tyre ende nuk dinë të përdorin internetin dhe nuk njohin në thelb problematikat e të rinjve.

Kjo krijon mungesën e përfaqësimit të të rinjve në politikë dhe njëkohësisht krijon tek ata opinionin se politika është për të mëdhenjtë se politika është e vështirë se politika nuk ka të bëjë me ta.

Jo dhe jo, të rinjtë e sotëm nuk duhet t’i kthejnë shpinën politikës ata duhet të reagojnë dhe të çojnë zërin e tyre në parlament.

Gjej rastin të përgëzoj ato subjekte politike që e kanë marrë parasysh këtë fakt dhe të denoncoj ato subjekte që kanë përbaltur e përdorur, e vazhdojnë ta bëjnë, shtresën më të rëndësishme të kombit, rininë.

Një gjë duket qartë dhe e them me keqardhje që parlamenti i ardhshëm do t’i gjejë të rinjtë më të papërfaqësuar se kurrë!

Takim me emigrantet ne Athine

“Emigracioni gjatë këtyre viteve ka qenë edhe një nga shtyllat kryesore të ekonomisë tonë, pasi dërgesat e tyre përbëjnë mbi 12% të PPB-së tonë. Duke u nisur prej kësaj është më se normale që emigrantët të përfshihen në vendimmarrjen politike, dhe ju duhet të shprehni përmes votës tuaj mesazhin se ndryshimi në Shqipëri është i mundur”.

Kështu deklaroi Erion Veliaj, Sekretari i PS për Rininë dhe Emigracionin, gjatë një takimi me emigrantët shqiptarë në ishullin e Rodos.

Veliaj, njëkohësisht kandidat për deputet i Partisë Socialistë për qarkun e Gjirokastrës, ka zhvilluar një seri takimesh me emigrantët shqiptarë që jetojnë në shtetin fqinj, Greqi, duke u ndalur dhe në kryeqytetin Athinë.

Veliaj deklaroi se shumica e emigrantëve bëjnë pjesë tek ata shqiptarë që e kanë parë me sytë e tyre sesi funksionon një shtet europian dhe kjo është arsyeja se pse Berisha u trembet atyre.

“Emigrantët e duan Shqipërinë europiane, e dinë se ç’pamje do të kishte një Shqipëri e tillë, dhe sigurisht që Saliu nuk është pjesë e kësaj tabloje. Dhe prandaj kryeministri ynë në 8 vite nuk ka zhvilluar asnjë takim me emigrantët. Për këtë arsye ne kemi deklaruar gjithmonë se premtimet e Berishës për votën e emigrantëve janë gënjeshtra, sepse votat e tyre janë vota kundër Berishës. Gjithmonë jam habitur sesa shumë të informuar janë emigrantë rreth asaj që ndodh në Shqipëri. Ata i njohin shumë mire vështirësitë ekonomike që po kalon Shqipërinë, e dinë shumë mirë se vendi është buzë greminës dhe se katër vjet të tjera me Berishën në qeveri do të kishin pasoja katastrofike. Gatishmëria e tyre për të ardhur në Shqipëri vetëm e vetëm që të largojnë me vote Berishën është për t’u admiruar e njëkohësisht burim frymëzimi për ne”, tha Veliaj.

Gjatë prezantimit, Prifti tha se është për ndryshimin dhe për ardhjen në pushtet të opozitës, por nuk ka ngurruar të sulmojë opozitën dhe qeverinë.

Prifti tha se i vjen keq që drejtimin e PS-së e ka marrë Ilir Meta, pasi sipas tij, Meta është ai që ka bërë edhe listat e deputetëve të Partisë Socialiste.

Ai tha se ka pasur ftesë edhe nga Partia Demokratike, por që nuk e ka pranuar për disa arsye.

“Nuk mund t’ia fal Sali Berishës 21 janarin. Nuk mund t’ia fal Sali Berishës ndërhyrjen në organet e drejtësisë për të nxjerrë të pafajshëm Ilir Metën. Nuk mund t’ia fal Sali Berishës pasurimin familjes së tij dhe varfërimin e shqiptarëve përditë”, theksoi Prifti.

“Listat e subjekteve politike janë mbushur me emra personash që kanë të shkuar kriminale”.

Kështu ka deklaruar nga qyteti i Elbasanit kryetari i Lidhjes Demokristiane Shqiptare, Nikollë Lesi, teksa ka prezantuar kandidatin për deputet, Arjan Paplekajn.

Lesi nuk ka përmendur emra, por sulmet e tij i ka bërë teksa ka komentuar hartimin e listave për deputetë të të dy forcave politike.

Po sipas Lesit, nëse nuk janë në listat e tyre, partitë e vogla  janë të detyruara të bëjnë koalicione me PD-në apo PS-në, pasi me këtë Kod Zgjedhor, ato nuk kanë mundësi të përfaqësohen në parlament.

Në këtë mënyrë Lesi ka justifikuar përfshirjen e tij në koalicionin e djathtë dhe pse nuk ishte në listën e aleatëve që u përshinë në listën e Partisë Demokratike.

Megjithatë për kreun e PLD-së, situata politike në vend është e patolerueshme.

“Nuk mund të pranojmë një situatë politike ku subjektet “ndahen” dhe “pajtohen” pas akuzave shumë të rënda për korrupsion ndaj njëri-tjetrit, vetëm për interesa karrigesh”, ka deklaruar  Nikollë Lesi./l.ç

Selami lexoi disa fjalë mbi një letër, duke thënë gjëra që vetë nuk i besonte para pak muajsh.

Kurse kryeministri Sali Berisha i habiti librazhdiotët kur u tha se do e bëjë Shqipërinë si Amerika dhe se atje do shkojmë vetëm për vizitë. Brenda katër vitesh./ep

Kryetari i Partisë Socialiste, Edi Rama, deklaroi në një intervistë për Top Channel se ata janë të gatshëm që të votojnë paketën e propozuar nga kryetari i Lëvizjes Socialiste për Integrim, Ilir Meta, për tre ligjet e integrimit. 

Rama tha se qëllimi i Berishës është që të mos miratohen tre ligjet, në mënyrë që ai ta përdorë këtë për fushatë, pasi argumentet e tjera i kanë rënë.

Kryetari i PS iu përgjigj edhe deklaratave të ministres së Integrimit, Majlinda Bregu se ai dhe Ilir Meta po luajnë bllofin me tre ligjet.

Gjatë paradites së sotme zoti Meta ka bërë një deklaratë ku ka ftuar mazhorancën për të votuar tre ligjet. Ju e keni shprehur edhe pak ditë më parë mbështetjen tuaj për këtë deklaratë, por cilat janë hapat e mëtejshëm që do të ndërmerrni për këtë çështje?

Qysh ditën e parë, që kryetari i LSI ka dalë me një paketë kompromisi për të miratuar të tre ligjet dhe vendosur që ato të hyjnë në fuqi me parlamentin e ri, ne jemi shprehur dakord me këtë paketë. Në fakt këtu bëhet fjalë për dy ligje dhe Rregulloren e Kuvendit, jo për tre ligje dhe kam nevojë ta nënvizoj këtë gjë. Mirëpo është e qartë që ka vetëm retorikë dhe propagandë të shfrenuar antiopozitare nga qeveria dhe mesa duket nuk ka në fakt, asnjë vullnet për t’i miratuar këto ligje.

Duket se kjo çështje është kthyer në një pingpong politik pasi dy ditë më parë kryeministri Berisha nga Gjirokastra deklaroi se do t’i kërkojë kryetares së parlamentit dhe deputetëve të vetë që të votojnë që nesër tre ligjet. Kush është e vërteta e kësaj deklarate, të gjithë thonë po, por ndërkohë…?

Në këtë rast e vërteta është e thjeshtë. Është shumica ajo që ka në dorë të marrë nismën, të paraqesë në Kuvend propozimin për miratimin e këtyre dokumenteve me propozimin e kompromisit të bërë nga LSI. Pastaj vota e Kuvendit do të tregojë se kush ka ndërmend çfarë, kush bën propagandë dhe kush në fakt është i interesuar drejtpërdrejtë për ecurinë e procesit. Edhe pse unë e kam thënë dhe e përsëris që nuk janë në thonjëza tre ligje që e pengojnë Shqipërinë të afrohet më tutje në Bashkimin Europian, po janë 3 pushtete që mungojnë. Pushteti legjislativ, që është i gjithi nën kontrollin e një njeriu të vetëm. Pushteti ekzekutiv, që është nën kontrollin e korrupsionit dhe pushteti gjyqësor, që është i gjithi nën kontrollin e ekzekutivit dhe të korrupsionit.

A jeni i gatshëm të uleni me kryeministrin Berisha në një tryezë bisedimi për këtë çështje pasi LSI ka bërë atë propozim kompromisi, kurse kryeministri thotë le të votojnë ato projektligje të cilat kanë kaluar nga Komisioni i Ligjeve dhe janë në Parlament?

Faktikisht, është e qartë që është kryeministri, ai që mesa duket që ka nevojë që këto tre ligje të qëndrojnë të pavotuara, për të mbushur çdo ditë topat e tij të fushatës elektorale, tanimë, që i gjithë baruti është lagur komplet dhe për t’u përpjekur që t’u tregojë shqiptarëve atë që shqiptarët nuk e besojnë, se gjithçka ata po jetojnë në gjithë këtë papunësi, në gjithë këtë varfëri, në këtë dëshpërim social lidhet me këto tre ligjet dhe lidhet me opozitën. E vërteta është që shqiptarët janë shumë të vetëdijshëm që koha për rotacionin është vetëm pak ditë përpara tyre dhe në 23 qershor ata do ta vendosin me votë përfundimisht. Rrotacionin dhe fundin e këtij rrënimi të vazhdueshëm.

Menjëherë pas deklaratës së zotit Meta ka reaguar ministrja e Integrimit zonja Bregu, e cila thotë se opozita nuk është e gatshme t’i votojë këto tre ligje. Komenti juaj?

Po pra, është zonja Bregu, është edhe zoti Kodra, Saliu. Kodra pas bregut dhe bregu që dalë menjëherë pas kodrës. Prandaj, shqiptarët në 23 qershor do ta lënë edhe kodrën edhe bregun dhe do të vazhdojnë në det të hapur rrugëtimin e tyre drejt Familjes Europiane.

Pas takimit me homologun e tij serb, Ivica Daçiç, me ndërmjetësimin e kryediplomates së BE, Catherine Ashton, Thaçi tha se është hartuar një plan veprimi për gjashtë muajt në vazhdim.

Thaçi tha se marrëveshja e arritur duhet të konfirmohet edhe nga dy qeveritë respektive.

Serbia dhe Kosova nënshkruan një marrëveshje në Bruksel për normalizimin e marrëdhënieve. Por më pas pati një ngërç në lidhje me planin e punës për implementimin e kësaj marrëveshje. Për këtë arsye u pa e nevojshme që të realizohet një tjetër takim mes kryeministrash për të arritur një akord në lidhje me mënyrën se si do të zbatohet marrëveshje.

Thaçi tha se asgjë nuk ka lëvizur nga marrëveshja e nënshkruar më parë në Bruksel./ep

Ndaj kryeministri Sali Berisha, dukshëm në një gjendje lodhjeje nervore, foli në mitingun e Librazhdit më së shumti për kryetarin e opozitës.

Fillimisht Berisha iu përgjigj batutës së Ramës se ai çdo halli i përgjigjet duke thënë se po bëj rrugë.

“E dëgjuat vetë mbrëmë, zoti Rama në një bisedë me qytetarët e Tiranës u tha atyre se çfarëdo t’i kërkosh kryeministrit, të thotë rrugë. I nderuar zotëri, i ke nervat e lodhur dhe i ke të lodhur shumë nga rrugët.

Jo zotëri, puna dhe punësimi janë qëndrimet e mia më madhore, fakti që në këtë rreth bizneset janë dyfishuar, dëshmon se kemi nxitur dhe inkurajuar biznesin dhe zhvillimin e tij.

Para se të flasësh, të ftoj të ngjitesh me autobusin mavi deri në Çermenikë, sipër do gjesh një lokal të madh ku festojnë dhe bëjnë dasmat si vend panoramik që është. Pronari do të thotë se e bëra investimin se më erdhi rruga,” tha Berisha.

Më pas kryeministri iu përgjigj edhe deklaratave të Ramës se Berisha po i gënjen qytetarët me çështjen e heqjes së vizave me SHBA, në mënyrë që të gjithë të vërshojnë për atje.

“Tani që deklaruam se do marrim vizat për SHBA, dje deklaroi se të gjithë do shkojnë në Amerikë. Jo zotëri, do shkojmë për vizitë, do ta bëjmë Shqipërinë Amerikë.

Të bashkohemi për punësim, mirëqenie dhe integrim. Alternativa tjetër e shpalli Shqipërinë karrocë për invalidin, Shqipëria është anëtare e NATO-s, meritoi statusin dhe do ta marrë, ti rri në autobus me xhamat e zi. Të bashkohemi të gjithë pavarësisht nga bindjet”, tha Berisha.

Kreu i qeverisë ka renditur një sërë investimesh e zhvillimesh që sipas tij ka përjetuar Librazhdi, e që do të vazhdojnë në mandatin e tretë.

“Gjatë këtyre viteve ju jeni dëshmitarë se ne kemi investuar shumë këtu. Ne kemi ndërtuar dhjetëra shkolla e qendra shëndetësore, ndërkohë që numri i bizneseve në Librazhd është dyfishuar në 1400”, ka thënë Berisha.

Ai ka premtuar se në katër vitet e ardhshme investimet do të shtohen, duke e vënë theksin tek shtrimi i rrugëve deri në fshatrat e rrethit.

“Ne jemi të vendosur të ndërtojmë në katër vitet që vijnë çdo kilometër rrugë në çdo fshat të këtij rrethi. Ne do ndërtojmë këtu infrastrukturën më moderne si ato të qyteteve tona. Do vazhdojmë ndërtimin e shkollave, ujësjellësve e kanalizimeve. Shkolla, rruga dhe energjia elektrike janë kushtet themelore për zhvillim”, ka premtuar Berisha.

Ai ka vlerësuar më tej se, Librazhdi ka gjithashtu kushtet për t’u shndërruar në një nga zonat më të rëndësishme të drurëve, arrave dhe pemëve të tjera frutore./ep