Misioni i panjohur i të besuarës së Berishës në Moskë në prill 2012

4 Dhjetor 2016, 11:11Politika TEMA

Në vitet 2011-2012 Shqipëria përpiqej të vinte në funksionim të gjitha nivelet e marrëdhënieve me Rusinë, duke siguruar një ftesë për kryeministrin Berisha në Petërburg dhe një vizitë të kryediplomatit rus Lavrov në Shqipëri.

Këto fakte bëhen të ditura në një intervistë që i ka dhënë agjencisë shtetërore ruse të lajmeve ITAR-TASS zëvendësministrja e Punëve të Jashtme Edit Harxhi, më 12 prill 2012.

Ndërkohë është i pashpjegueshëm fakti që ndërsa MPJ-ja dhe mediat ruse i bënë jehonë vizitës të Harxhit në Moskë, vartësit e saj në Tiranë nuk e pasqyronin në sajtin e Ministrisë së Punëve të Jashtme veprimtaritë në “Romën e Tretë”.

Për më tepër që Harxhi, një nga njerëzit më të besuar të Berishës dhe PD-së, kishte arritur sukses, teksa siguroi një ftesë për Kryeministrin shqiptar në forumin ekonomik të qershorit 2012 në Shën-Peterburg.

Po hedhim dritë për një vizitë të gjatë të ish-nr. 2 të MPJ-së, Edith Harxhi në Moskë, por që nuk është bërë publike as nga MPJ-ja dhe as nga mediat shtetërore.  Përtej misterit që shkakton ky fakt, ngjallin interes deklarimet e Harxhit në vendin e stepave të pamat.

Tatim pulsi

“Tani në kuadrin e NATO-s po formohet në mënyrë aktive sistemi evropian i mbrojtjes nga raketat. A po planifikon Shqipëria t’i bashkohet kësaj strukture, a do të instalohen në të ardhmen në territorin shqiptar elemente të sistemit pan-evropian të mbrojtjes nga raketat?”, kjo ishte një nga pyetjet e porositura nga lidershipi i Rusisë për agjencinë e shtetërore telegrafike ITAR-TASS për t’iu bërë zëvendësministres shqiptare të Jashtme Edith Harxhi.

Por, ajo, me elegancë, përdori një dredhi ala Berishë në përgjigjen e saj: “Që nga viti 2009, Shqipëria është anëtare e NATO-s. Angazhimi ynë në Aleancë nuk konsiston vetëm në ruajtjen e paqes dhe stabilitetit në botë në tërësi, si edhe në rajon, por edhe në pjesëmarrjen në operacionet paqeruajtëse. Do të vazhdojmë të përmbushim detyrimet tona në kuadër të ISAF-it në Afganistan, si dhe në operacione të tjera të NATO-s në të gjithë botën.

Shqipëria është një vend i cili jo vetëm garanton siguri, por edhe e prodhon, dhe, duke qenë një shtet i tillë, ne kemi instrumentet përkatëse për zgjidhjen e çështjeve të agjendës ndërkombëtare.

Pozicioni ynë mbetet i pandryshuar lidhur me çështje të ndryshme në OKB, OSBE dhe Këshillin e Evropës. Në bisedimet me Vladimir Titovin u konstatua se negociatat në kuadër të Këshillit Rusi-NATO duhet të vazhdojnë, nuk ka rëndësi se në çfarë niveli do të bëhen”. Rusia tatoi pulsin për faktin se në vitin 2008 Berisha kërkoi që radarët amerikanë anti-raketë të instaloheshin në Shqipëri, gjë që solli reagimin e ashpër të Moskës. Se sa me merak e ka këtë problem, mjafton të citojmë radion shtetërore “Golos Rossii” (Zëri i Rusisë) në një lajm të 17 prillit: “Rusia synon të vendosë një radar mbi-horizontal në territorin e Transnistrias.

Stacioni i ri i radiolokacionit, i përfshirë në sistemin e paralajmërimit të sulmeve raketore, do të jetë një nga përgjigjet e Rusisë ndaj vendosjes së Mbrojtjes Evropiane Antiraketë dhe krijimit të bazave ushtarake të NATO-s në Rumani”. Sikurse ka dalë nga dokumentet e shklasifikuara amerikane, në vitin 1961 Presidenti Xhon Kenedi anuloi një bombardim atomik të Shqipërisë për shkak të një radari sovjetik të Paktit të Varshavës në ishullin e Sazanit, me t’u prishur marrëdhëniet e Hoxhës me Hrushovin.

Por Moska e sotme është dhe pragmatiste. Sipas njoftimit për shtyp të MPJ-së ruse, në konsultimet midis Titovit dhe Harxhit, më 4 prill, “u diskutuan çështje të ndërveprimit të dy vendeve në organizatat ndërkombëtare, veçanërisht në kontekst të kryesimit të ardhshëm të Shqipërisë në Këshillin e Evropës, një numër çështjesh të politikës globale dhe gjendja në Evropën Juglindore”. Me sa duket, Rusia mund t’i jepte kënaqësi Tiranës duke i çuar ftesë Kryeministrit Berisha për një forum ekonomik në qershor dhe ku të takonte kryeministrin e ri rus. Të paktën, kështu del nga intervista e Harxhit që priste të realizohej ky event.

Nostalgjia

“Po bëjmë përpjekje të aktivizojmë lidhjet tona”, tha në intervistë Harxhi, e cila 9 ditë më parë, më 3 prill, në universitetin e Ministrisë së Punëve të Jashtme të Federatës Ruse MGIMO, në një leksion kushtuar zhvillimit të marrëdhënieve miqësore midis Rusisë dhe Shqipërisë, tregoi me hollësi mbi bazat e bashkëpunimit, që u vendosën në marrëdhëniet mes dy vendeve në vitet 1940-50.

Harxhi nënvizoi se kujtimi për këto tradita është ende i gjallë në Shqipëri. Por. me sa duket, rusët janë mosbesues. Në një shkrim të 19 gushtit 2009 gazeta zyrtare e qeverisë ruse botoi artikullin me titullin “Kryeministri shqiptar akuzoi Rusinë se po përpiqet “të kthejë Bashkimin Sovjetik”.

Kreu i qeverisë shqiptare Sali Berisha, me t’u kthyer nga ceremonia e hapjes së Lojërave Olimpike, në një konferencë shtypi të improvizuar, e gjykoi ashpër agresionin e Moskës kundër shtetit të lirë të pavarur dhe i bëri thirrje bashkësisë ndërkombëtare të ndërhynte me urgjencë për të rregulluar gjendjen.

Sipas fjalëve të kryeministrit të Shqipërisë, Rusia ne veprimet e saj nuk do as më shumë as më pak “të kthejë Bashkimin Sovjetik”. Për Kremlinin,“hipokrizia e shqiptarëve, natyrisht, shpjegohet me faktin se ata thjesht përsërisin fjalë për fjalë çka u thonë amerikanët”.

Por Berisha ka ndryshuar. Madje, ai u tregua tejet i sjellshëm, kur priti një vit më parë në një audiencë drejtorin e Antidrogës Ruse dhe urdhëroi aderimin e Shqipërisë në Pesëshen e udhëhequr nga Rusia dhe Serbia për të rrethuar Kosovën me një “kordon sanitar” për luftën kundër narkotrafikut. Jo vetëm kaq, Harxhi u udhëzua të deklaronte në intervistën e cituar se Shqipëria beson që “ndërveprimi në Ballkan krah për krah me Rusinë ka shumë rëndësi për garantimin e sigurisë në rajon”. Berisha u ka kërkuar rusëve të fusin në Shqipëri një degëzim të gazsjellësit rus “Rryma Jugore”./ Shqiptarja.com

5 komente në “Misioni i panjohur i të besuarës së Berishës në Moskë në prill 2012”

  1. Organizata baze e Çoles says:

    E keni nisur si diskreditim, por ka dale si pergezim. Shoke, mos u shtrengoni kaq shume! Unitet!

  2. K. F says:

    Edit Harxhi o zoterinj te gazetes meqe nuk e dini eshte se pari nje turkowoman dhe se dyti nje nxenese e besuar e Berishes, por qe nuk ka asnje lidhje me PD. Nje papagalli i besohet vetem te kendoje ato qe i thone padronet, ndaj mos kerkoni me shume se une Editin nuk e ve as te beje Doner-Kebap, jo ta bej diplomate te rangut te pare, por meqe Saliu dhe Ed Rama i kane qejf lepireset qe nuk kane as shtylle kurrizore as mend per te gjykuar, u duhen per te realizuar agendat e tyre personale.

  3. adi says:

    perpjekje qesharake , po deri ne dhjerje.
    po si more gazeta kr rilindas nis rilindasen kukumjacke ne rusi se mos rregullon gje me rusin tani qe ka ngelur fillikat dhe ju gjeni te jepni 1 lajm te tille????????????
    vertet spaskmei pare asgje akoma.
    por me e rendesishmja eshte se ju edhe opinionit publik po ja krijoni bindjen, se po akuzoi per ndonje rilindja PD ose berishen ose e ka bere vete ose e ka ne plan ta beje vete!!!!

  4. bledi says:

    Me sa duket BERISHA te ka prekur ne NDERIN e familjes dhe ti aty nuk duron .Je per tu marre shembull nga gjithe shqiptaret mor felliqesire.HENRI CILI ta futi per ish puntorine ushtarake. Plas nga inati

  5. fieraku NGA ferrasi says:

    Hahaha hahaha hahaha hahaha
    Organizzata baze e Coles
    Bravo!

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje