Ministri për Europën dhe Punët e Jashtme Ditmir Bushati, në cilësinë e drejtuesit politik të qarkut, është ndalur në Bashkinë Fushë-Arrëz ku ka shpërndarë libra për fëmiljet në nevojë.
Ministri Bushati u ndal në familjet e Gëzim Bashës dhe Arben Mecit. Ministri Bushati e vuri theksin tek iniciativa e qeverisë për të siguruar libra falas për klasat I-IV, ndërsa shtoi se po bëhen të gjitha përpjekjet e nevojshme që kjo nismë të zgjerohet më tej.
Gëzimi, babai i tre vajzave, duke vlerësuar këtë nismë tha se vitet e shkuara e ka pasur të vështirë të sigurojë libra vajzave të tij për shkak të situatës së rënduar ekonomike.
Në Bashkinë Fushë-Arrëz 955 familje përfitojnë nga nisma për libra falas, ndërkohë në të gjithë vendin janë 70 mijë fëmijë të të gjitha klasave që përfitojnë nga programi i qeverisë për libra falas.
Në total nga kjo nismë përfitojnë në total 125 mijë fëmijë të klasave 1-4. Ndryshe nga më parë, prindërit nuk do të detyrohet t’i blejnë, për t’u rimbursuar më pas.
Të gjithë librat u jepen automatikisht falas fëmijëve. Duke nisur nga viti i ardhshëm, libra falas do të përfitojnë edhe fëmijët e klasave të pesta.
Deri në fund të mandatit, qëllimi është që të gjithë librat të përfitohen falas deri në klasën e nëntë, ashtu siç ndodh në Zvicër, Finlandë dhe vetëm pak vende të tjera Europiane me mirëqënie shumë të lartë.