Dita NJË e vaksinimit dhe dita ZERO e maskës opozitare!

11 Janar 2021, 21:41Blog TEMA

Nga Alfred Peza

Ka një përkim fatal datash ndonjëherë në historinë e Shqipërisë dhe shqiptarëve, që të lënë pa fjalë, a thua se dora e padukshme e Zotit kujdeset posaçërisht për këtë.

Nga 28 nëntori 1443 i Skënderbeut, tek 28 nëntori 1912 i Ismail Qemalit. E nga ky 28 nëntor, tek sherrnaja e madhe e ditës së çlirimit, nëse ajo është në 28 nëntorin e 1944 apo gjermani i fundit iku nga Shkodra duke gdhirë 29-ta?!

Kështu ka ndodhur edhe këtë radhë, me ditën Numër NJË të vaksinimit të popullsisë kundër covid-19, që ka nisur edhe në Shqipëri më 11 janar 2021. Përkimi në këtë rast është se pikërisht në një 11 janar tjetër, këtu e 75 viteve më parë komunistët pasi kishin hyrë triumfatorë në Tiranë, e shpallën Shqipërinë Republikë Popullore.

Ishte viti 1946 dhe ajo ditë shënoi ngjitjen e Enver Hoxhës në majë dhe ndarjen përfundimtare me Mbretërinë e Ahmet Zogun. Ishte dita e triumfit të së majtës së re, mbi të djathtën tradicionale. Duke shënuar edhe nisjen e një luftë të re ideologjike, për të çrrënjosur trashëgiminë e vjetër, e për ta zëvendësuar me identitetin e ri komunist.

E nëse do ti besonim babait të marksizmit, “historia përsëritet dy herë, herën e parë si tragjedi, herën e dytë si komedi”.

Biem dakord se 11 janari i treçerek shekullit më parë, rezultoi për shqiptarët dhe Shqipërinë një tragjedi e vërtetë, që zgjati për 45 vjet me radhë. Ndërsa 11 janari i 2021 u shndërrua nga opozita jonë dhe propaganda e saj, në një komedi të vërtetë. Një komedi nga ato që kishim vite pa qeshur me lot.

Mjafton të shohësh se çfarë shkruajnë, se çfarë thonë, se çfarë komentojnë dhe se me çfarë argumentash debatojnë, që të shkulesh gazit.

Arsyeja se përse janë bërë kaq qesharakë është e thjeshtë: Duke qenë se qeveria shqiptare ia doli të jetë një ndër të parat në Europë që e ka nisur këtë proces, në të njëjtën kohë me vendet anëtare të BE dhe përpara shumë shteteve të tjera të rajonit, kjo i ka tërbuar opozitarët tanë.

Nuk ke si të mos shkrihesh së qeshuri, kur të gjithë ata që deri dje bënin presion që procesi të fillonte sa më parë, sot shkumëzojnë nga marazi a thua se Edi Rama në “Air Albania” nuk i ftoi qytetarët për tu vaksinuar nga pandemia, por për ti çuar me forcë drejt dhomave të gazit e krematoriumeve!

Është një komedi e zezë e lidershipit të opozitës shqiptare e gjitha kjo që po luhet këto orë, ndërkohë që në çdo shtet tjetër e në çdo ambjent politik të botës, ky 11 janar duhej të ishte një ditë shprese. Një ditë gëzimi. Një ditë optimizmi. Një ditë kthese përfundimtare në luftën kundër fatkeqësisë më të madhe shëndetësore që i ka rënë për pjesë njerëzimit që të vuaj në këto 100 vitet e fundit.

Sepse kjo ditë, shënon një fillim të ri në zbrapsjen përfundimtare të armikut të padukshëm, që ka prekur qindra milionë njerëz në të gjithë globin dhe po korr çdo ditë jetë njerëzisht. Mjafton të ndjekësh këtë komedi të zezë, për të kuptuar sesa shumë i pret barku liderëve tanë opozitarë për jetën dhe shëndetin e qytetarëve të këtij vendit, përpara hallit të tyre personal për pushtet. Sepse tek fillimi kaq shpejt i këtij procesi, ata nuk shohin më shumë jetë shqiptarësh të shpëtuar, por më pak vota për ta të fituara në zgjedhjet e 25 prillit.

Kaq mjafton për të kuptuar se kjo ditë duhet të mbahet mend, përveçse si dita Numër NJË e vaksinimit, edhe si dita ZERO kur opozitës sonë i ra përfundimisht maska. Ajo maskë që deri dje e mbanin në emër të humanizmit dhe qarjes së hallit të shqiptarëve.

4 komente në “Dita NJË e vaksinimit dhe dita ZERO e maskës opozitare!”

  1. A.M says:

    shhhh e saktee !!!

  2. bujari says:

    Peza, jam dakort me ty per 11 janarin 2021 si dite e mbare per shqietaret me rastin e fillimit tevaksinimit, por nuk jam aspak dakort per 11janarin e 1946, dites se shpalljes se republikes, qe ju e quani si dite te zeze. Me vjen keq se ju jeni edhe gazetar qe e gjykoni si dite zije 11 janarin e v.46 kur, ne fakt duhet te jete dita me e shenuar e ketije kombi mbasi shqiperija u shkepute njehere e mira nga monarkija ,nga injoranca, varferija e tejskajshme (megjithese edhe sot jemi te varfer) e kohes se mesjtes dhe, pava rsisht zikzakeve, vendi dhe populli eci drejt zhvillimit e emancipimit te shoqerise.

  3. luka says:

    Pikes i ke rene, e ke qare.

  4. Albani says:

    Bravo Fredi mire ben qe ja u gris perfundimishte masken ketyre maskarenjve te pa shpirt tradhetare te pa epur kunder shqiperise.

Lini një Përgjigje

Adresa juaj email nuk do të bëhet publike. Fushat e domosdoshme shënohen *

Lini një Përgjigje