Te fundit

Astronautët drejt Hënës me “firmën” e Prada-s

9 Qershor 2026, 13:00Lifestyle TEMA
Astronautët drejt Hënës me “firmën” e Prada-s

Shtëpia e famshme italiane e modës, Prada, ka bërë një hap të pazakontë përtej botës së luksit dhe pasarelave, duke prezantuar veshjen e re teknologjike që do të përdoret nga astronautët e NASA-s në misionet e ardhshme drejt Hënës.

Bëhet fjalë për një kostum të brendshëm të avancuar, i zhvilluar në bashkëpunim me Axiom Space, i cili do të vishet nën skafandrat hapësinore të astronautëve. Veshja përmban një sistem të integruar ventilimi dhe ftohjeje, i projektuar për të ruajtur temperaturën e trupit dhe për të garantuar komoditet gjatë qëndrimit në sipërfaqen e Hënës.

Produkti i ri, i njohur si Liquid Cooling and Ventilation Garment (LCVG), u prezantua në New York dhe konsiderohet një element kyç i skafandrave që do të përdoren në programin Artemis të NASA-s. Sipas kompanive partnere, teknologjia e re është krijuar për të mbështetur astronautët gjatë ecjeve hapësinore që mund të zgjasin deri në tetë orë.

Kjo nuk është hera e parë që Prada bashkëpunon me industrinë hapësinore. Në vitin 2024, kompania prezantoi së bashku me Axiom Space skafandrin e jashtëm që pritet të përdoret në misionet e ardhshme hënore të NASA-s, duke e shndërruar markën italiane në një nga emrat më të përfolur në kryqëzimin mes modës dhe teknologjisë.

Ekspertët e industrisë e shohin këtë projekt si një shembull të mënyrës se si njohuritë e fituara në sektorë të ndryshëm mund të kontribuojnë në eksplorimin hapësinor. Ndërkohë, për Prada-n, ky bashkëpunim përfaqëson një mundësi për t'u pozicionuar si një markë inovative që shkon përtej kufijve tradicionalë të modës./ Reuters

Lini një Përgjigje

Më të lexuarat

Blog Tema

Powered by Tomorrow.io