FOTOT/ Pistë Olimpike e Atletikës në Parkun e Liqenit, Veliaj: Mbajtëm premtimin që i bëmë Luiza Gegës, fantastike për sportistët e rinj

15 Gusht 2022, 12:26Sport TEMA

FOTOT/ Pistë Olimpike e Atletikës në Parkun e Liqenit, Veliaj:

Pista Olimpike e vrapit dhe kërcimit është drejt përfundimit të punimeve për të pritur sportistët profesionistë në mes të Parkut të Liqenit të Tiranës. Pista me 6 korsi është realizuar sipas standardeve të atletikës dhe është në pritje të certifikimit për t’u përdorur edhe si hapësirë për aktivitete ndërkombëtare.

Kryebashkiaku Erion Veliaj, i cili inspektoi punimet në Pistën Olimpike, u shpreh se Tirana po bën çdo përpjekje që edhe vitin e ardhshëm të jetë kryeqytet i Europës, këtë herë për Sportin, dhe se investime të tilla janë një pajë e vyer për evente që afrojnë të rinjtë me sportin dhe gjithashtu i shërbejnë edhe ekonomisë në kryeqytet. Po ashtu, ai kujtoi se kjo pistë është dhe një premtim i dhënë një prej kampioneve shqiptare si Luiza Gega.

“Ky ka qenë një vit i jashtëzakonshëm për Tiranën, jo vetëm për faktin se jemi Kryeqyteti Europian i Rinisë, por edhe sepse u munduam që, përveç aktiviteteve rinore, të kemi edhe disa investime që do ngelen edhe kur të mbarojë ky titull. Kjo hapësirë është një prej këtyre investimeve që do ngelen edhe kur të mbarojë viti kalendarik i kryeqytetit të Rinisë. Një premtim që ia kam bërë publikisht Luiza Gegës. Tani më vjen mirë që jemi te Pista e Atletikës dhe ajo është duke u përgatitur për Kampionatin Europian të Atletikës në Mynih, ku shpresojmë që të dalë faqebardhë. Gjykoj që kemi bërë një investim fantastik,” tha ai.

Kryetari i Bashkisë së Tiranës nuk la pa përmendur baltën e politikës që, sipas tij, si kudo, edhe në këtë investim, nuk i ka kursyer shpifjet. “Unë e di që në Tiranë nuk bëhen gjërat kollaj, politika është shumë toksike, të gjithë politikanët, ish-kryeministra, ish-presidentë, duan të bëhen të gjithë brigadierë komunale. Nuk u bë as gradaçelë, nuk u bë asnjë shkulje pemësh. Është ndoshta rasti i dytë, përveç pistës së Nike në Seattle, ku praktikisht natyra gërshetohet me atletikën,” u shpreh Veliaj.

Kryebashkiaku nënvizoi se me këto investime, por edhe me mbështetjen që i bëhet sportistëve sot në vendin tonë, janë të gjitha kushtet për të krijuar edhe kampionë të rinj të cilët do ndjekin rrugën e suksesit të Izmirit dhe Luizës. “Ne kemi Izmirin dhe Luizën si etalonët e arritjeve tona në atletikë, por në fakt na duhet të fillojmë që tani përgatitjet me brezin e ri. Na duhet që në dallim nga ata që u rritën në kushte spartane, pa shpërblime dhe pa infrastrukturë, sot që shpërblimet janë bërë automatike për medaljet, na kanë ikur të gjithë alibitë pse nuk japim dot maksimumin. Duhet vetëm përkushtim dhe disiplinë, një gjë që secili e ka individualisht, pra trajneri dhe sportisti. Pjesa tjetër është zgjidhur nga shteti, si nga qeveria, si nga Bashkia,” përfundoi Veliaj.

Në këtë pistë atletët mund të ushtrojnë disiplina të ndryshme të sportit të atletikës si 100 metra, kërcim së gjati, distancat e mesme, distancat e gjata, vrapim me pengesa, stafetat etj,.

 

3 Komente

  1. V
    Vito mashtruesi, shoku i Nikos

    Po hajduti i bashkise, kete kishte problem Tirana. Apo ndertimet qe po ben Cet Kastrati me Met Hasen te parku mbas Sheratonit kur do inagurohen? Piramida kur do mbaroje? Hotel Dajti kur do mbaroje? Ate rrugen tek Garda kur po e mbaron ? Hajdut !

    1. L
      Lasgushi

      Shyqyr,me ne fund. Ishim turpi I dheut se ketu r katandisen vendin Meksat,Berishet,Nanot etj.Turp 100 here turp Shqiperia.I vetme shtet ne Europe,pa piste e ambjente atletike. Prandaj,edhe mburja e Erjonit,eshte turp,per nje ambient,te manget si ky.

      1. G
        Genti

        Shqipëria si në ç'do fushë ështp mbrapa nga vendet fqinje për të mos përmendur vendet e Unionit. Erioni përmen shpërblimet e nunguara ose infrastuktutën e dobët gjatë rregjimit të kaluar por harron se gjithë infrastruktura sportive dhe gjithë shkollat dhe brezat e sportistove u ngritën nga zeroja në atë kohë. Ndërsa sot që baza ka qënë e ngritur dhe e fortë është bërë shumë pak në këtë drejtim dhe kjo vlen edhe për kulturën,shëndetësinë,arsimin,bujqësinë,industrinë, energjitikën dhe ushtrinë që jo vetëm kanë ngelur në vend por kanë shkuar hapa mbrapa krahasuar me dikur. Mburrja është e kotë. Duhet vetëm punë dhe vetëm punë. Ndërkohë që vjedhja dhe abuzimet bëjnë kërdinë.

        Lini një Përgjigje