“Luftën” kundër të ashtuquajturave Big Tech, Franca po e shtrin edhe në tregun e librit. Deputetët francezë do të shqyrtojnë kësaj jave një ligj të ri, i cili ndalon Amazon të ofrojë dhe dorëzojë librat e shitur me kosto transporti zero. Ligji ka mbështetjen e presidentit Macron dhe synon t’i mbrojë libraritë fizike nga konkurrenca e Amazon, e cila ua ka reduktuar shitjet.

Kjo është e fundit në një seri lëvizjesh që ka ndërmarrë Franca për të mbrojtur kulturën vendase nga sfida e firmave të huaja të teknologjisë, përfshirë mbështetjen e botuesve të lajmeve kundër Google dhe Facebook dhe mbështetjen e transmetuesve televizivë kundër Netflix.

Géraldine Bannier, një deputete nga partia aleate e Emmanuel Macron, MoDem, qëndron pas këtij ligji.

Drafti që do të rishikohet nga komiteti i kulturës i Asamblesë Kombëtare parashikon një tarifë minimale për shpërndarjen e librave. Me fjalë të tjera, premtimi i Amazon për dërgimin praktikisht falas të librave do të bëhet i paligjshëm në Francë.

Gjiganti amerikan i tregtisë elektronike është kundër këtij ligji të ri, sipas zyrtarëve të shumtë francezë, të cilët thonë se firma ka lobuar kundër tyre.

Politikanët francezë i kanë mbrojtur prej kohësh libraritë përballë kompanisë amerikane të teknologjisë – e përshkruar dikur nga kryebashkiakja e Parisit Anne Hidalgo si “vrasësja e librarive” – dhe disa madje kanë bërë thirrje për bojkotimin e Amazon.

Franca ka 3 300 librari dhe në vitet 2006-2019 shifrat tregojnë rënie për shkak të konkurrencës së shitësve me pakicë në internet si Amazon dhe Fnac.

1 komente në “Francë, ligj kundër Amazon për të mbrojtur libraritë”

Taulant says:

2 Tetor, 2021 07:44 te 7:44 am

Nje shkrim i paqarte dhe konfuz. Eshte e thjeshte analiza qe mund ta beje cdo gazetar kerkues. Ne periudhen kohore te nje viti, shiko levizjet e cmimeve ne bursen nderkombetare te drithrave per konsum njerzor. Grumbullo nga doganat cmimet e importit dhe te cilesise se drithrave qe kane sjelle furnitoret. Bej krahasimet per te pare nese ndryshimi i cmimeve te importit eshte eshte reflektuar apo jo ne cmimet brenda vendit nepermjet nje tabele dhe tregoja publikut. Une i kam bere keto dhe me rezultoje qe furnitoret ne menyre te sforcuar kane bere perpjekje per te mos rritur cmimet e shitjes, megjithe ritjen e kostos se blerjeve nga importi. Por vjen nje moment qe do te duhet te respektosh ligjesite kapitaliste te kerkeses dhe ofertes. Kjo qe po bejne mediat eshte spekullim per opinionin.

Përgjigjjuni