Serbia nderon Putin me paradën e parë ushtarake prej vitit 1985

Serbia, kandidate për anëtarësimin në Bashkimin Evropian, është duke i dërguar një mesazh konfuz Brukselit me paradën ushtarake që do të zhvillojë sot, ku i ftuari kryesor do të jetë presidenti rus, Vladimir Putin.

Vendimi për të ftuar Putinin si figurën kryesore vjen në një moment delikat për Serbinë, jo vetëm për faktin se marrëdhëniet mes Rusisë dhe Perëndimit janë në tension për shkak të Ukrainës, por edhe për faktin se, pas vitesh të tëra shtyrjesh, Bashkimi Evropian hapi bisedimet e anëtarësimit me Serbinë vetëm 10 muaj më parë.

Parada ushtarake përkujton sot zyrtarisht 70-vjetorin e çlirimit të Beogradit nga partizanët komunistë jugosllavë dhe Ushtria e Kuqe nga pushtimi gjerman.

Por, kritikë nga opozita serbe thonë se ngjarja është më tepër një nderim për vetë Putinin.

Kjo ngjarje u zhvendos nga përvjetori aktual, që është 20 tetori, dukshëm për të mos penguar axhendën e Putinit.

Zhvillimi i saj u njoftua zyrtarisht pasi lideri i Kremlinit konfirmoi pjesëmarrjen.

“Unë dyshoj se dikush në Moskë… do ta zhvendoste datën e paradës së 9 Majit, që shënon përfundimin e Luftës II Botërore”, thotë Gordana Comiç, deputete e Partisë Demokratike në opozitë.

Ndërkohë, zyrtarë nga Partia Progresive e kryeministrit Aleksandar Vuçiç dhe nga qeveria e tij hedhin poshtë paralajmërimet sipas të cilave nderimi i Putinit gjatë kohës kur në Ukrainë ka një konflikt, do të dëmtonte pozicionin e Serbisë ndaj Perëndimit.

”Vizita e Putinit është një shenjë se politikat e Serbisë vlerësohen”, thotë Zoran Babiç i kësaj partie.

“Mbi të gjitha, ne kërkojmë miq në të katër anët e botës, ne promovojmë ekonominë serbe”, tha në parlament i sipërcituari.

“Putini i ka kushtuar gjithmonë vëmendje Serbisë”, thotë nga ana e tij ambasadori rus në Beograd, Aleksander Çepurin.

“Bashkëpunimi me Serbinë është i dobishëm për të, për Rusinë, për Bashkimin Evropian dhe për gjithë botën”, thekson ai.

Që nga koha e shpërthimit të krizës ukrainase, Serbia ka mbështetur integritetin territoril të ish-republikës sovjetike, por nuk ka dënuar aneksimin e Krimesë nga Rusia dhe as i është bashkuar sanksioneve ekonomike të Perëndimit kundrejt Moskës.

Zyrtarët e Bashkimit Evropian kanë thënë se presin që gjatë bisedime të anëtarësimit Serbia të bashkojë politikën e saj të jashtme, përfshirë qasjen ndaj Rusisë, me atë të bllokut.

Megjithatë, ende nuk ka një datë për këtë çështje.

Kritika të ashpra për zhvillimin e paradës për Putinin kanë ardhur edhe nga ambasadori amerikan në Beograd, Michael Kirby, i cili muajin e kaluar theksoi se edhe trupat ukrainase bënin pjesë në brigadat e Ushtrisë së Kuqe që luftuan për çlirimin e kryeqytetit serb.

”Ndërkohë që Serbia mund të ketë marrëdhënie të mira me Rusinë dhe Kinën, ajo duhet të kujtojë se Kina nuk ka sulmuar askënd, ndërsa Rusia po”, thekson Kirby.

Parada e fundit ushtarake në Beograd është zhvilluar në vitin 1985 nga ish-Armata Jugosllave.

Gjashtë vite më pas Jugosllavia dhe ushtria e saj u ndanë.

Sot në paradë do të marrin pjesë 4 500 ushtarë, 300 mjete, përfshirë tanke, si edhe 50 avionë.

Putini do të mbërrijë me një enturazh prej 150 personash, përfshirë biznesmenë të suksesshëm që do të kërkojnë zgjerimin e bashkëpunimit me Serbinë, çka mund të shkaktojë habi në Bruksel dhe Uashington.

Në muajin gusht, Bashkimi Evropian paralajëroi Serbinë kundër zëvendësimit të shërbimeve dhe të mallrave perëndimore me tregjet ruse, pas vendosjes së sanksioneve Moskës për shkak të qëndrimit ndaj Ukrainës.

Por, Rusia ka interesa afatgjata biznesi në Serbi, veçanërisht në energji dhe sistemin bankar. Moska dhe Beogradi shpresojnë të zgjerojnë bashkëpunimin e tyre në sektorin energjetik me gazsjellësin ”South Stream”. (Boris Babiç/dpa-atsh)

Nga futbolli te rivaliteti etnik në Ballkan

19:29 Rajoni

Dy fytyrat e Ivica Daçiç

16:20 Rajoni

Vuçiç: Ne mbrojtëm fytyrën tonë, paralajmëruam BE-në se shqiptarët po përgatisnin një incident serioz

14:43 Rajoni

Krasniqi: Serbët nuk pranojnë genocidin, si mund të pranojnë dhunën për një ndeshje futbolli?

13:12 Rajoni

Enver Hoxhaj, kryeministri i ri i Kosovës?

12:26 Rajoni

Ja si reaguan grekët, maqedonasit e malazezët për flamurin e Shqipërisë etnike

12:15 Rajoni 1 koment

Daçiç: Ishte provokim politik, s’kemi asnjë përgjegjësi për ndërprerjen e ndeshjes

10:07 Rajoni

Haradinaj e krahason Thaçin me një diktator

18:23 Rajoni

Ngërçi politik, SHBA anulon vizitat diplomatike të planifikuara në Kosovë

18:21 Rajoni

Serbët përdorin aeroplanët ushtarakë për të frikësuar futbollistët shqiptarë

18:19 Rajoni