Dhoma e gjumit, e përgjakur (mbi një krim në vitet ’70)

Dr. Adem Harxhi

Nxjerrë nga fletoret e viteve ’70 *

Ora dy e tridhjetë pas mesit të natës. Një ekip kirurgësh punonte në trupin e masakruar të një gruaje të re. Dymbëdhjetë plagët përshkruese në gjoksin dhe barkun e gruas, dukeshin si gojë të hapura që villnin pa pushim gjak dhe dhimbje. Duart dhe bluzat e mjekëve ishin mbuluar nga gjaku dhe ata ndjenin se shkelnin në gjak.  Gjaku që transfuzohej nëpër disa tuba, dilte në po atë sasi nga vrimat e hapura nëpër trup.  Çdo gjë ishte tmerruese.

E kishin sjellë në spital disa komshinj, që në atë orë të vonë ishin tmerruar nga lebetitjet e dy vajzave të saj. Askush nuk e dinte sekretin e këtij krimi. Burrin e ndaloi policia. Vajzat e terrorizuara nuk ishin në gjendje të flitnin. Komshinjtë flitnin plot respekt për çiftin. “Një familje për ta patur zili”, thoshin ata. Ai ekonomist në një ndërmarrje, ajo mësuese. Dy vajzat, ishin shembullore.

Në orën tetë në mëngjes, pas operacionit, pa ndjenja e çuan në dhomën e reanimacionit. Hetuesit që prisnin jashtë sallës, u larguan të dëshpëruar, sapo morën vesh se gruaja gjatë gjithë kohës ishte pa ndërgjegje.

Në orën dhjetë, gruaja e re vdiq.

Cila është e vërteta për këtë vrasje? Kishin kaluar disa muaj, kur neurologu i spitalit,  që ishte thirrur nga hetuesia si ekspert, më tregoi ç’kishte ndodhur atë natë.

Besniku ishte martuar para 12 vjetëve me Lilianën dhe i donte shumë gruan dhe dy vajzat e tij. Ditën e parë që e takova, ai më tha, se Liliana ishte për të personi më i rëndësishëm në botë. Ajo krijoi familjen, kujdesej për vajzat dhe mirëmbante shtëpinë. Me pak fjalë, sipas tij, ajo ishte perfekte në çdo gjë. Ai më tregoi për fëmininë e tij. Për babanë që i kishte vdekur në moshë shumë të re. Më foli për sukseset e tij në punën si ekonomist. Më foli për martesën e tij me Lilianën. Më tregoi se ishte i kënaqur dhe gëzonte martesën dhe dashurinë e dy vajzave. Kishte punë të mirë dhe rehati në shtëpi. Të gjithë flisnin mirë për ta.

Në takimin e dytë, ai pranoi vetëm dy gjëra të vogla, që qëndronin si re të errëta në qiellin e kaltërt të jetës së tij. Në vitet e para të shkollës, somnambulizmi, e kishte turbulluar fëmininë e tij. Me shumë ndrojtje ai më tregoi për diçka tjetër, për dëshirën e tepruar  për të masturbuar. “Masturbacioni ishte dashnorja ime e parë”, më tha ai “dhe mbeti e tillë gjatë gjithë jetës, edhe pasi u martova. Ishte njëri nga të paktat pasione të mia”

Sipas Besnikut, një ditë Liliana e “kapi” duke masturbuar në dhomën e gjumit. Tërbimi i saj nuk mund të përshkruhej. Njësoj, sikur ta kishte kapur në flagrancë me një grua tjetër. -“Nuk do të hysh më në dhomën time të gjumit”, i kishte bërtitur ajo. “Deri një natë më parë”, më tha ai, “ajo kishte qenë dhoma e jonë e gjumit.”

Pas disa ditësh kjo krizë fillestare u zbut, por Liliana, kurrë, nuk ia fali.  Ajo humbi çdo interes për seks me Besnikun.

Në një moment gjatë bisedës ai më tha se, Liliana merrej me të gjitha problemet financiare të familjes, me një kompetencë mahnitëse. Ajo i shpenzonte paratë në mënyrë të mençur dhe i shpenzonte të gjitha. Ai më tregoi se në punën e parave ata kishin bërë një ndarje model të punëve. Ai i fitonte, ajo i shpenzonte. Ai i jepte rogën komplet, ajo çdo mëngjes i jepte paret që i duheshin për një kafe. Kjo atij i dukej krejt në rregull, sepse “ajo dinte si t’i përdorte lekët”. Ai ishte i kënaqur që Liliana ishte një amvisë e mirë.

Kur unë e pyeta, se a ishte Liliana krenare për burrin ai, pas një heshtje disi të zgjatur më tha se, Liliana, kurrë, nuk ka qenë krenare për të. Ajo e konsideronte atë të padenjë për një grua të zgjuar, të bukur dhe nga një familje e ngritur, siç ishte ajo. Unë për të kam qenë një fshatar i pagdhendur. Ajo nuk ishte nga ato gra që japin buqeta, më tha ai. Liliana nuk ishte as nga ato që dinë të thonë faleminderit.

Gradualisht, ai u shtrua në bisedë dhe u hap më shumë. Më tha se, çdo gjë që ai bënte konsiderohej, gjithnjë, si një detyrim që ai kishte për familjen dhe nuk vlerësohej, ndërsa, çdo gabim dhe dështim i tij, kurrë, nuk kalonte pa u vënë re, e pa u kritikuar. Ajo nuk pyeste për opinionin dhe interesat e tij. Kurrë, nuk kërkohej mendimi i tij për problemet e familjes.  Kurrë, nuk e pyeti ajo nëse duhej diçka në familje. Ajo blinte çdo gjë që donte.  “Kjo, gjithmonë, ishte një blerje perfekte”, më tha ai.  Kjo nuk do të thotë se Liliana vepronte nxitueshëm pa u këshilluar.  Ajo konsultohej, thuaj çdo ditë, me nënën e saj. Çdo ditë dy orë i kalonte tek nëna. Ishte vajzë e devotshme që ndante çdo gjë me nënën, e cila ishte një grua, vërtet, shumë e fortë.

Kur e qarkulluan në një punë tjetër me pagë më të ulët, ato të dyja, nuk bënë asnjë ndryshim të shpenzimeve, që t’i përshtateshin gjendjes së re financiare. Liliana dhe nëna e saj, vazhdimisht, bënin presion që ai të sillte më shumë, ndërsa ato vazhdonin të shpenzonin po njësoj. Me qëllim që të përmirësonte konfliktin me Lilianën dhe për të treguar se fitonte diçka më shumë, u zhyt në borxhe.

“Në këtë situatë”, më tha ai, “çifti ‘perfekt’, vetëm, vazhdonte të grindej”. Liliana e vinte përpara me orë të tëra, deri sa i mërzitur, i dëshpëruar, i nevrikosur dilte nga dhoma ose nga shtëpia. Këto skena po përsëriteshin shpesh. Zëniet e tyre nuk rregullonin asgjë. “Në njërën nga këto zënka, një telefonatë e vjehrrës”, me tha ai, “e rëndoi edhe më shumë situatën.”

Liliana, që nga ajo ditë e mallkuar që e kapi duke masturbuar, ishte larguar nga jeta seksuale.  Këtë sjellje e përkrahte edhe nëna e saj. Shkonin të flinin, duke thënë vetëm “natën e mirë”.  Kjo përsëritej çdo natë. Ajo nuk thoshte asgjë dhe të dy i zinte gjumi. Ajo nuk kishte më interesa seksuale, që janë të zakonshme për një çift. Shumë rrallë ajo e lejonte, por zënkat për lekët i shuan, tërësisht, pasionet seksuale.

Në një takim tjetër, Besniku i kish thënë neurologut, se kërkesat e Lilianës lidhur me punën e tij u bënë torturuese. Çdo ditë përsëriteshin pyetjet: Ç’bëre për punë? Mamaja të tha që të mos e lesh pas dore këtë punë… A provove të takosh sekretarin? A bisedove me mikun e kushëririt,  siç të thashë të bëje?. Ç’bëre me atë që bisedove dje? Ti duhej t’i telefonoje atij përsëri!”

Prej kohësh, ai ndjente dhimbje të forta koke sa herë hynte në shtëpi. Por çdo ankesë e tij ishte drithë për mullirin torturues: “Ç’është kështu me ty?”. “Prapë ti i sëmurë?”. “Ku po shkon, unë dua të flas me ty?” “Pse shkon në nevojtore?” “Ç’janë këto barna?”. “Pse të dhëmb koka vazhdimisht?”

Martesa e tyre ishte në vështirësi serioze. Marrëdhëniet e tyre ishin të këqija dhe çdo ditë bëheshin edhe më të këqija, por ai nuk e kuptonte këtë, sepse ato ndryshuan shumë gradualisht. Tani, ai e kishte kuptuar që gruaja ishte shumë e ndjeshme dhe mërzitej shpejt, kur gjërat nuk shkonin mirë. Por atij i duhej pak pushim, që të largohej nga dhimbja e vazhdueshme e këtyre marrëdhënieve. Gjatë vitit të fundit, në marrëdhëniet e tyre kishte patur periudha që ai i quante kohë të mira. Dilnin, ndonjëherë, për t’u darkuar në restorant, prisnim miq në shtëpi. Liliana organizonte pritje shumë të hijshme.

Kur unë e pyeta, rrëfen neurologu, “Siç duket, disa momente i kalonit me njerëzit që i donit?. Ai u përgjigj: “Jo. Liliana nuk çante kokën për miqtë e mi. Ajo kënaqej me njerëzit që ajo donte. Paragjykimet e saj sociale, e kishin mërzitur familjen time, të cilët i priste gjithmonë me vetulla të ngrysura. Ata i ftonte vetëm për raste që ishte e detyruar. Unë isha i izoluar dhe gjithnjë e më shumë u tërhoqa në marrëdhëniet e mia vetëm me gruan.”

Kur neurologu e pyeti, si ndjehesh? A je i depresuar? A ke dashur ndonjëherë ta godasësh Lilianën? Ai u përgjigj: “Jo, kurrë, nuk e godita. Por, ka patur shumë momente që nuk prisja dot sa të dilja nga dhoma. Vetëm desha të largohesha. Më dukej sikur i gjithë trupi do të shpërthente. Por nuk isha i zoti të bëja asgjë. Mundet që përplasja derën. Njëherë godita murin. Kjo ishte gjithçka që bëja. Ndjeja se e kisha dashur dhe vazhdoja ta doja. Çuditërisht, gjatë kësaj periudhe nuk kisha pagjumësi, ose mungesë oreksi, nuk u dhashë pas alkoolit. Jeta ime ishte e qetë, me sipërfaqe të shkëlqyer.”

-“Në gjithë këto vite, nuk mendove asnjëherë për divorc?”, e pyeti neurologu.

“Absolutisht, jo. Kurrë nuk e pata këtë ide.! Kjo do të thoshte të humbisja çdo gjë që kisha, familjen, shtëpinë, shoqërinë, punën. Për Lilianën, gjithmonë, kam ndjerë dashuri. Sinqerisht, nuk mbaj mend të kem ndjerë urrejtje, nuk mbaj mend të jem zemëruar për kohë të gjatë.”, u përgjigj ai.

Pas mesnatës, një natë përpara 12- vjetorit të martesës, Liliana ishte goditur për vdekje në krevatin e saj. Ja çfarë tha ai lidhur me këtë.

“Atë mbrëmje, unë erdha në shtëpi si zakonisht. Ajo, unë dhe dy vajzat hëngrëm darkën. Në orën nëntë e gjysmë, telefonoi vëllai im dhe më kërkoi lekët që më kishte dhënë borxh. Kjo bëri që gruaja të mos linte gjë pa thënë për vëllain dhe gjithë familjen time, veçanërisht, lidhur me paratë. Nga ora dhjetë e gjysmë deri në njëmbëdhjetë gruaja foli në telefon me nënën e saj, duke përsëritur sharjet për familjen time. Pas kësaj ajo u shtri në krevat në krahun tim dhe më kujtoi për të dhjetën herë, se nesër ditën e përvjetorit të martesës, duhet të sjell në shtëpi frigoriferin. Ajo fiku dritën, ndërsa, unë, si zakonisht, i thashë natën e mirë. Ajo u përgjigj në të njëjtën mënyrë.”

Ai besoi se fjeti. Por jo. Ai u ngrit nga shtrati, shkoi në kuzhinë dhe mori thikën.

“E gjitha që mbaj mend” tha ai “ishte që po ecja dhe shikoja ata të dy në dhomë. Ishte si një ëndërr. Ai ishte me mjekër. Në dhomë kishte rrëmujë të madhe. Shikoja një të huaj në krah të gruas, që i nguli asaj thikën që mbante në dorë. Pashë në tmerr dhe frikë se si thika u ngul dymbëdhjetë herë në gjoksin dhe barkun e gruas, një goditje për çdo vit martese Pastaj burri iku. Ai e la dhomën e gjumit në çrregullim. Sirtarë të thyera dhe plaçka të përhapura nëpër dhomë. Pikturat të thyera dhe teshat të hequra nga varëset.”

Vetëm pas tre ditësh, i shtrirë në një qeli burgu, ai kuptoi se nuk kishte keqbërës në shtëpi. Dora që mbante thikën dhe e ngulte atë në trupin e Lilianes, ishte dora e tij.

“Më vonë, janë bërë shumë ekspertiza mjeko-ligjore për këtë rast,” , më tha neurologu, “por akoma nuk është vendosur nëse Besniku është i papërgjegjshëm për krimin.  Pafajësia për një krim kaq të rëndë, nuk do të pritej mirë nga opinioni”.

-Për historinë e tij, Besniku, foli vetë. Unë vetëm përsërita fjalët e tij, tha doktori.  Mundet, që ato nuk janë e vërteta, por ato janë aq afër saj, sa nuk mund të gjejmë një të vërtetë tjetër më të besueshme për këtë vrasje.  Me gojën e tij, ai tregoi një nga arsyet pse njerëzit vrasin.”

Është e frikshme mendova, që shumë njerëz vriten për arsye të “parëndësishme”. Si mund ta vrasësh atë që ka patur vend të rëndësishëm në jetën tënde emocionale? Si mundet që një nënë të vrasë fëmijën e saj?.  Si mundet që një burrë të vrasë një grua qe e ka dashuruar thellësisht? Por, e vërteta është se, shumica e vrasësve dhe viktimat e tyre, gjithnjë, kanë patur më parë një lloj lidhje, ose marrëdhënie. Diku kisha lexuar se në vendet e përparuara, dhoma e gjumit zë vendin e dytë, menjëherë, pas autostradave, si skenë e përgjakur. Me sa duket, është paaftësia  e të dyve për të vazhduar të jetojnë bashkë, që i shtyn të kryejnë  ketë akt të tmerrshëm. (DITA)

*Nga libri me ese i Dr.Harxhit: TIM BIRI

FOTOT/ Ish-kryeministri Aleksandër Meksi siç nuk e keni parë, zgjedh të festojë Dhjetorin ’90 me mbesën...

13:35 Politika

REPLIKAT/ Komentuesit: Ishallah nuk na gënjen. Rama: Po doni rrena, ua jap unë adresën

11:42 Politika

Rrëfehet Majlinda Bregu: E ardhmja ime në PD, "oferta" nga Rama (dhe një shpotitje për Lulzim Bashën)

11:23 Politika

VIDEO/ Si e priti Gjin Gjoni zgjedhjen në Kolegjin Zgjedhor, në krah të Nishanit

09:59 Politika

“Shenjtëria” Koço Kokëdhima poston foto dhe video të një gruaja që i puth dorën

09:34 Politika

Polici i burgut që i shërbente Fatos Nanos: Më kë rrinte, si sillej i burgosuri “VIP” i Berishës, si e morën nga qelia më '97...

23:00 Politika

FOTO LAJM/ Në kulmin e tensioneve, Shqipëria, Greqia dhe Turqia bëhen bashkë (dhe duken miqësorë)

19:45 Politika

Rama: Një tjetër vlerësim kuptimplotë

18:32 Politika

PD: Lulzim Berishën e liroi… Edi Rama

18:25 Politika

VIDEO/ Mimi Kodheli flet për koalicionin PS-LSI dhe i përgjigjet homologut dhe mediave greke për sulmet e fundit

18:06 Politika