Te fundit
Politika s’ka moral, por kjo jona s’ka edhe logjikë
27 Korrik 2024, 20:19Blog
TEMA
Nga Ben Andoni
Ndryshimi i ri në Kodin Zgjedhor e ka ngazëllyer politikën e dy krahëve. Megjithë tonet “e ngritura” nga ana e opozitës në fund është miratuar dokumenti, që kushtëzon listat zgjedhore me 1\3 e kandidatëve, që zgjidhen nga kryetarët. Paçka se çfarë u tha për vitin 2008, marrëveshja është më e fortë sot, që Berisha është i mbyllur në shtëpi me masë arresti, ndërsa Rama vazhdon angazhimet ndërkombëtare me një axhendë, që mund t’ia ketë zili çdo funksionar i vendeve të fuqishme, që merret ekskluzivisht me politikat e jashtme.
Ashtu si pritej dhe parashihej, PS dhe PD, dy partitë e mëdha, do kenë mundësi që brenda një liste, që përbën një numër bajagi të madh të të afërmve (lexo shtojcat), besnikëve të kryetarit të vendosë një grup deputetësh, që 100% do jenë fitues. Njeriu i thjeshtë kupton me këtë rast dhe nga përcillet niveli i legjislaturave tona, por edhe faktin se pse performanca e legjislaturave të fundit është aq e dobët për të mos thënë katastrofale. Shembujt janë tej groteskut me deputetë që nuk dinë të lexojnë fjalimet, me tollovinë qesharake dhe bashkëpunimin njëzëri për rrogat e tyre!! Pak logjikë është kërkuar me kohë që partitë të rrisnin cilësinë e ideologjisë që përfaqësojnë, megjithëse publiku e di mirë, që partitë tona janë thjesht elektorale dhe më shumë se ideologjia u duhet një dokument programi për të justifikuar organizimin politik dhe votat e ditës së votimit. Prandaj, përpjekja më e madhe e individëve që duan karriera politike është të futen në suazën e pëlqimit të kryetarit, të artikulojnë si ai (mundësisht ta imitojnë dhe me gjestikulacione: Shiko Nokën dhe të tjerë te PD dhe po kaq te PS me Spiropalin si arketip), t’i tundin palmën rehatimit të tij. Nuk ka rëndësi dinjiteti dhe çdo gjë tjetër, që pason kanonet morale. Për hir të së vërtetës, politika nuk ka moral, por ne si demokraci e re e duam dhe e ushqejmë ende gënjeshtrën e demokracisë së kulluar. Qysh në korrikun e vitit 2024 çdo njeri mund të gjykojë lehtë për legjislaturën e vitit 2025 dhe atë që do t’i bëjnë vendit personazhet e zgjedhura (lexo të rizgjedhura), që kaluan dhe vetë groteskun me kinse justifikimet dhe ruajtjen e një domeni politik, që mund ta përkthesh në një bunker politik, i cili nuk mund të depërtohet.
E pasens dhe paraqitja e Tabakut, Alizotit, Gjekmarkaj dhe shumë individëve të PD-së, që mundohen të flasin në emër të parimeve, por që shpesh harrojnë se logjika nuk shkon kurrë pa moralin. Dhe, më shqetësuese është se apeli i madh i shumë zërave për të furnizuar PD-në me gjak dhe prurje të reja mund të quhet i dështuar, sepse gjithçka lidhet me shpurat, që i rrinë pas Berishës e mundohen të artikulojnë thjesht për interesin e tij. Sa për PS-në harroje, mjafton mandati, sa i përket moralit. Këtu kupton kinse metamorfozat e shumë prej deputetëve të PD-së, që nga kritikë të thekur lëshuan parimet dhe moralin në emër të zgjedhjes në parlament në votimet e vitit 2025. Edhe pse kjo dihej mirë dhe qartë.
Megjithatë, ka shumë zëra që e justifikojnë dhe e mbrojnë Kodin. Kështu sipas statisticienit Zaloshnja: “… Kodit Zgjedhor të ri, 47 nga këta 80 deputetë do të ishin të paracaktuar nga kryesia e PS-së në listat e mbyllura. Ndërsa rreth 33 deputetë të tjerë do të përcaktoheshin nga votuesit e thjeshtë socialistë, direkt nga listat e hapura…Edhe kryesia e PD-së, si çdo parti tjetër, do të ketë të drejtën të hartojë një listë të mbyllur me 47 kandidatë të paracaktuar. Dhe në qoftë se PD arrin të sigurojë 47 mandate në zgjedhjet e ardhshme, të gjithë ata do të bëhen deputetë”. Por, a ka ndonjë numër të llogaritur të më shumë se 40 deputetë nga dy partitë sëbashku që artikulojnë, mbrojnë kauza dhe shtrojnë problematika tejet interesave të partive të tyre për vendin në parlament? Madje, edhe ai grup aktiv në parlament, përveç fare pak emrave, është krejtësisht i lexueshëm, sepse lexon deridiku mendimin e Ramës dhe Berishës, por kuptohet me forma të tjera.
Në fund të kësaj legjislature vërtetuam për të disatën herë se populli është thjesht votues dhe ata (politikanët) mbeten jo vetëm numërues por edhe përfitues. Shiko indikatorët ekonomikë të Shqipërisë dhe e kupton më së miri këtë fakt. Nuk ia vlen më të indinjohesh, por të shikosh se ku na ka katandisur logjika e politikës sonë. Poeti amerikan Walt Whitman, në një kohë tjetër, duke iu referuar vendit të tij për krizën politike shkruante me vargje një mendim poetik: “Edhe pse ti, o mik, mendon ende se demokracia ishte vetëm për zgjedhje, për politikë dhe për emër partie?!” Dhe, pastaj vazhdonte sesi do të donte të ishte: “Unë them se demokracia është e dobishme vetëm të përshkojë e të vijë në lulen dhe frytin e saj të vërtetë në sjellje, në format më të larta të ndërveprimit midis [njerëzve] dhe besimeve të tyre: në fe, letërsi, kolegje dhe shkolla, pra, demokraci të jetë në të gjithë jetën publike dhe private…”. Anipse, demokracia jonë është tejet larg këtij koncepti, ajo na ka treguar se: politika s’ka moral, kurse kjo jona s’ka madje edhe logjikë në flirtet e saj, qepur me pe të zi, kurse ne publiku mbetemi një hiç, që votojmë qorrazi për nulitetin, që na drejton. (Javanews)
5 Komente
Lini një Përgjigje
Më të lexuarat
24 oret e fundit
Javen e fundit
Blog Tema
Ti Ben ke koh qe ju fryn gjerave te pakuptimta edhe ti e ke shitur shpirtin diku.Po votimi per partit nuk eshte demokratike dhe aq me keq qe per partit do votojn vetem 1/3?Po te pyes ty Ben kur ne kishem 100 Zona ne promotional kush I vendoste kandidatet ?po ta them une KRYETARI .po pse e hoqem ate system sepse po beheshin deputes vetem bizesmen te pa shkoll dhe me pare shum
Edhe ne mos te dalim te votojme hiç, dhe le te mbajne ato secili nga 47 deputetet e tyre, qe te hajne kokat me njeri tjetrin. Kjo nuk eshte demokraci.
O Beni ! Tani qe bie era lecke e djegur filluat te flisni hapur . Ti dhe shoket e tu ,te Medjave, jeni shume vone .Zogji i ka bere folet dhe zogjte jane gati te vijne ne pushtet pa marr akoma krahe te fluturojne .Ne listat e mbyllura jane dashnoret dhe lepirsat e dyshes Rama-Berisha .
Ne nuk jemi demokraci funksionale, dhe në një masë të madhe kjo, pa shfajësuar politikën (për këtë ka dhjetra e dhjetra përkufizime, po tani nuk është ky qëllimi i komentit tim), është e metë e shoqërisë shqiptare që për shkak edhe të së kaluarës, sa i përket demokracisë, është si ai fëmija i shkollës fillore. Nuk mund të tëhollësh petë byreku me miell misri edhe pse byrekun e duan të gjithë. Si argument për sa thashë, duke i njohur tashmë si politikanët si partitë tona, në një moment tjetër populli nuk do duhej t'i votonte më. Nuk po shtrihem larg, por vetëm në ish vendet e lindjes komuniste sot nuk ekziston më asnjë parti nga ato që në ato dolën pas rënies së komunizmit. Po tek ne?! Në Shqipëri, ende politika dhe rotacioni qeverisës janë pjellë e mentalitetit dhe nomenklaturës së partisë shtet, ish PPSh, të ndarë apo pozicionuar kryesisht në dy bijat e saj PS dhe PD. Këtë barrierë kush mund ta shembë?! Kjo është dilema dhe sfida jonë demokratike. Por rruga deri atje do jetë e gjatë, por edhe e vështirë! Ndoshta, për fat të keq, në këtë mund të influencojë negativisht edhe një nga ligjet bazë të Natyrës, që e përfshin dhe shoqërinë njerëzore, siç është "Ligji i Inercisë", i Isak Njuton.
o Ben , je nje gazetae i pakuptimte ne gjerat qe shkruan . Ke nje metamorfize te thelle ne shkrimet e tua . Kam pershtypjen ( dhe kete e shoh ne shkrimet e tua , futja kot ) , qe propoganda e atij dallkauku qe flet çdo nate nga ballkoni , e ka çorjentuar trurin tend si gazetar . Ishe mire o vella , ç'pate qe kaq shpejt qe nen effektin e helmit Salian . Megjithate te " shkuara " sepse me kete qendrim " lepirje " , po largon shume lexues nga shkrimet e tua Une i pari ????♂️????♂️????♂️????♂️????♂️