Te fundit

Tragjedi në Georgia, vritet një oficer policie, tjetri në gjendje kritike pas shkëmbimit të zjarrit në një hotel

2 Shkurt 2026, 07:30Bota TEMA
Tragjedi në Georgia, vritet një oficer policie, tjetri në gjendje

Një oficer policie ka humbur jetën dhe një tjetër ka mbetur i plagosur rëndë pas një shkëmbimi zjarri të ndodhur mëngjesin e së dielës në një hotel në periferi të Atlantës.

Policia e Qarkut Gwinnett njoftoi se ngjarja e rëndë ndodhi pranë zonës së Stone Mountain, rreth 40 kilometra në verilindje të Atlantës.

Sipas raportimeve paraprake, dy oficerët u dërguan në vendngjarje pas një telefonate që denonconte një rast mashtrimi. Në momentin që efektivët mbërritën në hotel dhe kontaktuan me personin e dyshuar, situata përshkallëzoi menjëherë. I dyshuari nxori armën dhe qëlloi në drejtim të tyre. Oficerët iu kundërpërgjigjën zjarrit, duke e lënë të plagosur agresorin.

Përplasja rezultoi fatale për njërin prej oficerëve, i cili ndërroi jetë nga plagët e marra. Oficeri i dytë u transportua me urgjencë në spital dhe ndodhet në gjendje kritike për jetën, por mjekët raportojnë se gjendja e tij është e qëndrueshme. I dyshuari po trajtohet gjithashtu në spital për plagë arme. Policia nuk ka bërë ende publikë emrat e oficerëve apo të autorit të ngjarjes.

Guvernatori i Xhorxhias, Brian Kemp, reagoi përmes një deklarate në platformën sociale X, duke shprehur ngushëllimet për familjen e oficerit të vrarë.

“Kjo është kujtesa më e fundit për rreziqet me të cilat përballen forcat e ligjit çdo ditë. Ne jemi mirënjohës për këdo që e vë veten në rrezik për të mbrojtur bashkëqytetarët e tyre,” shkroi Kemp.

Hetimi për zbardhjen e plotë të rrethanave i ka kaluar Byrosë së Hetimeve të Xhorxhias, procedura standarde për rastet kur përfshihen oficerë policie.

Lini një Përgjigje

Më të lexuarat

Blog Tema

Powered by Tomorrow.io