El-Baradei merr çmimin Nobel për Paqen

Pas marrjes së çmimit, El-Baradei është shprehur se çmimi njeh rrezikun numër një me të cilin përballemi sot dhe ky është kërcënimi i përhapjes së armëve bërthamore, ekzistenca e vazhdueshme e mijëra armëve bërthamore dhe perspektiva e terrorizmit bërthamor

Çmimi Nobel i Paqes i është dhënë këtë vit agjencisë bërthamore të OKB-së dhe drejtorit të saj egjiptian, Mohammed El-Baradei.

Komiteti Nobel tha se çmimi jepej për punën e tyre për të nxitur aplikimin e sigurt dhe paqësor të energjisë bërthamore, dhe parandalimin e përdorimit të saj për qëllime ushtarake. Zoti El-Baradei tha se çmimi njihte kërcënimin më të madh që i vinte botës dhe do të forcojë rolin e agjencisë në përballimin e problemeve lidhur me programet bërthamore të Koresë së Veriut e Iranit.

"Çmimi njeh rrezikun numër një me të cilin përballemi sot dhe ky është kërcënimi i përhapjes së armëve bërthamore, ekzistenca e vazhdueshme e mijëra armëve bërthamore dhe perspektiva e terrorizmit bërthamor," tha zoti El-Baradei.

"Komiteti njeh se këto rreziqe e të tjera mund të zgjidhen vetëm nëpërmjet bashkëpunimit më të madh të mundshëm ndërkombëtar si dhe rolin e përpjekjeve shumëpalëshe për të zgjidhur sfidat me të cilat përballemi.

Më parë zoti El-Baradei ishte zgjedhur për një mandat të tretë në detyrë, pasi Shtetet e Bashkuara tërhoqën kundërshtimin e tyre.

Shqetësime për 'kërcënime' të pabesueshme në Nju Jork

Qytetarëve u është thënë të mos ngarkohen me çanta nëse munden

Në Nju Jork u forcua siguria në sistemin e transportit publik, pasi shefi i policisë se qytetit tha se autoritetet kishin marrë informacione se në ditët në vazhdim, metroja e qytetit ishte e rrezikuar nga sulmet terroriste.

Shefi i policisë së Nju Jorkut Ray Kelly e bëri këtë publike gjatë një konferencë për shtyp me kryetarin e Bashkisë Michael Bloomberg.

Por Departamenti amerikan për Sigurinë e Brendshme tha se pretendimet nuk janë të besueshme. Russ Knocke, Sekretari për Marrëdhëniet me Median tha: "Ato ishin pretendime shumë precize dhe specifike në lidhje me kërcënimet, por siç e thashë komuniteti që merret me shërbimet sekrete tani beson, fatmirësisht, se pretendimet nuk janë të besueshme", tha zoti Knocke. Patrulla të policisë ishin shtuar, ndërkohë që qytetarëve u ishte bërë thirrje të mos përdornin valixhe, çanta të mëdha dhe karroca me rrota, nëse e shihnin të nevojshëm.

Presidenti amerikan Xhorxh Bush vlerëson kontributin e myslimanëve në SHBA

Bush: Amerika ka përfituar nga besimtarët

Presidenti amerikan George Bush vlerësoi kontributin e amerikanëve të besimit islam, në një mesazh me rastin e fillimit të muajit të shenjtë të Ramazanit. Presidenti tha se Amerika është e bekuar, pasi ka përfituar nga puna e individëve të të gjitha besimeve. Ai u përcolli përshëndetjet e tij myslimanëve të Amerikës, të cilët përbëjnë një komunitet shumë të larmishën në Shtetet e Bashkuara.

Ndoshta askund në botë komuniteti mysliman nuk ka një larmi të tillë si në Shtetet e Bashkuara, ku pjesëtarët e këtij komuniteti vijnë nga vende të ndryshme dhe u përkasin racave të ndryshme. Ky komunitet ka afrikano-amerikanë, latinë dhe të bardhë të konvertuar në fenë islame, të cilët festojnë së bashku Ramazanin. Myslimanët e Amerikës, numri i të cilëve mendohet të jetë diku nga 3 deri në 7 milion vetë, e ndiejnë edhe më shumë lidhjen mes tyre në qendrat e kultit. Ja si shprehet Dr. Abdullah Khouje, president i Qendrës Islamike në Uashington: “Njerëz nga e gjithë bota mblidhen në një vend dhe të gjithë ndihemi të njëjtë, pavarësisht nga rajonet e largëta gjeografike nga jemi me origjinë,”- thotë ai. Më shumë se 2 mijë xhami dhe qendra islamike në mbarë Shtetet e Bashkuara u ofrojnë besimtarëve myslimanë në Shtetet e Bashkuara, mbështetjen e nevojshme gjatë Ramazanit. Samir Salah është president i Dar Al Hijra: “Një ndër shërbimet bazë gjatë muajit të Ramazanit është t’i mbledhim njerëzit së bashku veçanërisht gjatë iftarit. Kjo financohet nga organizatat bamirëse.”-thotë zoti Salah.

Gjatë Ramazanit myslimanët e Amerikës marrin pjesë në lutjet e përnatshme, i kushtojnë kohë reflektimit shpirtëror dhe agjërojnë si dhe ushtrojnë akte të tjera vetë-kontrolli për të treguar përkushtimin e tyre ndaj Zotit. Vitet e fundit atyre u është shtuar edhe një detyrë tjetër. Robert Marro është një ish-diplomat amerikan, i cili është konvertuar në mysliman: “Duhet të shkosh të takohesh me fqinjët, t’u shpjegosh për fenë islame, të mësosh se çfarë mendojnë ata për këtë fe, në mënyrë që të kapërcehen paragjykimet,”- thotë zoti Marro. Xhamitë dhe qendrat islame hapin dyert për të gjithë amerikanët, pavarësisht nga besimi fetar, gjatë muajit të Ramazanit. Dr. Shaker El Sayed është Imami i Dar Al Hijras: “Ne kemi iftar në xhami edhe për fqinjët tanë të besimeve të tjera, dhe vihemi në kontakt me organizata jo-myslimane, qoftë kisha, sinagoga dhe organizata të tjera të shoqërisë civile për t’u shpjeguar se çfarë përfaqëson Ramazani,”- thotë imami.

Ky muaj i shenjtë është një mundësi e re për myslimanët që të pastrojnë shpirtin, të tregojnë zemërgjerësi duke dhuruar për organizatat bamirëse dhe t’i kujtojnë botës kuptimin e vërtetë të islamit si një besim paqeje dhe tolerance.

Të dielën mbahen zgjedhjet presidenciale në Poloni

Dy javë pas zgjedhjeve parlamentare në Poloni, pritet të mbahen të dielën zgjedhjet presidenciale. Më shumë se 30 milionë qytetarë janë ftuar të dalin në zgjedhje. Zakonisht në këtë vend në zgjedhjet presidenciale marrin pjesë më shumë njerëz se sa në ato parlamentare. Nëse të dielën asnjëri nga kandidatët nuk arrin shumicën absolute, pritet përsëritje e zgjedhjeve me 23 tetor. Në mesin e konkurruesve janë paraqitur 12 kandidatë. Lech Kacynski dhe Donald Tusk janë dy kandidatë kryesorë rivalë.

Shtohet numri i viktimave të uraganit në Amerikën e Mesme

Si pasojë e rrëshqitjeve të mëtejshme të dheut numri i viktimave të uraganit në Amerikën e Mesme është ngritur në 235. Siç njoftuan autoritetet, vetëm në Guatemalë humbën jetën 40 njerëz. Shirat që solli me vete shtrëngata 'Stan', bënë që të dalin nga shtrati shumë lumenj. Më së rëndi është goditur Guatemala me 144 viktima dhe El Salvadori me 65 të vdekur. Për viktima të tjera është njoftuar nga qyteti i Meksikës Çiapas ku nga shtrati kanë dalë 33 lumenj.

PKK-ja kurde paralajmëroi armëpushim të njëanshëm me Turqinë

Organizata ilegale kurde PKK ka paralajmëruar armëpushimin e njëanshëm me Turqinë. Në një komunikatë të publikuar nga mediat kurde thuhet se populli kurd do të shfrytëzojë të drejtat e tij legjitime për mbrojtjen dhe rezistencën demokratike kundër shtetit turk. PKK njëkohësisht kritikon mungesën e gatishmërisë për gjetjen e një zgjidhjeje të problemit kurd në dokumentet rreth negociatave për anëtarësim mes Bashkimit Europian dhe Turqisë. Në komunikatë theksohet se çështja kurde është problem i tërë Bashkimit Europian.