Bombë me C4 e komanduar me celular gjendet e montuar poshtë makinës së ish kryepolicit të Lezhës, Xhavit Shala

Bombë në makinën e ish-kryepolicit

Bomba është zbuluar nga një mekanik në Elbasan, ku makina po i nënshtrohej një kontrolli. Bomba përmbante 200 gr eksploziv C4 dhe ishte e komanduar me anë të një telefoni. Policia: Nëse akti do të ishte ekzekutuar, do të përballeshim me pasoja tragjike. Hetimet nuk arrijnë të zbardhin ende asgjë.

Një bombë e komanduar është zbuluar rastësisht poshtë makinës së ish drejtorit të Policisë së Lezhës, Xhavit Shala. Një bombë e komanduar me celular është zbuluar dje nga një mekanik në Elbasan, ku ishte dërguar për kontroll teknik, makina e ish komisarit Shala. Ish Drejtori i Policisë së Lezhës, përpara se të përjashtohej, Shala ka thënë se bomba është zbuluar në mënyrë rastësore nga mekaniku në qytetin e Elbasanit.

Policia nuk ka konfirmuar ende asgjë në lidhje me këtë ngjarje të rëndë, por është bërë e ditur se kanë filluar hetimet për çështjen. Mekaniku ka hapur për kontroll makinën e ish komisarit të Policisë për të rregulluar disa pjesë teknike të saj. Sapo makina është ngritur lart nga mjetet e mekanikut, poshtë makinës është dalluar një bombë.

Mekaniku nuk ka bërë asnjë veprim dhe ka lajmëruar menjëherë policinë e Elbasanit. Ekspertët e policisë kanë mbërritur në vendngjarje dhe kanë bërë çaktivizimin e bombës. Pas verifikimeve të menjëhershme ka rezultuar se bomba ishte e përbërë nga ekzploziv C4, një ekploziv shumë i fuqishëm.

Ekspertët e kriminalistikës së policisë kanë thënë se bomba ishte e lidhur me një celular dhe mund të komandohej nga personat që e kishin montuar. Policia nuk qe në gjendje të thotë se kur mund të jetë montuar bomba e komanduar në këtë makinë, por shtoi se nëse akti do të ishte ekzekutuar në praninë në makinë të komisarit Shala, pasojat do të ishin shumë tragjike.

Policia dhe prokuroria kanë filluar hetimet për të arritur në identitetin e personave që kanë vënë bombën. Burimet thanë se nga provat e gjetura është shumë e vështirë të arrihet në një zbardhje të ngjarjes, ndërkohë që bomba i është nënshtruar një ekspertize për të arritur në ndonjë gjurmë të mundshme të autorëve.

Xhavit Shala ka qenë drejtues i lartë i policisë së shtetit shqiptar. Ai ka qenë së fundi drejtor i Policisë së Lezhës. Shala është përjashtuar nga policia në kuadër të reformës së Toskës, të quajtur ‘rend brenda rendit’. Xhavit Shala është përjashtuar me një motivacion jo të qartë, por është bërë e ditur nga ministria se kjo ka lidhje me moskontrollin efiçent të portit të Shengjinit, përgjatë kohës që komisar Shala ishte drejtues i bluve të Lezhës.

Ndalohen tre persona që nuk kanë qenë aktivë për grabitjen e bankës, dyshohen për bashkëpunim

Banka Amerikane, Dështon kapja e grabitësve

Policia ka dështuar në kapjen e personave kryesorë të dyshuar për grabitjen e rreth 80 mijë dollarëve në filialin e Bankës Amerikane pranë stacionit të trenit. Një aksion i forcave speciale dhe policisë kriminale ka përfunduar me ndalimin në Durrës të tre personave që dyshohen për bashkëpunim në grabitje, por që nuk kanë qenë pjesë aktive e operacionit të grabitjes së bankës.

Një operacion i shpejtë i orëve të para të mëngjesit të djeshëm nga ana e Forcave Speciale dhe policisë kriminale ka vënë në pranga personin që fillimisht u dyshua si një ndër grabitësit kryesorë, Kujtim Vokshi. Policia ka ndaluar edhe ish bashkëshorten e Vokshit si dhe vëllain e tij. Fillimisht policia u shpreh se kishte kapur trurin e organizatës që ideoi dhe realizoi grabitjen e filialit të Bankës amerikane, disa ditë më parë.

Ndërkohë versioni i policisë ka ndryshuar pas pak kohe dhe burimet sqaruan se bëhet fjalë për arrestimin, thjesht të disa personave që dyshohen si bashkëpunëtorë në grabitjen e Bankës Amerikane. Gjatë arrestimit në disa apartamente në Durrës, policia tha se ka sekuestruar edhe 18 mijë dollarë amerikanë si dhe dy makina që ishin në zotërim të personave të ndaluar.

Kujtim Vokshi njihet në Durrës si një njeri jo i dyshuar për akte të tilla dhe nga rrethi i tij ky lajm është pritur me çudi. Disa burime thanë se Kujtim Vokshi ndoshta nuk është i implikuar në këtë grabitje, por grabitësit mund të kenë lidhje me të dhe kanë përdorur makinën e tij ditën, kur kanë realizuar veprën penale.

Policia tashmë është vënë në kërkim të trurit të organizatës që ka realizuar grabitjen më spektakolare bankare në vend. Pak ditë më parë disa persona të maskuar dhe të armatosur hynë në mes të ditës në filialin e Bankës Amerikane pranë stacionit të trenit. Fillimisht u deklarua se ata kishin grabitur një shumë prej 20 mijë dollarësh, por më vonë rezultoi se shuma kapte shifrën e rreth 80 mijë dollarëve amerikanë.

Policia nuk arriti të kapte njeri në ato momente, por duket se e ndihmuar nga gjurmët e gishtave dhe nga kamerat e sigurisë së bankës, kanë arritur në identifikimin e autorëve të grabitjes. Banda kriminale duket se ka synuar kasafortën e bankës, por ka dështuar, pasi kodi i tyre nuk përputhej me kodin e kasafortës.

Policia: Asgjë e qartë për vrasjen e Julian Agollit

Policia e Tiranës thotë se është duke hetuar intensivisht në lidhje me vrasjen e Julian Agollit, dy netë më parë në afërsi të shtëpisë së tij në Laprakë. Policia tha se të gjitha dyshimet lidhen me të shkuarën e tij, pasi ai ka pak javë që është liruar nga burgu për veprat penale të tentativës së vrasjes dhe armëmbajtjes pa leje. Policia e kishte skeduar Julian Agollin, si një anëtar të një bande vrasësish me pagesë, por prova në lidhje me këtë skedim nuk janë gjetur nga policia.

Policia e Tiranës tha se po hetohet edhe në lidhje me ndonjë konflikt të vonë të 28 vjeçarit Agollit, me persona që ende nuk njihen. Pista më e qëndrueshme e policisë, është vrasja për shkak të hakmarrjeve.

Persona te paidentifikuar kanë ekzekutuar në mënyrë mafioze dy ditë më parë, rreth orës 22:00 të mbrëmjes 25 vjeçarin Julian Agolli. Ai është vrarë në afërsi të shtëpisë së tij në Laprakë të Tiranës me katër plumba që kanë dalë nga një pistoletë me silenciator. Policia tha se ngjarja dukej e mirorganizuar, pasi autorët nuk kanë lënë gjurmë në vendngjarje dhe janë larguar. Julian Agolli është ndaluar tre vite më parë nga policia për vrasjen e Fatmir Dautit, por në Gjykatë rezultoi se nuk kishte prova për të dhe u lirua. Policia thotë se vrasja mund të ketë të bëjë me të kaluarën e 28 vjeçarit, por asgjë nuk ka të konfirmuar. Kjo është e disata vrasje që ka përfshirë vendin prej disa ditësh.