Edvin Murati nuk mendon se shqiptarët do të “falin” kundër Turqisë, sepse edhe ata kanë synimet e tyre

“Edhe ne kemi objektiva”

Fitorja e ndeshjes së rradhës me Turqinë e Terim, është objektivi i të mërkurës për kuqezinjtë. Në të gjitha deklaratat e tyre duket qartë se me Turqinë do të luhet sikur të ishte ndeshja e parë në grup. I këtij mendimi është edhe mesfushori Edvin Murati, i cili shprehet se skuadra i ka borxh tifozërisë, në mos një fitore, një ndeshje dinjitoze në “Qemal Stafa”, për të mbyllur me nder këto eleminatore. Për Muratin rezultati i ndeshjes me Ukrainën, ka ngritur moralin e skuadrës, e cila në këtë takim të fundit kërkon të përmirësoj sadopak imazhin e përfaqësueses tonë në arenën ndërkombëtare. Mesfushori, i cili në kampionatin grek luan me Iraklis, thotë se objektivi në shtëpi do të jetë vetëm fitorja. “Duhet ta fitojmë këtë ndeshje, ndonëse kemi një kundërshtar të fortë si Turqia që në takimin e fundit miqësor, mundi dhe vendin organizator të botërorit, Gjermaninë” – ka thënë Murati. Ai ka vijuar të thotë se ne nuk na interesojnë objektivat e skuadrës turke, por tonat, përmirësimi i kuotës së pikëve dhe i imazhit të futbollit shqiptar në Evropë. “Nëse e marrim këtë 3 pikësh në shtëpi, do të jetë fantastike. Kështu do të bëjmë një mbyllje e bukur e këtyre eleminatoreve”- ka vijuar deklaratën e tij mesfushori. Për Muratin, loja e mirë dhe barazimi në Ukrainë do të ketë pjesën e vet në ndeshjen e të mërkurës, për të cilën ai shprehet: “Kuptohet që vijmë me një moral më të lartë. Para ndeshjes me Ukrainën nuk  kishim asnjë lloj presioni. Askush nuk priste që të arrinim këtë rezultat, por ekipi tregoi mobilizim dhe lojë të mirë. Mendoj se meritonim më shumë se 1 pikë në atë ndeshje”. Murati thotë se  nëse kuqezinjtë do të fitonin, Shqipëria do të përmirësohej akoma në renditjen e FIFA-s. Sidoqoftë, ai është i kënaqur që pika e marrë me kryesuesit e grupit të 2-të, shërbeu për të qenë në një vazo tjetër në shortin për eleminatoret e evropianit të ardhshëm. “Mos harroni se luajtëm me ekipin që kryeson grupin, i cili kish hyrë në fushë me synimin për të festuar pas fitores së kësaj ndeshje. Ne arritëm të frenojmë një ekip që ka futbollistë të tillë si Shevçenko, të cilët janë në elitën e futbollit botëror. Ata ishin të rrezikshëm, por edhe ne patëm raste dhe ishim pranë fitores”. Ndërkohë futbollisti konfirmon formën e tij optimale për të mërkurën, duke premtuar se do të bëjë më të mirën në shërbim të ekipit kombëtar, në rast se gjermani do ta aktivizojën në këtë ndeshje. Edhe pse renditja në tabelë flet për një Shqipëri, e cila synon vetëm përmirësimin e kuotës së pikëve dhë një kundërshtar që nga ky takim kërkon kualifikimin në eleminatore, për futbollistin kuqezi, kjo nuk do të thotë se shqiptarët janë më pak të motivuar për të luftuar për fitore. “Nuk mendoj se jemi të pamotivuar.E thashë dhe më parë që duhet të përmirësojmë  kuotën e pikëve dhe dinjitetin e skuadrës. Në fushën e lojës nuk hyet me mendimin për ta humbur ndeshjen, por për ta fituar atë” – përfundon Murati, duke kërkuar mbështjetjen e tifozërisë në ‘Qemal Stafa’.

Danimarka, me sytë nga Shqipëria

Të mërkurën ekipi i Danimarkës do të përballet në Kazakistan me ekipin vendas për një vend në play-off-et, që do të zhvillohen për pjesëmarrjen në Gjermani 2006. Koka e këtij grupi është vendosur dhe është Ukraina, që do të marrë pjesë direkt në Kupën e Botës. Ndërsa për të vendosur se kush do të jetë ekipi i dytë nga Grupi 2, që do të shkojë në play-off dhe ndoshta në Gjermani, duhen pritur edhe ndeshjet e fundit që do të luhen të mërkurën në mbrëmje, me dy përballje mjaft interesante. Për vendin e dytë lufton Danimarka, që arriti të zgjojë shpresat e saj për kualifikim, pasi mposhti kampionët e Evropës në shtëpi, duke eliminuar njëkohësisht një pretendent direkt. Danezët duhet të bëjnë detyrën në Kazakistan, duke e fituar ndeshjen, por duke mbajtur edhe një vesh nga Shqipëria, ku turqit nuk duhet të marrin më shumë se një barazim. Përpara danezëve qëndron një ekip me një bilanc, që as mund të krahasohet me atë të nordikëve. Edhe kompanitë e basteve në Evropë e japin fitoren e danezëve si të sigurt dhe japin koefiçentë mjaft të ulët për këtë ndeshje. Për shembull Sportingbet, totalbet, sportingodds apo interwetten.com japin për fitoren e danezëve 1.22, për barazimin 8 dhe për fitoren e vendasve japin koefiçentin 26. Pra ekipi i Olsen shkon në Kazakistan si favorit absolut për këtë ndeshje. Por jo çdo gjë do të varet nga këmbët e tyre. Mjaft interesante dhe e rëndësishme është ndeshja tjetër, që do të luhet në Shqipëri, ndërmjet Shqipërisë dhe Turqisë. Një fitore e turqve do t’a bënte të pavlefshëm fitoren e danezëve. Ata do të vijnë në këtë ndeshje me dëshirën e madhe për të siguruar një vend në play-off. Ekipi shqiptar e ka arritur objektivin e tij kryesor në këto elimninatore, që është vendi i pestë në grup, me një total prej 13 pikësh, që është edhe rezultati më i mirë i arritur ndonjëherë nga kjo kombëtare. Mbetet për t’u parë se kush nga të dy ekipet do të arrijë i pari në finish, në një mbrëmje me shume dramacitet për të dy kandidatët, që do të luajnë për pjesëmarrjen në Gjermani 2006. Një ëndërr, nga e cila ata nuk do të heqin dorë deri në vërshëllimën e fundit.

Vjen Runi, Anglia më e fortë

Edhe pse mungesa e Devid Bekam dhe Stiven Zherard japin përshtypjen e një skuadre angleze më të dobët, në fakt është e kundërta

Vetëm një “i çmendur” do të thoshte se Anglia është një skuadër më e mirë pa Devid Bekem dhe Stiven Zherard, të cilët është e sigurtë se nuk do të jenë pjesë e formacionit anti-Poloni. Por në fakt është e kundërta. Mungesa e dy lojtarëve kyç të trajnerit Zven Goran Erikson do të bëjë Anglinë një formacion më efektiv kundër polakëve. Një vëzhgues i vëmendshëm do të kuptonte se Frenk Lampard dhe Stiven Zherard nuk përbëjnë zgjedhjen e duhur në mesfushë. Që të dy këto lojtarë në skuadrat e tyre respektive në kampionatin anglez e kanë të drejtën që të hidhen edhe në sulm, ndërkohë që në kombëtaren angleze atyre do t’u duhet që “të luftojnë” kundër këtij instikti. Dhe rezultati është se nuk kemi maksimumin e lojtarëve, të cilët frymëzojnë skuadrat e tyre në Premier Ligë. Ndërkohë që duke duke patur në krah të tij, Ledli King, ne do të kemi mundësinë që të shohim maksimumin e Frenk Lampard. Anglia do të humbasë Bekam dhe krosimeve e tij, por për Shoun Rait Filips krosimet do të ishin më natyrale. Sidoqoftë pavarësisht balancës së mirë, Anglia ende mbetet një skuadër, e cila ka një mundësi 4/7 për të mundur një skuadër polake të cilën ne nuk duhet ta nënvlerësojmë. Ndoshta ajo që ka ndikuar në këtë drejtim është motivacioni për fitoren në këto skuadra në një kohë kur kualifikimi për në Botëror është i sigurtë. Ajo që e bën Anglinë akoma më shumë favorite është edhe rikthimi i Uejn Runit. Runi sigurisht “që vjen nga një planet tjetër” dhe lëvizjet e tij sigurisht që do t’u shkaktojnë dhimbje koke lojtarëve të Polonisë. Runi i ka një borxh kombëtares angleze kundër kombëtares së Irlandës së Veriut. Sulmuesi i Mançester Junajted është kuotuar 7/1 nga Skybet për të shënuar golin e parë. Ndërkohë që Ouen kuptohet kuotohet sa gjysma e Runit. Është e pamundur që Frenk Lampard të jetë mbi Runin, kështu që Lampard është kuotuar 8/1. Ndërkohë që për sulmuesin polak, i cili luan për Sëlltikun, Maciej Zuravski duhet thënë se janë kompanitë e basteve e kanë përcaktuar atë si favorit për të shënuar. Sipas kompanive më prestigjoze të basteve kemi një parashikim 61 % fitore për skuadrën angleze, 25 % barazim dhe 14 %   fitore për skuadrën polake.

Barça humbet Eto-në për një muaj

Samuel Eto humbi mundësinë për t’u kualifikuar me Kamerunin në Kupën e Botës pas barazimit të fundjavës me Egjiptin, por sulmuesi i Barcelonës duket se nuk ka ndërmend të humbasë edhe Kupën Afrikës me kombëtaren e tij. Kështu ekipi katalanas nuk do ta ketë në dispozicion lojtarin e tij për një periudhë prej afër një muaji. Turneu i mësipërm do të nisë më 20 janar dhe do të zgjasë deri më 10 shkurt. Eto do të humbasë gjatë kësaj kohe tre ndeshje në Ligë dhe tre të tjera në Kupën e Mbretit, gjithmonë nëse Barcelona do të mund të kualifikohet deri në këto ture. Një problem për Rajkardin kjo mungesë e paralajmëruar, kur dihet që Eto është ndër lojtarët më në formë të ekipit kampion të Spanjës. Por të paktën kamerunasi nuk do të humbasë asnjë ndeshje në Ligën e Kampioneve, pasi kjo përkon me periudhën e pushimit të këtij kompeticioni. Presidenti Laporta ka bërë të ditur që do t’i kërkojë Federates Futbolle të Kamerunit që Eto të mos grumbullohet me kombëtaren për Kupën e Afrikës.