Numri i parë i gazetës RD, premtimet ndaj shqiptarëve dhe përshëndetja e Agollit

Nga Luljeta Progni

Me sloganin “Liria e gjithsecilit të bëhet garancia e lirisë së të gjithëve” nis numri i parë i gazetës “Rilindja Demokratike. 20 vjet më parë, në 5 janar të vitit 1991, u botua numri i parë i gazetës “Rilindja Demokratike”, organ shtypi i Partisë Demokratike, e themeluar menjëherë pas shpalljes së pluralizmit në Shqipëri, më 12 dhjetor 1990. Emra të njohur të medias shqiptare shkruan në numrin e parë të RD-së, ku u shprehën për herë të parë lirisht pas 50 vitesh. Numri i parë i saj, apo edhe numrat e parë të saj, nuk mund të konsiderohen vetëm si gazetë partie. Misioni i asaj gazete ishte shumë më tepër se kaq.

Artikulli kryesor i numrit të parë të RD-së mban titullin “Fjala e parë” dhe nuk ka një autor. E shkruar me shkronja kapitale, “FJALA E PARE”, ka në thelb idealin e stafit të parë të kësaj gazete për të krijuar një media të lirë, edhe pse RD dilte si organ shtypi i PD-së. “FJALA E PARË” ka në thelb përbetimet për të përçuar fjalën e lirë tek lexuesi shqiptar, e cila kishte munguar aq shumë në Shqipërinë komuniste, përbetimet për të mos përdorur censurën dhe për të përcjellë të vërtetën tek lexuesit. Vetëm pak numra më pas këto premtime nuk patën më kuptim, pasi RD-ja u kthye në një gazetë partiake.

Një prej shkrimeve kryesore të gazetës është edhe artikulli me titull “Katër ditët e mëdha të studentëve”, që mban bashkë-autorësinë e Ben Blushit dhe Blendi Fevziut, të dekoruar dy ditë më parë nga kryeministri Berisha me Medaljen e Mirënjohjes, për kontribut në fushën e medias. Në numrin e parë të gazetës RD spikasin disa emra, të cilët ishin harruar nga kreu i PD-së për t’u nderuar me dekoratë në 20 vjetorin e botimit të “Rilindjes Demokratike”.

Në numrin e parë shkruan Dritëro Agolli, i cili përshëndet daljen në treg të gazetës. Në numrin e parë pasqyrohet gjithashtu edhe një fjalim i anëtarit të komisionit nismëtar të PD-së, Sali Berisha, pasi ende nuk ishte zgjedhur në krye të PD-së. Fjalimi i tij ishte mbajtur në miting në Qytetin Studenti.

Në këtë numër shkruan edhe Preç Zogaj, i cili gjithashtu ishte anëtar i komisionit nismëtar të PD-së, si dhe Ismail Kadare, i cili përshëndet daljen e numrit të parë të gazetës “Rilindja Demokratike”.

Në numrin e parë përshëndet akademiku kosovar Rexhep Qosja, shkruan Frrok Çupi, kryeredaktor i gazetës një shkrim me titullin “Numri i parë i gazetës doli, vallë a do dalë i dyti?”.

Në numrin e parë pasqyrohet edhe një intervistë e anëtarit të komisionit nismëtar të PD, Gramoz Pashko. Në këtë numër pasqyrohet edhe programi i parë i PD  e të tjerë artikuj.

Më poshtë pasqyrohet artikulli kryesor i gazetës me titullin “Fjala e parë”, si dhe përshëndetja që shkrimtari Dritëro Agolli, drejtuar gazetës Rilindja Demokratike.

Fjala e Parë

Sot “Rilindja Demokratike” flet fjalën e parë të saj. Kjo “Rilindje …” ka marrë për vete një barrë të rëndë dhe detyrë të ndershme:

Ka marrë një detyrë që të thotë fjalën e vërtetë. Sa shumë e duam këtë fjalë! E dëgjofshim, e gëzofshim të gjithë bashkë të vërtetën!

“Rilindja Demokratike” do ta ketë zërin të dlirë dhe fjalën të lirë. E di ajo që më parë një fjalë: vetëm kur e vërteta është e lirë, atëherë liria është e vërtetë.  Prandaj do të bëjë të pamundurën të mundur për të thënë dhe për të mbrojtur lirinë e fjalës, lirinë e shprehjes dhe të mendimit. Ajo kurrë nuk do të ruajë sekretin për disa dhe l…në pa kufi për ca të tjerë. Ajo do ta shprehë dhe do ta mbrojë mendimin e lirë të gazetarëve të saj, të bashkëpunëtorëve, por edhe më gjerë, ose krejt gjerë: të drejtën e ligjshme të mendimit e të shprehjes së lirë në një popull të tërë.

Që në fjalën e  parë “Rilindja Demokratike” bën thirrje që askush të mos cenohet, të mos persekutohet, të mos censurohet për shkak të fjalës, të mendimit e të shprehjes.

“Rilindja Demokratike” lind pikërisht për të kryer vepër të madhe demokratike në mbrojtje të të drejtave të njeriut. Ajo është gazetë demokratike dhe do të ketë në mendjen e saj mendimin dhe fjalën e  publicistëve  të shquar demokratë e përparimtar shqiptarë, do të ketë guximin e dëshmorëve për demokraci, do të ketë idealin e drejtësisë sociale e të demokracisë.

“Rilindja Demokratike” në çdo fjalë e në çdo germë do të ketë çështjen e kombit e të atdheut. Kombi të ndritet, të vëllazërohet e të përparojë. Kombi shqiptar të ngjitet ku i takon e të zhvillohet! Atdheu të gëzojë liri e indipendencë, atdheu ynë i lashtë të bëhet çerdhe e dashur dhe kopsht lulesh për bijtë e vet, që këta të mos ia kthejnë jo shpinën, por as fjalën të mos ia kthejnë kurrë atdheut. Për këtë do të përpiqet “Rilindja Demokratike”.

Në faqet e “Rilindjes Demokratike” do të shihemi e do të kuvendojmë me vëllezërit tanë kosovarë, me të gjithë shqiptarët vëllezër tanë të shpërndarë nëpër botë, që nga brigjet e tejshme të Adriatikut e gjer në kontinentin amerikan.

“Rilindja Demokratike” i ka faqet të hapura.

Ajo do të interesohet për të gjithë problemet që ka jeta e popullit: Për ekonominë, për kulturën, për historinë për letërsinë e artin, për të drejtën, për mësimin, për mendimin e ndërgjegjen, për zakonin e traditën, për sot e për nesër.

“Rilindja Demokratike” shikon përpara. Ajo ka një dëshirë e vullnet që të hyjë tek të gjithë, te fshatari, te shkollari, te punëtori, te intelektuali, te shkrimtari e shkencëtari, tek i riu e fëmija, tek të mëdhenj e të vegjël.

“Rilindja Demokratike”, e cila lindi së bashku me Partinë Demokratike, do të mbështesë e do të pasqyrojë çdo reformë demokratike që i shërben përparimit, pavarësisht se cila forcë politike do të jetë nismëtare dhe zbatuese e saj. Ajo do të kultivojë dialogun, tolerancën, pluralizmin.

Por fjala e “Rilindjes…” nuk do të jetë kurrë lustër e lajkë. Fjala e saj do të jetë e rreptë kundër burokracisë, ndaj autokracisë, ndaj çdo të keqeje që do të përpiqet ta pengojë përparimin e vendit, lirinë e njeriut, forcimin e shtetit juridik shqiptar. Të mos qëndrojmë duarkryq para së keqes shoqërore dhe shtetërore, këtë do ta zbatojë vetë dhe do t’ia kërkojë lexuesit “Rilindja Demokratike”.

“Rilindja Demokratike” do të flasë fjalën shqipe, shqipen gurrë e qelibar, që nuk ngec nëpër gurët e sofizmave, që nuk njëtrajtësohet me enët e ideologjive të caktuara, që nuk flashket nëpër frazat e gjata boshe me pamje zyrtare. Ka një dëshirë “Rilindja Demokratike”: që njerëzit të mos thonë më: mos më fol si në gazetë. Por të thonë: Flasim si “Rilindja…”. Ajo ta ketë fjalën për ta pirë me etje.

Gëzuar të gjithëve fjalën e lirë.”

Bija e demokracisë

Shkrimtari i njohur, Dritëro Agolli, përshëndet i pari daljen e një gazete të re siç ishte RD, duke e cilësuar si “bijë të demokracisë në Shqipërinë e viteve 90, e sapodalë nga sistemi totalitar komunist, sistem që mbajti peng shqiptarëve, lirinë e fjalës, për 50 vite me radhë”.

Në një artikull të shkurtër të botuar në faqen e parë të numrit të parë të RD, Agolli, asokohe deputet i PPSH-së, Agolli uron që kjo gazetë të ishte mike, dhe jo mysafire në shtypin shqiptar.

“Ka gazeta që lindin të qeta në çaste të zakonshme kalendarike. Por ka gazeta që lindin mes dhimbjesh në momente historike të veçanta, siç lindin ditët e veçanta të papërsëritshme. Në momentet historike të vendit kur frynë erërat e lëvizjes së re të studentëve, kur nisën të rrahin valët e pluralizmit politik dhe kur në horizontin e jetës politike të Shqipërisë u shfaq Partia Demokratike, lindi edhe bija e demokracisë, gazeta “Rilindja Demokratike”. Kjo bijë e demokracisë erdhi dhe u ul në tryezën e  madhe të shtypit shqiptar për ta treguar më të plotë të vërtetën e erërave të progresit demokratik, për ta rrëfyer këtë progres me zërin e saj të veçantë në dobi të pasurimit shpirtëror të jetës dhe të kulturës.

E vërteta, ka thënë një i mençur, nuk është bijë e simpatisë, por është bijë e diskutimit. I urojmë Rilindjes Demokratike që ta bëjë të vërtetën bijë të diskutimit dhe të dialogut të gjerë dhe të jetë jo mysafire, por mike e Shqipërisë dhe nderin e saj”.

U vihet flaka fletëve të votimit

19:53 Politika

“Të vrarët” sipas KiE-së, jetojnë të gjallë në Pejë

19:07 Politika

Berisha është kthyer në objekt tallje në blogjet italiane. Ambientalistët shqiptarë protestojnë sërish

17:09 Politika

Lista e zgjedhësve te 28 qershorit bllokohet 50 vjet

15:23 Politika

Kjo është krejt e pandershme, Fevziu!

15:15 Politika

Meta prezanton Durim Hushin e Ylli Manjanin si anëtarë të rinj të LSI

15:00 Politika

Nënshtetësia shqiptare, nuk ka përparësi për qytetarët nga Kosova

13:10 Politika

Fillon asgjesimi i fletëve të votimit në Shqipëri

10:15 Politika

PD, plan për të bllokuar për 25 vjet listën e votuesve të 28 qershorit

20:46 Politika

Berisha: “Lajmësi nuk preket” funksionon këtu më mirë se në çdo shtet të botës

20:40 Politika