Te fundit
Moti i keq dhe errësira izolojnë veriun, Nishani paralajmëron më keq
7 Shkurt 2012, 20:09Sociale
TEMA
Qeveria shqiptare vetëm sot ka dhënë porositë për emergjencat civile, ndërkohë që prej ditësh disa zona në veri të vendit janë bllokuar tërësisht nga dëbora dhe moti i keq. Si të mos mjaftonte moti, këto zona po vuajnë dhe mungesat e gjata të energjisë elektrike, duke e bërë të vështirë jetesën e banorëve atje. Ndërkohë qeveria është mjaftuar duke paralajmëruar se do të bëhet edhe më keq. Vetëm sot është mbledhur për herë të parë komiteti ndërministror i emergjencave civile nga Ministri i Brendshëm, Bujar Nishani. Nishani bëri të ditur se kryeministri Berisha ka urdhëruar krijimin e shtabit të Emergjencave. Sipas ministrit, situata në vend aktualisht paraqitet e vështirë dhe pritet të vështirësohet edhe më tej. “Parashikimi i motit deri në datën 9 na bën me dije se moti do përkeqësohet dhe situata do bëhet edhe më e vështirë”, tha ai. Ministri Nishani deklaroi në këtë mbledhje se “Duhet të rritet gatishmëria për dhënien e ndihmës ndaj popullatës në zonat e thella ku ka vështirësi”. Një nga detyrat më të rëndësishme sipas tij është pjesa e koordinimit me prefekturat dhe kryetarët e qarqeve, rretheve apo komunave, të cilët janë më të prekur nga moti i keq.
“Në gatishmëri të kësaj situate sipas tij janë vënë mjekë dhe ndihmës mjekë, ndërsa borëpastruese do ketë në akset kryesore. Situata do monitorohet edhe nga ajri. Duhet të vëmë në dispozicion të gjitha mjetet e nevojshme për rrugët e bllokuara. Kërkohen 5 borëpastruese në akset kryesore, si dhe pajisja e tyre me skorie e kripë. Drejtoria e rezervave të përgatisë paketën ushqimore. Në gatishmëri të situatës edhe helikopterët për ndërhyrje nga ajri”, tha më tej Nishani.
Në veri izolohen fshatra të tëra
Problemet më të mëdha nga moti i keq raportohen në Pukë, Kukës dhe Dibër. Era e fortë ka sjellë ndërprerjen e energjisë në qytetin e Fushë- Arrëzit dhe në disa fshatra, ndërsa në Kukës, Shkodër dhe Lezhë energjia është rikthyer. Deri tani të gjitha komunat në Tropojë, Kukës, Pukë, Shkodër dhe Dibër rezultojnë të bllokuara, pasi trashësia e borës në disa zona i kalon 1 metër, ndërsa në ato më të thella i kalon 2 metra. Ndërsa temperaturat minimale kanë rënë minimalisht 15 gradë nën zero. Mësimi në të gjitha zonat problematike është i pezulluar. Kreu i Komunës Fierzë kërkon shpalljen e emergjencës, pasi sipas tij nuk dihet asgjë lidhur me fatin e disa familjeve në Lakun e Dardhave, ndërsa 26 familje të varfra kanë mbetur pa ushqime. Pa ushqime edhe 40 familje në komunën e Blerimit. Në aksin Bajram Curri-Qafë Morinë ka pasur edhe rënie orteqesh. Në Dibër, temperaturat deri në -20 gradë celsius. Të gjitha komunat të bllokuara. Mungon energjia në disa komuna të qarkut. Në pjesën më të madhe të fshatrave banorët ankohen se rezervat ushqimore janë drejt përfundimit, ndërsa në disa fshatra trashësia e borës arrin mbi 2 metra. Në Shkodër, probleme nga ngricat dhe akulli për qarkullimin e automjeteve dhe këmbësorëve brenda qytetit. Të bllokuara zonat e Dukagjinit dhe Vermoshi, trashësia e dëborës një metër e gjysëm.
Vasili flet për gatishmëri të Shëndetësisë
Ministria e Shëndetësisë njoftoi se ka aktivizuar qendrat operacionale për menaxhinin e fatkeqësive në zonat e bllokuara nga bora. Mësohet se grupi i ngritur është nën drejtimin e ministrit Petrit Vasili. Ministri Vasili u shpreh se “Në zonat e bllokuara është vënë në gatishmëri sistemi shëndetësor. Do të shpërndahen paketa medikamentoze për çdo rast nevoje”, tha ai. Vasili shtoi më tej, se vetë ai ka një komunikim me të gjitha strukturat në zonat e bllokuara, për çdo emergjencë që mund të dalë.
Ja problemet në akset rrugore
Situata në akset rrugore në shkallë vendi, nga informacionet më të fundit të marra nga shërbimet e Policisë Rrugore, rezulton:
Në qarkun Kukës:
1. aksi rrugor Morinë – Kalimash, i kalueshëm me zinxhirë me vështirësi
2. aksi Kukës – Krumë i kalueshëm me zinxhirë
3. aksi B.Curri – Qafë Morinë i pakalueshëm
4. aksi B.Curri – Fierzë i pakalueshëm
5. aksi B.Curri – Valbonë i pakalueshëm
6. aksi Krumë – B. Curri i pakalueshëm
7. aksi Krumë – Qaf Prushi i kalueshëm me zinxhirë
8. aksi Kukës – Topojan i pakalueshëm
9. aksi Ujmisht – Lusen – Bushtricë – Kala e Dodës në drejtim të Peshkopisë, i pakalueshëm me zinxhirë
10. aksi Shëmri – Kukës, i kalueshëm me zinxhirë
11. aksi rrugor Topojan – Shishtavec i pakalueshëm
Po punohet për pastrimin e rrugës dhe hedhjen e kripës, në të gjitha akset nacionale në këtë qark. Temperaturat vazhdojnë të jenë më të ulëta se dje dhe reshjet e dëborës me më intensitet në Has dhe Tropojë dhe me erë të fortë. Po punohet në vazhdimësi me entin pronar të rrugëve për normalizimin e gjendjes së rrugëve në të gjitha akset rrugore.
Në qarkun Dibër:
1. aksi rrugor Peshkopi – Bulqizë – Klos i kalueshëm me zinxhirë
2. aksi rrugor Klos – Burrel – Ulëz i kalueshëm pa zinxhirë
3. aksi Bulqizë – Shupenzë – Ostren i pakalueshëm
4. aksi Krastë – Bulqizë i kalueshëm me zinxhirë me vështirësi
5. aksi rrugor Peshkopi – Sllovë – Kala e Dodës në drejtim të Kukësit, i pakalueshëm
6. aksi Peshkopi – Muhurr – Aras i pakalueshëm
7. aksi Arras – Zall Dardhë – Reç i pakalueshëm
8. aksi Stëblevë – Librazhd i pakalueshëm
9. aksi Arras – Lurë i pakalueshëm
Temperaturat vazhdojnë të jenë më të ulëta se dje dhe reshjet e dëborës me më pak intensitet dhe në zonat e thella, por ka një erë të fortë, po punohet në vazhdimësi me entin pronar të rrugëve për normalizimin e gjendjes së rrugëve në të gjitha akset rrugore.
Në qarkun Shkodër:
1. aksi rrugor Shkodër – Mabe i kalueshëm, por ka ngrica
2. aksi rrugor Shkodër – Koman i kalueshëm pa zinxhirë, por ka ngrica
3. aksi Qaf Çelë – Pukë, i kalueshëm me zinxhirë
4. aksi Puke – Fushë Arrës – Qafë Mali- Qafë Shllak i pakalueshëm
5. aksi Fushë Arrës – Gjegjan – Shpal, i kalueshëm me zinxhirë
6. aksi Koplik – Hani i Hotit, i kalueshëm por ka ngrica
7. akset Koplik – Razëm, i kalueshëm me zinxhirë
8. aksi Bogë – Theth, Selcë – Vermosh, të pakalueshme, po punohet për pastrimin e tyre
9. akset në drejtim te Dukagjinit, të pakalueshme
10. aksi Qafë Mali – Dardhë – Fierzë, i pakalueshëm
11. aksi Fushë Arrës – Iballë, i pakalueshëm
Në qarkun Lezhë:
1. aksi Rubik – Kalimash, i kalueshëm pa zinxhirë me vështirësi
2. aksi rrugor Mirditë – Shpal – Fushë Arrës, i kalueshëm me zinxhirë
3. në zonat e thella të Mirditës në drejtim të Lurës, akset rrugore janë të pakalueshme
Në qarkun Tiranë:
1. në drejtim të Qafë Krrabës, i kalueshëm pa zinxhirë
2. në drejtim të Dajtit, i kalueshëm me zinxhirë
Në qarkun Elbasan:
1. aksi Librazhd – Qafë Thanë, i kalueshëm pa zinxhirë
2. aksi Elbasan – Qafë Krrabë, i kalueshëm
3. aksi Librazhd – Bulqizë i bllokuar, po punohet për pastrimin e këtij aksi
Në të gjitha akset e tjera rrugore lëvizja është normale.
Në qarkun Korçë:
1. aksi rrugor Kapshticë –Korçë, i kalueshëm me zinxhirë
2. aksi Korçë – Qafë Thanë, i kalueshëm pa zinxhirë
3. aksi rrugor Boboshticë – Dardhë dhe aksi rrugor Korçë – Voskopojë, të kalueshme me zinxhirë
4. aksi Korçë – Ersekë – Leskovik kalohet me zinxhirë
Në qarkun Berat:
1. aksi Bogovë – Skrapar kalohet pa zinxhirë, po punohet në vazhdimësi me entin pronar të rrugëve për normalizimin e gjendjes
Në qarkun Gjirokastër:
1. aksi Kakavijë – Gjirokastër – Tepelenë kalohet pa zinxhirë
2. aksi Tepelenë – Përmet është i kalueshëm pa zinxhirë
3. aksi Përmet – Çarshovë është i kalueshëm me zinxhirë
4. aksi Jorgucat – Qafa e Muzinës, i kalueshëm pa zinxhirë
Në qarkun Vlorë:
1. Në segmentin rrugor Vlorë – Llogora, lëvizja e automjeteve kryhet pa zinxhirë dhe po punohet në vazhdimësi me entin pronar të rrugëve për normalizimin e gjendjes.
1 komente në “Moti i keq dhe errësira izolojnë veriun, Nishani paralajmëron më keq”
Lini një Përgjigje
Lini një Përgjigje
Më të lexuarat
24 oret e fundit
Javen e fundit
Blog Tema
Nishani te tregoje ku i ka traktoret e pastrimit te rrugeve, diku ne lajmet lexova qe mjetet e pastrimit te rrugeve nuk punojne sepse u mungon lenda djegese. Cfare masa preventive ka marre Nishani qe te mos ndodhin fatkeqesi per arsye te bores dhe te ftohtit, dhe per furnizimin e njerezve me ushqim?