Kroacia zë vendin e Serbisë në tregun kosovar

Një muaj pasi Kosova ka ndërprerë importet nga Serbia, ka nisur beteja për marrjen e tregut kosovar që mbulohej nga produktet serbe, shkruan të enjten gazeta “Blic”, duke paralajmëruar edhe se vizita e kryeministres së Kroacisë, Jadranka Kosor, në Kosovë, ka të bëjë edhe me këtë qëllim.

Sipas kësaj gazete, Oda Ekonomike e Kroacisë tashmë me të madhe harton listën e biznesmenëve që janë të interesuar për të ardhur bashkë me shefen e qeverisë në Kosovë, ndërsa shton se nga mediat kroate mësohet se më të interesuarit janë përfaqësuesit e industrisë kroate të ushqimit dhe të plastikës.

Biznesmenët nga Serbia, në anën tjetër, nuk shprehen të befasuar me këtë ngarendje për të marrë pjesën e tregut kosovar që mbulohej nga Serbia, meqë bëhet fjalë për një treg që nuk është aspak i parëndësishëm.

“Ka një zbrazëti, pjesë e tregut që vlen rreth 400 milionë dollarë që tani duhet të plotësohet. Konkurrenti kryesor i deritanishëm, Serbia, është hequr, ndërsa kërkesat e tregut janë emergjente. Ky është rasti që do të përpiqen ta shfrytëzojnë të gjithë”, thotë për “Blic” Zoran Bojoviqi nga Oda Ekonomike e Serbisë.

Ai pret që në periudhën e ardhshme në Kosovë të udhëtojnë edhe delegacionet ekonomike të vendeve tjera të rajonit dhe që lufta për pjesën e tregut kosovar që mbulohej nga Serbia të jetë jo edhe aq e thjeshtë.

Ndërkohë, “Blic” shkruan edhe se kompanitë serbe nga industria e ushqimit që kanë shitur shumë prej produkteve të tyre në Kosovë tani janë në “pat pozicion” dhe zhvillimi i tanishëm i ngjarjeve nuk po u pëlqen aspak.

“Të gjithë po e shfrytëzojnë fatkeqësinë serbe dhe si qëndrojnë punët tani gjasat janë të mëdha që kompanitë nga vendet e rajonit ta marrin plotësisht tregun e Kosovës. Nëse merren vesh, malli kroat do të gjendet nëpër shitoret atje brenda 24 orëve, kaq kohë do t’u duhet të na zëvendësojnë”, tha për “Blic” Rodolub Drashkoviqi, drejtor i “Swisslion”, një prej kompanive serbe me plasmanin më të madh të produkteve të veta në Kosovë.

Sipas gazetës, kompanitë serbe tashmë kanë shënuar humbje serioze për shkak të masave të reciprocitetit dhe ato shpresojnë që Qeveria e Serbisë do t’i dëmshpërblejë.

“Kemi humbur treg serioz, dhe hyrje devizore prej rreth 20 milionë eurosh. Dhe ky nuk është problemi i vetëm, sepse ‘Swisslion’ ka borxhe nga Kosova në shumë prej rreh 4 milionë eurosh. Vërtetë nuk e dimë se si do t’i inkasojmë ato, nëse vazhdohet kështu”, tha Drashkoviqi.

Kompania “Bambi” nga Banati thuhet se pas masave të reciprocitetit humb rreth 200,000 euro në muaj, për të cilat drejtori i kësaj ndërmarrjeje, Miroslav Miletiqi, thotë se nuk është e mundur të kompensohen në ndonjë treg tjetër – së paku jo në afat të shkurtër.

“Këtu asgjë nuk është kontestuese, tashmë e kemi parë dhe kemi kaluar nëpër këtë gjë. Produktet kroate tashmë janë të pranishme në tregun kosovar, por tani është hapur edhe më shumë ajo hapësirë e zbrazët ku ata mund të hyjnë”, tha Miletiq.

Për dallim nga “Bambi”, “Blic shkruan se kompania “Imlek” ka një vit e gjysmë që ka ndërprerë dërgimin e mallit në Kosovë, për shkak të vulave. Qeveria e Kosovës ka kërkuar që në paketimet e produkteve të “Imlekut” ku shkruan se kush është importues për Kosovë të jetë e shënuar Republika e Kosovës, ndërsa Qeveria e Serbisë e ka refuzuar këtë, që ishte arsye për ndërprerjen e eksportit të produkteve të ndërmarrjes në Kosovë.

Kryeministrja e Kroacisë, Jadranka Kosor, do të vizitojë Kosovën më 24 gusht. Në Prishtinë ajo do të hapë forumin ekonomik kroato-kosovar, do të vizitojë komunitetin kroat në Janjevë, ndërsa do të ketë edhe takime me zyrtarët më të lartë të Kosovës dhe do të vizitojë kontingjentin kroat në kuadër të KFOR-it./kd/

NATO: “Vuçko”, gjakpirësi i Bosnjës dhe i Kosovës

12:27 Rajoni

Bogdanoviç: Prishtina po organizon “eksodin e serbëve”

16:13 Rajoni

Benini njeh pavarësinë e Kosovës

10:37 Rajoni

Merkeli do të urojë Kroacinë për pavarësinë dhe do të flasë në Serbi për Kosovën

18:59 Rajoni

Kosova 2.5 tonelata ar në Serbi

14:12 Rajoni

Xhamia e pa-arritshme zemëron muslimanët e Prishtinës

12:12 Rajoni 1 koment

Guinea dhe Nigeri njohin Kosovën

15:50 Rajoni

Shtetasi kosovar vret gruan dhe punonjësen sociale në Zvicër

12:07 Rajoni

Rigjykimi i Haradinajt këtë javë

13:03 Rajoni

Akademikët maqedonas: Qeveria të parandalojë lindjet e larta tek shqiptarët

14:14 Rajoni